Не барыла болорзынарга канайып ӱренип алар?

1. Не барыла болорзынып турары нени темдектеп јат, нени темдектебей јат?

СЛЕРГЕ бойоордыҥ јӱрӱмеер јарап турган ба? Бойоорды ырысту кижи деп бодойдоор бо? Андый кижи ончо бар јакшы неме учун Иеговага быйанду јӱрет, мынаҥ улам оныҥ јӱрегинде амыр ла сӱӱнчи болот. Ондо та не де јок деп санааркабай јат, ачынбай јат. Је андый да болзо, не барыла болорзынары дегени — кандый да амаду тургуспай, нени де кӱӱнзебей турарын темдектебей јат. Темдектезе, Агару Бичик Иеговага оноҥ кӧп эдетен аргалар бедирезин деп кӱӱнзедет (Рим. 12:1; 1 Тим. 3:1). Је не барыла болорзынып турган кижи аларга кӱӱнзеп турган јакылта берилбей турза, сӱӱнчизин јылыйтпай јат.

2. Не барыла болорзынбай барганы неге экелет?

² Не барыла болорзынбай турган кижи јеткерлӱ айалгада болот. Ол андый ла керектӱ эмес неме аларга болуп, тӱни-тӱжи иштеп јат. Керек дезе кезик христиандар уурданып та баштайт. Олор мынайып сананган болор: «Мен мыны алар јаҥду», «Меге бу эмди ле сӱреен керектӱ» эмезе «Акчаны кийнинде кайра јандырып берерим». Је кандый ла уурданыш Кудайды уйатка тӱжӱрет (Укаа 30:9). А та кем де организациянаҥ аларга кӱӱнзеген молјузы берилбесте, тыҥ чӧкӧп, Иегованы артыргызып салган (Гал. 6:9). Бу мындый немени христиан кижи канайып эдет? Андый кижи не барыла болорзынбай барган болор.

3. Филиппыдагыларга 4:11, 12-деги сӧстӧр бисти неде бӱдӱмјилейт?

³ Апостол Павел «кандый ла айалгаларда не барыла болорзынарга ӱренип» алган деп айткан. (Филиппыдагыларга 4:11, 12 кычырыгар.) Ол бу сӧстӧрди айылда каруулда болордо бичиген. Мындый кӱч айалгада да Павел сӱӱнчизин јылыйтпаган деп кӧрӱнет. Нениҥ учун дезе ол не барыла болорзынып јӱрерге ӱренип алган. Айдарда, бис те кандый ла айалгаларда сӱӱнчилӱ артар аргалу. Андый болзын деп, биске не барыла болорзынарга ӱренип алар керек. Биске ӱренип аларга не болужар деп кӧрӱп ийектер.

БЫЙАНЗАК БОЛУГАР

4. Быйанзак болоры јӱрӱмле јакшызынып, сӱӱнчилӱ јӱрерге канайып болужат? (1 Фессалоникадагыларга 5:18).

⁴ Быйанзак кижи јӱрӱмле јакшызынып, сӱӱнчилӱ јӱрет (1 Фессалоникадагыларга 5:18 кычырыгар.) Темдектезе, бисте эҥ керектӱ неме бар деп быйанду болзоос, јок немеге, оны аларга кӱӱнзеп те турган болзоос, тыҥ санааркабазыс. Анайда ок Иегованыҥ организациязында берилген јакылталарысты баалап турзаас, јаҥы јакылталар аларга меҥдебей, берилгенин оноҥ јакшы бӱдӱрерге албаданарыс. Агару Бичик мӱргӱӱлдерде Иеговага быйанысты айдып турзын деп, тегин јерге кӱӱнзетпей јат. Бис быйанду болзоос, бисте «кижиниҥ сагыжынаҥ бийик Кудайдыҥ амыры» болор (Флп. 4:6, 7).

5. Израильтяндарга Иеговага нениҥ учун быйанду болор керек болгон? (Јурукты база кӧрӱгер.)

⁵ Израильтяндарла не болгонын эске алып ийектер. Олор Египетте јиген курсагына санаап калган деп, Иеговага кӧп катап комыдагылаган (Тоол. 11:4—6). Чӧл јерде јӱрерге чын кӱч болгон. Је олорго не барыла болорзынарга не болужар эди? Израильтяндарга Иегова олорго нени эткенин шӱӱп сананып, быйанду болор керек болгон. Египетте олор кулдар болгон, анда олорго коркышту кату баштанган. Је Иегова 10 кайкал эдип, албатызын Египеттеҥ јайымдаган. Израиль албаты Египеттеҥ чыгып јадала, «Египет албатыныҥ баалу-чуулу не-немелерин алып баргылаган»: алтын-мӧҥӱнди ле кийим-тудумды (Чыг. 12:35, 36). Мыныҥ кийнинеҥ Египеттиҥ черӱзи израильтяндарды сӱрӱжип барала, Кызыл талайдыҥ јанында туйуктап саларда, Иегова сууны эки јара бӧлӱп, албатызын аргадап алган. Анайда ок олор чӧл јерде јӱрерде, Кудай олорды кажы ла кӱн маннала азыраган. Је олор нениҥ учун комыдаган? Олорго та не де јетпей турганынаҥ улам эмес, је быйанду болбогонынаҥ улам комыдаган.

6. Быйанзак болорго, не болужар?

⁶ Биске быйанзак болорго не болужар? Баштапкызында, јӱрӱмигерде ончо бар јакшы неме керегинде шӱӱп сананыгар. Бойоорго кӱнниҥ туркунына кандый јакшы неме болгонын бичип аларга, блокнот эдип алыгар (Ыйы 3:22, 23). Экинчизинде, быйанду болгоноорды сӧстӧрӧӧрлӧ, керектереерле кӧргӱзип туругар. Улуска слерге та нени де эткени учун быйаныгарды айдыгар. Анайда ок Иеговага быйанаарды айдарга база ундыбагар (Сар. 75:1). Ӱчинчизинде, быйанзак улусла најылажыгар. Андый кижиле најылажып, бойоор до быйанзак болорго ӱренип алараар. Је јаантайын комудап турган кижиле најылажып турзаар, бойоор до андый болуп калараар (Јаҥ. т. 1:26—28; 2 Тим. 3:1, 2, 5). Айдарда, быйанзак болуп јӱрзеер, комыдайтан шылтак табылбас.

7. Ачи эјеге ойто сӱӱнчилӱ болорго не болушкан?

⁷ Индонезияда јадып турган А́чи деп эје мынайып куучындаган: «COVID-19 деп пандемияныҥ ӧйинде мен бойымды ӧскӧ улусла тӱҥдештирип баштагам. Меге кӧрӧ ӧскӧ улуста ӱзе јакшы деп билдирген. Мынаҥ улам кунугып баштагам» (Гал. 6:4). Ачиге кӧрӱм-санаазын солыырга не болушкан? «Иегованыҥ меге кажы ла кӱн берип турган сыйларына ајару эдерге албадангам. Анайда ок Кудайдыҥ организациязында болгоным учун менде кандый кӧп алкыштар бар деп шӱӱп санангам. Оноҥ мындый алкыштары учун Иеговага быйанымды айдатам. Бу меге бар немени бааларга ла ырысту артарга болушкан». Слерге де андый кунукчылду санаалар келип турза, Ачи эје чилеп эдип кӧрӱгер.

ЈОБОШ БОЛУГАР

8. Нениҥ учун Барух кунугып баштаган?

⁸ Бир катап Барух, Иеремия судурчыныҥ болушчызы, кунугып баштаган. Ого Иеремияла кожо быйаны јок албатыга Кудайдыҥ јаргызын айдатан јакылта берилген болгон. Је Барух Иегованыҥ кӱӱн-табын сананардыҥ ордына, бойыныҥ кӱӱнин санана берген. Оныҥ учун Иегова Иеремия ажыра Барухка мынайып айткан: «Сен бойыҥа ӧйинеҥ ӧткӱре кӧпти бедиреп јадыҥ. Бедиребе» (Иер. 45:3—5). Ӧскӧртӧ айтса, Кудай мынайып айткан: «Бойыҥныҥ айалгаҥды баалап јӱр». Барух Иегованыҥ јӧбин алынып, оныла најылыгын тыҥыткан.

9. 1 Коринфтегилерге 4:6, 7-деги сӧстӧр бисти неге ӱредет? (Јуруктарды база кӧрӱгер.)

⁹ Кезикте христиан кижи кандый бир јакылтаны јӱк ле ол јакшы бӱдӱрип ийер аргалу деп сананардаҥ айабас. Ол кижи јайалталу, иштеҥкей ле ченемелдӱ болгон болор. Је оныҥ аларга турган јакылтазы ӧскӧ кижиге берилген болзо, канайдар? Кунукпаска ого не болужар? Ол 1 Коринфтегилерге 4:6, 7-де айдылган апостол Павелдиҥ сӧстӧрин шӱӱп сананар аргалу (кычырыгар). Бистиҥ јайалталарыс, берилип турган јакылталарыс — ӱзе Иегованыҥ сыйлары болот. Бис олорды улустаҥ артык болгоныстаҥ улам эмес, је Иегованыҥ иштеп албас јалакайынаҥ улам алганыс (Рим. 12:3, 6; Эф. 2:8, 9).

10. Биске јобош болорго, не болужар?

¹⁰ Биске јобош болорго, Иисустыҥ темин шӱӱп сананганыс болужар. Оныҥ божоор алдында эҥирде болгон учуралды эске алып ийектер. Ол Кудайдыҥ Уулы болуп, ого андый бийик јаҥ берилген де болзо, ол ӱренчиктериниҥ буттарын јунуп берген. Иоанн мынайып бичиген: «Иисус, Адазы ончозын оныҥ колына бергенин, бойы Кудайдаҥ келгенин ле ойто Кудайга барып јатканын билип, ӧрӧ турды... Оноҥ суу белетеп алала, ӱренчиктердиҥ будын јунуп, курчанып алган бӧзиле арчып турды» (Иоанн 13:3—5). Иисус мынайып сананар аргалу болгон: ол ӱренчиктериниҥ буттарын јунар эмес, карын олор оныҥ будын јунар учурлу. Иисус јерде болордо, јӱрӱмине качан да комыдабаган, оноҥ Кудайдыҥ Уулы болуп, аргалу-чакту јадар учурлу деп сананбаган (Лука 9:58). Иисус јобош кижи болгон, оныҥ учун не барыла болорзынып јӱрген. Анайып ол бистерге сӱреен јакшы тем кӧргӱскен (Иоанн 13:15).

11. Јобош болоры Денниске сӱӱнчизин јылыйтпаска ла не барын баалап турарга канайып болужат?

¹¹ Нидерландыда јадып турган Де́ннис деп ака јобош болорында Иисустаҥ тем аларга албаданат. Је бу јеҥил эмес болот. Ол куучындайт: «Кезикте мен бойымды улустаҥ артык деп сананып турганымды, бар немени баалабай барганымды кӧрӱп ийедим. Анчада ла мениҥ аларга турган јакылталарым, ӧскӧ улуска берилип турза, андый сезимдер болот. Ол тушта мен капшай ла јобош болоры керегинде кычырып баштайдым. JW Library^® приложениеде мен «јобош болоры» деген тег эдип алала, ары ӱлгерлер јууп јадым. Анайып керектӱ тушта олорды тӱрген ачып ийер аргалу болодым. Анайда ок телефонымга јобош болоры керегинде куучын-эрмектер таштап алала, улам сайын олорды угадымa. Мениҥ ончо эткеним мени эмес, је Иегованы мактаар учурлу деп оҥдоп јадым. Бойыс керегинде ӧйинеҥ ӧткӱре кӧп сананбас керек, нениҥ учун дезе Иегованыҥ андый учурлу ижинде бистиҥ эткенис андый ла јаан эмес». Айдарда, јуунда слерге кандый бир јакылталар берилбей турганынаҥ улам сӱӱнчигер јылыйып турган болзо, слерге јакылталар эмес, слерге јобош болоры јетпей турган болор. Нениҥ учун дезе јобош болоры биске Иеговала најылыгысты тыҥыдарга, ырысту болорго ло бар немени баалап турарга болужар (Иак. 4:6, 8).

ИЖЕМЈИ КЕРЕГИНДЕ ШӰӰП САНАНЫГАР

12. Биске не барыла болорзынып јӱрерге ле сӱӱнчилӱ артарга Иегованыҥ берген кандый ижемјизи болужар? (Исайя 65:21—25).

¹² Биске не барыла болорзынып јӱрерге ле ырысту артарга не болужар? Иегованыҥ келер ӧйдӧ сӱреен јакшы ижемјизи керегинде шӱӱп сананганыс болужар. Исайя деп бичиктеҥ Кудайдыҥ эмдиги ӧйдӧ биске кандый кӱч деп оҥдоп турганы кӧрӱнет. Је ол бистиҥ ончо кӱчтеристи јоголтып салар деп сӧзин берет. (Исайя 65:21—25 кычырыгар.) Бистиҥ кажыбыста ла эптӱ, јараш тура болор, ижис бойыска јарап турар, анайда ок амтанду, тузалу курсак артыгынча болор. Бисле эмезе балдарысла јаман неме болуп калар деп качан да коркыбазыс (Иса. 32:17, 18; Иез. 34:25). Иегова ончо берген сӧзин бӱдӱрип салар деп, бис бир де алаҥзыбай јадыс.

13. Келер ӧй керегинде шӱӱп сананганыс кӱчтерди ӧдӧргӧ канайып болужат?

¹³ Бӱгӱнги кӱнде Иегованыҥ берер болгон алкыштары керегинде кӧптӧдӧ шӱӱп сананары анчада ла керек болот. Нениҥ учун? Бис «калганчы кӱндерде» јададыс, оныҥ учун јӱрӱмис коркышту кӱч болуп калган (2 Тим. 3:1). Иегова биске ойгорын ла ийде-кӱчин берип, кажы ла кӱн јӧмӧжип јат (Сар. 145:14). Анайда ок јаҥы телекейге јӱретен ижемји бистерге уур-кӱчтерди јеҥерге болужып јат. Слер билегерди јеткилдеерге, кӧп иштеп турган болороор, је акчагар тӱҥей ле јетпей јат. Мындый кӱч јӱрӱм јаантайын болор бо? Јок, база катап јок! Иегова райда бастыра керектӱ немени артыгынча берер (Сар. 9:18; 72:12—14). Ол эмезе слер депрессияла эмезе ӧскӧ дӧ оорула тартыжып турган болороор. Мынайып јаантайын болор бо? Јок, андый болбос. Келер ӧйдӧ Иегова оору-јоболды ла ӧлӱмди јоголтып салар (Ачыл. 21:3, 4). Мындый јакшы ижемји кӱчтерге табарткан тушта катуланбаска ла эмдиги ӧйдӧ ырысту болорго болужат. Керек дезе биске јаман баштанып турган болзо, јуук улузыс божогон болзо, эмезе оноҥ до ӧскӧ тӱбекке табарткан болзоос, бис тӱҥей ле ырысту ла амыр артар аргалу. Бу недеҥ улам болот? Бис «кыйын-шырабыс кыска ӧйгӧ» деп, анайда ок јаҥы телекейде Иегова кыйын-шыраны јоголтып салар деп билерис (2 Кор. 4:17, 18).

14. Ижемји бек болзын деп нени эдер?

¹⁴ Јаҥы ла кӧргӧнисле, ижемји биске не барын баалап, сӱӱнчилӱ јӱрерге болужат. Айдарда, ижемји бек болзын деп албаданар керек. Мыны канайып эдер? Кезикте та нени де ыраактаҥ кӧрӱп ийерге, очки кийип алар керек. Анайып ла бойысты райда деп кӧрӱп турарга, анда болотон алкыштарды бажыска јурап турар керек. Бӱгӱнги кӱнде слер билегерди канайып азыраар деп, санааркап турган болзоор, келер ӧйдӧ акча да, тӧлӱ де, јоксыраш та болбос деп шӱӱп сананып туругар. Ол эмезе, аларга турган јакылталар слерге берилбей турза, бойоорды толо кеминде јӱрӱмле јакшызынып, Иеговага канча муҥ јылдар иштеп јӱргенеер деп сананып ийзеер де (1 Тим. 6:19). Ол тушта эмди болгон кӱчтерге санааркаараар ба? Та кем де айдар болор: «Менде кӱчтер андый кӧп, келер ӧйди сананатан ийде-кӱч те јок». Эйе, кӱчтерге табартып, келер ӧйдӧ болотон алкыштарды сананарга кӱч болордоҥ айабас. Је кӱчтердиҥ ӧйинде келер ӧй керегинде шӱӱп сананарга албаданып турзаас, мыны эдерге ӱрениже берерис.

15. Слер Кристанаҥ неге ӱрендер?

¹⁵ Бек ижемји Кри́стага, байагы айдылган Де́ннистиҥ ӱйине, канайып болужып турганын кӧрӱп ийектер. Ол куучындайт: «Мен јаанап турган оорула ооруп, мынаҥ улам инвалидный креслого отурадым. Је кӧп сабада меге орында јадарга келижет. Колы-будым јаантайын коркышту тыҥ ооруп јат. Јаан удабай врач мени качан да јазылбас деп айткан. Бу ла ӧйдӧ мен санандым: „Јок, јазыларым! Врачка кӧрӧ, келер ӧй кандый болор деп мен билерим“. Келер ӧйдӧ болотон алкыштарды сананып турзам, јӱрегиме амыр боло берет. Бӱгӱнги кӱнде мен тыҥ шыралап та турган болзом, келер ӧйдӧ јӱрӱмге сӱӱнерим деп алаҥзыбай јадым!»

«КУДАЙДАҤ АЙАП ЈӰРГЕНДЕРДЕ КЕРЕКТӰ НЕМЕ ӰЗЕ БАР»

16. Давидтиҥ Иегова керегинде «Кудайдаҥ айап јӱргендерде керектӱ неме ӱзе бар» деп айтканы нени темдектейт?

¹⁶ Бистиҥ јӱрӱмис бойыска јарап та турган болзо, уур-кӱчтер тӱҥей ле болор. Давид каанды эске алып ийектер. Ол ӱч уулын јылыйткан. Давидти актуга ла бурулаган, оны садып ийгендер. Оноҥ ого Саул кааннаҥ канча јылдарга качарга келишкен. Мындый уур-кӱчтерге де кӧрбӧй, ол Иегова керегинде: «Кудайдаҥ айап јӱргендерде керектӱ неме ӱзе бар» — деп айткан (Сар. 34:9, 10). Бистерге де бӱгӱнги кӱнде кӱчтер болбос деп сананбас керек. Је чыннаҥ ла не керектӱзин Иегова ӱзе берер деп бӱдедис (Сар. 145:16). Иегова биске амырысты ла сӱӱнчисти јылыйтпай, бастыра уур-кӱчтерди ӧдӧргӧ болужар.

17. Биске нениҥ учун не барыла болорзынарга ӱренер керек?

¹⁷ Иегова бисте ӱзе јакшы болзын деп кӱӱнзеп јат (Сар. 131:1, 2). Ол биске не барыла болорзынарга канайып ӱренип аларын ачып берген. Оныҥ учун бу јӧрмӧлдиҥ јӧптӧрин тузаланарга албаданыгар: быйанзак, јобош болугар, анайда ок ижемјигер керегинде шӱӱп сананыгар. Ол тушта слер мынайда айдар аргалу болороор: «Не барыла болорзынарга ӱренип алдым» (Флп. 4:11).