Si Jehova ro Atong “Mabahoe nga Kasadya”

1-2. (a) Ano ro ginabatyag it abung tawo makaron? (b) Ano ro atong pagatalakayon sa rayang artikulo?

RO MGA tawo makaron hay ginaobra ro tanan para eang mangin masadya. Pero, bukon gihapon sanda it masadya. Abu ro nasubuan ag nadueaan eon it pag-eaum. Nabatyagan man ra it mga alagad ni Jehova. Dahil nagakabuhi eon kita sa “katapusan nga mga inadlaw,” mapaabot naton nga makaatubang kita it mga kalisdanan ag negatibo nga mga baeatyagon nga “malisud atubangon.”​—2 Tim. 3:1, NWT.

² Sa rayang artikulo, pagatalakayon naton kon ano ro makaduea it atong kasadya ag kon ano ro atong obrahon para mangin masadya it uman. Pero talakayon anay naton kon sin-o ro Ginahalinan it matuod nga kasadya.

RO GINAHALINAN IT MATUOD NGA KASADYA

3. Ano ro ginaturo katon it mga tinuga parti kay Jehova? (Tan-awa man ro piktyur.)

³ Masadya gid pirme si Jehova. Ag gusto na nga mangin masadya man kita. Ngani nag-obra imaw it abung mga bagay nga makapasadya katon. Halimbawa, nasadyahan kita nga makita ro atong manami nga planeta, ro sari-sari nga mga kulay sa palibot, ag ro paghampang it mga sapat. Excited man kita nga makakaon it atong paboritong mga pagkaon. Matuod gid nga palangga kita it Dyos ag gusto na nga mangin masadya ro atong kabuhi!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Ham-an nakapabilin nga masadya si Jehova maskin pa nakikita na nga nagaantus ro mga tawo? (b) Ano ro regalo katon ni Jehova? (Salmo 16:11)

⁴ Maskin pa nga si Jehova hay “bulahan [o, masadya] nga Dyos,” sayod na gid ro atong ginaagyan nga mga kasakit ag pag-antus. (1 Tim. 1:11) Pero owa na ra ginapasugtan nga magduea it anang kasadya. Sayod na nga temporaryo eang ro tanan nga pag-antus dahil imaw mismo ro nagpili it adlaw kon hin-uno na ra dueaon. Ag mapinasensyahon imaw nga nagatiis hasta nga mag-abot ro adlaw nga dueaon na it dayon ro tanan nga kasakit ag pag-antus. Pero habang owa pa ron nagaabot, naintindihan ni Jehova ro atong mga ginaagyan ag gusto nang buligan kita. Paalin na kita ginabuligan? Ro sambilog kara hay paagi sa anang regalo katon nga kasadya. (Basaha ro Salmo 16:11.) Tan-awon naton kon paalin na gintao rayang regalo sa anang Unga nga si Jesus.

5-6. Ham-an masinadyahon si Jesus?

⁵ Sa tanan nga mga tinuga ni Jehova, si Jesus ro pinakamasadya. Ham-an? Tan-awa ro daywang ka rason. (1) “Imaw ro makita nga larawan ku indi makita nga Dyos” ag perpekto na nga ginapakita ro ugali it anang Ama sa tanan nga paagi. (Col. 1:15; 1 Tim. 6:15.) (2) Mabuhay nga nakaibahan ni Jesus ro anang Ama, ro Ginahalinan it kasadya.

⁶ Nasadyahan si Jesus sa pagtuman it tanan nga ginapaobra kana it anang Ama. (Hulu. 8:30, 31; Juan 8:29) Dahil sa anang katutom, ginkahamut-an imaw ni Jehova.​—Mat. 3:17.

7. Paalin naton mabatyagan ro matuod nga kasadya?

⁷ Mabatyagan man naton ro matuod nga kasadya kon mangin maeapit kita kay Jehova, ro Ginahalinan it kasadya. Kon mas abung oras ro atong ginagamit sa pagtuon parti kay Jehova ag sa pagtuead kana, mangin mas masadya kita. Ag mabatyagan pa gid naton ra kon ginatuman naton ro kabubut-on ni Jehova ag kon masayran naton nga nahamuot imaw katon.a (Sal. 33:12) Pero paalin kon may mga panahon nga mabatyagan naton nga naduea ro atong kasadya? Nagakahueogan baea ra nga owa eon imaw nahamuot katon? Owa! Naintindihan ni Jehova nga bukon kita it perpekto ag kon amat makabatyag kita it kasakit, kasubo, ag ma-depress pa ngani. (Sal. 103:14) Talakayon naton ro mga bagay nga makaduea it atong kasadya ag kon ano ro atong obrahon para mangin masadya it uman.

INDI PAGPASUGTI NGA MADUEA ING KASADYA

8. Ano ro epekto katon it mga problema?

⁸ Ro makaduea it kasadya #1: Mga problema. Nagaatubang ka baea it paghingabot, kalamidad, kapobrehon, masakit, o paggueang? Rayang mga problema hay makaduea it atong kasadya, eabi eon gid kon owa man kita it maobra para mabag-o ro atong sitwasyon. Ginahambae it Biblia nga “ro nagaantus nga tagipusuon hay makatumok it espiritu.” (Hulu. 15:13) Ro elder nga si Babis hay nakabatyag kara. Sa sueod eang it ap-at nga dag-on, namatay ro anang magueang nga eaki ag ro anang mga ginikanan. Naghambae imaw: “Pamatyag ko hay nagaisaeahanon lang ako ag owa gid it makabulig kakon. Kon amat, grabi gid ang kasubo dahil maskin gusto ko kunta nga makaibahan ang mga ginikanan ag ang magueang bago sanda namatay, owa ko gid ra naobra.” Ro mga problema hay makapaeuya gid katon sa pisikal ag emosyonal.

9. Ano ro makabulig katon para mangin masadya it uman? (Jeremias 29:4-7, 10)

⁹ Ano ro makabulig katon para mangin masadya it uman? Mabalik naton ro atong kasadya kon indi naton pagkabaeak-an ro mga bagay nga indi man naton mabag-o ag kon mapinasaeamaton kita sa kon ano ro una katon. Gustong ipapati katon it kalibutan nga mangin masadya eang kita kon una katon ro tanan nga bagay ag kon manami ro sitwasyon it atong kabuhi. Pero bukon ron it matuod. Halimbawa, ginpadumdom ni Jehova ro mga Judio nga ginbihag sa Babilonia nga obrahon eang ro andang masarangan para mangin masadya igto. (Basaha ro Jeremias 29:4-7, 10.) Ano ro atong matun-an kara? Magpukos sa mayad nga mga bagay nga imong nabaton ag apresyaha ra. Tandai nga buligan ka ni Jehova ag indi ka nana pag-aywanan. (Sal. 63:7; 146:5) Si Effie, nga naparalisa dahil sa aksidente hay naghambae: “Abu gid nga bulig ag suporta ro ang nabaton halin kay Jehova, sa ang pamilya, ag sa kongregasyon. Ngani, gintinguhaan ko nga mangin masadya pirme dahil gusto ko nga ipakita kanda nga nagapasaeamat gid ako sa tanan nga gin-obra nanda para kakon.”

10. Ham-an pwede kitang mangin masadya bisan pa may mga problema kita?

¹⁰ Bisan pa may mga problema kita o may maeain nga natabo katon o sa atong pamilya, pwede gihapon kitang mangin masadya.b (Sal. 126:5) Ham-an? Dahil owa nagadepende ro atong kasadya sa atong sitwasyon. Si Maria nga sangka payunir hay naghambae: “Kon nagaatubang ka it mga problema, ro pagpabilin nga masadya hay owa nagakahueogan nga ginatago mo ing ginabatyag. Kundi, nagapakita ra nga owa mo nalipatan ro mga promisa ni Jehova. Buligan kita it atong Ama nga mangin masadya gihapon.” Tandaan naton nga maskin mauno pa kalisud ro atong sitwasyon, tanan ra hay temporaryo eang—kapareho sa mga marka it siki sa baeas it baybay, nga maduea kon maagyan it humbak. Sa indi magbuhay, dueaon eon gid ni Jehova ro tanan nga dahilan it atong kalisud ag kasubo.

11. Paalin ka napalig-on sa halimbawa ni apostol Pablo?

¹¹ Basi maisip naton kon amat nga abu kitang problema dahil owa nahamuot katon si Jehova. Kon nagabatyag kita it kapareho kara, mapalig-on kita it matutom nga mga alagad ni Jehova nga nakaatubang man it malisud gid nga mga sitwasyon. Tan-awa ro halimbawa ni apostol Pablo. Si Jesus mismo ro nagpili kana para iwali ro kamatuoran “sa mga Hentil, sa mga hari ag sa mga taga-Israel.” (Binu. 9:15) Mabahoe gid ra nga pribilehiyo! Pero, abu gihapon nga mga problema si Pablo. (2 Cor. 11:23-27) Ginapakita baea kara nga owa eon nahamuot kana si Jehova? Owa! Ro matuod, natiis ni Pablo ratong mga problema dahil ginbuligan imaw ni Jehova. (Roma 5:3-5) Isipa man ing sitwasyon makaron. Padayon ka nga nagaalagad it matutom kay Jehova maskin pa nagaatubang ka it mga problema. Ngani makasigurado ka man nga buligan ka ni Jehova ag ginakahamut-an ka nana.

12. Paalin makaduea it atong kasadya ro mga ginapaabot nga owa matabo?

¹² Ro makaduea it kasadya #2: Mga ginapaabot nga owa matabo. (Hulu. 13:12) Ro atong pagpalangga ag pag-apresyar kay Jehova hay nagapahueag katon nga mag-set it mga goal sa pag-alagad kana. Pero kon mag-set kita it mga goal nga indi naton masarangan, pwede kitang maeuyahan it buot. (Hulu. 17:22) Ro sangka payunir nga si Holly hay naghambae: “Gusto ko nga makaeskuyla sa School for Kingdom Evangelizers, mag-alagad sa ibang lugar, o mag-volunteer sa construction project sa Ramapo. Pero nagbag-o ang sitwasyon, ag indi ko eon kaya nga abuton ruyong mga goal. Naeuyahan gid ako. Nasubuan gid ang nga indi ko eon maobra ro mga bagay nga gusto ko kuntang obrahon.” Abu mang alagad ni Jehova ro nakabatyag it kapareho karon.

13. Kon limitado ing maobra dahil sa ing sitwasyon, ano ing pwedeng obrahon?

¹³ Ano ro makabulig katon para mangin masadya it uman? Tandai nga owa man nagapangayo si Jehova it sobra sa atong masarangan. Ag owa man nakabase ro atong haega sa kon ano ro kaya natong maobra para kana. Gusto ni Jehova nga mangin mapainubuson kita ag mangin matutom. (Miq. 6:8; 1 Cor. 4:2) Mas importante kana kon ano ro atong mga ginaisip, ginabatyag, ag mga ugali kaysa sa atong mga ginaobra. Ngani bukon it tama nga magpaabot kita it sobra sa kon ano ro atong masarangan.c Kon limitado ing maobra sa pag-alagad kay Jehova dahil sa ing sitwasyon, tinguhai nga obrahon eang kon ano ing makaya. Halimbawa, pwede mong sanayon ro mga bataon o palig-unon ro mga magueang. O pwede mo mang palig-unon ro sangka igmanghod paagi sa pagbisita kana, pagtawag sa cellphone, pag-text o pag-chat kana. Mapasadya mo si Jehova kon ginaobra mo ing masarangan ag pakamayron ka man nana paagi sa pagbulig kimo nga mangin masadya. Ag tandai nga sa bag-ong kalibutan, maalagad naton si Jehova sa owa’t katapusan sa paagi nga owa naton ginapaabot! Raya ro nakapalig-on kay Holly. Ginhambae na: “Kon makabatyag ako it pag-euya it buot, nagapundo ako ag ginadumdom ko nga mabuhi ako sa owa it katapusan. Sa bulig ni Jehova, maobra ko eon ro mga bagay nga gusto kong obrahon sa bag-ong kalibutan.”

14. Ano pa ro pwedeng makaduea it atong kasadya?

¹⁴ Ro makaduea it kasadya #3: Mga pangsariling kasadyahan. Ginagamit it iba ro social media para ipakita nga kon ginauna naton ro atong sarili, mabatyagan naton ro matuod nga kasadya ag pagkakontento. Ginakumbinsi kara ro mga tawo nga obrahon ro andang mga gusto, bak-eon ro andang mga nailaan, ag magpamasyar sa iba-ibang lugar. Bukon man it saea nga obrahon rayang mga bagay. Gusto ni Jehova nga mag-enjoy kita sa manami nga mga bagay nga anang gin-obra. Pero, narealisar it abung tawo nga ro ginaisip nanda nga makatao kanda it kasadya hay bukon man gali it matuod. Ro sangka payunir nga si Eva hay naghambae, “Kon pirme mo eang ginaisip ro kasadyahan, indi ka gid makontento.” Ngani kon pangsariling kasadyahan eang ro pirme natong ginaisip, masubuan eang kita ag madismaya.

15. Ano ro atong matun-an kay Haring Solomon?

¹⁵ Matun-an naton kay Haring Solomon ro buko’t manami nga resulta it pag-una it pangsariling kasadyahan. Gintinguhaan na nga obrahon ro iba-ibang mga bagay para mangin masadya. Halimbawa, ginsamitan na ro iba-ibang manami nga mga pagkaon, ginpamatian ro manami nga mga musika, ag ginbakae ro maeahaeon nga mga bagay. Pero raya tanan hay owa kana nakatao it matuod nga kasadya. Ginhambae na: “Ro mata hay indi maayawan sa pagtan-aw; ag ro dueonggan hay indi matak-an sa pagpamati.” (Man. 1:8; 2:1-11) Ro pagpati it kalibutan parti sa matuod nga kasadya hay pareho sa peke nga kwarta. Bukon ra it matuod, ag indi gid makatao it matuod nga kasadya.

16. Ham-an ro pagbulig sa iba makabulig katon para mangin masadya it uman? (Tan-awa man ro piktyur.)

¹⁶ Ano ro makabulig katon para mangin masadya it uman? Gintur-an kita ni Jesus nga “mas malipayon ro gatao kaysa sa gabaton.” (Binu. 20:35, Ro Bag-o nga Kasugtanan, TAP) Ro elder nga si Alekos hay naghambae: “Ginatinguhaan ko nga mag-obra it simple nga mga bagay para sa iba. Kon ginabuligan ko sanda, owa ko rayon naiisip kon ano ang mga gusto ag nasadyahan ako kara.” Ano ing pwedeng obrahon para buligan ro iba? Kon may nakita ka nga nagakalisud, tinguhai nga palig-unon imaw. Indi mo man masolbar ro anang mga problema, pero mapaumpawan mo imaw paagi sa pagpamati kana it mayad, pag-intindi sa kon ano ro anang ginabatyag, ag sa pagpadumdom kana nga isugid kay Jehova ro anang ginabatyag dahil nagakabaeaka imaw kana. (Sal. 55:22; 68:19) Ag pasaliga imaw nga indi imaw pag-aywanan ni Jehova. (Sal. 37:28; Isa. 59:1) Pwede ka man makatao it praktikal nga bulig pareho sa pag-eaha it pagkaon para kana o sa pag-iba kana sa pagpamasyar. Sampita imaw nga magsunod kimo sa pag-preaching dahil ro pagsugid it mayad nga balita sa iba hay makapasadya katon. Pasugti si Jehova nga gamiton ka para palig-unon ro iba. Ro pagpukos sa iba kaysa sa atong sarili hay makatao katon it matuod nga kasadya!—Hulu. 11:25.

17. Ano ro dapat natong obrahon para mangin matuod kita nga masadya? (Salmo 43:4)

¹⁷ Mangin matuod kita nga masadya kon padayon kitang mangin maeapit sa atong Ama sa eangit. Ginapasalig kita it Biblia nga si Jehova ro atong “mabahoe nga kasadya.” (Basaha ro Salmo 43:4.) Ngani maskin may mga problema kita, indi naton kinahang-ean nga mabaeaka o mahadlok. Kon si Jehova ro atong pinakamaeapit nga amigo, buligan na kita nga mangin masadya sa owa it katapusan!—Sal. 144:15.