Buligi Eagi ro mga Interesado sa Mayad nga Balita

1. Ano ro reaksyon it mga tawo sa mayad nga balita? (Binuhatan 13:47, 48; 16:14, 15)

KU UNANG siglo, abung tawo ro nagbaton eagi it kamatuoran kat nabatian nanda ro mensahe it Ginharian. (Basaha ro Binuhatan 13:47, 48; 16:14, 15.) Makaron, abu man ro masadya nga nagbaton it mayad nga balita kat una nanda rang mabatian. Maskin ro mga buko’t interesado ku una hay nagbaton man it kamatuoran ku ulihi. Ngani, ano ro dapat natong obrahon kon makakita kita it interesado nga magtuon parti sa Dyos ag sa Biblia?

2. Ham-an makumpara naton ro atong pagwali nga ueobrahon sa ginaobra it sangka mangunguma?

² Isipa rayang ilustrasyon. Ro atong pagwali nga ueobrahon hay makumpara sa ginaobra it sangka mangunguma. Kon makita it sangka mangunguma nga euto eon ro bunga it pila sa anang mga tanum, anihon na eagi ra. Pero, padayon na gihapon nga bunyagan ag diparahon ro iba nanang mga tanum sa anang taeamnan. Pareho karon, kon makakita kita it interesado sa atong mensahe, gusto eagi naton sandang buligan agud mangin disipulo it Cristo. Ag padayon man natong ginabuligan ro mga bukon pa it interesado nga makita kon ham-an importante nga tun-an nanda ro parti sa Dyos ag sa Biblia. (Juan 4:35, 36) Ngani kon sayod naton kon interesado ro mga tawo o bukon, masayran naton kon paalin sanda buligan. Sa rayang artikulo, talakayon naton kon ano ro atong obrahon sa una nga pag-istorya para mabuligan ro mga interesado sa atong mensahe. Talakayon man naton kon paalin sanda mabuligan nga padayon nga mangin maeapit kay Jehova ag mangin sambilog sa anang mga alagad.

KON PAALIN BULIGAN RO MGA INTERESADO SA MAYAD NGA BALITA

3. Ano ro dapat natong obrahon kon makakita kita it interesado sa atong pagministeryo? (1 Corinto 9:26)

³ Kon makakita kita it interesado sa atong pagministeryo, gusto eagi naton sandang buligan nga makatuon parti kay Jehova ag mangin maeapit kana. Sa ruyong sitwasyon, dapat magsumbil eagi kita it pagtuon sa Biblia ag imbitahan sanda nga mag-attend sa atong mga miting sa una paeang nga pag-istorya.​—Basaha ro 1 Corinto 9:26.

4. Magtao it sangka eksperyinsya parti sa interesado nga gustong magpa-Bible study eagi.

⁴ Magsumbil it pagtuon sa Biblia. Ro pila sa atong maistorya hay gustong magpa-Bible study eagi. Halimbawa, sangka Hwebes, ro sangka bataon nga bayi sa Canada hay nagpaeapit sa cart ag nagbuoe it brosyur nga Mangin Masadya sa Owa it Katapusan! Ginhambae it sister nga naga-cart nga pwede imaw maka-Bible study gamit ruyong brosyur it libre. Nangin interesado ro bataon nga bayi ag gintao na ro anang contact number ag ginbuoe na man ro contact number it sister. Ku ruyong adlaw, gin-text it bataon nga bayi ro sister kon hin-uno sanda pwedeng mag-Bible study. Kat ginhambae it sister nga pwede sandang mag-Bible study it Sabado o Domingo, naghambae imaw: “Pwedeng hin-aga lang? Owa man ako’t ginaobra.” Ngani nag-Bible study eagi sanda it Byernes. Ag naka-attend man imaw sa unang beses sa atong miting ku ruyong domingo ag madasig imaw nga nag-uswag.

5. Ano ro makabulig katon para masayran kon paalin kita makasumbil it Bible study? (Tan-awa man ro piktyur.)

⁵ Indi naton mapaabot nga ro tanan nga nagapamati sa atong mensahe hay pareho sa bataon nga bayi kaina nga gustong magpa-Bible study eagi. Ro pila hay basi nagakinahang-ean pa it panahon. Posibleng kinahang-ean anay natong mag-usoy it topiko nga interesado sanda. Ag kon padayon kita nga mangin positibo ag magpakita kanda it personal nga interes, posibleng sa indi magbuhay, makaumpisa kita kanda it Bible study. Ano ro pwede natong hambaeon kon magsumbil kita it Bible study? Tan-awon ta ro suhistyon it pila nga mga igmanghod nga mayad sa pag-umpisa it Bible study.

6. Ano ro pwede natong hambaeon para padayon nga maistorya ro interesado nga tawo?

⁶ Ro mga publisher ag mga pioneer nga ginpangutana parti sa pag-umpisa it Bible study hay naghambae nga sa pila nga mga lugar, ginalikawan nanda ro mga termino nga “magtuon,” “Bible study,” o “tur-an ka” kon nagasumbil sanda it pagtuon sa Biblia. Ginhambae nanda nga mas mayad nga gamiton ro mga termino pareho it “pag-istorya,” “pagtalakay,” ag “kon paalin mas maintindihan ro Biblia.” Para mapadayon sa sunod ro inyong pag-istorya, pwede mong hambaeon nga “Ginasabat it Biblia ro importanteng mga pangutana sa atong kabuhi” o “Ro Biblia hay bukon eang it libro nga parti sa relihiyon kundi nagatao man ra katon it praktikal nga mga bulig.” Pwede mo pang hambaeon: “Bukon man ra it mabuhay, mga 10 o 15 minutos malang ag matun-an mo eon ro mga bagay nga makabulig sa ing kabuhi.” Indi mo eon kinahang-ean hambaeon ro mga termino nga “iskedyul” o “kada domingo,” nga pwedeng makapabatyag kanda nga obligado gid sanda nga makipag-istorya kimo.

7. Paalin nasayran it iba ro kamatuoran sa Biblia? (1 Corinto 14:23-25)

⁷ Imbitaha sanda sa atong mga miting. Sa panahon nanday apostol Pablo, nasayran it pila ro kamatuoran sa Biblia sa unang beses nandang pag-attend sa Cristyanong miting. (Basaha ro 1 Corinto 14:23-25.) Pareho man ra sa atong panahon makaron. Ro kaeabanan sa mga bag-uhan hay mas madasig nga nagauswag kon naga-attend sanda sa atong mga miting. Ngani hin-uno mo sanda imbitahon? Ro leksyon 10 it libro nga Mangin Masadya sa Owa it Katapusan! hay nagapalig-on kanda nga mag-attend sa atong mga miting, pero indi mo kinahang-ean nga maghueat nga makaabot kamo sa ruyong leksyon agud imbitahon imaw sa atong mga miting. Sa una paeang ninyo nga pag-istorya, pwede mo imaw nga imbitahan sa atong weekend meeting, ag pwede mong sambiton ro titulo it pangpubliko nga diskurso o ro sangka punto sa Pagtuon sa Taean-awan sa ruyong domingo.

8. Ano ro pwede natong isugid sa sangka interesado kon ginaimbitahan naton imaw sa atong mga miting? (Isaias 54:13)

⁸ Kon ginaimbitahan naton ro sangka interesado, isugid kana kon ano ro kinaiba it atong mga miting sa anang nakasanayan nga pagsimba. Kat unang nag-attend ro Bible study sa Pagtuon sa Taean-awan, ginpangutana na ro naga-Bible study kana, “Paalin nasayran ku nagadumaea it pagtuon ro tanan ninyong pangaean?” Ginhambae it sister nga ginatinguhaan naton nga masayran ro pangaean it tanan sa kongregasyon, kon paalin nga sayod naton ro pangaean it kada isaea sa atong pamilya. Ginhambae it Bible study nga sa andang simbahan, haeos bukon sanda tanan it magkakilaea. Pwede man natong isugid ro iba pa gid nga kinaiba it atong mga miting. (Basaha ro Isaias 54:13.) Nagatipon kita para simbahon si Jehova, magtuon parti kana, ag palig-unon ro kada isaea. (Heb. 2:12; 10:24, 25) Ngani ro atong mga miting hay organisado ag praktikal, owa it mga ritwal nga ginaobra. (1 Cor. 14:40) Ro aton man nga mga Kingdom Hall hay simple ag gindisenyo para komportable kita nga makatuon. Ag dahil neutral kita sa politika, owa naton ra iya ginaistoryahan o nagadebate parti kara. Makabulig man sa ing Bible study kon ipatan-aw mo eagi kana ro video nga Ano ro Ginaobra sa Kingdom Hall? agud may ideya imaw kon ano ro atong ginaobra iya.

9-10. Kon ginaimbitahan naton ro sangka interesado sa atong mga miting, ano ro pwede natong ihambae kana agud indi imaw makuebaan nga mag-attend? (Tan-awa man ro piktyur.)

⁹ Nagadaywang-isip ro iba nga mag-attend dahil nakuebaan sanda nga basi piliton naton sanda nga mangin Saksi ni Jehova. Ngani pasaligon naton imaw nga mag-attend eang ag mamati sa miting, ag owa man imaw it kinahang-ean nga obrahon o hambaeon. Pwedeng mag-attend ro anang bilog nga pamilya pati man ro mga unga. Sa atong mga miting, owa ginapaeain ro mga unga sa andang mga ginikanan, kundi magkaibahan sanda nga nagapungko ag nagatuon. Sa rayang paagi, nakikita it mga ginikanan ro andang mga unga ag sayod nanda kon ano ro ginaturo kanda. (Deut. 31:12) Owa man kita nagapangolekta it kwarta sa atong mga miting, kundi ginasunod naton ro sugo ni Jesus: “Nakabaton kamo nga owa it bayad, ngani magtao man kamo nga indi magpabayad.” (Mat. 10:8) Pwede mo mang hambaeon kana nga indi na kinahang-ean nga magsuksok it maeahaeon nga eambong para maka-attend. Dahil nagatan-aw ro Dyos sa atong tagipusuon, buko’t sa itsura.​—1 Sam. 16:7.

¹⁰ Kon mag-attend imaw, ipabatyag kana nga welcome gid imaw. Ipakilaea man imaw sa mga elder ag sa mga igmanghod. Kon mabatyagan na nga ginaabiabi imaw, mas gustuhon na nga mag-attend it uman. Sa panahon it miting, kon owa imaw it Biblia, pwede mong i-share kana ing Biblia ag ipakita kana kon paalin naton ginasundan ro mga teksto nga ginahambae it manogdiskurso o kon paalin kita nagatuon.

KON ANO RO ATONG OBRAHON KON MAKAKITA KITA IT BIBLE STUDY

11. Paalin naton mapakita nga ginakonsiderar naton ro oras ag iskedyul it Bible study?

¹¹ Ano ro dapat natong isipon kon naga-Bible study kita kanda? Ipakita nga ginakonsiderar naton ro andang oras ag iskedyul. Halimbawa, kon may inyong gin-istoryahan nga iskedyul sa pag-Bible study, mag-abot gid sa insakto nga oras, maskin pa buko’t importante sa mga tawo sa inyong lugar ro pagiging insakto sa oras. Mas mayad man nga sa una paeang ninyo nga pagtuon hay buko’t masyadong mabuhay. Ginhambae it pila nga mga igmanghod nga abung Bible study nga mas mayad nga tapuson it temprano ro pagtuon maskin gusto pa kunta nanda nga magtuon. Ag likawi nga ikaw lang pirme ro maghinambae. Taw-i man it tsansa ing Bible study nga mahambae ro anang ginabatyag ag ginaisip.​—Hulu. 10:19.

12. Ano dapat ro atong goal kon naga-Bible study kita?

¹² Kon nagaumpisa kita sa pagtuon sa atong Bible study, dapat ro atong goal hay buligan imaw nga makilaea si Jehova ag si Jesus ag mapaeambo ro anang pagpalangga kanda. Para maobra ra, gamiton gid naton pirme ro Biblia kaysa sa atong sariling opinyon eang ag mga nasayran. (Binu. 10:25, 26) Nagpakita it mayad nga halimbawa kara si apostol Pablo. Kon nagaturo imaw sa mga tawo, ginapukos na ra kay Jesus, ro isaea nga ginpadaea ni Jehova para buligan kita nga makilaea ag palanggaon Imaw. (1 Cor. 2:1, 2) Ginklaro man ni Pablo nga importante gid nga buligan ro bag-ong mga disipulo nga paeambuon ro mayad nga mga ugali nga makumpara sa bueawan, pilak, ag maeahaeon nga mga bato. (1 Cor. 3:11-15) Naeakip sa manami nga mga ugali ro pagtuo, kaaeam, pag-eubot, ag ro kahadlok kay Jehova. (Sal. 19:9, 10; Hulu. 3:13-15; 1 Ped. 1:7) Matuead mo ro paagi ni Pablo sa pagturo kon buligan mo ing Bible study nga mangin mabakud ro anang pagtuo ag mangin maeapit ro anang relasyon sa atong mapinalanggaon nga Ama sa eangit.​—2 Cor. 1:24.

13. Paalin naton mapakita ro pagpasensya ag ro pag-intindi habang nagaturo kita sa atong Bible study? (2 Corinto 10:4, 5) (Tan-awa man ro piktyur.)

¹³ Ginatuead naton ro paagi it pagturo ni Jesus kon ipakita naton ro pagpasensya ag ro pag-intindi. Ginalikawan naton nga magpangutana it mga bagay nga mapahuy-an sanda. Kon may mga punto nga nalisdan imaw nga intindihon, magpadayon anay sa masunod ag balikan lang galing ra it uman. Indi naton imaw pagpiliton nga batunon ro atong mga ginaturo kana, kundi taw-an naton it panahon nga magtubo ro kamatuoran sa anang tagipusuon. (Juan 16:12; Col. 2:6, 7) Ginakumpara it Biblia ro saea nga mga pagturo sa malig-on nga pader nga malisud waskon. (Basaha ro 2 Corinto 10:4, 5) Posible nga buko’t maeumo sa sangka Bible study nga aywanan ro anang mabuhay eon nga ginapatihan. Ngani kinahang-ean naton imaw buligan nga magpatindog it bag-ong pader, kon siin nagakahueogan ra nga buligan naton imaw nga magsalig kay Jehova. Paagi kara, mangin mas maeumo sa Bible study nga aywanan ro anang ginapatihan dati.​—Sal. 91:9.

KON PAALIN BULIGAN RO MGA BAG-UHAN NGA NAGA-ATTEND SA MGA MITING

14. Ano dapat ro atong pagtratar sa mga bag-uhan nga naga-attend sa atong mga miting?

¹⁴ Gusto ni Jehova nga trataron naton ro tanan sa mapinalanggaon nga paagi, maskin alin man ro andang lahi, kultura, o estado sa kabuhi. (Sant. 2:1-4, 9) Ngani paalin naton mapakita ro pagpalangga sa mga bag-uhan nga naga-attend sa atong mga miting?

15-16. Paalin naton mapabatyag sa mga bag-uhan nga welcome sanda sa atong mga miting?

¹⁵ Ro iba hay naga-attend sa atong mga miting dahil gusto eang nandang masayran kon ano ro atong ginaobra sa Kingdom Hall. Ro iba mat-a hay ginsampit it andang igbata o amigo nga Saksi o it nagatuon man sa Biblia nga nagaestar sa ibang lugar. Ngani, indi dapat kita magdaywang-isip nga paeapitan ag istoryahon sanda. Abiabiha sanda, pero likawi nga mabatyagan nanda nga bukon eon sanda it komportable. Pwede mo sandang sampiton nga iping lang kamo sa pungkuan. I-share kanda ing Biblia ag ro publikasyon nga ginatun-an, o taw-i sanda it sarili nandang kopya. Isipa man ro ibang paagi para mangin mas komportable sanda. Kat nag-attend ro sangka eaki sa Kingdom Hall, naghambae imaw sa brother nga nag-abiabi kana nga nahuya imaw dahil kaswal eang ro anang suksok. Ginhambae kana it brother nga indi dapat imaw mahuya dahil ro mga Saksi ni Jehova hay pareho man sa ibang tawo. Ku ulihi, nabautismuhan ro eaki ag owa na gid nalipatan ro pag-abiabi ag ro ginhambae kana it brother. Pero dapat maghaeong kita kon ginaistorya naton ro mga bag-uhan nga nag-attend bago o pagkatapos it miting. Ipakita kanda ro personal nga interes pero likawan naton nga magpangutana parti sa andang personal nga kabuhi.​—1 Ped. 4:15.

¹⁶ Mapabatyag man naton sa mga bag-uhan nga welcome sanda kon matinahuron kita sa pag-istorya kanda, sa pagkomento, ag sa pagpresentar it atong mga parte sa miting kon ginatalakay kara ro parti sa mga buko’t Saksi o sa andang mga pagpati. Likawi ro mga termino nga makapaeuya o makainsulto kanda. (Tito 2:8; 3:2) Halimbawa, owa naton ginaintrimis o ginapakanaba ro andang mga pagpati. (2 Cor. 6:3) Ngani ro mga brother nga nagatao it pangpubliko nga diskurso hay nagahaeong gid kon ginatalakay nanda ro topiko parti kara. Ginadumdom man nanda nga ro pila sa manogpaeamati hay buko’t Saksi, ngani nagagamit sanda it simple nga mga termino o ginaeksplikar nanda ra sa simple nga paagi para maintindihan nanda.

17. Ano ro dapat natong obrahon kon makakita kita it interesado sa atong pagministeryo?

¹⁷ Ro atong pagwali nga ueobrahon hay mas nagasako pa gid kada adlaw, ag padayon natong ginausoy ro mga tawo nga gustong magtuon parti sa Dyos ag sa Biblia. (Binu. 13:48) Ngani, owa kita nagadaywang-isip nga magsumbil it pagtuon sa Biblia o mag-imbita kanda sa atong mga miting. Paagi kara, ginabuligan naton sanda nga magtikang sa “daean paadto sa kabuhi.”​—Mat. 7:14.