Saka 4 Folad

Ci Aristarkus o Tisalonika Makiton a tamdaw, o madimadiay a widang ni Pawlo cingra. Sakina cecay masowal no Fangcalay Cudad ci Aristarkus i, itiyaay sakina tolo no piliwko ni Pawlo a mitosil tayra i Ifiso. O cafay ni Pawlo ci Aristarkus itiya, malepelay no mariˈangay a tamdaw cangra. (Dmak 19:29) Matedal cingra i, cowa ka pakayni sapidipotaw to niyah a mifalah ci Pawloan. Ikor no pina folad tayra ci Pawlo i Kirisiya, sapipatayaw ko Yutaya tamdaw cingraanan, kamayan ci Aristarkus eca ka matalaw, pacafay itihi ni Pawlo. (Dmak 20:​2-4) Maedeng i saka 58 miheca, patayraan ci Pawlo i Loma, kalacafayay ci Aristarkus i lalan, toniya tatokian tahalifaay to pades no tamina. (Dmak 27:​1, 2, 41) Tahirato i Loma marofoay i lomaˈ ci Pawlo, cecay liyad kalacafayay ci Aristarkus cingraanan. (Kolosay 4:​10) Ira ko madimadiay a cafay, maedeng taˈangayay ko pakalalok ci Pawloan, mahinomay ko falocoˈ! Wa ngaˈay kita malecad ci Aristarkusan, ano kangaˈayanto katatiihanto no salikaka, aka a piliyas cangraanan. w20.01 9 fiedac 4-5 fatac

O roma minilnilan no fangcalay saocor no Kawas a tamdaw, cowa ka citatodong milifok to mahaenay a sakaliko sanay ko piharateng alatek. Soˈlin mahaen, cowa ka cisasa to minilnilan ko niyah hokira. Ano maharateng ningra maˈorip i kakarayan noikor i, wa matomes ko lipahak ato piakoˈid no falocoˈ. (1 Pitiro 1:​3, 4) Ano hatiraay i, o minilnilan no fangcalay saocor no Kawas a tamdaw makalimay sakahenayaw a mahererek ko ˈorip i fafekang no sera han? Patinakoan ni Pawlo ko tireng no manilnilay a tamdaw to pakopangan, sanay: ‘Itiniay kita i pakopangan a cedaah, micada to saroero, cowa ko pakayniay sapihepolaw tonini, o sapicaˈdongaw toriraan, tano sakaˈorip mikotay to mamapatay a tireng.’ (2 Korinto 5:4) Mihaenay, cowa ko mapiliˈay cangra to ˈorip i fafekang no sera a makalim kahenay a mapatay. Soˈlinay i, limlaay cangra to ˈorip no niyah, misongilaˈ misakadademak to cecacecay romiˈad malacafay to salawina a matayal saki Yihofaan. Mankora, halamhamay cangra to sakaliko matayal i kakarayan no ikor.​—1 Korinto 15:53; 2 Pitiro 1:4; 1 Yohani 3:​2, 3; w20.01 23 fiedac 12-​13 fatac

Ano pahatatanam ko kakarayan Wama kitaanan i, mirikecay kitaanan. Adihayay ko pakayraan ni Yihofa a mirikec. Tinakoen, ano miˈosi kita to Fangcalay Cudad anca mirienang to saˈopo i, wa mahapinang itini maanan a pakayraan iraay ko sasalofen no niyah alatek. Roma i, patalipaˈelalay anca painiay ko malohemay malitengay kitaanan. Ano samaanto ko pirikec ni Yihofa kitaanan, iraay ko olah Ningra a mihaen to demak. (Yirimiya 30:11) Padamaay ci Yihofa kitaanan misiˈayaw to sapalifet. O kakarayan a Wama malecad o sidaˈitay a wama wa padama to wawa miremo to pasangaray. Pafeliay Cingra kitaanan to fangcalay saocor, padama kitaanan tahatolas a madimadi. (Luka 11:13) Padamaayho Cingra kitaanan miremo to matoleday a harateng. Tinakoen, pafeliay kitaanan to makapahay a hatokel, ho ngaˈay kita mihadidi to pasangaray. Ano o maananto ko malifaay ita a sapalifet, o sidaˈitay a Wama wa misongilaˈ a miadah to dokaˈ ita. O macadaay ita anini a masakenaay a roray ono cecayay aca liyad, nikawrira o sapafeli ni Yihofa a saparaheker o tahadaˈocay.​—2 Korinto 4:​16-​18. w20.02 5 fiedac 14-​15 fatac

Wa ngaˈay kita pakalowid to maˈinapay a falocoˈ. Haratengen ko kaka ni Yosif hena. Ikor no pina mihecaan, malalitemohay cangra ci Yosifan i Icip. Sakafanaˈaw ci Yosif, pasasiyoray ko kaka ningra hokira, mansa cowa ka tangsol sa mifanaˈ to o safa cingra. Tahidangan ni Yosif ko kaka a mitahka, itini pitahkaan ciharatengay cingra to sasafaay a Pinyamin, pafelianho cingra to adihayay a kakaenen. (Satapangan 43:33, 34) Kawra, cowa ka ˈinap ko kaka ci Pinyaminan, ciharatengayho cangra ci Pinyaminan ato wama nangra. (Satapangan 44:30-​34) Mifaˈnotanto no kaka ni Yosif ko maˈinapay a falocoˈ, rihadayayto ko paro no lomaˈ nangra. (Satapangan 45:​4, 15) Kita i, ngaˈay faˈnoten ko i falocoˈay a ˈinap, mihaen ngaˈ rihaday ko paro no lomaˈ ato kasakopang ita. Tokel ni Yihofa kitaanan falahen ko maˈinapay, micowat to rihadayay. Ano palahad kita to misapoeneray ato marenecay a harateng, masemer to tao, cowato ko papalamit to maˈinapay i falocoˈ. w20.02 19 fiedac 17-​18 fatac

Mao:lahay ci Yihofa tisowanan, o pakayraan iso a pacoˈay i, mitolon Cingraanan. Fanaˈen ko Kawas to kacarirawan ato piakoˈid iso, mihaen wa matongal ko olah iso Cingraanan. Maˈaraw iso samanay ci Yihofa a pacaˈof to picangacang iso i, wa tanektek ko kalawidang Cingraanan. O satolon papadama tisowanan a pakasoˈlin to cipinangay ci Yihofa tisowanan. Kawra, sapitongalaw a miingid ci Yihofaan, cipinang to harateng Ningra, ato mitokelay Cingra samaan ko hademak no miso, mihaenay ka pisongilaˈ a micekiw to Kimad Ningra. Minanam misaareteng minengneng to Kimad no Kawas. Dengan o Fangcalay Cudad ko ngangaˈay pasowal tisowanan to pakayniay ci Yihofaan a kimad, ato mitokelay to sasamaan ko hademak iso. To romiˈamiˈad miasip to Fangcalay Cudad, misongilaˈ misaday to cacekiwen a lalakaw, hanaca saka dademaken ko mananamay, o paihkalay to misaaretengay kiso to Kimad no Kawas. (ˈOlic 119:​97, 99; Yohani 17:17) Iraay ko mihalakaan iso a miasip to Fangcalay Cudad, mitoor toniya mihalakaan to romiˈamiˈad a miasip to Fangcalay Cudad hokira? w20.03 5 fiedac 8-9 fatac

Citolasay ko ˈicel no roma tamdaw, cowa ka ngaˈay halafin a pakalomaˈ mitosil, kawra wa ngaˈay cangra maroˈ i kaˈalomanan a kitiraan, misawacay to mitaˈlifay a tamdaw, ngaˈayay tano cowa padeteng pakayraan misawacay, patikami anca patingwa misawacay. ˈAlomanay mitosilay soˈlin caka ngaˈay mararid pakalomaˈ mitosil, kamayan mikitini roma pakayraan mitosil a milifok to kadofahay a lipahak. Soˈlin caka ngaˈay ko tireng ita, wa ngaˈay misongilaˈ milaheci to tatayalen. Sanay ci Pawlo: ‘Tiˈeren ako koya pafeliay to ˈicel takowanan, maremo ko polong a demak.’ (Filipi 4:​13) Itini miliwko mitosil adadaay ci Pawlo, kawra iraay ko sapafeli ni Yihofa a ˈicel, ngaˈayay padotoc a tanektek cingra. Sanay ko sowal ningra to Kalatiya tamdaw: ‘Samanen adadaay kako, hato iraay ko toki milasil to ngaˈayay lihaf tamowanan.’ (Kalatiya 4:​13) Malecaday, tatiih ko tireng to latekay mafohatay ko sapitosil a toki, ngaˈay kita pasayra i ising, kangkofo, ato roma miadahay a tamdaw misawacay, oniya tamdaw cowa ka litemoh no mitosilay i lomaˈ nangra. w19.04 4-5 fiedac 10-​11 fatac

Itini 2018 miheca, o makecengay anca pakidemay ko saconged to midokoay demak a kilac, komoden i, 223, 000 ko mitosilay a tamdaw. Makeceng no mikowanay ko demak ita, cowa ko kafahkaˈan, o soˈlinay mihakelongay ci Yisan a tamdaw, o tatahacada to sapalak. Ano icowato ko kitiraan ita, wa fahal saan ko mikowanay a mikeceng to pidoko ita to sidaˈitay a Kawas ci Yihofaan. Ano mikeceng ko mikowanay to demak ita i, o cowato kaolah cowato palemed ko Kawas kitaanan, wa saan ko harateng ita alatek. Kawra cowa ka hatira. Haratengen ko tinakoan no tarokos ci Pawlo, malifokay ningra ko pihayda no Kawas, mansa ira ko tatodong mitilid to 14 cacudadan no Krisiya Sowal a Fangcalay Cudad, malo tarokosayho padama to kalo kitakit a tamdaw. Kawraan tahacadaay cingra to pakidemay a sapalak. (2 Korinto 11:23-​27) Itini nalifetan ni Pawlo mananamay ita, mihaian no Kawas tahacada to sapalak ko madimadiay midoko Cingranan a tamdaw. w19.07 8 fiedac 1, 3 fatac

Tada ciharatengay ci Yihofa to sikawdan Ningra, o cecay pakayraan i, padama cangranan micoˈay to ˈada. Sakakaay ˈada ita ci Satan ato tatiihay coyoh. Patalipaˈelalay ci Yihofa kitanan aka piingid ci Satanan ato tatiihay coyoh, halo padama kitanan micoˈay cangranan. (Ifiso 6:​10-​13) Micada kita to sadama ni Yihofa, misarocod a mitadiˈec Cingranan, wa pakalowid to saˈodis ni Akoma. Malecad ci Pawloan ira ko pakasoˈlinay falocoˈ, sanay cingra: ‘Ano midamaay ko Kawas kitanan, o cima ko mamisafelit kitanan hani?’ (Loma 8:​31) Kita o malo Krisciyangay, cowa ko mamasemer to demak ni Satan ato tatiihay coyoh, o mamisaˈicel mafanaˈ ci Yihofaan ato midoko Cingranan. (ˈOlic 25:5) Soˈlin mahaen, o mamafanaˈ kita to mihalakaan ni Satan, ho eca ka lipalaw ningra.​—2 Korinto 2:​11. w19.04 20 fiedac 1-2 fatac

Ano mihinom to masomaday a tamdaw i, o pacafay aca i tihi nangra, caka somowal to maanan ngaˈayto han? Cowa ko pitengil aca to sowal nangra, paihkalho kita to siniˈadaay a falocoˈ. Wa ngaˈay tano madaˈmaˈay a sowal paihkal to kaciharateng no mita. Ngaˈay mihaen ko sowal iso: “Matengil ko malifaay iso masomaday kako.” Ngaˈayay hadaken ko pina salicay, misaˈosi to cipinangay ko niyah to sowal no tao, haenen ko sowal “Saka cipinangaw kako to harateng iso, ngaˈay padamaen iso kako han?” Anca “O sowal iso . . . mahaenay ko tatodong han?” O hatiniay a sowal ngaˈay mahapinang ningra, soˈlinay misongilaˈ kita a mitengil, saka cipinangaw to harateng ningra. (1 Korinto 13:​4, 7) Wa misinanot kita a mitengil, ‘aka macaloh a pasowal.’ Hamaan ketonen ko sowal no tao, haharateng sa a paini anca misalof to harateng nangra. Masakalimlaan ko pitafo to mihadidiyay! Hamaan macaloh a paini to tao, paihkalen ko siniˈadaay a falocoˈ.​—1 Pitiro 3:⁠8. w19.05 17-​18 fiedac 15-​17 fatac

Itini paro no lomaˈ, Wa maolah ko faˈinay to fafahi, ‘malecad o kaolah ni Kristo to kasakopang.’ (Ifiso 5:​28, 29) Nanamen no faˈinay ko kinafalahay a olah ni Kristo, paikakaen ko saali ato sakangaˈay no fafahi to niyah. O roma faˈinayan pasangaray maolah to tao, pakayniay i serangawan nangra alatek, o picada no kalo a tamdaw cowa ka sadafdaf, awaay ko sidaˈit, tada pasangaray a mifalic, kawra ano sapitooraw cangra to Rikec ni Kristo a maˈorip i, kalimlaan ko noka pifalic. O faˈinay ano ira ko kinafalahay to niyah a olah i, wa kangodoen no fafahi cingra. Roma i, ano maolah ko wama to wawa i, cowa ko tatano sowal ato waywayan a midokaˈ to wawa. (Ifiso 4:​31) Wa paihkal cingra to olah, ato pihayda, parihaday to wawa, mihaenay wa matongal ko olah ato pakasoˈlin no wawa to wama. w19.05 6 fiedac 21 fatac

Pairasolay ci Kapriil to mamala ‘hongtiˈ ci Yis, ngaˈayay haratengen ita samaan mifiyor ci Mariyaan konini. Miharateng cingra o mamikotay ci Yis ci Hirotian a mala hongti, anca midotocay ci Hirotian a tamdaw, mala hongti mikowan to Israil hokira? Ano mahaenay, wa mamalo wina no hongti ci Mariya, aitira i lomaˈ no hongti a maroˈ cingra kira. Kawra awaay matilid to mihaenay ci Mariya milongoc to mikiriwiˈay a saaroˈan i Hongti Kitakit. O misapoeneray a fafahiyan ci Mariya. Haharatengen ita, micekiw to Fangcalay Cudad ato mitepangan cudad no likakawa, oha sapiingidaw ci Yihofaan. O ngangaˈay kita pakayni noka picekiw a mafanaˈ to “masamaanay a tamdaw” ko niyah, ato mamisamaan a misalof kita ngaˈ pakahemek ci Yihofaan. (Yakop 1:​22-​25; 4:8) ˈAyaw no picekiw, tolonen ci Yihofa, micangacang Cingranan pafeli to fangcalay saocor kitaanan. Ngitangiten Cingra padama kitanan mikitini picekiw milifok to taˈangayay epoc, ato pahapinang kitanan to o maanan ko sasalofen noniyah. w19.05 30-31 fiedac 18-19 fatac

Latekay, cowa ka cecay aca ko masiˈayaway ita a pasangaray. Tinakoen, salikaka ci Yohani, ciadadaay cingra to koicaway ko tatirengan, taˈangayay ko pisemsem, oya 19 miheca mararamod a fafahi ningra miliyasay cingranan, matongalay ko roray. Ikor, oya tatosaay fafahiyan wawa ningra, cowato pidoko ci Yihofaan. Salikaka ci Pawpo aci Linta oniya mararamoday na tahasiˈayaway to cowa ka lecad a pasangaray. Malahdaway ko katayalan ato lomaˈ nangra, roma i, ciadadaay tono falocoˈan ci Linta, mamapatay cingra alatek, hanaca ciadadaayho to mipalakay to sapicoˈay no tireng to fayking. Ngaˈayay masayar ko falocoˈ ita, o misangaˈay a Tatapangan ita, sidaˈitay a Wama ci Yihofa cipinangay to pifiyor no saroero kitanan, makalimay sapadamaaw kitanan. (Filipi 4:​6, 7) Adihayay ko maˈoningay i Fangcalay Cudad a nalifetan no madimadiay sikawdan misiˈayaw to pasangaray, milengoayho samaanay ci Yihofa padama cangranan. w19.06 14 fiedac 2-3 fatac

Patado kita to malahdaway ko ramod a tamdaw midemak to mimingay demak, wa macada nangra ko kaciharateng ita cangranan, samanen tada misaaliay cangra nohatini to kalacafay no ngaˈayay widang. Sasamaan kiso a ciharateng cangranan hani? Ngaˈayay tahidangen iso cangra tayni i lomaˈ komaen, malacafay cangranan a milawla, anca malacafay cangranan a mitosil. Latekay tahidangen cangra malacafay to pakalomaˈay pidoko. Mihaen ko demak iso, wa mahemek ci Yihofa, samanen ci Yihofa ‘miingiday to makesemay ko falocoˈ a tamdaw,’ halo ciharateng to malahdaway ko ramod a tamdaw. (ˈOlic 34:18; 68:5) Caka halafin, wa mikowanto ko Hongti Kitakit no Kawas to polong a hekal, cowato ko mamilomal to kasomadan a demak, “o mamatawalto ko iˈayaway a demak a maemin.” (Isaya 65:16, 17) Hinatalaay kita to kaira noniya romiˈad! ˈAyaw nonini i, masasidama kita, pakayni i sasowalen, waywayan paihkal to maolahay kita to kahacecay a tamdaw i paro no lomaˈ ni Yihofa.​—1 Pitiro 3:8. w19.06 25 fiedac 18-​19 fatac

Cecay lalakaw no ˈayaway a Mikecolay, sanay ko sowal: “Ano matongal ko kafanaˈ no tamdaw to Kawas, ano misiˈayaw to sapalifet wa matongal ko pitadiˈec Cingranan.” Matatodongay koniya sowal! Ano tatahatolas ko pihadidi i sapalak, kalimlaan ko kaolah ita ci Yihofaan, mitadiˈec Cingranan. (Matay 22:36-​38; Yakop 5:⁠11) Romiˈamiˈad miˈosi to Fangcalay Cudad, o sapiingidaw ci Yihofaan ko patosokan a micekiw. (Yakop 4:8) Ano miˈosi kiso i, sinanoten ko capeling ni Yihofa, mikitira i sasowalen ato midemakan Ningra, mitinako to olah ato damsay Ningra. (Kasadakan 34:6) O roma tamdaw pasangaray pakasoˈlin to maolahay ko Kawas cangranan, samanen cowa ka tahatanam cangra to olah no tao. Ano iraay ko mahaenay a harateng iso i, to romiˈamiˈad tanamen mitilid to samanay ci Yihofa a siniˈada tisowanan, midipot tisowanan. (ˈOlic 78:38, 39; Loma 8:​32) Tikolen iso miharateng ko malifaay no niyah, midotim to Kimad no Kawas, wa madoloto maharateng ko adihayay nano demak ni Yihofa tisowanan. Ano miakoˈid kiso ci Yihofaan, wa matongal ko tanektek no kalawidang iso Cingranan.​—ˈOlic 116:​1, 2. w19.07 2-3 fiedac 4-5 fatac

Cowa pafeli ci Yihofa kitaanan to fadangalan a patado to tao a misaˈosi. O mikeriday a salikaka, ano patelas sa patireng to coko kalimlaan a sarikec i, cowa ko midipotay to salikaka a pakayraan kora, o miroeroay to pakasoˈlinay falocoˈ no salikaka a waywayan kora. Ci Satan cowa ka pisawad mipalak to madimadiay sikawdan ni Yihofa. (1 Pitiro 5:8; Paˈarawan 2:​10) Ci Satan ato mikotoday ciraan a tamdaw mihalakaay mikeceng kitaanan midoko ci Yihofaan. Soˈlin matalaw kita, aka misawad to pihakelongan! (Limoˈot 7:​21) Padadotocay ci Yihofa a mikapot kitaanan, soˈlin mikeceng ko mikowanay to demak ita, wa padadotoc Cingra a midama kitaanan. (2 Rayray 32:​7, 8) Itini i saka 1 hahekalan a Krisciyang sanay pasowal to mikowanay: ‘Midofdof tamowanan eca ka pidofdof to Kawas, o moecelay i pinengneng no Kawas hokira, o kamo ko mamisaˈosi. O manengnengay matengilay niyam a demak, cowa ka ngaˈay mihawad a pasowal.’ (Dmak 4:​19, 20) Nanay ira ko malecaday a saˈosi no falocoˈ ita! w19.07 12-13 fiedac 18-​20 fatac

Ano mitosil, o mamisaˈicel kita a cipinang to hano mahaen ko harateng no tao. Nengnengen ita ko taˈarawan ni Pawlo. O Yutaya tamdaw cingra, ano mitosil cingra to ˈalafang a tamdaw i, o mamisalof to pakayraan a somowal, samanen awaay ko kafanaˈan no ˈalafang tamdaw ci Yihofaan ato Fangacalay Cudad. Mihaenay i, ano saka cipinangaw to harateng no kilacay a tamdaw, kilimen ita ko kalimlaan lalakaw anca licayen ko iraay ko milifetan a salikaka. (1 Korinto 9:​20-​23) O patosokan ita mamikilim to citatodongay to ngaˈayay lihaf a tamdaw. (Matay 10:11) Mihaenay, papihadaken ita ko tao to samanay ko pinengneng nangra hanaca misongilaˈ a mitengil. Itini i Ikok, o cecay salikaka milicayay to mitosilan, samaan ngaˈ ira ko lipahakay a raramod, samaan pasifanaˈ to wawa anca samaan misiˈayaw to cowa ka sadafdaf a demak. Maherek misongilaˈ a mitengil cingra to caˈof no tao ngaˈ pacaˈofay, “Itini iraay ko ˈayaw no 2,000 miheca mitilidan a sowal, samanay ko harateng iso?” Cowa ka sowal ningra ko “Fangcalay Cudad”, tangsol hananay paˈaraw to sinael i soci. w19.07 21-​22 fiedac 7-8 fatac

Hahakowa ko tangongol no olah ita to Kawas hani? Pasowal sa ci Yis to Farisay a tamdaw: ‘Sarocoden ko falocoˈ iso, sarocoden ko harateng iso, sarocoden ko taneng iso a maolah ci Yihofaan Kawas iso.’ (Matay 22:36, 37) Mihaenay i, o olah ita to Kawas coko kalitosaen ko olah, ao matongal to romiˈamiˈad. Sapitongalaw kita to olah i Kawas, salakatho kita mafanaˈ to Kawas ngaˈ ngaˈay maolah Cingranan. Sowal no Fangcalay Cudad: ‘Awaay ko olah i, cowaho ka fanaˈ to Kawas, samanen o olah ko Kawas.’ (1 Yohani 4:8) Sanay ko sowal ni Pawlo, ano matatodong ko kafanaˈ ita to Kawas, misongilaˈ a cipinang to harateng Ningra, mihaen o mamatongal ko olah Cingranan. (Filipi 1:9) Satapang kita minanam to Fangcalay Cudad i, soˈlin, cowa ka adihay ko kafanaˈ to capeling no Kawas, kamayanho a maolah Cingranan. Ikor matongal ko kacipinang ita ci Yihofaan, matongalay ko kaolah ita Cingranan. Mihaenay i, micerid a micekiw to Fangcalay Cudad, pacalep a misimsim to lalakaw, tada o masakalimlaan!​—Filipi 2:​16. w19.08 9 fiedac 4-5 fatac

Tahira kita i faelohay katayalan, misaaliay to faelohay widang. Haratengen, sapisawidangaw to tao, isalakat kiso malo widang no tao ngaˈ ngaˈay. Ngaˈayay paladaˈen iso ko tao to nalifetan no niyah matayal saki Yihofaan, mahapinang no tao to lipahakay kiso. Ano pakayniay tatiih no tireng no ramod ko piliyas iso to katayalan no niyah, aka a miroroh to tihi. Ano o tireng no niyah ko tatiihay, aka a makesem, miharateng to patoleday ko niyah to ramod. Haratengen, o ‘cecayay ko tirengˈ namo, na miketonay to sowal i ˈaˈayaw ni Yihofa, ano samaanto ko pakayraan oha mamadadama. (Matay 19:​5, 6) Ano fahal sanay a mapoyapoy ko sapiliyas to katayalan, pasifanaˈen ko wawa, pakayni tamowanan, mikikakaay a kalimlaan cingra to katayalan namo. Ceriden pasowal ko wawa, o sapafeli no Kawas a ‘sapatelongˈ tamowanan cingra. (ˈOlic 127:​3-5) Paladaˈen cingra to kalimlaan a nalifetan namo matayal i salakat. O papakalalok konini cingranan minanam to taˈarawan namo, ngaˈay ko pisaka dademak to kaˈorip matayal saki Yihofaan. w19.08 22-23 fiedac 10-​11 fatac

Taˈangayay Papilon, o polong mararaway pihakelongan, pakidemay ko pipalak to ngangan no Kawas. Samanen pakayni i Kawas miolatay to tamdaw ko mararaway a pihakelongan, micapidayho to mikowanay, malecad o tasalamaan a fafahiyan. Miroeroay to mihakelongay tamdaw, milipalaw to payci, mipatayay to adihayay sikawdan no Kawas cikiyamay to ˈirang. (Paˈarawan 18:24; 19:2) Sakadademaken ni Yihofa ko “moetep ko pohong” no “kahngangay a ˈaˈadopen” a palaˈafo to “tasalamaan a fafahiyan.” “Kahngangay a ˈaˈadopen” mitaypiyaway to makomoday kitakit, “moetep ko pohong” mitaypiyaway to midamaay to makomoday kitakit a mikowanay. Malaod ko misaˈosian no Kawas a toki, oniya mikowanay mamiˈodis to “tasalamaan a fafahiyan”, ‘milonic cingranan, miwacay cingranan,’ wa miˈafas to hafay no mararaway pihakelongan ato mitihedak to malafoay a demak nangra. (Paˈarawan 17:​3, 16) Wa kaliki mifekad koniya laˈafo, malecad to “cecay a romiˈad,” tataˈangay ko kacekid no midamaay to mararaway pihakelongan a tamdaw, samanen malikoay ko “tasalamaan a fafahiyan” sanay: “Caay ko mamararom kako.”​—Paˈarawan 18:​7, 8. w19.09 10 fiedac 10-​11 fatac

Oniya tahidang pasayraay i polong a tamdaw a hadaken, o makalimay sapidokoaw to Kawas a tamdaw, cowa ko nanaˈayen ningra. (Yohani 6:​37, 38) Patorodan ni Yihofa ci Yis to cecay a tayal, polong a nisawawaan ni Yis iraay ko toki a mirienang. Wa ngaˈay pakasoˈlin kita, papadadotoc ci Yis kalacafay kitaanan, padama kitaanan milaheci toniya tayal. (Matay 28:​18-​20) Masolotay ni Yis ko misapoeneray ko falocoˈ a tamdaw. (Matay 19:13, 14; Luka 7:​37, 38) Misamaanay hani? Samanen taˈangayay ko kasasiroma ni Yis to Farisay a tamdaw. Cowa ka ngaˈay ngataen misatakaraway ko ˈaˈideman no pihakelongan, kawra damsayay a misapoener ci Yis. (Matay 12:​9-​14) Maˈanofay to fadangalan ko Farisay a tamdaw, samanen ˈakawangay ko saaroˈan hato misatakaraway. Palimoˈotay ci Yis, hamaan maˈanof, pasifanaˈ to nisawawaan misapoener a matayal i tamdaw. (Matay 23:​2, 6-​11) O Farisay tamdaw marariday a patalaw to tamdaw, mikowan to tao. (Yohani 9:​13, 22) Ci Yis sai tano sidaˈitay a waywayan ato sasowalen pasinoway to tamdaw. Itini i tireng ni Yis mananamay iso ko maanan hani? w19.09 20 fiedac 1 fatac; 21 fiedac 7-8 fatac; 23 fiedac 9 fatac

Micerid mirienang to saˈopo. Papadama ko saˈopo kitaanan matongal ko piingid ci Yihofaan. Misaˈicel kita mirienang to saˈopo anini, wa malaˈosi ko pisiˈayaw to sapalak noikor. (Hipray 10:24, 25) Misamaanay hani? Anini ano pakayniay i mimingay a demak, sawad sa kita mirienang to saˈopo, ano misiˈayaw to katalawan noikor wa malingadho kiso a masaˈopo han? Ano mararid kita mirienang to saˈopo anini, soˈlin tahalifa to pisafelit noikor, cowa ko mamisawad a mirienang to saˈopo. Mihaenay aniniho maolah a mirienang to saˈopo, mihaen ira ko misafelitay noikor, anca makeceng no mikowanay, wa padadotoc kita midofdof to Kawas eca ko tamdaw. (Dmak 5:​29) Misaˈicel minaˈeng i falocoˈ to kaolahan a sinael. (Matay 13:52) Cowa ka hakowa ko maharatengay iso a sinael alatek, kawra o fangcalay saocor ni Yihofa papadama tisowanan pakaharateng to adihayay sinael. (Yohani 14:26) Oniya sinael papadama tisowanan miingid ci Yihofaan, tahatolas a madimadi. w19.07 3 fiedac 5 fatac; 4 fiedac 8-9 fatac

Itiniay kiso i ikor no 1914 miheca hofocen han? Ano hatiraay itiniay kiso i ‘salikoray romiˈadˈ a maˈorip. O pairasolan ni Yis a demak mifekaday nohatini, tahatengilay kita to lalood, cangoˈotay ko kakaenen, ˈatoray, lifong, matongalay ko mariˈangay a demak, o finawlan ni Yihofa micadaay to sapalak. (Matay 24:​3, 7-9,12; Luka 21:10-​12) Maˈarawayho ita ko waywayan no tamdaw malecaday o pairasolan ni Pawlo. Pakasoˈlinay ko midokoay ci Yihofaan a tamdaw, o salikoray a ˈawaled noniya lekakawa nohatini. (Mika 4:1) 1914 miheca tahanini mataˈlifayto ko 100 miheca, tahiniayto kita i pahererekan no ‘salikoray romiˈad.’ Mansa, o cacipinang kita to caˈof no laenoay kalimlaan a salicay: O pahererekan no ‘salikoray romiˈadˈ wa mifekad ko maanan a demak hani? ˈAyaw nonini, mitokelay ci Yihofa kitaanan samaan ko hademak hani? w19.10 8 fiedac 1-2 fatac

Soˈlin caka falic ko pakayraan ita, ano mitadiˈec ci Yihofaan o ngangaˈay mitafo to mihadidiay. (Loma 12:12) Aniniay a sinael, mikiˈokay ci Yis ano o manan to ko masiˈayaway ita a sapalifet, padadotoc madimadi to Kawas ngaˈ malidong. Ano misiˈayaw kita to sapalifet mitafo to mihadidiay, wa matongal ko tanektek no pakasoˈlinay falocoˈ, maharek ko pisaday pakayni i taˈangayay padiing. O soˈlinay a timolo cowa ko ˈicel no mita, pakayniay pitadiˈec ci Yihofaan. Sasamaan kita ngaˈ matongal ko pitadiˈec ci Yihofaan hani? To romiˈamiˈad micekiw to Fangcalay Cudad, midotim to samanay ci Yihofa milidong to finawlan Ningra i saˈayaw. (ˈOlic 68:20; 2 Pitiro 2:9) Ano miˈodis ko kalo kitakit kitaanan i taˈangayay padiing i, misaaliay kita to timolo, wa mikikaka to salakatay ko pitadiˈec ci Yihofaan. (ˈOlic 112:​7, 8; Hipray 13:6) Ano aniniho kita a mitadiˈec ci Yihofaan, wa taˈangay ko timolo no ikor a misiˈayaw to saˈodis ni “Kok.” Pakasoˈlin kita, ira ko olah ato sadipot ni Yihofa, o rarihaday kita.​—1 Korinto 13:8. w19.10 18 fiedac 15-​16 fatac

Maˈimeray ni Satan ko polong no hekal, misaka dademakan ningra koniya lekakawa misalo anca pakidem ko pisaareteng to sakaˈorip. (Ifiso 2:​1-3) Misamacayay cingra mikalisanga kitaanan, ecato pisarocod a maolah ci Yihofaan. Malengo no tarokos ci Pitiro ko kahererekan no hekal ni Satan ato faelohay hekal i, sanay midotoc somowal: “Kaolahan ako a salikaka, ano halamhamay kamo a mitala tonini a demak. Orasaka, saˈicelen ko falocoˈ namo to sakakorac no falocoˈ namo, ta awaay ko tatoroˈen no Kawas a raraw namo ta mararihaday kamo.” (2 Pitiro 3:​14) Midoedo kita toniya limoˈot, misaˈicel mitoor to kahemekan ni Yihofa a pakayraan maˈorip ato midoko Cingranan, o paihkalay to misarocoday a maolah Cingranan. Ci Satan ato niya hekal sapifalicaw to misaaretengan ita i nokaˈorip. (Luka 4:​13) Kawra, cowa ko mamakahi kita to roma demak ato tamdaw mikotay to saˈaroan ni Yihofa i falocoˈ no mita. Misetek kita to falocoˈ misarocod a maolah ci Yihofaan, dengan Cingra ko citatodongay to hatiniay a olah ato pidoko! w19.10 27 fiedac 4 fatac; 31 fiedac 18-​19 fatac

Calemcem kita to kalo a demak cowa ko mararaway. Tinakoen, ciharatengay kita to kalalaˈed no niyah ci Yihofaan aci Yisan, makalim micada to pihayda Nangra. (1 Korinto 7:​32) Ano mararaw kita i, wa calemcem ko falocoˈ, makalim patikol ngaˈay ko kalalaˈed ci Yihofaan. Calemcemayho kita eca ka hemek ko ramod, ciharateng to paro no lomaˈ ato salikaka. (1 Korinto 7:​33; 2 Korinto 11:28) Nikawrira, pakidem ko cariraw ita, mararid a calemcem cangoˈot ko kakaenen ato rikoˈ, wa misamacayto ko harateng mietan to payci alatek. (Matay 6:​31, 32) Mihaenay, wa cangoˈot ko pakasoˈlin ita ci Yihofaan, palidlid sato miliyas Cingranan. (Marko 4:​19; 1 Timoti 6:​10) Roma i, pakidem ko calemcem to pinengneng no tao, wa mipalak to pakasoˈlinay falocoˈ no mita. Ano sapilifokaw kita to pihayda no hekal a tamdaw i, wa matalaw to salikaf ato sapalak nangra, telocto midemak to kapiliˈan ni Yihofa a demak. Mihaenay, o cacangacangen ita ci Yihofa pafeli kitaanan to pakasoˈlinay falocoˈ ato timolo a miremo to ciˈangiay.​—Taneng 29:25; Luka 17:5. w19.11 15 fiedac 6-7 fatac

O roma masaka limlaan a saˈosi, ano misaˈosianto i, cowa ko mamafalic, tinakoen, ano misaˈosi kita patafang to tireng a midoko to Kawas, wa madimadi Cingranan tahadaˈoc. Roma i, mamisaˈosi kita a mitoor to miketonan a sowal i raramod, wa madimadi to ramod. (Matay 16:24; 19:6) Kawra, ano mafalic ko pakayraan i, o misaˈosian ita a roma demak misaaliay to sasalofen alatek. Ano mahaenay i, o maanan a pakayraan ko papadama kitaanan citaneng ko misaˈosian hani? Mitolon micangacang to taneng. Itini roma a demak i, cangoˈotay ko taneng ita, mihaenay i, ˈayaw no misaˈosi anca mamifalic to isalakatay a saˈosi i, tatiˈeren ci Yihofa, wa padama Cingra kitaanan ira ko taneng a misaˈosi. Cangacangen ko citanengay a sakayat. Songilaˈen a miˈosi ko Fangcalay Cudad, micekiw to mitepangan a lalakaw no likakawa no Kawas, licayen ko pakasoˈlinan no miso a tamdaw. (Taneng 20:18) Ano mamifalic kiso to tayal anca malinah tayra i roma pala, hanaca misaharateratengay kiso to mamicada to ˈakawangay a picudadan, ngaˈ ira ko sakaˈorip iso padadotoc a midoko to Kawas, ano mahaen i, cangacangen ko citanengay a sakayat tada masaka limlaan. w19.11 27 fiedac 6-8 fatac

Tada mahemekay kita maharekayto ko Kawas midemak to sapilidong a limasmas, ho ngaˈay kita matedal i kala koli no raraw. Ano sapilifokaw kita to pasalat, ci Yis o masakalimlaan a tamdaw. Itini ˈayaw ni Yis to 8 hahekalan, paˈayaway ci Isaya to mamilifok kita to taˈangayay pasalat noikor, o hatiniay a pasalat mikikakaay ko kangaˈay to malifokay no Israil i Kalipahakan a Mihecaan. Sanay cingra: ‘O fangcalay saocor no Tatapangan ci Yihofa itiniay i tireng ako, samanen minilnilan ni Yihofa kako, papilasil to ngaˈayay lihaf i misapoeneray ko falocoˈ a tamdaw, miocor takowanan mitafo to dokaˈ no masomaday a tamdaw, milasil to mamatedal ko mapalitay a tamdaw.’ (Isaya 61:1) Wa samaan a malaˈosi koniya sinael hani? Mitosil ci Yis i, misatapangay a malaˈosi ko sapairasol ni Isaya. Itini i kasaˈopoan no Nacali ci Yis, pasayraay i Yutaya tamdaw miˈosi toniya sowal ni Isaya, halo pisaka dademak to matatodongay koniya sowal i tireng no niyah.​—Luka 4:​16-​19. w19.12 9-​10 fiedac 6-8 fatac

Misaaliay kiso to timolo ngaˈ ngaˈay misiˈayaw to sapalak. Ano cangoˈotay ko timolo no niyah ano sanay kiso, sasamaan ko hademak hani? Haratengen o soˈlinay a timolo, cowa pilingat to tatirengan, ˈicel ato inaneng. Ngaˈayay haratengen ita ko kaemangay a Tafiti, samanay milood to ˈakawangay tamdaw ci Koliyatan. Palalinien toniya ˈakawangay tamdaw, poeneray mangiliway ci Tafiti, awaay ko sapilood a lalosidan, ano fonosto, awaay. Kawra timoloay cingra talaˈayaw milood toniya misatakalaway ˈakawangay a tamdaw. Hano ira ko timolo ni Tafiti hani? Samanen pakasoˈlinay cingra to kalacafayay ci Yihofa cingranan. (1 Samuil 17:37, 45-​47) O misinanotan ni Tafiti, cowa ko hakowaay ko kaˈakawang ni Koliyat, ao ikakaay ko kataˈangay ni Yihofa ci Koliyatan. Mikitini o maanan ko mananamay ita hani? Ano pakasoˈlin kita kalacafayay ci Yihofa kitaanan, palinien ko misafelitay a tamdaw to Kawas o kaemingay cangra, mihaen wa taˈangayto ko timolo.​—2 Rayray 20:15; ˈOlic 16:8. w19.07 5 fiedac 11-​13 fatac

Ci Tikikus o madimadiay a cafay ni Pawlo, o ngaˈayay pakasoˈlinen a tamdaw. (Dmak 20:4) Maedeng saka 55 miheca i, sapadamaaw to Yutaya a Krisciyang, milimasmasay ci Pawlo to misopeday to kiyaho a demak, alatek miocoran ningra ci Tikikus milosimet toniya kalimlaan a demak. (2 Korinto 8:​18-​20) Ikorto, sakina cecay marofo ci Pawlo i Loma i, papipacafayan ningra ci Tikikus palakat to tikami, miˈorong to sapakalalok a sowal tayra i kasakopang no Aciya. (Kolosay 4:​7-9) Padadotocay o ngaˈayay pakasoˈlinen a widang ni Pawlo ci Tikikus. (Titus 3:​12) Itiya, cowa ka sahto saan ko Krisciyang mahecad ci Tikikusan a ngaˈay pakasoˈlinen. Maedeng saka 65 miheca, sakina tosa marofo ci Pawlo i Loma sanay ko tikami, ˈalomanay itiniay Aciya a salikaka cowa kakahi a micawmaˈ cingraanan. Matalaway cangra tahacada to sapalak alatek. (2 Timoti 1:​15) Kawra, ngaˈayay pakasoˈlinen ci Tikikus, mansa patoroden ni Pawlo cingra to roma a ˈinorong. (2 Timoti 4:​12) Ira ko mahaenay ci Tikikusan a ngaˈayay widang, maedeng mahinomay ci Pawlo. w20.01 10 fiedac 7-8 fatac

Miharateng ko roma tamdaw: “Manilnilay no fangcalay saocor ni Yihofa kako han?” Ano mahaenay ko harateng iso i, haratengen ko laenoay kalimlaan a salicay: Tada makalimay kiso sapidofdofaw to araaw ni Yihofa han? Mikiriwiˈay ko fanekfek no niyah i mitosilay a demak sanay kiso miharateng han? Misongilaˈay kiso a micekiw to Fangcalay Cudad, maolahay a minanam to ‘tangongolay a demak no Kawasˈ han? Palaˈosian ni Yihofa ko mitosilay a demak iso sanay kiso miharateng han? Padama to tao mafanaˈ ci Yihofaan o dademaken a ˈinorong sanay kiso miharateng han? Itini adihayay a pakayraan nokaˈorip mahapinangay iso ko sapadama ni Yihofa tisowanan han? Ano masaˈosiay ko caˈof iso i, mitaypiyaway to mipiliˈan no Kawas kiso tayra i kakarayan han? Cowa, samanen o polong a sikawdan no Kawas iraay ko hatiniay a harateng. Soˈlinay i, ano cowa ka songilaˈ ko kafanaˈ iso to manilnilay ko niyah, paihkalay konini to cowa ko tatayra kiso i kakarayan. Samanen iraay ko tokel tayra i kakarayan a tamdaw cowa ko cacisasa to hatokel no niyah. w20.01 23 fiedac 14 fatac