Kite ma Yehova dwoko ko wang’ rwo mwa

1-2. Waromo penjara ku penji ma kani pi rwo mwa?

NYO idaru penjiri de ka nyo andha Yehova bedwoko wang’ rwo peri? Ka eyo, in ikendi ngo. Umego ku nyimego moko de gigam gipenjiri kumeno, asagane kinde ma gibino kadhu kud i peko. Ka wan’i peko, wan bende wacopo nwang’u nia etie tek nineno kite ma Yehova ubedwoko ko wang’ rwo mwa.

² Dong’ wakedoku iwi lembe moko ma romo ketho cwinywa bedo tek nia Yehova bedwoko wang’ rwo mi jutic pare. (1 Yoh. 5:15) Wabiweco bende iwi penji ma e: Pirang’o saa moko ecopo nen nia Yehova ubedwoko ngo wang’ rwo mwa? Tin Yehova bedwoko wang’ rwo mwa i ayi ma kanigi?

SAA MOKO YEHOVA ROMO DWOKO NGO WANG’ RWO MWA I AYI MA WAGENO

3. Pirang’o Yehova ubemito warwo i bang’e?

³ Lembagora ubetego cwinywa nia Yehova umaruwa lee man nia piwa tie tek i iye. (Hag. 2:7; 1 Yoh. 4:10) Eno re m’uketho ebekwayuwa nia wakway kony i bang’e nikadhu kud i rwo. (1 Pet. 5:6, 7) Ebemito ekonywa wabed ceng’ini kude man wacir peko ma wabenwang’ara ko.

4. Wang’eyo nenedi nia Yehova dwoko wang’ rwo mi jutic pare? (Nen bende cal.)

⁴ Wabed wasomo wang’ ma pol i Biblia nia Yehova udwoko wang’ rwo mi jutic pare. Nyo ibepoy pi laporne moko? Waromo yero ang’o pir ubimo Daudi? Ebed enwang’ere i wang’ judegi ma reco i kwo pare, ento saa ceke esayu kony i bang’ Yehova nikadhu kud i rwo. Nindo acel ekwayu kumae: “Winj rwo para, E Yehova; leng’ ithi ba kwac para: lok ira lembe i bedo mandha peri, man i bedopwe peri.” (Zab. 143:1) Pi nidwoko wang’ rwo pa Daudi, Yehova ubodhe. (1 Sam. 19:10, 18-20; 2 Sam. 5:17-25) Eno uketho Daudi uyero ma cwinye tek kumae: “Yehova ni ceng’ni [ku] dhanu ceke m’ulwong’e.” Wan bende waromo bedo ku tegocwiny maeno.​—Zab. 145:18.

5. Nyo saa ceke Yehova ubed udwoko wang’ rwo mi jutic pare ma con i ayi ma gigeno? Kemii lapor. (Nen bende cal.)

⁵ Saa moko Yehova romo dwoko ngo wang’ rwo mwa i ayi ma nwang’u wageno. Eno tie lembe ma jakwenda Paulo unwang’ere ko. Ekwayu Mungu ukab “ukudho” mi ring’kume. Wang’ adek zoo Paulo urwo athothi pi peko maeno. Nyo Yehova udwoko wang’ rwo parene? Eyo, re ungo i ayi ma nwang’u egeno. Kakare nikabu peko parene, Yehova umiyo ire tego m’etie ku yenyne kara emedere nitimo ire ku bedopwe.​—2 Kor. 12:7-10.

6. Pirang’o saa moko eromo nen nia Yehova ubedwoko ngo wang’ rwo mwa?

⁶ Wan de saa moko wacopo nwang’u dwokowang’ rwo i ayi m’ukoc ku ma nwang’u wageno. Cwinywa copo bedo tek nia Yehova ung’eyo cuu mandha ayi ma ber m’usagu m’eromo konyo kowa. Ecopo “timo lee dit apila nisagu ma wapenjo man ma wabeparu.” (Efe. 3:20) Pi thelembe maeno re m’ecopo dwoko wang’ rwo mwa i saa kunoke i ayi ma nwang’u wageno de ngo.

7. Pirang’o saa moko waromo bedo ku yeny mi wilo lembe ma waberwo pire? Kemii lapor.

⁷ Saa moko wacopo bedo ku yeny mi wilo lembe ma waberwo pire ka wanyang’ cuu mandha pi yeny pa Yehova. Wakewec pi lapor p’umego Martin Poetzinger. Nyanok i ng’ey gamiri pare, jutwiye i kambi mi masendi mi Nazi. Ku kwong’a, ekwayu Yehova nia uketh jugonye kara ecidh egwok min ot pare man ecak rweyo lembanyong’a kendo. Re i ng’ey yenga ario zoo, eneno de ngo gin moko m’unyutho nia Yehova ubino timo lembe moko pi niwodhe. Pieno ecaku rwo kumae: “Ka copere Yehova, nyuth ira gin m’imito atim.” I ng’eye ecaku paru pi lembe m’umego mange gibeciro i kambi mi masendi. Cwiny ju ma dupa m’i kindgi ubino pido lee mandha pi mon migi man pir awiya migi. Umego Poetzinger udog urwo kumae: “Yehova, afoyi pi tic ma nyen m’imiyo ira. Konya atiel umego para man amii amora i kumgi.” Pi oro abung’wen m’etimo i kambi mi masendi, ebed ekonyo umego pare tap kumeno!

8. Lembang’o ma pire tek ma wacikara nipoy i kume kinde ma waberwo?

⁸ Wacikara nipoy nia Yehova utie ku lembakeca pare man ebipong’e ke nimakere ku nindo m’eketho. Lembakeca maeno uketho i iye nidaru mi magwei lembe ceke m’ubenyayu peko tin eni, niwacu lembe ma calu ve peko ma wok rek, twoyo man tho. Yehova bipong’o lembakeca pare nikadhu kud i Ker pare. (Dan. 2:44; Nyu. 21:3, 4) Re Yehova uweko Sitani ukeubim wi ng’om nitundo ma Ker parene bitundo.b (Yoh. 12:31; Nyu. 12:9) Ka nang’u Yehova udaru tin eni lembe ceke m’ubesendo dhanu, eromo nen nia Sitani ubebimo wi ng’om cuu. Pieno, kadok ubekwayu wakur Yehova upong’ lembang’ola pare de, eno nyutho ngo nia ewenjowa. Dong’ wakenenu ayi moko ma Yehova konyo kowa.

AYI MA YEHOVA DWOKO KO WANG’ RWO MWA TIN ENI

9. Yehova copo konyowa nenedi kan ubekwayere nia wamak yubi? Kemii lapor.

⁹ Ebed emiyo iwa rieko. Yehova ung’olo nia ebimiyo iwa rieko ma watie ku yenyne kara wamak yub ma cuu. Wabedo ku yeny mi rieko m’uai i bang’ Mungu asagane ka wabemaku yub ma bimulo dong’ kwo mwa, calu ve nibedo jamusuma kunoke nigamiri. (Yak. 1:5) Wakewec pi lapor pa nyamego moko ma tie jamusuma ma nyinge Maria.c Saa m’enwang’u umego moko, nwang’u ebino jayab yo ma nja ma won anyong’a. Eyero kumae: “Calu ma mer mwa ubemedere, kite ma ng’atuman ubewinjere ko pi wadi de ucaku medere kumeno. Ang’eyo nia ukwayu amak yub moko. Agam arwo lee mandha iwi lembene. Abino ku yeny mi telowic pa Yehova, ento ang’eyo nia Yehova copo maku ngo yub kakara.” Enyang’ nia Yehova udwoko wang’ rwo pare m’ekwayu ko rieko i bang’e. Nenedi? Calu m’etimo sayusac i girasoma mwa, enwang’u thiwiwec m’ukonye ninwang’u dwokowang’ penji m’ebino penjere ko. Etiyo bende ku juk mi rieko ma min ma tie Jamulembe umiyo ire. Juk maeno ukonye ning’iyo kite m’ebewinjere ko pir umego maeca. Tokcenne, ebedo ire lembe ma yot nimaku yub mi rieko.

10. Nimakere ku Jufilipi 4:13, Yehova bitimo ang’o pi nikonyo jutic pare? Kemii lapor. (Nen bende cal.)

¹⁰ Ebed emiyo iwa tego pi niciro. Yehova bimiyo iwa tego ma watie ku yenyne pi niciro peko mwa, tap calu m’emiyo ni jakwenda Paulo. (Som Jufilipi 4:13.) Kenen kite ma Yehova ukonyo ko umego moko ma nyinge Benjamin niciro peko m’ebino nwang’ere i iye. Benjamin giku juruot pagi gikwo i kambi ma tung’ tung’ mir uring ng’wec i Afrika i oro ma dupa mir aradu pare. Eyero kumae: “Abed arwo nja i bang’ Yehova m’akwaye ko nia emii ira tego mi timo lembe ma nyayu anyong’a i iye. Pi nidwoko wang’ rwo para, Yehova umiyo ira kwiyocwiny mir adunde, tegocwiny mi medara nirweyo, man girasoma m’ukonya nibedo tek i thenge mi tipo.” Eyero kendo kumae: “Nisomo lembe ma jumulembe wadwa gibekadhu kud i iye man ning’eyo kite ma Yehova ukonyo kogi niciro, uketho lembakeca para mi medara nigwoko bedoleng’ ire udoko tek.”

11-12. Yehova copo ng’iyo nenedi nitiyo ku juruot mwa mi tipo pi nidwoko wang’ rwo mwa? (Nen bende cal.)

¹¹ Ebed etiyo ku juruot mwa mi tipo. Yesu urwo kud adundene ceke i uthieno m’i wang’ nithiero kwo pare. Ekwayu nia timba Yehova ukab cen cac ma jubecikelo i wiye nia etie jacid nying Mungu. Re kakare nitimo kumeno, Yehova uoro malaika acel kud i kind umego pare pi nimiyo ire tego. (Luka 22:42, 43) Yehova copo konyowa bende nikadhu kud i tielocwiny p’umego kunoke nyamego moko m’ulwong’owa i simu kunoke m’uliewowa i pacu. Ng’atuman m’i kindwa copo sayu kaka mi yero “lembe ma ber” ni juyic wadi.​—Rie. 12:25.

¹² Wakewecu pi lapor pa nyamego moko ma nyinge Miriam. Yenga moko i ng’ey ma won ot pare tho, Miriam udong’ kende i pacu; enwang’ere ku can man cwinye tur. Ebino wak i ayi ma jukere ngo man ebino ku yeny pa ng’atu moko m’ewec i bang’e. Eyero kumae: “Akoso tego mi lwong’o ng’atu moko ci i simu, pieno arwo i bang’ Yehova. Kinde ma fodi asu abewak man aberwo, simu para caku wak. Karaman ubino jadit cokiri acel m’utie jarimbwa ma ceng’ini.” Miriam unwang’u jukocwiny niai kud i bang’ jadit cokiri maeno man min ot pare. Enyang’ nia andha Yehova re m’ucwalu umego maeno nilwong’e.

13. Kemii lapor moko m’unyutho kite ma Yehova romo tiyo ko ku ju ma gitimo ngo ire pi nidwoko wang’ rwo mwa.

¹³ Ecopo tiyo ku dhanu ma gitimo ngo ire. (Rie. 21:1) Saa moko Yehova cwalu dhanu ma gitimo ngo ire gikony dhanu pare pi nidwoko wang’ rwo migi. Ku lapor, ecwalu ubimo Artacacta uyiyo ni Nehemia nidok i Yeruzalem kara edok ekony tic mi giero kendo adhura. (Neh. 2:3-6) Tin de Yehova copo cwalu ju ma gitimo ngo ire pi nikonyowa kinde ma watie i yeny.

14. Lembe ma Soo Hing ukadhu kud i iye ubetielo cwinyi nenedi? (Nen bende cal.)

¹⁴ Nyamego moko ma nyinge Soo Hing unwang’u nia Yehova ukonye nikadhu kud i bang’ dokta pare. Wode ubino sendere ku twoyo ma tung’ tung’ mi ng’ith. Saa ma Wode unwang’u ret ma lee, en giku won ot pare giweko tic migi pi nidogwoke. Lembuno uketho ginwang’iri ku peko pa sente. Soo Hing uyero nia enwang’ere calu lasthik (musambrel) ma jutelo tego m’i iye thum. Eyabu adundene ni Yehova m’ekwayu ko kony i bang’e. Dokta m’ubethiedho wode unwang’u yore m’ecopo konyo kogi. Lembene uketho ginwang’u kony m’uai i bang’ gavmenti man ginwang’u ot ma beine tek ungo akeca. I ng’ey lembuno, Soo Hing uyero kumae: “Waneno cing’ Yehova i lembe maeni. Andha etie ‘jawinj rwo.’”​—Zab. 65:2.

KWAYU YIYOYIC PI NING’IYO AYI MA YEHOVA DWOKO KO WANG’ RWO MWA MAN NIJOLE

15. Girang’o m’ukonyo nyamego moko ninyang’ nia wang’ rwo pare ubed udwogo?

¹⁵ Wang’ rwo mwa bedwogo ngo saa ceke i ayi ma nen terere kamaleng’. Ento dwokowang’ rwo mwa utie gin ma watie ku yenyne pi nigwoko bedoleng’ mwa ni Wegwa m’i polo. Pieno, bed iyeny nineno kite ma Yehova ubedwoko ko wang’ rwo peri. Nyamego moko ma nyinge Yoko ugam unwang’u nia Yehova ubedwoko ngo wang’ rwo pare, e ecaku kiewo lembe m’ebekwayu pire i bang’ Yehova i buku. Nindo moko i ng’eye, edok eneno i bukune man enwang’u nia Yehova udaru dwoko wang’ rwo pare ma pol, kadok moko ma nwang’u wiye daru wil i kumgi de. Kubang’ saa, kwayu wabed wapar pi kite ma Yehova ubedwoko ko wang’ rwo mwa.​—Zab. 66:19, 20.

16. Wacopo nyutho yiyoyic nenedi i lembe m’uneno rwo? (Juebrania 11:6)

¹⁶ Wanyutho ngo yiyoyic mwa kende kende nwang’u waberwo i bang’ Yehova ento bende nwang’u wabejolo dwokowang’ rwone i ayi moko ci m’edwoge i iye. (Som Juebrania 11:6.) Wakewecu pi lapor pa Mike giku min ot pare Chrissy. Gibino ku lembakeca mi citimo tic i Bethel. Mike uyero kumae: “Wapong’o fom pi oro ma lee man warwo wang’ udul i bang’ Yehova pi lembakecane, ento julwong’owa ngo zoo de.” Mike giku Chrissy gibedo asu ku genogen nia Yehova ung’eyo ayi ma ber mi tiyo kugi i tic pare. Gimediri ni ii nitimo calu juyab yo ma nja kaka ma yeny utie lee i iye man gidikiri i tic mi giedo mi dilo pa Yehova. Tin gibetimo calu juliew mi twodiri. Mike uyero kumae: “Saa moko Yehova udwoko ngo wang’ rwo mwa i ayi ma nwang’u wageno, ento ebed edwokogi i ayi ma ber m’usagu kadok ma nwang’u waparu de.”

17-18. Nimakere ku Zaburi 86:6, 7, cwinywa copo bedo tek i kum lembang’o?

¹⁷ Som Zaburi 86:6, 7. Cwiny Daudi ubino tek nia Yehova uwinjo man udwoko wang’ rwo pare. In de icopo bedo ku tegocwiny ma rom eno. Lapor ma tung’ tung’ ma juweco pigi i thiwiwec maeni ubetego cwinywa nia Yehova romo miyo iwa rieko man tego ma watie ku yenyne pi niciro peko mwa. Ecopo tiyo ku juruot mwa mi tipo kunoke kadok dhanu ma gibetimo ngo ire de pi nimiyo iwa kony i ayi moko.

¹⁸ Kadok nwang’u Yehova copo dwoko ngo wang’ rwo mwa i ayi ma nwang’u wageno de, re wang’eyo nia ebidwoko wang’gi. Ebimiyo iwa piny ma watie ku yenyne, ke tap i saane. Dong’ mediri nirwo man cwinyi bed tek nia Yehova bigwoki kawoni man i nindo m’ubino ‘ebiyeng’o gin ceke ma kwo kubang’gi’ i ng’om ma nyen.​—Zab. 145:16.