Wacopo medara niketho mer m’i kindwa udok tek nenedi?

1-2. (a) Pirang’o jakwenda Paulo uyero nia mer utie kite “ma dit m’usagu zoo”? (b) Wabidwoko wang’ penji ma kani?

KINDE ma jakwenda Paulo ubino weco iwi yiyoyic, genogen, man mer, edolo dhu wecne nia “ma dit m’usagu zoo kud i kind [kite maeno] utie mer.” (1 Kor. 13:13) Pirang’o eyero kumeno? Pilembe i nindo m’ubino, wabibedo mbe kendo ku yeny mi bedo ku yiyoyic i ng’om ma nyen ma Mungu ung’olo kadi ku genogen ma nia lembakeca pare bipong’o, pilembe nwang’u dong’ gidaru pong’o. Re wabimedara nibedo ku yeny mi maru Yehova man dhanu wadwa. I andha, mer ma wamaru kogi bimedere ameda nidongo pi nja.

² Calu ma wabimedara nibedo ku yeny mi mer, wabidwoko wang’ penji ma e: Mi kwong’o, pirang’o wacikara nimarara i kindwa? Mir ario, wacopo nyutho mer i kindwa nenedi? Mir adek, wacopo ketho mer m’i kindwa umedere nidoko tek nenedi?

PIRANG’O WACIKARA NIMARARA I KINDWA?

3. Pirang’o wacikara nimarara i kindwa?

³ Pirang’o pire tie tek nia wamarara i kindwa? Thelembene tie dupa; re acelne utie nia nikum mer wanyutho nia watie Jukristu mandha. Yesu uyero ni jukwenda pare kumae: “Ni kum lembe maeni dhanu ceke bing’eyo nia wu julubna, tek wumeruru i kindwu.” (Yoh. 13:35) Bende, mer ma wanyutho i kindwa ketho wamedara nibedo i acel. Paulo ulwong’o mer nia “jamtwic ma cuu mandha ma dikojo i acel.” (Kol. 3:14) Re thelembe mange de tie ma pire tek ma wacikara ninyutho ko mer i kindwa. Jakwenda Yohana ukiewo ni juyic wagi kumae: “Ng’atu moko ci m’umaru Mungu ucikere nimaru bende umin.” (1 Yoh. 4:21) Ka wamarara i kindwa, eno nyutho nia wamaru Mungu.

4-5. Kemii lapor m’unyutho nia winjiri utie i kind mer ma wamaru ko Mungu ku mer ma wamarara ko i kindwa.

⁴ Winjiri ma kani m’utie i kind mer ma wamaru ko Mungu ku mer ma wanyutho ni umego ku nyimego mwa? Pi ninyang’, wakewec iwi winjiri m’utie i kind adundewa ku wat kumwa mange. Ka munganga moko ubemulo ler mi ng’udi cingwa pi ning’eyo kite ma rimbwa ubewotho ko, eromo ng’eyo bende kite m’adundewa ubedhongo ko. Eno ubeponjowa ku lembang’o?

⁵ Kinde ma munganga ubesayu ning’eyo kite ma rimbwa ubewotho ko, ecopo ng’eyo kite m’adundewa ubedhongo ko. Kumeno bende, ka wabeng’iyo i kadhiri ma wamaru iye umego ku nyimego mwa, wacopo ng’eyo kadhiri ma wamaru ko Mungu. Ka wanyang’ nia mer ma wamaru ko juyic wadwa ukwiyo i kadhiri moko, eno romo nyutho nia mer ma wamaru ko Mungu de ubedoko ng’ic. Re ka saa ceke wabenyutho mer ni juyic wadwa, wabinyang’ nia mer ma wamaru ko Mungu de utie tek.

6. Ka mer ma wamaru ko umego ku nyimego mwa ubedoko ng’ic, pirang’o mito ngo wanen lembuno ku tuko? (1 Yohana 4:7-9, 11)

⁶ Tek wanyang’ nia mer ma wamaru ko umego ku nyimego mwa ubedoko ng’ic, mito ngo wanen lembuno ku tuko. Pirang’o? Pilembe eromo nyutho nia watie kud ariti i thenge mi tipo. Jakwenda Yohana unyutho lembuno kamaleng’ kinde m’epoyo wiwa kumae: “Ng’atu m’umaru ngo umin m’ebeneno copo maru ngo Mungu m’eneno ngo.” (1 Yoh. 4:20) Eno ubeponjowa ku lembang’o? Anyong’a nego Yehova i kumwa nwang’u ndhu ‘wamarara i kindwa.’—Som 1 Yohana 4:7-9, 11.

WACOPO NYUTHO MER I KINDWA NENEDI?

7-8. Wacopo nyutho nenedi nia wamarara i kindwa?

⁷ I Lembe pa Mungu, cik ma nia “wumeruru i kindwu” nwang’ere wang’ dupa. (Yoh. 15:12, 17; Rum. 13:8; 1 Thes. 4:9; 1 Pet. 1:22; 1 Yoh. 4:11) Re mer utie kite ma wawinjara ko yor i iwa ma ng’atu moko mbe ma copo neno. Dong’ wacopo ketho mer ma wamarara ko i kindwa unen kamaleng’ nenedi? Nikadhu kud i wec man timo.

⁸ Yore tie dupa ma wacopo nyutho ko ni umego ku nyimego mwa nia wamarugi. Laporne moko ni e: “Wuwec lembe mandha ng’atuman ku wadi man ku wadi.” (Zek. 8:16) “Wukwo ku kwiyocwiny i kindwu.” (Mark. 9:50) “Wubed ma kwong’a i nyutho yung ni jumange.” (Rum. 12:10) “Wujoluru i kindwu.” (Rum. 15:7) ‘Wumeduru niweko lembe m’i kindwu.’ (Kol. 3:13) “Wumeduru nikonyuru i kindwu i lembe m’ubenurowu.” (Gal. 6:2) “Wumeduru nijuko cwinywu i kindwu.” (1 Thes. 4:18) “Wumeduru . . . niteng’uru i kindwu.” (1 Thes. 5:11) “Wurwo ng’atuman pi wadi man pi wadi.”—Yak. 5:16.

9. Pirang’o nijuko cwiny jumange utie yo ma pire tek ma wanyutho ko nia wamarugi? (Nen bende cal.)

⁹ Dong’ wakewec iwi yo acel ma wacopo nyutho ko mer ni jumange calu ma wanwang’u i udukuwec m’ukadhu. Paulo ukwayuwa kumae: “Wumeduru nijuko cwinywu i kindwu.” Pirang’o nijuko cwiny jumange utie yo acel ma pire tek ma wanyutho ko igi nia wamarugi? Nimakere ku buku moko ma koro i Biblia, wec ma Paulo utiyo ko ma juloko nia “nijuko cwiny,” thelembene tie “nicungo i ng’et ng’atini pi nitielo cwinye kinde m’ebenwang’ere i amulaic ma tek.” Pieno ka wabejuko cwiny jayic wadwa moko m’utie i peko, eno nwang’u wabekonye enwang’ tego m’emedere ko niwotho i yo mi kwo. Saa ceke ma ka wabejuko cwiny umego moko, eca nwang’u wabenyutho ire nia wamare.—2 Kor. 7:6, 7, 13.

10. Winjiri ma kani m’utie i kind nibedo ku kisa ku nijuko cwiny?

¹⁰ Winjiri ma ceng’ini mandha utie i kind nibedo ku kisa man nijuko cwiny. Nenedi? Kisa cwalu ng’atini nijuko cwiny jumange man eii nitimo lembe moko pi nikonyogi. Pieno, ku kwong’a kisa negowa i kum ng’atini, kan i ng’eye wajuko cwinye. Paulo ukoro nia kisa ma Yehova utie ko i kum dhanu cwale nijuko cwinygi. Eyero nia Yehova utie “Wego m’upong’ ku kisa man Mungu mi jukocwiny ceke.” (2 Kor. 1:3) Kakeni Paulo uweco iwi “kisa” ma nego ng’atini i kum jumange. Pieno elwong’o Yehova nia “Wego” mi kisa pilembe etie acaki mi kisa. Kisa maeno cwale nijuko “cwinywa i masendi mwa ceke.” (2 Kor. 1:4) Tap calu ma pii ma leng’ mi kulo kwiyo cwiny ju ma rieu ubenegogi, Yehova de kwiyo man tielo cwiny ju ma gin’i can. Dong’ wacopo lubo lapor pa Yehova nenedi i lembe m’uneno ninyutho kisa ni jumange man nijuko cwinygi? Yo acel utie nicego kite ma tung’ tung’ ma bikonyowa nibedo ku kisa i kum jumange man nitielo cwinygi. Kitene moko utie ma kanigi?

11. Nimakere ku Jukolosai 3:12 man 1 Pethro 3:8, ukwayu waceg kite mange ma kani ma bikonyowa nigwoko mer ma bicwaluwa nijuko cwiny jumange?

¹¹ Ang’o ma bikonyowa nigwoko mer mwa kara ‘wamedara nijuko cwinywa i kindwa’ kubang’ ceng’i? Ukwayu waceg kite ma calu ve ngisi, mer mir umego, man berocwiny. (Som Jukolosai 3:12; 1 Pethro 3:8.) Kite maeno bikonyowa nenedi? Ka kisa ku kite mange m’urombo kude udoko ni theng kwo mwa, eno bicwaluwa nijuko cwiny ju ma gin’i can. Calu ma Yesu uyero, “dhok yero lembe m’upong’ i adunde. Ng’atu ma ber wodho piny ma beco kud i kind piny m’akana pare.” (Mat. 12:34, 35) Nijuko cwiny umego ku nyimego mwa ma gin’i yeny utie yo acel ma pire tek lee ma wanyutho ko nia wamarugi.

WACOPO KETHO MER M’I KINDWA UMEDERE NIDOKO TEK NENEDI?

12. (a) Pirang’o ukwayu wabed ku wang’wa? (b) Wabidwoko wang’ penji ma kani kawoni?

¹² Wan ceke wamito “wamedara nimarara i kindwa.” (1 Yoh. 4:7) Ento pire tie tek nipoy nia Yesu uyero nia “mer mi dhanu dupa . . . bidoko ng’ic.” (Mat. 24:12) Ebino yero ngo nia julub pare ma dupa gibijigo ninyutho mer i kindgi. Re mito wabed ku wang’wa kara pidoic mi dhanu mi ng’om maeni m’ukoso mer kud ubed kud atelatela i wiwa. Ku paru maeno i wiwa, dong’ wakedwoku wang’ penji ma pire tek ma e: Wacopo ng’eyo nenedi ka nyo mer ma wamaru ko umego ku nyimego mwa utie teki?

13. Wacopo ng’eyo nenedi nia mer mwa utie teki?

¹³ Yo acel ma wang’eyo ko nia mer mwa utie tek utie niparu cuu pi gin ma watimo saa ma lembe moko wok. (2 Kor. 8:8) Jakwenda Pethro uweco iwi lembene acel, eyero kumae: “M’usagu zoo, wumeruru i kindwu lee mandha, pilembe mer umo wi udul dubo.” (1 Pet. 4:8) Pieno kinde m’umego gitimo kosa kunoke lembe m’ukierowa, gin ma watimo bikonyowa ning’eyo ka nyo mer ma wamaru kogi utie tek.

14. Nimakere ku 1 Pethro 4:8, watie ku yeny mi kit mer ma nenedi? Kemii lapor moko.

¹⁴ Dong’ wakeng’iyu kilili mandha i wec pa Pethro eno. Thenge ma kwong’a mi verse mir 8 ukoro kit mer m’ukwayu wabed ko, niwacu ‘mer ma lee mandha.’ Wec ma Pethro utiyo ko ma juloko nia “lee mandha,” thelembene utie “niyabu.” Thenge mir ario mi verse maeno uweco iwi adwogi ma mer ma lee copo kelo: Eumo wi dubo mir umego mwa. Wakemak lapor pa meza moko ma wiye kwico ku cilo. Jucopo ting’o tapi moko man jupedhe iwi mezane pi niumo kaka m’ukwicone moko kende ngo, ento juume zoo. Kumeno bende, ka wamaru umego ku nyimego mwa lee mandha, wabiweko kunoke wabiumo wi racu migi acel kende ngo, ento wi “udul dubo.”

15. Ka mer ma wamaru ko umego ku nyimego mwa utie tek, wabibedo ayika nitimo ang’o? (Jukolosai 3:13)

¹⁵ Mer ma wamaru ko jumange ucikere nibedo tek i kadhiri m’ecopo konyowa niweko racu mi juyic wadwa, kadok nwang’u saa moko bikwayu watim kero ma lee de. (Som Jukolosai 3:13.) Ka wabed waweko lembe ni jumange, eno nyutho nia mer mwa utie tek man nia wabemito wanyay anyong’a i Yehova. Ang’o mange ma copo konyowa nikadhu kud iwi ng’ico man kosa mi jumange?

16-17. Ang’o mange ma bikonyowa nikadhu iwi racu ma kabang’e mbe mi jumange? Kemii lapor moko. (Nen bende cal.)

¹⁶ Bed iketh wii i kum kite ma beco mir umego ku nyimego peri, ento ungo i kum ma reco. Wakemak lapor ma e: Kepar nia wubenambu kud umego ku nyimego. Nambune ukur lee man i ajikine, wucokuru karacelo pi nimaku cal moko. Imaku cal mange ario kara ka mi kwong’o uwok cuu ngo, maeno bikonyo. Kawoni cal utie adek. Re i acel, ineno nia umego moko umino wang’e. Ibitimo calne nenedi? Ibiweye cen pilembe i ario mange dhanu zoo ubevonjo, kadok umegone de.

¹⁷ Wacopo poro cal maenogi ku paru ma wagwoko i wiwa. Wang’ ma pol wabed wadong’ ku paru ma beco iwi saa ma wanambu kud umego ku nyimego mwa i iye. Re kepar nia i saa mi nambune acel, umego kunoke nyamego moko uyero kunoke utimo lembe m’umaku piny ungo. Waromo timo ang’o? Nyo wacopo weyo ngo paru maeno tap calu ma waromo weyo ko acel m’i kind cal ma wamaku? (Rie. 19:11; Efe. 4:32) Wacopo ii niweyo dubo ma kabang’e mbe ma jayic wadwa utimo kud i paru mwa, pilembe watie ku lembe dupa ma beco ma wacopo poy i kumgi ka wabeparu pi saa ceke ma wabedo kude i iye. Lembe ma kumeno re ma wamaru nigwoko i wiwa.   

PIRANG’O TIN RE MA PI MER UTIE TEK AKECA?

18. I thiwiwec maeni, lembang’o ma dongo dongo ma waponjo iwi meri?

¹⁸ Pirang’o ukwayu wagwok mer ma wamarara ko i kindwa ubed teki? Calu ma waneno, ka wabenyutho mer ni umego ku nyimego mwa, eno nwang’u wabenyutho nia wamaru Yehova. Wanyutho nenedi nia wamaru juyic wadwa? Yone acel utie nijuko cwinygi. Ka kisa negowa i kum jumange, ‘wabimedara nijuko cwinywa i kindwa.’ Wacopo medara niketho mer m’i kindwa ubed tek ke nenedi? Nwang’u wabeii nitimo kisa ni jumange.

19. Pirang’o tin re ma pire tie tek akeca nia wanyuth mer i kindwa?

¹⁹ Pirang’o tin re ma pire tie tek akeca nia wanyuth mer i kindwa? Pethro unyutho thelembene, eyero kumae: “Ajiki mi piny ceke dong’ ni ceng’ini. Pieno, . . . wumeruru i kindwu lee mandha.” (1 Pet. 4:7, 8) Calu m’ajiki mi ng’om maeni udhingo magwei, ukwayu wakur ang’o? Yesu ular uewo pi lembe ma binwang’u julub pare, eyero kumae: “Thek ceke . . . bidaguwu pi nyinga.” (Mat. 24:9) Kara wacir adegi maeno, wacikara nibedo i acel. Ka watimo kumeno, Sitani bituc ungo nipoko iwa pilembe mer m’utie “jamtwic ma cuu mandha ma dikojo i acel” re m’udiko kindwa.—Kol. 3:14; Filip. 2:1, 2.