Сӱӱнчи — Кудайдыҥ сыйы

КАЖЫ ЛА кижи сӱӱнчилӱ болорго кӱӱнзейт. Је бис Агару Бичикте «[коркышту, ЈТ] уур-кӱч ӧйлӧр» деп айдылган калганчы кӱндерде јададыс (2 Тим. 3:1). Оныҥ учун чындык јогынаҥ, су-кадыкла колбулу кӱчтердеҥ, иш-јогынаҥ, јуук улузысты јылыйтканыстаҥ ла санааркаштардаҥ улам сӱӱнчи билдирбезинеҥ јылыйып јат. Кезикте Кудайдыҥ да ишчилери сӱӱнчизин јылыйтып, кунугып јат. Мындый айалга боло берзе, сӱӱнчини канайып таап алар?

Је озо баштап чын сӱӱнчи ол не деп ле кӱчтердеҥ улам сӱӱнчизин јылыйтпагандардыҥ темдерин кӧрӱп ийеектер. Оныҥ кийнинде сӱӱнчини јылыйтпаска ла оноҥ јаан сӱӱнчини аларга не болужар деп шӱӱп кӧрӧрис.

ЧЫН СӰӰНЧИ ОЛ НЕ?

Чын сӱӱнчи — кижиниҥ кӱӱниниҥ кӧдӱрилгенин темдектебей јат. Темдектезе, кижи аракыны кӧп ичип ийзе, кӱӱни кӧдӱриле берет. Је серий берзе, сӱӱнердеҥ болгой, кӱчтериниҥ ол ло бойы артып калганын кӧрӧт. Мынайып кыска ӧйгӧ сӱӱнери чын сӱӱнчи болбой јат (Укаа 14:13).

Сӱӱнчи — јӱректеҥ келген тереҥ сезим. Андый сезим кандый бир јакшы неме алганынаҥ эмезе оны аларга сакып турганынаҥ улам болот. Сӱӱнчилӱ кижи јакшы да јаман да айалга болзо, эмезе санааркап та турза, јӱректеги сӱӱнчизин јылыйтпай јат (1 Фес. 1:6). Бир катап элчилер Христос керегинде куучындап турганы учун коркышту тыҥ соктырткан, је олор «Иисус Кайраканныҥ ады учун базындырдыс деп, сӱӱнгилеп, оток-кӱреедеҥ чыгып бардылар» (Ап. ижи 5:41). Бу учуралда элчилер соктыртканынаҥ эмес, је Кудайга чындык артканынаҥ улам сӱӱнген.

Андый сӱӱнчи алдынаҥ бойы да, энедеҥ чыкканда да болбой јат. Нениҥ учун? Нениҥ учун дезе сӱӱнчи — Кудайдыҥ агару тыныныҥ тӱжӱми. Агару тынныҥ болужыла бис «јаҥы кижини» алынар аргалу. Сӱӱнчи дезе, «јаҥы кижиниҥ» кылык-јаҥы болот (Еф. 4:24; Гал. 5:22). Бисте чын сӱӱнчи болзо, јӱрӱмниҥ кӱчтерин јеҥил ӧдӧрис.

СӰӰНЧИЗИН ЈЫЛЫЙТПАГАНДАРДЫҤ ТЕМДЕРИ

Иегова јердеги бастыра улусты сӱӱнчилӱ болзын деп кӱӱнзеген. Је бӱгӱнги кӱнде јасак јогы коркышту таркаган. Мынаҥ улам Кудайдыҥ сӱӱнчизи јылыйды ба? Јок. Агару Бичикте: «Оныҥ туразында — ийде-кӱч ле сӱӱнчи» — деп айдылат (1 Лет. 16:27). Ого ӱзеери, Иегова бойыныҥ ишчилериниҥ јакшы керектерин кӧрӱп, сӱӱнет (Укаа 27:11).

Бис Иегованаҥ тем алар аргалу. Качан эдерге турганыс келишпей турза, ӧйинеҥ ӧткӱре санааркабас керек. Оныҥ ордына барыла болорзынып, јакшы ӧй келер деп чыдажып, сакыыр керекa.

Агару Бичикте Кудайдыҥ ишчилериниҥ јеҥил эмес айалгаларда сӱӱнчизин јылыйтпаганыныҥ кӧп темдери бар. Олордыҥ бирӱзи — Авраам. Ол ӧлӱмниҥ кырында јаҥыс катап болбогон ло ӧскӧ кижиниҥ бурузы учун кӧп катап шыралаган (Баш. 12:10—20; 14:8—16; 16:4, 5; 20:1—18; 21:8, 9). Је андый да болзо, Авраам сӱӱнчизин јылыйтпаган. Ого не болушкан? Ол Мессия башкарар јаҥы телекейде јӱрер ижемјизин ундыбай јӱрген (Баш. 22:15—18; Евр. 11:10). Иисус Авраам керегинде: «Слердиҥ адагар Авраам Мениҥ кӱнимди кӧрӧтӧнине сӱӱнип-јыргап јӱрген» — деп айткан (Иоанн 8:56). Бис Авраамнаҥ тем алып, келер ӧйдӧ болотон алкыштарды шӱӱп сананар аргалу (Рим. 8:21).

Элчи Павел ле оныла кожо иштеген Сила Кудайдыҥ беретен алкыштарын база ундыбай јӱрген. Олордыҥ бӱткени бек болгон ло олордыҥ сӱӱнчизине кандый да ченелтелер салтарын јетирип болбогон. Темдектезе, олор тыҥ соктырттып, тӱрмеге таштаткан. Оныҥ кийнинде «Павел ле Сила Кудайга мӱргип, сарнагандар» (Ап. ижи 16:23—25). Олор Кудайдыҥ берген сӧзин шӱӱп сананганынаҥ улам ченелтелерди ӧдӱп чыккан. Анайда  ок Христостыҥ ады учун шыралап турганын оҥдогоны олорго сӱӱнчизин јылыйтпаска болушкан. Бис Кудайга чындык артып, сӱреен јаан алкыштар аларыс деп ундыбай турзаас, олордоҥ тем аладыс (Флп 1:12—14).

Бӱгӱнги кӱнде Кудайдыҥ албатызында кыйын-шырага да табартса сӱӱнчилӱ артып турган кӧп ака-эјелер бар. Темдектезе, кӱчӱрген айда 2013 јылда Филиппиныныҥ орто јерлеринде «Хайян» деген јаан јоткон болгон. Ол ӧйдӧ 1000-наҥ кӧп билелер тура јок арткан. Таклобан калада јаткан Джорджтыҥ туразы бӱдӱнге бузулган. Ол айдат: «Кандый да кӱч болзо, ака-карындаштар сӱӱнчилӱ артат. Бистиҥ сӱӱнчисти сӧслӧ айдып болбозыҥ». Иегованыҥ биске берип турган болужын шӱӱп сананзаас ла ого быйанду болзоос, ченелтелер тужында сӱӱнчис јылыйбас. Бисте сӱӱнчилӱ болотон база кандый шылтактар бар?

СӰӰНЧИЛӰ БОЛОТОН ШЫЛТАКТАР

Сӱӱнчилӱ болотон шылтактыҥ эҥ јааны — Кудайла јуук колбуларлу болгоныс. Бис Јер-Телекейдиҥ Бийин билип јадыс! Ол бистиҥ Адабыс, Кудайыс ла Најыбыс (Сар. 71:17, 18).

Ого ӱзеери, бис Иеговага јӱрӱм сыйлаганы учун ла бу јӱрӱмнеҥ сӱӱнчи алып турганыс учун быйанду болодыс (Јарл. 3:12, 13). Иегова бисти бойына јуудып алган, оноҥ улам Кудай бистеҥ нени сакып турганын оҥдоп јадыс (Кол. 1:9, 10). Оныҥ учун бис јӱрӱмниҥ учурын ла баштапкы јерге нени тургузарын оҥдоп јадыс. Кӧп саба улус јӱрӱмниҥ учурын јакшы оҥдобой јат. Элчи Павел бу керегинде аҥылап айткан: «„Оны сӱӱп турган улуска Кудай нени белетеп койгонын кӧс кӧрбӧгӧн, кулак укпаган, ол кижиниҥ санаазына кирбеген“. Биске дезе бу јажытты Кудай Бойыныҥ Тыныла ачкан» (1 Кор. 2:9, 10). Оныҥ учун Иегованыҥ табын оҥдоп турганыстаҥ сӱӱнчилӱ болодыс эмес пе?

Иегова биске оноҥ до ӧскӧ неме берет. Темдектезе, бистиҥ кинчегис ташталып јат (1 Иоан. 2:12). Анайда ок удабас јаҥы јӱрӱм болор деп ижемји берген (Рим. 12:12). Бисте телекейлик карындаштык бар (Сар. 133:1). Иегова бойыныҥ албатызын Сатананаҥ ла оныҥ кӧрмӧстӧринеҥ корулайт (Сар. 91:11). Кудайдыҥ мындый болужын сананып, бистиҥ сӱӱнчис тыҥыйт (Флп. 4:4).

СӰӰНЧИНИ КАНАЙЫП ТЫҤЫДАР

Христиан кижи бойыныҥ сӱӱнчизин канайып тыҥыдар аргалу? Иисус айткан: «Сӱӱнчим слерде болзын, сӱӱнчигер толо болзын деп, бу мыны слерге айттым» (Иоанн 15:11). Айдарда, бис сӱӱнчисти оноҥ ары тыҥыдар аргалу. Мындый тем кӧрӱп ийеектер. От јаанада кӱйзин деп, ого кӧп одын салар керек. Анайып ла, сӱӱнчи тыҥызын деп, агару тынныҥ болужы керек. Анайдарда бис Иегованаҥ агару тынды јаантайын сурап, агару тынла бичилген оныҥ Сӧзин шӱӱп турзаас, сӱӱнчис там тыҥыыр (Сар. 1:1, 2; Лука 11:13).

Кудайга јарап турган керектерди эрчимдӱ бӱдӱрип турзаас, сӱӱнчис тыҥыыр аргалу (Сар. 35:27; 112:1). Нениҥ учун? Бис чын Кудайдаҥ коркып ла оныҥ јакылталарын бӱдӱрер эдип јайалганыс, не дезе Агару Бичикле болзо «кижинеҥ некелип турганы бу» (Јарл. 12:13). Ӧскӧртӧ айтса, бис Кудайдыҥ табын бӱдӱрерге керексинип јадыс. Оныҥ учун Иеговага иштеери биске јаан сӱӱнчи экелетb.

СӰӰНЧИ ЈААН ТУЗА ЭКЕЛЕТ

Чын сӱӱнчи јӱрӱмистиҥ башка-башка јандарына камаанын јетирет. Темдектезе, бис кӱчтерге кӧрбӧй, теҥеридеги Адабыска сӱӱнип иштезеес, ол оноҥ тыҥ сӱӱнер (Јаҥ. т. 16:15; 1 Фес. 5:16—18). Анайда ок чын сӱӱнчини не экелип турганын ундыбай турзаас, бис акча-јӧӧжӧ јуурына бар-јок кӱчисти салбазыс. Карын Каандыктыҥ ижин кӱӱнзеп бӱдӱрерге албаданарыс (Матф. 13:44). Мынайып албаданганыстыҥ тузазын кӧрӱп, јаан сӱӱнчи ле токунал аларыс, анайда ок ӧскӧ дӧ улуста сӱӱнчи болзын деп болужарыс (Ап. ижи 20:35; Флп. 1:3—5).

Небраска штаттагы (США) Университеттиҥ бир билимчизи су-кадык корыыры јанынаҥ ӧткӱрилген шиҥжӱлерге тӧзӧлӧнип: «Слер бӱгӱнги кӱнде јӱрӱмге сӱӱнип, бойоорды ырысту деп бодоп турган болзогор, келер ӧйдӧ су-кадыгар бек болор» — деген шӱӱлтеге келген. Бу сӧстӧр Агару Бичиктеги «сӱӱнчилӱ јӱрек — јакшы эм-тус» деген сӧстӧргӧ келижет (Укаа 17:22). Айдарда, сӱӱнчигерди тыҥыдарга албаданып турзагар, су-кадыгар јакшы болор.

Бис шакпыртту ӧйдӧ јададыс. Је андый да болзо, агару тынныҥ болужыла чын сӱӱнчини алар аргалу. Агару тынды аларга, Иеговага мӱргӱп, оныҥ Сӧзин ӱренип ле шӱӱп турар керек. Иегованыҥ берген алкыштарын сананып, оныҥ ишчилериниҥ бӱткенинеҥ тем алып, Кудайдыҥ табын бӱдӱрерге албаданып турзаас, сӱӱнчисти тыҥыдып аларыс. Ол тушта бис Сарын 64:10-до: «Чындык кижи Иегованыҥ керектерине сӱӱнет, оноҥ коруланар јер табат» деп бичилген сӧстӧрдиҥ чынын кӧрӧрис.