Paalin Mo Mapakita nga Nagapasaeamat Ka sa Pangtubos?

1-2. Ano ro dapat natong obrahon dahil gintao ni Jesus ro anang kabuhi bilang pangtubos, ag ham-an? (2 Corinto 5:14, 15) (Tan-awa man ro piktyur.)

KON na-trap ka sa nawasak nga bilding ag may nagbulig kimo, ano ing batyagon sa tawo nga nag-euwas sa ing kabuhi? Siguradong gusto mo gid imaw pasaeamatan it personal ag ihambae kana nga indi mo gid malipatan ro anang gin-obra kimo.

² Sa natun-an naton ku nagtaliwan nga artikulo, indi naton maeuwas ro atong sarili sa mga epekto it atong namana nga saea. Pero dahil sa pangtubos, (1) mapatawad ni Jehova ro atong mga saea, (2) may pag-eaum kita nga mangin perpekto sa paeaabuton, ag (3) mangin mayad ro atong relasyon kay Jehova. Bilang resulta, may pag-eaum kita nga mabuhi sa owa’t katapusan sa bag-ong kalibutan ni Jehova. Ginpakita ni Jesus ro anang mabahoe nga pagpalangga sa mga tawo kat gintao na ro anang kabuhi para katon. Ag mabuhay na eon nga palangga ro mga tawo bago pa imaw nag-agto iya sa eugta. (Hulu. 8:30, 31) Nagsueat si apostol Pablo nga ‘ginapahueag kita ku gugma ni Cristo.’ (Basaha ro 2 Corinto 5:14, 15.) Nagakahueogan ra nga dapat natong ipakita nga nagapasaeamat kita sa pagpalangga ni Jesus ag owa naton ginakalipatan ro anang gin-obra para katon.

3. Ham-an buko’t paeareho ro pagpakita it pagpasaeamat it kada isaea katon sa pangtubos?

³ Ano ing obrahon para mapakita nga nagapasaeamat ka sa pangtubos? Posibleng buko’t pareho ing sabat sa sabat it iba. Sa pag-ilustrar, imadyina ro tatlong ka tawo nga nagaagto sa pareho nga lugar, pero ro kada isaea kanda hay naghalin sa iba-ibang syudad. Iba-iba ro andang ginaagyan para makaabot sa andang destinasyon. Pareho kara, posibleng iba-iba man ro atong paagi it pagpakita it pagpasaeamat sa pangtubos. Ag nakadepende ra kon ikaw hay sangka Bible study, bautismado nga Cristyano, o mabuhay eon nga owa nagaalagad kay Jehova kaibahan ro kongregasyon. Talakayon naton makaron kon paalin mo mapakita ing pagpasaeamat sa pangtubos.

KON IKAW HAY SANGKA BIBLE STUDY

4. Ano ro nakikita ni Jehova sa mga Bible study?

⁴ Kon ikaw hay Bible study, isipa ra: Gusto mo nga masayran ro parti kay Jehova ag ro mga ginaturo it Biblia. Nagapakita ra nga gusto ni Jehova nga mangin amigo ka ag buligan ka nana nga maobra ra. (Juan 6:44; Binu. 13:48) “Si Jehova ro nagausisa it mga tagipusuon.” Nagakahueogan ra nga nakikita na ing mga pagtinguha para makilaea imaw, ag masadya imaw nga makita nga nagaobra ka it mga pagbag-o sa ing kabuhi agud mapasadya imaw. (Hulu. 17:3; 27:11) Ro pangtubos ro nagpaposible para mangin maeapit ro atong relasyon kay Jehova. (Roma 5:10, 11) Indi ra pagkalipati.

5. Paalin maaplikar it mga Bible study ro ginahambae sa Filipos 3:16?

⁵ Kon sangka Bible study ka, paalin mo mapakita ing pagpasaeamat sa pangtubos? Ro sangka paagi hay ro pag-aplikar sa eaygay ni apostol Pablo sa mga taga-Filipos: “Ro kinahang-ean eang hay magpadayon kita sa pagkabuhi suno sa sueondan nga atong ginasunod hasta makaron.” (Fil. 3:16) Gin-translate it sambilog pa nga bersyon it Biblia rayang bersikulo: “Dapat padayon kita nga magtikang sa daean nga atong pagaagtunan.” Ngani, indi gid pagpasugti ro maskin alin o maskin sin-o nga magpugong kimo sa padayon nga pagtikang sa daean nga paagto sa kabuhi.—Mat. 7:14; Luc. 9:62.

6. Ano ro pwedeng obrahon it mga Bible study kon nalisdan sanda nga mag-obra it mga pagbag-o? (Deuteronomio 30:11-14) (Tan-awa man ro piktyur.)

⁶ Ano ing pwedeng obrahon kon nalisdan ka nga patihan ing natun-an sa Biblia? Mag-research parti kara ag ipangamuyo kay Jehova nga buligan ka nga mas maintindihan ra it mayad. (Sal. 86:11) Kon nalisdan ka gihapon nga maintindihan ra, indi anay ra pag-inisipa, ag padayon eang sa pagtuon dahil maintindihan mo man ra sa ulihi. Pero, paalin kon nalisdan ka nga aywan ro ueobrahon nga owa nagapasadya kay Jehova? Tandai nga owa man nagapangayo si Jehova it indi naton makaya. Kaya mong obrahon kon ano ro makapasadya kana. (Basaha ro Deuteronomio 30:11-14.) Ag nagpromisa si Jehova nga buligan ka nana. (Isa. 41:10, 13; 1 Cor. 10:13) Ngani indi magpundo. Imbes pag-inisipon ro kalisdanan nga imong ginaatubang, isipa ro mayad nga mga bagay nga gintao ni Jehova para kimo—eakip kara ro kahimusan it pangtubos. Habang nagadaeum ing pagpalangga kay Jehova, mahambae mo nga “ro anang mga sugo bukon man it mabudlay.”—1 Juan 5:3.a

7. Ano ro dapat pamaeandungan it mga bataon nga ginpabahoe sa kamatuoran?

⁷ Kamusta kamo nga mga bataon nga ginpabahoe sa kamatuoran? Kamo hay mga Bible study man. Ro matuod, kamo ro pinakaimportante nga Bible study it inyong mga ginikanan. Nagahambae ro Biblia: “Magpaeapit kamo sa Dyos, ag ro Dyos magapaeapit kinyo.” (Sant. 4:8; 1 Cron. 28:9) Kon mag-obra ka it paagi para mangin maeapit kay Jehova, mangin maeapit man imaw kimo. Owa ka nakita ni Jehova dahil nagbahoe ka sa Saksi nga pamilya. Kundi, nakita ka nana dahil gusto na nga mangin amigo ka. Ano ro nagpaposible para may personal ka nga pagpakig-amigo kay Jehova? Ro pangtubos—ro sangka bagay nga indi mo gid dapat pagkalipatan. (Roma 5:1, 2) Ngani bago ka mag-attend it Memoryal sa rayang dag-on, pamaeandungi kon ano ro gin-obra ni Jehova ag ni Jesus para kimo. Rayon isipa kon paalin mo magamit ing kabuhi makaron ag kon ano nga mga goal ing pwedeng obrahon para ipakita ing pagpasaeamat kay Jehova.b

KON IKAW HAY SANGKA BAUTISMADO

8. Paalin ginpakita it bautismado nga mga Cristyano ro andang pagtuo sa pangtubos?

⁸ Kon sangka bautismado ka nga Cristyano, ginpakita mo eon ing pagtuo sa pangtubos sa abu nga paagi. Halimbawa, nag-obra ka it mga pagbag-o para mapasadya si Jehova ag mangin maeapit nga amigo nana. Gintuman mo ro sugo ni Jesus nga iwali ro mayad nga balita sa mga tawo ag tur-an sanda parti kay Jehova ag kay Jesus. Gindedikar mo ing sarili kay Jehova ag nagpabautismo. Nakaatubang ka baea it pagkontra o paghingabot dahil nagaalagad ka kay Jehova? (2 Tim. 3:12) Ro imong pagtiis hay nagapakita nga palangga mo si Jehova ag nagapasaeamat ka sa pangtubos nga anang gintao paagi sa anang Unga.—Heb. 12:2, 3.

9. Sa ano dapat maghaeong ro bautismado nga mga Cristyano?

⁹ Bilang bautismado nga mga Cristyano, dapat kitang maghaeong dahil posibleng maduea ro atong apresasyon sa pangtubos. Paalin ron matabo? Tan-awa ro natabo sa mga Cristyano kato sa Efeso. Nagpakita sanda it pagtiis ag ginkomendahan sanda ni Jesus. Pero, ginhambaean na sanda: “May owa ako nailai kinyo. Ro inyong paghigugma kakon kat nagtuo kamo kakon hay ginpabay-an eon ninyo nga maduea.” (Pah. 2:3, 4) Ginapakita it ginhambae ni Jesus nga posibleng mangin rutina lang ro pagsimba it sangka Cristyano. Ruyong igmanghod hay posibleng nagapangamuyo man, naga-attend sa mga miting, ag naga-preaching, pero ginaobra na eang ra dahil nakasanayan na eon ra. Bukon eon ro pagpalangga ro nagapahueag kana. Ano ing pwedeng obrahon kon mabatyagan mo nga amat-amat eon nga nagakaduea ing pagpalangga kay Jehova?

10. Paalin mo maaplikar ro ginhambae ni Pablo kay Timoteo nga dapat nang obrahon? (1 Timoteo 4:13, 15)

¹⁰ Ginhambae ni apostol Pablo kay Timoteo nga pirme nang isipon ro kalidad it anang pagsimba kay Jehova ag obrahon ro anang pinakamayad sa pag-alagad. (Basaha ro 1 Timoteo 4:13, 15.) Pwede mo mang isipon kon ano ing pwedeng obrahon agud padayon ka nga mangin mahugod sa pag-alagad kay Jehova. (Roma 12:11) Halimbawa, basi pwede mong tun-an it mayad ro mga ginatun-an sa miting. Makabulig ra kimo nga mas makapukos sa miting. O basi pwede kang mag-usoy it mahipos nga lugar sa ing personal nga pagtuon para mapamaeandungan mo it mayad ing mga natun-an. Makabulig ra kimo nga mas makabenepisyo sa ing pagtuon. Pareho sa pagdugang it kahoy agud padayon nga magdabdab ro kaeayo, kinahang-ean mo man nga padayon nga obrahon rayang mga bagay para padayon ka nga mangin mapinasaeamaton sa pangtubos ag sa iba pang mga bagay nga gintao kimo ni Jehova. Pilang domingo bago ro Memoryal, pwede mo mang pamaeandungan ro mayad nga mga bagay nga na-enjoy mo dahil sambilog ka sa mga Saksi ni Jehova. Siguradong makabulig ra kimo nga mangin mas mapinasaeamaton sa pangtubos, kon siin raya ro rason kon ham-an may maeapit ka nga relasyon kay Jehova.

11-12. Kon mabatyagan mo kon amat nga ing kahugod hay bukon eon it pareho dati, nagakahueogan baea ra nga owa eon kimo ro espiritu ni Jehova? Ieksplikar. (Tan-awa man ro piktyur.)

¹¹ Kon mabatyagan mo kon amat nga ing kahugod hay bukon eon it pareho dati, indi maeuyahan it buot o mag-isip nga owa eon kimo ro espiritu ni Jehova. Dumdoma nga ginhambae ni apostol Pablo sa mga taga-Corinto nga maskin imaw kon amat hay nakabatyag nga kontra sa anang kagustuhan ro pagwali. Pero padayon na ra nga gin-obra dahil sayod na nga ana ra nga responsibilidad. (1 Cor. 9:17) Ano ro atong matun-an kana?

¹² Posibleng nakabatyag man kon amat si Pablo nga owa it gana sa pagwali. Pero, owa imaw nagpundo sa pagwali maskin ruyon ro anang ginabatyag. Matuead mo man ro anang determinasyon. Mangin determinado nga obrahon ro tama maskin owa ka it gana nga obrahon ra. Ngani mangamuyo kay Jehova nga taw-an ka it ‘kagustuhan ag ikasarang sa pagtuman.’ (Fil. 2:13) Padayon nga mangin aktibo sa ing espiritwal nga rutina. Makasalig ka nga sa indi magbuhay, magabakud it uman ing pagpalangga kay Jehova ag ing kahugod sa pag-alagad kana.

13. Ano ro atong obrahon para masigurado nga ‘nagakabuhi kita sa pagtuo’?

¹³ Kon amat, mayad man nga usisaon naton ro atong sarili kon nagakabuhi baea kita pareho sa ginhambae ni Pablo sa 2 Corinto 13:5: “Usisaa ro inyong kaugalingon, agud masayran ninyo kon baea nagakabuhi kamo sa pagtuo.” Halimbawa, pwede natong pangutan-on ro atong sarili: ‘Ginauna ko baea ro intereses it Ginharian sa ang kabuhi?’ (Mat. 6:33) ‘Ro ang ginapili baea nga kalingawan hay nagapakita nga ginakaugtan ko ro maeain?’ (Sal. 97:10) ‘Ginatinguhaan ko baea nga ipakita ro kalinong ag paghiusa sa mga igmanghod?’ (Efe. 4:2, 3) Mayad gid nga pamaeandungan rayang mga bagay sa panahon it Memoryal. Kon dumdomon naton ro mga gin-obra ni Jehova ag ni Jesus para katon, mapakita naton ro atong pagpasaeamat kay Jehova ag ginapakita naton nga nagakabuhi kita kay Cristo bukon it sa atong sarili, pareho sa ginhambae ni Pablo.c

KON IKAW HAY MABUHAY EON NGA OWA NAGAALAGAD KAY JEHOVA

14. Ano ro posibleng rason kon ham-an owa eon naga-attend ro pila nga mga igmanghod sa atong mga miting?

¹⁴ Ro pila nga mga igmanghod hay owa eon naga-attend sa atong mga miting pagkatapos nandang mag-alagad it matutom kay Jehova sa sueod it pilang buean o dag-on. Ham-an? Ro pila kanda hay nalisdan gid sa “mga paealigban [o, kabaeaka] sa rayang kabuhi.” (Luc. 21:34) Ro iba mat-a hay nasandad sa mga ginahambae o ginaobra it ibang mga igmanghod. (Sant. 3:2) Ro iba pa gid hay nakaobra it seryoso nga saea ag nahuya sandang magpabulig. Ano man ro rason, ano ing pwedeng obrahon kon mabuhay ka eon nga owa nagaalagad kay Jehova? Dahil sa pagpalangga ni Jehova ag ni Jesus kimo paagi sa pangtubos, napalig-on ka nga obrahon ro ano?

15. Paalin ginapakita ni Jehova nga nagakabaeaka imaw sa karnero nga naduea? (Ezequiel 34:11, 12, 16)

¹⁵ Isipa kon ano ro ginabatyag ni Jehova sa anang mga karnero nga naduea. Owa na sanda ginakalipatan kundi ginausoy na gid sanda. Ginapakaon na sanda ag ginabuligan nga magbalik kana. (Basaha ro Ezequiel 34:11, 12, 16.) Maobra man baea kimo ra ni Jehova? Huo! Ro imong pagbasa it rayang artikulo hay nagapakita nga gusto mo gihapon imaw mapasadya. May nakita si Jehova nga mayad nga mga bagay kimo kat ginbuligan ka nana nga makilaea imaw ag mangin parte it anang katawhan. May nakikita gihapon imaw nga mayad kimo, ag gusto na nga magbalik ka sa anang pamilya.

16. Ano ro makabulig sa naduea nga karnero nga magbalik kay Jehova? (Tan-awa man ro piktyur.)

¹⁶ Raya ro makapalig-on nga ginahambae it brosyur nga Magbalik kay Jehova: “Makasalig ka nga indi ka pagpabay-an ni Jehova kon magbalik ka kana. Buligan ka nana nga maatubang ro kabaeaka, maduea ro eain it buot, ag mangin malinong ing isip ag tagipusuon nga resulta it malimpyo nga konsensya. Rayon mabatyagan mo it uman nga mapahueag ka sa pag-alagad kay Jehova kaibahan ro mga igmanghod.” Dumdoma man nga gusto gid it mga elder nga buligan ka. Pwede sandang mangin “pareho it paeanaguan sa hangin, sangka lugar nga mapanilungan sa bagyo.” (Isa. 32:2) Para ipakita nga naapresyar mo ro pangtubos, pangutan-a ing sarili, ‘Ano ang pwedeng obrahon makaron para ‘mahusay ro mga bagay’ kay Jehova?’ (Isa. 1:18; 1 Ped. 2:25) Halimbawa, pwede ka baea nga mag-attend it miting sa Kingdom Hall? Pwede mo baea nga paeapitan ro sambilog sa mga elder ag hambaeon nga gusto mong magbalik kay Jehova? Posibleng mangabay imaw sa sangka igmanghod nga studyhan ka it uman. Makasigurado ka nga pakamayron ni Jehova ing mga pagtinguha nga magbalik kana ag mapakita ing pagpasaeamat sa pangtubos.

ANO ING OBRAHON?

17-18. Paalin naton magamit it mayad ro atong oras bago ro Memoryal sa rayang dag-on?

¹⁷ Ginhambae ni Jesus nga gintao ro pangtubos “agud nga ro kada nagatuo kana indi eon mamatay, kundi may kabuhi nga owa it katapusan.” (Juan 3:16) Ro pangtubos ro paagi ni Jehova para euwason kita sa epekto it saea ag kamatayon. Indi dapat naton ra pagkalipatan. (Roma 3:23, 24; 2 Cor. 6:1) Pilang adlaw bago ro Memoryal, magtao it oras para pamaeandungan ro ginpakita nga pagpalangga ni Jehova ag ni Jesus para katon, ag rayang pagpalangga ro magapahueag katon nga ipakita ro atong pagpasaeamat kanda.

¹⁸ Paalin mo mapakita ing pagpasaeamat sa pangtubos? Posibleng buko’t pareho ing sabat sa sabat it iba. Pero makasigurado ka nga pakamayron ni Jehova ro imong mga pagtinguha pareho sa mga igmanghod nga nagatinguha man nga “indi eon magkabuhi para sa andang kaugalingon, kundi para kay Cristo nga namatay ag nabanhaw tungod kanda.”—2 Cor. 5:15.