Kon Paalin Makapabilin nga Masadya ro mga Magueang

1-2. Ano ro pagtan-aw ni Jehova sa matutom nga mga magueang? (Salmo 92:12-14; tan-awa man ro piktyur.)

IBA-IBA ro reaksyon it mga tawo sa paggueang. Halimbawa, kat una mong nakita ing uban, basi gusto mo eagi ra nga bugnuton bago pa makita it iba. Pero narealisar mo nga magaabu man gihapon ra maskin bugnuton mo. Ginapakita it rayang halimbawa nga owa naila ro mga tawo nga maggueang.

² Pero, ano ro pagtan-aw it atong Ama sa eangit sa anang mga alagad nga magueang eon? (Hulu. 16:31) Ginkumpara na sanda sa nagapamunga nga puno. (Basaha ro Salmo 92:12-14.) Ham-an nagakabagay gid sanda nga ikumpara kara? Dahil ro kaeabanan nga mga puno nga nagaedad it mga dinekada hay may maeambo nga mga dahon ag mahumot nga mga bueak. Ro sambilog sa manami nga halimbawa kara hay ro puno it cherry blossom nga makita sa Japan. Ro pila kara hay nagaedad eon it sobra sa sanglibo nga dag-on ag kanami gid ra tan-awon. Pareho kara, ro magueang nga mga alagad ni Jehova hay manami ag espesyal sa anang pagtan-aw. Ginapahaegahan ni Jehova ro manami nga mga ugali it mga magueang. Nag-alagad sanda kana sa sueod it maabu nga dag-on ag nagpabilin nga matutom sa mayad man ag malisud nga sitwasyon.

3. Magtao it halimbawa kon paalin gingamit ni Jehova ro mga magueang para matuman ro anang kabubut-on.

³ Padayon kita nga ginapahaegahan ni Jehova maskin magueang eon kita.a Ro matuod, ginagamit ni Jehova ro mga magueang para matuman ro anang kabubut-on. Halimbawa, magueang eon si Sara kat ginhambae kana ni Jehova nga mangin nanay imaw it sangka gamhanan nga nasyon ag sa anang linahi magahalin ro Mesias. (Gen. 17:15-19) Magueang eon man si Moises kat ginsugo imaw ni Jehova nga pangunahan ro mga Israelinhon paguwa it Ehipto. (Ex. 7:6, 7) Ag si apostol Juan hay magueang eon gid kat gingiyahan imaw ni Jehova nga isueat ro limang ka libro it Biblia.

4. Base sa Hulubaton 15:15, ano ro makabulig sa mga magueang nga matiis ro mga kalisdanan? (Tan-awa man ro piktyur.)

⁴ Abung mga kalisdanan ro ginaatubang it mga magueang. Ngani abu ro nagahambae nga, “Buko’t maeumo nga mangin magueang.” Pero ro pagiging masadyab hay makabulig sa mga magueang nga matiis ro mga kalisdanan nga andang ginaatubang. (Basaha ro Hulubaton 15:15.) Sa rayang artikulo, pagatalakayon ta ro praktikal nga mga bagay nga maobra it mga magueang para makapabilin nga masadya. Pagatalakayon ta man kon paalin kita makabulig sa mga magueang nga igmanghod sa atong kongregasyon. Pero, talakayon anay naton kon ham-an malisud nga makapabilin nga masadya ro mga magueang.

KON HAM-AN MALISUD NGA MAKAPABILIN NGA MASADYA RO MGA MAGUEANG

5. Ano ro posibleng rason nga maeuyahan it buot ro mga magueang?

⁵ Ano ro posibleng rason nga maeuyahan ka it buot? Posibleng nasubuan ka dahil indi mo eon maobra ing mga naobra dati. Ag basi ginaisip mo ro mga panahon nga bata ka pa ag mayad ro pang-eawas. (Man. 7:10) Halimbawa, ro sister nga si Ruby hay naghambae: “Nalisdan eon ako magsuksok it eambong dahil nagapaeanakit ang eawas ag indi eon ako haeos kahueag. Maskin ro pag-alsa it ang siki para magsuksok it medyas hay malisud gid para kang. May eubat eon ang mga alima ag nagapaeaminhod ra, ngani maskin ro pag-obra it simpleng mga bagay hay indi ko eon maobra.” Ag si Harold nga nag-alagad sa Bethel hay naghambae: “Kon amat, naakig ako dahil indi ko eon maobra ro mga bagay nga naobra ko dati. Mahilig gid ako sa sports ag ang paborito nga hampang kato hay baseball. Nagahambae ro iba, ‘Taw-an kay Harold ro bola agud magdaog kita.’ Pero makaron, matsa indi ko eon ngani kayang maghaboy it bola.”

6. (a) Ano pa ro posibleng mga rason nga maeuyahan it buot ro mga magueang? (b) Ano ro makabulig sa mga magueang nga masayran kon ma-drive pa baea sanda it saeakyan o indi? (Tan-awa sa rayang isyu ro artikulo nga “Dapat Eon Baea Ako Magpundo sa Pag-drive?”)

⁶ Basi nagabatyag ka it pag-euya it buot dahil indi mo eon maobra ro mga bagay nga kaya mong obrahon dati nga ikaw eang isaea. Matuod gid ra kon nagakinahang-ean ka eon it alalay o kinahang-ean mo eon nga mag-estar sa sambilog sa ing mga unga. O posibleng nadismaya ka gid dahil maeuya ka eon o malabo eon ing mata, ngani indi ka eon makapanaw nga ikaw eang isaea o mag-drive it saeakyan. Siguradong makapaeuya gid ra sa ing buot! Pero tandai nga importante ka gid kay Jehova ag sa iba, maskin indi mo eon kayang obrahon ro mga bagay nga naoobra mo dati. Ag makasigurado ka nga naintindihan ni Jehova ing ginabatyag. Sayod na man kon mauno mo imaw kapalangga ag ro mga igmanghod, ag ruyon ro pinakaimportante kana.—1 Sam. 16:7.

7. Ano ro makabulig kimo kon nasubuan ka nga indi mo eon makita ro katapusan it rayang sistema?

⁷ Posibleng nasubuan ka dahil naisip mo nga basi indi mo eon makita ro katapusan it rayang sistema. Ano ro makabulig kimo kon mabatyagan mo ron? Dumdoma nga may rason si Jehova kon ham-an nagahueat imaw bago na tapuson rayang maeain nga sistema. (Isa. 30:18) Ham-an mapinasensyahon si Jehova? Dahil gusto na nga abu pa ro makakilaea kana ag mangin alagad nana. (2 Ped. 3:9) Ngani kon naeuyahan ka it buot, dumdoma nga abu pang tawo ro posibleng maeuwas bago mag-abot ro katapusan. Basi ro pila kanda hay myembro pa ngani it ing pamilya.

8. Kon nagamasakit ro mga magueang, ano ro posible nandang maobra?

⁸ Bata man kita o magueang, kon buko’t mayad ro atong pamatyag, posibleng makahambae kita o makaobra it mga bagay nga nuoean naton. (Man. 7:7; Sant. 3:2) Halimbawa, kat nag-antus si Job, nakahambae imaw it “padasu-daso.” (Job 6:1-3) Dugang pa, kon may sakit ro mga magueang o may ginainom nga bueong, posibleng makahambae sanda o makaobra it mga bagay nga owa nanda ginahungda. Syempre, indi man naton dapat paggamiton nga rason ro atong edad o ro atong sakit para maghambae it buko’t mayad o magsalig pirme nga iba ro mag-obra para katon. Ag kon narealisar naton nga nakahambae kita it buko’t mayad sa iba, dapat mangayo eagi kita it pasensya.—Mat. 5:23, 24.

KON PAALIN MAKAPABILIN NGA MASADYA

9. Ham-an dapat mong batunon ro bulig it iba? (Tan-awa man ro piktyur.)

⁹ Batuna ro bulig it iba. (Gal. 6:2) Sa una, basi malisdan ka kara. Ro sister nga si Gretl hay naghambae: “Kon amat, nahuya ako magpabulig sa iba dahil pamatyag ko makaistorbo eang ako kanda. Mabuhay man bago ko nabag-o ang kaisipan ag nabaton nga kinahang-ean ko it bulig.” Kon ginabaton mo ro bulig it iba, ginataw-an mo sanda it tsansa nga mabatyagan ro kasadya sa pagbulig. (Binu. 20:35) Ag mangin masadya ka man kon makita mo nga palangga ka nanda ag nagakabaeaka sanda kimo.

10. Ham-an indi mo dapat pagkalipatan nga magpasaeamat? (Tan-awa man ro piktyur.)

¹⁰ Magpasaeamat. (Col. 3:15; 1 Tes. 5:18) Nagapasaeamat kita kon may mayad nga mga bagay nga gin-obra ro iba para katon, pero basi malipatan naton nga ihambae ra kanda. Pero kon mag-smile kita ag magpasaeamat, mapabatyag naton kanda nga naapresyar naton ro andang gin-obra para katon. Si Leah nga sangka caregiver it mga magueang sa Bethel hay naghambae: “Ro sambilog sa mga sister nga akong ginaalagaan hay pirmeng nagapasaeamat kakon. Ginasueat na ra sa maisot nga papel. Matag-od malang man ra pero manami gid ro mensahe kara. Naila gid ako kara magbasa, ag nagapasadya ra kakon dahil naapresyar na ro ang bulig kana.”

11. Paalin mo mabuligan ro iba? (Tan-awa man ro piktyur.)

¹¹ Tinguhai nga buligan ro iba. Kon ginaisip mo ro iba ag ginatinguhaan nga buligan sanda, malikawan mo nga pag-inisipon ing mga problema. Makumpara naton ro mga magueang sa mga libro nga nagaturo katon it importanteng mga leksyon. Pero kon nakatago eang rayang mga libro sa bueotangan, indi ra makaturo sa iba. Sa parehong paagi, indi man makatuon kimo ro mga bataon kon indi mo sanda pag-istoryahon o isugid kanda ing mga nasayran. Pangutan-a sanda, ag pamatii. Rayon, isugid kanda kon paalin ka ginbuligan ni Jehova ag kon ham-an makapasadya katon ro pagtuman Kana. Sigurado gid nga mangin masadya ka kon paumpawan mo ag palig-unon ing bataon nga mga amigo.—Sal. 71:18.

12. Base sa Isaias 46:4, ano ro promisa ni Jehova para sa mga magueang? (Tan-awa man ro piktyur.)

¹² Mangayo it kusog kay Jehova. Kon amat, basi nagaoy ka ag pwede ka karang maeuyahan it buot. Pero dumdoma nga gamhanan gid si Jehova. Ginahambae it Biblia nga “owa gid imaw ginagaoy o nagapang-euya.” (Isa. 40:28) Ngani matao na gid kimo ro kusog nga kinahang-ean mo. (Isa. 40:29-31) Ro matuod, nagpromisa imaw nga buligan ka nana. (Basaha ro Isaias 46:4.) Ag pirme na gid ginatuman ro anang promisa. (Jos. 23:14; Isa. 55:10, 11) Kon mangamuyo ka, itao ni Jehova ro bulig nga kinahang-ean mo. Mabatyagan mo rayon nga palangga ka nana, ag magapasadya gid ra kimo.

13. Base sa 2 Corinto 4:16-18, ano dapat ro dumdomon it mga magueang? (Tan-awa man ro piktyur.)

¹³ Dumdoma nga temporaryo eang ing sitwasyon. Kon dumdomon mo nga temporaryo eang ing sitwasyon, mas madali para kimo nga makatiis. Ag ginapasalig kita it Biblia nga ro paggueang ag ro mga masakit hay dueaon. (Job 33:25; Isa. 33:24) Ngani mangin masadya ka dahil nasayran mo nga sa paeaabuton mangin mayad ing pang-eawas, mabalik ing kusog, ag mangin bata it uman ing itsura. (Basaha ro 2 Corinto 4:16-18.) Pero paalin ka mabuligan it mga igmanghod?

KON PAALIN KA MABULIGAN IT MGA IGMANGHOD

14. Ham-an importante nga bisitahan ag tawagan naton ro mga magueang?

¹⁴ Bisitahi ag tawagi it regular ro mga magueang. (Heb. 13:16) Nagabatyag ro mga magueang nga nagaisaeahanon eang sanda. Ro sangka brother nga indi makahalin sa andang baeay hay naghambae: “Sa bilog nga adlaw, sa sueod eang gid ako it baeay. Ngani na-boring gid ako. Kon amat, pamatyag ko hay matsa pareho ako sa magueang nga leon nga nakakulong sa hawla. Ngani nadismaya gid ako ag naugot.” Kon ginabisitahan naton ro mga magueang, ginapabatyag naton nga importante sanda katon ag palangga naton sanda. Posibleng may mga panahon nga gusto natong tawagan o bisitahan ro sangka magueang sa atong kongregasyon, pero owa naton ra haobra dahil masako kita. Ngani, ano ro makabulig katon nga obrahon ro “eabing mahaega nga bagay,” pareho it pagbisita sa mga magueang? (Fil. 1:10) Pwede mong isueat ro pangaean it mga magueang sa inyong kongregasyon ag ro petsa kon hin-uno mo sanda i-message o tawagan. Pwede ka mang mag-iskedyul it oras ag adlaw para mabisitahan sanda agud indi mo ra malipatan.

15. Ano ro pwedeng obrahon ku mga bataon ag ku mga magueang it magkaibahan?

¹⁵ Kon sangka bataon ka, basi ginaisip mo kon ano ro pwede mong iistorya o obrahon kon makaibahan mo ro sangka magueang. Pero indi mo kinahang-ean nga magkabaeaka. Mangin mayad ka eang nga amigo. (Hulu. 17:17) Istoryaha ro mga magueang bago o pagkatapos it miting sa kongregasyon. Pwede mo sandang pangutan-on it andang paborito nga teksto o kon ano ro makabueo-bueo nga mga bagay nga andang gin-obra kat bata pa sanda. Pwede mo man sandang sampiton nga magtan-aw kamo it sangka video sa JW Broadcasting^®. Pwede mo pa gid sandang buligan sa praktikal nga mga paagi. Halimbawa, pwede mo sandang buligan sa pag-update it andang cellphone o tablet, o downloadan it pinakabag-o nga mga publikasyon nga atong ginatun-an. Ro sangka sister nga si Carol hay naghambae: “Pwede nyo mang sampiton kami nga mga magueang sa mga bagay nga nailaan nyong obrahon. Maskin magueang eon ako, gusto ko gihapon nga i-enjoy ang kabuhi. Gusto kong mag-shopping, magkaon sa mga restaurant, ag magpamasyar sa manami nga mga lugar.” Ag ro sister nga si Maira hay naghambae: “Sambilog sa ang mga amiga hay 90 nga dag-on eon, 57 nga dag-on ro amon nga agwat. Pero nalilipatan ko ra dahil gahinibayag kami ag magkaibahan kami nga nagapamantaw it mga pelikula. Ag kon may mga problema kami, nagapangayo kami it advice sa kada isaea.”

16. Ham-an mayad nga ibhan naton ro mga magueang kon nagaagto sanda sa doktor?

¹⁶ Ibhi sanda kon nagaagto sa doktor. Euwas sa paghatod kanda sa ospital, pwede mo sandang ibhan agud masigurado nga ginatratar sanda it mayad ku doktor o nurse ag ginataw-an sanda it bulig nga kinahang-ean nanda. (Isa. 1:17) Mabuligan mo man ro mga magueang kon ilista mo ro ginahambae it andang doktor. Ro magueang nga sister nga si Ruth hay naghambae: “Kon amat, kon ako eang ro mag-agto sa doktor, owa imaw nagapati sa ang ginahambae. Ginahambaean ako it mga doktor nga, ‘Owa ka man it sakit, sa ing isip malang ron.’ Pero kon may kaibahan ako, mayad ro pagtratar kang it mga doktor. Nagapasaeamat gid ako sa mga igmanghod nga nagtao it oras para ibhan ako.”

17. Ano ing pwedeng obrahon para makaibahan ro mga magueang sa pagministeryo?

¹⁷ Ibhi sanda sa pagministeryo. Ro ibang mga magueang hay indi eon kaya nga magpamaeay-baeay. Pwede mo baeang sampiton ro sangka magueang nga sister nga mag-cart witnessing? Pwede kang magdaea it bangko para kana agud makapungko imaw maeapit sa cart. O pwede mo baeang sampiton ro sangka magueang nga brother nga ibhan ka sa pag-Bible study, o daehon ing study sa anang baeay agud igto lang mag-study? Pwedeng mag-obra it kahimusan ro mga elder nga hiwaton sa baeay it mga magueang ro miting para sa field service agud makasunod sanda sa pag-preaching. Masadya gid si Jehova kon tinguhaan naton nga ipakita ro pagpalangga ag pagrespeto sa mga magueang.—Hulu. 3:27; Roma 12:10.

18. Ano ro atong pagatalakayon sa masunod nga artikulo?

¹⁸ Ginpadumdom kita it rayang artikulo nga palangga ni Jehova ag importante kana ro mga magueang. Ag ruyon man ro atong ginabatyag para kanda! Mga magueang namon nga igmanghod, maskin abu ro inyong problema, buligan kamo ni Jehova nga makapabilin nga masadya. (Sal. 37:25) Makapalig-on gid masayran nga may manami kamo nga paeaabuton! Pero paalin mat-a makapabilin nga masadya ro mga igmanghod nga nagadipara it andang magueang eon nga kapamilya, unga, o amigo nga nagamasakit? Talakayon naton sa masunod nga artikulo ro sabat sa rayang pangutana.