Кичӱ изӱ ай

Иегова баштапкы чактыҥ христиандарын солынып турган айалгаларга эптежип турганы учун алкап туратан. Темдектезе, апостол Павел ле Варнава Листрада јарлап турарда кандый учурал болгонын кӧрӱп ийектер. Озо баштап улус олорды јылу уткыган. Је оноҥ бу улустыҥ кезиги, ӧштӱлердиҥ кӧрӱмине киреле, Павелди таштарла шыбалап салган. Мынаҥ улам ол арай божобогон (Ап. ижи 14:19). Је Павел ле Варнава мындый табаруга табарткан да болзо, бир де јалтанбай, оноҥ ло ары ӧскӧ јерде јарлаган. Мынаҥ кандый туза болды? Олор «кӧп ӱренчиктер» белетеген ле ака-эјелердиҥ бӱдӱмјизин тыҥыткан (Ап. ижи 14:21, 22). Айдарда, Павел ле Варнаваныҥ истежӱлердеҥ јалтанбай јарлаганынаҥ кӧп улуска јаан туза болды. Анайып ла ок бис те Иегованыҥ берген јакылтазын оноҥ ло ары јалтанбай, чӧкӧбӧй бӱдӱрип турзаас, кӧп алкыштар аларыс. w23.04 16—17, абз. 13, 14

Сарнаачы Давидте кӧп ӧштӱлер болгон, оныҥ учун ол јаантайын Иегованаҥ болуш сураган. Иегова оныҥ мӱргӱӱлдерин уккан ла каруузын берген деп, ол бир де алаҥзыбаган. Бис те алаҥзыбас аргалу. Иегова биске турумкай артарга, ойгор ло ийде-кӱчтӱ болорго болужар деп, Агару Бичиктеҥ јарт кӧрӧдис. Ол биске кӧгӱс билегис ажыра эмезе ого бажырбай да турган улус ажыра болужар аргалу. Чын ла, кезикте Иегованыҥ каруузы сураганыстаҥ башка болот. Андый да болзо, мӱргӱӱлдерис качан да каруу јок артпай јат. Је ол нени, качан берерин бистеҥ јакшы билер. Оныҥ учун Иеговага оноҥ ло ары мӱргӱгер. Ол слерди бӱгӱнги де кӱнде, келер де ӧйдӧ бир де артыргыспас. Иегова јаҥы јӱрӱмде кажы ла ишчизиниҥ кӱӱнин бӱдӱрип салар (Сар. 145:16). w23.05 8, абз. 4; 13, абз. 17, 18

Амадугардыҥ тузазын сананып туругар. А кандый туза алараар? Агару Бичикти јазап кычырарга ла кӧптӧдӧ мӱргӱӱрге амадап турган болзогор, Иеговага оноҥ јуук болороор (Сар. 145:18, 19). Ол эмезе кандый бир христиан кылык-јаҥыгарды тыҥыдарга турган болзоор, ака-эјелерге јуук болороор (Кол. 3:14). Оныҥ учун амадулараардыҥ тузазын бичип алала, олорды јаантайын ла кӧрӱп турзаар кайдаар? Амадулараарга јединерге болужатан улусла кожо болуп туругар (Укаа 13:20). Кезикте бистиҥ амадуга јединетен кӱӱнис ӧчӧ берет. Мынаҥ улам амадубыска јединип болбозыс па? Јок, андый эмес. Јеҥил эмес болордоҥ айабас, је амадулараарга јединип алзагар, јаан сӱӱнчи алараар. w23.05 27—28, абз. 5—8

Бис чыгарган јӧптӧристеҥ Кудайдыҥ алдына каруулу деп оҥдоп турзаас, кинчектерди алынарга, тӱзединерге ле база андый кинчек этпеске јеҥил болор. Анайып этсеес, бис бу јолдоҥ чыкпазыс. Темдектезе, слер кинчек эдип ийгенеер. Эмди нени де солыыр арга јок то болзо, ундыбагар, болуп калган немени кайра эдип болбозоор. Оныҥ учун кӱчигерди јылыйтып, бойоорды тегин јерге бурулабагар эмезе актабагар. Анайда ок јастырагар учун улусты да бурулабагар. Андый ӧйдӧ бойыгардыҥ јастырагарды алынып, база анайда этпеске албаданыгар. Јастырагар учун бойыгарды бурулап турган болзоор, јобош тудунып, Иеговага јастырагарды таштазын деп мӱргӱгер (Сар. 25:11; 51:3, 4). Ачындырып ийген кижигердеҥ јаманыгарды таштазын деп сурагар. Керек болзо, аксагалдаҥ да болуш сураарга јараар (Иак. 5:14, 15). Јастыралараардаҥ ӱренигер. Ол тушта Иегова слерди килеер ле болужар деп, бир де алаҥзыбагар (Сар. 103:8—13). w23.08 28—29, абз. 8, 9

Иодай тирӱ јӱрерде, Иоас јакшы керектер эткен. Иодайдаҥ кӧгӱс таскаду алган јиит каан Иегова Кудайды сӱӱндирерге кӱӱнзеген. Је качан Иодай божоп каларда, Иоас Иеговага чындык артпаган ла јайзаҥдардыҥ сӧзине кирип баштаган (2 Лет. 24:4, 17, 18). Иеговага мыны кӧрӧргӧ коркышту ачу болгон. Оныҥ учун Кудай «олорды бойына кайра экелерге, канча катап судурчыларын ийген, је олор судурчыларды укпаган». Олор керек дезе, Иодайдыҥ уулын, Захарияны, да укпаган. Захария дезе судурчы ла абыс болгон. Анайда ок ол Иоаска энези јанынаҥ тӧрӧӧн кижи болгон. А Иоас Захарияны ӧлтӱртип койгон (2 Лет. 22:11; 24:19—22). Ол Иегованаҥ коркыбай барган. Кудай мындый сӧстӧр айткан: «Мени јаман кӧргӧн улус бойлоры да јаман кӧрдирер» (1 Сам. 2:30). Качан Сирияныҥ јаан эмес черӱзи Иудей јериниҥ коркышту јаан черӱзин одо согуп койордо, Сирияныҥ улузы «каанды шыркалу таштап, јӱре бергендер» (2 Лет. 24:24, 25). А кийнинде, Иоастыҥ јалчылары оны ӧлтӱрер деп куучындажала, Захарияныҥ канын тӧккӧни учун, оны ӧлтӱрип койгон. w23.06 18—19, абз. 16, 17

Апостол Павел Эфесте узак ӧйдиҥ туркунына сӱӱнчилӱ јар јарлаган ла ӱренчиктер белетеген (Ап. ижи 19:1, 8—10; 20:20, 21). Павел ол ака-эјелерди сӱӱген, оныҥ учун олорго Иеговага чындык артарга болушкан. Эфестеги христиандар чындыкты билердеҥ озо, тӧгӱн кудай јаҥныҥ ӱредӱлериниҥ ле чӱм-јаҥдарыныҥ олјозында болгон. Анайда ок Эфестеги улус коркышту балыр јӱрӱм јӱрген. Олор театральный постановкаларында, кудай јаҥныҥ байрамдарында да јӱзӱн-базын балыр немелер куучындап, улусты каткыртатан (Эф. 5:3). Мындый керектери учун олорды уйады бир де јибейтен (ӧскӧртӧ айтса, олор «нени де сеспей барган») (Эф. 4:17—19). Олор Кудайдыҥ алдында нези јакшы, нези јаман деп оҥдобой баргандар. Оныҥ учун Павел олор керегинде мынайда бичиген: «Олордыҥ санаазы карачкыда, олор Кудайдыҥ [«берерге турган јӱрӱминеҥ тууралап калган», ЈТ]». Је Эфестеги кезик улус караҥуйдаҥ чыгып калган. w24.03 20, абз. 2, 4; 21, абз. 5, 6

Гедеон јаргычыныҥ ижин бӱдӱрерге тыҥ албаданган. Ол тӱниле мадиандарла јуулашкан. Је олор качарда, Гедеон олорды Изреель деп ӧзӧктӧҥ ала Иордан суунныҥ јаказына јетире истешкен. (Јарг. 7:22). Ол Иордан суунныҥ јаказына келеле, токтоп калды ба? Јок! Гедеон 300 јуучылыла кожо арып та калган болзо, Иордан суунныҥ ол јанына кечип, ӧштӱни оноҥ ары истежип барды. Учы-учында олорды јаба једеле, одо согуп салган (Јарг. 8:4—12). Гедеон Иегова ого ийде-кӱч берер деп, бир де алаҥзыбаган. Иегова ого чын ла ийде-кӱч берген (Јарг. 6:14, 34). Качан Гедеон ло оныҥ јуучылдары мадиандардыҥ каанын сӱрӱжип барадарда, олор тӧӧлӧрлӱ качкан, а Гедеон ло оныҥ јуучылдары јойу сӱрӱшкендер (Јарг. 8:12, 21). Је Кудайдыҥ болужыла Гедеон ло оныҥ јуучылдары тӱҥей ле мадиандарды јаба једеле, олорды одо согуп салды. Бӱгӱнги кӱнде аксагалдар Кудай олорго бойыныҥ ӧйинде ийде-кӱч берер деп, база бир де алаҥзыбай јат. Нениҥ учун дезе Иегова «качан да арыбас ла чылабас» Кудай (Иса. 40:28,29). w23.06 6, абз. 14; 7, абз. 16

Бис, не де болотон болзо, Кудайыска чындык артар аргалу. Иеговага иженигер. Јаргычы Варак Иеговага иженгени учун јеҥӱ алган. Израильдиҥ черӱзинде куйак та, јыда да јок болгон болзо, Иегова олорды коркышту тыҥ мылтык јепселдерлӱ Сисараныҥ черӱзине удура барзын деген (Јарг. 5:8). Иегова судурчы Девора ажыра Варакты 900 јуучыл абралу Сисараныҥ черӱзине удура тӱшсин деп јакарган. Сананып ийзеер де, тӱс јерде ол абралар Варактыҥ черӱзин кырып салар эди. Андый да болзо, Варак Иегованыҥ сӧзин угуп јат. Анайып, Варак черӱзиле кожо Фавор кырдаҥ тӱжӱп јадарда, Иегова теҥеридеҥ ургун јааш ийген. Мынаҥ улам Сисараныҥ абралары балкашка бадалып, туруп калды (Јарг. 4:1—7, 10, 13—16). Анайып Варак Сисараныҥ черӱзин јеҥип алган. Бис те Иеговага ла оныҥ улузы ажыра берилген башкартуларга сӧсуккур болзоос, јеҥип аларыс. w23.07 19, абз. 17, 18

Чыдамкай болзоос, аргадаларыс. Алдындагы ӧйдӧ Кудайдыҥ чындык ишчилери Кудай айткан сӧзин бӱдӱрер деп сакыгандар (Евр. 6:11, 12). Биске база анайып ла эдер керек. Агару Бичик христиандарды јер ишчинеҥ тем алзын деп кӱӱнзедет. (Иак. 5:7, 8, ЈТ) Јер ишчи јерди ӱрендеп, сугарат. Је ол ӱрен качан чыгып келерин билбес. Оныҥ учун ол отургызып салган ажыныҥ тӱжӱмин јууп алар деп иженип, чыдажып сакып јат. Анайып ла бис, Христостыҥ «кандый кӱнде келерин» билбес те болзоос, оныҥ јакылтазын јакшы бӱдӱрерге албаданадыс (Матф. 24:42). Иегова берген сӧзин бӱдӱрип салар деп алаҥзыбай сакып јадыс. Оноҥ башка Иегованыҥ кӱнин сакыырын кӱчсинип, Кудайдаҥ ыраап баштаарыс. Эмезе эмди ле јакшызынатан неме бедирей берердеҥ айабазыс. Је чыдамкай болзоос, учына јетире турумкай артарыс ла аргадаларыс (Мих. 7:7). w23.08 22, абз. 7

Даниил 2:41—43-те бичилген судурды Даниилдиҥ бичигинде ле Ачылта деп бичиктеги судурларла тӱҥдештирип ийзе, оныҥ будыныҥ шагайынаҥ ала таманына јетире тужы — Англо-Американыҥ державазы — деп јарт кӧрӱне берет. А бу дезе телекейде эҥ јаан держава болот. Бу держава керегинде Даниил: «Бу каандык та неде де бек, та неде де бортык болор» — деп айткан. Ол нениҥ учун та неде де бортык болор? Нениҥ учун дезе јымжак той балкаш эдип кӧргӱзилген тегин албаты бу державага бойыныҥ темирдий ийде-кӱчин толо тузаланарга бербей јат. Даниилдиҥ чалу керегинде бичигенинеҥ јаан учурлу чындыкты билип аладыс. Баштапкызы, Англо-Американский держава коркышту ийде-кӱчтӱ, ол бойыныҥ ийде-кӱчин канча катап кӧргӱскен. Темдектезе, эки телекейлик јуу-согушта јеҥип алган ороондорго јаан камаанын јетирген. Је оныҥ ийде-кӱчин бойыныҥ ла албатызы кезикте бой-бойлорыла удурлажып, анайда ок башкарып турган јаҥга удура болуп, уйададып јат. Келер де ӧйдӧ андый ла болор. Экинчизинде, Кудайдыҥ Каандыгы бу телекейдиҥ башкаруларын јоголтып јатса, бу ла держава башкарып турган болор. w23.08 10—11, абз. 12, 13

Кезикте Давид кӱчтердеҥ улам ийде-кӱчин јылыйткан (Сар. 18:4, 5). Је Иегова оныҥ кӱӱнин кӧдӱрип салатан. Ол бойыныҥ чучурап калган најызын «јажыл ӧлӧҥдӱ јалаҥдарга» экелип, сууныҥ јанында амырадып туратан. Мынайып Давидтиҥ кӱӱни кӧдӱрилип, ийде-кӱчи кирип келзе, ол Иеговага оноҥ ло ары иштеер аргалу болгон (Сар. 18:28—32; 23:2). Кӱч учуралдар бисте де болуп јат. Је Иегова бисти болуш јок артыргыспай турган (Ыйы 3:22; Кол. 1:11). Давидтиҥ јӱрӱми ӧлӱмниҥ кырында болуп туратан. Ого кӱчтӱ ӧштӱлери амыр бербейтен. Је Иегованыҥ сӱӱжинеҥ улам Давид недеҥ де коркыбаган. Кажы ла айалгада Иегова оныҥ јанында деп сескен. Оныҥ учун ол Иегова керегинде мынайып кожоҥдогон: «Ол меге недеҥ де коркыбаска болушкан» (Сар. 34:4). Давидте коркыйтан шылтактар кӧп тӧ болгон болзо, је Иегованыҥ сӱӱжин сезип турганынаҥ улам ол недеҥ де коркыбайтан. w24.01 30, абз. 15—17

Иоас биске јаман тем кӧргӱскен. Иодай божоп каларда, ол каршузын јетирип турган улусла најылажып, Иегованы сӱӱбей турган иудейлердиҥ јайзаҥдарын угуп баштаган (2 Лет. 24:17, 18). Слер јӧпсинер болороор, олордыҥ јӧбин укканча, Иоас олордоҥ ыраак јӱрген болзо, торт болор эди. Је ол олордыҥ јӧбин уккан. Бир катап оныҥ јуук тӧрӧӧни, Захария, Иоастыҥ санаа-укаазын кийдирерге сананарда, ол оны ӧлтӱрзин деп јакару берген (2 Лет. 24:20, 21; Матф. 23:35). Кандый килемји јок, јаман керек болуп калды! Озо баштап, Иоас јакшы керектер эткен, је кийнинде Кудайдаҥ јана базып, кижи ӧлтӱрген. Оноҥ Иоасты оныҥ ла кулдары ӧлтӱрип салды (2 Лет. 24:22—25). Иоас Иегованыҥ сӧзин угуп, Кудайды сӱӱген улусла најылашкан болзо, оныҥ јӱрӱми чек башка болор эди. w23.09 9, абз. 6

Пётр Кудайга чындык артар аргалу деп, Иисус билген. Оныҥ учун ол бойыныҥ ӱренчигине јылу этире: «Коркыба» — деп айткан. Иисустыҥ мындый бӱдӱмјилӱ айткан сӧстӧринеҥ Пётрдыҥ јӱрӱми солынган. Кийнинде ол Андрейле кожо балык тудар ижин артыргызала, Мессияныҥ кийнинеҥ барган. Бу учун Иегова олорго јаан алкыжын берген (Марк 1:16—18). Иисустыҥ кийнинеҥ барала, Пётр сӱреен кайкамчылу кӧп учуралдар кӧргӧн. Ол Кайраканныҥ улусты јасканын, кӧрмӧстӧрди сӱргенин ле божогон улусты да тиргискенин бойыныҥ кӧзиле кӧргӧн (Матф. 8:14—17; Марк 5:37, 41, 42). Анайда ок Иисус келер ӧйдӧ Каан болотон ӧйин кӧрӱлтеде кӧргӱзип турарда, Пётр оны база кӧргӧн. Бу кӧрӱлтени ол бастыра јӱрӱмине сананып алган (Марк 9:1—8; 2 Пётр 1:16—18). Пётр Иисустыҥ ӱренчиги болбогон болзо, бу кайкалдарды качан да кӧрбӧс эди. Карын ол јастыра санааларына алдыртып, коркыйла, отурып калбаганына сӱреен тыҥ сӱӱнген болор. w23.09 21, абз. 4, 5

Апостол Пётр бойыныҥ баштапкы самаразында тыҥ сӱӱш бир-эки кинчекти эмес, је «кӧп кинчектерди таштаттырып јат» деп айткан (1 Пётр 4:8). Ол канча јыл кайра Иисустыҥ канайып јаманды таштаары керегинде ӱреткенин эске алган болор. Ол ӧйдӧ Пётр 7 катап јаманын таштаары тыҥ деп сананган болор. Је Иисус ого ло бистерге кинчектерди 77 катап таштазын деп айткан, ӧскӧртӧ айтса, ол јаантайын таштаары дегени (Матф. 18:21). Слерге бу коркышту кӱч деп билдирип турган болор. Је слер санааркабагар, нениҥ учун дезе бис ончобыс толо кеминде эмезис, оныҥ учун биске улустыҥ јаманын таштаарга јеҥил эмес болуп јат. Андый да болзо, бойоордыҥ ичеерде ачынып кородобой, ол кижиле јаражып аларга албаданыгар. w23.09 29, абз. 12

Иона балыктыҥ ичинде де болгон болзо, Кудай оныҥ јастыразын алынганын кӧрӱп турган ла оныҥ мӱргӱӱлине каруузын берер деп, бир де алаҥзыбаган. Иегова ого болужар деп ол билген. Оныҥ учун кийнинде, ол Иегованаҥ јаҥы јакылта аларга белен болгон (Иона 2:10—3:4). Слерге санааркаштардаҥ улам, мӱргӱӱрге кӱч болот по? Эмезе ӱренерге ийде-кӱч јетпейт пе? Слерди Иегова сӱреен јакшы оҥдоп турган деп ундыбагар. Оныҥ учун слердиҥ мӱргӱӱлеер тоолу ла сӧстӧҥ турган да болзо, Иегова керектӱ немени слерге тӱҥей ле берер (Эф. 3:20). Слерге эмоциональный ла физический оорунаҥ улам кычырарга јеҥил эмес болзо, Агару Бичиктиҥ ле бистиҥ бичиктердиҥ аудиозын угарга јараар. Анайда ок бистиҥ сайтта кандый бир кожоҥдорды угарга ла видеолорды кӧрӧргӧ јараар. Слер Иеговага мӱргӱп, организацияныҥ берген кӧгӱс курсагын тузаланып турзаар, Иегова слерди кӱчтӱ эдип салар. w23.10 13, абз. 6; 14, абз. 9

Агару байканныҥ ла Иерусалимде тудулган ӧргӧӧлӧрдиҥ ичи тӱҥей болгон. Олор эки кыптаҥ турган: Агару ла Агарудаҥ агару. Олордыҥ ортозында кӧжӧгӧ болгон (Евр. 9:2—5; Чыг. 26:31—33). Агару деп кыпта јарыткыш, фимиам ӧртӧйтӧн тагыл ла агару калаш салатан стол турган. Ары бойыныҥ молјуларын бӱдӱрерге, јӱк ле «майлаткан абыстар» кирер аргалу болгон (Тоол. 3:3, 7, 10). А Агарудаҥ агаруда Иегова бар деп кӧргӱзип турган јӧптӧжӱниҥ алтын ковчеги турган (Чыг. 25:21, 22). Бу кыптӧӧн, кӧжӧгӧниҥ ары јанындӧӧн, јылдыҥ ичинде, бир катап кинчектер ташталар кӱнде, јӱк ле улу абыс киретен (Лев. 16:2, 17). Ол ары кирзе, бойыныҥ ла албатыныҥ кинчектери ташталзын деп, тындулардыҥ канын алып туратан. Кийнинде Иегова бойыныҥ ишчилерине агару байканныҥ кыптары нени темдектеп турганын јартап берген (Евр. 9:6, 7). w23.10 27, абз. 12

Кудайдыҥ Сӧзи бисти бой-бойыбысты сӱӱп турзын деп, кӧп катап кычырат (Иоанн 15:12; Рим. 13:8; 1 Фес. 4:9; 1 Пётр 1:22; 1 Иоанн 4:11). Је сӱӱштиҥ јӱректе барын кем де кӧрӱп болбос. Андый болордо, ака-эјелер бистиҥ сӱӱжисти канайып кӧрӱп ийер? Бис сӱӱжисти сӧстӧрисле, керектерисле кӧргӱзер аргалу. Мындый аргалар бар. «Бой-бойыгарды тӧгӱндебегер» (Зах. 8:16). «Ортогордо амыр-энчӱ болзын» (Марк 9:50). «Улуска тоомјыгарды озо бойоор кӧргӱзигер» (Рим. 12:10, ЈТ). «Бой-бойыгарды акту-кӱӱнигердеҥ јуудып турыгар» (Рим. 15:7, ЈТ). «Акту јӱректеҥ јаманын таштагар» (Кол. 3:13, ЈТ). «Бой-бойыгардыҥ јӱктеригерди апарыжыгар» (Гал. 6:2). «Бой-бойыгарды токунадып туругар» (1 Фес. 4:18, ЈТ). «Бой-бойыгарды тыҥыдыгар» (1 Фес. 5:11). «Бой-бойыгар учун мӱргӱгер» (Иак. 5:16, ЈТ). w23.11 9, абз. 7, 8

Бис кажы ла кӱн, темдектезе, кемле куучындажарын, канайып амыраарын, кандый ӱредӱге кирерин, анайда ок бала-барка, иш-тош ло биле јанынаҥ сурактарда нени эдерин шӱӱп сананадыс. Бу айалгаларда Иеговага бӱдӱп турганыс ченелет. Оныҥ учун бойоордоҥ сурагар: «Мениҥ эдип турган керектеримнеҥ калју телекей удабас јоголор деп ле оныҥ ордына Кудайдыҥ јаҥы телекейи болор деп бӱдӱп турганым кӧрӱнет пе? Эмезе мен келер ӧйгӧ кандый да ижемји јок бир ле кӱнле јӱрӱп турган улус чылап јӱредим бе?» (Матф. 6:19, 20; Лука 12:16—21). Бис јаҥы јӱрӱм сӱреен јуук деп бӱдӱп турзаас, эдип турган керектерис Иегова Кудайысты макка чыгарып турар. Анайда ок истежӱлер башталза, хронический оорулу болзоос, ол эмезе колыбысты бош салгадый оноҥ до ӧскӧ ченелтелер болуп турза, биске бек бӱдӱмји керек болот. Озо баштап бис ченелтени јеҥил ӧдӧ берерис деп сананардаҥ айабазыс. Је ченелте узак ӧтпӧй турза, а ол кӧп сабада андый болуп јат, турумкай артарга ла Кудайга оноҥ ло ары сӱӱнчилӱ иштеерге биске бек бӱдӱмји керек болот (1 Пётр 1:6, 7). w23.04 26—27, абз. 4, 5

Иегова бисти мӱргӱӱлдерис аайынча јӱрерис деп сакып јат. Темдектезе, ака регионныҥ курултайына барарга иштеҥ суранып аларга, Иегованаҥ болуш сурайт. Иегова бойыныҥ ишчизине канайып каруу берер? Ол ого барып суранарга, јалтанбас болорго болужар. Је акага начальникле бойына куучындажар керек. Ол оны баштапкы ла катап суранган кийнинде божотпостоҥ айабас. Оныҥ учун ого база да канча катап куучындажарга келижер болор. Акага кожо иштеп турган кижиле иштеп турган кӱндерин солыжарга эмезе тӧлӧлбӧй турган отпуск та аларга келижер болор. Иегова бисти чӧкӧбӧй мӱргӱзин деп сакыйт. Иисустыҥ сӧстӧринеҥ бис кажы ла мӱргӱӱлистиҥ каруузын капшай ла албазыс деп кӧрӱнет (Лука 11:9). Оныҥ учун колоорды бош салбагар! Такып-такып мӱргӱгер (Лука 18:1—7). Анайып, Иеговага слердиҥ сурап турганаар слерге чын ла керектӱ деп кӧргӱзедеер. Анайда ок Иегова слерге болужар деп бӱдӱп турганаарды кӧргӱзедеер. w23.11 22, абз. 10, 11

Иегова бойыныҥ најызына, Авраамга, оныҥ балазы ажыра јердеги ончо албатылар алкыш алар деп сӧзин берген (Баш. 15:5; 22:18). Авраам бек бӱдӱмјизинеҥ улам Кудай берген сӧзин кыйалтазы јок бӱдӱрер деп алаҥзыбаган. Је јылдар ӧдӱп, Авраамга 100 јаш, оныҥ ӱйине, Саррага, 90 јаш болуп калган да болзо, бала анайып ла чыкпаган (Баш. 21:1—7). Андый да болзо, Агару Бичикте айдылганыла, «ол... кӧп калыктардыҥ адазы боло[рына]» иженип ле бӱдӱп јӱрген (Рим. 4:18). Слер билереер, Авраамныҥ ижемјизи бӱдӱп калган. Узак ӧйгӧ сакыган уулы, Исаак, чыккан. Авраамныҥ ижемјизи неге тӧзӧлӧнгӧн? Авраам Иегованы сӱреен јакшы билетен, оныҥ учун ол Кудай берген сӧзин бӱдӱрер деп, алаҥзу јогынаҥ бӱткен (Рим. 4:21). Анайып, ол бӱдӱмјизи учун Кудайдаҥ јараду алып, акту кижи деп адаткан (Иак. 2:23). w23.12 8, абз. 1, 2

Бӱдӱмјилӱ карындаш ончо молјуларын јакшы бӱдӱрерге албаданат. Иисустыҥ толо кеминде темин кӧрӱп ийектер. Иисус ижин чала-была эмес, јазап бӱдӱрген. Ол Иегованыҥ ончо јакылталарын, кӱч те болзо бӱдӱрген. Ол улусты сӱӱген — анчада ла ӱренчиктерин — олор учун јӱрӱмин берген (Иоанн 13:1). Иисустаҥ тем ал. Сеге берилген јакылтаны акту кӱӱниҥнеҥ бӱдӱрерге албадан. Берилген јакылтаны канайып бӱдӱрерин билбес болзоҥ, јобош болуп, ченемелдӱ акалардаҥ болуш сура. Кезик улус јалкуурып, артык иш эдерин сананбай да јат, је сен андый болбо! (Рим. 12:11). Кажы ла јакылтаны бӱдӱрип јатсаҥ, «улуска чылап эмес, Кайраканга [Иеговага] чылап эт». Баштап алган ижиҥди учына јетирип сал (Кол. 3:23). Је сен толо кеминде эмезиҥ, оныҥ учун бойыҥныҥ кемиҥди билип, јастыраларыҥды алынып тур (Укаа 11:2). w23.12 26, абз. 8

Сууга чӧҥӱрилип, Иегованыҥ билезине кожулары кандый јаан сӱӱнчи! Иегованыҥ најызы болоры јаан кӱндӱ эмей. Бис те Давидтиҥ: «Сениҥ тураҥда јатсын деп, бойыҥа кемди талдап, јууктадып аларыҥ, ол кижи ырысту» — деп айткан сӧзиле јӧпсинип јадыс (Сар. 65:4). Иегова бойыныҥ айылына кемдерди кычырат? Кижи бойы Иеговага јууктаза, Иегова да ого јууктайт (Иак. 4:8). Иеговага јӱрӱмеерди учурлап, сууга чӧҥӱрилзеер, Иегованыҥ алкыштары слерге артыгынча урулар деп, бир де алаҥзыбагар (Мал. 3:10; Иер. 17:8). Је сууга чӧҥӱрилери — Иеговага иштеп баштаганы. Чӧҥӱрилген кийнинеҥ бис Иеговага учурланып јадарыста берген сӧзисти ле кандый ла ченелтелер болзо, Кудайга чындык артарга берген сӧзисти бӱдӱрер учурлу (Эккл. 5:4, 5). Иисустыҥ ӱренчиктери болуп калзаас, биске оныҥ темиле, јакылталарыла јӱрерге албаданар керек (Матф. 28:19, 20; 1 Пётр 2:21). w24.03 8, абз. 1—3

Слерге, эш-нӧкӧрлӧр, бой-бойоорло кожо болорго јарабай турза, нени эдерге јараар? От керегинде сананып ийзеер де. От кенете ле јалбырап кӱйе бербей јат не? Оны кӱйдӱрерге, кижи озо баштап кичинек ооктор салып јат, а јаанада кӱйе берзе, одын салат. Анайып ла ок эш-нӧкӧрлӧргӧ кажы ла кӱн бир эмештеҥ де болзо, бой-бойыла ӧй не ӧткӱрип баштабас? Слерге экӱлегерге јарап турган неме эдип кӧрӱгер (Иак. 3:18). Анайып, слердиҥ сӱӱжигер араайынаҥ кӱйӱп баштаар. Биледе бой-бойын тооры — отко керектӱ кислород болуп јат. Кислород јокко от тӱрген ӧчӱп калат. Анайып ла эш-нӧкӧрлӧр бой-бойын тообой турза, олордыҥ сӱӱжи тӱрген ӧчӧ берердеҥ айабас. Је тооп турза, олордыҥ сӱӱжи јалбырап кӱйет. Слер эш-нӧкӧрӧӧрди тооп турганаар деп сананып турган да болзоор, ол оны сезет пе? w23.05 22, абз. 9; 24, абз. 14, 15

Агару Бичикте Иегованыҥ кезик ишчилери коркыган учуралдар база бар. Олор ӧштӱлердеҥ эмезе ӧскӧ недеҥ-недеҥ улам коркышту тыҥ коркып, ал-санаага да тӱжӱп туратан (Сар. 18:4; 55:1, 5). Бӱгӱнги кӱнде бис те школдо, иште, биледе эмезе јаҥдардаҥ тыҥ коркып турган болорыс. Ол эмезе бисте јазылбайтан оору табылган болор. Андый ӧйлӧрдӧ бойысты кӱчи неге де јетпейтен кичинек бала ошкош деп бодоор болорыс. Је Иегова мындый ӧйдӧ канайып болужып турган? Ол бисти токунадып јат. Оныҥ учун Иеговага мӱргӱп, оныҥ Сӧзин кычырып, оныла кожо болугар (Сар. 77:1, 12—14). Мынайып эдерге темигип калзаар, коркып турган тужыгарда капшай ла теҥеридеги Адагарга баштанараар. Иеговага санааркаштараарды ла недеҥ коркып турганаарды куучындагар. Оноҥ, оныҥ сӧстӧрин Агару Бичиктеҥ угугар. Анайып, Иегова слерди токунадар (Сар. 119:28). w24.01 24—25, абз. 14—16

Кӧгӱс амадубыска јединерге тыҥ кӱӱнзеер керек. Анайып, амадубыска јединерге бастыра ийде-кӱчисти саларыс. Кижи нени-нени эдерге тыҥ кӱӱнзезе, оны эдерге тыҥ албаданып јат. Андый кижиге не де чаптыгын јетирип болбос. Айдарда, амадубыс бӱтсин деп тыҥ кӱӱнзеерге нени эдер керек? Бу керегинде мӱргӱгер. Иегова агару тыны ажыра кӱӱнисти тыҥыдар аргалу (Флп. 2:13). Кезикте бис амадулар тургузар керек деп оҥдоп јадыс. Бу јакшы кӧрӱм-санаа. Је амадуга јединерге тыҥ кӱӱнзебей турзаас, канайдарыс? Иегованыҥ слерге нени эдип турганын сананып туругар (Сар. 143:5). Апостол Павел Иегованыҥ ого берген алкыштарын сананып јӱрген, оныҥ учун ого кӧптӧдӧ иштеген (1 Кор. 15:9, 10; 1 Тим. 1:12—14). Бис те Иегованыҥ болужын канча ла кире кӧп сананып турзаас, амадуларыска јединерге ончо ло кире тыҥ кӱӱнзеп турарыс (Сар. 116:12). w23.05 27, абз. 3—5

Бис теҥеридеги Адабысты мактап турзаас, ол сӱӱнип јат (Сар. 119:108). Је толо кемдӱ эмес улуска кӧрӧ Иегова, Кӱчтӱдеҥ Кӱчтӱ Кудай, бистиҥ мактаганыс ла сӱӱжис јогынаҥ да сӱӱнип јӱрер аргалу. Бис теҥеридеги Адабыстыҥ адын мактап турзаас, Сатананыҥ айтканы тӧгӱн деп кӧргӱзип јадыс. Оныҥ айтканыла болзо, кижи Кудайга болуш аларга ла болуп иштеп турган (Иов 1:9—11; 2:4). Је Иов Кудайга чындык артып, Сатананы тӧгӱнчи деп кӧргӱскен. А бис нени эдер аргалу? Бис оныҥ адын корулаарыс ла Кудайды сӱӱндирерге, ого чындык артарыс (Укаа 27:11). Иегованыҥ адын корулаары биске кажыбыска ла јарап јат! w24.02 8—9, абз. 3—5

Моисей ле Иисус Навин божоп каларда, Иегова бойыныҥ албатызын башкарарга, јаргычылар кӧстӧгӧн. Кийнинде, каандардыҥ ӧйинде, Кудай албатызын судурчылар ажыра башкарган. Чындык каандар судурчылардыҥ сӧзин угуп туратан. Темдектезе, Давид каан судурчы Нафанныҥ айткан сӧзин јобош болуп, алынып туратан (2 Сам. 12:7, 13; 1 Лет. 17:3, 4). Иосафат каан дезе Яхазиилдиҥ айткан сӧзин угуп, Иудей албатыны судурчыларды уксын деп кӱӱнзеткен (2 Лет. 20:14, 15). А Езекия каан кӱч айалгада боло берерде, судурчы Исайяга баштанып, болуш сураган (Иса. 37:1—6). Каандар Иегованыҥ башкартузын бӱдӱрип турза, Иегова бойыныҥ албатызын алкап, корулап туратан (2 Лет. 20:29, 30; 32:22). Иегова олорды судурчылар ажыра башкарып турган деп, јап-јарт кӧрӱнген. w24.02 21, абз. 8

Бис Иегованы сӱӱбей турган улусла куучындажып баштазаас, Сатананы сӱӱндирер эдис. Нениҥ учун дезе ол тушта биске Агару Бичиктиҥ принциптериле јӱрерге кӱч болор. Биске ајарыҥкай болор керек, нениҥ учун дезе эмди бис улусла јӱк кӧстӧҥ кӧскӧ куучындажып турган эмезис, је соцсетьтер ажыра куучындажып јадыс. Бу телекей бисти бойыныҥ јескинчилӱ, јабыс нормаларына ӱредип аларга албаданат. Је оныҥ ийде-кӱчи јетпес (Эф. 4:19, 20). Бойысты корулаарга, мындый сурактарды шӱӱп сананып ийерге јараар: «Мен кожо иштеп турган улусла, кожо ӱренип турган балдарла, Иегованыҥ нормаларыла јӱрбей турган кандый ла улусла канча ла кире ас куучындажарга албаданадым ба? Улус мени фанатик та деп айткылаза, мен Иегованыҥ бийик нормаларынаҥ тудунарга белен бе?» Најыларды христиан јуунда да ајарыҥкай талдаар керек. Апостол Павел 2 Тимофейге 2:20—22-де шак ла бу керегинде айткан. Айдарда, биске Иеговага чындык иштеерге болужатан најылар талдаар керек. w24.03 22—23, абз. 11, 12

Иегова керегинде сананып турзаар, слерде кандый санаалар болот? Бис Кудайды кӧрбӧй дӧ турган болзоос, је Агару Бичиктеҥ ол керегинде кӧп неме билип алар аргалу. Темдектезе, ондо Кудай «кӱн ле куйак», анайда ок «јуда салар от» деп бичилет (Сар. 84:11; Евр. 12:29). Иезекиильдиҥ кӧрӱлтезинде Кудай сапфирдеҥ эдилген ширееде отурган. Оныҥ бойынаҥ дезе, баалу таштардыҥ јаркыны кӧрӱнип турды, а оны айландыра солоҥыдый јаркын јарыдып турды (Иез. 1:26—28). Бис Иегованы кӧзисле кӧрбӧй јадыс, оныҥ учун ол бисти сӱӱп турган деп бӱдерге кезикте кӱч болот. Кезик улус Иегова олорды качан да сӱӱбес деп сананат, нениҥ учун дезе олор сӱӱш деп немени качан да кӧрбӧгӧн. Је Иегова, бистиҥ Ада, сезимдеристи оҥдоп јат. Биске ого бӱдерге ле јууктаарга нениҥ учун кӱч болуп турганын ол база оҥдоп јат. Оныҥ да учун Агару Бичик ажыра биске бойыныҥ сӱӱжин ле јалакайын кӧргӱзет. Сӱӱш — Иегованыҥ кылык-јаҥын эҥ ле јакшы кӧргӱзип турган сӧс (1 Иоанн 4:8). Иегованыҥ ӱзе ле эткен керектеринде сӱӱжи кӧрӱнет. Оныҥ сӱӱжи коркышту јаан, ол оны сӱӱбей де турган улусты сӱӱйт (Матф. 5:44, 45). w24.01 26, абз. 1—3

Иегова израильтяндарды Египеттеҥ чыгарарга, Моисейди кӧстӧгӧн. Кудай чыннаҥ ла Моисей ажыра башкарып турганын кӧскӧ кӧрӱнер немелер ажыра кӧргӱскен. Израильтяндар тӱште булуттый столмоны, а тӱнде оттый столмоны кӧргӧн (Чыг. 13:21). Моисей столмоныҥ кийнинеҥ израильтяндарды ээчидип, Кызыл талайдыҥ јаказына келген. Ол ӧйдӧ албаты чакпыга тӱжӱп калдыс деп бододы, нениҥ учун дезе алдында талай, кийни јанында Египеттиҥ черӱзи сӱрӱжип келип јаткан. Је мында коркыыр шылтак болбогон, нениҥ учун дезе ары албатыны Иегова бойы экелген (Чыг. 14:2). Оноҥ дезе, Кудай израильтяндарды кайкал эдип, аргадап алган (Чыг. 14:26—28). Моисей Иегованы бойыныҥ албатызын чӧл јерде, 40 јылдыҥ туркунына булуттый столмоныҥ болужыла башкарган деп, бир де алаҥзыбаган (Чыг. 33:7, 9, 10). Иегова Моисейле бу столмо ажыра куучындашкан, оноҥ ол албатыга Иегованыҥ башкартузын јетирип туратан. Анайып, израильтяндар Иегова башкартуларды Моисей ажыра берген деп јарт кӧргӧн. w24.02 21, абз. 4, 5