Mayad Gid Para Katon nga Mangin Maeapit sa Kada Isaea!

1-2. Ano ro sangka bagay nga importante kay Jehova, ag ano ro gusto na nga obrahon naton?

IMPORTANTE gid kay Jehova kon paalin naton ginatratar ro iba. Gintur-an kita ni Jesus nga dapat palanggaon naton ro atong isigkatawo pareho sa pagpalangga naton sa atong sarili. (Mat. 22:​37-39) Eakip kara ro pagiging mabuot maskin sa mga buko’t alagad ni Jehova. Kon ginaobra naton ra, ginatuead naton si Jehova nga Dyos. “Ana nga ginapasilak ro adlaw sa tanan nga tawo, mayad man o maeain. Ag ana man nga ginatao ro uean sa mga nagahimo it matarong ag sa mga owa nagahimo it matarong.”​—Mat. 5:​45, Ro Bag-o nga Kasugtanan, TAP.

² Palangga ni Jehova ro tanan nga tawo, pero mas palangga na ratong mga nagatuman kana. (Juan 14:21) Gusto na nga tuearon naton imaw. Ginapalig-on na kita nga “maghigugmaanan . . . it hantop” ag ipakita ro ‘pagpalangga’ sa atong mga igmanghod sa kongregasyon. (1 Ped. 4:8; Roma 12:​10, NWT) Rayang pagpalangga hay pareho sa kon ano ro atong ginabatyag sa atong pamilya o maeapit nga amigo.

3. Ano ro dapat natong tandaan parti sa pagpalangga?

³ Ro pagpalangga hay pareho sa tanum, nga kinahang-ean alagaan para mag-eambo. Ginpadumdom ni apostol Pablo ro mga Cristyano: “Magpadayon kamo sa paghigugmaanan bilang mga mag-igmanghod.” (Heb. 13:1) Gusto ni Jehova nga padayon natong ipakita ro atong pagpalangga sa iba. Pagatalakayon sa rayang artikulo kon ham-an dapat kita mangin mas maeapit sa atong isigka-Cristyano ag kon paalin naton ra padayon nga maobra.

KON HAM-AN DAPAT KITA MANGIN MAS MAEAPIT SA KADA ISAEA

4. Base sa Salmo 133:​1, paalin naton padayon nga maapresyar ro paghiusa sa atong mga igmanghod? (Tan-awa man ro piktyur.)

⁴ Basaha ro Salmo 133:1. Pareho sa salmista, nagapati kita nga ro pagpakig-amigo sa mga nagapalangga kay Jehova hay “mayad” ag “manami.” Pero pareho sa sangka tawo nga ginabalewala eang ro manami nga puno nga nakikita na kada adlaw, pwede man natong mabalewala ro manami nga paghiusa sa atong mga igmanghod. Pirme natong nakikita ro atong mga igmanghod, posibleng pilang beses pa ngani sa sang domingo. Paalin naton sanda padayon nga maapresyar? Kon isipon naton kon mauno kaimportante ro kada isaea kanda sa kongregasyon ag pati man katon, magaeambo ro atong pagpalangga sa atong mga igmanghod.

5. Ano ro epekto sa iba it atong pagpalangga sa atong mga igmanghod?

⁵ Ro pila nga unang beses paeang nga naka-attend sa atong miting hay nagdayaw gid sa atong pagpalangga sa kada isaea. Dahil karon, nakumbinsi sanda nga matuod kita nga mga Cristyano. Ginhambae ni Jesus: “Kon nagahigugmaanan kamo, ro tanan nga mga tawo makasayod nga mga disipulo ko kamo.” (Juan 13:35) Tan-awa ro eksperyinsya ni Chaithra, nga sangka estudyante sa unibersidad ag Bible study it mga Saksi ni Jehova. Nagsugot imaw nga mag-attend sa pangrehiyon nga kunbensyon. Pagkatapos nang mag-attend sa unang adlaw, naghambae imaw sa naga-Bible study kana: “Owa gid ako ginakupkupan it ang mga ginikanan. Pero sa inyong kunbensyon, 52 nga beses ako nga ginkupkupan sa sang adlaw eang! Gingamit ni Jehova rayang mga tawo para ipabatyag kang ro anang pagpalangga. Gusto ko nga mangin parte it rayang pamilya.” Padayon nga nag-uswag si Chaithra ag nabautismuhan imaw ku 2024. Ngani, kon makita it mga bag-uhan ro atong mayad nga mga ginaobra, pati ro pagpalangga nga atong ginapakita sa kada isaea, mapahueag sanda nga alagaron man si Jehova.​—Mat. 5:16.

6. Paalin ro pagiging maeapit sa atong mga igmanghod makaprotekta katon?

⁶ Ro pagiging maeapit sa atong mga igmanghod hay makaprotekta katon. Ginpalig-on ni Pablo ro anang mga isigka-Cristyano: “Magtueor-an [o, magpaealig-unan] kamo adlaw-adlaw . . . agud owa it sambato kinyo nga mapataeang it saea ag manginmatig-a it tagipusoon.” (Heb. 3:13) Kon naeuyahan kita it buot ag nalisdan kita nga obrahon ro tama, pwedeng gamiton ni Jehova ro atong isigka-Cristyano nga nakapansin kara para itao ro bulig nga kinahang-ean naton. (Sal. 73:​2, 17, 23) Rayang bulig hay mayad gid para katon.

7. Paalin ro pagpalangga naangot sa paghiusa? (Colosas 3:​13, 14)

⁷ Parte kita it grupo it mga tawo nga nagatinguha gid nga ipakita ro pagpalangga sa kada isaea, ngani abu nga pagpakamayad ro atong nabaton. (1 Juan 4:11) Halimbawa, ro pagpalangga hay nagapahueag katon nga “mangin mapinasensyahon . . . sa kada isaea,” ag nakabulig man ra nga maghiusa sa atong mga igmanghod. (Basaha ro Colosas 3:​13, 14, Ro Bag-o nga Kasugtanan, TAP; Efe. 4:​2-6) Ngani sa atong mga miting, masadya kita nga nagaieiba kon ikumpara sa ibang mga grupo sa kalibutan.

PADUNGGI RO KADA ISAEA

8. Paalin kita ginabuligan ni Jehova nga maghiusa sa atong mga igmanghod?

⁸ Ro paghiusa nga may una kita sa atong mga igmanghod sa bilog nga kalibutan hay nangin posible eang dahil kay Jehova. Ginpaposible na ra maskin bukon kita it perpekto. (1 Cor. 12:25) Ginahambae it Biblia nga “gintur-an gid [kita] it Dyos sa paghigugmaanan.” (1 Tes. 4:9) Nagakahueogan ra nga ginagamit ni Jehova ro Biblia para isugid katon kon ano gid ro kinahang-ean natong obrahon agud mangin maeapit sa kada isaea. ‘Matur-an gid kita it Dyos’ kon ginatun-an naton it mayad ro anang mga pagturo ag ginaaplikar ra. (Heb. 4:12; Sant. 1:25) Ag ruyon gid ro ginatinguhaan nga obrahon it mga Saksi ni Jehova.

9. Ano ro atong matun-an sa Roma 12:​9-13, NWT parti sa pagpadungog sa kada isaea?

⁹ Paalin kita ginatur-an ku Bisaea it Dyos para mangin maeapit sa kada isaea? Tan-awa ro ginhambae ni Pablo parti kara, nga makita sa Roma 12:​9-13, NWT. (Basaha.) Mapansin naton nga naghambae imaw nga “manguna kamo sa pagpadungog sa kada isaea.” Ano ro buot hambaeon kara? Dapat nga manguna kita sa pagpakita it pagpalangga sa iba-ibang paagi pareho it pagiging mapinatawaron, maabiabihon, ag maalwan. (Efe. 4:32) Indi mo eon dapat paghueaton ing igmanghod nga magpaeapit kimo. Pwede kang “manguna” sa pag-obra kara. Ag maeksperyinsyahan mo ro ginpromisa ni Jesus kat ginhambae na: “Mas eabaw nga bulahan [o, masadya] ro magtao kaysa sa magbaton.”​—Binu. 20:35.

10. Paalin kita mangin mahugod sa “pagpadungog sa kada isaea”? (Tan-awa man ro piktyur.)

¹⁰ Makapainteres nga pagkatapos nga ginhambae ni Pablo nga manguna kita sa pagpadungog sa kada isaea, ginpalig-on na man kita nga “mangin mahugod, indi magtinamad.” Kon ro mahugod nga tawo hay makabaton it asayment, ginaobra na ra it mayad. Ginapalig-on kita it Hulubaton 3:​27, 28: “Indi pagtagua ro mayad sa mga dapat mong taw-an kara kon kaya mo malang nga magbulig.” Ngani, kon may makita kita nga nagakinahang-ean it bulig, nagabulig eagi kita. Owa eon kita nagahueat o nagaisip nga may ibang magabulig kana.​—1 Juan 3:​17, 18.

11. Ano ro makabulig katon para mangin maeapit sa kada isaea?

¹¹ Ro sambilog pa nga paagi para mapadunggan naton ro iba hay kon handa kita nga magpatawad sa mga nakasaea katon. Nagahambae ro Efeso 4:​26, Ro Bag-o nga Kasugtanan, TAP: “Dueaa ro imong kaakig bago matunod ro adlaw.” Ham-an? Dahil ginahambae sa bersikulo 27 nga kon indi naton ra pag-obrahon, ‘ginataw-an naton it tsansa si Satanas.’ Sa Bisaea it Dyos, pauman-uman kita nga ginapadumdom ni Jehova nga patawaron ro kada isaea. Ginapalig-on kita it Colosas 3:13 nga padayon kitang “magpaeatawaran.” Ro pagpatawad sa mga nakasaea katon hay sambilog sa pinakamayad nga paagi para mangin maeapit kita kanda. Kon ginaobra naton ra, nagabulig kita sa “paghaeong ku paghiliusa nga gintao [katon] ku Espiritu.” (Efe. 4:3) Ngani kon ginapatawad naton ro iba, makabulig kita sa paghiusa ag kalinong it kongregasyon.

12. Paalin kita ginabuligan ni Jehova nga mangin mapinatawaron?

¹² Malisud gid matuod nga magpatawad sa mga nakasakit katon. Pero mapatawad naton sanda paagi sa bulig ku espiritu it Dyos. Pagkatapos kita palig-unon nga “magpalanggaanan” ag “mangin mahugod,” ginapalig-on man kita it Biblia nga “mangin mapagsik dahil sa baeaan nga espiritu.” Ro tawo nga “mapagsik” hay napuno it kahugod ag kasadya nga resulta it baeaan nga espiritu. Ngani, ro espiritu it Dyos hay nagabulig katon nga ipakita ro pagpalangga ag mangin handa sa pagpatawad sa iba. Ruyon ro rason kon ham-an sinsero kita nga nagapangayo it bulig kay Jehova.​—Luc. 11:13.

“INDI KAMO MAGGRUPO-GRUPO”

13. Ano ro posibleng rason nga maggrupo-grupo kita?

¹³ Sa kongregasyon, makita ro “tanan nga mga tawo” nga iba-iba ro lahi o ginhalinan. (1 Tim. 2:​3, 4) Dahil kara, ro kada isaea katon hay may iba-ibang gusto parti sa pang-eambong, pang-ayos, kalingawan, o paagi it pagpabueong. Kon indi kita maghaeong, posible rang mangin rason nga maggrupo-grupo kita. (Roma 14:4; 1 Cor. 1:​10, Ro Bag-o nga Kasugtanan, TAP) Dahil gintur-an kita it Dyos nga palanggaon ro kada isaea, dapat maghaeong kita nga indi pag-ipilit nga ro atong personal nga mga gusto hay mas mayad kaysa sa iba.​—Fil. 2:3.

14. Ano dapat ro pirme natong tinguhaan, ag ham-an?

¹⁴ Malikawan man naton ro paggrupo-grupo sa kongregasyon kon tinguhaan naton pirme nga mangin makapaumpaw ag makapalig-on sa iba. (1 Tes. 5:11) Ku raya eang, abu nga mga inactive o ginpahalin sa kongregasyon ro nagbalik. Masadya naton nga ginaabiabi sanda! (2 Cor. 2:8) Tan-awa ro natabo sa sangka sister nga nag-attend it uman sa Kingdom Hall pagkatapos nga nangin inactive sa sueod it pueong dag-on. Ginhambae na, “Masadya nanda ako nga ginmueo ag ginlamano.” (Binu. 3:19) Ano ro epekto kana it ratong simpleng pagpakita it kabuot? Naghambae imaw, “Nabatyagan ko nga ginabuligan ako ni Jehova nga mangin masadya it uman.” Kon tinguhaan naton nga mangin makapalig-on sa tanan, pwede kitang gamiton it Cristo para paumpawan ratong mga “ginabudlayan ag ginabug-atan.”​—Mat. 11:​28, 29.

15. Ano ro sambilog pa nga paagi nga makabulig kita sa paghiusa it kongregasyon? (Tan-awa man ro piktyur.)

¹⁵ Ro sambilog pa nga paagi nga makabulig kita sa paghiusa it kongregasyon hay paagi sa atong ginahambae. Ro Job 12:11 hay nagahambae: “Indi baea nga ginapamatian it dueonggan ro mga bisaea kon paalin nga ginalasahan it dila ro pagkaon?” Pareho sa sangka mayad nga manog-eaha nga pirmeng ginasamitan ro pagkaon para masigurado nga manami ra bago ipakaon sa iba, dapat man natong isipon it mayad ro atong pagahambaeon bago ra ihambae. (Sal. 141:3) Gusto natong siguraduhon pirme nga ro atong mga ihambae hay makapalig-on, makapaumpaw, ag “makatao it kamaeayran sa mga nagapamati.”​—Efe. 4:29.

16. Sin-o dapat ro mas magtinguha gid nga maghambae it makapalig-on?

¹⁶ Ro mga asawang eaki ag mga ginikanan hay dapat mas magtinguha gid nga maghambae it makapalig-on. (Col. 3:​19, 21; Tito 2:4) Ro mga elder man hay dapat nga makapaumpaw ag makapalig-on sa panong ni Jehova. (Isa. 32:​1, 2; Gal. 6:1) Ro sangka hambaeanon sa Biblia hay nagapadumdom katon: “Ro bisaea nga ginhambae sa tama nga panahon—kanami gid!”—Hulu. 15:23.

IPAKITA RO SINSERO NGA PAGPALANGGA PAAGI SA ATONG GINAOBRA

17. Paalin naton masigurado nga sinsero ro atong pagpalangga sa mga igmanghod?

¹⁷ Ginapalig-on kita ni apostol Juan nga “ro atong paghigugma kinahang-ean bukon eamang it sa bisaea ukon sa hambae, kundi kinahang-ean ro matuod-tuod nga paghigugma nga ginapakita sa buhat.” (1 Juan 3:18) Gusto naton nga mangin sinsero ro atong pagpalangga sa mga igmanghod. Paalin naton ra maobra? Kon pirme kitang nagaiba sa mga igmanghod, mas mangin maeapit kita kanda ag magabakud pa gid ro atong pagpalangga sa kada isaea. Ngani mag-obra kita it mga paagi nga makaibahan sanda—sa mga miting ag sa ministeryo. Magtao it oras para mabisita sanda. Kon obrahon naton ra tanan, mapakita naton nga “gintur-an gid [kita] it Dyos sa paghigugmaanan.” (1 Tes. 4:9) Ag padayon naton nga maeksperyinsyahan nga “mayad ag manami gid kon ro mga igmanghod hay mag-ieiba nga nagahiusa!”—Sal. 133:1.