Куран ай

Бу сарында јаан учурлу эки шӱӱлте бар: 1) уур-кӱчтер чындык та улуста болуп јат; 2) Иегова бисти ченелтелердеҥ јайымдап јат. Ол мыны канайып эдет? Иегова бисти јӱрӱмге чын кӧрӱмдӱ болорго болужат. Бис ого иштезеес, сӱӱнчи аларыс деп, ол сӧзин берип турган да болзо, је бу телекейде бис санааркаштар јогынаҥ јӱрерис деп айтпай јат (Иса. 66:14). Анайда ок бисти ижемјибисти јылыйтпазын деп кӱӱнзеп јат. Нениҥ учун дезе келер ӧйдӧ качан да тӱгенбейтен ырысту јӱрӱм болор (2 Кор. 4:16—18). Је эм тура Иегова биске колыбысты бош салбай, оноҥ ло ары јӱрерге болужып јат (Ыйы 3:22—24). Озогы ла эмдиги ӧйдиҥ Иегованыҥ чындык ишчилериниҥ темдеринеҥ бис бойыска кандый ӱредӱ алар аргалу? Кудайдыҥ ишчилеринде сакыбаган јанынаҥ кӱчтер болуп турганын билип аларыс. Је бис Иеговага иженип турзаас, ол бисти качан да артыргыспас ла кандый бир эп-арга болужып берер (Сар. 55:22). w23.04 14—15, абз. 3, 4

Иосиф ле Мария јасак кӱч те болзо, оны бӱдӱрери јанынаҥ сӱреен јаан тем кӧргӱскен (Лука 2:1—6). Марияныҥ кӧчӧлӱ болгоны тогус айга једип калган тушта, олорго јаан тӱп-шӱӱлте эдерге келишкен. Нениҥ учун дезе император Август Римниҥ империязында јадып турган албатыны тооалышка келзин деп јасак чыгарган. Мынаҥ улам Иосиф ле Марияга Вифлеемге барарга келишкен. А бу јол 150 километр кырлар ажыра баратан јол болгон. Иосиф ле Мария мынайып санааркаган болор: «Јолго барып јадала, бала чыга берзе, бис канайдарыс? Марияныҥ ла баланыҥ јӱрӱми јеткерлӱ айалгада болуп калбас па?» Мынаҥ Мессияныҥ јӱрӱми камаанду болгон. Олор бу айалганы јаҥдарга багынбайтан шылтак деп кӧргӧн бӧ? Је Мария ла Иосиф шакпырап санааркаган да болзо, јасакты бӱдӱрдилер. Олордыҥ мындый сӧсуккур болгонын Иегова кӧрӱп, алкап салды. Иосиф ле Мария Вифлеемге эзен-амыр једип бардылар. Анда Марияда су-кадык уул чыккан. Анайып, ол Агару Бичикте айдылган судурдыҥ бӱдерине јӧмӧшти (Мих. 5:2). w23.10 8, абз. 9; 9, абз. 11, 12

Слер колоорды кӧдӱрип, јартамал беререер деп јӱк сананып ла ийеле, коркый берип турган болзоор канайдараар? Слерге јуунныҥ туштажузына јакшы белетенип турары болужар (Укаа 21:5). Материалды канча ла кире јакшы билзеер, колоорды кӧдӱрерге ончо ло кире јеҥил болор. Анайда ок беретен јартамалаар кыска болзын (Укаа 15:23; 17:27). Јартамал канча ла кире кыска болзо, ончо ло кире ас ӧкпӧӧрӧрӧӧр. Слердиҥ бойоордыҥ сӧстӧрӧӧрлӧ берген кыска јартамалдараардаҥ материалга јакшы белетенип, оны јакшы оҥдоп алганаар деп кӧрӱнип јат. Је слер бу јӧптӧрди тузаланарга албадандаар, је тӱҥей ле ӧкпӧӧрип, бир-эки ле јартамал берип турган болзоор канайдар? Иегова слердиҥ албаданып турганаарды сӱреен тыҥ баалап јат деп, бир де ундыбагар (Лука 21:1—4). Ол бисти тобрак деп оҥдоп, бистеҥ эдип болбос немени сакыбай јат (Флп. 4:5). Кӱчигер неге једерин оҥдоп алала, келиштире амаду тургузып, каруу берип јадала ӧкпӧӧрбӧскӧ, Кудайдаҥ јӱрегерге амыр сурагар. Темдектезе, та кем де баштап тарый кыска бир јартамал берерге амаду тургузып алат. w23.04 21, абз. 6—8

Апостол Павел бисти јуулажатан кийимин кийип алган јуучылга тӱҥейлештирет. Јуучыл јуулажарга јаантайын белен болор учурлу. Бисти олорго тӱҥейлеерге јараар. Нениҥ учун дезе бис сӱӱштиҥ ле бӱдӱмјиниҥ кӧӧ-куйагын, анайда ок ижемјиниҥ јуучыл бӧрӱгин кийип алзаас, Иегованыҥ кӱнине белен болорыс. Кӧӧ-куйак јуучылдыҥ јӱрегин корулайт. Анайып ла бӱдӱмји ле сӱӱш бистиҥ сӱрлеп айдылган јӱрегисти корулап јат. Бу кылык-јаҥдар биске Кудайыска чындык артарга ла Иисустыҥ кийнинеҥ барарга болужып јат (Евр. 11:6). Бисте бӱдӱмји бар болзо, Иегованы акту јӱрегистеҥ бедиреп турганы́с учун кайрал аларыс деп алаҥзыбай јадыс. Анайда ок бӱдӱмји кӱчтердиҥ ӧйинде бисти Башчыбыска, Иисуска, чындык артарга кӱӱнзедет. Бӱдӱмји кӱчтерди ӧдӧргӧ болужат. Истежӱлердиҥ де ӧйинде, акча-манатла да кӱчтер болуп турарда, Иеговага чындык арткан ака-эјелердиҥ темдери бар. Бого коштой Кудайга бӱдӱп турзаас, кӧп акча-јӧӧжӧлӱ болотон тузакка тӱшпезис. Бу јанынаҥ биске Каандыктыҥ ижин баштапкы јерге тургузарга, јӱрӱмин јеҥилткен ака-эјелердеҥ тем алар керек. w23.06 10, абз. 8, 9

Бойын тудунары — бойыныҥ санааларын ла керектерин тудуп билери. Бойын тудунары амадуларыска једерге керек болуп јат, анчада ла биске јеҥил эмес болзо эмезе бис оны эдер кӱӱнис јок болзо. Бойын тудунары — агару тынныҥ тӱжӱми. Оныҥ учун бу јакшы кылык-јаҥды ӧскӱрерге, Иегованаҥ агару тын сурагар (Лука 11:13; Гал. 5:22, 23). Сӱреен јакшы айалга сакыбагар, нениҥ учун дезе јӱрӱмде андый болбой јат. Сӱреен јакшы айалга сакызаас, тургускан амадубыска качан да јетпезис. Тургузып алган амадубыс кӱч деп билдирип турза, кӱӱнис ӧчӧ берердеҥ айабас. Слердиҥ амадугар андый болзо, оны кичинек бӧлӱктерге не бӧлӱп албас? Кандый бир кылык-јаҥыгарды тыҥыдарга турган болзоор, оны бир кичинектеҥ тыҥытса кайдар? Ол эмезе Агару Бичикти бӱдӱнге кычырарга турган болзогор, оны бир кичинектеҥ кычырып баштазаар кайдар? w23.05 29, абз. 11—13

Калганчы кӱндердиҥ туркунына Иегова бойыныҥ албатызын организациязы ажыра кӧгӱс курсакла ӱзӱги јогынаҥ јеткилдеп јат. А бу дезе биске «Агару јолдоҥ» чыкпаска болужат (Иса. 48:17; 60:17). Кижи Агару Бичикти ӱренерге јӧпсинип ийзе, ондо «Агару јолго» туруп алатан арга ачылды деп айдарга јараар. Кезик улус бу јолдо барып јадала, оноҥ чыгып, јӱрӱп калат. Је кезиги једер јерге јетпегенче ле, бу јолдоҥ чыкпаска шӱӱп алган. Кандый јерге јетпегенче? «Агару јол» теҥериде јӱретен ижемјилӱ улусты теҥериде «Кудайдыҥ райына» апарат (Ачыл. 2:7). Јерде јӱретен ижемјилӱ улусты Христостыҥ бир муҥ јылга башкаратан ӧйиниҥ учында толо кемине једетен јӱрӱмге апарар. Слер, бу јолло барып јаткандар, бир де кайра кӧрбӧгӧр! Карын, агару јолдыҥ једетен јерине, јаҥы јӱрӱмге јетире, јетпегенчеер, бу јолдо артыгар. w23.05 17, абз. 15; 19, абз. 16—18

Слер Иегованыҥ болужын шӱӱп сананып турзаар, бойоорды Иеговага учурлаарга албадабазаар. Андый кӱн бойы ла једип келер (Сар. 116:12—14). Агару Бичикте Иегова «кандый ла толо кемдӱ јакшы сыйлар» берип турган Ада деп айдылып калган (Иак. 1:17, ЈТ). Эҥ ле јаан сыйларыныҥ бирӱзи — оныҥ Уулыныҥ, Иисустыҥ, толынты тайылгазы. Бу сый слерге Иегованыҥ јуук најызы болотон ло јажын-чакка јӱретен арга ачат (1 Иоанн 4:9, 10). Слер Иеговага јӱрӱмеерди учурлазаар, оныҥ бу да, ӧскӧ дӧ сыйлары учун быйанду болгоноорды кӧргӱзереер (Јаҥ. т. 16:17; 2 Кор. 5:15). w24.03 5, абз. 8

Бӱгӱнги ӧйдӧ улустыҥ кылык-јаҥы коркышту тыҥ ӱрелип бараткан. Мыны кӧрӱп, Лоттыҥ сезимдерин аайлап јадыс. Лот «јарамастулардыҥ јаман кылыгынаҥ арып-чылаган», нениҥ учун дезе теҥеридеги Адазы мындый керектерди кӧрӧр кӱни јок деп билетен (2 Пётр 2:7, 8). Ол Кудайды сӱӱп, оноҥ айап, ӧскӧртӧ айтса, јалтанып туратан. Бу ого айландыра јаткан улустыҥ кӧрӱм-санаазын алынбаска болушкан. Бӱгӱнги кӱнде айалга база андый ла. Је бис Иегованыҥ бийик нормаларыла јӱрӱп, ару артар аргалу. Ару артарга, Иегова Кудайысты сӱӱп, оноҥ айап турарга ӱренер керек Оныҥ учун Иегова биске болужарга, Укаа сӧстӧр деген бичикти берген. Бу бичик бисти чын јӱрерге кӱӱнзедет. Анайда ок бистиҥ ончобыска — эр де, ӱй де улуска, јажы јаан да, јиит те улуска — оныҥ ойгор сӧстӧрин шӱӱп сананары тузалу болор. Бис Иегованаҥ јалтанып турган болзоос, јаман керектер эдип турган улуска бирикпей јадыс. w23.06 20, абз. 1, 2; 21, абз. 5

Слерге, байла, јуук улустараар удурлашкан болор. Ол эмезе слер Кудайдыҥ Каандыгыныҥ ижине ӧйӧӧрди ле кӱчеерди берерге, јӱрӱмеерди јеҥилткен болороор (Матф. 6:33). Иегова слердиҥ эткен ижеерди ӱзе кӧрӱп јат деп, бир де алаҥзыбагар (Евр. 6:10). Слер, байла, Иисустыҥ айткан сӧстӧрин бойоордыҥ јӱрӱмеердеҥ кӧргӧн болороор: «Чынын айдадым слерге: кем айлы-јуртын, эмезе ага-карындажын, эмезе эје-сыйнын, эмезе адазын, эмезе энезин, эмезе бала-барказын, эмезе кыразын Меге болуп, Сӱӱнчилӱ Јарга болуп таштаза, эмдиги ӧйдӧ, бу чакта, айыл-јуртты, ага-карындашты, эје-сыйынды, ада-энени, бала-барканы, кыраны, истедип јӱрӱп, јӱс катап артыктай алар, келер чакта дезе ӱргӱлји јӱрӱмди алар» (Марк 10:29, 30). Иегова слердиҥ ого болуп эткен чыгымдараарды ӱзе бӧктӧп салар (Сар. 37:4). w24.03 9, абз. 5

Иудей јеринде коркышту тыҥ торо башталарда, Сирияныҥ Антиохия деп калазында јадып турган христиандар «Иудейде јаткан карындаштарга арга-кӱчи јеткенче болужар болуп јӧптӧштилер» (Ап. ижи 11:27—30). Је Иудей јери ыраак та болгон болзо, Антиохияныҥ ака-эјелери олорго болужарга тыҥ кӱӱнзеген (1 Иоанн 3:17, 18). Бис тӱбекке тӱшкен ака-эјелерди килеп турганыс деп, база кӧргӱзер аргалу. Темдектезе, аксагалдарга болужарга белен болгонысты айдадыс, телекейлик ишке акча-манатла болужадыс ла тӱбекке тӱшкендер учун мӱргӱйдис. Анайда ок ака-эјелерис эҥ керектӱ немелерге јединбей турган болор. Удабас бистиҥ Кааныс, Иисус Христос, Кудайдыҥ јаргызын бӱдӱрерге келер. Оныҥ учун биске ака-эјелерге килеҥкей болор керек. Ол тушта Иисус биске: «Каандыкты энчиленигер» — деп айдар (Матф. 25:34—40). w23.07 4, абз. 9, 10; 6, абз. 12

Иисус Адазы ла чылап керсӱ болгон. Иегова оны «Израильдиҥ азып јӱрген койлорына» јар айтсын деп, јердӧӧн ийген. Иисус дезе бу јакылтаны бӱдӱрип тура, керсӱ болгонын кӧргӱскен. Бир катап израильтян эмес ӱй кижи оныҥ кызычагын кӧрмӧстӧр ээлеп, кыйнап турарда, Иисусты оны јазып ийзин деп сураган. Иисус дезе бу кижини килеп, оныҥ кызычагын јазып ийди (Матф. 15:21—28). База бир учурал кӧрӱп ийектер. Иисус апостолдорына мынайда айткан: «Менеҥ јана тӱшкен кижидеҥ мен де... јана тӱжерим» (Матф. 10:33). Је качан Пётр Иисустаҥ ӱч катап јана тӱжерде, Иисус оны кату каруузына тургуспады. Карын ол Пётрдыҥ бӱдӱмјизин ле кинчегин алынып турганын кӧргӧн. Оныҥ учун Иисус тирилген кийнинеҥ Пётрга келип, оны сӱӱп турганын ла јаманын таштап турганын айткан (Лука 24:33, 34). Иегова ла Иисус экӱлези керсӱ. А бис керегинде нени айдарга јараар? Иегова бисти база керсӱ болзын деп кӱӱнзейт. w23.07 21—22, абз. 6, 7

Иегова јердиҥ ӱстин рай эдип салар деп, кандый керелер бар? Баштапкызында, Иегова бойы сӧзин берген. Ачылта деп бичикте мынайып айдылган: «Ширееде Отурганы айткан: — „Бат, ончозын јаҥы эдип јайап јадым!“». Иеговада амадузын бӱдӱрерге ойгор до, кӱч те, кӱӱн де бар. Экинчизинде, ол айткан сӧзине бир де алаҥзыбай јат, Иегова оны бӱдӱп калган этире кӧрӧт. Оныҥ учун ол мынайып айткан: «Бу сӧстӧр чындык ла чын», «Бӱтти!» Ӱчинчизинде, Иегова нени баштаган, оны учына јетиргизет. Нениҥ учун дезе ол бойын «Альфа ла Омега» деп айткан (Ачыл. 21:6). Иегова Сатананы тӧгӱнчи ле ол оныҥ амадузына бир де буудак јетирип болбос деп керелеер. Оныҥ учун јарлаар иште кем-кем бу сӧстӧрди угуп: «Бу сӧстӧр чӧрчӧккӧ тӱҥей» — деп айтса, слер ого оноҥ арыгы 5 ле 6 ӱлгерлерди кычырып ийеле, јартап беригер. Бу ӱлгерлердиҥ алдында Иегова бойыныҥ колын салып койгон деп айдарга јараар. Анайып, Кудай берген сӧзин бӱдӱрер деп керелеп салганын кӧргӱзип береригер (Иса. 65:16). w23.11 7, абз. 18, 19

Иегова бу сӧстӧрди Авраамга 75 јаш болордо ло балдар јок тужында айткан. Авраам бу сӧстӧрдиҥ бӱткенин кӧргӧн бӧ? Јок. Ол јӱк ле башталганын кӧргӧн. Авраам Евфрат сууны кечкен кийнинде, база да 25 јыл ӧдӧ берерде, Исаак деп уулду болуп калган. Бу сӱреен јаан кайкал болгон! А база да 60 јылдаҥ Иаков ла Исав деп баркалары чыккан (Евр. 6:15, ЈТ). Је Авраам бала-барказынаҥ улу албаты болуп калганын ла Ханаан јерге киргенин анайып ла кӧрбӧгӧн. Андый да болзо, оныҥ Иеговала колбулары божоордыҥ божогончо бек болгон (Иак. 2:23). Сананып ийзеер де, Авраам тирилип келзе, оныҥ бӱдӱмјизинеҥ ле чыдамкайынаҥ улам јердиҥ бастыра улузы Иегованыҥ алкыжын алган деп билип ийеле, не аайлу сӱӱнгей не! (Баш. 22:18). Бис неге ӱренедис? Бистиҥ кезигис Иегованыҥ сӧзи канайып бӱдерин бойыныҥ кӧзиле кӧрбӧстӧҥ айабас, је Авраам чылап чыдамкай болзоос, Иегова бисти эмди де кайралдаар, келер ӧйдӧ оноҥ јаан алкыштар берер деп, бир де алаҥзыбас аргалу (Марк 10:29, 30). w23.08 24, абз. 14

Уззия каан јиит тужында јобош болгон ло Кудайдаҥ айап јӱретен. Уззия јӱк ле 68 јаш јажаган. Ол бу јылдардыҥ кӧп сабазында Иегованыҥ алкыжын алган (2 Лет. 26:1—4). Уззия Иудеяныҥ ӧштӱлерин кӧп катап јеҥген, Иерусалимди корулаарга, кӧп-кӧп иштер эткен (2 Лет. 26:6—15). Уззия бу ончо немени Иегованыҥ болужыла эткен. Оныҥ учун эткен керектерин эске алган тужында, ол байла, сӱреен тыҥ сӱӱнип туратан (Эккл. 3:12, 13). Је ол, байла, башкартулар берерге ӱренип калган болгон. Мынаҥ улам ого нени ле эдерге јараар деп сананган болор. Бир катап ол Иегованыҥ ӧргӧӧзине киреле, фимиам ӧртӧгӧн. Је каандарга мындый јаҥ берилбеген (2 Лет. 26:16—18). Азария деп улу абыс оны токтодорго албаданарда, Уззия тыҥ ачына берген. Бу ӧйгӧ јетире ол Иеговага чындык иштеген, је бу учуралда Иегова оны баш билинип ийгени учун капкаш балула оорыдып салган (2 Лет. 26:19—21). Ол бийиркенбей, оноҥ ло ары јобош болгон болзо, јӱрӱми чек башка болор эди. w23.09 10, абз. 9, 10

Апостол Пётрдыҥ једикпестери майлаткан кийнинде де јоголбогон. Б. э. 36-чы јылында, Пётр еврей эмес Корнилий деп кижиге агару тын тӱшкенин кӧргӧн. Бу учуралдаҥ «Кудай улустыҥ чырай-бӱдӱжине кӧрбӧй» турган ла ӧскӧ укту улус христиан јуунга кожулар аргалу деп јарт кӧрӱнген (Ап. ижи 10:34, 44, 45). Мыныҥ кийнинде Пётр андый улусла отурып, ажанып туратан, је мынаҥ озо ол оны качан да этпес эди. Је кезик еврей укту христиандар олорго ӧскӧ укту албатыларла кожо ажанарга јарабас деп сананып туратан. Качан Антиохиядӧӧн анайып сананып турган кезик христиандар келерде, Пётр еврей эмес укту акалардаҥ тууралап баштаган. Ол еврей укту христиандарды ачындырып ийбеске мынайып эткен болор. Је апостол Павел мыны кӧрӱп ийеле, Пётрды улустыҥ кӧзинче ле тӱзедип ийген (Гал. 2:13, 14). Андый да болзо, Пётр бойынаҥ чӧкӧбӧй, Иеговага оноҥ ло ары чындык иштеерге албаданган. w23.09 22, абз. 8

Бойоорды шиҥдеп турала, тӱзединетен јер кӧрӱп ийген болзоор, кунукпагар! Бистиҥ јалакай Кудайыс тӱзединерге болужар (1 Пётр 2:3). Апостол Пётр бисти бӱдӱмјилейт: «Кудай... бойы слердиҥ ӱредӱгерди учына јетирер». Качан да Пётр бойын Кудайдыҥ Уулыныҥ јанында болорго турбас деп сананган (Лука 5:8). Је Иегованыҥ ла Иисустыҥ болужынаҥ улам ол колын бош салбай, оноҥ ло ары Иисустыҥ кийнинеҥ барган. Кийнинде Пётрга «Кайраканыстыҥ — Аргадаачы Иисус Христостыҥ мӧҥкӱлик Каандыгына кирер» кӱндӱ эдилген (2 Пётр 1:11). Слер Пётрдаҥ тем алып, колоорды бош салбай, Иеговага слерди оноҥ ло ары ӱредер арга берип турзаар, кайрал эдип, ӱргӱлји јӱрӱм алараар. Ол тушта, слер, «бӱдӱп турганыгардыҥ амадузына — тыныгарды аргадаарына» једеригер (1 Пётр 1:9). w23.09 31, абз. 16, 17

Јебрен ӧйдӧ Агару байканды айландыра чедендеп салган јер — кӱрентик, болгон. Ондо абыстар бойыныҥ молјуларын бӱдӱретен. Анайда ок ондо јаан јес тагыл ла суулу јес чан болгон. Абыстар бойыныҥ ижин бӱдӱрерге, оноҥ суу алып, јунунгылап туратан (Чыг. 30:17—20; 40:6—8). Бӱгӱнги кӱнде јерде јӱрген Христостыҥ майлаткан карындаштары кӧгӱс ӧргӧӧниҥ ич јанында, кӱрентикте чындык иштегилеп јат. Јаан суулу чан олорго ло бастыра христиандарга нравственный ла кӧгӱс јанынаҥ ару артар керек деп эске алындырат. А «кара-бајырт» улус керегинде нени айдарга јараар? Олор кайда иштегилеп јат? Апостол Иоанныҥ кӧргӧниле болзо, олор «ширеениҥ алдында... тургандар». Бу дезе олор кӧгӱс ӧргӧӧниҥ тыш јанында, кӱрентикте Кудайга «тӱни-тӱжи бажырып јадылар» деп кӧргӱзет (Ачыл. 7:9, 13—15). Бис Иегова Кудайыска јаан быйанду, нениҥ учун дезе ол биске оныҥ улу кӧгӱс ӧргӧӧзинде бажыратан арга берген! w23.10 28, абз. 15, 16

Иегова биске аксагалдар ажыра болужат (Иса. 32:1, 2). Оныҥ учун слерди та не де санааркадып турган болзо, бойоордыҥ аксагалдараарла куучындажып ийеер. Олордыҥ болужын јектебей, карын, быйанду болуп, алыгар. Ол тушта Иегова слерди кӱчтӱ эдип салар. Анайда ок христиандарда јажын-чакка јӱретен кайкамчылу арга бар. Кезиги — јердеги райда јадар, а кезиги — теҥеридеги Каандыкта јадар. Бу ижемји кандый ла ченелтелерди ӧдӧргӧ, сӱӱнчилӱ јарды јарлаарга, анайда ок јуундагы берген јакылталарды бӱдӱрерге ийде-кӱч берет (1 Фес. 1:3). Бу ижемји апостол Павелди де тыҥыткан. Ол «кӱч айалгаларда јӱр[ет]», улус оны «кыстайдылар», «истейдилер» деп бичиген. Ол, керек дезе, ӧлӱмниҥ кырында да болгон (2 Кор. 4:8—10). Павелге ченелтелерди чыдажып ӧдӧргӧ ижемји болушкан (2 Кор. 4:16—18). Ол бойыныҥ теҥериде јадар ижемјизин сӱреен тыҥ баалаган. Павелди ижемји керегинде тереҥ шӱӱп сананганы кӱчтӱ эдетен. w23.10 15—16, абз. 14—17

Мӱргӱп јатсагар: «Иеговага мениҥ сурагымды бӱдӱрерге, эмди эптӱ ӧй бӧ?» — деп сананыгар. Бис сураганысты капшай ла бӱдӱрзин деп кӱӱнзеп турган болорыс. Је ол бистиҥ сураганысты бӱдӱретен ӧй качан болорын бистеҥ јакшы билер (Евр. 4:16). Бис сурагыстыҥ каруузын капшай ла албазаас, Иегова биске «јок» деп айткан деп сананарыс. Је Иегова «эмди эмес» деп айдып турган болор. Темдектезе, оору-јоболынаҥ јазыларга турган карындаш Иегованаҥ болуш сурайт. Је Иегова оныҥ оорузын кайкал ажыра јазып ийген болзо, Сатана Иегованы јамандаарга шылтак табып ийер эди. Сатана карындашты Иеговага оны јазып ийгени учун иштеп турган деп айдар эди (Иов 1:9—11; 2:4). Је Иегова ончо ооруларды јоголтотон ӧйди тургузып салган (Иса. 33:24; Ачыл. 21:3, 4). Ол ӧй келгенче биске кайкал ажыра јазылып каларыс деп сакыбас керек. Оныҥ учун карындаш колын бош салбай, оору-јоболыла тартыжып, оноҥ ары иштеерге, Иегованаҥ ийде-кӱч ле јӱрегине амыр сураар аргалу. w23.11 23, абз. 13

Самсон тыҥ јастырган да болзо, бир де чӧкӧбӧгӧн. Ол Кудайдыҥ берген јакылтазын оноҥ ло ары бӱдӱрерге белен болгон (Јарг. 16:28—30). Оныҥ учун Самсон Иегованы: «Филистимляндардаҥ ӧч алайын» — деп сураган. Чындык Кудай оныҥ мӱргӱӱлин угуп, ого коркышту јаан ийде-кӱч берген. Мыныҥ болужыла Самсон коркышту кӧп филистимляндарды ӧлтӱрип салган. Бӱдӱн јӱрӱмине де ол ончо кире кӧп филистимляндарды ӧлтӱрбеген. Самсон бойыныҥ јастыразы учун шыралаган да болзо, Кудайдыҥ табын бӱдӱрерге тыҥ кӱӱнзеген. Бисти јастырганыс учун тӱзеткен болзо, ол эмезе јуундагы молјуларысты айрып салган болзо, чӧкӧбӧс керек. Иегова бистиҥ јастырагысты таштаарга белен деп ундыбай јӱректер (Сар. 103:8, 9). Бис јастырган да болзоос, ол биске јаҥы јакару берер аргалу. Бойыныҥ ӧйинде Самсонго ийде-кӱч бергени чилеп, биске де ийде-кӱч берер. w23.09 6, абз. 15, 16

«Турумкай болзоос, Кудайдыҥ јарадузын аларыс». Айса бисте кӱчтер болуп турза, Иеговага јарап турган ба? Јок эмей. Је ченелтерде чындык артканыска ол сӱӱнип јат. Мынаҥ улам бис Кудайдыҥ јарадузын аладыс. Бистиҥ турумкай болгонысты кӧрӱп, Иегова бисле оморкойт! (Сар. 5:12). Авраамныҥ темин сананып ийзеер де. Ондо коркышту кӱч ченелтелер болгон. Је ол олордыҥ кажызын ла турумкай ӧдӱп чыккан. Оныҥ учун Иегова оны најым деп адап, чындык кижи деп кӧргӧн (Баш. 15:6; Рим. 4:13, 22). Ол слер де керегинде анайып ла айтсын деп кӱӱнзейдеер эмей. Кудай биске јарадузын јӱк ле кӧп јакылталарлу, кӧп молјуларлу болзоос, берип турган эмес, је кӱч ӧйлӧрдӧ ого чындык артсаас берет. Кажы ла кижи турумкай болор аргалу. Турумкай болоры кижиниҥ јажынаҥ, айалгаларынаҥ ла аргаларынаҥ камаанду эмес. Слер эм тургуза кандый бир ченелте ӧдӱп турганаар ба? Эйе болзо, ундыбагар: Иегова слердиҥ ого чындык артып турганаарды кӧрӱп јат. Кудайдыҥ кӧзинде јаман неме этпей турганыс деп билип турзаас, Иегова бисти јарадып турган деп алаҥзыбай јадыс. Јарадып турганында алаҥзыбай турзаас, бис кайрал јок артпазыс. Бот мынайып бистиҥ ижемјибис тыҥыйт. w23.12 11, абз. 13, 14

Христиан кижиге улусла куучындажып билер керек. Андый кижи улусты лаптап угат, олордыҥ сезимдерине ле санааларына ајару эдет (Укаа 20:5). Је мыны эдерге, улустыҥ ӱнине, чырайына, кыймыгына ајару эдерге ӱренип алар керек. Айдарда, улусла ӧй ӧткӱрип турзаҥ, јакшы болор. Нениҥ учун дезе сен јӱк ле СМС ла мессенджер ажыра куучындажып турзаҥ, кижиниҥ бойыла јолугып, кӧстӧҥ кӧскӧ куучындажарга кӱч болот. Оныҥ учун улусла јӱк ле электронный эдимдер ажыра куучындашпай, олордыҥ бойыла куучындажатан аргалар бедире (2 Иоанн 12). Анайда ок кӧгӱзи тереҥ христиан кижи бойын ла билезин јеткилдеер учурлу (1 Тим. 5:8). Јиит тужыҥда неге-неге ӱренип алзаҥ, керектӱ иш табарга јеҥил болор (Ап. ижи 18:2, 3; 20:34; Эф. 4:28). Оныҥ учун иштеҥкей бол ло баштап алган немеҥди учына јетире эдерге ӱренип ал. Ол тушта сени улус бӱдӱмјилӱ кижи деп кӧрӧр. А андый кижи качан да иш јок артпас! w23.12 27, абз. 12, 13

Агару Бичикте «Иегованыҥ кӱни» дегени Кӱчтӱдеҥ Кӱчтӱ Кудай ӧштӱлерин јаргылаар ла бойыныҥ ишчилерин аргадап алар ӧйди темдектейт. Алдындагы ӧйдӧ Иегова кезик албатыларды јаргылап туратан (Иса. 13:1, 6; Иез. 13:5; Соф. 1:8). Эмдиги ӧйдӧ «Иегованыҥ кӱни» Улу Вавилонго табару эткениле башталып, Армагеддон деп јуу-согушла божоор. Ол «кӱнде» аргаданып аларга, эмди ле белетенер керек. Бисти Иисус улу тӱбекке јаантайын белен болзын деп ӱреткен (Матф. 24:21; Лука 12:40). Апостол Павел 1 Фессалоникадагыларга Иегованыҥ јаргылайтан улу кӱнине белетенип аларга болужатан бир канча јакшы темдер айткан. Кудайдыҥ кӱни эмеш оноҥ келер деп, Павел билген (2 Фес. 2:1—3). Је андый да болзо, апостол Павел ака-эјелерди ол кӱн эртен ле баштала берер чылап белетенип турзын деп ӱреткен. Бу јӧпти бистер де тузаланар аргалу. w23.06 8, абз. 1, 2

1970 јылдыҥ учында Токиодо 60 этажту тура тудулган. Ол ӧйдӧ улус ол тураны јерсилкиништерди канайып чыдашкай не деп кайкашкан. Бу тура канайып тудулган? Бу тура јер силкинзе келген толкунаҥ аҥтарылбай, карын оны араайладып ийетен конструкцияла тудулган. Христиандарды бу турага тӱҥейлеерге јараар. Нениҥ учун? Христиан кижи ӧйинеҥ ӧткӱре кату да, ӧйинеҥ ӧткӱре јымжак та болбос учурлу. Бир јанынаҥ ол Иегованыҥ јасактарын ла нормаларын бир де буспай јат. Анайда ок Иеговага сӧсуккур болот ло улустыҥ кӧрӱмине јайылбай јат (Иак. 3:17). Је бу ла ок ӧйдӧ ого јымжак болор керек. Айалганы кӧрӱп, башкартуларды ойгор тузаланар керек. w23.07 14, абз. 1, 2

Иисусты Дьявол коркышту тыҥ ченеген. Ол оны керек дезе Кудайды да садып ийзин деп кӱӱнзеткен (Матф. 4:1—11). Сатана, канайда да болзо, Иисусты кинчек этсин деп албаданган. Иисус оныҥ сӧзин уккан болзо, толынтыны тӧлӧп болбос эди. Иисус јерде ижин бӱдӱрип баштаарда, оныҥ ченелтелери оноҥ ары улалган. Ӧштӱлер оны истежип, канча катап ӧлтӱрерге де санангылаган (Лука 4:28, 29; 13:31). Анайда ок ого ӱренчиктериниҥ јастыраларын чыдажарга келишкен (Марк 9:33, 34). Јаргы тушта оны шоодып каткыргандар. Оны каршулу керек эткен деп, коркышту тыҥ кыйнагандар (Евр. 12:1—3). А калганчы ченелтени Иисуска Кудайдыҥ болужы јок јаҥыскан ӧдӧргӧ келишкен (Матф. 27:46). Чын ла, толынты эдерге Иисуска кӧп кӱчтер ӧдӧргӧ келишкен. Оныҥ бис учун нени эдерге белен болгонын шӱӱп сананзаас, ого сӱӱжис ле быйаныс тыҥып јат. w24.01 10—11, абз. 7—9

Чыдамкай болоры улусла эптӱ-јӧптӱ јӱрерге ле улусты јазап угарга болужат (Иак. 1:19). Анайда ок чыдамкай болоры амыр-энчӱге јӧмӧжӧт. Ол бисти немени сананбай айтпаска болужат. Айалга катулана да берзе, бис јаман неме айтпай јадыс. Анайда ок кем де бисти ачындырып турза, бис капшай ла ачынарга меҥдебей јадыс. Ӧчин алардыҥ ордына: «Бой-бойыгарга чыдамкай болыгар, кем кемигерге комыдалду болзо, акту јӱректеҥ јаманын таштагар» — деген сӧстӧр аайынча эдедис (Кол. 3:12, 13). Чыдамкай болзоос, меҥдебей, айалганы бастыра јанынаҥ кӧрӱп турзаас, ойгор јӧп чыгарарыс. Темдектезе, бис иш бедиреп турганыс. Баштапкы ла келишкен ишке јӧпсинип ийдис. Је чыдамкай болзоос, билегиске ле бойыстыҥ кӧгӱс јаныска кандый каршузын јетирерин ајаруга аларыс. Айдарда, чыдамкай болзоос, каршу јетиргедий јӧптӧр чыгарбазыс. w23.08 22, абз. 8, 9

Слер бойоордо јастыра кӱӱн-санаа кӧрӱп турган болзоор, кезикте кунуга берердеҥ айабазаар. Је чӧкӧбӧгӧр! Учурланган тушта Иеговага берген сӧзӧӧрди сананып туругар. Ол тушта ченелтеге кирбеске слерге јеҥил болор. Мыны канайып оҥдоор? Слер Иеговага учурланып јадараарда, бойоорды јектеп салганаар. Бу дезе Кудайды ачындыратан кӧрӱмеерле, амадулараарла јӱрбезим деп айдып салганаар болот (Матф. 16:24). Оныҥ учун кандый бир кӱч айалга боло берзе, бодоп ӧй јылыйтып, канайдайын деп сананып отурбазаар. Нениҥ учун дезе слер учурланып јаткан тужыгарда ла Кудайга чындык артараар деп сӧзӧӧрди берип салганаар. Айдарда, слер коркышту кӱч те ӧйлӧрдӧ Иегованы сӱӱндирерге, Иов чылап: «Кудайга чындык артарым!» — деп, бек шӱӱп алганаар (Иов 27:5). w24.03 9, абз. 6, 7

Иегова, «сӱӱштиҥ... Кудайы», бисле кожо! (2 Кор. 13:11). Иегова бистиҥ кажыбыска ла ајару эдет. Ончобысты эбире оныҥ чындык сӱӱжи (Сар. 32:10). Иегованыҥ бисти канайып тыҥ сӱӱп турганын сананып турзаас, ол биске ончо ло кире јуук деп билдирер. Кудайыска мӱргӱген тужыста, бис оныҥ сӱӱжи биске сӱреен керектӱ деп айдар аргалу. Анайда ок бис ого санааркаштарысты куучындаар аргалу. Ол бисти оҥдоор ло болужар (Сар. 145:19). Канайып соок кӱнде оттыҥ јанына отурала, јылынарга јакшызынып јадыс, анайып ла бисти сӱӱжиле јылыдып турган Иеговага јууктаарга биске сӱреен јарап турган. Иегова бисти сӱреен тыҥ сӱӱп јат. Јайаачы Иегованыҥ бисти бойы сӱӱп турганы не аайлу јакшы дезеер! Оныҥ да учун сарнаачы чылап: «Мен Иегованы тыҥ сӱӱп јадым!» — деп айдып ийектер (Сар. 116:1). w24.01 31, абз. 19, 20

Иисустыҥ ӱреткен ӱренчиктери, еврейлер, Кудайдыҥ ады — Иегова деп билетен болгон. Оныҥ учун Иисус, јаҥыс ла, Кудайдыҥ ады — Иегова деп куучындаган эмес, је улуска Кудай керегинде билгирин кӧптӧдӧргӧ болушкан (Иоанн 1:17, 18). Темдектезе, Еврей Бичимелдерде Иегова јалакай ла килеҥкей Кудай деп кӧргӱзилет (Чыг. 34:5—7). Мыны јартаарга, Иисус тенибер уул ла оныҥ адазы керегинде укаа сӧс куучындаган. Анда адазы јастыразын алынган уулын кӧрӧлӧ, удура јӱгӱрип, оны кучактап, акту јӱрегинеҥ јаманын таштаганы айдылат. Бу учуралды кычырган улус Кудайдыҥ килеҥкейин ле јалакайын кӧрӱп јат (Лука 15:11—32). Анайып, Иисус Иегованыҥ чыннаҥ ла кандый болгонын кӧргӱскен. w24.02 10, абз. 8, 9

Иегова Кудай шыралап јӱрген улусты сергидип, токунадып јат. Бис Кудайга канайып тӱҥейлежер аргалу? Улусты килеп, токунадып турар керек. Оныҥ учун килеерге ле токунадарга болужатан кылык-јаҥдарга ӱренер керек. Бой-бойысты кажы ла кӱӱн токунадып турарга, биске јалакай ла килемкей болор керек (Кол. 3:12; 1 Фес. 4:18; 1 Пётр 3:8). Улуска канча ла кире јалакай ла килемкей болзоос, кӱч айалгада болгон улусты токунадар кӱӱнис, ончо ло кире тыҥ болор. Иисус мынайда айткан: «Кижиниҥ јӱреги неле толо, оозынаҥ чыгары ол ине. Јакшы кижи бойында јакшыны чеберлейт, оноҥ јакшы чыгат» (ЈТ) (Матф. 12:34, 35). Тӱбекке тӱшкен ака-эјелеристи токунадып турзаас, олор бистиҥ сӱӱжисти сезер. w23.11 10, абз. 10, 11

Бис Агару Бичиктеги судурларды болуш јогынаҥ оҥдоп болбозыс. Темдектезе, слер таныш эмес јерге келгенеер, карын јаныгарда најыгар бар. Ол бу јерди ле кажы јол кайдӧӧн апарып турганын ӱзе билер. Кудайыс Иегова андый најыга тӱҥей. Ол бисти кандый ӧйдӧ јадып турганысты ла удабас не болорын јакшы билер. Оныҥ учун Агару Бичиктиҥ судурларын оҥдоорго, јобош болуп, Иегованаҥ болуш сураар керек (Дан. 2:28; 2 Пётр 1:19, 20). Сӱӱштӱ ада-энелер балдарыныҥ јӱрӱмин јакшы болзын деп кӱӱнзеп јат. Иегова шак ла андый Ада (Иер. 29:11). Је Кудай улуска кӧрӧ, келер ӧйдӧ не болорын чике айдып берер аргалу. Оныҥ учун ол бистерге келер ӧйдӧ не болорын озодоҥ билип турзын деп, эр улус ажыра судурлар бичиткен (Иса. 46:10). w23.08 8, абз. 3, 4