Icopo tundo i kum lembakeca peri mi tipo

1. Peko ma kani ma ju dupa m’i kindwa gibenyego ko pi nitundo i kum lembakeca migi?

NYO idaru ketho lembakeca moko mi tipo re ibenyego kpe pi nitundo i kume?b Ka eyo, itie ngo kendi. Ku lapor, Philip ubed umito erwo ma ber nisagu man thirithiri, re saa ubed unwang’ere ngo ire pi rwone. Erika ke ubino ku lembakeca mi betundo con i coko mi lembanyong’a, re asu ebed etundo kpe kago i cokone ceke. Tomáš lundo ubed uii wang’ dupa nidaru somo Biblia zoo. Eyero kumae: “Somo Biblia ubed unyang’a ngo. Atimo tego wang’ adek, ento wang’ adekne zoo abed ajik i buku mi Lembe mi Julawi.”

2. Pirang’o kwayu ngo cwinywa utur ka waketho lembakeca moko mi tipo ma re fodi watundo ngo i kume?

² Kan iketho lembakeca moko ceng’ini eni re fodi itundo ngo i kume, cwinyi kud utur nia lembe udaru voyi. Kum nitundo kadok i kum nyathi lembakeca moko de kwayu saa man tego. Lemandha utie nia kan ibeii asu nitundo i kum lembakeca peri, eno nyutho nia ibeneno winjiri peri ku Yehova ni gin ma pire tek, man ibemito imii kero peri ceke ire. Kero ceke m’ibetimo, Yehova neno ni gin ma pire tek. I andha, ekwayu ngo lembe dupa i beng’i nisagu m’icopo timo. (Zab. 103:14; Mik. 6:8) Pieno keth lembakeca m’iromo tundo i kume, ke nimakere ku lembe m’ibenweng’iri i iye. Ing’ey m’iketho lembakeca moko, icopo timo ang’o pi nitundo i kume? Wakewecu iwi lembene moko.

AMORA PIRE TIE TEK

3. Pirang’o pire tie tek nibedo kud amora?

³ Amora tie gin ma pire tek pi nitundo i kum lembakeca mi tipo. Ng’atu m’utie kud amora bedo kud ava ma lee mi timo kero pi nitundo i kum lembakeca pare. Wacopo poro amora ku yamu m’ubecwalu bongu m’i wi yei kara yeine utund kaka m’ebecidho i iye. Ka yamu bemedere nikoto, ng’atu m’uberingo ku yei copo tundo kaka m’ebecidho i iye. Man ka yamune ubekoto ma tek, ecopo tundo piyo mandha. Rom rom kumeno, ka watie kud amora, wabitundo bende i kum lembakeca mwa. Umego David mi ng’om mi Salvador uyero kumae: “Amora ketho itimo kero, eketho iyiyo ngo lembe moko ci uceri nitundo i kum lembakeca peri.” Dong’ icopo timo ang’o kara ibed kud amora lee?

4. Icopo rwo pi lembang’o? (Jufilipi 2:13) (Nen bende cal.)

⁴ Rwo pi nikwayu amora. Yehova copo miyo iri amora nikadhu kud i tipo pare ma leng’ kara itund i kum lembakeca peri. (Som Jufilipi 2:13.) Saa moko waketho lembakeca pilembe wang’eyo nia etie lembe m’ubekwayere, man eno tie ber. Re wacopo bedo mbe kud ava mandha pi nitundo i kume. Eno tie lembe m’utimo nyamego moko ma nyinge Norina mi ng’om mir Uganda. Eketho lembakeca mi caku telo wi ponji moko mi Biblia, ento ebino mbe kud ava ma lee m’etund ko i kum lembakecane pilembe ebino nwang’ere nia etie ngo japonjo ma cuu. Ang’o m’ukonye? Ekoro kumae: “Acaku kwayu Yehova kubang’ ceng’ nia ekonya amed ava para mi telo wi ponji mi Biblia. Atimo kero nimedo bodho para mi ponji nimakere ku rwo para. I ng’ey dwi ma nyanok ci, anwang’u nia ava para medere. I oro ma rom eno, acaku ponji ario mi Biblia.”

5. Waromo nyamu i lembe iwi ang’o pi nimedo amora mwa?

⁵ Nyam i lembe iwi gin ma Yehova udaru timo iri. (Zab. 143:5) Jakwenda Paulo unyamu i lembe iwi bero ma yawe mbe ma Yehova unyutho ire, man eno ucwale nitimo ire ku tego pare ceke. (1 Kor. 15:9, 10; 1 Tim. 1:12-14) Kumeno bende, kan ibenyamu i lembe pi gin ma Yehova udaru timo iri, ibibedo kud amora mi tundo i kum lembakeca peri. (Zab. 116:12) Kenen lembe moko m’ukonyo nyamego acel mi ng’om mi Honduras pi nitundo i kum lembakeca pare mi doko jayab yo ma nja. Eyero kumae: “Aparu pi kite ma Yehova umara ko lee, etela i kind dhanu pare, ebedieng’ kuda man ebegwoka. Nyamu i lembe maeno uketho amare lee man umedo amora para mi caku tic pa jayab yo.”

6. Ang’o mange ma copo konyowa nimedo amora mwa?

⁶ Keth wii i kum mugisa m’ibinwang’u kan itundo i kum lembakeca peri. Wakenen lembe m’ukonyo Erika ma waweco pire i udukuwec m’ukadhu ma lembakeca pare ubino nibetundo con i coko. Eyero kumae: “Anyang’ nia tundo kpe i coko mi lembanyong’a uketho lembe dupa ubed ukadha. Ento tundo con romo ketho amotho umego ku nyimego man abedo kugi. Acopo bende niwinjo paru migi ma beco ma romo konya nimaru tic mi lembanyong’a man nimedo bodho para i tije.” Erika uketho wiye i kum bero mi tundo con i coko mi lembanyong’a, e etundo i kum lembakeca pare. Icopo ketho wii i kum mugisa ma kani? Tek lembakeca peri utie nisomo Biblia kunoke nirwo, par iwi kite m’eromo ketho kindwu doko ko ceng’ini ku Yehova. (Zab. 145:18, 19) Tek lembakeca peri utie nicego kite mi Jukristu, keth wii iwi kite m’ebiyiko ko winjiri peri ku jumange. (Kol. 3:14) Etie ber nia iriey thelembe ceke m’ubecweli nitundo i kum lembakeca peri. Bed ibol weng’i thirithiri iwi lembe m’irieyonegi. Tomáš ma wadaru weco bende pire uwacu kumae: “Kan atie ku thelembe dupa mi tundo i kum lembakeca moko, cwinya tur ungo nyaswaswa nitundo i kumgi.”

7. Ang’o m’ukonyo Julio giku min ot pare nitundo i kum lembakeca migi?

⁷ Bed ku dhanu ma bimiyo amora i kumi pi nitundo i kum lembakeca peri. (Rie. 13:20) Kenen lembe m’ukonyo Julio giku min ot pare nitundo i lembakeca mi medo tic migi mi lembanyong’a. Julio uyero kumae: “Wang’iyo jurimo m’ubed ucwaku lembakeca mwa, man ma wacopo weco iwi lembakecane kugi. Dupa m’i kindgi udaru tundo i kum lembakeca m’urombo ku mwa; pieno gibed gimiyo iwa kony ma beco pi lembene. Gibed gipenjowa nia wawok kakani ku lembakeca mwa, man gibed gitielo cwinywa kinde ma watie ku yenyne.”

KA WAMBE KUD AMORA

8. Lembang’o ma copo timere ka wabetiyo iwi lembakeca mwa kende kende saa ma watie kud amora? (Nen bende cal.)

⁸ I andha, nindo moko wan ceke wanwang’ara nia wambe kud amora. Nyo eno nyutho nia waromo tundo ngo i kum lembakeca mwa? Ungo. Ku lapor, yamu copo bedo ku tego ma lee ma romo cwalu yei nitundo kaka m’ecidho i iye. Re tego pa yamu belokere, man nindo moko ekoto ngo akota zoo de. Nyo eno nyutho nia jaring yei bicungo dii kakare? Kumeno ngo. Ku lapor, yei moko wotho ku moter, mange ke ku ngai. Jaring yei copo tiyo ku jamtic maeno pi nimedere asu ku woth pare. Amora mwa de ubedo ve yamu; saa moko ecopo jwik kunoke emedere. Man saa moko wanwang’ara nia wambe kud amora mi tiyo iwi lembakeca mwa. Pieno ka wabetiyo iwi lembakeca mwa kende kende saa ma watie kud amora, wabitundo ngo i kum lembakecane. Ento tap calu ma jaring yei nwang’u yore mange kara etund kaka m’ecidho i iye, wan bende waromo tiyo iwi lembakeca mwa kadok kinde ma wambe kud amora de. I andha, eno tie lembe ma yot ungo, re ibibedo kud anyong’a tek itundo i kum lembakeca peri. I wang’ niweco iwi gin ma wacopo timo, wakewec iwi penji moko ma waromo penjara ko.

9. Nyo etie rac ni ii pi nitundo i kum lembakeca moko kadok wanwang’u nia wambe kud amora mi tundo i kume? Kekor.

⁹ Yehova ubemito watim ire kud anyong’a man kud ava. (Zab. 100:2; 2 Kor. 9:7) Dong’ ka wanwang’u nia wambe kud amora mi tundo i kum lembakeca moko mi tipo, nyo ukwayu wamedara asu ni ii nitundo i kume? Wakenenu lapor pa jakwenda Paulo. Eyero kumae: “Abefwodo kuma man abetelo wiye calu ng’eca.” (1 Kor. 9:25-27) Paulo ubed utegere nitimo lembe m’atira kadok i saa ma nwang’u kume ubecwale nitimo lembe m’ukoc de. Nyo Yehova ujolo tic pa Paulo? Eyo, emiyo ire bende sukulia pi kero m’etimo.​—2 Tim. 4:7, 8.

10. Ni ii pi nitundo i kum lembakeca kadok i saa ma wambe kud amora miyo bero ma kani?

¹⁰ Wan bende, anyong’a nego Yehova piwa kan ebeneno nia waii nitundo i kum lembakeca mwa kadok nwang’u wambe kud amorane de. Anyong’a nege pilembe eng’eyo nia wabetimo ngo pi mer ma wamaru ko lembakecane, ento pi mer ma wamaru ko en. Tap calu ma Yehova umiyo mugisa ni jakwenda Paulo, ebimiyo bende mugisa iwi kero ma wabetimo. (Zab. 126:5) Man ka wabeneno mugisa pa Yehova, wabicaku bedo kud amora. Nyamego moko ma nyinge Lucyna ma kwo i ng’om mi Pologne uyero kumae: “Saa moko amito ngo acidh i tic mi lembanyong’a, asagane kan aol. Re kan acidho, anyong’a m’alund adok anwang’u i ng’eye tie giramiya ma wang’u ijo.” Dong’ wakenenu gin ma wacopo timo ka wambe kud amora.

11. Yehova copo konyowa nenedi waceg kweriri gijo?

¹¹ Rwo pi nikwayu kweriri gijo. Kweriri gijo utie copo ma ng’atini bimo ko wi paru man timo pare. Wang’ ma pol, wec maeno benyutho paru mi ceriri gijo i kum timo lembe ma rac. Re watie bende ku yeny mi kweriri gijo kara watim lembe ma cuu, asagane ka tic moko tie tek kunoke wanwang’u nia wambe kud amora. Poy nia kweriri gijo utie acel m’i kind nying tipo. Pieno kway Yehova ukonyi ku tipo ma leng’ kara iceg kite maeno ma pire tek. (Luka 11:13; Gal. 5:22, 23) David ma juweco pire i wang’e ukoro kite ma rwo ukonye ko. Emito ngo ebed ekeng’ ponji pare ma segi. Eyero kumae: “Akwayu Yehova ukonya aceg kweriri gijo. Ku kony pare, acaku program ma cuu mi timo ponji man abed akeng’e ngo.”

12. Cik mir ukungu ma nwang’ere i Eklizia 11:4 konyowa nenedi nitundo i kum lembakeca mwa?

¹² Kud ikur nia lembe ceke kedok ber hai. I ng’om maeni e ci, lembe ma bibedo iwa ma ber hai umbe. Pieno ka wabekuro nia lembe ukeudok ma beri, wabitundo ngo nyanok de i kum lembakeca mwa. (Som Eklizia 11:4.) Umego moko ma nyinge Dayniel uyero kumae: “Lembe ma ber hai ci umbe. Pieno akura mbe, wacikara nicaku acaka wang’acel.” Umego moko ma nyinge Paul mi ng’om mir Uganda unyutho thelembe mange ma wacikara ko ngo nidwoko lembe ku ng’eye. Eyero kumae: “Ka wacaku lembe moko kadok kud i peko, Yehova copo konyowa.”​—Mal. 3:10.

13. Nicaku lembakeca ku lembe ma thindho miyo bero ma kani?

¹³ Cak ku lembe ma thindho. Waromo bedo mbe kud amora pilembe nang’u wabeneno nia ve nitundo i kum lembakeca mwa tie tek lee. Tek in de ibenweng’iri i lembe maeno, nyo iromo poko ngo i lembakeca perine thindho thindho? Ka lembakeca peri utie nicego kite moko, nyo iromo kecaku nyuthe ngo nok noki? Ka lembakeca peri utie nisomo Biblia zoo, nyo icopo caku some ngo nok noki? Tomáš ma juweco pire i acaki uii ku lembakeca pare mi somo Biblia pi oro acel. Eyero kumae: “Anyang’ nia acaku some dongo dongo dit. Pieno ang’iyo nicake kendo, ento ma wang’uni, apangu nibesomo theng thek moko kubang’ ceng’ man ninyamu lembe i wigi. Lembuno uketho acaku nwang’u anyong’a i som para.” Calu m’anyong’a pa Tomáš ubino medere iwi somo Biblia, ecaku some dong’ pi saa ma lee. Tokcenne, esomo Biblia tup.c

CWINYI KUD UTUR TEK ITUNDO NGO I KUM LEMBAKECA M’IKETHO

14. Lembang’ogi ma copo ketho nitundo i kum lembakeca peri bedo teki?

¹⁴ Lembe ma rac utie nia kadok nwang’u watie kud ava kunoke wapangu lembe mwa ma ber de, re asu moko wacopo tundo ngo i kum lembakeca mwa. Ku lapor, “lembe ma wok rek” copo camu saa mwa ma watie ku yenyne pi nitiyo iwi lembakeca mwa. (Ekl. 9:11, NWT) Wacopo nwang’ara ku peko ma turo cwinywa man ma jwigo tego mwa. (Rie. 24:10) Calu ma watie ku kum mi dubo, wacopo timo kosa ma ketho ebedo iwa tek nitundo i kum lembakeca mwa. (Rum. 7:23) Kunoke saa moko waromo nwang’u nia waol. (Mat. 26:43) Dong’ ang’o ma romo konyowa nivoyo gin m’ubecerowa?

15. Ka watundo ngo i kum lembakeca mwa, nyo eno nyutho nia lembe udaru voyowa? Kekor. (Zaburi 145:14)

¹⁵ Poy nia kan itundo ngo i kum lembakeca moko m’iketho, eno nyutho ngo nia lembe daru voyi. Biblia yero nia wacopo nwang’ara ku peko thiri thiri. Ento edok enyutho bende kamaleng’ nia wacopo tundo i kum lembakeca mwa kendo, ndhu ku kony pa Yehova. (Som Zaburi 145:14.) Umego Philip ma walar waweco pire i wang’e ukoro pi gin m’uketho lembe urombo ire, eyero kumae: “Aketho ngo wiya nia tundo i kum lembakeca para udaru voya wang’ adi, ento aketho wiya i kum saa m’adok abed acakugi kendo i iye.” David ma walar waweco pire uwacu kumae: “Kan atundo ngo i kum lembakeca para, anene ngo ni macero, ento ebedo ira ni kaka mi nyutho ni Yehova nia amare lee.” Eyo, kan ibemediri nitundo i kum lembakeca peri kadok kud i kind peko de, eca nwang’u ibenyutho ni Yehova nia ibemito inyay mutoro i iye. Anyong’a nege lee kan eneno ibemediri ni ii pi nitundo i kum lembakeca peri!

16. Ka lembe moko uketho itundo ngo i kum lembakeca peri, iromo nwang’u ponji ma kani?

¹⁶ Nwang’ ponji i kum lembe m’uceri nitundo ngo i kum lembakeca peri. Kepar pi gin m’uketho lembene utimere, man ipenjiri kumae: ‘Nyo acopo wilo lembe moko kara lembakeca para kud upodh kendo?’ (Rie. 27:12) Ento saa moko kan ibenwang’u nia nitundo i kum lembakeca m’iketho tie tek, eno nyutho nia eromo ngo kudi. Kan inwang’u nia andha etie iri kumeno, kedok inen i lembakeca perine kendo ka nyo asu eromo kudi.d Yehova bineni ngo ni ng’atu ma lembe voyo pilembe nia itundo ngo i kum lembakeca moko m’ukadhu kadhiri peri.​—2 Kor. 8:12.

17. Pirang’o wacikara nibeparu pi gin ma wadaru timo?

¹⁷ Bed ipar pi gin m’idaru timo. Biblia yero nia “Mungu en e won gondiri ngo ma nia wiye wil i kum tic mwu.” (Ebr. 6:10) Pieno in de wii kud uwil i kum gin m’idaru timo. Kepar pi lembakeca m’idaru tundo i kumgi; saa moko nyo ubino nibedo ku winjiri ma ceng’ini ku Yehova, niweco pire ni jumange, kunoke nilimo batizo. Tap calu m’i wang’e de idaru timo mediri man itundo i kum lembakeca peri moko mi tipo, icopo mediri nitundo i kum lembakeca peri ma kawoni de.​—Filip. 3:16.

18. Wacikara nipoy i kum lembang’o kinde ma wabeii nitundo i kum lembakeca mwa? (Nen bende cal.)

¹⁸ Ku kony pa Yehova, icopo tundo i kum lembakeca peri, tap calu ma jaring yei tundo kud anyong’a kaka m’ebecidho i iye. Ento poy nia uring yei ma dupa ginwang’u bende anyong’a i kum woth migine. Rom rom kumeno, bed itim kero saa ceke nineno kite ma Yehova ubekonyi ko; eno bikonyi nibedo kud anyong’a kinde m’ibeii nitundo i kum lembakeca peri. (2 Kor. 4:7) Tek ivoc ungo, ibinwang’u mugisa ma lee dit.​—Gal. 6:9.