Yehova ubetego cwinywa nia ng’om bidoko andha ni paradizo

1. Lembe ma jabila Isaya uyero ni Juisrael wagi ubino ang’o?

JABILA Isaya uyero nia Yehova utie “Mungu mi lemandha.” Wec ma juloko nia “lemandha” thelembene utie “amen.” (Isa. 65:16) “Amen” ke thelembene utie “ebed kumeno,” kunoke “andha.” I Biblia ka jutiyo ku wec ma nia “amen” pi niweco iwi Yehova kunoke Yesu, eno miyo tegocwiny ma nia lembe ma jubeweco i kume utie andha kumeca. Pieno, lembe ma Isaya uyero ni Juisrael wagi ni e: Lembe ma Yehova uyero ci, jugeno. Pi ninyutho nia utie andha kumeno, epong’o gin ceke m’eng’olo igi.

2. Pirang’o wacopo bedo ku genogen i lembe ma Yehova ung’olo piwa, man wabidwoko wang’ penji ma kani?

² Nyo wan de wacopo bedo ku genogen ma rom eno i lembe ma Yehova ung’olo pi nindo m’ubino? Ceng’ini oro 800 i ng’ey rundi pa Isaya, jakwenda Paulo ukoro thelembe m’uketho wacopo geno lembang’ola pa Mungu, eyero kumae: “Mungu copo cwayu ndra ngo.” (Ebr. 6:18) Tap calu ma kulo acel copo wodho ngo pii ma mit ku pii ma nyakadu kadu i saa ma rom, Yehova m’utie acaki mi lemandha de copo cwayu ngo ndra nyanok de. Pieno, wacopo geno lembe moko ci m’eyero, uketho i iye lembe ceke m’eng’olo piwa. I thiwiwec maeni, wabidwoko wang’ penji ma e: Yehova ung’olo nia ebimiyo iwa ang’o i nindo m’ubino? Man ang’o m’ubetego cwinywa nia lembang’ola parene bipong’o andha?

LEMBE MA YEHOVA UNG’OLO

3. (a) Lembang’ola ma kani ma pire tek lee i jutic pa Mungu? (Lembanyutha 21:3, 4) (b) Jumoko gijolo lembang’ola maeno nenedi ka wanyuthe igi?

³ Lembang’ola ma wabiweco i wiye pire tie tek lee i jutic pa Mungu mi wang’ ng’om zoo. (Som Lembanyutha 21:3, 4.) Yehova ung’olo nia saa ubebino ma “tho bibedo nuti kendo ngo, kadok lembcan, kadi nduru, kadok remokum de bibedo nuti kendo ngo.” Ju dupa m’i kindwa betiyo ku giragora maeno ma mulo adunde saa ma giberweyo pi niweco iwi kwo mi paradizo. Jumoko gijolo lembang’ola maeno nenedi? Giyero nia, “Lembene ber ci, re ung’eyere ngo nia ecopo timere andha.”

4. (a) Yehova ugam ung’eyo ang’o? (b) M’uweko nitimo lembang’ola, Yehova utimo ang’o mange?

⁴ Kinde ma Yehova ubetelo wi jakwenda Yohana pi nikiewo lembang’ola m’uweco iwi kwo mi paradizo, egam eng’eyo nia wabiweco pi genogen maeno ku jumange saa ma waberweyo lembanyong’a mi Ker. Egam eng’eyo bende nia ebibedo tek ni jumoko niyiyo lembang’ola m’uweco iwi “gin ma nyen.” (Isa. 42:9; 60:2; 2 Kor. 4:3, 4) Dong’ ang’o ma copo tego cwinywa man cwiny jumange nia mugisa ma juweco pire i Lembanyutha 21:3, 4 bitimere andha? Yehova umiyo iwa thelembe ma copo ketho wabedo ku genogen i lembang’olane. Etie thelembe ma kani?

YEHOVA UBETEGO CWINYWA PI LEMBANG’OLA PARE

5. Thelembe ma kani m’ubecwaluwa nibedo ku genogen i paradizo ma Yehova ung’olo, man thelembene nwang’ere kani?

⁵ Thelembe m’ucwaluwa nigeno paradizo ma Yehova ung’olo, nwang’ere i verse ma e: “Ng’atu m’ubedo iwi komker uwacu kumae: ‘Nen! Abedwoko gin ceke nyen.’ Eyero bende kumae: ‘Kiew, kum lembe maeni gi mandha man ma jugeno.’ Man ewacu ira kumae: ‘Gidaru timiri! An a Alfa man Omega, acaki man ajiki.’”—Nyu. 21:5, 6a.

6. Pirang’o wec ma nwang’ere i Lembanyutha 21:5, 6 ubedwoko genogen mwa tek i lembang’ola pa Mungu?

⁶ Pirang’o verse maeno ubedwoko genogen mwa tek i lembang’ola pa Mungu? Buku Révélation: dénouement uyero iwi versene kumae: “Udok ubedo ve Yehova en ku kume uketho cinge i the karatasi moko pi weg bedopwe, pi ninyutho nia andha gibilagu mugisa maeno i nindo m’ubino.”b Mugisa ma Yehova ung’olone nwang’ere i Lembanyutha 21:3, 4. E i verse mir 5 kud 6, eketho cinge i ayi mi lapor i the lembang’olane, pi nitego cwinywa nia andha ebipong’o. Dong’ wakeng’iyu cuu i wec ma Yehova utiyo ko pi nitego cwinywane.

7. Ng’a m’uweco i verse mir 5, man lembuno ubeketho nwoc iwi ang’o?

⁷ Verse mir 5 ucaku ku wec ma e: “Ng’atu m’ubedo iwi komker uwacu kumae.” (Nyu. 21:5a) Wec maeno pire tie tek lee pilembe i buku mi Lembanyutha, Yehova uweco wang’ adek kende; acel m’i kindgine nwang’ere i verse maeni. Eno ubenyutho nia utie ngo malaika moko kadi Yesu re m’uyero wec ma tego cwinyjone, ento Yehova ku kume! Lembuno ubeketho nwoc nia wacopo geno wec m’eyero i ng’eye. Pirang’o wayero kumeno? Pilembe Yehova “copo cwayu ndra ki ngo.” (Tito 1:2) Pieno wec ma nwang’ere i Lembanyutha 21:5, 6 utie wec ma jugeno.

“NEN! ABEDWOKO GIN CEKE NYEN”

8. Yehova uyero ang’o pi ninyutho nia andha lembang’ola pare bipong’o? (Isaya 46:10)

⁸ Kawoni wakedwog iwi wec ma nia, “Nen!” (Nyu. 21:5) Wec mi dhu Jugiriki ma juloko nia “nen!” jutiyo kude wang’ dupa i buku mi Lembanyutha. Buku moko ma koro i Biblia uyero nia jubed jutiyo ku wec maeno “pi nitelo nen pa jasom iwi lembe m’ulubo.” Lembe m’ulubone tie ang’o? Utie wec pa Mungu ma e: “Abedwoko gin ceke nyen.” Andha Yehova ubeweco iwi alokaloka mi nindo m’ubino, re calu m’etie ku tegocwiny nia lembang’ola pare bipong’o andha, ebeweco ve dong’ alokalokane ubetimere.—Som Isaya 46:10.

9. (a) Wec pa Yehova ma nia, “Abedwoko gin ceke nyen” ubenyutho tic ario ma kani m’ebitimo? (b) Ang’o ma binwang’u “polo” ku “ng’om” ma kawoni?

⁹ I ng’eye Yehova uyero i Lembanyutha 21:5 kumae: “Abedwoko gin ceke nyen.” Emito yero ang’o? I thek maeni, wec maeno ubenyutho tic ario ma Yehova bitimo: niwilo man nidwoko kakare. Ku kwong’a Yehova biwilo ang’o? Lembanyutha 21:1 uyero kumae: “Polo ma con ku ng’om ma con udaru kadhu.” “Polo ma con” ubenyutho bimobim mi ng’om ma n’i the loc pa Sitani ku pajogi pare. (Mat. 4:8, 9; 1 Yoh. 5:19) I Biblia, “ng’om” copo nyutho dhanu ma kwo iwi ng’om. (Tha. 11:1; Zab. 96:1) Pieno, “ng’om ma con” ubenyutho dhanu ma reco. Yehova biyiko lembe m’i “polo” man m’i “ng’om” ma kawoni ayika kende ngo, ento ebikabugi cen man ebiwilogi. Ebiwilo polo ku ng’om ma kawonine ku “polo ma nyen ku ng’om ma nyen” ma tie bimobom ma nyen man kodhi dhanu de ma nyen.

10. Ang’o ma Yehova bidwoko nyeni?

¹⁰ Yehova bidwoko gin ceke nyen i ayi mange ma kani? (Nyu. 21:5) Ebiyiko lembe mi ng’om man ebikeyo kum dhanu kara gidok pwe. Calu ma Isaya uewo, Yehova bidwoko ng’om zoo ni kabedo ma leng’ calu ve bodho mir Eden. Ebidwoko bende ng’atuman m’i kindwa udok nyen. Kum abala, abinga, man ith udhing’ bikey, man kadok ju m’utho de bicer.—Isa. 25:8; 35:1-7.

“LEMBE MAENI GI MANDHA MAN MA JUGENO. . . . GIDARU TIMIRI!”

11. Yehova ukwayu nia Yohana utim ang’o, man pirang’o?

¹¹ Yehova uyero ang’o mange pi nitego cwinywa? Eyero ni Yohana kumae: “Kiew, kum lembe maeni gi mandha man ma jugeno.” (Nyu. 21:5) Emiyo ngo kende kende cik mi ‘kiewo’ lembang’ola pare, ento enyutho bende thelembene, eyero kumae: “Lembe maeni gi mandha man ma jugeno.” Watie ku foyofoc lee nia Yohana uworo cik maeno. Eno uketho ecopere iwa nisomo lembe ma Mungu ung’olo pi paradizo man ninyamu i lembe iwi mugisa m’ubekurowa.

12. Pirang’o Yehova uyero nia, “Gidaru timiri!”

¹² I ng’eye Mungu uyero kumae: “Gidaru timiri!” (Nyu. 21:6) Kawoni Yehova ubeweco ve dong’ gin ceke m’eyero iwi paradizo m’eng’olo, udaru timere. Eyero kumeno kakare pilembe gin acel de mbe ma copo cere nipong’o lembakeca pare. Yehova umedo lembe mange m’ubedwoko genogen mwa tek i lembang’ola pare. Eyero ang’o?

“AN A ALFA MAN OMEGA”

13. Pirang’o Yehova uyero nia, “An a Alfa man Omega”?

¹³ Calu ma wanwang’u i wang’e, Yehova uweco wang’ adek i ginmawokiwang’ ma Yohana uneno. (Nyu. 1:8; 21:5, 6; 22:13) Wang’ adekne ceke Yehova uyero wec ma e: “An a Alfa man Omega.” I dhok mi Jugiriki, alfa utie nying guta ma kwong’a, omega ke utie ma tokcen. Ka Yehova uyero nia en e “Alfa man Omega,” eno nyutho nia kan ecaku gin moko, edare kwa.

14. (a) Yehova uyero “Alfa” i ayi mi lapor i saa ma kani, man ebiyero “Omega” ke i saa ma kani? (b) Wec ma kani ma tielo cwinyjo ma nwang’ere i Thangambere 2:1-3?

¹⁴ I ng’ey ma Yehova ucwiyo Adamu giku Eva, enyutho lembakeca m’ebino ko pi dhanu man pi ng’om. Biblia uyero kumae: “Mungu mio mugisa igi: man Mungu wacu igi kumae, Wunyol, wumedru de, wupong’ ng’om, man wudwoke wor iwu.” (Tha. 1:28) Saa ma Yehova unyutho lembakeca m’ebino ko pi dhanu man pi ng’om, eyero “Alfa” i ayi mi lapor. Kinde ma lembakeca parene bipong’o man ma nyikway Adamu giku Eva ma wor gibipong’o ng’om man gibidwoke ni paradizo, eca ebilund yero “Omega.” I ng’ey ma Yehova udaru tic mi cwiyo ‘polo ku ng’om kud udul pinje ceke,’ etimo lembe moko pi ninyutho nia andha lembakeca pare bipong’o. Lembene nwang’ere i Thangambere 2:1-3. (Som.) Edwoko nindo mir abiro leng’. Eno ubenyutho ang’o? Eno ubenyutho nia ekoyo nindo mir abiro pi nidolo dhu tic mi pong’o lembakeca pare pi dhanu man pi ng’om. Pieno kinde m’edwoko nindo mir abiro leng’, udok ubedo ve ebeyero nia lembakeca pare bipong’o kubang’e kubang’e i ajiki mi nindone.

15. Pirang’o uyenyo nen nia Sitani unyotho lembakeca pa Mungu pi dhanu?

¹⁵ I ng’ey m’Adamu giku Eva gijai, gidoko judubo man nyikwaygi de ulagu dubo man tho. (Rum. 5:12) E uyenyo nen nia Sitani unyotho lembakeca pa Mungu ma nia dhanu ma pwe man ma wor gibipong’o ng’om. Udok ubedo ve Sitani uketho edoko lembe ma copere ngo ni Yehova niyero “Omega.” Copere eparu nia Yehova binego Adamu giku Eva man ebicwiyo nico ku dhaku mange pi nipong’o lembakeca pare. Re ka nwang’u etimo kumeno, nwang’u Sitani uciyero nia etie javupo. Pirang’o? Pilembe calu ma Thangambere 1:28 unyutho, Yehova ugam uyero nia nyikway Adamu giku Eva re ma gibipong’o ng’om.

16. Copere pirang’o Sitani uparu nia plan pa Yehova upodho?

¹⁶ Copere Sitani uparu nia Yehova romo timo ang’o mange? Saa moko nyo eparu nia Yehova biweko Adamu giku Eva ginyol awiya ma copo doko pwe tak de ngo. (Ekl. 7:20; Rum. 3:23) Re ka nwang’u ecopere ngo ni nyikway Adamu giku Eva nidoko pwe, m’umbe jiji nwang’u Sitani uciyero nia plan pa Yehova upodho. Pirang’o wayero kumeno? Pilembe nwang’u dhanu ma pwe ngo re ma gibecipong’o ng’om.

17. Yehova uyiko lembe m’uwok i podho mir Eden nenedi, man lam mi jamgony bikelo bero ma kani? (Nen bende cal.)

¹⁷ I Sitani uwang’ lii kinde m’eneno ayi ma Yehova uyiko ko lembe m’unyay i podho mir Eden. (Zab. 92:5) Yehova uweko Adamu giku Eva ginyol awiya; eno unyutho kamaleng’ nia etie ngo javupo. Bende, enyutho nia gin acel de mbe ma romo nyotho plan pare. Kara lembakeca pare upong’, ewodho “kodhi” moko ma bibodho nyikway Adamu giku Eva ma wor. (Tha. 3:15; 22:18) Kodhi maeno bithiero kwo pare ni lam mi jamgony. Lembuno utero wii Sitani bor! Pirang’o? Pilembe yub maeno ujengere iwi mer ma cwalu ng’atini nitwonere ku piny moko pi bero pa ng’atu mange. (Mat. 20:28; Yoh. 3:16) Lembuno ke mbe i bang’ Sitani, pilembe e jakec. Dong’ lam mi jamgony bikelo bero ma kani? I ajiki mi Bimobim mi oro elufu acel, nyikway Adamu giku Eva ma pwe man ma wor gibikwo iwi ng’om m’udoko ni paradizo, tap calu ma Yehova ular ukeco. I saa maeca, Yehova biyero nia, “Omega.”

DWOK GENOGEN PERI UDOK TEK I PARADIZO MA YEHOVA UNG’OLO

18. Mungu ubetego cwinywa ku wec adek ma kani? (Nen bende sanduku ma thiwiye tie, “Thelembe adek m’ucwaluwa nibedo ku genogen i lembang’ola pa Yehova.”)

¹⁸ Nimakere ku lembe ma waai waweco i wiye, wacopo yero ang’o ni jumange kara gin bende gibed ku tegocwiny ma nia andha ng’om bidoko ni paradizo? Mi kwong’o, Yehova re m’utimo lembang’olane. Buku mi Lembanyutha uyero kumae: “Ng’atu m’ubedo iwi komker uwacu kumae: ‘Nen! Abedwoko gin ceke nyen.’” Etie ku rieko, copo, man ava mi pong’o lembang’ola pare. Mir ario, cwiny Yehova utie tek lee i kum lembakeca pare; ebenene ve dong’ edaru pong’o, uketho eyero kumae: “Lembe maeni gi mandha man ma jugeno. . . . Gidaru timiri!” Mir adek, ka Yehova ucaku lembe moko, edare kwa. Pieno emedo kumae: “An a Alfa man Omega.” Yehova binyutho kamaleng’ nia Sitani utie javupo man nia plan pare upodho.

19. Ka dhanu gitie ku jiji iwi paradizo ma Mungu ung’olo, icopo timo ang’o?

¹⁹ Poy nia kan ibenyutho ni jumange thelembe m’uketho itie ku tegocwiny nia lembakeca pa Mungu bipong’o, genogen peri de bidoko tek. Dong’ macen kinde m’ibesomo ni ng’atini lembang’ola ma mulo adunde m’uweco iwi paradizo calu ma Lembanyutha 21:4 ukoro, e ng’atune ulund uyero iri nia, “Lembene ber ci, re ung’eyere ngo nia ecopo timere andha,” icopo timo ang’o? Som bende verse mir 5 ku mir 6, man kor igi. Nyuth ire bende kite ma Yehova ubetego ko cwinywa i kum lembang’ola pare man cinge m’eketho i ayi mi lapor i the lembang’olane.—Isa. 65:16.