«Јаантайын болор каланы» сакыгар

1. Иисустыҥ судурлаганыла болзо, Иерусалимле не болор керек болгон?

ИИСУС божоор алдында бир канча кӱн озо, јаан учурлу судур айдып салган. Ол ӱренчиктерине: «Иерусалимди черӱ курчап алганын кӧрӱп ийзегер... Ол тушта Иудейде јӱргендер кырларга качсын» — деп айткан (Лука 21:20—22).

2. Апостол Павел Иудеяда ла Иерусалимде јаткан христиандарды келер ӧйгӧ канайып белетеди?

² Иерусалимди Римниҥ черӱзи курчаар алдында, бир канча јыл озо, апостол Павел Иудея ла Иерусалимниҥ христиандарына самара бичиген. Бӱгӱн бу Еврейлерге бичиген самара болуп јат. Анда Павел ака-эјелерге келер ӧйгӧ белетенип алзын деп, сӱреен керектӱ башкартулар берген. Је келер ӧйдӧ не болор? Иерусалим удабас јоголтылар. Оныҥ учун аргаданарга, олорго айыл-јурттарын ла иштерин артыргызып, Иерусалимнеҥ качар керек болгон. Павел Иерусалим керегинде мынайып айткан: «Мында бисте јаантайын болор кала јок». Оноҥ: «Бис келер ӧйдиҥ калазын энчикпей сакып јадыбыс» — деп айткан (Евр. 13:14).

3. «Бек тӧстӱ кала» ол не? Бис оны нениҥ учун сакыйдыс?

³ Иерусалимнеҥ ле Иудеянаҥ качып јаткан христиандарды улус јамандап, олорго каткырышкан да болор. Је мынайып чыгарган јӧби олордыҥ јӱрӱмин аргадаган. Бӱгӱн бис база андый ла айалгада болуп јадыс. Улус бисти саҥ башка улус деп кӧрӧт. Нениҥ учун дезе бис акча кору берет, анайда ок телекейдеги кӱчтердиҥ аайына улус чыгар деп иженбей јадыс. Је бис неге иженип турганыс? Удабас бу калју телекей јоголып каларын бис билерис. Оныҥ учун «бек тӧстӱ каланы», «келер ӧйдиҥ калазын», — Кудайдыҥ Башкарузынa сакып јадыбыс (Евр. 11:10; Матф. 6:33). Бу јӧрмӧлдӧ бис Павелдиҥ самаразы баштапкы чактыҥ христиандарына «келер ӧйдиҥ калазын» сакыырга, канайып болушканын кӧрӱп ийерис. Анайда ок Павел олорды келер ӧйгӧ канайып белетегенин ле оныҥ јӧптӧри биске кандый туза экелерин шӱӱжип ийерис.

ИЕГОВАГА ИЖЕНИГЕР — ОЛ СЛЕРДИ КАЧАН ДА АРТЫРГЫСПАС

4. Нениҥ учун Иерусалим христиандарга јаан учурлу кала болгон?

⁴ Иерусалим христиандарга јаан учурлу кала болгон. Нениҥ учун дезе анда б. э. 33-чи јылында христиан јуун тӧзӧлгӧн. Анайда ок анда башкару јӧп болгон. Бого коштой кӧп саба христиандарда бу калада айылдары ла ӧскӧ дӧ јӧӧжӧзи болгон. Је Иисус ӱренчиктерине јӱк ле Иерусалимнеҥ эмес, керек дезе Иудеянаҥ да качарга келижер деп айдып салган (Матф. 24:16).

5. Павел христиандарды келер ӧйгӧ канайып белетеген?

⁵ Павел христиандарды Иерусалимнеҥ качарга белен болзын деп кӱӱнзеген. Оныҥ учун ол олорго Иегованыҥ бу калага кӧрӱмин оҥдоп аларга болушкан. Кудайдыҥ кӧрӱмиле болзо, ӧргӧӧ, абыстардыҥ ижи ле Иерусалимде экелип турган тайылгалар база агару болбой барган (Евр. 8:13). Анайда ок бу каланыҥ кӧп саба улузы Мессияны јектеп саларда, Иерусалимдеги ӧргӧӧ ару бажырыштыҥ тӧс јери болбой барган. Кийнинде ол јоголтылып калды (Лука 13:34, 35).

6. Павелдиҥ Еврейлерге 13:5, 6-гы сӧстӧри нениҥ учун ӧйинде болгон?

⁶ Апостол Павел еврейлерге самара бичип турарда, кӧп саба улуска Иерусалимде јадарга јарап туратан болгон. Ол ӧйдӧги Римниҥ тӱӱкичизи Иерусалимди «јӱк ле Иудеяда эмес, је бӱдӱн Кӱнчыгышта эҥ јарлу кала» деп айткан. Иерусалимде кажы ла јыл ӧткӱрилип турган байрамдарга башка-башка ороондордоҥ еврейлер келетен. Мынаҥ улам каланыҥ экономиказы ӧзӱп, христиандарда кӧп акча иштеп алатан арга ачылган болор. Шак ла оныҥ учун Павел олорго: «Акчаны сӱӱбегер, не барыгарла болорзыныгар» — деп айткан. Оноҥ ол Агару Бичимелдеги Иегованыҥ кажы ла ишчизине берген сӧзин эске алындырган: «Сени артырбазым, сени таштабазым» (Евреям 13:5, 6 кычырыгар; Јаҥ. т. 31:6; Сар. 118:6). Бу сӧстӧр Иерусалимде ле Иудеяда јаткан христиандарга чек ле ӧйинде болгон. Нениҥ учун? Нениҥ учун дезе удабас олорго айылдарын, ижин, бар јок јӧӧжӧзин артыргызып, ӧскӧ јерде јаҥы јӱрӱм баштаар керек болгон.

7. Нениҥ учун биске эмди ле Иеговага иженерге ӱренер керек?

⁷ Бис неге ӱренедис? Биске удабас «улу тӱбекти» ле бу телекейдиҥ јоголтыларын ӧдӧргӧ келижер (Матф. 24:21). Оныҥ учун бӱткенисти тыҥыдып, келер ӧйгӧ белен болор керек (Лука 21:34—36). Улу тӱбектиҥ ӧйинде биске ончо бар јӧӧжӧбисти артыргызарга келижер болор. Анчада ла ол тушта Иегованыҥ бисти качан да артыргыспас деген сӧстӧрине иженер керек. Је улу тӱбек келгелекте, эмди ле Иеговага иженерге ӱренип алары сӱреен керектӱ болот. Бойоордоҥ сурагар: «Мениҥ чыгарган јӧптӧримнеҥ ле келер ӧйгӧ амадуларымнаҥ акчага эмес, је Иеговага иженип турганым кӧрӱнет пе?» (1 Тим. 6:17). Карын бисте баштапкы чактыҥ христиандарыныҥ темдери бар. Бис олордоҥ кӱч ӧйлӧрдӧ Кудайга чындык артарга ӱренип алар аргалу. Келер ӧйдӧ болотон улу тӱбек јердиҥ ӱстинде качан да болбогон. Ол кӱч ӧйдӧ башкартуларды кайдаҥ аларыс?

«БАШКАРАР ЈАҤДЫ АЛГАН УЛУСКА» СӦСУККУР БОЛУГАР

8. Иисус ӱренчиктерине кандый јакару берген?

⁸ Христиандар Павелдиҥ самаразын алган кийнинеҥ бир канча јыл ӧдӧ берерде, Римниҥ черӱзи Иерусалимди курчап алган. Бу дезе ака-эјелерге качатан темдек болды — олор удабас кала јемирилип каларын оҥдоп ийдилер (Матф. 24:3; Лука 21:20, 24). Је кайдӧӧн качар? Иисус: «Иудейде јӱргендер кырларга качсын» — деп айткан (Лука 21:21). Айландыра кӧп кырлар болгон. Је ол кырлардыҥ кажызына барып јажынар?

9. Нениҥ учун христиандарда кажы кырга качатан деп сурак чыккан болор? (Картаны база кӧрӱгер.)

⁹ Христиандар бу мындый кырларга качар аргалу болгон: Самарияныҥ, Галилеяныҥ кырлары, Ермон деп кыр, Ливанныҥ кырлары, анайда ок Иордан сууныҥ ары јанындагы кырлар. (Картаны кӧрӱгер.) Бу кырлардагы кезик калалардыҥ улузы амыр јаткан. Темдектезе, Гамла деп кала бийик кырдыҥ кайыр келтейинде турган, ары чыгарга јеҥил эмес, је кемге де бу кала сӱреен јакшы јажынатан јер деп билдирген болор. Кийнинде Гамлада еврейлерлер ле римляндардыҥ ортозында коркышту јаан јуу болгон, мынаҥ улам кӧп улус божогонb.

10, 11. а) Иегова христиандарга керектӱ башкартуларды канайып берген болор? (Еврейлерге 13:7, 17). б) Нениҥ учун ака-эјелерге башкарар јаҥды алган улуска сӧсуккур болор керек болгон? (Јурукты база кӧрӱгер.)

¹⁰ Иегова христиандарга јуунды башкарып турган акалар ажыра керектӱ башкартуларды берген. Кийнинде Евсе́вий Памфи́л деп тӱӱкичи бу ӧй керегинде мынайып бичиген: «...Иерусалимниҥ Серкпезиниҥ улузы јуу-согуш башталгалакта, тоомјылу эр улус ажыра берилген башкартуларды угуп, Иерусалимнеҥ качып барала, Переядагы Пелла деп калада токтогылаган»c. Пелла јажынатан сӱреен јакшы јер болгон. Бу кала Иерусалимнеҥ ыраак эмес јерде турган, оныҥ учун ого једерге кӱч эмес болгон. Анайда ок ол калада кӧп саба еврей укту эмес улус јаткан, оныҥ учун олор римляндарла тартышпай туратан. (Картаны кӧрӱгер.)

¹¹ Христиандар Павелдиҥ «башкарар јаҥды алган улуска... сӧсуккур болуп багыгар» деген јӧпти алынып, кырларга качкан. (Еврейлерге 13:7, 17 кычырыгар.) Оныҥ учун олор тирӱ артып калгылаган. Бу ака-эјелер «бек тӧстӱ каланы» — Кудайдыҥ Башкарузын, сакыганы учун Иегова олорды артыргыспаган (Евр. 11:10).

12, 13. Иегова албатызын кӱч ӧйлӧрдӧ канайып башкарып турганы керегинде темдер куучындап беригер.

¹² Бис неге ӱренедис? Иегова бойыныҥ албатызына башкарар јаҥды алган акалар ажыра чике башкартулар берет. Агару Бичикте Иегова албатызын коркышту кӱч ӧйлӧрдӧ чындык эр улус ажыра башкарган деп кӧп темдер бичилген (Јаҥ. т. 31:23; Сар. 77:20). Анайда ок бӱгӱнги де кӱнде Иегова анайып ла башкарып турган деп кӧп керелер бар.

¹³ Темдектезе, COVID-19 деп пандемия башталарда, бис «башкарар јаҥды алган улус» ажыра керектӱ башкартулар алганыс. Аксагалдар туштажуларды канайып ӧткӱрери ле јаҥы айалгаларда канайып јарлаары керегинде башкартулар алган. Пандемия башталганыныҥ кийнинеҥ бир канча айдаҥ бис бир уунда 500 тилге курултай ӧткӱргенис. Ака-эјелер курултайды интернет, телевизор ажыра кӧргӧн, анайда ок радио ажыра уккан. Мындый курултай бисте качан да болбогон! Пандемияныҥ ӧйинде Иегова албатызын кӧгӱс курсакла оноҥ ло ары јеткилдеген, оныҥ учун бис бирлик артып калганыс. Келер ӧйдӧ кандый да кӱч болотон болзо, Иегова башкарар јаҥды алган акаларга ойгор јӧптӧр чыгарарга болужар деп бир де алаҥзыбай јадыс. Айдарда, биске бу калју телекейдиҥ калганчы кӱндерин ӧдӧргӧ, Иеговага иженип, ого сӧсуккур болор керек. Је улу тӱбекке белетенип аларга, база кандый кылык-јаҥдарды тыҥыдар керек?

БОЙ-БОЙЫГАРДЫ КАРЫНДАШТАРДЫ ЧЫЛАП СӰӰП, КӰНДӰЗЕК БОЛУГАР

14. Еврейлерге 13:1—3 болзо, Иерусалимниҥ јоголтыларыныҥ алдында јаткан христиандарга кандый кылык-јаҥдарды тыҥыдар керек болгон?

¹⁴ Улу тӱбек башталза, биске бой-бойыска сӱӱжисти оноҥ јакшы кӧргӱзер керек. Бис Иерусалимде ле Иудеяда јаткан христиандардаҥ тем алар аргалу. Олор бой-бойын јаантайын сӱӱген (Евр. 10:32—34). Је Иерусалимниҥ јайрадыларынаҥ озо, ака-эјелерге бой-бойына сӱӱжин ле кӱндӱзегин оноҥ тыҥ кӧргӱзер керек болгон. (Еврейлерге 13:1—3 кычырыгар.)d Биске база анайып ла эдер керек, нениҥ учун дезе бу телекейдиҥ јоголтыларыныҥ ӧйи чек јууктап келген.

15. Нениҥ учун ака-эјелерге Иерусалимнеҥ качкан кийнинеҥ бой-бойына сӱӱжин ле кӱндӱзегин кӧргӱзер керек болгон?

¹⁵ Качан Римниҥ черӱзи Иерусалимнеҥ кенетийин кайра јӱре берерде, христиандарда качатан арга боло берген. Олорго айыл-јуртынаҥ керектӱ ле немени алып, тӱрген ле качар керек болгон (Матф. 24:17, 18). Оныҥ учун олорго бой-бойына јӱк ле јолой эмес, је Пелага да једип барала, болужар керек болгон. Болуш керексип турган улустыҥ тоозы да кӧп болгон болор (Титке 3:14). Анайып ака-эјелер не барыла ӱлежип, бой-бойын сӱӱп турганын ла кӱндӱзек болгонын кӧргӱзер аргалу болгон.

16. Бис болуш керексинип турган ака-эјелерге сӱӱжисти канайып кӧргӱзерис? (Јурукты база кӧрӱгер.)

¹⁶ Бис неге ӱренедис? Бис ака-эјелерди сӱӱп јадыс. Оныҥ учун олорго кандый бир болуш керек болзо, бис тууразында артып калбайдыс. Темдектезе, калганчы ӧйлӧрдӧ кӧп Керечилерге јуу-согуштаҥ эмезе ар-бӱткенниҥ тӱбегинеҥ улам айылдарын артыргызып качарга келишкен. Бис капшай ла ака-эјелерге болужарга келип, олордыҥ кӧгӱс ле ӧскӧ дӧ керексиништерин јеткилдеерге албаданадыс. Украинада јуу-согуштаҥ улам качкан эје мынайып айдат: «Иегова јаантайын башкартулар берип, акалар ажыра болужып турганын сезетем. Бис кайдӧӧн дӧ келзеес, ака-эјелер бисти јылу уткып, болужатан болгон: бойыстыҥ да орооныста, Венгрияда да, эмди Германияда!» Ака-эјелерге болужып, кӱндӱзек болуп турган улус — Иегованыҥ колында оныҥ јепселдери болот (Укаа 19:17; 2 Кор. 1:3, 4).

17. Нениҥ учун биске карындаштарды чылап бой-бойысты сӱӱрге ле кӱндӱзек болорго, эмди ле ӱренер керек?

¹⁷ Бӱгӱнги кӱнге кӧрӧ, улу тӱбектиҥ ӧйинде бис ака-эјелердиҥ болужын оноҥ тыҥ керексинерис (Авв. 3:16—18). Оныҥ учун Иегова бисти кожо чыккан карындаштар чылап бой-бойысты сӱӱп, кӱндӱзек болзын деп ӱредет. Бу кылык-јаҥдар биске ол кӱч ӧйлӧрдӧ сӱреен керектӱ болор.

КЕЛЕР ӦЙДӦ БИСТИ НЕ САКЫЙТ

18. Баштапкы чакта Иерусалимде ле Иудеяда јаткан христиандардаҥ бис кандый тем аларыс?

¹⁸ Иерусалимнеҥ кырга качкан христиандар јӱрӱмин аргадап алган. Олор каладаҥ јӱре берерде, Иегова олорды таштабай, јанында болгон. Мынаҥ биске кандый ӱредӱ бар? Удабас айалга канайып солынарын, не болорын билбес те болзоос, је Иисустыҥ «белен болыгар» деген сӧстӧрин ундыбай јӱректер (Лука 12:40). Анайда ок еврейлерге бичиген самараны кычырып, шӱӱп-сананарга јараар. Анда Павелдиҥ баштапкы чактагы ака-эјелерге берген јӧптӧри, бӱгӱнги кӱнде биске де тузалу болот. Анайда ок Иегова: «Сени артырбазым, сени таштабазым» — деп сӧзин берет (Евр. 13:5, 6). Оныҥ учун оноҥ ло ары «јаантайын болор каланы» — Кудайдыҥ Башкарузын сакып јӱректер. Ол тушта качан да тӱгенбес алкыштарды аларыс (Матф. 25:34).