Ham-an Kinahang-ean Naton ro Pangtubos?

1-2. Ham-an kinahang-ean nga may mag-euwas katon? (Roma 7:22-24) (Tan-awa man ro piktyur.)

IMADYINA rayang sitwasyon: Nawasak ro bilding, ag may tawo nga na-trap sa sueod. Buhi imaw, pero indi imaw makahueag ag kinahang-ean na nga may magbulig kana. Ro maobra na eang hay ro pagsinggit it tabang ag mag-eaum nga may magbulig kana.

² Pareho gid karon ro atong sitwasyon. Ham-an? Dahil kat owa nagtuman si Adan kay Jehova, nangin makasasaea imaw. Ag dahil mga inunga kita ni Adan, namana naton ro saea. Bilang resulta, tanan kita hay nakulong sa saea, ag indi naton kayang dueaon ro mga epekto kara. Sa sueat ni apostol Pablo sa mga taga-Roma, ginsugid na kon ano ro atong sitwasyon bilang makasasaea. (Basaha ro Roma 7:22-24.) Nagpakit-euoy imaw nga euwason imaw sa “eawas nga nagadaea [kana] sa kamatayon.” Namana ni Pablo ro saea kay Adan, ngani indi na malikawan ro kamatayon. (Roma 6:23) Pareho man karon ro atong sitwasyon. Ag kinahang-ean nga may mag-euwas katon!

3. Ano ro maobra ni Jehova dahil sa pangtubos?

³ Pagkatapos isugid ni Pablo ro anang malisud nga sitwasyon, ginsugid na man ro manami nga pag-eaum. Pagkatapos nang magpangutana: “Sin-o baea ro magahilway kakon sa rayang eawas nga nagadaea kakon sa kamatayon?” Naghambae imaw: “Saeamat sa Dyos tungod kay Jesu-Cristo nga atong Ginuo!” (Roma 7:25) Ginatukoy kara ni Pablo nga gin-euwas kita ni Jehova paagi sa kamatayon ni Jesus.a Dahil sa pangtubos, (1) mapatawad ni Jehova ro atong mga saea, (2) may pag-eaum kita nga mangin perpekto sa paeaabuton, ag (3) mangin mayad ro atong relasyon kay Jehova. Habang ginatun-an naton rayang mga punto, magadaeum ro atong pagpalangga kay Jehova, “ro Dyos nga ginahalinan it pag-eaum.” (Roma 15:13) Ag mangin mas mapinasaeamaton man kita kay Jesus—ro “nagtubos katon.”—Col. 1:14.

DAHIL SA PANGTUBOS, MAPATAWAD NI JEHOVA RO ATONG MGA SAEA

4-5. Ham-an kinahang-ean naton tanan ro pangtubos? (Manugwali 7:20)

⁴ Kinahang-ean naton ro pangtubos para mapatawad ro atong mga saea. Tanan kita hay nagakasaea sa atong ginahambae o ginaobra. (Basaha ro Manugwali 7:20.) Ro pila nga mga saea hay seryoso. Halimbawa, base sa Mosaikong Kasugoan, ro sangka Israelinhon nga nagpangbabayi o nagpang-eaeaki , o nakapatay hay dapat patyon. (Lev. 20:10; Num. 35:30, 31) Pero maskin bukon it makaruyon kaseryoso ro saea nga haobra, saea man gihapon ra. Halimbawa, naghambae si David: “Bantayan ko ro akong eak-ang agud indi makasaea ro akong dila.” (Sal. 39:1) Ginapakita kara nga maskin sa atong ginahambae hay pwede kitang makasaea.—Sant. 3:2.

⁵ May mga nahambae ka baea sa iba nga kunta owa mo lang ginhambae? May mga haobra ka baea nga ginnuoean mo? Tanan kita hay nakahambae o nakaobra it mga bagay nga ginanuoean naton. Ginahambae it Biblia: “Kon maghambae kita nga owa kita it saea, ginadaya naton ro atong kaugalingon ag ro kamatuoran owa katon.”—1 Juan 1:8.

6-7. Ano ro gintao ni Jehova para mapatawad ro atong mga saea? (Tan-awa man ro piktyur.)

⁶ Gintao ni Jehova ro pangtubos para mapatawad ro atong mga saea. (Efe. 1:7) Pero, owa ra nagakahueogan nga ginabalewala na ro atong mga saea. Naakig si Jehova kon makasaea kita. (Isa. 59:2) Dahil sa anang katarungan, nag-obra imaw it paagi nga magatao kana it rason nga patawaron ro atong mga saea.

⁷ Ginapatuman it Mosaikong Kasugoan nga ro mga Israelinhon hay dapat maghaead it sapat para mapatawad ro andang mga saea. (Lev. 4:27-31; 17:11) Ruyong mga haead hay anino eang it mas mabahoe nga haead ni Jesus ag magaresulta ra it mga pagpakamayad. Ro anang kamatayon hay nagtao kay Jehova it rason para patawaron ro atong mga saea. Naintindihan ni Pablo kon ano ro benepisyo it kamatayon ni Jesus para sa mga tawo. Kat ginsueatan na ro mga Cristyano sa Corinto, ginsueat na ro maeain nga mga bagay nga andang gin-obra dati ag ginhambaean na rayon sanda: “Paagi sa ginhimo ni Ginuong Jesu-Kristo ag paagi sa gahom ku Espiritu it atong Dyos hay ginlimpyuhan eon kamo sa inyong mga saea, ginpaeain it Dyos nga mangin ana nga balaan nga katawhan, ag ginbilang nga matarong sa anang panueok.”—1 Cor. 6:9-11.

8. Pilang domingo bago ro Memoryal, ano ing pwedeng pamaeandungan?

⁸ Pilang domingo bago ro Memoryal, pwede mong pamaeandungan ro mga benepisyo it pagpatawad ni Jehova kimo. Halimbawa, dahil sa pangtubos, indi ka eon makonsensya sa mga saea nga haobra mo dati nga ginhinuesuean mo eon. Nalisdan ka baea nga magpati nga napatawad ka eon ni Jehova? Posibleng nahambae mo sa ing sarili, ‘Sayod ko nga napatawad eon ako ni Jehova, pero indi ko mapatawad ang sarili.’ Kon ruyon ing ginabatyag, tandai ra: Si Jehova ro isaea nga nagapatawad katon, ag gintaw-an na it awtoridad si Jesus nga maghukom katon. Owa ka gintaw-an ni Jehova o ro maskin sin-o nga tawo it karapatan nga magdesisyon kon sin-o ro anang patawaron o indi. Nagahambae ro Biblia: “Kon kita nagakabuhi sa kahayag, bilang nga [si Jehova] una sa kahayag, . . . ro dugo ni Jesus nga anang Unga nagalimpyo katon sa tanan nga mga saea.” (1 Juan 1:6, 7) Makasalig kita nga matuod ra pareho sa iba pa nga ginaturo it Biblia. Dahil sa pangtubos, may rason si Jehova nga kaeuy-an kita, ag ginahambae it Biblia nga imaw hay “handa sa pagpatawad.”—Sal. 86:5.

DAHIL SA PANGTUBOS, MAY PAG-EAUM KITA NGA MANGIN PERPEKTO

9. Sa Biblia, ano ro buot hambaeon it termino nga “saea”? (Salmo 51:5 ag footnote)

⁹ Sa Biblia, ro termino nga “saea” hay owa eang nagatukoy sa saea nga mga ueobrahon kundi nagatukoy man ra sa pagkabuko’t perpekto nga namana naton. (Basaha ro Salmo 51:5 ag footnote.) Dahil sa namana natong saea, makaisip kita ag makaobra it saea nga mga bagay. Ag dahil man kara, nagamasakit kita, nagagueang, ag nagakamatay. Ngani maskin ro eapsag nga owa pa it naobra nga saea hay pwedeng magmasakit ag mamatay. Ginapakita man kara nga maskin ro maeain ag mayad nga tawo hay pwedeng mag-antus ag mamatay. Dahil sa saea ni Adan, namana naton ro pagkabuko’t perpekto.

10. Ano ro nabatyagan nanday Adan ag Eba pagkatapos nandang magkasaea?

¹⁰ Isipa kon ano ro nabatyagan nanday Adan ag Eba pagkatapos nandang magkasaea ag mangin buko’t perpekto. Nabatyagan eagi nanda ro pagkabaeaka ag grabi nga pagkakonsensya dahil owa sanda nagtuman sa sugo it Dyos. (Roma 2:15) Nabatyagan man nanda nga may nagbag-o sa andang sarili, ag bukon ra it mayad. Nabatyagan pa gid nanda nga kinahang-ean nandang tabunan ro andang eawas ag magpanago sa andang Manogtuga. (Gen. 3:7, 8) Raya ro unang beses nga nakabatyag sanday Adan ag Eba it pagkakonsensya, kabaeaka, pagkaduea it kompyansa, kasakit, ag kahuya. Ag padayon nanda ra nga nabatyagan hasta nga namatay sanda.—Gen. 3:16-19.

11. Ano ro epekto katon it atong pagkabuko’t perpekto?

¹¹ Dahil bukon kita it perpekto, nakakabatyag man kita it pagkakonsensya, kahuya, ag kabaeaka. Raya man ro dahilan kon ham-an nagaantus kita sa pisikal ag emosyonal. Maskin pa ginatinguhaan naton nga mangin maayos ro atong kabuhi ag malikawan ro mga problema, may una gihapon nga mga problema. Ham-an? Dahil ginahambae it Biblia nga kita hay “nangin owa it pueos.” (Roma 8:20) Matuod gid ra katon pati man sa tanan nga tawo. Halimbawa, abung tawo makaron ro nagatinguha nga mangin maayos ro palibot, makontrol ro krimen, maduea ro kapobrehon, ag maduea ro inaway. Pero owa gid nanda nasolbar rayang mga problema. Pero dahil sa pangtubos, may matuod kita nga pag-eaum. Ano rayang pag-eaum?

12. Ano nga pag-eaum ro nangin posible dahil sa pangtubos?

¹² Dahil sa pangtubos, nangin posible ro pag-eaum nga “ro mga tinuga pagahilwayon sa pagkaulipon it kamatayon.” (Roma 8:21) Nagakahueogan ra nga kon mangin perpekto eon kita sa paraiso, indi eon kita mag-antus sa pisikal, mental, o emosyonal. Indi eon man kita makabatyag it pagkakonsensya, kabaeaka, pagkaduea it kompyansa, kasakit, o kahuya. Dugang pa, magagahum si Jesus ro “Prinsipe it Paghidait” nga nagbayad it pangtubos para katon. Solbaron na ro tanan nga problema nga indi kayang masolbar it mga tawo.—Isa. 9:6, 7.

13. Pilang domingo bago ro Memoryal, ano pa ing pwedeng pamaeandungan?

¹³ Pamaeandungi ing mangin kabuhi kon perpekto ka eon. Mabugtaw ka kada adlaw nga manami ing pamatyag, owa ka eon nagakabaeaka o ro imong pamilya nga magutom, magmasakit, o mamatay. Maskin makaron pa eang, mabatyagan mo ro katawhay kon ikaw hay “magmalig-on sa pag-eaum . . . pareho ku angkla it atong kabuhi. Malig-on raya ag indi mahueag.” (Heb. 6:18, 19) Pareho it angkla nga nagabulig para mangin balanse ag indi maanod ro baroto, ro pagpamaeandong pirme sa pag-eaum hay makapabakud sa ing pagtuo ag makabulig kimo nga matiis ro maskin alin man nga kalisdanan nga imong ginaatubang makaron. Ngani makasigurado ka nga si Jehova hay “nagatao . . . it baeos sa mga nagausoy kana.” (Heb. 11:6) Ro paumpaw nga imong nabatyagan makaron ag ro matuod nga pag-eaum sa paeaabuton hay nangin posible eang dahil sa pangtubos.

DAHIL SA PANGTUBOS, MAY MAYAD KITA NGA RELASYON KAY JEHOVA

14. Kat nagkasaea sanday Adan ag Eba, ano ro epekto kara sa atong relasyon kay Jehova, ag ham-an?

¹⁴ Kat nagkasaea sanday Adan ag Eba, naduea ro atong mayad nga relasyon kay Jehova. Ginahambae man it Biblia nga napaeayo kita sa atong Manogtuga. (Roma 8:7, 8; Col. 1:21) Ham-an? Dahil perpekto si Jehova ag owa na ginakunsinti ro saea. Nagahambae ro Biblia parti kay Jehova: “Malimpyo gid ro imong mga mata para magtan-aw sa maeain, ag indi mo pagkunsintihon ro kaeainan.” (Hab. 1:13) Ro saea hay nagpaeayo sa relasyon it Dyos ag ku mga tawo. Kon owa it may mag-ayos kara, indi gid kita mangin maeapit sa Dyos. Ro pangtubos ro nag-ayos sa atong nasamad nga relasyon sa Dyos ag nagpaposible nga mangin mayad ra it uman.

15. Paalin ro kamatayon ni Jesus nagpaposible nga mangin mayad it uman ro atong relasyon kay Jehova?

¹⁵ Ginahambae it Biblia nga si Jesus “ro paagi nga mapatawad ro atong mga saea.” (1 Juan 2:2) Paalin ro kamatayon ni Jesus nagpaposible nga mangin mayad it uman ro atong relasyon kay Jehova? Ro kamatayon ni Jesus ro nagtao it rason sa atong perpekto nga Dyos nga mangin mayad it uman ro atong relasyon kana. (Roma 3:23-26) Ginakonsiderar na man nga matarung ratong mga nagasimba kana it matutom bago pa namatay si Jesus. (Gen. 15:1, 6) Paalin? Dahil sigurado si Jehova nga maitao gid it anang Unga nga si Jesus ro pangtubos. (Isa. 46:10) Ro pangtubos ro nangin paagi para mangin mayad it uman ro relasyon it mga tawo sa Dyos.

16. Pilang domingo bago ro Memoryal, ano pa gid ing pwedeng pamaeandungan? (Tan-awa man ro piktyur.)

¹⁶ Pamaeandungi ro mga benepisyo dahil may mayad ka nga relasyon kay Jehova. Halimbawa, basi ginatawag mo nga “Ama” si Jehova pareho sa ginturo katon ni Jesus. (Mat. 6:9) Basi may panahon man nga ginatawag mo si Jehova nga imong “Amigo.” Kon ginagamit naton ro mga termino nga “Ama” o “Amigo,” ginaobra naton ra sa matinahuron ag mapainubuson nga paagi. Ham-an? Dahil makasasaea kita ag indi kita mangin maeapit kay Jehova kon sa atong sarili eang. Makapaeapit eang kita kana dahil sa pangtubos. Ginpaposible ni Jehova nga “makapanumbalik kana ro tanan . . . paagi sa dugo ni Kristo nga nag-ilig tag gineansang imaw.” (Col. 1:19, 20) Ngani may mayad kita nga relasyon kay Jehova makaron maskin pa bukon kita it perpekto.

GINAPAKITA IT PANGTUBOS RO PAGKAMAEUEOY-ON NI JEHOVA

17. Paalin ginapabahoe it pangtubos ro pagkamaeueoy-on ni Jehova? (Efeso 2:4, 5)

¹⁷ Ginapabahoe it pangtubos nga “bugana gid ro kaeuoy” ni Jehova. “Bisan nga patay kita . . . tungod ku atong mga pag-eapas, ana kita ginbuhi.” (Basaha ro Efeso 2:4, 5.) Ratong “mga ginpili para sa kabuhi nga owa it katapusan” hay nagapangayo it bulig dahil sayod nanda nga nakulong sanda sa namana nga saea ag kinahang-ean nga may mag-euwas kanda. (Binu. 13:48) Ginabuligan sanda ni Jehova paagi sa mensahe it Ginharian para makilaea nanda imaw ag ro anang Unga nga si Jesus. (Juan 17:3) Ngani kon gin-isip ni Satanas nga indi eon matuman ro kabubut-on it Dyos dahil nagkasaea sanday Adan ag Eba, saea gid imaw.

18. Habang ginapamaeandungan naton ro pangtubos, ano ro dapat natong dumdomon?

¹⁸ Habang ginapamaeandungan naton ro mga benepisyo nga nangin posible dahil sa pangtubos, dapat natong dumdomon ro panguna nga rason kon ham-an gintao ra ni Jehova. Imbes isipon naton nga ro pangtubos hay para eang sa atong benepisyo, dapat natong dumdomon nga ginagamit ra ni Jehova para sabton ro akusasyon ni Satanas sa hardin it Eden. (Gen. 3:1-5, 15) Paagi sa pangtubos, ginpakabaeaan ni Jehova ro anang pangaean, ag ginpamatud-an nga purilon si Satanas. Euwason na man kita sa saea ag kamatayon, nga nagapamatuod nga imaw ro Dyos it gugma. Ag dahil sa owa it tupong nga kabuot ni Jehova, maskin pa makasasaea kita, gintaw-an na man kita it tsansa nga pamatud-an nga buko’t matuod ro mga ginhambae ni Satanas parti kana. (Hulu. 27:11) Paalin mo mapakita nga nagapasaeamat ka sa pangtubos? Pagasabton naton rayang pangutana sa masunod nga artikulo.