TUEON-AN NGA ARTIKULO 5
KANTA 108 Matutom nga Gugma sang Dios
Kon Paalin Kita Makabenepisyo sa Pagpalangga ni Jehova
“Si Cristo Jesus nag-abot sa kalibutan sa pag-euwas it mga makasasaea.”—1 TIM. 1:15.
RO ATONG MATUN-AN
Kon paalin kita makabenepisyo sa pangtubos ag kon paalin naton mapakita ro pagpasaeamat kay Jehova.
1. Ano ro pwede natong obrahon para mapasadya si Jehova?
IMADYINA nga gintaw-an mo ing pinalangga it espesyal nga regalo nga manami ag pwede nang magamit. Masubuan ka gid kon masayran mo nga ginbalewala ag gintago na eang ing gintao nga regalo! Pero, sigurado gid nga masadyahan ka kon magpasaeamat imaw ag gamiton na ra. Ano ro matun-an naton kara? Gintao ni Jehova ro anang Unga para katon. Ngani masadyahan gid si Jehova kon ipakita naton ro pagpasaeamat sa anang maeahaeon nga regalo ag sa anang pagpalangga, nga nagpahueag kana nga itao ro pangtubos!—Juan 3:16; Roma 5:7, 8.
2. Ano ro atong pagatalakayon sa rayang artikulo?
2 Habang nagataliwan ro mga dinag-on, posible nga maduea naton ro pagkamapinasaeamaton sa regalo nga pangtubos. Matsa ginbutang eang naton ro regalo it Dyos sa sangka taeaguan ag ginkalipatan ra. Para indi ra matabo, dapat pirme natong pamaeandungan ro gin-obra it Dyos ag it Cristo para katon. Rayang artikulo hay makabulig katon nga maobra ron. Pagatalakayon naton kon paalin kita makabenepisyo sa pangtubos makaron ag sa paeaabuton. Pagatalakayon ta man kon paalin naton mapakita ro pag-apresyar sa pagpalangga ni Jehova eabi eon gid sa panahon it Memoryal.
KON PAALIN KITA MAKABENEPISYO MAKARON
3. Ano ro sangka paagi nga nakabenepisyo kita sa pangtubos makaron?
3 Nakabenepisyo eon kita makaron sa sakripisyo ku pangtubos it Cristo. Halimbawa, paagi sa pangtubos ginapatawad ni Jehova ro atong mga saea. Bukon imaw it obligado nga patawaron kita, pero gusto nang obrahon ra. Ro mapinasaeamaton nga salmista hay nagkanta: “Ay ikaw, O Jehova, hay mayad ag handa sa pagpatawad.”—Sal. 86:5; 103:3, 10-13.
4. Para kanyo gintao ni Jehova ro pangtubos? (Lucas 5:32; 1 Timoteo 1:15)
4 Ro iba hay nagabatyag nga bukon sanda it nagakadapat sa kapatawaran ni Jehova. Ro matuod, tanan kita hay bukon it nagakadapat nga patawaron. Naintindihan ni apostol Pablo nga “bukon ngani [imaw] it takus nga pagatawgon nga apostol.” Pero naghambae man imaw: “Sa kaeuoy it Dyos, nanginmakara ako makaron.” (1 Cor. 15:9, 10) Kon maghinuesoe kita sa atong mga saea, patawaron kita ni Jehova. Ham-an? Buko’t dahil nagakadapat kita kara kundi dahil palangga na kita. Kon pamatyag mo hay bukon ka it nagakadapat nga patawaron ni Jehova, tandai nga gintao na ro pangtubos buko’t para sa owa’t saea nga mga tawo kundi para sa mahinuesueon nga mga makasasaea.—Basaha ro Lucas 5:32; 1 Timoteo 1:15.
5. Pwede baeang isipon naton nga nagakadapat kita sa pagpatawad ni Jehova? Ieksplikar.
5 Indi kita dapat mag-isip nga nagakadapat kita nga patawaron ni Jehova dahil eang mabuhay eon kita nga nagaalagad kana. Syempre, naapresyar ni Jehova ro atong katutom kana. (Heb. 6:10) Gintao na ro anang Unga bilang libre nga regalo, buko’t bilang bayad sa atong pag-alagad kana. Kon ginaisip naton nga nagakadapat kita sa kaeuoy o pagpatawad ni Jehova dahil eang sa atong pag-alagad kana, matsa ginahambae naton nga indi eon naton kinahang-ean ro pangtubos ni Jesus.—Ikumpara ro Galacia 2:21.
6. Ham-an nangin mahugod si Pablo sa pag-alagad kay Jehova?
6 Sayod ni Pablo nga buko’t kahugod sa pag-alagad ro paagi para mabaton na ro kaeuoy it Dyos. Pero ham-an nangin mahugod gid imaw sa pag-alagad kay Jehova? Buko’t para pamatud-an nga nagakadapat imaw sa pagpatawad it Dyos, kundi para ipakita ro pagpasaeamat sa owa it katumbas nga kabuot ni Jehova. (Efe. 3:7) Pareho kay Pablo, padayon kita nga nagaalagad it mahugod kay Jehova buko’t para mabaton ro anang kaeuoy kundi para ipakita ro pagpasaeamat kana.
7. Ano pa ro sambilog nga paagi nga nakabenepisyo kita makaron sa pangtubos? (Roma 5:1; Santiago 2:23)
7 Ro sambilog pa nga paagi nga nakabenepisyo kita makaron sa pangtubos hay pwede kita mangin maeapit nga amigo ni Jehova.a Sa ginsambit sa nagtaliwan nga artikulo, halin kat gin-unga kita, imposible nga mangin amigo kita it Dyos. Pero dahil sa pangtubos, posible eon nga “may paghidait kita sa Dyos” ag pwede kita mangin maeapit nga amigo nana.— Basaha ro Roma 5:1; Santiago 2:23.
8. Ham-an nagapasaeamat kita kay Jehova sa pribilehiyo nga pangamuyo?
8 Ro pagpangamuyo kay Jehova hay sangka espesyal nga bagay nga pwede natong obrahon dahil maeapit nga amigo naton imaw. Ginapamatian ni Jehova bukon eang ro pangpubliko nga mga pangamuyo it anang katawhan kon nagatipon sanda, kundi pati man ro personal nga pangamuyo it kada isaea katon. Ro pangamuyo hay makapakalma katon ag makapatawhay sa atong isip, pero bukon eang it ruyon ro maobra it pangamuyo. Mapabakud kara ro atong pagpakig-amigo sa Dyos. (Sal. 65:2; Sant. 4:8; 1 Juan 5:14) Kat iya si Jesus sa eugta, pirme imaw nga nagapangamuyo dahil sayod na nga nagapamati si Jehova ag makabulig ra nga magbakud ro anang relasyon sa anang Ama. (Luc. 5:16) Nagapasaeamat gid kita nga paagi sa sakripisyo ni Jesus, pwede kita mangin amigo ni Jehova ag maistorya naton imaw sa pangamuyo!
KON PAALIN KITA MAKABENEPISYO SA PAEAABUTON
9. Paalin makabenepisyo sa pangtubos ro mga matutom nga nagasimba kay Jehova sa paeaabuton?
9 Paalin makabenepisyo sa pangtubos ro matutom nga mga nagasimba kay Jehova sa paeaabuton? Taw-an na sanda it kabuhi nga owa it katapusan. Abu ro nagaisip nga imposible ra dahil ro mga tawo hay nagakamatay. Pero ro orihinal nga katuyuan ni Jehova para sa mga tawo hay mabuhi sa owa it katapusan. Kon owa nagpakasaea si Adan, owa it tawo nga magaisip nga imposible ro kabuhi nga owa it katapusan. Ag maskin malisud makaron patihan ro kabuhi nga owa it katapusan, nagapati kita nga matabo ra dahil sayod naton nga ginbayad ni Jehova ro pinakamataas nga bili—ro kabuhi it anang bugtong nga Unga.—Roma 8:32.
10. Ano ro ginaeauman it mga pinili ag ku ibang karnero?
10 Maskin ro kabuhi nga owa’t katapusan hay sa paeaabuton pa, gusto ni Jehova nga pamaeandungan naton ra makaron. Ginaeauman it mga pinili ro exciting nanda nga kabuhi sa eangit bilang manoggahum sa bilog nga eugta kaibahan it Cristo. (Pah. 20:6) Ginaeauman man it ibang karnero nga mabuhi sanda sa Paraiso nga eugta nga owa eon it kasakit ag pag-antus. (Pah. 21:3, 4) Sambilog ka baea sa ibang karnero nga may pag-eaum nga mabuhi sa owa it katapusan iya sa eugta? Rayang pag-eaum hay bukon it mas manaba sa kabuhi sa eangit! Gintuga it Dyos ro mga tawo para mabuhi iya sa eugta. Ngani, ro kabuhi nga owa it katapusan iya sa eugta hay makapasadya gid katon.
11-12. Ano ro pila sa mga pagpakamayad sa Paraiso ro ginaeauman naton? (Tan-awa man ro piktyur.)
11 Imadyina kon ano ing mangin kabuhi sa Paraiso nga eugta. Indi ka eon magkabaeaka nga basi magmasakit ka o mamatay. (Isa. 25:8; 33:24) Itao ni Jehova ro tanan nga bagay nga gusto mo. Alin ing gustong tun-an igto? Gusto mo baeang tun-an ro parti sa mga sapat? Gusto mo baeang magkaantigo sa pag-drawing ag sa pagpatukar it mga instrumento sa musika? Sigurado nga kinahang-ean igto ro kaantigo mag-design ag magpatindog it mga baeay. Kinahang-ean man ro kaantigo mag-eaha, mag-obra it mga gamit sa pagpananum, magtanum ag magdipara kara. (Isa. 35:1; 65:21) Kon mabuhi ka eon sa owa it katapusan, maobra mo eon ro tanan nga mga bagay nga gustong-gusto mo.
12 Kasadya gid kon abiabihon naton ro mga banhawon sa paeaabuton! (Binu. 24:15) Imadyina man ro kasadya habang ginatun-an mo ro mga tinuga ni Jehova. (Sal. 104:24; Isa. 11:9) Eabaw sa tanan, indi ka eon makaobra it saea, ngani maalagad mo si Jehova nga owa ginakonsensya! Ibaylo mo baea rayang mga pagpakamayad sa paeaabuton sa ‘pagpangalipay sa saea sa matag-od eamang nga tyempo’? (Heb. 11:25) Syempre indi! Sulit gid nga mag-obra it mga pagsakripisyo makaron para mabaton naton rayang mga pagpakamayad. Tandai nga ro Paraisong eugta hay bukon eang it basta pag-eaum sa paeaabuton. Sa indi magbuhay, mangin matuod ra nga lugar nga pagaestaran naton. Nangin posible eang ra tanan dahil palangga gid kita ni Jehova, ngani gintao na ro anang Unga bilang regalo!
Ano nga mga pagpakamayad sa Paraiso ro ginapaabot mo gid? (Tan-awa ro parapo 11-12)
MAGPASAEAMAT SA PAGPALANGGA NI JEHOVA
13. Paalin naton mapakita ro pagpasaeamat sa pagpalangga ni Jehova? (2 Corinto 6:1)
13 Paalin naton mapakita ro pagpasaeamat kay Jehova sa gintao na nga pangtubos? Kon ginauna naton sa atong kabuhi ro pag-alagad kana. (Mat. 6:33) Ro rason kon ham-an namatay si Jesus hay “agud nga ro nagakabuhi indi eon magkabuhi para sa andang kaugalingon, kundi para kay Cristo nga namatay ag ginbanhaw tungod kanda.” (2 Cor. 5:15) Sigurado gid nga owa kita naila nga indi naton mabaton ro katuyuan it owa’t katumbas nga kabuot ni Jehova.—Basaha ro 2 Corinto 6:1.
14. Paalin naton mapakita nga nagasalig kita sa paggiya ni Jehova?
14 Mapakita man naton ro pagpasaeamat sa pagpalangga ni Jehova paagi sa pagsalig sa anang paggiya. Paalin? Kon nagaobra kita it mga desisyon pareho sa kon ano nga klasi it edukasyon ro atong pilion o ano nga trabaho ro atong batunon, dapat natong isipon kon ano ro gusto ni Jehova nga obrahon naton. (1 Cor. 10:31; 2 Cor. 5:7) Kon magdesisyon kita base sa atong pagtuo kay Jehova, mangin mas mabakud ro atong pagtuo ag pagpakig-amigo kana. Ag mangin mas sigurado kita sa atong pag-eaum nga mabuhi sa owa it katapusan.—Roma 5:3-5; Sant. 2:21, 22.
15. Paalin naton mapakita ro atong pagpasaeamat sa panahon it Memoryal?
15 May sambilog pa nga paagi para mapakita naton ro pagpasaeamat sa pagpalangga ni Jehova. Raya hay paagi sa pagtao it atong bilog nga masarangan sa panahon it Memoryal agud ipakita nga nagapasaeamat kita kay Jehova sa pangtubos. Euwas sa pagplano nga maka-attend it Memoryal, pwede man natong imbitahan ro iba nga mag-attend. (1 Tim. 2:4) Ieksplikar sa imong mga gin-imbita kon alin ro ginaobra sa Memoryal. Makabulig kon ipatan-aw mo kanda ro mga video sa jw.org/akl nga Ham-an Namatay si Jesus? ag Dumdoma ro Kamatayon ni Jesus. Dapat siguraduhon it mga elder nga maimbitahan ro mga inactive. Imadyina ro kasadya sa eangit pati man sa eugta kon magbalik eon sa panong ni Jehova ro pila sa anang mga karnero nga naduea! (Luc. 15:4-7) Sa Memoryal, tinguhaan naton nga abiabihon ro kada isaea bukon eang ro mga bag-uhan kundi pati man ro mga mabuhay eon nga owa naka-attend. Gusto naton nga mabatyagan nanda nga welcome gid sanda!—Roma 12:13.
16. Ham-an manami nga dugangan naton ro atong pag-alagad kay Jehova sa panahon it Memoryal?
16 Madugangan mo baea ing espiritwal nga mga ueobrahon sa panahon it Memoryal? Kon obrahon naton ra, mapakita naton ro pagpasaeamat sa tanan nga gin-obra it Dyos ag it Cristo para katon. Kon mas abu ro atong ginaobra sa pag-alagad kay Jehova, mas maeksperyinsyahan naton ro anang pagsuporta. Ag bilang resulta, mas magabakud ro atong pagsalig kana. (1 Cor. 3:9) Siguraduha man nga maobra mo ro pagbasa it Biblia sa Memoryal nga makita sa Pag-usisa sa Kasulatan Adlaw-adlaw o sa chart nga makita sa workbook para sa midweek miting. Pwede mo mang gamiton ruyong mga teksto sa Biblia sa ing personal nga pagtuon.
17. Ano ro nagapasadya kay Jehova? (Tan-awa man ro kahon nga “Kon Paalin Naton Mapakita ro Pagpasaeamat kay Jehova.”)
17 Basi indi pwede sa ing sitwasyon ro pila sa ginsambit nga mga suhistyon sa rayang artikulo. Pero, tandai nga owa man ginakumpara ni Jehova ing maobra sa maobra it iba. Sayod na kon mauno mo imaw kapalangga. Nasadyahan imaw kon nakikita na nga tinagipusuon ka nga nagapasaeamat sa anang espesyal nga regalo, ro pangtubos.—1 Sam. 16:7; Mar. 12:41-44.
18. Ham-an nagapasaeamat gid kita kay Jehova nga Dyos ag kay Jesu-Cristo?
18 Paagi eang gid sa pangtubos, pwede kita mapatawad sa atong mga saea, mangin amigo ni Jehova, ag may pag-eaum nga mabuhi sa owa it katapusan. Kabay pirme natong ipakita ro pagpasaeamat sa pagpalangga ni Jehova nga nagpahueag kana nga itao katon rayang mga pagpakamayad. (1 Juan 4:19) Kabay ipakita man naton ro apresasyon kay Jesus nga nagpamatuod it anang pagpalangga paagi sa pagtao it anang kabuhi para katon!—Juan 15:13.
KANTA 154 Gugma nga Wala sing Katapusan
a Ginpatawad eon ni Jehova ro mga nagasimba kana bago pa ginbayad ni Jesus ro pangtubos. Maobra ra ni Jehova dahil nagasalig imaw nga kaya it anang Unga nga mangin matutom hasta sa kamatayon. Ngani, para kay Jehova ro pangtubos hay habayad eon bago pa mamatay si Jesus.—Roma 3:25.