Saka 5 Folad

Wa ngaˈay ko wama wina midemak to maanan padama to wawa a maolah ci Yihofaan hani? Micangacang to sadama ni Yihofa. Mahecad ci Manowaan. Tano waywayan patireng to taˈarawan. Wama wina a tamdaw, o sasowalen namo taˈangayay ko pilingat to wawa, kawra o waywayan namo mikikakaay ko pilingat. Haratengen ci Yosif aci Mariya, patirengay cangra to ngaˈayay a taˈarawan ni Yis ato roma a wawa, adihayay ko mananamay ni Yis pakayni cangraanan. Ci Yosif malalokay a micokang sapaririˈaw to paro no lomaˈ, halo padama to paro no lomaˈ misaareteng to midokoay to Kawas a demak. (Limoˈot 4:​9,10) Ci Yosif ‘tomihecahecaanˈ miˈorongay to paro no lomaˈ tayra i Yirusalim misalisin to pitaˈelifan a lisin. (Luka 2:​41, 42) Itiya, o harateng no roma malo wamaay a tamdaw, mahadak ko polong no paro no lomaˈ o mipalakay to payci ato toki a demak sanay. Kawra maolahay ci Yosif mirienang to midokoay to Kawas a demak, pakalalokayho cingra to wawa tawlik a mirienang. Roma i, ci Mariya mananamay cingra to sinael no Fangcalay Cudad, o sasowalen ato waywayan ningra maedeng padamaay to wawa a maolah to kimad no Kawas. w19.12 24-​25 fiedac 9-​12 fatac

Mikitini i pisaysay ni Yihofa to pitowakang ni Atam a demak, mahapinangay ita tada maolahay Cingra kitaanan. Ikor no mitowakang ci Atam i, cowato ko paro no lomaˈ ni Yihofa cingra ato teloteloc ningra. (Loma 5:​12) Kawraan cowa ka falahen ni Yihofa kita. Ikor no misayfang ci Yihofa ci Ataman, cowa ka silikor sato to teloteloc ni Atam. Kalikiay Cingra mihadak to sakiˈok, ngaˈay ko midofdofay a tamdaw malo taˈangayay paro no lomaˈ Ningra. (Satapangan 3:​15; Loma 8:​20, 21) Pakayni i mihadakan ni Yis a sapatefoc, palaˈosian ni Yihofa koniya sakiˈok. Pakayni kitaanan a kinafalah to ˈorip no kanonoˈan a wawa, misawacayay konini to tangongolay ko olah Ningra kitaanan. (Yohani 3:​16) O sangaˈayay a Wama ci Yihofa, tangongolay ko olah Ningra kitaanan, ciharatengay kitaanan. Mitengilay to satolon ita, mirenec to sakaˈorip ita, padamaho kitaanan padotoc a madimdi. Pahatatanamay Cingra kitaanan, midipotay kitaanan, pafeli to makapahay hatokel. Mafanaˈ to ciharatengay ko kakarayan Wama kitaanan, tada dihkoay ko falocoˈ ita. w20.02 6 fiedac 16-​17 fatac; 7 fiedac 20 fatac

Na macariraway kiso to maanan a demakan han? O sowal anca o midemakan no tao na midokaˈay tisowanan alatek, pakasomaday tisowanan. Anca pakayni sowal ato demak no niyah macariraway kiso, alatek calemcemay kiso to cowa ko sasododen ni Yihofa kiso. Mangalefay i, mapaekel no cariraw ko niyah, samanen cangoˈotay ko pakasoˈlinay falocoˈ, tada o awaay ko kapo a Krisciyang saan kiso a miharateng. Nengnengen ita ko pina tinakoan i Fangcalay Cudad. Ci Hana o wina ni Samuil, tanektekay ko pakasoˈlinay falocoˈ ningra. Soˈlin mahaen, pakayni pisamsam no paro no lomaˈ na masomaday cingra. (1 Samuil 1:7) Pakasoˈlinay ko falocoˈ no tarokos ci Pawlo to Kawas, kawra na ‘pakayniay kacalemcem to kasakopang a carirawˈ cingra. (2 Korinto 11:28) Ci Tafiti iraay ko pakasoˈlinay falocoˈ, mansa mikiriwiˈ a maolah ci Yihofa cingraanan. (Dmak 13:22) Kawra, na mararaway ci Tafiti, micadaay to taˈangayay saroero. (ˈOlic 38:4) Mihinoman ni Yihofa koniya tatoloay madimadiay sikawdan, parihaday to falocoˈ nangra. w20.02 20 fiedac 1-2 fatac

Tatodong nonini mikifalocoˈ kiso a mitolon to Kawas, pasowal Cingraanan tatahadaˈoc kiso a midoko Cingraanan. Patafang kiso to tireng, ‘mihaiyay cowato kono niyah kiso.’ Itiya misatapang oni Yihofato kiso, tada kalikoan konini. (Loma 14:8) Patafang kiso to tireng malecaday mikiˈokay ci Yihofaan, wa misamacay kiso matayal saki Cingraanan, ecato pakahemek to niyah. O patafangay to tireng o kalimlaan a noka piketon, cowa ko papacieci ci Yihofa tisowanan mihaen ko demak. Kawra, ano maharek kiso miketon, misaaliay Cingra tisowanan midofdof to mikiˈokan. (ˈOlic 116:12, 14) Patafang to tireng ono tekedan a piketon, dengan kiso aci Yihofa ko mafanaˈay. Kawra o micadaay to paputisem o pakapapotalay, tocerid itiniay pitaykayan a misikay. Micada kiso to paputisem paihkalay i tamdaw, maharekayto kiso a patafang to tireng ci Yihofaan. Micada to paputisem mifanaˈay to tao, misarocod to falocoˈ, to harateng, to ˈicel, tano polong a ˈorip iso a maolah ci Yihofaan, misetek to falocoˈ tahadaˈoc midoko Cingraanan.​—Marko 12:30. w20.03 9 fiedac 4-5 fatac

Miapohan ni Satan ko tamdaw eca ka tatodong ko kafanaˈ ci Yihofaan. Ikor no mapatay ko tarokos ni Yis, o misafelitay to kimad a tamdaw patenakay to mararaway a kimad, ecato ka hapinang no tamdaw cima ko soˈlinay a Kawas. (Dmak 20:​29, 30) Tinakoen, itini Fangcalay Cudad nangra cowato pisaka dademak to ngangan no Kawas, tano “Tapang” a saaroˈan a pangangan to Kawas, mihaen ko demak nangra miapohay to tamdaw ecato pakahapinang ci Yihofaan ato “Tapang” i Fangcalay Cudad o maanan ko kasasiromaan. (1 Korinto 8:⁠5) Misaka dademakanho nangra ko “Tapang” a saaroˈan pangangan ci Yihofaan aci Yisan, cowato ka fanaˈ ko tamdaw to cowa ka hecad ci Yihofa ato wawa Ningra. (Yohani 17:⁠3) Mihaenay a masadak ko toloay cecayay ko tireng sanay a mararaway a kimad. Telocto, awaayto ko pakayraan no tamdaw a mafanaˈ to Kawas. Tada o taˈangayay a mangah konini!​—Dmak 17:⁠27. w19.06 5 fiedac 11 fatac

O roma pakayraan misongilaˈ milaheci to tatayalen i, pacakaten ko inaneng no niyah a mitosil. (Taneng 1:5; 1 Timoti 4:​13, 15) Malo “kapot” ni Yihofa kita a matayal, tada o kalikoan ita a demak konini! (1 Korinto 3:9) Ano ‘mahapinang o maanan ko kalimlaan a demakˈ ato misamacay a mitosil, mihaen ‘oha lalipahak a mihodop ci Yihofaan.’ (Filipi 1:​10; ˈOlic 100:2) Wa ngaˈay pakasoˈlin ko sikawdan no Kawas, ano samaanto ko pasangaray i kaˈayaw, papafelien no Kawas kita to ˈicel milaheci to tatayalen. (2 Korinto 4:​1, 7; 6:4) Cowa ka lecalecad ko pakayraan no tamdaw, o roma tamdaw ngaˈayay mararid a mitosil, o roma late:kay ngaˈ mitosilay, kawra ano misarocod to falocoˈ ato harateng kita a dademak, oha tataˈangay ko lipahak. (Kalatiya 6:4) Misongilaˈ milaheci kiso to tatayalen, o maolahay ci Yihofaan ato tao. O sowal no Fangcalay Cudad: ‘Mihaen ko demak iso, wa ngaˈay milidong to niyah, halo milidong to mitengilay tisowanan a tamdaw.’​—1 Timoti 4:​16. w19.04 6 fiedac 15 fatac; 7 fiedac 17 fatac

Sakakaay pakayraan ni Satan ato tatiihay coyoh milipalaw to tamdaw pakaynian i miangangay. Sowal no miangangay a tamdaw, mafanaˈay cangra to cowa ko kafanaˈan no tao a demak, ato mikayat to demak sanay. Tinakoen, sowal no roma tamdaw ngaˈay pakayni piˈedaw a mafanaˈ to noikoran a demak, ato masasowal to mapatayay anca misakawasay, mipaˈekak to tao. O pitiyawca itini katimol no Padaka a pala ato taliyok no Kalepi Riyar 18 kakitakitan, ano tatolo cecayay ko pakasoˈlinay to misakawasay, tatolo-cecayay ko pakasoˈlinay to, ngaˈayay ko tamdaw masasowal to mapatayay. Roma i, pitiyawca itini 18 Afrika kitakit, tatosa cecayay ko pakasoˈlinay to miangangay. Ano icowato kita, o mamisinanot to pifiyor no miangangay, samanen padotocay ci Satan miapoh to ‘polong a tamdaw.’ w19.04 20-21 fiedac 3-4 fatac

Tada ˈintehay ci Yihofa to kihcod tatiihay a demak. (ˈOlic 5:​4-6) O miˈodangay to kaemangay a waywayan, o kaˈintehan ni Yihofa, samanen o kaacekan a raraw konini. Kita o Misawacayay Tamdaw ni Yihofa, wa mitodong Cingranan a mikaˈinteh to hatiniay kaacekan a waywayan, cowa ko pakihateren ko hatiniay a raraw i kasakopang. (Loma 12:9) O pasemsemay to kaemangay a pakayraan i, o mitowakangay to Sarikec ni Kristo. (Kalatiya 6:2) Pakayniyan ni Yis i waywayan ato sasowalen a pasifanaˈ kitaanan, oniya rikec o olah ko taˈeneran o masadafdafay. Midofdofay ko Krisciyang to Rikec ni Kristo, ano micada to kaemangay i, paihkalay to kaciharateng ato olah cangranan. O miˈodangay to kaemangay a demak, o misatekeday a waywayan koni, o hatiniay a demak wa palahdaw to rihaday no kaemangay, hato awaay ko maolahay cangranan saan ko harateng. Ka adayayan i, o roma salikaka ita makariˈangay a madokaˈ. Misamaanay hani? O aniniay a hekal matomesay ko ‘mariˈangay a tamdaw ato misaˈfitay a tamdawˈ, mitakaway cangra a micomod i kasakopang. (2 Timoti 3:​13) Roma Krisciyang cowa pakaˈmet to mararaway a coos, midemakay to miˈodangay to kaemangay a raraw. w19.05 8 fiedac 1-3 fatac

O pakidemay ko kasomad a tamdaw pasangaray mitolon to Kawas, awaay ko tatodong ako miingid ci Yihofaan sanay. Sapihinomaw cangranan, ngaˈayay malacafay kita cangranan mitolon hanaca i satolon hadaken ko ngangan nangra. Ngaˈayho kita itini satolon somowal, tada misalimlaay kita cangranan, o kalimlaan a salikaka no kasakopang cangra. Ngaˈayay cangacangen ita ci Yihofa mihinom to kalimlaan a finawlan, parihaday to falocoˈ nangra. O mahaenay a satolon taˈangayay ko sahinom i tamdaw. ˈAyaw no somowal kita misaharateratengho, samanen o cowa ka simsimen a sowal midokaˈay to tao, kawra o sidaˈitay a sowal miadahay to falocoˈ no tao. (Taneng  12:18) Mihaenay, cacangacangen ita ko sadama ni Yihofa, ho ngaˈay kita tano sidaˈitay damsayay a sowal mihinom to tao. Hamaan mapawan, tada ciˈicelay ko kimad ni Yihofa. (Hipray 4:​12) Ano hinomen ita ko tao o mamaharateng nangra to maolahay ci Yihofa cangranan. Hamaan mapawan kita, o masadafdafay a Kawas ci Yihofa, cowa ko tatalimaanen Ningra ko miˈodangay to tao a raraw, oha sasayfangen Ningra ko cowa pasasiyor a tamdaw. ​—Saˈosi 14:18. w19.05 18 fiedac 18 fatac; 19 fiedac 19, 21 fatac

Sapilipalawaw ci Satan kitaanan mitowakang to Kawas. Mansa mifiyoray cingra a mionting to harateng no mita. Saka dademakan ningra ko nai falocoˈay a kalim ita, milipalaw kitanan mitoor cingranan.（Kolosay 2:​4）Wa soˈlin a malipalaw ni Satan kita han? Hay! Haratengen ko sarikec ni Pawlo i Kolosay 2:8, cowa ko ˈalafang a tamdaw ko patikamian ni Pawlo, o mapasimalay Krisciyang ko patikamian ningra. (Kolosay 1:​2, 5) Itiyaay a Krisciyang malipalawayho, o kitaho coko mikikakaay ko saali to sapisinanotaw hokira. (1 Korinto 10:12) Nohatini itiniay i ngata no cikiw ci Satan, misaˈicelay cingra milipalaw to madimadiay midoko to Kawas a tamdaw. (Paˈarawan 12:​9, 12, 17) O roma i, o lintad ita nohatini mariˈangay a tamdaw ato makaniway ‘matongalay ko tatiih.’​—2 Timoti 3:​1,13. w19.06 2 fiedac 1-2 fatac

Tiya sapipatayaw ci Yicipil ci Iliyaan i, matalaway ci Iliya milaliway tayra i Pirsipa. Tada matoleday cingra, sakapatayaw sanay. Hano ira ko mahaenay harateng ningra hani? Samanen cowa ko malefotay a tamdaw cingra, “malecaday titaanan cingra ao tamdaw.” (Yakop 5:​17) Tahacada cingra to taˈangayay saroero malotayay ko tireng. Na pakalalokay cingra to tao midoko to Kawas, nohatini sato awaay ko epoc no demak sanay cingra miharateng, samanen edengan cingra ko midokoay ci Yihofaan, polong no Israil awaay ko masalofay sanay miharateng. (1 Hongti 18:​3, 4, 13; 19:10, 14) Ihkalay ko kafanaˈ ni Yihofa to harateng ato nafalocoˈan ni Iliya. Cowa ka rikecen ni Yihofa ci Iliya, hano ira ko mahaenay a harateng, padamaay cingranan patatikol ko ˈicel. (1 Hongti 19:​5-7) Ikor, pakayni i sapadamaaw ci Iliyaan tawlik ko harateng, itiniay i ˈaˈayaw ningra paihkal to kafahkaˈan a ˈicel, halo pasowal cingranan itini i Israil iraay ko 7 patek a tamdaw cowa pidoko ci Paalan. (1 Hongti 19:11-​18) Mihaen ko sapadama, pasifanaˈan ni Yihofa ci Iliya tada maolahay Cingra cinganan. w19.06 15-16 fiedac 5-6 fatac

Aka maliyang to sakayat. Ano pakasoˈlin kita to sakayat no mikeriday a salikaka, wa maliyas ko pifekad no pasangaray. Tinakoen, itini i makecengay a kilac, pasowalay ko mikeriday salikaka ano mitosil, hamaan palilam to cudad. O cecay misakafahay salikaka cowa ka pidofdof, samanayto ko teloc? Oniya salikaka ato roma mitosilay maharek to cowa ka hapinang a pakayraan a mitosil i, iraayto ko dimeng a milicay cangranan. ˈArawhan i mihokhokay a mitoor ko dimeng cangranan, miˈafasan ko mapalilamay nangra a cudad. O maanan ko mananamay ita hani? Soˈlin ano cowa ka olah kita to pina sakayat, kamayan o dadofdofen. Ano malacecay kita to minilnilan ni Yihofa a salikaka, wa mahemek ci Yihofa.​—Hipray 13:​7, 17. w19.07 12 fiedac 17 fatac

Na somowalay ci Yis i ˈAyaw no mapatay a dadaya, polong mikotoday cingranan a tamdaw o kakaˈintehen no tamdaw. (Yohani 17:14) Mikitiya misatapang, padadotocay kariˈangen no misafelitay to kimad a tamdaw ko madimadiay a Krisciyang. Mangata mangataay ko hererekan noniya lekakawa, wa matongal ko macadaay ita a sapalak. (Matay 24:9) Sasamaan kita aniniho misaday misiˈayaw to sapalak hani? Hamaan haratengen ita o maanan a demak ko mamalifa ita noikor, ano mihaen o mamalowid no ˈangi ato cariraw kita, telocto soˈlin ira ko sapalifet i, wa pakayni katalaw ecato pidoko kita ci Yihofaan. (Taneng 12:25; 17:22) “ˈAda ci Akoma” marariday misaka dademak to ciˈangiay a falocoˈ a miˈodis kitaanan. (1 Pitiro 5:​8, 9) Mihaenay, aniniho kita patanektek to pakasoˈlinay falocoˈ no niyah. w19.07 2 fiedac 1-3 fatac

Patikol a maˈorip ci Yis i, palimoˈotay cingra to tarokos tayra i lotok a masasoˈaraw cingranan, hinatalaay ko tarokos mamifekad ko maanan a demak. (Matay 28:16) Itiya iraay ko “lima a soˈot” a salikaka itira alatek. (1 Korinto 15:6) Hano palisopsopen ni Yis ko nisawawaan hani? Samanen papafelien ni Yis cangra to kalimlaan a ˈinorong, sowal sa cingra: ‘Kalingad kamo, palanisawawaan no mako ko polong no kasafinawlan.’ (Matay 28:18-​20) Ikor oniya nisawawaan masalalomaˈay no saka 1 hahekalan a kasakopang no Krisciyang, o sakakaay a tayal nangra papalanisawawaan ni Kristo to ˈalomanay tamdaw. Anini i polong no hekal iraay ko 11 efan a kasakopang, mahecaday o saka 1 hahekalan a kasakopang ko ˈinorong, o kalimlaan a tayal ita i, o papadama to tamdaw malo Krisciyang. w19.07 14 fiedac 1-2 fatac

Sanay ko sowal no cecay i Nowiay a kasakilac kantok, itiraay tamdaw cowa ka sapilengoaw to milingatay to Kawas a lalangian, kawra makahiay milengo to pakayraan no hekal. Ano mitosil i salakatenho mihayda ko tao, dotoc sowalen: “Harateng iso wa malingad a makapah koniya hekal han? O cima ko papafeli to tamdaw to ˈodingaray a hatokel? O sifo, kakakosiya, anca o roma tamdaw hokira?” Songilaˈen a mitengil ko caˈof no tao, ikor saka dademaken ko cecay sinael, mitadtad to iraay ko makapahay hano ikor no tamdaw. Matengil no roma tamdaw cowa ko mamalaˈafo ko cikiw, wa tahadaˈoc a maˈorip ko ngaˈayay tamdaw i sera, satapangayto a maolah to Fangcalay Cudad. (ˈOlic 37:29) Tatanamen ita ko masasiromaay a lalangian masasowal to tamdaw. Misamanay hani? Samanen o harateng no tamdaw cowa ka lecad. O roma lalangian misolotay to tamdaw, kawra o roma tamdaw mapiliˈay. Tinakoen makahiay ko roma tamdaw milengo to Kawas anca Fangcalay Cudad, o roma tamdaw maolahay i salakat a miholol to roma demak. Ano samaanto, mameten ita ko toki a mitosil to masakenakenaay a tamdaw. (Loma 1:​14-​16) Haratengen ita, edengan ci Yihofa ko papalengaw to sapaloma no soˈlinay kimad i falocoˈ no moecelay a tamdaw.​—1 Korinto 3:​6, 7. w19.07 22-23 fiedac 10-11 fatac

O olah no Kawas miocoray kitaanan a maolah to salikaka. (1 Yohani 4:​20, 21) Maolah to salikaka cowa ko pasangaray a demak sanay ko harateng no mita alatek, samaanen kita i, sahto o midokoay ci Yihofaan ato minanamay to fangcalay capeling Ningra. Hanaca, minanamayho kita ci Yisan, tada maolahay cingra kitaanan, pakayni kitaanan kinafalah to niyah. Latekay pasangaray kita midofdof to masasiolahay a limoˈot no Kawas. Ci Iutia aci Sintiki o fanekfekay a fafahiyan salikaka, O ‘malacafayay matayalˈ to tarokos ci Pawloan. Ikorto, cowa ka lecad ko harateng nangra, cowato ko ngaˈayay widang. Itini tikami ni Pawlo to kasakopang no Filipi masowalay ci Iuotia aci Sintiki, palimoˈot cangranan ‘mahecad ko falocoˈ ato harateng.’ (Filipi 4:​2, 3) Pasowalay ci Pawlo to polong a tamdaw i kasakopang: ‘Ano mananto ko demak namo, hamaan ngaliwngiw, malacongis.’​—Filipi 2:14. w19.08 9 fiedac 6-7 fatac

ˈAlomanay salikaka misaˈicelay padama to misakafahay materek i katayalan, tada kahemekanto konini. Somowalay cangra to sapakalalok a sowal, padama to sakaˈorip a payci, anca pacafay midimokos to paro no lomaˈ no salikaka. Ano manilnilay ko misakafahay tayni i kasakopang namo i, cowa ka ngaˈay ko demak nangra mansa mafalic ko katayalan, anca mararaway, hamaan haenen ko harateng. Padamaen cangra kaliki a mananam to faelohay kitiraan. Soˈlin caka ngaˈay ko tireng nangra, cowa ka hakowa ko mademakay, hemeken a mihamham cangra, pakahemek to nano tayal nangra i salakat. Tongalen ko kafanaˈ cangranan, minanam cangranan, samanen kadofahay ko sifanaˈ ato nalifetan nangra, micadaayho to sapahatatanam. Malinah i faelohay pala koniya salikaka i, misaaliay to sadama iso ngaˈ makilim ko matatodongay a pikilomaˈan, kamawmahan, kakalicen, ato sakaˈorip a dafong. w19.08 23-24 fiedac 12-13 fatac

O mitadiˈecan ni Kok, o ‘ˈicel no tamdaw,’ o ˈicel no sofitay, kawra ci Yihofa ko mitadiˈecan no mita. (2 Rayray 32:8) Pinengneng no kalo kitakit, mafolaay ko harateng ita, samanen taˈangayay ko ˈicel no Taˈangayay Papilon, kawra o kawakawas nira cowa pakaconged to saˈodis no “ˈaˈadopen” ato “moetep ko pohong!” (Paˈarawan 17:16) Harateng no Kok wa madolo a palaˈafo to finawlan ni Yihofa sanay, hato mifekaday to saˈodis, malecad o “toˈem mitahpo to sera.” Kawra malecad o malifetay ni Falaw i hangangay riyar, miˈodis ci Kok to finawlan no Kawas cowa ko sakangaˈay nira, hanaca salikor cacipinang cira to ci Yihofa ko misiˈayawan noniyah. (Kasadakan 14:​1-4; Icikil 38:​3, 4, 18, 21-​23) Ci Yis ato kakarayan a sofitay, wa midipot to finawlan no Kawas, palaˈafo to kalo a kitakit. (Paˈarawan 19:11, 14, 15) Miowingay ci Satan to kalo kitakit a miˈodis to finawlan no Kawas, mikidatay to Armakiton, wa samaan ko teloc nira hani? Wa fahekolen ni Yis ci Satan ato tatiihay coyoh i awaay ko tolas a ofang, mipalit cangranan to 1,000 miheca.​—Paˈarawan 20:​1-3. w19.09 11-12 fiedac 14-15 fatac

Ciharatengay kita sapakaˈarawaw to kalaˈosi no mikiˈokan ni Yihofa a makapahay tokel. Kawra, ano caho ka laˈosi ko mitalaan a demak, wa matoled ko falocoˈ ita alatek. (Taneng 13:12) Itini satapangan no 20 hahekalan, harateng no ˈalomanay manilnilay no fangcalay saocor a Krisciyang, wa itini 1914 miheca milifok to saki kakarayan a lifon sanay, ˈarawhan cowa pifekad koniya demak itiya. Oya madimadiay a Krisciyang samanay cangra miremo toniya pasangaray demak hani? Cowa pisawad cangra to saka tahadaˈoc noˈorip a dadefolen, o misaaretengan nangra o madimadi midofdof to araaw no Kawas, cowa ko sapilifokaw to sapalifon, hato misetekay to falocoˈ cangra miemem tahatolas, milaheci to cacikayen. Makalimay kiso pakaˈaraw to pikorac ni Yihofa to ngangan no Niyah, misawacay to matatodongay ko sapikowan a fadangalan no Niyah, halo palaˈosi to kihcod a mikiˈokan. Oniya demak wa itini misaˈosian ni Yihofa a toki mifekad, ˈayaw no kairaan noniya romiˈad, wa padadotoc kita a fanekfek ko falocoˈ mihodop to Kawas, hamaan pakayni ka ecaho ka laˈosi no mitalaan a demak minaˈon to hawang.w19.08 4-5 fiedac 9-10 fatac

Ngaˈayay licayen ko niyah: “Minengneng ko tao takowanan, o damsayay misapoeneray han? Maolahay kako midemak to sasafa:ay a demak han, matayal saki tao han? O waywayan ako to tao sidaˈitay han?” Malacafay ci Yis ato nisawawaan matayal i, iraay ko rihadayay a macacawmaˈ, sinowayay ko falocoˈ no nisawawaan, ci Yis i, maolahay pahatatanam cangranan. (Luka 10:​1, 19-​21) Pakalalokan ni Yis ko nisawawaan a mihadak to salicay, makalimay cingra mitengil to harateng nangra. (Matay 16:13-​16) O nisawawaan malecaday to micadaay to masongilaˈay a midimokos a pinaloma, padotoc a romahad, kadofahay ko minaroˈan nangra. Mananamay nangra ko pasifanaˈan ni Yis a kimad, midemak to ciepocay a demak. Iraay ko fadangalan iso han? Ano iraay i, ngaˈay licayen ko niyah: “Itini i lomaˈ anca i katayalan, samaanay kako micada to tao hani? O micowatay to rihaday a tamdaw kako han? Pakalalokay kako to tao mihadak to salicay han? Makahiay kako mitengil to harateng no tao han?” O Farisay a tamdaw mapiliˈay milicay ko tao cangranan, miroeroayho toya cowa kahecad ko harateng cangranan a tamdaw, aka a mahecad cangranan!​—Marko 3:1-6; Yohani 9:29-34. w19.09 20 fiedac 1 fatac; 23 fiedac 9-11 fatac

Ano malalengo ko mikowanay no hekal to sasamaan misalof to kalalaˈed no kitakit i, misaka dademakay to malecaday a sowal. Kawra o misowalan no Fangcalay Cudad a salasil cowa ka hatira. Itiya wa pakasoˈlin ko tamdaw to, sasoˈlin padipayalen no mikowanay koniya hekal, o rarihaday ko tamdamdaw sanay. Kawraan, o tatangsol a misatapang ko ‘taˈangayay padiing,’ ‘fahal sanay a laˈafoˈ wa tangsol sa ira. (Matay 24:21) Cowa ka fanaˈ kita to, o maanan a demakan ko miocoray to kalo kitakit a milasil toniya lihaf, cowa ka fanaˈ to tano maanan a pakayraan a milasil. Tano madadoedoay a salasil, anca kina cecay a salasil hokira? Cowa kafanaˈ kita. Kawra mafanaˈay kita, ano samaanto, aka a pakasoˈlin miharateng to, papadipayalen no ˈaˈideman no kitakit koniya hekal. Haratengen ita, o tahapinangan konini to mamisatapangto ko ‘romiˈad ni Yihofa!’​—1 Tisalonika 5:2. w19.10 8-9 fiedac 3-4 fatac

O papalaˈafo to lekakawa ni Satan ko Armakiton a lalood. Kawra cowa ko mamatalaw kita, samanen ono Kawas a lalood konini. (Taneng 1:​33; Icikil 38:18-​20; Cikariya 14:3) Matengil ko limoˈot ni Yihofa, mikeridto ci Yis Kristo to salikaka ningra ato masacaˈolay efan a coyoh milood, miˈodis ci Satanan ato tatiihay coyoh, ato kalo kitakit. (Paˈarawan 6:2; 17:14) Mikiˈokay ci Yihofa pasowal: ‘O sapiˈodis tisowanan a lalosidan, wa awa ko kapo.’ (Isaya 54:17) Wa ‘masadak i taˈangayay padiingˈ ko ‘taˈangayay ˈopo a tamdaw,’ ikor aitini faelohay hekal padadotoc a midoko ci Yihofaan. (Paˈarawan 7:​9, 13-​17) Padamaay ko Fangcalay Cudad kitaanan pakasoˈlin, oha mamalidong kita! Mafanaˈay kita ‘dadipoten ni Yihofa ko madimadiay a tamdaw.’ (ˈOlic 31:23) Itiya, o mamikangodo ko tamdamdaw to fangcalay ngangan ni Yihofa, polong maolahay ato pakahemekay ci Yihofaan a tamdaw o tataˈangay ko lipahak.​—Icikil 38:23. w19.10 18-19 fiedac 17-18 fatac

Tahiniayto kita i kahererekan no ‘salikoray romiˈad,’ mihaenay o tatahalifa to masakenaay a pasangaray alatek. (2 Timoti 3:1) Tinakoen i kakaetipan a Afrika, maharek ko pisingkiw sasifod sanay ko pakayraan, adihayay pala mifekaday ko mariˈangay a demak. O kitiraan no roma salikaka pakidemay ko sasifod, enemay folad caka ngaˈay a masadak. Samanay cangra milakowit to pasangaray hani? Milaliway ko roma tamdaw tayra i rihadayay a kilac, itiniay i lomaˈ no salikaka miliyas to pades. Cecay salikaka sanay: “Malifa ko hatiniay katalawan a pakayraan, kao ngaˈayay iraay ko salikaka masasipakalalok.” Ano mifekad ko ‘taˈangayay padiingˈ i, ira i tatihi ko maolahay a widang kitaanan, oha rarihaday ko falocoˈ ita. (Paˈarawan 7:​14) Mihaenay i, nohatiniho kita palahad to tangongolay kalawidang to salikaka. (1 Pitiro 4:​7, 8) Misamanay? Samanen noikor, wa miyakayak ko ˈada ita to mangah, mipalak to kakelec ita. Kawra cowa ko mamalaˈosi cangra, samanen awaay ko pakayraan nangra miconged to olah ita to salikaka. w19.11 2 fiedac 1-2 fatac; 7 fiedac 19 fatac

Ci Satan o ‘wama no misamangahay tamdaw,’ misaka dademakan ningra ko maontingay ningra a tamdaw miyakayak to pakayniay ci Yihofaan ato salikaka a mangah. (Yohani 8:​44) Tinakoen, itini wangcan, tilifi ato sinpon milasilay ko misafelitay to kimad a tamdaw to cowa ko soˈlinay a safanaˈ pakayni i Misawacayay Tamdaw ni Yihofa, o hatiniay a lihaf sahtoay mikitiniay ci Satanan a ‘cinamalay a panaˈ.’ Ano pasowal ko tamdaw kitaanan to mahaenay a mangah, o sasamaan hani? Cowa ko tatengilen ita! Pakasoˈlinay kita to Kawas ci Yihofaan ato salikaka, mihaenay cowa ko mamiingid to misafelitay to kimad a tamdaw. Ano o maanto a demakan, maanan a lalangian, cowa ko mamacacoli kita cangraanan, cowa ko fafaheka a masasowal cangraanan, ano miyakayak ko misafelitay to kimad a tamdaw to mangah i, manaˈayay kiso mitengeil ato macacoli han? Ano mahaenay i, ngaˈayay ko demak iso. Kawra, o papadotoc kita talipaˈalal, samanen iraayho ko roma sapilood a lalosidan ni Satan. w19.11 15 fiedac 8 fatac; 16 fiedac 11 fatac

Ano mamisaˈosi i, hapinangen ko araaw no nafalocoˈan no niyah. Mitokelay ci Yihofa kitaanan itini i kihecod a demak awaay ko misakaniway, mansa ano misaˈosi kita to demak i, hapinangen ko araaw no nafalocoˈan no niyah, hamaan milipalaw to niyah ato tao. Ano cowa ka soˈlin a mahapinang ko niyah i, wa pasangar a milaheci to misaˈosian a demak. Tinakoen, o cecay salikaka misaˈosiay cingra malo misakafahay, kawra cowa pakatoor toya toki, ikor awaay ko hemek ningra i pitosilan. Alatek sapakahemekaw cingra ci Yihofaan itini i misakafahay a tayal, kawra, o soˈlinay a harateng ningra o sapakahemekaw cingra to wama wina anca roma tamdaw hokira? Haratengen ko roma tinakoen. O cecay pacekiwan misaˈosiay cingra misawad to tamako, isatapang tada pasangaray a misawad, ikor cowa to pitamako cingra to tosa a lipay, ˈarawhan miliyaway cingra a mitamako. Salikor i, malaˈosiayto cingra misawad mitamako. Samanen oniya pacekiwan tangongolay ko olah ci Yihofaan, makalimay pakahemek ci Yihofaan, mansa maremoayto ningra koniya tatiihay a nanaman.​—Kolosay 1:​10; 3:​23. w19.11 27 fiedac 9 fatac; 29 fiedac 10 fatac

Pakasoˈlinay ci Pawlo to mamalaˈosi ko patosokan no niyah, milahci to saka tahadaˈoc no ˈorip a cacikayen. Malo manilnilay no fangcalay saocor a Krisciyang, mitalaay ci Pawlo milifok to saki kakarayan a ˈorip. Mafanaˈay cingra wa pasayra i patosokan a comikay ko niyah, ngaˈ malifok koniya sapalifon. (Filipi 3:​14) Pakayni sapakalalokaw to Filipiay Krisciyang misamacay to patosokan, misaka dademakan ni Pawlo ko matatodongay a sapatinako. Patalipaˈelalan ni Pawlo ko Filipiay a Krisciyang, ono kakarayan a finawlan cangra. (Filipi 3:​20) Hano kalimlaan konini hani? Itiya, adihayay ko fadangalan no Loma a finawlan. Kawra malo finawlan no kakarayan a kitakit ko manilnilay no fangcalay saocor a Krisciyang, ikakaay ko macadaay a epoc, palalinien, cowa ka samaan ko finawlan no Loma kitakit. O aniniay a manilnilay no fangcalay saocor a Krisciyang, wa pasayra i patosokan a comikay, o ngaˈayay a taˈarawan no mita. w19.08 6 fiedac 14-15 fatac

O hatiniay a pasalat mikikakaay ko kangaˈay to malifokay no Israil i Kalipahakan a Mihecaan! (Lifi 25:​8-​12) Samanen soˈlin milifok ko tamdaw to pasalat i Kalipahakan a Mihecaan, wa miliyawho a mala koli alatek, hanaca salikor o mamapatay. Itini saka 33 miheca Kocinsic, tano fangcalay saocor ci Yihofa a minilnil to tarokos ato roma madimadiay faˈinayan fafahiyan, micada cangranan malo wawa, padama cangranan ira ko tokel patikol maˈorip tayra kakarayan malacafay ci Yisan a mikowan. (Loma 8:​2, 15-​17) Orato, oniya Krisciyang malo isalakatay milifok to milasilan ni Yis i kasaˈopoan no Nacali a pasalat. Matedalay cangra nai mararaway kimad ato nanaman no litengan, matedalay i raraw ato patay sanay ko pinengneng no Kawas. Mihaenay i, iraay ko malecaday o kalipahakan miheca a tatokian mikitini i saka 33 mihecaan Kocinsic misatapang, tahira kahererekan no Pikowan ni Kristo to Comaˈol Miheca ko tolas. w19.12 11 fiedac 11-12 fatac

O wama wina Padamaen ko wawa mipiliˈ to ciepocay a widang. O waywayan no widang taˈangayay ko pilingat to wawa, o mamafanaˈ ko wama wina to masamaanay a tamdaw ko widang no wawa ato mimaanay cangra, o masaka limlaan a demak koni. Mahawpay ko o cima ko micawmaˈan no wawa tano soci, ato milinakay cingra to cimaanan i wangcan. Adihayay wama wina milimasmasay to toki, pacacawmaˈ to wawa to fanekfekay misakafahay a salikaka. Ci Enteni aci Poming itiniay i Ketetiwa a mararamoday, marariday cangra micada to kasakilac kantok. Sanay ko sowal ni Enteni: “Taˈangayay ko sadama nonini to wawa niyam, ikor misatapangay cingra misakafah, nohatini o mikotayay a kasakilac kantok cingra.” Ano kahenay misatapang pasifanaˈ to wawa maolah ci Yihofaan, wa taˈangay ko haepoc. (Taneng 22:6) Ci Timoti o ngaˈayay a tinakoan, o wina ningra ci Iunici ato fofo ningra ci Lois, “nano kaemanganho” pasifanaˈay to cingranan mihatatanam to Fangcalay Cudad.​—2 Timoti 1:5; 3:​15. w19.12 25 fiedac 14 fatac; 26 fiedac 16-17 fatac

Malo ngaˈayay pakasoˈlinen a widang. Ano mihaiay kita padama to salikaka, tooren a mihaen ko demak. (Matay 5:37; Luka 16:10) Milaheci kita to mikiˈokan a demak i, wa marihaday ko falocoˈ no misaaliay to sadama a tamdaw, o cecay fafahiyan salikaka sanay: “Cowa ko cacalemcem kiso, samanen o mihaiay padama a tamdaw oha mamitoor to sowal a midemak.” O tahalifaay to pasangaray ato matoleday ko falocoˈ a tamdaw, ano mahela ko ngaˈayay pakasoˈlinen a widang, mihadak to nafalocoˈan i, wa milifok to sahinom. Mamalo ngaˈayay pakasoˈlinen a widang no tao i, misaaliay palahad to mihadidiay a falocoˈ. Mafalahay no faˈinay ci Cana, kawra masasowal to ngaˈayay widang tada taˈangayay ko sapadama cingraanan, sanay: “Mahecaday a sowal misaliyaliyawan ako alatek, kawra mihadidiay cangra mitengil to roray no falocoˈ ako.” Ano misamacay a mitengil kita, wa ngaˈayto malo soˈlinay a widang no tao. w20.01 10-11 fiedac 9-11 fatac

Nolitengan ˈalomanay madimadiay a sikawdan na milifokay to fangcalay saocor no Kawas, kawra cowa ka piliˈen no Kawas cangra tayra i kakarayan. Tinakoen ci Tafiti, o makayatay no fangcalay saocor a tamdaw cingra. (1 Samuil 16:13) Itini sapadama no fangcalay saocor, cipinangay ci Tafiti to tangongolay a demak ni Yihofa, mitilidayho to lalakaw no Fangcalay Cudad. (Marko 12:36) Soˈlin mahaen, sowal no tarokos ci Pitiro ‘cowa ka tayra i kakarayanˈ ci Tafiti sanay. (Dmak 2:​34) Roma i, o paputisemay a Yohani o ‘matomesay no fangcalay saocorˈ a tamdaw. (Luka 1:​13-​16) Sowal ni Yis ilalomaˈ no hekal a tamdaw, awaay ko mikikakaay ko taˈangay to paputisemay a Yohanian, kawra cowa ko tatayra ci Yohani i kakarayan a Hongti Kitakit. (Matay 11:10, 11) Pakaynian ni Yihofa i fangcalay saocor a padama ko nolitengan madimadiay sikawdan palaˈosi to adihayay taˈangayay demak, kawra cowa ka tano fangcalay saocor a minilnil cangraanan. Samanen cowa ka lecad cangra to manilnilay a tamdaw a madimadi han? Cowa ka hatira. Soˈlin cowa ka piliˈen ni Yihofa cangra tayra i kakarayan, kawra wa patikolen cangra a paˈorip i fafekang no sera a Lakoing.​—Yohani 5:​28, 29; Dmak 24:15. w20.01 23-25 fiedac 15 fatac

Mitahidangay ci Yihofa kitaanan, micomod i paro no lomaˈ Ningra a midoko Cingraanan, oniya paro no lomaˈ a tamdaw sahto mipatafangayto ko tireng to Kawas, pakasoˈlinay to sapatefoc ni Yis. Masalalomaˈ noniya lipahakay a paro no lomaˈ tada o kalikoanto no mita! Cowa ko ka ciepoc aca ko nokaˈorip ita anini, noikor wa itini i Lakoing anca tayra i kakarayan milifok to tahadaˈocay a ˈorip. Tangongolay ko olah ni Yihofa kitaanan, mansa makahi mihadak to taˈangayay a kinafalah, hato iraay ko toki ita micomod i taˈangayay paro no lomaˈ Ningra. (Yohani 3:​16) Sanay ko Fangcalay Cudad, ‘ˈatekakay ko sapicakay’ kitaanan. (1 Korinto 6:​20) Pakayni i sapatefoc, padamaay ci Yihofa kitaanan ira ko ngaˈayay kalalaˈed Cingraanan. Ngaˈay palo ‘Wamaˈ to saˈakawangay a Tatapangan tada o kalikoan a demak, hanaca mafanaˈay kita, o sangaˈayay a Wama ci Yihofa. Alatek malecad kita to mitiliday to ˈOlic a tamdaw, mahaen ko harateng: ‘Pafeliay ci Yihofa to kihcod a sidaˈit, o maanan ko sapacoˈay ako Cingraanan hani?’ (ˈOlic 116:12) Soˈlinayto, tahadaˈocto cowa ko mamaemin ita a pacoˈay ko kakarayan Wama, kawra kamayan makalim kita mihaen to demak. w20.02 8 fiedac 1-3 fatac