Kon Paalin Kita Ginabuligan ni Jehova nga Makatiis

1. Ham-an kinahang-ean naton nga magtiis, ag sin-o ro makabulig katon? (1 Pedro 5:10, NWT)

SA RAYANG katapusan nga mga inadlaw, makaeksperyinsya kita it iba-ibang mga problema, ngani kinahang-ean naton nga magtiis. Ro iba hay mabuhay eon nga nagaantus it andang masakit. Ro iba mat-a hay namatayan it andang pinalangga. Ro iba pa gid hay ginahingabot it andang pamilya o it mga opisyal it gubyerno. (Mat. 10:18, 36, 37) Pero, maskin alin man nga kalisdanan ro imong ginaatubang, makasalig ka nga buligan ka ni Jehova nga makatiis.​—Basaha ro 1 Pedro 5:10, NWT.

2. Bilang mga Cristyano, siin naghalin ro atong ikasarang nga makatiis?

² Ro pagtiis hay ro ikasarang nga makapadayon nga owa nadueaan it pag-eaum maskin may mga problema, paghingabot, kalisdanan, o tentasyon. Bilang mga Cristyano, ro atong ikasarang nga makatiis hay buko’t halin sa atong sariling kusog, kundi naghalin ra kay Jehova, ro isaea nga nagatao katon it “gahom nga eabaw sa tanan.” (2 Cor. 4:7, Ro Bag-o nga Kasugtanan, TAP) Sa rayang artikulo, pagatalakayon naton ro ap-at nga bulig nga ginatao katon ni Jehova para buligan kita nga makatiis. Talakayon man naton kon ano ro atong obrahon para makabenepisyo kara.

RO PANGAMUYO

3. Ham-an daeayawon gid nga makapangamuyo kita kay Jehova?

³ Nag-obra si Jehova it daeayawon nga paagi para buligan kita nga makatiis. Ginpaposible na nga makaistorya naton imaw maskin pa makasasaea kita. (Heb. 4:16) Isipa ra: Makapangamuyo kita kay Jehova maskin anong oras ag maskin parti sa alin mang bagay. Ginapamatian na kita ano man ro atong linggwahe ag maskin siin man kita, nagaisaeahanon man kita o napriso. (Jon. 2:1, 2; Binu. 16:25, 26) Kon nabaeaka gid kita ag indi naton masayran kon ano ro ihambae, maintindihan gihapon kita ni Jehova. (Roma 8:26, 27) Daeayawon gid nga makapangamuyo kita kay Jehova!

4. Ham-an makasalig kita nga buligan kita ni Jehova nga makatiis kon magpangamuyo kita kana?

⁴ Sa Biblia, ginapasalig kita ni Jehova nga “nagapamati imaw katon, kon magpangayo kita it bisan ano nga butang nga suno sa anang kabubot-on.” (1 Juan 5:14) Makapangayo baea kita it bulig kay Jehova nga makatiis? Huo, dahil suno ra sa anang kabubut-on. Ham-an makahambae kita kara? Kon ginatiis naton ro mga kalisdanan, masabat ni Jehova si Satanas nga nagaintrimis kana. (Hulu. 27:11) Euwas karon, ginasugid it Biblia nga gusto ni Jehova nga “ipakita ro anang kusog sa mga tawo nga bilog ro tagipusuon para kana.” (2 Cron. 16:9) Ngani makasigurado kita nga may gahum si Jehova para buligan kita nga makatiis ag gusto na gid nga obrahon ra.​—Isa. 30:18; 41:10; Luc. 11:13.

5. Paalin ro pangamuyo makatao katon it katawhay sa isip? (Isaias 26:3)

⁵ Ginahambae it Biblia nga kon ipangamuyo naton kay Jehova ro atong mga ginakabaeak-an, magatao imaw it “katawhayan nga indi matungkad ku isip it tawo . . . nga nagaprotektar sa [atong] tagipusuon ag isip.” (Fil. 4:7, Ro Bag-o nga Kasugtanan, TAP) Nagapasaeamat gid kita kara. Ro mga owa nagaalagad kay Jehova hay may mga problema man, ag ginatestingan nanda ro iba-ibang paagi para mangin matawhay ro andang isip. Halimbawa, ginatinguhaan it iba nga mangin blangko ro andang isip para mabatyagan ro katawhay. Pero ro pag-obra kara hay delikado gid para sa atong espiritwalidad. (Ikumpara ro Mateo 12:43-45.) Ag maskin pa makabatyag sanda it katawhay sa rayang mga paagi, indi gid nanda mabaton ro pinakamayad ag matuod nga katawhay nga si Jehova eang ro makatao. Ngani kon nagapangamuyo kita kay Jehova, ginapakita naton nga nagasalig kita kana ag itao na katon ro “dayon nga katawhay.” (Basaha ro Isaias 26:3.) Ro sangka paagi nga ginatao na ra hay paagi sa pagbulig katon nga madumdoman ro mga teksto sa Biblia nga makapaumpaw katon. Ruyong mga teksto hay magapadumdom katon nga palangga na kita ag gusto na gid kita nga buligan. Ngani, makabatyag kita it katawhay.​—Sal. 62:1, 2.

6. Ano ing pwedeng obrahon para makabenepisyo it mayad sa pangamuyo? (Tan-awa man ro piktyur.)

⁶ Pwede mong obrahon. Kon may problema ka, isugid kay Jehova ing ginabatyag. “Ihaboy ing paeas-anon” kana ag mangamuyo nga taw-an ka nana it katawhay. (Sal. 55:22) Mangamuyo man nga taw-an ka it kaaeam para masayran mo kon ano ing dapat obrahon sa ing sitwasyon. (Hulu. 2:10, 11) Ag indi man pagkalipati nga magpasaeamat kay Jehova sa imong mga pangamuyo. (Fil. 4:6) Isipa kon paalin ka ginabuligan ni Jehova nga makatiis kada adlaw, ag pasaeamati imaw sa anang bulig pati man sa mayad nga mga bagay nga gintao na kimo. Indi pagpasugti ro mga kalisdanan nga mangin rason para indi mo makita ro mga pagpakamayad nga nabaton mo eon.​—Sal. 16:5, 6.

RO BISAEA IT DYOS

7. Paalin ro pagtuon sa Biblia makabulig katon nga makatiis?

⁷ Gintao katon ni Jehova ro anang Bisaea, ro Biblia, para buligan kita nga makatiis. Mabasa naton iya ro mga teksto nga nagapasalig katon nga buligan kita ni Jehova. Halimbawa, ro Mateo 6:8 hay nagahambae: “Ro inyong Ama nakasayod eon ku inyong kinahang-ean samtang owa pa kamo makapangamuyo.” Si Jesus mismo kara ro naghambae, ag owa eon it iba nga mas nakakilaea kay Jehova kaysa kana. Ngani, makasigurado gid kita nga sayod ni Jehova ro atong kinahang-ean ag buligan na gid kita kon nagaatubang it mga kalisdanan. Mabasa sa Biblia ro mga promisa ni Jehova nga makatao katon it kusog nga makatiis.​—Sal. 94:19.

8. (a) Magtao it halimbawa it eaygay sa Biblia nga makabulig katon nga makatiis. (b) Ano ro makabulig katon nga madumdoman ro mga eaygay nga kinahang-ean naton?

⁸ Nagatao ro Biblia it mga eaygay nga makabulig katon nga matiis ro mga kalisdanan. Rayang mga eaygay hay makatao katon it kaaeam nga makabulig katon para makaobra kita it mayad nga mga desisyon. (Hulu. 2:6, 7) Halimbawa, ginapalig-on kita it Biblia nga isipon eang anay ro mga bagay para sa rayang adlaw imbes nga magkabaeaka sa kon ano ro posibleng matabo sa masunod nga mga adlaw. (Mat. 6:34) Kon regular kita nga nagabasa it Biblia ag ginapamaeandungan ra, mas madali naton nga madumdoman ro mga eaygay sa Biblia nga makabulig katon nga makaobra it mayad nga desisyon ag matiis ro mga kalisdanan.

9. Paalin ro istorya it mga alagad ni Jehova sa Biblia makabulig katon nga mangin kumbinsido sa Anang bulig?

⁹ Mabasa man naton sa Biblia ro istorya it mga tawo nga nagsalig kay Jehova ag nakabaton it Anang bulig. (Heb. 11:32-34; Sant. 5:17) Kon pamaeandungan naton ra, mangin kumbinsido kita nga si Jehova “ro atong paeanaguan ag kusog, handa gid imaw magbulig sa panahon it kalisdanan.” (Sal. 46:1) Ag kon isipon naton ro katutom it mga alagad ni Jehova kato, mapahueag kita nga tuearon ro andang pagtuo ag ro andang pagtiis.​—Sant. 5:10, 11.

10. Ano ing pwedeng obrahon para makabenepisyo it mayad sa Biblia?

¹⁰ Pwede mong obrahon. Basaha ro Biblia adlaw-adlaw, ag ilista ro espisipiko nga mga teksto nga nakabulig kimo. Nakita man it iba nga manami magbasa it daily text sa agahon agud may mapamaeandungan sanda sa bilog nga adlaw. Raya ro nakabulig sa sister nga si Mariea sa panahon nga gindipara na ro anang mga ginikanan nga may cancer ag maeapit lang mamatay. Ginhambae na: “Kada agahon, ginabasa ko ro teksto sa Pag-usisa sa Kasulatan Adlaw-adlaw ag ginapamaeandungan ra. Nakabulig ra kakon kada adlaw nga isipon ro parti kay Jehova ag ro manami nga mga bagay nga anang ginaturo katon sa anang Bisaea kaysa magpukos sa ang mga problema.”​—Sal. 61:2.

RO ATONG MGA ISIGKA-TUMOEUO

11. Ham-an makapaumpaw masayran nga owa kita nagaisaeahanon kon nagatiis kita it mga kalisdanan?

¹¹ Gintaw-an kita ni Jehova it mga igmanghod sa bilog nga kalibutan para buligan kita nga makatiis. Makapaumpaw masayran nga owa kita nagaisaeahanon kon nagatiis kita it mga kalisdanan dahil “ro [atong] mga isigka-tumoeuo sa bilog nga kalibutan nagaantus it makaruyon man nga mga pag-antus.” (1 Ped. 5:9) Nagakahueogan ra nga may mga igmanghod kita nga nagaeksperyinsya it pareho man sa atong mga problema ag nakapabilin sanda nga matutom kay Jehova. Ngani sigurado gid nga makatiis man kita!—Binu. 14:22.

12. Paalin kita mabuligan it mga igmanghod, ag paalin man naton sanda mabuligan? (2 Corinto 1:3, 4)

¹² Mabuligan kita it mga igmanghod nga makatiis paagi sa andang mga ginahambae ag ginaobra. Naeksperyinsyahan ra ni apostol Pablo. Sa anang sueat, pirme nang ginapasaeamatan ag ginasambit ro pangaean it mga igmanghod nga nagbulig kana kat napriso imaw. Nagtao sanda it paumpaw, pagpalig-on, ag praktikal nga bulig kay Pablo. (Fil. 2:25, 29, 30; Col. 4:10, 11) Nagatao man katon ro atong mga igmanghod it paumpaw ag bulig para matiis naton ro mga kalisdanan makaron. Ag nagabulig man kita kon sanda man ro magkinahang-ean.​—Basaha ro 2 Corinto 1:3, 4.

13. Ano ro nakabulig sa sister nga si Maya nga makatiis?

¹³ Ku 2020, ginsueod it mga pulis sa Russia ro baeay it sister nga si Maya ag gin-ukay ro andang mga gamit. Rayon, kinahang-ean nang apinan ro anang mga pagpati sa korte. Ginsugid ni Maya nga nakapalig-on gid kana ro mga igmanghod sa ratong malisud nga panahon. Naghambae imaw: “Sa ruyong panahon, grabi gid ang kabaeaka ag kasubo, pero gintawagan ako ag ginsueatan it mga igmanghod. Ginpabatyag gid nanda kang kon mauno nanda ako palangga. Sayod ko nga palangga ako it mga igmanghod ag pamilya ko sanda. Pero dahil sa andang gin-obra, mas nangin kumbinsido ako kara.”

14. Ano ing pwedeng obrahon para makabenepisyo it mayad sa bulig it mga igmanghod? (Tan-awa man ro piktyur.)

¹⁴ Pwede mong obrahon. Kon nagaeksperyinsya ka it kalisdanan, mangin maeapit sa mga igmanghod. Indi magdaywang-isip nga magpangayo it bulig sa mga elder. Sanda ro atong “salipdanan sa hangin” ag “daeangpan sa bagyo.” (Isa. 32:2, ftn.) Dumdoma nga ro atong mga igmanghod hay nagatiis man it mga kalisdanan. Ngani kon nagaobra ka it mayad sa iba, makabulig ra kimo nga mangin balanse ag mangin positibo habang nagatiis sa ing kalisdanan.​—Binu. 20:35.

RO ATONG PAG-EAUM

15. Paalin ro pag-eaum nakabulig kay Jesus, ag paalin man ra makabulig katon? (Hebreo 12:2)

¹⁵ Gintaw-an kita ni Jehova it masaligan nga pag-eaum nga makabulig katon nga makatiis. (Roma 15:13) Dumdoma kon paalin ra nakabulig kay Jesus nga matiis ro pinakamalisud nga natabo sa anang kabuhi iya sa eugta. (Basaha ro Hebreo 12:2.) Sayod ni Jesus nga ro anang katutom hay makabulig para mabendikar ro pangaean ni Jehova. Nagaeaum man imaw nga makaibahan it uman ro anang Ama sa eangit pati man ro panahon nga makaibahan na ro 144,000 nga mga pinili nga maggahum sa Ginharian sa eangit. Pareho man karon, ro atong pag-eaum nga mabuhi sa owa’t katapusan sa bag-ong kalibutan it Dyos hay makabulig katon nga matiis ro maskin alin man nga kalisdanan nga atong naeksperyinsyahan sa kalibutan ni Satanas.

16. Paalin ro pag-eaum nakabulig sa sister nga si Alla nga makatiis, ag ano ing matun-an sa anang halimbawa?

¹⁶ Tan-awa kon paalin ro pag-eaum nga mabuhi sa bag-ong kalibutan hay nakabulig sa sister nga si Alla, nga taga-Russia. Gin-aresto ro anang asawa ag ginkulong sa pretrial detention. Kat natabo ra, naghambae si Alla: “Ro pagpangamuyo parti sa atong pag-eaum sa paeaabuton ag ro pagpamaeandong kara hay nakabulig kakon nga indi gid maeuyahan it buot. Sayod ko nga pagkatapos it rayang mga kalisdanan, may manami nga matabo. Pirdihon ni Jehova ro anang mga kaaway ag premyuhan na kita.”

17. Ano ing pwedeng obrahon para mapakita nga nagapasaeamat ka sa pag-eaum nga ginpromisa katon ni Jehova? (Tan-awa man ro piktyur.)

¹⁷ Pwede mong obrahon. Pamaeandungi ro manami nga paeaabuton nga ginpromisa katon ni Jehova. Imadyina ing mangin kabuhi sa bag-ong kalibutan ag ro mga pagpakamayad nga mabaton mo. Ag maskin alin man nga mga kalisdanan ro ing ginaatubang makaron hay “sangkurot ag umaeagi” eang. (2 Cor. 4:17) Obraha man ing bilog nga masarangan nga masugid sa iba ro parti sa mga promisa it Dyos sa paeaabuton. Isipa kon mauno kalisud ro kabuhi it mga tawo nga owa nagaalagad kay Jehova. Abu man ro andang mga problema pero owa sanda kasayod sa manami nga mga bagay nga ginpromisa ni Jehova. Maskin matag-od eang ro inyong pag-istorya, mabuligan mo sanda nga masayran ro parti sa Ginharian ni Jehova ag sa anang mga promisa sa paeaabuton.

18. Ham-an makasalig kita sa mga promisa ni Jehova?

¹⁸ Kat natiis ni Job ro abu nga mga kalisdanan, naghambae imaw kay Jehova: “Sayod ko eon makaron nga kaya mong obrahon ro tanan nga bagay, ag ro tanan nga maisip mong obrahon hay buko’t imposible para kimo.” (Job 42:2) Natun-an ni Job nga owa’t makapugong kay Jehova sa pagtuman sa anang mga promisa. Kon dumdomon naton ra, makatao ra katon it kusog nga makatiis. Halimbawa, isipa ro masakiton nga bayi nga naeuyahan gid it buot dahil maskin abu eon nga doktor ro anang naagtunan, owa gid nanda imaw napamayad. Pero, kat nakakita imaw it mayad nga doktor nga nag-eksplikar kana kon ham-an nagamasakit imaw ag kon paalin na imaw mapamayad, nangin masadya imaw maskin kinahang-ean nang maghueat bago magmayad. Mas maeumo eon kana makaron nga padayon nga magtiis sa anang masakit dahil sayod na nga magamayad imaw. Pareho karon, padayon man kita nga nagatiis dahil sigurado kita nga matuman ro promisa ni Jehova nga Paraiso.

19. Ano ro kinahang-ean natong obrahon para makatiis?

¹⁹ Sa natun-an eon naton, ginabuligan kita ni Jehova nga matiis ro atong mga kalisdanan paagi sa pangamuyo, sa anang Bisaea, sa atong mga isigka-tumoeuo, ag sa atong pag-eaum. Kon obrahon naton ro atong bilog nga masarangan para makabenepisyo sa mga gintao ni Jehova, buligan na kita maskin alin man ro atong naeksperyinsyahan makaron. Makapadayon kita nga makatiis hasta nga maduea eon ro kalibutan ni Satanas ag ro tanan nga pag-antus.​—Fil. 4:13.