የአንባቢያን ጥያቄዎች

ጳውሎስ፣ አንዲት መበለት ከክርስቲያን ጉባኤ እርዳታ ለማግኘት ብቁ እንድትሆን “የአንድ ባል ሚስት የነበረች” መሆን እንዳለባት ሲገልጽ ምን ማለቱ ነበር?—1 ጢሞቴዎስ 5:9

ሐዋርያው ጳውሎስ “የአንድ ባል ሚስት የነበረች” ሲል ይህች እህት መበለት ከመሆኗ በፊት የነበራትን ሁኔታ ለማመልከት እንደሆነ ግልጽ ነው። ይህ ሲባል ይህች መበለት አንድ ጊዜ ብቻ ያገባች መሆን እንዳለባት መግለጹ ነው? ወይስ ጳውሎስ የተናገረው ነገር ሌላ ትርጉም ሊኖረው ይችላል?a

አንዳንዶች፣ ጳውሎስ እየተናገረ ያለው አንድ ጊዜ ብቻ ስላገቡ እህቶች እንደሆነ ይገልጻሉ። እርግጥ ነው፣ በበርካታ ባሕሎችና ማኅበረሰቦች ውስጥ ባሏ ከሞተ በኋላ ድጋሚ ሳታገባ የምትኖር ሴት ጥሩ እንዳደረገች ይታሰብ ነበር። ሆኖም ይህ ዓይነቱ አመለካከት ጳውሎስ በሌላ ደብዳቤው ላይ ከጻፈው ሐሳብ ጋር ይጋጫል። ለምሳሌ በቆሮንቶስ ለነበሩት ክርስቲያኖች በጻፈው ደብዳቤ ላይ በእርሱ አመለካከት፣ አንዲት መበለት ሳታገባ ብትኖር ደስተኛ እንደምትሆን ገልጿል፤ ሆኖም እንደገና ትዳር ለመመሥረት ከፈለገች “የፈለገችውን ሰው ለማግባት ነጻነት አላት፤ ሰውየው ግን በጌታ መሆን አለበት” በማለት በግልጽ ተናግሯል። (1 ቆሮንቶስ 7:39, 40፤ ሮሜ 7:2, 3) ከዚህም በተጨማሪ ጳውሎስ ለጢሞቴዎስ ሲጽፍ “ባል የሞተባቸው ወጣት ሴቶች እንዲያገቡ . . . እመክራለሁ” ብሏል። (1 ጢሞቴዎስ 5:14) በመሆኑም አንዲት መበለት እንደገና ለማግባት ብትመርጥ አትነቀፍም ነበር።

ታዲያ ጳውሎስ ለጢሞቴዎስ በጻፈው ደብዳቤ ላይ ከላይ ያለውን ሲናገር ምን ማለቱ ነበር? “የአንድ ባል ሚስት የነበረች” የሚለው አባባል የሚገኘው በዚህ ጥቅስ ላይ ብቻ ነው። ጥቅሱ መጀመሪያ በተጻፈበት ቋንቋ፣ ይህ ሐረግ ቃል በቃል ሲተረጎም “የአንድ ወንድ ሴት” ማለት ነው። ይህ አባባል ደግሞ ጳውሎስ በደብዳቤው ላይ በተደጋጋሚ ከተጠቀመበት “የአንዲት ሚስት ባል” ወይም በግሪክኛው “የአንዲት ሴት ወንድ” ከሚለው አገላለጽ ጋር ተመሳሳይ መሆኑ ትኩረት የሚስብ ነው። (1 ጢሞቴዎስ 3:2, 12፤ ቲቶ 1:6) ጳውሎስ፣ ክርስቲያን የበላይ ተመልካቾችና የጉባኤ አገልጋዮች ሊያሟሏቸው የሚገቡ ብቃቶችን ሲዘረዝር “የአንዲት ሚስት ባል” የሚለውን አገላለጽ ተጠቅሞበታል። በዚያ ጥቅስ ላይ ይህ አባባል በዋነኝነት የተሠራበት፣ አንድ ያገባ ወንድ በክርስቲያን ጉባኤ ውስጥ ኃላፊነት ለመሸከም ብቁ እንዲሆን ለሚስቱ ታማኝና በሥነ ምግባር ረገድ የማይነቀፍ መሆን እንዳለበት ለመግለጽ ነው።b በመሆኑም በ1 ጢሞቴዎስ 5:9 ላይ የሚገኘው አባባልም ተመሳሳይ ትርጉም አለው:- አንዲት መበለት በጉባኤ ውስጥ እርዳታ ለማግኘት ብቁ እንድትሆን ባሏ በሕይወት በነበረበት ወቅት ባሏን የምትወድ ታማኝ ሚስት የነበረች እንዲሁም በሥነ ምግባር ረገድ የማትነቀፍ መሆን ይኖርባታል። ጳውሎስ በቀጣዮቹ ቁጥሮች ላይ የዘረዘራቸው ሌሎቹ ብቃቶች በሙሉ እንደዚህ ዓይነት ምግባር ስላላት መበለት የሚገልጹ ናቸው።—1 ጢሞቴዎስ 5:10

[የግርጌ ማስታወሻዎች]