Saka 7 Folad

Ano milokes anca misamsam ko tao kitaanan, wa cariraw a masomad kita alatek. O mihaenay to demak a tamdaw ano o salawina anca ngaˈayay a widang, wa mangalef ko kasomad. Mahaenay ko pakayraan ni Hana, roma fafahi no faˈinay, lalikaf sanay cingranan. Mikitini ci Hanaan wa adihay ko mananamay ita. (1 Samuil 1:​12) Wa ngaˈay adihayen ita ko toki, misongilaˈ pasowal ci Yihofaan to cariraw, dangoc, ato kaciˈangian no niyah. O lalakaw no satolon ita cowa pisaali to masieroday anca malecad o miˈolicay a makapah ko sowal. Latekay pakidemay ko kasomad ita alatek, tahatangitangic sanay a mitolon to Kawas. Soˈlin mahaen, cowa ko cacinaˈisangen ci Yihofa a mitengil. Cowa ko pifanaˈ aca ita to pasangaray i Kawas, haratengen ko limoˈot no Filipi 4:​6, 7. . Itini satolon paihkalen ko piakoˈid sanay ko sinael. Adihayay ko lalangian ita a miakoˈid ci Yihofaan, tinakoen pafeliay Cingra to ˈorip ita, misangaˈay to kasapaan a maamaan, madimadiay a maolah kitaanan, pafeliayho to makapahay hatokel no mita. w20.02 21 fiedac 3 fatac; 22 fiedac 6 fatac

O saka caciyaw a inaneng o sapatelong ni Yihofa. (Kasadakan 4:​10,11; Paˈarawan 4:​11) Pakaynian ni Yihofa i Fangcalay Cudad a pacipinang kitaanan, oha sasamaan a misaka dademak toniya inaneng. Oha mamicerid kita a misaday, pasowal to tamdaw to pakayniay i Hongti Kitakit ni Yihofa a kimad. (Matay 24:14; Loma 10:14) Mihaen ko demak ita o mitodongay to taˈarawan ni Yis. O sakakaay a araaw ni Yis tayni i fafekang no sera i, o papasowal to tamdaw to pakayniay kakarayan Wama a kimad. (Yohani 18:37) Kawraan, o haharatengen ita, kalimlaan ko sasamaan a pasowal. Ano pasowal kita to tamdaw to pakayniay sifanaˈ ni Yihofa i, o ‘dadamsay ko waywayanˈ no mita, ‘tangongol ko pikangodoˈ to tao, ciharateng to nafalocoˈan no tao, mikangodo to pihakelongan nangra. (1 Pitiro 3:​15) Mihaen, o mamalaˈosi ko araaw a pasifanaˈ, ngaˈayho mitemer to falocoˈ no tao. Ano maˈaraw no malohemay malitengay ko misaaliay to rarikecen a salikaka i, aka cisasa ko harateng. Sakaecaaw a mangodo ko tao i, wa itini matatodongay a tatokian a mihadak ko malohemay malitengay to limoˈot. w20.03 18-19 fiedac 2-4 fatac

O maanan ko cacangacangen ita hani? Ngaˈayay cangacangen ita ci Yihofa ‘paˈicel to pasoˈlinay falocoˈ ita.’ (Luka 17:5; Yohani 14:1) Misaaliay kita to pasoˈlinay falocoˈ, samanen miˈodisay ci Satan to mikotoday ci Kristoan a tamdaw. (Luka 22:31) O pasoˈlinay falocoˈ samaan padama kitaanan hani? Ano ira ko pasoˈlinay falocoˈ ita i, ikor no misaˈicel miremo to pasangaray, wa patorod hanto ko demak ci Yihofaan, samanen pasoˈlinay kita Cingranan wa tano sangaˈayay pakayraan misaysay to pasangaray. Mihaen ngaˈayto rihaday ko harateng ato falocoˈ no mita. (1 Pitiro 5:​6, 7) Mitolon kita to Kawas, itini masakenaay a pasangaray wa ngaˈay padotoc a rihaday ko falocoˈ. Nengnengen ko tinakoan ni Lopote, 80 ko mihecaan ningra, o madimadiay a malohemay malitengay. Sanay cingra: “Mikitini sapatalipaˈelal no Filipi 4:​6, 7, maremoay ako ko adihayay pasangaray i nokaˈorip. Tinakoen, awaay ko payci ako, na malahdaway ko ˈinorong malo malohemay malitengay.” Hano ngaˈay ci Lopote padadotoc a rihaday ko falocoˈ hani? Sanay cingra: “Ano cariraw kako tangsolay mitolon, pasoˈlinay kako ano padotoc mitolon ngaˈayayto a rihaday ko falocoˈ.” w19.04 9-10 fiedac 5-7 fatac

O miˈodangay to kaemangay o pakararaway ci Yihofaan a waywayan: Ano midokaˈ ko tamdaw to tao, o pakararaway ci Yihofaan. Tooren ko Rikec ni Mosi, miˈafas anca misaˈfit ko tamdaw to finawlan, o ‘pakararaway ci Yihofaan, midemakay to cowa ka madimadi a demakˈ. (Lifi 6:​2-4) Ano miˈodang ko salikaka to kaemangay, miˈafas to rihaday no wawa, o cowa ka madimadi to Kawas. Oniya tamdaw pakaditay to fangcalay ngangan ni Yihofa, pakidemay ko pakararaw to Kawas, o mamicada to sasawkit. Na milengoay ko Mikecolay ato Katalipaˈelal!, sasamaan mihinom to mikaˈodangan a tamdaw, sasamaan ko roma tamdaw padama ato pakalalok cangranan, halo wama wina sasamaan midipot to wawa. O likakawa no Kawas pafeliay to malohemay malitengay to mikitiniay Fangcalay Cudad a sakayat ato sapahatatanam, pasifanaˈ cangranan samaan misaysay to miˈodangay to kaemangay a demak. O likakawa ni Yihofa wa padotoc a miharateng sasamaan misaysay to hatiniay a demak. w19.05 9 fiedac 8-9 fatac

O Kimad no Kawas malecaday o cihinangay a fonos, ngaˈayay patesok to mangah ni Satan. (Ifiso 6:​17) Tinakoen, o Kimad no Kawas pahapinangay to tamdaw, cowa ka ngaˈay masasowal to mapatayay. (ˈOlic 146:4) Patalipaˈelalay ko Fangcalay Cudad kitanan, edengan ci Yihofa ko matatodongay pairasol to hanoikor. (Isaya 45:21; 46:10) Ano micerid kita miˈosi ato midotim to Kimad no Kawas, cowato ko mamalipalaw no mangah no tatiihay coyoh, hanaca wa ˈinteh to hatiniay a mangah. Cowa ko mamidemak kita to milingatay to miangangay a demak. O soˈlinay Krisciyang cowa ko mamirienang to kihcod a demak no miangangay. Tinakoen, cowa ko mamiingid anca mitanam kita a masasowal to mapatayay. O pisiki to mapatayay ano mitooray to: “Maˈoripay ko saloˈafang no mapatayay,” sanay a pihakelongan, cowa ko mamirienang kita. Cowa ko papakayni kita i miˈedaway a mafanaˈ to hanoikor. Samanen mafanaˈay kita, masakatalawan ko hatiniay a demak, malecaday o miingiday ci Satanan ato tatiihay coyoh. w19.04 21-22 fiedac 8-9 fatac

O roma tamdaw mafiyoray no taneng no hekal, awaay ko epoc no Fangcalay Cudad sanay, mansa matawaay to makoracay palinian no Fangcalay Cudad. Mihaenay cangra misalalicayan: “Ano pafelian no Kawas ko tamdaw to sakadadiˈiyaw, hano kecengenho ko tamdaw a misalo toni saali hani?” Saka pihaen a milicay cangra iraay ko mararaway harateng, samanen ngaˈayay sao haratengay saan ko tamdaw sanay. ˈArawhan cowa ka lecad ko pinengneng no Fangcalay Cudad. Pasifanaˈay ko Fangcalay Cudad papiˈimer to mararaway a coos, hongaˈ sanengseng ko nika ˈorip no mita. (Kolosay 3:5) O sapatelong no Kawas ko raramod, ano madadiˈi ko mararamoday pairaay to lipahak. (1 Korinto 7:​8, 9) Cowa ka lecad to taneng no hekal, o makoracay palinian no Fangcalay Cudad soˈlinay ciepoc to tamdaw. Sowal no Fangcalay Cudad, o madadiˈiyay no kalalaˈed no mararamoday pairaay to lipahak sanay. (Taneng 5:​18, 19) Sowal no Fangcalay Cudad: ‘ O kahacecay tamdaw kafanaˈ a miˈimer to tireng no niyah, mitafo to makoracay, aka pakonira to ˈanof no tireng a maˈodang.’​—1 Tisalonika 4:​4, 5. w19.05 22-23 fiedac 7-9 fatac

Cowa ko mamihayi ko Kawas to mikowanay palaˈafo to finawlan Ningra. Samanen i nganganay ni Yihofa cangra, mitooray to limoˈot no Kawas mikitini “Taˈangayay Papilon” a masadak, misaˈicelay a padama to tao miliyas to mararaway pihakelongan. (Dmak 15:16, 17; Paˈarawan 18:4) Soˈlin, o sikawdan ni Yihofa cowa ko mamalacafay to mararaway pihakelongan a malaˈafo, kawra o mamidotoc mifekad a demak wa palifet to pakasoˈlinay falocoˈ nangra. (Icikil 38:​2, 8) Ikor no mapalaˈafo ko mararaway pihakelongan, cecayayto ko matatodongay a pihakelongan a materek. O finawlan no Kawas malecaday o materekay a taˈangayay kilang i ikor no taˈangayay faliyos a mahapinang no tamdaw. Maedeng o mamangolaw ci Satan, oha mamilasil cira, tano ‘cikaditay a lihaf^ˈ no tatiihay coyoh misaˈopo to makomoday kitakit a miˈodis to sikawdan ni Yihofa. (Paˈarawan 16:13, 14) O makomoday a kitakit oya ‘Makok a kok,’ Ano miˈodis ko mikowanay to finawlan no Kawas i, wa mifekadto ko Armakiton.​—Paˈarawan 16:16. w19.09 11 fiedac 12-13 fatac

Itini nolitengan Israil, misaka dademakan ni Satan ko mararaway pihakelongan miowing to tamdaw a maˈodang. Mahecaday ko pakayraan ningra anini. Pakihater sanay ko mararaway pihakelongan to hatiniay waywayan, o matatodongay konini sanay, telocto misao midokoay to Kawas a tamdaw misilikoray to palinian no Kawas. O tarokos ci Pawlo itini Loma cudad, mitadtaday to samanay mifiyor to tamdaw ko hatiniay a demak. (Loma 1:​28-​31) Kihcod a malafoay waywayan sahtoay o ‘caka tatodong ko demak,’ mahawpay ko tongsinlien. (Loma 1:​24-​27, 32; Paˈarawan 2:​20) O sasinanoten ita a midoedo ko sakayat no Fangcalay Cudad tada kalimlaan konini! O taneng no tamdaw misafelitay to paliniyan no Kawas, cowa ko papadama to tamdaw palahad to minaroˈan no fangcalay saocor, ao paihkalay tono ‘hecian a waywayan.’ (Kalatiya 5:19-23) O mahaenay a taneng patakalaway to tamdaw, ‘maolah to niyah.’ (2 Timoti 3:​2-4) Oniya tatiihay capeling misafelitay to saali no Kawas, samanen o dadamsay a misapoener ko sikawdan no Kawas.​—2 Samuil 22:28. w19.06 5-6 fiedac 12-14 fatac

Matayal ci Iliya saki Yihofaan i, tahalifaay to adihayay roray ato sapalifet. Palimoˈotan ni Yihofa ci Iliya patorod to tayal ci Ilisaan, mihaen, wa ira ko ngaˈayay hacafay ni Iliya, hanaca, ano matoled ko falocoˈ i, ngaˈayay masasidama. Anini, ano fanaˈen ita ko ngaˈayay tadiˈecen a widang to nafalocoˈan i, oha mamidama kora widang kitanan. (2 Hongti 2:2) Ano awaay ko mahaenay a widang iso, tolonen ci Yihofa, micangacang Cingranan padama tisowanan, mahela ko matenesay a Krisciyang a pakalalok tisowanan. Padamaan ni Yihofa ci Iliya miremo to saroero, hato halafinay cingra madimadi a matayal, tada pakalalokay konini kitanan. Soˈlin halafin kita misiˈayaw to taˈangayay saroero a maroray, ano tadiˈecen ita ci Yihofa, o papafelien Ningra kita to ˈicel, padama kitanan padadotoc a matayal saki Cingranan.​— Isaya 40:28, 29. w19.06 15 fiedac 4 fatac; 16 fiedac 9-10 fatac

Pakapapotal a mitenak to ngaˈayay lihaf no Hongti Kitakit no Kawas, wa ngaˈay kita palahad to timolo. Misamaanay hani? Samanen mitosil ngaˈay padama kitaanan mitadiˈec ci Yihofaan, miremoay to matalaway to tamdaw a falocoˈ. Malecad o picerid ita mionto, kiemelay ko fatil, pakalomalomaˈ kita, itini i kaˈalomanan ato pisasingdian a mitosil, ato icowacowa kitiraan a misawacay, wa matongal ko timolo ita. Aniniho timoloto kita a misawacay, soˈlin maconged ko pitosil noikor, wa padadotocho kita a mitosil. (1 Tisalonika 2:​1, 2) Iraay ko cecay madimadiay fafahiyan salikaka paihkalay to kafahkaˈan a timolo, ngaˈayay nanamen ita ko ngaˈayay taˈarawan ningra. O ˈakawang no salikaka ci Yuan Nai-Wei 150 kongfen, kawra timoloay cowa ka talaw cingra, cowa paselaˈ a mitenak to ngaˈayay lihaf no Hongti Kitakit. Telocto, 20 ira ko pina miheca mapalit i Ciwkoku. O misawkitay cingranan a ˈaˈideman, somowalay “o saˈatekakay a tamdaw i polong no kitakit” cingra, sanay. w19.07 5 fiedac 13-14 fatac

O roma tamdaw makalimay minanam to Fangcalay Cudad, kawra ˈalomanay tamdaw i satapang cowa ka olah minanam. Mansa kidaten ita ko kalim nangra, songilaˈen misimsim a misaday, mihaen ngaˈ milifok to ngaˈayay a minaroˈan i pitosilan. Haratengen o manan a lalangian ko kaolahan no tamdaw, ato sasamanen masasowal toniya lalangian.Tinakoen, ngaˈay pasowal to: “Ngaˈay tengilen ako ko harateng iso han? Anini adihayay a pades milingatay to polong a tamdaw, o tamdaw misaaliay to cecay a sifo, misaysay to pades no tamdaw han?” Ikor ngaˈay lengoen ko cilomaˈay to Taniil 2:​44 a sinael. Anca licayen to: “Samanen pasifanaˈ ko wawa malo mitengilay to sowal hani?” Ikor ngaˈay lengoen ko Limoˈot 6:​6, 7 a sinael. Ano padamaen ita ko tamdaw malo Krisciyang maedeng o tataˈangay ko lipahak. w19.07 15 fiedac 4, 6-7 fatac

Itini i kilac no Kawali no Asia, o cecay salikaka mafanaˈay mitosil to awaay ko pihakelongan a tamdaw, sanay cingra: “Oya somowalay to ‘cowa pakasoˈlin kako to Kawas,ˈ saan a tamdaw i, o harateng ningra o cowa pidoko tono litengan a kawas o sanay. Mihaenay, i salakatan ako somowal to o tamdaw ko misangaˈay to adihayay a kawakawas. Ikor ˈosien ko Yirimiya 16:20, dotoc licayen cingra: ‘O soˈlinay a Kawas ato makaniway kawas, o maanan ko kasasiromaan hani?’ Misongilaˈ mitengil ngaˈ pacaˈof, ikor, ˈosien ako ko Isaya 41:23: “Pasowalen kami to mamifekad a demak no ikor, ho mafanaˈ kami to o kawas kamo.’ Dotoc paˈarawen to samaanay malaˈosi ko sapairasol ni Yihofa.” Sanay ko roma salikaka: “Mihadakay kako to pina taneng no Fangcalay Cudad, mitinako to malaˈosiayto a sapairasol, anca milengo to masieroday koniya dohaw. Pasowal to cilomaˈay o wacay konini to iraay ko citanengay a Misangaˈay Tatapangan. Ano mihayda ko tao, miharateng to iraay ko Kawas, paˈarawen ako cingra to Fangcalay Cudad mitadtad to masamanay a Kawas ci Yihofa.” w19.07 23-24 fiedac 14-15 fatac

O masakalimlaan a demak mahawpay ko pikangodo to fangcalay ngangan ni Yihofa, malaˈosi ko araaw Ningra, ato makelec a dipayal ko kasakopang. (Matay 6:​9, 10; Yohani 13:35) Ano saaretengen i nokaˈorip koniya pina demak, o misawacayay to maolahay kita ci Yihofaan. Sowal ni Pawlo misaaliayho kitaanan to ‘makoracay awa ko kadit.ˈ Cowa ko malo malefotay a tamdaw kita sanay, kawra ano songilaˈen ita patongal to olah, mihapinang to manan ko masakalimlaan a demak, o makoracay awaay ko kadit saan ko pinengneng ni Yihofa kitaanan. O roma pakayraan paihkal to olah i, aka pasetolen ko tao. ‘Aka pakapolin to tao,ˈ o pakidemay a sapirikec koni. Midemak kita to maanan o papakapolin to salikaka hani? O mipiliˈan ita a lawla, caˈedong ato tayal, cowa ko mararaway, kawra, o mipiliˈan ita ano mamipalak to ngaˈayay falocoˈ no salikaka, malahdaw ko pakasoˈlinay falocoˈ nangra to Kawas, o mararawayto konini.​—Matay 18:6. w19.08 10 fiedac 9-11 fatac

Mikitini 1935 miheca misatapang, cipinangayto ko Misawacayay Tamdaw ni Yihofa o madimadiay a Krisciyang ko taˈanagayay ˈopo a tamdaw, iraay ko tokel tahadaˈoc maˈorip i fafekang no sera. (Paˈarawan 7:​9, 10) Mahapinangayho nangra, o taˈangayay ˈopo a tamdaw itini ˈayaw no misatapang Mikowan ci Kristo to Comaˈol Miheca mafanaˈayto ci Yihofaan, midoko Cingranan, ngaˈ ngaˈay milakowit to taˈangayay padiing. O taˈangayay ˈopo tamdaw ira ko tanektekay pakasoˈlinay falocoˈ, ngaˈ ngaˈay “mitaˈlif tonini aira a demak.” (Luka 21:34-​36) Mahemekay ko taˈangayay ˈopo tamdaw itini fafekang no sera a tahadaˈoc maˈorip. Mafanaˈay cangra, edengan ci Yihofa ko mamisaˈosi to ao cima ko itini kakarayan ato i fafekang no sera a midoko Cingranan. O tatayra kakarayan anca o taˈangayay ˈopo tamdaw, cipinangay cangra o pakaynian ni Yihofa i sapatefoc ni Yis a mikiriwiˈay a sidaˈit, mansa ngaˈay ira ko makapahay a hatokel nangra.​—Loma 3:​24. w19.09 28 fiedac 10 fatac; 29 fiedac 12-13 fatac

Iraay ko faelohay katayalan iso han? Ano iraay i, o mamadangar iso. Hamaan pakayni kafalic no katayalan, miharateng to cowa ka ngaˈay ko midemakan no niyah, ecato ka mahaen o salakatay a ciepoc. Hapinangen to samanay ci Yihofa midimokos tisowanan nohatini, ka padadotoc a mitosil. Saka 1 hahekalan a Krisciyang ano talacowato, ‘milasilay to ngaˈayay lihaf no fangcalay kimad,’ ngaˈayay todongen iso ko madimadiay a taˈarawan nangra. (Dmak 8:​1, 4) Misaˈicel kiso mitosil wa ira ko ngaˈayay minaroˈan. Tinakoen, malaplapay ko roma misakafahay i cecay kitakit, tayra i ngataay malecaday ko sowal a kilac, taˈangayay ko saali itira. Ikor no pina folad, adihayay ko mapatirengay a kasakapot, hanaca kalikiay macakat ko ˈaloman no tamdaw. O sakalipahak ita mikitiniay i kalalaˈed ita ci Yihofaan. Mihaenay o aingiden ita ci Yihofa, micangacang Cingranan to taneng, sakayat ato sapadama. O sakaolah iso to salakatay a katayalan, samanen fanekfekay kiso a padama to itiraay a tamdaw. Mihaenay ano misarocod kiso to tayal nohatini, o papadamaen ni Yihofa kiso a maolah toniya katayalan.​—Patnakay 7:10. w19.08 24-25 fiedac 15-16 fatac

Misamanay hano dadoedoen ita ci Yihofa hani? Samanen o misangaˈay a Tatapangan Cingra, iraay ko fadangalan patireng to palinian no mita. (Paˈarawan 4:​11) Roma i, makahi kita a midoedo ci Yihofaan, samanen o sangaˈayay ko pikowan Ningra. Likisi no tamdaw adihayay ko mikowanay, awaay ko malecaday ci Yihofaan a citaneng, ciolahay ato siniˈaday a falocoˈ. (Kasadakan 34:6; Loma 16:27; 1 Yohani 4:8) Ano midoedo kita ci Yihofaan i, wa misarocod midoedo Cingranan i maamaan a demakan, cowa ko mamisatakaraw. (Taneng 3:5) Mafanaˈ kita to makapahay capeling ni Yihofa, wa madoloto a midoedo Cingranan. Misamanay hani? Kihcod a demak ni Yihofa sahtoay o paihkalay to makapahay capeling Ningra. (ˈOlic 145:9) Ano cipinang kita toniya capeling, wa matongal ko kaolah ci Yihofaan. Maolah kita Cingranan, cowato ko mamisaali mihacecay a pasowal kitaanan, o maanan ko ngaˈayay demaken, o maanan ko cowa ka ngaˈay demaken. w19.09 14 fiedac 1, 3 fatac

O masakenaay a mangah ni Satan pakarorayay to tamdaw, awaay ko hatokel. Tinakoen, mioratay cingra to harateng ita cowa ko mamisodod ci Yihofa to raraw ita, awaay ko tatodong ita milifok to olah ni Yihofa sanay. Tada mariˈangay koniya mangah ningra! (Yohani 8:​44) Ano pakasoˈlin ko tamdaw toniya mangah, mamatoled a masomad. Kawraan, tayra kita ci Kristoan, mamasodod ko raraw, samanen tangongolay ko olah ni Yihofa to kahacecay tamdaw. (Matay 11:28; Loma 8:​32, 38, 39) O sapatamorong ni Yis kitaanan a ˈinorong, cowa kalecad to roma ˈinorong i kaˈorip ita. Tinakoen, ikor no misaromiˈad a mawmah i, malotayayto, awaay ko lipahak. Kawra matayal kita ci Yihofaan aci Kristoan marenecay ko falocoˈ. Matayal to cecay romiˈad, malotayay kita, misaˈicel ngaˈ ngaˈay mirienang to saˈopo toya dadaya, kawra mahererek ko saˈopo mapakalalokay a sinoway kita. Malecaday, misaˈicel kita a micekiw to Fangcalay Cudad ato mirienang to mitosilay, o malifokay ita a epoc mikikakaay to mihadakan a ˈicel. w19.09 20 fiedac 1 fatac; 23-24 fiedac 15-16 fatac

O ‘romiˈad ni Yihofaˈ wa kalikito a ira, ˈayaw nonini, mitokelay ci Yihofa kitaanan fanekfek a mitosil. Mihaenay, oha ‘mararid a misaˈicel to tayal no Tapangˈ kita. (1 Korinto 15:58) Pairasol ci Yis to tahapinangan i salikoray ˈawaled i, masowalay ko mitosilay a demak, sanay: ‘A isalakaten patenak ko ngaˈayay lihaf i polong a kitakit.’ (Marko 13:​4, 8, 10; Matay 24:14) Ano malingad kita a mitosil i, o misadakay to ˈicel a palaˈosi toniya sapairasol. To mihecahecaan, macakatay ko mitosilay a demak ita. Nengnengen ita i ‘salikoray romiˈad,’ adihyay ko katongal no mitosilay a tamdaw. Itini 1914 miheca, 5,155 ko mitosilay i 43 kakitakitan ato kasapala a mitosil. Anini, 850 efan ko mitosilay tamdaw itini 240 kitakit ato pala a mitosil! Kawra, cowaho ka hererek, wa padadotoc kita milasil to, dengan o Hongti Kitakit no Kawas ko mamisaysay to kihcod a pasangaray no tamdaw.​—ˈOlic 145:11-13. w19.10 8 fiedac 3 fatac; 9-10 fiedac 7-8 fatac

Misakadademakan ni Yihofa ci Parcilay padama to hongti ci Tafitian. Itiya, milimekay ci Tafiti ci Apsaloman, macahiway malotayay ci Tafiti ato sikawdan ningra. Soˈlin matoˈasayto ci Parcilay, kawra kamayanayho cingra padama ci Tafitian ato sikawdan ningra. Ci Parcilay malitengayto kako awaayto ko kapo cowa ka saan ko piharateng, hinapaladaˈay cingra padama to sikawdan no Kawas. (2 Samuil 17:27-​29) O manan ko mananamay ita hani? Ano hakowato ko mihecaan ita, wa sakadademaken no Kawas kita a padama to itiniay a salikaka ato roma kitakit a salikaka, pafeli cangranan to hasaka ˈorip a dafong. (Taneng 3:​27, 28; 19:17) Ano cowa ka tangsol sa militemoh padama cangraanan, kawra ngayˈay kita pakiyaho midama to tayal i polong no hekal, midama to tahapadesay a salikaka.​—2 Korinto 8:14, 15; w19.10 21 fiedac 6 fatac

Alatek na madokaˈay kita cato ka timolo mifohat to falocoˈ i tamdaw. (Taneng 18:19) Alatek awaay ko toki ato ˈicel ako palahad to ngaˈayay kalawidang to tao, sanay ko harateng. Kawra aka a misawad, ano sapilifokaw kita to sadama no salikaka a misiˈayaw to sapalifet i, aniniho minanam a pakasoˈlin to salikaka, fanaˈen cangra to harateng ato nafalocoˈan iso, mihaen ngaˈ malo ngaˈayay a widang nangra kita. (1 Pitiro 1:​22) Pakasoˈlinay ci Yis to widang ningra, awaay ko mahimeday a sowal. (Yohani 15:15) Todongen ita ci Yis, pasowalen ko widang to kahemekan, cariraw anca kasomadan a demak. Ano pasowal ko tao to nafalocoˈan a sowal i, songilaˈen ita a mitengil, mihaen o mamahapinang ita o adihayay ko malecaday a harateng, nafalocoˈan ato patosokan ita to tao. Ano talaˈayaw kita pasowal to nafalocoˈan i widang, halo misongilaˈ a mitengil to harateng nangra, wa tanektek ko kalalaˈed ita ato widang.​—Taneng 27:9 ato roma pihongyak. w19.11 4 fiedac 8-9 fatac

Itini taˈangayay padiing, wa mafalic ko milasilan ita a lihaf alatek. Anini, o ngaˈayay lihaf no Hongti Kitakit ko milasilan ita, padama to tamdaw malo Krisciyang, kawra itini taˈangayay padiing, o pakidemay a lihaf ko lalasilen ita alatek, sowal no Fangcalay Cudad oniya lihaf malecaday o masaˈikayay a soeda. (Paˈarawan 16:21) Alatek o mamilasil kita to mamalaˈafoto ko hekal ni Satan, kawra, o ihkalay a pakayraan cowa kafanaˈ kita nohatini. Wa padadotoc kita tono ˈayaway a pakayraan milasil toniya pakidemay a lihaf han? Anca o roma a pakayraan hokira? Ikor, wa mafanaˈ kita. Ano samaanto, o tatimolo kita milasil to sapisawkit ni Yihofa a lihaf! (Icikil 2:​3-5) Alatek o mikowanay no kalo kitakit, wa mapakangolaw no milasilan ita a lihaf a sapicongedaw to mitosilay a tayal. Anini mitosil kita mitadiˈec ci Yihofaan, itiya mamatongal ko saali ita to sadama Ningra. Pakasoˈlinay kita, o papaˈicelen ni Yihofa kita milaheci to patorodan Ningra a tayal.​—Mika 3:8. w19.10 16 fiedac 8-9 fatac

Ano makalim kita sapilifokaw to cowa ko kalimlaan a dafong, oha ‘mamararaw ko lalan,ˈ o lalomahad i falocoˈ ko ‘tatiihay a coos.’ (1 Timoti 6:9) Saka dademakan ni Satan ko hatiniay a coos mipalak to pakasoˈlinay falocoˈ no mita, mihaenay o tatanektek kita a micoˈay! Ano iraay ko payci iso i, miˈacaay to cowa ko misaalian a dafong, o mararaway a demak han? Cowa ka hatira. Kawra ano iraay ko payci iso miˈaca toya dafong, wa ira ko toki ato ˈicel iso a misaka dademak ato midipot toya dafong han? Wa samacay sa kiso miharateng to miˈacaan a dafong iso han? Wa pakidem ko pisakareteng iso to dafong, mahecad oya minaˈayay to satahidang ni Yis a kapah, caka sapitongalaw to tayal ni Yihofa han? (Marko 10:17-​22) Soˈlinay i, kantangen ko kaˈorip, saka dademaken ko toki ato ˈicel midemak to kaolahan no Kawas a demak, mihaen ngaˈ o sangaˈayay no kaˈorip! w19.11 17-18 fiedac 15-16 fatac

Wa pafelien ko Kawas kiso to ‘haˈicel a misaka dademak,ˈ milaheci to misaˈosian a demak. (Filipi 2:13) Mihaenay i, cangacangen ci Yihofa pafeli tisowanan to fangcalay saocor, ho ngaˈay kiso a midemak. Ano cowa ka tangsol sa pacaˈof ko Kawas to micangacangan iso, padadotocen a micangacang mitolon, o sowal ni Yis: ‘Padadotoc micangacang, wa pafelien kamo.’ (Luka 11:9, 13) Limasmasen ko halaka. Sapilaheciaw to demak i, pairaen ko halaka, dotoc doedoen koya halaka a midemak. Ano misaˈosi to demak i, sarayrayen ko misaˈosian a palaˈosi to patosokan. Tinakoen, na pakalalokan ni Pawlo ko Korinto a salikaka, itini ‘saka cecay romiˈad no cecay lipayˈ a misaday to payci, coko taynito cingra i caloh sa a mihoped to kiyaho. (1 Korinto 16:​2) Mahapinangayto ita, o pasangaray a demak sieroden ato sarayrayen a midemak i, wa kahenay malaheci ko tayal, cowato ka taˈangay ko saroero. w19.11 29 fiedac 13-14 fatac

Cecay tamdaw ano mafanaˈay to ngangan no Kawas, ato midemakan ato na misowalan no Kawas, o mafanaˈayto ci Yihofaan. Kawra ano sapicalepaw mafanaˈ ci Yihofaan i, misaaliayho sapipalakaw to toki a cipinang to makapahay capeling ni Yihofa, mihaen kita i, wa palidlid sato a cipinang to hano mahaen ko sowal, ato demak Ningra, cipinangho kita to maolahay ko Kawas to harateng ita misaˈosian, ato waywayan. Ano mahapinangay ita to samanay ko pitokel ni Yihofa kitaanan i, tatangsolen ita a misaka dademak ngaˈ ngaˈay. Alatek malikafay ko tamdaw kitaanan midoko ci Yihofaan, misatapang to kita mirienang to saˈopo i, wa mangalef ko pisafelit nangra. Kawra ano mitiˈer kita to Kawas, cowa ko pakatoleden Ningra kita, wa ngaˈay ko kalalaˈed ita ato Kawas, malo ngaˈayay a widang i hakelong no kaˈorip. Wa soˈlin kita ngaˈay tangongol ko kafanaˈ ci Yihofaan han? Wa ngaˈay! w19.12 16-17 fiedac 3-4 fatac

Latekay, paririˈ pasifanaˈ to wawa, tada o marorayay a ˈinorong. Kawra o wawa o sapatelong ni Yihofa koni, makalimay Cingra padama to wama wina, mitengil to satolon nangra, pakaynianho i Fangcalay Cudad, mitepangan a cudad, ato pakayni matenesay a salikaka i kasakopang pafeli to sapaini ato sadama. Sowal no tamdaw, palahad to wawa o 20 miheca a halaka, kawra mikikakaay tonini ko mihadakan no wama wina. O sangaˈayay a sapatelong nangra to wawa i, o olah, toki, ato mikitiniay ci Yihofaan a sapasifanaˈ nangra. Manaokaniw, pakayni sapasifanaˈ no wama wina, cowa ka lecalecad ko picada no wawa. Kawra, icowacowaay a Krisciyang a wama wina adihayay ko malaˈosiay a pasifanaˈ to wawa maolah to Kawas. O cecay ci Ciuanami a fafahiyan salikaka mihadakay to nafalocoˈan no wawa: “Tada miakoˈiday kako to wama wina ako palahad takowanan malo maolahay ci Yihofaan a tamdaw, cowa ko ˈorip aca ko sapafeli nangra takowanan, pafeliayho to ciepocay no kaˈorip ako.”​—Taneng 23:24, 25. w19.12 27 fiedac 21-22 fatac

Itini tatihi ita adihayay ko misaaliay to sahinom a salikaka. Latekay cowa ka fanaˈ kita to o maanan ko hasowal ato midemak to maanan, mansa maˈaraw ko tao misaali to sahinom i, cisasaay ko harateng. Kawra wa ngaˈay kita talaˈayaw a mihinom to masomaday a tamdaw. Wa mahererekto koniya lekakawa, mihaenay o pakayraan noniya hekal wa tatiitatiih, wa malingad ko pasangar nokaˈorip ita. (2 Timoti 3:​13) Roma i, cowa ko malefotay kita, marariday mararaw, mansa miceriday misaali to sahinom. Haratengen ko tinakoan ni Pawlo, hano ngaˈay cingra madimadi, mihadidi tahatolas hani? O sahinom no salikaka o kalimlaan a lalangian. Mihaenay, nanamen ita koya mihinomay ci Pawloan a tamdaw, mihaen wa ngaˈay padama to salikaka tanektek caka ngiyangi.​—1 Tisalonika 3:2, 3. w20.01 12-13 fiedac 17-19 fatac

Iraay ko tokel tayra i kakarayan a Krisciyang cowa ka pitala cangra to kakiriwiˈen ko picada cangraanan. (Filipi 2:​2, 3) Mafanaˈay cangra, tiya nilnilen no fangcalay saocor no Kawas cangra i, cowa ka fanaˈen ko tao, mansa ano cowa pakasoˈlin ko tao i, cowa ko fafahka cangra, samanen patalipaˈelalay ko Fangcalay Cudad, ano ira ko pasowalay to patoroday ko Kawas cingraanan to mikiriwiˈay a ˈinorong i, aka tangsol a pakasoˈlin. Iraay ko tokel tayra i kakarayan a Krisciyang cowa ko sasowalsa to minilnilan no Kawas ko niyah, misolot to harateng no tao, cowa ko papahiyo toniya demak. (1 Korinto 4:​7, 8) O Maninilay no fangcalay saocor no Kawas a Krisciyang, cowa ko sapikilimaw to roma manilnilay a tamdaw, masasowal to harateng nangra a piliˈen no Kawas, anca satekedansa a masaˈopo milengo to Fangcalay Cudad. (Kalatiya 1:​15-​17) O fangcalay saocor oha papadama to finawlan no Kawas makakelec a malacafay, ano mahaen ko demak nangra i, cowa ko midoedoay to fangcalay saocor, o papaliwasak to kasakopang.​—Loma 16:17, 18. w20.01 28 6-7 fatac

Itini taˈangayay padiing, o na pakasoˈlinay to mararaway pihakelongan a tamdaw, maˈaraw dengan to ko pihakelongan no Misawacayay Tamdaw ni Yihofa ko materekay, wa pakidem ko kangolaw alatek, misatapang a miˈodis kitaanan, tinakoen itini wangcan a mitongangan kitaanan. O mikowanay no kalo kitakit na sapalahdawaw to polong a pihakelongan no hekal, kawra padadotocay ko Misawacayay Tamdaw ni Yihofa a midoko to Kawas, orato o kalo kitakit ato miontingay cangranan a Akoma Satan mamisaˈada kitaanan. Malaod ko toki, o mamalo pairasolanto no Fangcalay Cudad ko mikowanay no kalo kitakit a ‘Makok a Kok,’ mamakomod a mifekad to pakidemay a saˈodis to finawlan ni Yihofa. (Icikil 38:​2, 14-​16) Samanen cowa ka ihkal ko kafanaˈ to sasamaan ko mifekaday a demak i taˈangayay padiing, o cacalemcem kita alatek. Kawra ngaˈayay pakasoˈlinen i, cowa ko marawraw kita, o papafeli ci Yihofa to sakaˈorip ita a sakayat.​— ˈOlic 34:19. w19.10 16-17 fiedac 10-11 fatac

Cowa ko piakoˈid aca ita to kakarayan Wama, pakaynienho i sasowalen ato waywayan a paihkal. Anini, cowa kahaen ko ˈalomanay tamdaw, itini ‘salikoray romiˈad,ˈ cowa piakoˈid ko ˈalomanay tamdaw, cowa piakoˈid to nano demak no Kawas cangraanan. (2 Timoti 3:​1, 2) Aka a mahaen ko waywayan no mita! Ci Yihofa maolahay rihaday ko wawa Ningra. Ano masasiolah kita to salikaka i, wa mahapinang no tao, o soˈlinay a Krisciyang kita. (Yohani 13:35) Sanay ko mitiliday to ˈOlic: ‘Nengnengen hena! Makakelec malacafay makakapot ko salikaka, tada o makapahay, kahemekanto!’ (ˈOlic 133:1) Ano maolah kita to salikaka, mahecad o pasowalay ci Yihofaan maolahay kita Cingraanan. (1 Yohani 4:​20) O salikaka ita, tano ‘sidaˈitay a macacadaˈ ato ‘tano damsayay patado a miharateng to tao,’ masalalomaˈ no mahaenay a paro no lomaˈ tada o kalipahakanto!​—Ifiso 4:​32. w20.02 9 fiedac 6-7 fatac

Cowa ka tangsol saan malahedaw ko pasangaray ni Hana, minokayto cingra kamayan malacafay ci Pininaan a mikilomaˈ. Cowa ka somowal ko Fangcalay Cudad to mafalicay ko waywayan ni Pinina, mihaenay o papadadotoc ci Hana a mihadidi to pilikaf ni Pinina. Kawraan, patikolayto a rihaday ko falocoˈ ni Hana. Pakasoˈlinay ci Hana to mitengilan ni Yihofa ko satolon ningra, mitadiˈecay cingra ci Yihofaan, cowato ka paekel no cariraw. Ikor no cecay liyad, pacaˈofan ni Yihofa ko satolon ni Hana. Iraayto ko wawa ni Hana! (1 Samuil 1:​2, 6, 7, 17-​20) Soˈlin caka lahedaw ko pasangaray, wa ngaˈayho patikol a rihaday ko falocoˈ ita. Latekay, soˈlin mikifalocoˈay kita a mitolon ato micerid mirienang to saˈopo, kawra cowa ka lahedaw ko pasangaray. Mikitini nalifetan ni Hana mahapinangay ita, awaay ko maanan a demakan ko papakaconged ci Yihofaan a mihinom kitaanan. Cowa ko fafalahen ni Yihofa kita, o papalifonen Ningra ko madimadiay tamdaw.​—Hipray 11:6. w20.02 22 fiedac 9-10 fatac

Sapadamaaw to salikaka mitoor to safalod no Fangcalay Cudad a dademak, o tatimolo ko malohemay malitengay a mihadak to limoˈot. Mihaen to demak hano kalimlaan hani? Nengnengen ko tinakoan ni Ili. O taˈangayay a saysi ci Ili maolahay to tatosaay faˈinayan wawa, kawra oniya tatosaay wawa cowa pikangodo ci Yihofaan. Itini fangcalay pakopangan a mala saysi cangra, patelasay misaka dademak to fadangalan, cowa pikangodo to patafangan no finawlan ci Yihofaan a sapatoˈaya, maˈaˈodangayho to fafahiyan. (1 Samuil 2:​12-​17, 22) Tooren ko Rikec ni Mosi, o papatayen koniya tatosa a wawa ni Ili, kawra o pirikec aca ni Ili cangranan, padadotocayho itini fangcalay pakopangan a matayal. (Limoˈot 21:18-​21) Samanay ko harateng ni Yihofa to pisaysay ni Ili to demak hani? Sanay ko sowal Ningra ci Ilian: ‘O pikangodo iso to wawa hano ikaka to pikangodo Takowanan hani?’ Orato, mipatayan ni Yihofa koya tatosaay wawa ni Ili.​—1 Samuil 2:29, 34. w20.03 19 fiedac 4-5 fatac