“በትክክለኛው ጊዜ የተነገረ ቃል”

 ¹ ሕይወት የሚያስገኘውን መልእክት ለሌሎች ሰዎች ማካፈል ፈታኝ ሆኖብሃልን? አድማጮችህን ለመማረክ የተራቀቁ ቃላትን መጠቀም እንዳለብህ ይሰማሃልን? ኢየሱስ ደቀ መዛሙርቱን የላካቸው “ሄዳችሁም:- መንግሥተ ሰማያት ቀርባለች ብላችሁ ስበኩ” ብሎ ነበር። (ማቴ. 10:​7) መልእክቱ ያልተወሳሰበና ለመናገር ቀላል ነበር። ዛሬም ቢሆን ሁኔታው ከዚህ የተለየ አይደለም።

 ² ብዙውን ጊዜ ውይይት ለመጀመር ጥቂት ቃላትን መናገር ብቻ በቂ ሊሆን ይችላል። ፊልጶስ ኢትዮጵያዊውን ጃንደረባ ሲያገኘው “በእውኑ የምታነበውን ታስተውለዋለህን?” በማለት ጠየቀው። (ሥራ 8:​30) ‘በትክክለኛው ጊዜ የተነገረው ቃል’ እንዲህ ያለ አስደሳች ውይይት ለማድረግ አስችሏል!​—⁠ምሳሌ 25:​11 NW 

 ³ አንተም በአገልግሎትህ ተመሳሳይ አቀራረብ መጠቀም ትችላለህ። እንዴት? አስተዋይ በመሆንና ከሁኔታዎች ጋር የሚስማሙ ቃላትን በመምረጥ ነው። አንድ ጥያቄ ጠይቅና ለጥያቄው የሚሰጠውን መልስ አዳምጥ።

 ⁴ አንዳንድ መሠረታዊ ጥያቄዎች:- ውይይት ለመጀመር ከሚከተሉት ጥያቄዎች አንዱን መሞከር ትችላለህ:-

◼ “የጌታን ጸሎት (ወይም አባታችን ሆይ) ጸልየህ ታውቃለህ?” (ማቴ. 6:​9, 10) ጥቂቱን ክፍል ከጠቀስክለት በኋላ እንደሚከተለው ማለት ትችላለህ:- “አንዳንድ ሰዎች ‘እዚህ ላይ ኢየሱስ ይቀደስ ያለው የአምላክ ስም የትኛው ነው?’ ብለው ይጠይቃሉ። አንዳንዶች ደግሞ ‘ኢየሱስ እንድንጸልይለት የነገረን መንግሥት ምንድን ነው?’ ብለው ይጠይቃሉ። አንተ ለእነዚህ ጥያቄዎች አጥጋቢ መልስ አግኝተሃል?”

◼ “‘የሕይወት ትርጉም ምንድን ነው?’ ብለህ ራስህን ጠይቀህ ታውቃለህ?” አምላክ ከሚሰጠው እውቀት ጋር ዝምድና እንዳለው አሳየው።​—⁠መክ. 12:​13፤ ዮሐ. 17:​3

◼ “ሞት የማይኖርበት ጊዜ ይመጣል ብለህ አስበህ ታውቃለህ?” አሳማኝ መልስ ለመስጠት ኢሳይያስ 25:​8ን እና ራእይ 21:​4ን ተጠቀም።

◼ “በዓለም ላይ ለሚታየው ሁከትና ብጥብጥ ቀላል መፍትሔ ይኖር ይሆን?” አምላክ “ባልንጀራህን . . . ውደድ” ብሎ እንዳስተማረ አሳየው።​—⁠ማቴ. 22:​39

◼ “ምድራችን አንድ ቀን በጠፈር አካል ተመትታ ትወድም ይሆን?” መጽሐፍ ቅዱስ ምድር ለዘላለም ጸንታ ትኖራለች የሚል ተስፋ እንደያዘ ንገረው።​—⁠መዝ. 104:​5

 ⁵ ምሥራቹን ቀላል፣ ቀጥተኛና ደግነት በሚታይበት መንገድ አቅርብ። ይሖዋ የእውነትን አንድ “ቃል” እንኳ ለሌሎች ለማካፈል የምታደርገውን ጥረት ይባርክልሃል።