Saka 8 Folad

Tahalifa ci Yis to sapalak kamayan padotoc rihaday ko falocoˈ, samanen mafanaˈay cingra ano madimadi i, o papakahemek to Wama. Soˈlin pasangar ko pakayraan, kamayan midofdof ci Yis ci Yihofaan. Maolahay cingra to Wama, misaareteng to mihodopay ci Yihofaan i nokaˈorip. ˈAyaw no tayni i sera ci Yis, ‘o ngaˈayay sayhoˈ i tihi no Kawas. Taynito i sera cingra, fanekfekay pasifanaˈ to tamdaw mafanaˈ to Wama. (Taneng 8:​30; Matay 6:9; Yohani 5:​17) Midofdof to araaw ni Yihofa palipahakay ci Yisan. (Yohani 4:​34-​36) Todongen ita ci Yis midofdof ci Yihofaan, ‘kararid misaˈicel to tayal no Kawas.’ (1 Korinto 15:58) ‘Misarocod patenak to fangcalay kimad,ˈ mihaen cato pisamacay to pasangaray no niyah. (Dmak 18:5) Tocerid ikakaay ko pasangaray no mitosilan a tamdaw, kawra ano misatapang cangra maolah ci Yihofaan ato mitoor to sowal Ningra a midemak, wa matongal ko lipahak, adihay ko kafalic no kaˈorip. Maˈaraw ita ko kafalic nangra, matongalay ko pasoˈlin to papadamaen ni Yihofa kita. w19.04 10-​11 fiedac 8-9 fatac

Saka 1 hahekalan a Krisciyang misetekay ko falocoˈ nangra micoˈay to tatiihay coyoh. Soˈlin adihayay ko mapalakay nangra a payci miˈaca to misakawasay cudad, cowa pafelien ko tao anca pacakayen nangra koniya cudad, mieminan a mitodoh. O kaciharatengan nangra sasamaan pakahemek ci Yihofaan, cowa ko hakowaay ko ˈaca noniya cudad. Wa samaan kita minanam to taˈarawan no saka 1 hahekalan a Krisciyang hani? Ano iraay ko milingatay to misakawasay a dafong no mita, mahawp ko sapidipot to tireng a dafong, ato palemeday a dafong, romaroma mihawikidan sapilaplap to kaloykoy a dafong, wa eminen a mifalah. (1 Korinto 10:⁠21) O kakinsaen ita ko mipiliˈan no niyah a lawla. Ngaˈayay licayen ita ko niyah: O mipiliˈan ako a lawla cicamolay to miangangay han? Cowa ko tatiihay ko misakawasay anca paˈekakay a demak, sanay koniya lawla han?” Wa misetek kita to falocoˈ miliyas to kaˈintehan ni Yihofa a lawla, misarocod to ˈicel ‘eca ka pakararaw to Kawas.’​–Dmak 24:16. w19.04 22-23 fiedac 10-12 fatac

Ano mafanaˈ ko malohemay malitengay to iraay ko midemakay to pakidemay raraw a tamdaw i, mamisongilaˈ a misimsim. Salakatay haharatengen nangra o sapaˈadingaw to fangcalay ngangan no Kawas. (Lifi 22:31, 32; Matay 6:9) Wa midipotho cangra to kalalaˈed no salikaka aci Yihofaan, hanaca makalim a padama to mikaˈodangan a tamdaw. Ano o salikaka kora mararaway tamdaw, sasaˈicelen no malohemay malitengay a padama a mitapid to kalalaˈed ningra aci Yihofaan. (Yakop 5:14,15) Ano eca ka pakaˈmet ko Krisciyang to mararaway a coos midemak to taˈangayay raraw, paihkalay konini to tatiihay ko kalalaˈed ningra aci Yihofaan, malecaday o pakidemay ko adada. Malecaday o ising ko malohemay malitengay, wa misaˈicel a padama toniya ‘adadaay a tamdawˈ patikol a ngaˈay. Ano soˈlin a pasasiyor ko mararaway tamdaw, mikitini i Fangcalay Cudad ko malohemay malitengay misadak to salimoˈot, wa ngaˈay padama cingranan miliyaw a ngaˈay ko kalalaˈed ato Kawas.​—Dmak 3:19; 2 Korinto 2:5-10. w19.05 10 fiedac 10-11 fatac

Ci Yihofa pairato makalimay a falocoˈ no mita a dademak. mafanaˈay kita to iraay ko papadamaen a tamdaw i kasakopang, saan ko piharateng ita: “Wa ngaˈay kako a midemak to maanan hani?” Anca mitahidangay ko likakawa kitaanan micada to pasangaray a demak, saan kita miharateng: “Samanen ngaˈ malaheci koniya demak hani?” Alatek maˈosiay ita ko cecay sinael, saan ko harateng: “Wa samaan kako misakadademak toniya sinael padama to tao hani?” Manaokaniw, cowa ko papacieci ci Yihofa kitaanan a midemak, kawra maˈaraway Ningra ko masimsimay ita a hademak, wa padama kitaanan ira ko makalimay a falocoˈ a midemak. Wa samaan ci Yihofa paira to ˈicel ita a midemak hani? (Isaya 40:29) Tano fangcalay saocor Cingra a patongal to na iraay a ˈicel no mita. (Kasadakan 35:30-​35) Pakayniayho i likakawa Ningra, pahatatanam kitaanan midemak to tayal Ningra. Ano awaay ko pinang iso sasamaan midemak to tayal Ningra, licayen ko tao ato cangacangen ko hinapaladaˈay a Wama, pafeli tisowanan to tadamaanay a ˈicel.​—2 Korinto 4:7; Luka 11:13. w19.10 21 fiedac 3-4 fatac

Anini, o misatekeday a waywayan misaˈakawangan no tamdaw. O cecay hakacudad sanay ko sowal, itini i 1970 mamihecaan “pakowaday to niyah a cudad no hekal matongalay ko nika adihay,” pakalalokay kora cudad “mafanaˈ to o masamaanay tamdaw ko niyah, hamaan sapifalicaw to niyah” sanay. Patinakoen, sanay pasowal: “Edengan o niyah ko samakapahay toniya hekal, kasemeran no tao, citodongay to kakaolahen no tamdaw.” Oniya tilid miowingay to misakareteng maolah to niyah a waywayan, ngaˈayay mitoor to makapahay falocoˈ ato kahemekan no niyah a misaˈosi to demak sanay. Hato na matengilay ko mahaenay a sowal han? Ci Satan, mihaenay a miowing ci Ifaan, pasowal cingranan to “mamatiyato o Kawas kamo, maedeng kamo a mihapinang to ngaˈayay ato tatiihay.” (Satapangan 3:⁠5) Anini, miharateng ko ˈalomanay awaay ko cimacima to citatodongay pasowal cangranan to manan ko ngaˈayay manan ko tatiihay, ano o Kawasto cowa ka ngaˈay sanay. Pakayni to kapinengneng nangra to raramod paihkalay to matiniay misatekeday to niyahan a waywayan. w19.05 23 fiedac 10-11 fatac

Hongti ci Tafiti tahasiˈayaway to masakenaay a pasangaray, taˈangayay ko saroero. Pakayni i kararaw makesemay ko harateng. (ˈOlic 40:12) Mitowakangay ko wawa ningra ci Apsalom, ikor mipatayan no tao. (2 Samuil 15:13, 14; 18:33) Mipacakayanho no pakasoˈlinan ningra a widang. (2 Samuil 16:⁠23–​17:2; ˈOlic 55:12-​14) O mitilidan ni Tafiti adihayay a ˈOlic, mitadtaday to matoleday a harateng ningra, kawra paihkalay to tanoktokay a pakasoˈlin ningra ci Yihofaan. (ˈOlic 38:​5-​10; 94:17-​19) O cecay mitiliday to ˈOlic a tamdaw, na masemeray to kaˈorip no tatiihay tamdaw. Oniya tamdaw ono Lifi a ngasaw, o teloteloc ni Asaf, itiniay i fangcalay sefi no Yirusalim a matayal. O macadaay ningra a saroero, palahdaway to lipahak ningra, cowa ka saloen to kaˈorip no niyah, awaay ko epoc a matayal saki Kawas sanay miharateng.​—ˈOlic 73:2-5, 7, 12-14, 16, 17, 21. w19.06 17 fiedac 12-13 fatac

Misaka dademakan ni Satan ko matatodongay a kalim no tamdaw. Sapinanaman kita to inaneng a matayal hongaˈay paririˈ to niyah ato paro no lomaˈ, o matatodongay a kalim konini. (1 Timoti 5:⁠8) Itini picudadan wa ngaˈay kita minanam to inaneng, kawra o maminaˈon kita, itini roma kitakit, cowa ko pasifanaˈ aca to ciepocay a inaneng, pasifanaˈayho tono tamdawan a taneng. Mikayhid to micudaday misakahmaw to Fangcalay Cudad ato cisasa iraay ko Kawas hokira. Pasowalay to edeng o sinkalon ko matatodongay mitadtad to pipowalan no ˈorip sanay. (Loma 1:​21-23) O hatiniay kimad misafelitay to ‘taneng no Kawas.’ (1 Korinto 1:​19-​21; 3:​18-​20) Seteken ko falocoˈ aka a papiontingen ko ‘pakatamdaway a harateng ato awaay ko epoc a sasowalenˈ to harateng iso. (Kolosay 2:8) Ceriden a micoˈay ko sakayhid ni Satan. (1 Korinto 3:​18) Aka a malipalaw ningra, mapawan ci Yihofaan ato limoˈot Ningra. Dofdofen ko ˈakawangay palinian ni Yihofa, aka a maorat ni Satan a misakahmaw to sapalimoˈot ni Yihofa. w19.06 5 fiedac 13 fatac; 7 fiedac 17 fatac

Ano o manan ko milengoan ita a lalangian i, haharatengen to samanen padama ko tamdaw mikitini i sinael a milifok to haepoc. Ano masasowal to tamdaw i, songilaˈen a mitengil mikangodo to harateng ningra, mihaen ngaˈ cipinang kita to harateng no tao, o mamakahi ko tao mitengil to sowal ita. Wa adihay ko mapalakay ita a toki ato ˈicel a milisoˈ to cecay tamdaw, ngaˈ makahito a minanam to Fangcalay Cudad cingra alatek. Samanen awaay i lomaˈ anca awaay ko toki ningra a masasowal kitaanan alatek, wa kinapina masasoˈaraw cingranan, ngaˈ makahi cingra a minanam. Malecaday konini to caceriden a micefos to nanom ko pinaloma ngaˈ lomahaday, o mamicerid kita a malalengo to tamdaw to Fangcalay Cudad, ngaˈ ngaˈay padama cingranan palahad to kaolah ci Yihofaan aci Kristoan. w19.07 14 fiedac 1 fatac; 15-16 fiedac 7-8 fatac

O maanan ko tatodong no sowal ni Yis hani? Maolahay ko Krisciyang kaˈintehen no tamdaw, cowa ka saan ko sowal ni Yis, o aira ko tamdaw mihaen kitaanan o sanay. Cowa ko noni hekal kita, mitooray to sapasifanaˈ ni Yis a maˈorip, hanaca patenakay to lihaf no Hongti Kitakit, mansa mikaˈinteh ko hekal tamdaw kitaanan. (Yohani 15:18-​21) Maolahay kita ci Yihofaan, sapakahemekaw Cingranan, ano mikaˈinteh ko tao kitaanan i, o nangra a raraw kora, cowa kono mita. Pakayni kaeca kaolah ko tao kitaanan, awaayto ko kapo no niyah aka mihaen ko harateng. Cowa kafanaˈ kita hahacowa tahalifa to sapalak, cowa ka fanaˈ hahacowa makeceng no kitakit ko pidoko ita ci Yihofaan a tayal. Kawra ano tanektek ko kalawidang ita ci Yihofaan, palahad to timolo, mafanaˈ a misiˈayaw to kaˈinteh no tao, mihaen wa padotocto a madimadi i sapalak. w19.07 6 fiedac 17-18 fatac; 7 fiedac 21 fatac

Ano malalengo kita to awaay ko pihakelongan a tamdaw i, padadotocen a padama cangra pakasoˈlin to iraay ko Kawas. Pasifanaˈenho ita cangra pakasoˈlin to o soˈlinay kimad ko misowalan no Fangcalay Cudad. Mihaenay o mamisaliyaliyaw kita milengo to kalimlaan. Tinakoen, ano minanam to Fangcalay Cudad i, ngaˈayay lengoen ita iraay ko maanan a wacay, paihkalay to pipowaran no Fangcalay Cudad ko Kawas. Ngaˈayay tinakoen ita matatodongay i kakak ato likisi ko Fangcalay Cudad, matatodongay ko kalaˈosi no sapairasol no Fangcalay Cudad, anca ngaˈayay padama ko safalod no Fangcalay Cudad lipahak ko kaˈorip no mita. Ano iraay anca awaay ko pihakelongan no tao, sapadamaaw cangranan malo Krisciyang, o mamisaˈicel kita a paihkal to olah. (1 Korinto 13:1) Ciharatengay kita cipinang ko pacekiwan, maolahay ko Kawas cangranan, mitokel cangranan tano olah ko sapatikol to olah. To mihecahecaan, ˈalomanay cowa ka olah to pihakelongan a tamdaw, minanamay a maolah to Kawas, micadaay to paputisem malo Krisciyang. Mihaenay o papadotoc a tawlik kita, ira ko olah a ciharateng to masakenaay a tamdaw, misongilaˈ mitengil, misaˈicel a cipinang to harateng no tao, tano ngaˈayay a taˈarawan no niyah pasifanaˈ to tamdaw malo nisawawaan ni Kristo. w19.07 24 fiedac 16-17 fatac

O fafahiyan wawa ni Salong misaka dademakan ni Yihofa misangaˈ to lowil no Yirusalim. (Nihimiya 2:​20; 3:​12) Soˈlin o ˈaˈideman ci Salong, makahiay ko fafahiyan wawa ningra dademak to marorayay katalawan a tayal. (Nihimiya 4:15-18) Anini, ˈalomanay fafahiyan salikaka makahiay mirienang to mikiriwiˈay a tayal, patireng ato misakapah to pidokoan to Kawas a kitiraan. Malaˈosi koniya tayal, inanengay, ato fanekfekay madimadiay fafahiyan salikaka, tada kalimlaan ko demak nangra! Mapakalalokay ni Yihofa ci Tapisa, ‘hinapaladaˈay to tao,’ hanaca makahiay a midimokos to maponengay. (Dmak 9:​36) Samanen hinapaladaˈay ato sidaˈitay ci Tapisa, mansa mapatay cingra i, ˈalomanay ko tomangicay a tamdaw. Ikor patikolan ni Pitiro a paˈorip cingra, lipahakayto ko ˈalomanay. (Dmak 9:​39-​41) Mikitini ci Tapisaan mananam ita ko maanan? Ano faˈinayanto fafahiyanto a maemin, wa ngaˈay midemak kita, mihadak to ciepocay a sadama to salikaka. w19.10 23 fiedac 11-12 fatac

Latekay, samanay kita a pakapolin to salikaka hani? Tinakoen, o cecay minanamay to Fangcalay Cudad a tamdaw, halafinay misaˈicel misawad to kahiyan to epah, misetek to falocoˈ ecato komaen to epah. Ikor macakat cingra micada to paputisem. Cecay romiˈad, mitahidangan no salikaka a micawmaˈ, patakid to epah cingranan, saan ko sowal: “O Krisciyangto kiso nohatini, iraay ko fangcalay saocor ni Yihofa, o minaroˈan no fangcalay saocor iraay ko miˈimeray. Mihaenay ano iraay ko miˈimeray iso, wa matatodong ko kakomaen to epah.” Ano tengilen noniya faelohay a salikaka koniya sapaini, misatapang aca komaen to epah, maedeng ka adayayan ko hateloc! O saˈopo no Krisciyang padamaay kitaanan misaka dademak to limoˈot no sinael anini. O lalakaw no saˈopo patalipaˈelalay kitaanan, itini pinengneng ni Yihofa o maanan ko masakalimlaan a demak, sasamaan kita misaka dademak to safalod no Fangcalay Cudad, ngaˈ ira ko makoracay awaay ko kadit a waywayan ato sasowalen. Itini saˈopo adihayay ko micadaan ita a sapakalalok, wa matongal ko olah ita to Kawas ato salikaka. Maolah kita to Kawas ato salikaka, eca to pakapolin to salikaka. w19.08 10 fiedac 9 fatac; 11 fiedac 13-14 fatac

O cecay tamdaw ano fanekfekay ko falocoˈ anca, timoloay mihadak to harateng no niyah, cowa ko malitaˈangay a tamdaw alatek. (Yohani 1:​46, 47) Kawra, ano samaanto ko pinangan ita, o maomoyay anca o mamenacay, o hamami saˈicel a malo soˈlinay misapoeneray a tamdaw. Sasinanoten ko nalifetan ni Pawlo. Miocoran ni Yihofa cingra, itini icowacowa a pala patireng to kasakopang, alatek o minaroˈan no pitosilan ningra ikakaay ko adihay to roma tarokos, kawra cowa ka malitaˈang ci Pawlo. Ira ko ngaˈayay kalalaˈed ni Pawlo aci Yihofa, cowa ko malaˈosiay a demak ko piˈarawan, pakayniay sapadama ni Yihofa ato mikiriwiˈay a sidaˈit. (1 Korinto 15:10) Itini i Korinto a kasakopang o roma a Krisciyang, sapisawacayaw cangra ikakaay ko inaneng no niyah ci Pawloan, kawra patikami ci Pawlo cangranan i, cowa pasengi to niyah. Tada misapoenengay cingra, patireng to tada ngaˈayay a taˈarawan no mita!​—2 Korinto 10:10. w19.09 3 fiedac 5-6 fatac

O lalangian a pasangar midoedo ci Yihofaan i, mirocokay kita to raraw, o cowa ka lefot a tamdaw, mansa ira ko mitowakangay a harateng. Mitowakangay ci Atam aci Ifa to Kawas, komaen to heci no mihapinang to ngaˈayay ato tatiihay a kilang, paihkalay to niyah sa patireng to ngaˈayay tatiihay a palinian. (Satapangan 3:​22) Anini, cowa pisikol ko ˈalomanay tamdaw to palinian ni Yihofa, o niyah sanay ko misaˈosiay to ngaˈayay tatiihay. Soˈlin mafanaˈay kita ci Yihofaan, maolahay Cingranan, kawra, sapidoedoaw Cingranan i kihcod a demak tada pasangarayto. Mahecaday ko harateng no tarokos ci Pawlo. (Loma 7:​21-​23) Mahecaday kita ci Pawloan, sapidemakaw to matatodongay a demak i pinengneng ni Yihofa, kawra, papadadotoc kita a misaˈicel ngaˈ ngaˈay pakaconged to mararaway a coˈos no tireng. O roma pasangaray midoedo ci Yihofaan a lalangian i, o kalomahadan ita mifiyoray to harateng. O harateng no kalo a tamdaw, misafelitay to harateng ni Yihofa, wa misaˈicel kita ngaˈ, caka madenga no hekal. w19.09 15 fiedac 4-6 fatac

O cacipinang kita, citolasay ko ˈicel no kahacecay tamdaw, mihaenay o sasongilaˈen ita misaka dademak ko ˈicel no niyah. Tinakoen, ano caka pisinanot kita, wa saka dademaken ko ˈicel i picangacang to hafay, mihaen to demak o mafolaay. O cecay cihafayay a kapah na milicayay ci Yisan: ‘Sasamaan ko demak ngaˈ, milifok to tahadaˈocay a ˈorip hani?’ Oniya kapah midofdofay to Rikec ni Mosi, hanaca sowal no Marko, ci Yis ‘maolahay cingrananˈ sanay, mihaenay maedeng o moecelay a tamdaw cingra. Mitahidangan ni Yis koniya kapah a tapang sanay: ‘Olili, paˈacaen ko kihcod iso mihakelong takowanan.’ Makalimay koniya kapah sapihakelongaw ci Yisan, kawra ‘adihayay ko hafayˈ ningra, cowa ka sapisawadaw. (Marko 10:17-​22) Telocto manaˈayay cingra mitamorong to taloˈodan ni Yis, padadotocay malo ‘koli no Hafay.’ (Matay 6:​24) Ano onini kapah a tapang kiso, wa samaan ko pipiliˈ iso hani? Wa micerid kita mikinsa to, o manan ko misaaretengan noniyah i nokaˈorip, mihaen ngaˈ citaneng kita misaka dademak to ˈicel noniyah. w19.09 24 fiedac 17-18 fatac

ˈAyaw no pasowal ci Yihofa to malaheciayto ko mitosilay a demak i, o papadotoc kita a mitosil. Hakowaayto ko maˈosaway a toki no tamdaw, mafanaˈ ci Yihofaan aci Yisan hani? (Yohani 17:3) Cowa ka fanaˈ kita. Kawra, mafanaˈay kita ˈayaw no misatapang ko taˈangayay padiing i, o matatodongay ko waywayan ngaˈay milifok to tahadaˈocay ˈorip a tamdaw, iraayho ko toki mipiliˈ midoko ci Yihofaan. (Dmak 13:48) Sasamaan kita mimamet to toki padama to hatiniay a tamdaw hani? Pakaynian ni Yihofa i likakawa Ningra mihadak to sapadama, mihaen ngangaˈay kita pasifanaˈ to tao a minanam to Fangcalay Cudad. I Mitosilay ato Nikaˈorip a Saˈopo, minanamay kita to sasamaan i salakatay pitosil ato pilisoˈ a masasowal to tao. Maharek kita masasowal to makalimay a tamdaw i, ngaˈayay tereken ko tancang ato casi, mihaen ˈayaw no miliyaw milisoˈ cingranan i, wa ngaˈay cingra mikitini lalakaw a cipinang to lihaf no Fangcalay Cudad. Mihaenay, oha fafanekfek kita milasil to ngaˈayay lihaf no Hongti Kitakit, misarocod a mitosil to folafoladan. w19.10 9 fiedac 7 fatac; 10 fiedac 9-10 fatac

Itiniay i Yirusalim ko kitiraan ni Simiyong, madimadiay cingra to Kawas, soˈlin matoˈasayto cingra, kawra, mikiˈokay ko Kawas, ˈayaw no mapatay cingra wa pakaˈaraw ci Misiyaan sanay. Halafinto mitala ci Simiyong ci Misiyaan, o sakiˈok ni Yihofa mitemeray to falocoˈ ningra. Cecay romiˈad, o pakasoˈlinay falocoˈ ato mihadidiay ningra milifokay to sapalifon. Miocoray ko fangcalay saocor cingranan a tayra i fangcalay sefi, maˈaraway ko ‘engaengaho a Yisan, misakadademakanho no Kawas cingra a pasowal to pakayniay ci Yisan a sapairasol. (Luka 2:​25-​35) Cowa ka ˈaraw ni Simiyong ko pisatapang ni Yis a mitosil i hekal alatek, kawra miakoˈiday cingra to Kawas misakadademak cingranan. Itini faelohay a hekal, mamilifok cingra to adihayay a lifon! Itini faelohay hekal, mamaˈaraw ningra, mikowan ci Yis to polong a tamdaw milifok to lipahakay a ˈorip. (Satapangan 22:18) Ngaˈayay kita mitodong ci Simiyongan, ano sakadademaken ni Yihofa kita midemak to maanan, pairaen ko miˈakoiday a falocoˈ ita. w19.10 22 fiedac 7 fatac; 23 fiedac 12 fatac

Ano manikawto cihafayto kita, o dadipoten ko falocoˈ no niyah. Sasamaan ko hademak ita hani? Aka a maˈanof to hafay, aka a pakidem ko pisaareteng to tayal, misakahmaw to tayal ci Yihofaan. Sakafanaˈaw to samanay ko harateng no niyah, ngaˈayay licayen ko niyah: “Ano mirienang to saˈopo ato mitosil i, marariday kako miharateng to katayalan han? Calemcemay kako to noikoran, sapitongalaw to sadipot no payci han? Marariday kako pakayni payci a malacongis to raramod han? O cecay kapiliˈan no tamdaw a tayal, kawra o sakangaˈay matayal saki Yihofaan, wa makahi kako a midemak han? (1 Timoti 6:9-12) Ano miharateng kita to fafekangay a salicay i, haratengen, maolahay ci Yihofa kitaanan, mikiˈokay Cingra to misarocoday maolah Cingranan a tamdaw: ‘Cowa ko mamiliyas Kako tisowanan, cowa ko mamifalah tisowanan.’ Mihaenay i, pakalalokay ko tarokos ci Pawlo kitaanan: ‘O waywayan namo malo tamdaw, aka a maˈanof to payci.’​—Hipray 13:5, 6. w19.10 29 fiedac 10 fatac

Malacafay to salikaka a matayal, misinanot to kangaˈayan nangra, minanam cangranan, mamatongal ko ngaˈayay kalalaˈed cangranan. Haratengen hena, ano maˈaraw iso ko cafay mitosil timolo a miˈading to soˈlinay kimad, anca matomes ko pakasoˈlinay falocoˈ a pasifanaˈ to tao mafanaˈ ci Yihofaan ato araaw Ningra, wa samaan ko harateng iso hani? Maedeng matongal ko kaolah iso cingranan. Cecay 23 ko mihecaan salikaka ci Atelin, mitahidangan ningra ko widang ci Kantis malacafay tayra i cowa kararid lisoˈen a kilac mitosil. Sanay ci Atelin: “Mitokelay kami matongal ko fanekfek, ato olah a mitosil, mansa ciharatengay mikitini piliwko a mitosil milifok to sapakalalok.” Samanayto ko minaroˈan hani? Sanay ci Atelin: “Mahererek misaromiˈad a mitosil i, masasowalay kami to samanay ko harateng toya romiˈad, iraay ko maanan pakalalokay to niyah a nalifetan, ato samanay mahapinang to mikayatay ci Yihofa tamiyanan. Milomal toniya demak tada lipahakay kami, matongalay ko kasasifanaˈ niyam.” w19.11 5 fiedac 10-11 fatac

Nolitengan, o sofitay ano eca pakadipot to sapatada, masakangodoanto konini. Mikingkiway to likisi no Loma ci Tacitos sanay: “Pakayni i sofitay, ano mahiday ko sapatada o kangodoan a demak.” Mihaenay ano milood i, mimetmetan no sofitay ko sapatada no niyah. Malecaday, o kakelecen ita mimetmet ko taˈangayay sapatada no niyah. Wa micerid kita mirienang to saˈopo, milasil to ngangan ni Yihofa ato Hongti Kitakit Ningra, to romiˈamiˈad micekiw to Fangcalay Cudad ato micangacang to sadama ni Yihofa misaka dademak to minanaman. (2 Timoti 3:​16, 17; Hipray 10:23-25) Mihaen, ano o mananto ko misaka dademakan ni Satan ‘sapilood a lalosidan,ˈ awa ko pakayraan tahadaˈoc a midokaˈ kitaanan. (Isaya 54:17) O pakasoˈlinay falocoˈ ita wa malecad o taˈangayay sapatada midipot kitaanan, tanektek kita a tomireng, malacafay to salikaka a micoˈay ci Satanan. Kalimlaan i, wa masongilaˈto ni Yis a milowid ci Satan ato kapot ningra, midama kita ci Yisan, wa mikapot to pakalowiday!​—Paˈarawan 17:14; 20:10. w19.11 19 fiedac 18-19 fatac

Ano tiliden iso ko halaka i, wa madolo a milaheci to demak. (1 Korinto 14:40) Tinakoen, pakayni sakayat no likakawa no Kawas, o kasacefang no malohemay malitengay, ocoren ko cecay mitilid to misaˈosian a demak, oniya lalakaw mahawpay ko o cima ko ciˈinorong toniya demak, ato tiliden ko hahacowa a malaheci koni demak. Ano tooren no malohemay malitengay koniya sakayat i, wa madolo milaheci to misaˈosian a demak. Oniya safalod ngaˈayay sakadademaken iso misaysay to niyah a demak. Tinakoen, rayrayen kono romiˈamiˈad a demak, doedoen koya rayray a midemak, mihaenay wa kaliki milaheci toya misaˈosian iso a midemak. Sarocoden a misaˈicel. Dengan misaˈicel ngaˈ mamalaheci ko patosokan ita. (Loma 12:11) Pakalalokan ni Pawlo ci Timoti padadotoc a misaˈicel, ‘tanoktoken a padadotocˈ misalof to pipasifanaˈ a inaneng no niyah. Ano samaanto ko hademak ita ci Yihofaan i, sahto misaaliay to sapisaˈicelaw ita a midemak.​—1 Timoti 4:13, 16. w19.11 29-30 fiedac 15-16 fatac

Tiya papilidongen no Kawas ci Mosi to Israil i, cangoˈotay ko pakasoˈlin ni Mosi, ecato pakadangar ko niyah sanay, caka kahi a micada. Siniˈadaay ko Kawas ci Mosian, mihadak to sapadama cingraanan. (Kasadakan 4:​10-​16) Mansa ngaˈay ci Mosi misaliyaliyaw milasil to sasawkit a lihaf ci Falawan. Ikor, mitefadan ni Yihofa ko Moetep a Pades i Icip, itini Kahngangay a Riyar palaˈafo ci Falawan ato sofitay ningra, mahapinangay ni Mosi tada taˈangayay ko ˈicel ni Yihofa. (Kasadakan 14:​26-​31; ˈOlic 136:15) Pasadaken ni Mosi ko Israil tamdaw i Icip i, sangaliwngiw sanay, soˈlin mahaen, maˈaraway ni Mosi ko pihadidi ni Yihofa to finawlan no Niyah. (ˈOlic 78:40-​43) Mahapinangayho ni Mosi tada misapoeneray to falocoˈ ci Yihofa, kinacecayay, maharek ci Yihofa mitengil to sowal ni Mosi i, mifalicay to harateng no Niyah. (Kasadakan 32:9-14)Ikor no miliyas to Icip i, matongalay ko piingid ni Mosi ci Yihofaan, hato maˈaraway to ningra ko Kawas.​—Hipray 11:27. w19.12 17 fiedac 7-8 fatac; 19 fiedac 9 fatac

O ˈalomanay a nisawawaan ni Yis o Kalili a tamdaw, mansa itini i lotok no Kalili a misaˈopo to ˈalomanay tamdaw, mikikakaay ko kangaˈay itini lomaˈ no tamdaw. Roma i, ano maharekayto ci Yis i ikor no patikol maˈorip a masasoˈaraw to 11 a tarokos i Yirusalim, ano o tarokos aca ko mamalingad a mitosil, maedeng papalimoˈoten ningra cangra itiya, cowato ko mamitahidang cangraanan ato roma tamdaw tayra i kalili a miˈaraw cingraanan kira. (Luka 24:33, 36) O limoˈot ni Yis cowa ko saka 1 aca hahekalan a nisawawaan ko pasowalan, samanen itini sapihererek a sowal ningra sanay: ‘Toniya kihcod a romiˈad, tahira ka hererekan noniya lekakawa, kalacafayen ako kamo.’ (Matay 28:19, 20) ˈAlomanay tamdaw anini midofdofay to limoˈot ni Yis, misaˈicel a padama to tao malo nisawawaan ni Yis. To mihecahecaan 30 emang ko micadaay to paputisem a tamdaw malo Krisciyang, malo Misawacayay Tamdaw ni Yihofa, tada kahemekanto konini! w20.01 2 fiedac 1 fatac; 3 fiedac 5-6 fatac

O roma kapah pakidemay ko adada, malingaday ko kalonay no tireng, o roma tamdaw matoˈamatoˈasay, pasangaray makilim ko katayalan, roma tamdaw matoˈasayto, citolasay ko tayal saki Yihofaan. Ano tahalifaay kiso to malecaday a demak, awaayto ko kapo no niyah wasa miharateng alatek. O hatiniay a pakayraan wa midokaˈ to falocoˈ no miso, milingat to kalalaˈed iso to tao, wa pakatoled to harateng iso alatek. Itini pinengneng ni Satan, hato awaay ko epoc no tamdaw. Mafanaˈay cingra ano mitowakang to Kawas o mamapatay, kawra kamayanho a milipalaw ci Ifaan, miorat cingraanan to papaira to pasalat mitowakang to Kawas. Padadotocay ci Satan mionting toniya hekal, mansa mahecaday cangra ci Satanan, misakahmaw to epoc ato kasenengan no tamdaw. Tokel ni Yihofa kitaanan matatodong ko pinengneng to niyah, mihapinang to epoc no niyah, ano awaay ko kapo no niyah saan kita miharateng i, wa damaen Ningra kita.​—Loma 12:3. w20.01 14 fiedac 1-4 fatac

Iraay ko 40 miheca, i taliyokay ni Yirimiya adihayay ko cowa ka madimadi to Kawas a tamdaw, mahawpay ko nai Anatot a finawlan, ato salawina alatek. (Yirimiya 12:6) Kawraan, cowa ka sawad sa ci Yirimiya a micawmaˈ to tamdaw, paihkalan ningra ko nafalocoˈan a harateng i madimadiay a Parukan, matiliday koniya sowal, ngaˈayay maˈosi ita anini. (Yirimiya 8:​21; 9:1; 20:14-​18; 45:1) Haratengen hena, mitilidan ni Paruk ko masakenaay a malifetay ni Yirimiya, toniya tatokian, maedeng matongalay ko kalawidang nangra, matongalay a makakangodo cangra. (Yirimiya 20:​1, 2; 26:​7-​11) Adihayay a mihecaan, timoloay ci Yirimiya pasowal to Israil tamdaw to mamalaˈafo ko Yirusalim. (Yirimiya 25:3) Pakayni sapakalalokaw to finawlan a pasasiyor, palimoˈotan ni Yihofa ci Yirimiya mitilid toniya sapirikec a lihaf i maloloday cudad. (Yirimiya 36:​1-4) Ci Yirimiya aci Paruk malacafay matayal, adihayay ko mapalakay a toki nangra milaheci to patorodan no Kawas cangranan a demak, o kasasowal nangra malacafay matayal maedeng patanektekay to pakasoˈlinay falocoˈ nangra. w19.11 2-3 fiedac 3-4 fatac

Sasamaan kita minengneng to minilnilan no fangcalay saocor no Kawas a tamdaw hani? Cowa ka ngaˈay kita pakaka to cecacecay tamdaw, mahawpay ko tatayra i kakarayan ko hatokel a tamdaw. (Matay 23:​8-​11) Haratengen, masowal no Fangcalay Cudad ko malohemay malitengay i, misaaliay kitaanan ‘mitodong to pakasoˈlinay falocoˈ nangra,ˈ kawra cowa pisaali kitaanan palo ˈaˈideman a minengneng cangraanan. (Hipray 13:7) Somowalayho ko Fangcalay Cudad, o roma malohemay malitengay ‘ikakaen ko pikangodo,’ samanen cangra ‘misongilaˈay a mikayat to kasakopang,’ hanaca ‘marorayay mikimad a pasifana,’ ao cowa ko pakayniay i tatayra i kakarayan ko hatokel nangra. (1 Timoti 5:​17) Ano pakidem ko pisamacay ato pipakahemek to tatayra i kakarayan ko hatokel a Krisciyang, o mamangodo cangra alatek, anca malo misatakarawayto cangra. (Loma 12:3) Cowa ko mamaolah kita mahaen ko raraw nangra!​—Luka 17:2. w20.01 29 fiedac 8 fatac

Adihayay ko cariraw ni Pawlo, patadoay cingra a calemcem to pasangaray no salikaka. (2 Korinto 2:4) Na mihadidiay cingra to pipekpek no misafelitay tamdaw, hanaca mipalitan. O mamiremoho cingra to roma pasangaray, tinakoen o ‘manikaway kaˈorip.’ (Filipi 4:​12) Roma i, kina toloay tahapades ko tamina ningra, mihaenay calemcemay cingra mikalic to tamina. (2 Korinto 11:23-​27) Samanay ci Pawlo miremo to masakenaay a cariraw hani? Tahalifa ko salikaka to pasangaray i, soˈlinay patado ci Pawlo a calemcem cangraanan, kawra cowa piharateng to ngangaˈay ko niyah a misaysay to kihcod a pasangaray nangra. Mafanaˈay ci Pawlo to citolasay ko ˈicel no niyah, mansa mitahidang to roma tamdaw a padama midimokos to kasakopang. Tinakoen, patorodan ningra ci Timoti, ci Titus ato roma ngaˈayay pakasoˈlinen a tamdaw to hatayal. Oniya madimadiay a salikaka maedeng milowanay to cariraw ni Pawlo.​—Filipi 2:​19, 20; Titus 1:​1, 4, 5. w20.02 23 fiedac 11-​12 fatac

Mitokelayho ci Yihofa kitaanan midofdof Cingranan. Cowa ko pisangaˈ aca Ningra kitaanan, midamaayho to sakaˈorip no mita, hanaca o citanengay a Wama Cingra, mansa midofdof kita Cingraanan o matatodongay. Kawra, midofdof kita sakakaay lalangian pakayniay i ka olah Cingraanan. (1 Yohani 5:⁠3) Soˈlin adihayay ko lalangian ita a midofdof ci Yihofaan, kawra cowa ka pacieci Cingra kitaanan. Mihaenay, maˈaraw no kakarayan Wama pakayni kaolah ita a midofdof Cingraanan, maedeng o tataˈangay ko hemek. O wama wina a tamdaw maolahay rihaday ko wawa, mihaenay patirengay cangra to palinian a midipot to wawa. Ano dofdofen no wawa koniya palinian i, o pakasoˈlinay ato mikangodoay to wama wina. Kita i, cipinang ato midofdof to palinian no kakarayan Wama, tada o kalimlaan a demak koni. Mihaen ko demak ita o maolahay ato mikangodoay Cingraanan, hanaca o saka ciepoc no mita konini. (Isaya 48:​17, 18) Ano caka pidofdof ci Yihofaan, salikor o sakaroray no niyah.​—Kalatiya 6:​7, 8. w20.02 9-​10 fiedac 8-9 fatac

Oha nanamen ita ko taˈarawan ni Apikail, ano maˈaraw ko tao mamararaw ko demak, timolo a mihadak to limoˈot. (ˈOlic 141:5) Ira ko mikangodoay ato sidaˈitay a waywayan ita, timolo a mihadak to limoˈot i tamdaw, paihkalay to soˈlinay a widang kita. (Taneng 27:⁠17) Misaaliay ko malohemay malitengay to timolo, pasayra i mararaway a salikaka mihadak to limoˈot. (Kalatiya 6:1) Soˈlin cowa ko malefotay ko malohemay malitengay, misaaliay to sapatalipaˈelal no tao to latekay, kawra oha tatimolo a mirikec to misaaliay to limoˈot a tamdaw. (2 Timoti 4:2; Titus 1:9) Sakadademaken no malohemay malitengay ko saka caciyaw a inaneng, mihadidi damsay a padama to tao. Mihaen ko demak nangra pakayniay kaolah to salikaka. (Taneng 13:24) Kawra sakakaay kaciharatengan nangra o papaˈdil ci Yihofaan, mansa mamiˈading cangra to palinian no Kawas, hoeca ka madokaˈ ko kasakopang.​—Dmak 20:28. w20.03 20 fiedac 8-9 fatac

Palaˈaˈideman ni Yihofa ci Mosi a milidong to Israil a tamdaw, i hacowaay Cingra misakadademak ci Mosian hani? Itiniay “mapakafanaˈ cingra to masamaamaanay a sifanaˈ no Icip” ikorto i, pakaremoayto saan miharateng han? (Dmak 7:​22-​25) Cowa, misalofan ni Yihofa ci Mosi, malo misapoeneray ato damsayay a tamdaw ikor ngaˈ, misatapang a misakadademak cingranan. (Dmak 7:​30, 34-​36) Pafelian ni Yihofa ci Mosi to timolo, ngaˈay tomireng i ˈaˈayaw no ˈakawangay ko saaroˈan a mikowanay no Icip milasil to araaw no Kawas. (Kasadakan 9:​13-​19) Mikitini, mahapinangay ita misakadademakan ni Yihofa ko misaˈicelay mitodong ato mitadiˈecay Cingranan a tamdaw. Mihaenay, misakadademakan ni Yihofa ko sikawdan Ningra midemak to adihayay a demak. Samanay Cingra misakadademak tisowanan hani? Mikitiniay i kalim iso ko piˈarawan. (Kolosay 1:​29) Ano makahi kiso patafang to niyah, o mamalo palaˈosiay to araaw ni Yihofa a tamdaw kiso, tinakoen, malo fanekfekay mitosilay, ngaˈayay a singsi, matenesay a matayalay, pairaay to sahinom a tamdaw, anca malo ngaˈayay widang no tao. w19.10 21 fiedac 5 fatac; 25 fiedac 14 fatac

Ngaˈayay widang wa padama kitanan madimadi ci Yihofaan. Ano sapicawmaˈaw kita to ngaˈayay widang, salakatho kita mikangaˈay to tao. (Matay 7:​12) Pakalalokay ko Fangcalay Cudad kitanan misaka dademak to toki ato ˈicel padama to tao, mangalef ko ‘manikaway a tamdaw.’ (Ifiso 4:​28) Ano fanekfek kita padama to tao, wa lipahak ko niyah. (Dmak 20:35) Ano tahasiˈayaw kita to sapalifet i, wa midama ko widang, padama kitanan rihaday ko falocoˈ. Mahecad ci Ilihuan misongilaˈay cingra mitengil to pilomal ni Yopu to pasangaray no niyah, anini o widang ita wa mahecad ci Ilihuan mihadidi mitengil to nafalocoˈan ita. (Yopu 32:4) Manaokaniw, cowa ko mamisaali kita to widang patado a misaˈosi, kawra o citanengay a tamdaw wa micada to nai Fangcalay Cudad a sapaini no widang. (Taneng 15:22) Mahecad to Hongti ci Tafitian misapoener ko falocoˈ micada to sadama no widang, pahecaden ita cingranan, misapoener ko falocoˈ a micada to sadama no widang. (2 Samuil 17:27-​29) O soˈlinay widang tada o sapatelong ni Yihofa!​—Yakop 1:​17. w19.04 11 fiedac 12 fatac; 12 fiedac 14-​15 fatac