23 ӰРЕНЕТЕН ЈӦРМӦЛ
2 КОЖОҤ Сениҥ адыҥ — Иегова
Бис Иегованыҥ адын сӱреен баалап јадыс
«„Слер мениҥ керечилерим“ — деп, Иегова айдат» (ИСА. 43:10).
НЕНИ ШӰӰЖЕРИС
Бис Иегованыҥ адын канайып агарулап, корулаар аргалу.
1, 2. Иисус Иегованыҥ адын сӱреен тыҥ баалаган деп недеҥ кӧрӱнет?
ИИСУС Иегованыҥ адын сӱреен тыҥ баалап јат. Улуска Иегованыҥ адын ачарга, ол кӧпти эткен. Ӧткӧн јӧрмӧлдӧ кӧргӧнисле, Иисус Иегованыҥ эткенинде бир де јастыра јок деп, Иегова — агару Кудай деп кӧргӱзерге јӱрӱмин берген (Марк 14:36; Евр. 10:7—9). Ол бастыра башкарар јаҥ Адазында болзын деп кӱӱнзеп, бир муҥ јыл башкарган кийнинде, јаҥды Иеговага берип ийер (1 Кор. 15:26—28). Иегованыҥ адын тооп турганынаҥ, Иисус Адазын сӱреен тыҥ сӱӱп турган деп кӧрӱнет.
2 Иисус јерге Иегованыҥ адынаҥ келген (Иоанн 5:43; 12:13). Ол Адазыныҥ адын ӱренчиктерине ачкан (Иоанн 17:6, 26). Адазыныҥ адынаҥ ол кайкалдар эдип, улусты ӱреткен (Иоанн 10:25). Анайда ок Иисус Адазын ӱренчиктерди бойыныҥ ады учун корулазын деп мӱргӱген (Иоанн 17:11). Адазыныҥ адын Иисус сӱреен баалаган деп јарт кӧрӱнип јат. Айдарда, Иисустыҥ ӱренчиктери христиандар деп аданып турган кийнинде, канайып оныҥ Адазыныҥ адын билбейтен, канайып оныҥ адын тузаланбайтан?
3. Бу јӧрмӧлдӧ нени кӧрӧрис?
3 Бис христиандар деп аданып, Иисустаҥ бастыра јанынаҥ тем аладыс (1 Пётр 2:21). Оныҥ учун оныҥ Адазыныҥ адын база тооп јадыс. Бу јӧрмӧлдӧ бис «Кудайдыҥ Башкарузы керегинде сӱӱнчилӱ јарды» јарлап тургандар нениҥ учун Иегованыҥ адын аданып турган деп кӧрӱп ийерис (Матф. 24:14). Анайда ок бистиҥ кажыбыс ла Иегованыҥ адын тооп турганын канайып кӧргӱзер аргалу деп кӧрӱп ийерис.
КУДАЙДЫҤ АДЫН АДАНАТАН АЛБАТЫ
4. а) Иисус теҥери барар алдында, ӱренчиктерине нени айткан? б) Кандый сурак шӱӱжерис?
4 Иисус теҥериге барар алдында, ӱренчиктерине айткан: «Слерге агару тын тӱшсе, кӱч алынып, Иерусалимде, Иудей ле Самар ичинде, јердиҥ јаказына да јетире мениҥ керечилерим болорыгар» (Ап. ижи 1:8). Бу сӧстӧрлӧ болзо, сӱӱнчилӱ јар араайынаҥ Израильдеҥ ӧскӧ јерлерде таркадылар. Мынаҥ улам башка-башка укту улуска Иисустыҥ ӱренчиги болотон арга берилер (Матф. 28:19, 20). Је Иисус: «Мениҥ керечилерим болорыгар» — деп айткан. Айдарда, јаҥы ӱренчиктер јӱк ле Иисустыҥ Керечилери болотон бо? Эмезе олорго Иегованыҥ адын база билер керек болгон бо? Бу сурактыҥ каруузын билип аларга, биске Апостолдордыҥ ижи деп бичиктиҥ 15-чи бажалыгы болужар.
5. Иерусалимде болгон туштажу Иегованыҥ адын ончо улус билип алар учурлу деп канайып кӧргӱскен? (Јурукты база кӧрӱгер.)
5 Б. э. 49-чы јылында апостолдор ло аксагалдар Иерусалимде јуулыжып, јаан сурак шӱӱштилер: еврей укту эмес улуска христиандар болуп каларга, кестирӱ эдер керек пе? Туштажуныҥ учында Иисустыҥ кожо чыккан карындажы Иаков мындый сӧстӧр айтты: «Кудай баштапкы катап ӧскӧ калыктардаҥ бойыныҥ адына учурлалган улус талдап алганын [Пётр] чокумдап, јартап берди». Иаков кемниҥ ады керегинде айтты? Оноҥ ары Иаков Амостыҥ судурын эске алындырат: «Артып калган улус ӧскӧ албатылардыҥ улузыла, мениҥ адымды аданган улусла, кожо Иегованы јана баспай бедирезин деп. Мынайып. . . Иегова айдат» (Ап. ижи 15:14—18). Јаҥы ӱренчиктерге јӱк ле Иегова керегинде билер керек эмес, је оныҥ адын аданып јӱрер керек болгон. Айдарда, улус олорды Кудайдыҥ адын аданганынаҥ таныыр, анайда ок олор улуска Кудайдыҥ адын ачар.
Баштапкы чактагы башкару јӧптиҥ туштажузында акалар Кудайдыҥ албатызына оныҥ адын аданар керек деп јарт оҥдоп ийген. (5 абзацты кӧрӱгер.)
6, 7. а) Иисус јерге нениҥ учун келген? б) Иисуста кандый јаан амаду болгон?
6 Иисустыҥ ады «Иегова — аргадаачы» дегени. Шак ла Иисус ажыра Иегова оныҥ Уулына бӱдӱп турган улусты аргадап јат. Иисус јерге бойыныҥ јӱрӱмин берерге келген (Матф. 20:28). Оныҥ толынтызынаҥ улам бистиҥ кинчектерис ташталар аргалу, анайда ок биске ӱргӱлји јӱрӱм јӱретен арга ачылат (Иоанн 3:16).
7 Нениҥ учун улуска толынты керек болгон? Шылтагын Эдем садта болгон учуралдаҥ билип аладыс. Ӧткӧн јӧрмӧлдӧҥ кӧргӧнисле, Адам ла Ева Иеговага удура тӱймеен кӧдӱрип, ӱргӱлјиге јӱретен аргазын јылыйтып салган (Баш. 3:6, 24). Је Иисус јерге јӱк ле улусты аргадаарга келген эмес. Оныҥ тӧс амадузы — Кудайдыҥ адын агарулаары болгон. Сатана Иегованыҥ адын јамандап салган (Баш. 3:4, 5). Оныҥ учун ончо улуска Иегованыҥ эткени ӱзе чын деп, ол улусты сӱӱп турган Ада деп билип алар керек болгон. Иисус Иегованыҥ адынаҥ келип, ончо немени оныҥ кӱӱн-табы аайынча эткен. Оныҥ учун ол Иегованыҥ адын агарулаарында эҥ кӧпти эткен деп айдарга јараар.
Иисустыҥ ӱренчиктери христиандар деп аданып турган кийнинде, канайып оныҥ Адазыныҥ адын билбейтен, канайып оныҥ адын тузаланбайтан?
8. Иисустыҥ ӱренчиктерине нени оҥдоор керек?
8 Иисустыҥ ончо ӱренчиктерине, еврей укту да, еврей укту эмес те улуска, олорды јӱк ле оныҥ Адазы, Иегова Кудай, аргадаар деп оҥдоор керек болгон (Иоанн 17:3). Олорго Иисус ла чылап, Иегованыҥ адын аданар керек, анайда ок Кудайдыҥ адын агарулаары сӱреен учурлу деп оҥдоор керек болгон. Мынаҥ олордыҥ јӱрӱми камаанду (Ап. ижи 2:21, 22). Иисустыҥ ӱренчиктери болорго турган улуска јӱк ле Иисус керегинде эмес, је Иегова да керегинде кӧпти билип алар керек. Оныҥ да учун Иисус Иоанныҥ 17-чи бажалыгында мӱргӱӱлиниҥ учында мынайып айткан: «Олор улусты, сен мени канайып сӱӱп тургаҥ, анайып ла сӱӱзин деп, мени олорло кожо бирлик болзын деп, мен олорго адыҥды ачтым, оноҥ до ары ачарым» (Иоанн 17:26).
«СЛЕР МЕНИҤ КЕРЕЧИЛЕРИМ»
9. Иисустыҥ ончо чындык ӱренчиктерине нени эдер керек?
9 Иисустыҥ ончо чындык ӱренчиктерине Иегованыҥ адын агарулаар керек (Матф. 6:9, 10). Биске Кудайдыҥ ады ӧскӧ аттарга кӧрӧ, јаан учурлу болот. Је бис Иегованыҥ адын канайып агарулаарыс? Сатананыҥ Кудай керегинде айткан сӧстӧри ӱзе тӧгӱн деп канайып кӧргӱзерис?
10. Исайя 42-неҥ 44-кӧ јетире бажалыктарда кандый јаргы болуп јаткан? (Исайя 43:9; 44:7—9). (Јурукты база кӧрӱгер.)
10 Исайя деп бичикте 42-неҥ 44-кӧ јетире бажалыктарда бис Иегованыҥ адын канайып агарулаар аргалу деп билип аладыс. Ондо сӱрлеп айдылган јаргы болуп јатканы керегинде бичилет. Бу јаргыда чын Кудай кем деп сурак кӧдӱрилет. Иегова бойлорын кудай деп аданып тургандарды, олор чын ла кудайлар ба деп кӧргӱзип берзин деп айдат. Анайда ок олор кудайлар деп айдып беретен керечилери бар ба деп сурайт. Је андый керечилер табылбады! (Исайя 43:9; 44:7—9 кычырыгар.)
Бис сӧстӧрисле, керектерисле Иегова чын Кудай деп кӧргӱзедис. (10, 11 абзацтарды кӧрӱгер.)
11. Исайя 43:10—12-де Иегова ишчилерине нени айдат?
11 Исайя 43:10—12 кычырыгар. Иегова бойыныҥ ишчилерине: «Слер мениҥ керечилерим. . . а Мен Кудай» — деп айдат. Анайда ок Иегова сурап јат: «Менеҥ ӧскӧ Кудай бар ба?» (Иса. 44:8). Биске бу сурактыҥ каруузын беретен јаан кӱндӱ эдилген. Оныҥ ады ӧскӧ аттарга кӧрӧ, эҥ бийик. Бис сӧстӧрисле, керектерисле Иегова — сок јаҥыс, чын Кудай деп кӧргӱзип јадыс. Анайда ок бастыра јӱрӱмисле Иегованы акту јӱрегистеҥ сӱӱп турганыс деп кӧргӱзедис. Оноҥ Сатана бисти јыга базарга канайып та тыҥ албаданза, Адабыска чындык артадыс. Анайып бис Кудайдыҥ адын агарулаарында туружып јадыс.
12. Исайя 40:3, 5-теги судур канайып бӱткен?
12 Анайда ок судурчы Исайя «Иеговага јол» арчыйтан эмезе белетейтен кижи келер деп судурлаган (Иса. 40:3). Бу судур канайып бӱткен? Крестеечи Иоанн Иисуска јол белетеп салган. Је ол оны Иеговага белетеген деп айдарга јараар, нениҥ учун дезе Иисус Иегованыҥ адынаҥ келген (Матф. 3:3; Марк 1:2—4; Лука 3:3—6). Ол ло судурда «Иегованыҥ магы иле кӧрӱне берер» деп айдылат (Иса. 40:5). Бу сӧстӧр канайып бӱткен? Иисус Иегованыҥ адынаҥ јерге келип, оныҥ айтканын андый чике бӱдӱрген, керек дезе Иегова јерге бойы келгендий болгон (Иоанн 12:45).
13. Бис Иисустаҥ кандый тем аладыс?
13 Иегованыҥ јакшы адын корулап турганысла Иисустаҥ тем аладыс. Иисус ла чылап бис Иегованыҥ Керечилери болодыс. Бис Кудайдыҥ адын аданып, оныҥ кайкамчылу керектерин улуска куучындайдыс. Је анайда ок биске Иисус Кудайдыҥ адын агарулаарында нени эткенин база куучындаар керек (Ап. ижи 1:8). Иисус Иегованыҥ баштапкы Керечизи болот, а бис оноҥ тем аладыс (Ачыл. 1:5). Эмди Иегованыҥ адын баалап турганысты канайып кӧргӱзерис деп шӱӱжип ийектер.
ИЕГОВАНЫҤ АДЫН БААЛАП ЈАДЫС
14. Сарын 105:3-ле болзо, бис Иегованыҥ адын канча киреге тыҥ баалайдыс?
14 Иегованыҥ ады керегинде оморкоп куучындайдыс. (Сарын 105:3 кычырыгар.) Иегова бисти оныла мактанзын деп кӱӱнзейт (Иер. 9:23, 24; 1 Кор. 1:31; 2 Кор. 10:17). «Иеговала мактанары» дегени ол бистиҥ Кудайыс деп оморкоп турарын темдектейт. Иегованыҥ адын корулаары ла улуска ол — агару Кудай деп куучындаары јаан кӱндӱ болот. Биске иште улуска, школдо балдарга, айылдаштарга ла ӧскӧ дӧ улуска бис Иегованыҥ Керечилери деп айдарга бир де уйалбас керек. Нениҥ учун дезе Дьявол бисти Кудайдыҥ адын улуска куучындабазын деп албаданып јат (Иер. 11:21; Ачыл. 12:17). Сатана ла оныҥ тӧгӱнине бӱдӱп тургандар Иегованыҥ адын улус ундып салзын деп кӱӱнзегилейт (Иер. 23:26, 27). Је бис Иегованыҥ адын сӱӱп јадыс, оныҥ учун арга боло ло берзе, јаантайын оны мактайдыс (Сар. 5:11; 89:16).
15. Иегованыҥ адын адап турары не дегени?
15 Иеговага адын адап баштанадыс (Иоиль 2:32; Рим. 10:13, 14). Иегованыҥ адын адап турары — бу јӱк ле оныҥ адын билерин ле тузаланып турарын темдектебей јат. Бис Кудайды јакшы билерис, оныҥ учун ого бӱдӱп јадыс, оноҥ болуш ла јӧптӧр сурайдыс (Сар. 20:7; 99:6; 116:4; 145:18). Анайда ок оныҥ ады керегинде ле оныҥ сӱреен јакшы кылык-јаҥдары керегинде улуска куучындап јадыс. Мынайып улуста Иегованы сӱӱндирерге ле ӱргӱлји јӱрӱм јӱрерге арга болзын деп, олорго солынарга болужып јадыс (Иса. 12:4; Ап. ижи 2:21, 38).
16. Сатана тӧгӱнчи деп канайып кӧргӱзерис?
16 Иегованыҥ ады учун кыйын-шыраны чыдажарга белен болодыс (Иак. 5:10, 11). Кӱчтерге табартып, Иеговага чындык артканысла Сатана тӧгӱнчи деп кӧргӱзедис. Иовтыҥ ӧйинде Сатана Кудайга иштеп турган улусты мынайып бурулаган: «Кижи бойыныҥ јӱрӱми учун ончо бар немезин берип ийер» (Иов 2:4). Оныҥ айтканыла, улус Кудайга јӱк ле ӱзе јакшы болзо, иштеп јат. Је кӱчтер боло ло берзе, олор Кудайдаҥ тууралап калар. Је Иов бу тӧгӱн деп кӧргӱскен. Бис те Иов чылап, мындый ла каруу берер аргалу. Сатана бистиҥ јӱрӱмисти ӱреерге канайып ла албаданып турза, бис Иегованаҥ тууралабазыс. Иегова бойыныҥ ады учун бисти корулаар деп алаҥзыбай јадыс (Иоанн 17:11).
17. 1 Пётр 2:12-ле болзо, бис Иегованыҥ адын канайып мактаарыс?
17 Иегованыҥ адын мактаарга бастыра ийде-кӱчистеҥ албаданадыс (Укаа 30:9; Иер. 7:8—11). Бис Иегованыҥ адын аданып јӱредис. Андый болордо, бистиҥ кажы ла алтамыс Иегованыҥ адын эмезе мактап јат, эмезе уйатка тӱжӱрет. (1 Пётр 2:12 кычырыгар.) Оныҥ учун бис эткен керектеристе ле айткан сӧстӧристе ајарыҥкай болодыс. Бис кинчектӱ де болзоос, је Иеговага эҥ артыгын берип турганысла оны мактайдыс.
18. Иегованыҥ адын баалап турганысты база канайып кӧргӱзерис? (Сносканы база кӧрӱгер.)
18 Иегованыҥ ады учун јаман кӧрдӱрерге коркыбайдыс (Сар. 138:2). Бис Иегованы сӱӱп турганыстаҥ улам оныҥ јасактарыла јӱрерге кӱӱнзеп јадыс. Је бу кӧп сабада улуска јарабай јат. Оныҥ учун олор бисти јамандап јатa. Иисусты да улус јаман керек эткен деп, актуга ла бурулап, кӧрӧр кӱӱндери јок болгон. Је ол Иегованыҥ ады макталзын деп, јӱрӱмин де берерге белен болгон. Иисус улустыҥ алдына јаман кӧрдӱрерге коркыбаган, ӧскӧртӧ айтса, улус ол керегинде нени сананар деп санааркабаган (Евр. 12:2—4). Ол јӱрӱминде эҥ ле тыҥ Иегованы сӱӱндирерге кӱӱнзеген (Матф. 26:39).
19. Иегованыҥ адын баалап турганысты канайып кӧргӱзерис? Нениҥ учун оны баалап јадыс?
19 Бис Иеговага иштеп турганысла оморкойдыс. Оныҥ Керечилери деп аданары — биске јаан кӱндӱ болот. Анайда ок бис Иегованыҥ адын баалап турганыс учун улуска јаман кӧрдӱрерге коркыбайдыс. Оноҥ Сатана канайып та буудактап турза, бис Иегованы оноҥ ло ары мактаарыс. Анайып бис Иегованыҥ адын Иисус ла чылап баштапкы јерге тургузадыс деп кӧргӱзерис.
10 КОЖОҤ Кудайысты, Иегованы, мактагар!
a Иовтыҥ ӱч најызы оны јастырган деп бурулаарда, Иов то јаҥыс бойын санана берген. Озо баштап Иов балдарын, јӧӧжӧзин јылыйтып алала, «јастырбаган ла Кудайды бир де бурулабаган» (Иов 1:22; 2:10). Је оны актуга бурулаарда, ол ачу сӧстӧр айдып баштады. Иегованыҥ адын мактап, корулаардыҥ ордына, ол бойыныҥ јакшы адын уйатка тӱжӱрбеске албаданган (Иов 6:3; 13:4, 5; 32:2; 34:5).