Makasigurado Ka nga Palangga Ka ni Jehova

1. Ham-an nagdedikar ka kay Jehova? (Tan-awa man ro piktyur.)

NADUMDOMAN mo pa kat nagdedikar ka kay Jehova? Ruyon ing nangin desisyon dahil nakilaea mo imaw ag palangga mo imaw. Nagpromisa ka kana nga imaw ro imong unahon sa ing kabuhi ag padayon mo imaw nga palanggaon sa ing bilog nga tagipusuon, kaeag, isip, ag kusog. (Mar. 12:30) Umpisa kato, ro imong pagpalangga kana hay mas nagdaeum pa gid. Ngani, paalin kon may magpangutana kimo nga, “Palangga mo gid baea si Jehova?” Ano ing isabat? Sigurado gid nga masabat ka nga, “Huo, palangga ko gid imaw eabaw pa sa maskin sin-o ag sa maskin alin nga bagay!”

2-3. Ano ro gusto ni Jehova nga patihan naton, ag ano ro atong pagatalakayon sa rayang artikulo? (Jeremias 31:3)

² Ano ing isabat kon may magpangutana kimo nga, “Sigurado ka nga palangga ka gid ni Jehova?” Magadaywang-isip ka baea sa pagsabat dahil basi ginaisip mo nga owa ka nagakadapat sa pagpalangga ni Jehova? Ro sangka sister nga owa nakabatyag it pagpalangga sa anang tatay halin kat unga pa imaw hay naghambae: “Palangga ko si Jehova sa ang bilog nga tagipusuon. Sigurado gid ako kara. Pero bukon ako’t sigurado kon palangga na man ako.” Ngani ano ro makabulig kimo nga magpati nga palangga ka ni Jehova?

³ Gusto ni Jehova nga magpati ka nga palangga ka nana. (Basaha ro Jeremias 31:3.) Ro matuod, ginpapaeapit ka ni Jehova kana. Ag kat nagdedikar ka ag nagpabautismo, gintaw-an ka nana it espesyal gid nga regalo—ro anang mainunongon nga pagpalangga. Nagakahueogan ra nga palangga ka gid nana ag indi ka gid nana pag-aywanan. Dahil may mainunongon nga pagpalangga si Jehova sa anang matutom nga mga alagad, para kana, sanda hay anang “ginpahaegahan nga pagkabutang.” Ngani, espesyal ka man kana. (Mal. 3:17, ftn.) Gusto ni Jehova nga mabatyagan mo man ro pagpalangga nga nabatyagan ni apostol Pablo. Kumbinsido gid si Pablo kat ginsueat na: “Nasiguro ko gid nga owa it may makapabueag katon sa anang gugma, bisan pa ro kamatayon ukon kabuhi, bisan pa ro mga anghel ukon ro eangitnon nga mga pamunoan ukon mga gahum. Bisan pa ro mga butang sa makaron ukon sa paeaabuton, ro kalibutan sa ibabaw ukon sa idaeum, owa gid it butang sa tanan nga mga tinuga nga sarang makapabueag katon sa gugma it Dyos.” (Roma 8:38, 39) Sa rayang artikulo, pagatalakayon naton kon paalin kita mangin mas kumbinsido nga palangga kita ni Jehova ag kon ano ro makabulig katon nga maobra ra.

HAM-AN IMPORTANTE NGA MAGPATI NGA PALANGGA KA NI JEHOVA?

4. Ano nga kapurilan ro gustong ipapati katon ni Satanas, ag paalin naton ra masuk-ean?

⁴ Kon nagapati kita nga palangga kita ni Jehova, “makasukoe [kita] sa mga pagdaya” ni Satanas. (Efe. 6:11) Gusto ni Satanas nga magpundo kita sa pag-alagad kay Jehova ag ginaobra na ro tanan para matabo ron. Ro sangka paagi nga ginaobra na ra hay ro pagpapati katon nga bukon kita it palangga ni Jehova, pero bukon ra it matuod. Ginkumpara it Biblia si Satanas sa sangka leon. (1 Ped. 5:8, 9) Ginaatake it mga leon ro mga sapat nga maeuya ag indi makadepensa sa andang sarili. Pareho kara, ginaatake kita ni Satanas kon naeuyahan kita, nagaoy, o nasubuan dahil sa buko’t mayad nga mga bagay nga naeksperyinsyahan naton dati, sa mga problema nga ginaatubang naton makaron, o dahil nabaeaka kita sa mga matabo sa paeaabuton. (Hulu. 24:10) Ginaisip ni Satanas nga kaya na kitang paeuyahon agud magpundo kita sa pag-alagad kay Jehova. Pero ‘masuk-ean naton ro Yawa’ ag ro anang mga pagpangdaya kon obrahon naton ro tanan para mangin kumbinsido nga palangga kita ni Jehova .​—Sant. 4:7.

5. Ham-an kinahang-ean nga mabatyagan naton nga palangga kita ni Jehova ag importante kita kana?

⁵ Kon nagapati kita nga palangga kita ni Jehova, mangin mas maeapit kita kana. Ham-an mahambae naton ra? Gintuga kita ni Jehova nga may ikasarang sa pagpalangga ag makabatyag it pagpalangga. Kon ginapakitaan kita it pagpalangga it iba, napahueag kita nga palanggaon man sanda. Ngani, kon mas nabatyagan naton nga palangga kita ni Jehova ag importante kita kana, mas palanggaon pa gid naton imaw. (1 Juan 4:19) Ag habang nagadaeum ro atong pagpalangga kana, magadaeum man ro anang pagpalangga katon. Ginasugid katon it Biblia: “Magpaeapit kamo sa Dyos, ag ro Dyos magapaeapit kinyo.” (Sant. 4:8) Ano ro pwede natong obrahon para mangin mas kumbinsido nga palangga kita ni Jehova?

ANO RO MAKABULIG KIMO NGA MAGPATI NGA PALANGGA KA NI JEHOVA?

6. Kon bukon ka it sigurado nga palangga ka ni Jehova, ano ing pwedeng obrahon?

⁶ Mangin espisipiko ag padayon nga magpangamuyo. (Luc. 18:1; Roma 12:12) Basi kinahang-ean mo nga magpangamuyo kay Jehova it pilang beses sa sang adlaw para makita kon mauno ka nana kapalangga. Kon amat, basi nagabatyag ka nga owa ka nagakadapat sa pagpalangga ni Jehova, ngani nalisdan ka nga magpati nga palangga ka nana. Pero tandai nga si Jehova hay mas eabaw pa sa ing tagipusuon. (1 Juan 3:19, 20) Nakikita na ing mayad nga mga ugali nga owa mo nakikita sa ing sarili. (1 Sam. 16:7; 2 Cron. 6:30) Ngani isugid kana kon ano gid ing ginabatyag ag pangabaya imaw nga buligan ka nga magpati nga palangga ka nana. (Sal. 62:8) Pagkatapos mong mangamuyo, obraha rayang masunod nga mga suhistyon.

7-8. Paalin ro ginahambae it mga Salmo nagapasalig katon nga palangga kita ni Jehova?

⁷ Patihi kon ano ro ginahambae ni Jehova. Gingiyahan ni Jehova ro mga manogsueat it Biblia, ngani makasalig kita nga matuod ro andang ginhambae parti kana. Tan-awa kon mauno kanami ro ginhambae ni David parti kay Jehova. Ginsueat na: “Maeapit si Jehova sa mga tagipusuon nga nagakalisud; ginaeuwas nana ro mga naeuyahan it buot.” (Sal. 34:18) Kon nasubuan ka, basi mabatyagan mo nga nagaisaeahanon ka eang. Pero nagpromisa si Jehova nga sa ruyong mga panahon, maeapit imaw kimo dahil nakikita na nga mas kinahang-ean mo ro anang bulig. Nagsueat pa si David it sambilog nga salmo: “Tipuna ang mga euha sa ing panit nga sueodlan.” (Sal. 56:8) Nakikita ni Jehova kon masubo ka ag nalisdan. Nagakabaeaka gid imaw kimo ag owa imaw naila nga makita ka nga nagaantus. Kon paalin nga importante sa nagapamanawon nga tawo sa disyerto ro kada tueo it tubi sa anang panit nga sueodlan, makaron man kaimportante kay Jehova ro kada nagatueo nga euha sa ing mga mata ag sayod na ro mga panahon nga nagkasubo ka ag nagtangis. Ro Salmo 139:3 hay nagahambae: “Nasayran mo [Jehova] ro tanan ko nga ginaobra.” Nakikita ni Jehova ro tanan mong ginaobra, pero nagapukos imaw sa mayad nga mga bagay nga imong ginaobra. (Heb. 6:10) Ham-an? Dahil importante kana ing ginaobra nga pagtinguha para mapasadya imaw.a

⁸ Paagi sa ruyong makapaumpaw nga mga teksto sa anang Bisaea, matsa ginahambae ni Jehova nga: “Gusto ko nga masayran mo nga palangga ta gid ag nagakabaeaka ako kimo.” Pero sa natun-an eon naton, gusto kitang papatihon ni Satanas nga bukon kita it palangga ni Jehova. Ngani kon may mga panahon nga nagaduda ka kon palangga ka ni Jehova, isipa kon sin-o ing patihan, si Satanas baea nga “ama it tanan nga kapurilan” o si Jehova nga “Dyos it kamatuoran”?​—Juan 8:44; Sal. 31:5.

9. Ano ro promisa ni Jehova sa mga nagapalangga kana? (Exodo 20:5, 6)

⁹ Isipa kon ano ro ginabatyag ni Jehova sa mga nagapalangga kana. Tan-awon ta ro ginhambae ni Jehova kay Moises ag sa mga Israelinhon. (Basaha ro Exodo 20:5, 6.) Nagpromisa si Jehova nga padayon nang ipakita ro anang mainunongon nga pagpalangga sa mga nagapalangga kana. Dahil mainunongon si Jehova, makasalig kita nga indi na pagbalewalaon ro mga nagapalangga kana. (Neh. 1:5) Ngani kon maisip mo nga bukon ka it palangga ni Jehova, tandai nga palangga mo imaw. Isipa ra: Kon palangga mo si Jehova ag ginaobra ing bilog nga masarangan para mapasadya imaw, makasalig ka nga palangga ka gid nana. (Dan. 9:4; 1 Cor. 8:3) Buot hambaeon, kon sigurado ka nga palangga mo si Jehova, indi ka eon magduda sa anang pagpalangga kimo. Makasigurado ka gid nga palangga ka nana ag indi ka gid nana pag-aywanan.

10-11. Ham-an gusto ni Jehova nga dumdomon mo ro pangtubos? (Galacia 2:20)

¹⁰ Pamaeandungi ro pangtubos. Ro pinakamanami nga regalo ni Jehova sa mga tawo hay ro haead nga pangtubos ni Jesu-Cristo. (Juan 3:16) Pero para kimo man baea rayang regalo? Huo! Isipa ro halimbawa ni apostol Pablo. Nakaobra imaw it seryosong mga saea bago imaw nangin Cristyano ag kinahang-ean na nga padayon nga suk-ean ro anang mga kaeuyahon. (Roma 7:24, 25; 1 Tim. 1:12-14) Pero, nagapati imaw nga personal kana nga regalo ni Jehova ro pangtubos. (Basaha ro Galacia 2:20.) Dumdoma nga gingiyahan ni Jehova si Pablo nga isueat ra sa Biblia. Ngani gusto ni Jehova nga makatuon kita kara. (Roma 15:4) Gusto na man nga patihan mo nga ro pangtubos ni Jesus hay regalo na para kimo. Kon dumdomon mo kon mauno kanami rayang regalo ag si Jehova ro nagtao kara kimo, mangin mas kumbinsido ka nga palangga ka gid ni Jehova.

¹¹ Nagapasaeamat gid kita kay Jehova dahil ginpadaea na si Jesus iya sa eugta agud mamatay para katon. Pero ro sambilog pa nga rason kon ham-an nag-agto iya si Jesus sa eugta hay para isugid ro kamatuoran parti sa Dyos. (Juan 18:37) Naeakip kara kon mauno kita kapalangga ni Jehova.

PAALIN KITA GINABULIGAN NI JESUS NGA MAGPATI NGA PALANGGA KITA NI JEHOVA?

12. Ham-an mapatihan naton ro mga ginhambae ni Jesus parti kay Jehova?

¹² Kat iya si Jesus sa eugta, ginsugid na kon ano ro mga ugali ni Jehova. (Luc. 10:22) Ham-an mapatihan naton ro mga ginhambae ni Jesus parti kay Jehova? Dahil nagkabuhi si Jesus sa eangit kaibahan ni Jehova sa sueod it binilyon nga mga dinag-on bago pa imaw mag-agto sa eugta. (Col. 1:15) Naeksperyinsyahan mismo ni Jesus kon mauno imaw kapalangga ni Jehova ag nakita na man kon mauno kapalangga ni Jehova ro matutom nga mga anghel ag mga tawo. Paalin ginbuligan ni Jesus ro mga tawo nga patihan nga palangga sanda ni Jehova?

13. Ano ro gustong ituro katon ni Jesus parti kay Jehova?

¹³ Gusto ni Jesus nga masayran naton kon ano ro ginabatyag ni Jehova parti katon. Sa mga Ebanghelyo, gintawag ni Jesus si Jehova bilang “Ama” it sobra sa 160 nga beses. Ag kon nagaistorya imaw sa anang mga sumoeunod, ginagamit na ro mga termino nga “inyong Ama” o “inyong Ama sa eangit.” (Mat. 5:16; 6:26) Bago nag-agto si Jesus iya sa eugta, gintawag it matutom nga mga alagad ni Jehova kato si Jehova bilang ‘Eabing Gamhanan,’ ‘Eabing Mataas,’ ‘Mabahoe nga Manogtuga,’ ag it iba pang mga titulo nga pareho kara. Pero ginatawag pirme ni Jesus si Jehova nga atong ‘Ama.’ Ruyong termino hay nagapakita nga gusto ni Jehova nga mangin maeapit ro anang mga alagad kana pareho it unga nga maeapit sa anang mapinalanggaon nga ama. Ngani, ginturo katon ni Jesus nga palangga kita ni Jehova pareho it sangka mabuot nga Ama nga palangga gid ro Anang mga unga. Talakayon ta ro daywang halimbawa nga gingamit ni Jesus ro termino nga “Ama.”

14. Paalin ginpakita ni Jesus nga ro kada isaea katon hay importante sa atong Ama nga si Jehova? (Mateo 10:29-31) (Tan-awa man ro piktyur.)

¹⁴ Una, tan-awon ta ro ginhambae ni Jesus sa Mateo 10:29-31. (Basaha.) Ro mga maya hay maisot nga mga pispis nga indi makapalangga o makasimba kay Jehova. Pero, importante sa atong Ama ro kada maya dahil owa it sambilog kanda ro nahueog sa eugta nga owa na nasayran. Ngani kon importante kay Jehova ruyong maisot nga pispis, makasalig kita nga mas importante kita kana ag nagakabaeaka gid imaw sa kada isaea katon dahil palangga naton imaw ag nagasimba kita kana. Ginhambae man ni Jesus nga huyap it atong Ama ro tanan nga buhok sa atong ueo. Dahil sayod ni Jehova ro maskin maisot nga mga detalye parti katon, makasigurado kita nga interesado gid imaw katon. Ngani gusto gid ni Jesus nga patihan naton nga ro kada isaea katon hay importante sa atong Ama nga si Jehova.

15. Ano ro gustong ituro kimo ni Jesus sa Juan 6:44 parti sa imong Ama sa eangit?

¹⁵ Tan-awon ta ro pangaywang halimbawa nga gingamit ni Jesus ro termino nga “Ama.” (Basaha ro Juan 6:44.) Ginbuligan ka it imong Ama sa eangit nga makilaea imaw ag mangin maeapit kana. Ham-an gin-obra na ra? Dahil nakita na ing mayad nga mga ugali. (Binu. 13:48) Ro ginhambae ni Jesus sa Juan 6:44 hay posibleng nagatukoy sa ginhambae ni Jehova sa Jeremias 31:3. Naghambae si Jehova sa anang katawhan: “Dahil sa akong mainunongon nga pagpalangga, ginpapaeapit ko ikaw kakon [o, padayon ako nga nagpakita it mainunongon nga pagpalangga kimo].” (Jer. 31:3; ftn.; Ikumpara ro Oseas 11:4.) Isipa kon ano ro kahueogan kara. Padayon nga ginatan-aw it atong mapinalanggaon nga Ama sa eangit ing mayad nga mga ugali nga owa mo nakikita sa ing sarili.

16. (a) Ano ro ginturo ni Jesus, ag ham-an dapat mo imaw patihan? (b) Paalin ka mangin mas kumbinsido nga si Jehova ro Ama nga imong kinahang-ean? (Tan-awa ro kahon nga “Ro Ama nga Kinahang-ean Naton Tanan.”)

¹⁶ Ginturo ni Jesus nga si Jehova hay bukon eang it anang Ama kundi imo man nga Ama. Gusto ni Jesus nga mangin kumbinsido ka nga palangga ka ni Jehova ag nagakabaeaka gid imaw kimo. Ngani kon nagaduda ka kon amat nga palangga ka ni Jehova, dumdoma ro ginhambae ni Jesus ag patihi imaw. Dahil pirme nang ginahambae ro kamatuoran ag imaw eang ro mas nakakilaea it mayad sa atong Ama.​—1 Ped. 2:22.

PADAYON NGA MANGIN KUMBINSIDO NGA PALANGGA KA NI JEHOVA

17. Ham-an dapat padayon kita nga mangin kumbinsido nga palangga kita ni Jehova?

¹⁷ Dapat padayon kita nga mangin kumbinsido nga palangga kita ni Jehova. Dumdoma nga ginaobra ni Satanas ro tanan para papunduhon kita sa pag-alagad kay Jehova. Gusto na nga mag-euya kita, ngani padayon na nga ginatinguhaan nga mapapati kita nga bukon kita it palangga ni Jehova. Indi naton dapat pagpatihan ro anang kapurilan!—Job 27:5.

18. Ano ing obrahon agud padayon ka nga mangin kumbinsido nga palangga ka ni Jehova?

¹⁸ Natun-an mo sa rayang artikulo kon ano ing obrahon agud padayon nga mangin kumbinsido nga palangga ka ni Jehova. Mangamuyo kana ag pangabaya imaw nga buligan ka nga makita ro mayad nga mga ugali nga nakikita na kimo. Pamaeandungi ro mga teksto sa Biblia nga nagapakita kon mauno ka nana kapalangga. Tandai nga palangga ni Jehova ro mga nagapalangga kana. Indi man pagkalipati nga personal nga regalo kimo ni Jehova ro pangtubos. Ag patihi ro pasalig ni Jesus nga si Jehova ro imong Ama sa eangit. Rayon kon may magpangutana kimo nga: “Sigurado ka nga palangga ka ni Jehova?” makasabat ka nga may kompyansa: “Huo, palangga na gid ako! Ag obrahon ko ang bilog nga masarangan adlaw-adlaw para ipakita ang pagpalangga kana!”