Lembrieko
22 E ber ning’iyo nying’ ma ber* kakare ning’iyo lonyo dupa;
Nibedo ng’atu ma juworo* tie ber nisagu mola ma tar man mola ma kwar.
2 Jalonyo ku jacan gitie ku lembe ma rom ma e:*
Yehova re m’ucwiyogi ceke.
3 Ng’atu m’utie ku riekowang’ neno ariti man epondo,
Ento ng’atu m’ung’eyo lembe akeca ngo medere ku woth man enwang’u matokene.*
4 Adwogi mi jwigiri man mi lworo Yehova
Tie lonyo, dwong’ man kwo.
5 Ukudho man uwic n’i yo pa ng’atu m’atira ngo,
Ento ng’atu ma neno kwo* pare ni gin ma pire tek bibedo bor kugi.
6 Ponj jalawobi* i yo m’umaku ewoth i iye;
Kadok kinde m’etii ebiweke ngo.
7 Jalonyo bimo wi jacan,
Man jagam banja en e ng’eca pa jamii banja.
8 Ng’atu ma coyo racu bikayu peko,
Man uluth mi ng’eicwiny pare bijik.
9 Ng’atu ma miyo piny ku berocwinye* binwang’u mugisa,
Kum emiyo kum cam pare ni jacan.
11 Ng’atu m’adundene leng’* man ma wec pare ber
Bibedo jarimb ubimo.
12 Wang’ Yehova gwoko ng’eyong’ec,
Ento eranyu wec mi ju ma cibojo.
13 Janyap wacu kumae: “Umvor ni woko!
Ebinega i die lela ma lac!”
14 Dhu dhaku ma wang’e tar* tie vur ma thuc.
Ng’atu ma Yehova upoko lembe rac i wiye bipodho i iye.
15 Kasegu bedo atwiya i adunde jalawobi,*
Ento uluth mi twiny bikabe cen kud i iye.
16 Ng’atu m’ubeyaku jacan pi nimedo lonyo pare
Man ng’atu m’ubemiyo giramiya ni jalonyo,
Gibidong’ jucan.
17 Cik ithi man winj lembe mi ju ma riek,
Kara iketh adundeni i kum ng’eyong’ec para,
18 Kum etie lembe ma ber nigwokogi i ii,
Kara gin ceke gibed i dend dhogi saa ceke.
19 Abemiyo iri ng’eyong’ec tin,
Kara genogen peri ubed i Yehova.
20 Nyo adaru kiewo iri ngo
Pi nimiyo iri juk man ng’eyong’ec,
21 Pi niponji ku lembe mandha man ma jugeno
Kara idok ku lembe ma tap ni ng’atu m’uori?
22 Kud iyak ng’atu ma jacan pilembe nia e jacan,
Man kud irung i ng’atu ma ka kite mbe i dhugang’ mir adhura,
23 Kum Yehova en gire bicero bang’gi
Man ebikabu kwo* mi ju m’ubeyakugi.
24 Kud idikiri karacelo ku ng’atu ma won ng’eicwiny,
Kadi kud imond i lembe pa ng’atu ma kwinyo make pio,
25 Kara kud iponj yo pare ki,
Man kud iroyiri giri* i uwic.
26 Kud ibed i kind dhanu ma gidiko cing’gi pi mukwatu,*
Ma giwodhiri pi niculo banja mi jumange.
27 Tekene imbe ku piny m’icul,
Jubimayu kavuto peri m’ivuto i wiye!
28 Kud icor lanyuth ma con mi kieu
Ma kwaru peri giketho.
29 Nyo ineno ng’atu moko m’ubetimo tic pare ku bodho?
Ebicungo i wang’ jubim;
Ebicungo ngo i wang’ dhanu ma sai.