Saka 1 Folad

Ci Timoti pakasoˈlin cingra to Kawas, pakayniay pakasoˈlin to o soˈlinay kimad ko sowal no Fangcalay Cudad, oniya kimad miocoray cingranan malo widang ni Yihofa. Ano kitato o mamisongilaˈ a micekiw to Fangcalay Cudad, pakasoˈlin to milingatay ci Yihofaan a sifanaˈ no Fangcalay Cudad sahtoay o soˈlinay kimad. O hahapinangen iso ko tolo taˈeneran a soˈlinay kimad: Saka 1, o Misangaˈay a Tatapangan ci Yihofa. (Kasadakan 3:​14, 15; Hipray 3:4; Paˈarawan 4:​11) Saka 2, mikayatan no Kawas ko tamdaw mitilid to Fangcalay Cudad, sapafeli to polong tamdaw a cudad. (2 Timoti 3:​16, 17) Saka 3, milikakawaan ni Yihofa ko cecay ˈopo a tamdaw, itini sakayat ni Kristo midoko Cingraanan, oniya ˈopo o Misawacayay Tamdaw ni Yihofa. (Isaya 43:10-​12; Yohani 14:6; Dmak 15:14) Mafanaˈ to polong a Fangcalay Cudad ngaˈ pakasoˈlin toniya taˈeneran no soˈlinay kimad cowa kasaan. O patosokan iso saka dademaken ko ‘taneng’ a mihapinang to o soˈlinay kimad ko minanaman iso.​—Loma 12:1. w20.07 10 fiedac 8-9 fatac

O sapairasol i Paˈarawan masowalay ko taˈangayay ˈopo a ririˈ iraay ko ‘laway no tamdaw,’ ‘hato cipohongay ko fongoh,’ wa pasemsem cara toya ‘awaay ko salinaˈ no Kawas i katotong no laway a tamdaw’ lima folad (koˈedaw no ˈorip no ririˈ). (Paˈarawan 9:​4) O masowalay no Paˈarawan a ririˈ oya tatayra i kakarayan a Krisciyang ko mitoroˈan, timoloay cangra milasil to sasawkit no Kawas toniya ciraraway a hekal, adadaan nanay ko hekal a tamdaw. O masowalay no Yoil ato Paˈarawan mitaypiyawan no ririˈ cowa kalecad. Itini Fangcalay Cudad, o malecaday a demak latekay mitaypiyaway to cowa ka lecad a tatodong. Tinakoen, sowal i Paˈarawan 5:5 ci Yis o ‘layong no finacadan no Yuta,’ kawra sowal i 1 Pitiro 5:8 ci Satan o ‘miletohay a layong.’ w20.04 3 fiedac 8 fatac; 5 fiedac 10 fatac

O sikawdan ni Sara ci Hakar, ikor malo fafahiyay ni Apraham. Ikor no mapoyapoy cingra misakahmaway ci Saraan, samanen awaay ko wawa ni Sara. Tada pakidemayto ci Hakar, orato milaplapan ni Sara cingra. (Satapangan 16:​4-6) O pinengneng no kalo tamdaw, misatakaraway ci Hakar, matatodongayto a malaplap, kawra cowa pihaen ko pinengneng ni Yihofa cingraanan. Miocoran ni Yihofa ko coyoh padama cingraanan misalof to waywayan no niyah, palemedayho cingraanan. Itiyaayto a mafanaˈ ci Hakar, o padotocay a misinanot ci Yihofa cingraanan, cipinangay to kihcod a malifaay ningra. Mitemeray to falocoˈ ningra, somowal to ‘maˈaraway ni Yihofa ko kihcod,’ pangangan Cingranan to ‘pakaˈaraway takowanan a Kawas.’ (Satapangan 16:​7-​13) O maanan ko maˈaraway ni Yihofa i tireng ni Hakar hani? Cipinangay ci Yihofa to kalengawan ato malifaay ni Hakar. Manaokaniw, cowa pihai ci Yihofa ira ko lalangian ni Hakar a misakahmaw ci Saraan, kawra misimsimay to nafalocoˈan ni Hakar, mansa sidaˈit a micada cingraanan. w20.04 16 fiedac 8-9 fatac

Sowal ni Pawlo o mamirienang maemin ko Krisciyang to cacikayen sanay. (Hipray 12:1) Sapakalowidaw a comikay, milifok to sapalifon ni Yihofa, ano hakowato ko mihecaan, ngaˈay anca tatiih ko tireng, o tatahatolas a mihadidi, milaheci to cacikayen. (Matay 24:13 ) O ngaˈayay a taˈarawan ita ci Pawlo, samanen malaheciayto ningra a comikay ko cacikayen. (2 Timoti 4:​7, 8) Mihaenay, o maanan kora misowalan ni Pawlo a cacikayen hani? Tano masasiayay a onto nolitengan a Krisiya ci Pawlo a mitadtad to kalimlaan a kimad. (1 Korinto 9:​25-​27; 2 Timoti 2:5) Kinapinaay cingra patinako to kaˈorip no Krisciyang to misiayay a comikay. (1 Korinto 9:​24; Filipi 3:​14) Patafang to tireng micada to paputisem ko cecay tamdaw i, mirienangayto cingra toni cacikayen. (1 Pitiro 3:​21) Ano malifok ningra ko sapafeli ni Yihofa tahadaˈocay ˈorip i, tahiraayto cingra i patosokan a comikay.​—Matay 25:31-​34, 46; 2 Timoti 4:8. w20.04 26 fiedac 1-3 fatac

‘O soˈlinay a tatiˈeren ko Tapang. Wa patongalen Ningra ko ˈicel namo, midipot tamowanan eca ka madokaˈ noya mariˈangay.’ (2 Tisalonika 3:3) Sasamaan ci Yihofa midipot kitaanan hani? Patadoay ci Yihofa kitaanan misaday to sapilood a rikoˈ, ho ngaˈay kita miconged to saˈodis ni Satan. (Ifiso 6:​13-​17) Tanektekay koniya sapilood a rikoˈ, wa masongilaˈ ko pidipot kitaanan. Kawra sapilifokaw kita to sadipot, cacaˈedongen ko polong a sapilood a rikoˈ, hanaca ano samaanto cowa ka ngaˈay hepolen. Tinakoen, soˈlinay kimad a safaked mitaypiyaway to soˈlinay kimad no Fangcalay Cudad. Hano kalimlaan koniya safaked hani? Samanen ‘o wama no misamangahay’ ci Satan. (Yohani 8:​44) Mafanaˈay milipalaw cingra, pinaay patek miheca ko nalifetan, ‘miapohay to polong a tamdaw no hekal.’ (Paˈarawan 12:9) Kawra, o mamidipot ko soˈlinay kimad no Fangcalay Cudad kitaanan eca ka lipalaw ningra. Sasamaan ko demak ita, misafaked to soˈlinay kimad hani? Wa minanam kita to pakayniay ci Yihofaan a soˈlinay kimad, wa ‘itini sakayat no fangcalay saocor, mitoor to soˈlinay kimad a midoko Cingranan.’ Roma i, ano samaanto ko pakayraan, malo soˈliˈlinay a tamdaw kita.​—Yohani 4:​24; Ifiso 4:​25; Hipray 13:18. w21.03 26-​27 fiedac 3-5 fatac

Hano mikiriwiˈ a makapah koniya sera, samanen o maroˈay itira a tamdaw o midokoay ci Yihofaan. Kawra mikitini saka 33 miheca Kocinsic misatapang, ‘fangacalay pala’ cowato ko soˈlinay pala ko mitoroˈan, samanen itiniay i cowa kalecad a kitakit ko kitiraan no finawlan no Kawas. O aniniay ‘Fangcalay palaˈ o fafekangay no sera a likakawa ni Yihofa, i lalomaˈay a tamdaw midemakay to masakenaay a tayal, mahawpay ko masaˈopoay ato mitosilay a midoko to Kawas. Itini pahererekan a tatokian, o kaˈamisay hongti kinapinaay ‘micomod i Fangcalay pala.’ Tinakoen, ikor no malo kaˈamisay hongti ko Naci a Towic mipalakay a mipatay to finawlan no Kawas, itini Saka Tosa Lalood no Hekal matongalay ko kariˈang. Mahererek ko saka tosa lalood, o Suwiay ato kapot ningra malo kaˈamisay hongti, mipalakay cangra to finawlan no Kawas, paholiw to salikaka ita tayra i Sipoliya. w20.05 13 fiedac 7-8 fatac

ˈAyaw no tayni i fafekang no sera ci Yis i, o roma tamdaw malawidangayto ni Yihofa. Masalalomaˈay koya matomesay ko pakasoˈlinay falocoˈ a Apraham, ikor no mapatayay cingra 1000 miheca, kamayan ‘o widang Ako’ sanay ci Yihofa cingranan. (Isaya 41:8) Mihaenay, soˈlin mapatayayto ci Apraham, kawra kamayan o maˈoripay i harateng no Kawas, o widang cingra sanay ko pinengneng ni Yihofa. (Luka 20:37, 38) O roma tinakoan ci Yopu. Kina cecayay, itini ˈaˈayaw no ˈalomanay coyoh somowalay ci Yihofa, ci Yopu o ‘marocekay ko madimadi, mangodoay to Kawas, miliyasay to tatiihay demak.’ (Yopu 1:​6-8) Roma i ci Taniil. Madimadiay matayal ci Yihofaan cingra itiniay i cowa pidoko to Kawas a kitakit maedeng 80 miheca, samaanay ko pinengneng ni Yihofa cingranan hani? Soˈlin itiya o malitengayto cingra, kawra kina toloay ko coyoh somowal to ‘tada masakalimlaan’ ko pinengneng no Kawas cingranan. (Taniil 9:​23; 10:11, 19) Makalimay ci Yihofa mipatikol a paˈorip toniya mapatayay a ngaˈayay widang.​—Yopu 14:15. w20.05 26-​27 fiedac 3-4 fatac

O cecay ngaˈayay a pacekiwan malalokay minanam to palinian no Kawas alatek, ngaˈayay koniya palinian saan, kawra wa pakayni cingra i kaolah ci Yihofaan midofdof Cingraanan han? Haratengen ko tinakoan ni Atam aci Ifa, ihkalay ko kafanaˈ nangra to sarikec ni Yihofa, kawra cowa ka soˈlin ko falocoˈ maolah Cingranan. (Satapangan 3:​1-6) Mansa, o pipasifanaˈ aca ita to pacekiwan to moecelay palinian ato safalod no Kawas cangoˈotayho. O palinian ni Yihofa ato pisaali sahtoay o ciepocay i kitaanan. (ˈOlic 119:97, 111, 112) Kawra ano sakafanaˈaw ko pacekiwan tonini, wa pakahapinang to mikitiniay i olah ko pipatireng ni Yihofa toniya palinian. Mihaenay ngaˈayay licayen ita cangra: “Harateng iso hano palimoˈoten no Kawas ko tamdaw midemak to cecay demak, anca congeden ko tamdaw midemak to cecay demak hani? Paihkalay koni to maanan a capeling ni Yihofa hani?” Ano kayaten ita ko pacekiwan miharateng to masamaanay a Kawas ci Yihofa, anca padama cangranan maolah to ‘Yihofa’ sanay a ngangan, wa ngaˈay mitemer to falocoˈ nangra. Mihaen, cowa ko kaolah aca nangra to mananamay a palinian, wa soˈlin ko falocoˈ maolah to pafeliay toniya palinian a Yihofaan. Wa patanektek to pakasoˈlinay falocoˈ nangra, misiˈayaw to sapalifet wa ngaˈay mitafo to mihadidiay.​—1 Korinto 3:​12-​15. w20.06 10 fiedac 10-​11 fatac

O papaihkal kita to mihadidiay, samanen sapatikolaw ko cecay tamdaw to kalawidang aci Yihofaan misaaliay to toki. ˈAlomanay na mihawaday mitosil a tamdaw sanay ko sowal, itini pisaliyaliyaw no malohemay malitengay ato roma salikaka a milisoˈ cangranan ikor i, palidlid sanay cangra a mafalic. Cecay itiniay Tongnanya (Kowaping) fafahiyan salikaka ci Nansi, sanay: “O cecay ngaˈayay widang i kasakopang taˈangayay ko sapadama takowanan, maolahay cingra takowanan, malecaday o malikakaay kami. Milengoay cingra to kahemekan niyam malacafay i salakat. Mihadak kako to nafalocoˈan a harateng i, mihadidiay cingra a mitengil, pafeliay takowanan to ngaˈayay sapaini. Ano hacowato makahiay cingra a padama, tada o soˈlinay a widang ako.” O siniˈadaay falocoˈ malecaday o ngaˈayay sapaiyo, ngaˈayay miadah to adadaay a falocoˈ. O roma mihawaday mitosil a tamdaw na midokaˈan no tao i kasakopng i salakat, tahaniniay kamayanho a maketer. O hatiniay masofaway harateng milowanay to sapatikolaw a ˈicel nangra minokay i tatihi ni Yihofa. Mapakararaway ko niyah sanay ko roma tamdaw miharateng, misaaliay to mamitengil to nafalocoˈan nangra a tamdaw, cipinang to nafalocoˈan nangra. w20.06 26 fiedac 10-​11 fatac

Ano malaˈosi ko piconged iso to sakayhid, wa matongal ko katanektek. Roma i haharatengen iso, o mararaway a pinengneng to madadiˈiyay sahtoay o mikitiniay ci Satanan. Ano caka fiyor no hatiniay a pinengneng kiso, o ‘pakalowiday toya mariˈangay.’ Makahiay kita micada to pinengneng ni Yihofa to raraw, wa misaˈicel miliyas to sakararawaw. Kawra, ano soˈlin mararaw kita, wa pasayra ci Yihofaan mitolon, mikifalocoˈ a mihai to mararaway i Cingranan. (1 Yohani 1:9) Ano pakidemay ko raraw ita, wa pasayra malohemay malitengay micangacang to sadama, samanen miocoran ni Yihofa cangra midimokos kitaanan. (Yakop 5:​14-​16) Hamaan padotoc a makesem kita to iˈayaway a raraw. Misamanay? Samanen maolahay ko kakarayan Wama kitanan, miocoray to wawa Ningra mihadak to sapatefoc, sapisodod to raraw ita. Ano somowalay ci Yihofa to mamisodod to soˈlinay a pasasiyor a tamdaw, o mamalaˈosi ko sowal Ningra. Mansa, ano o mananto ko raraw ita i saˈayaw, wa ngaˈay tano makolacay a falocoˈ padadotoc a midoko to Kawas.​—1 Yohani 2:​1, 2, 12; 3:​19, 20. w20.07 22-​23 fiedac 9-​10 fatac

Salakat edengan ci Yihofa ko materekay, kawra cowa ka matoˈol Cingra, cowa pisaali Cingra to papacafayen kamayan a lipahak. Kawra, makalimay Cingra paladaˈ to lipahak no kaˈorip, mansa mikitini i olah a misatapang misangaˈ to maamaan. (1 Yohani 4:​19) Salakat misangaˈan ni Yihofa ko Wawa Ningra ci Yis, dotoc malacafayay toniya Wawa misangaˈ to ‘romaroma a maamaan,’ mahawpay ko masacaˈolay masaemangay a coyoh. (Kolosay 1:​16) Malacafay ci Yis ci Yihofaan a matayal tada lipahakay, o romaroma a coyoh malecaday a lipahak, samanen pakaˈaraway cangra to pisangaˈ ni Yihofa ato ‘Ngaˈayay Sayho’ Ningra ci Yis to maamaan i paro no kakarayan. (Taneng 8:​30) Samanay ko coyoh a paihkal to kalipahak nangra hani? Sowal no Fangcalay Cudad, tiya masangaˈ ko cikiw i, ‘mawahoay a mahemek’ cangra. Ikorto, misangaˈ ci Yihofa to kihcod i fafekang no cikiw, mangalef ko tamdaw, tada lipahakay cangra! (Yopu 38:7; Taneng 8:​31) O kihcod misangaˈan ni Yihofa paihkalay to olah ato taneng Ningra.​—ˈOlic 104:24; Loma 1:​20. w20.08 14 fiedac 1-2 fatac

Misangaˈ ci Yihofa kitaanan mafanaˈayto a maolah to tamdaw, mitokelay kaolahen no tao. Cecay ci Tanilo a salikaka sanay: “Samanen o Misawacayay Tamdaw ni Yihofa misetiˈay ko sofitay takowanan, mapoˈiyay, miroeroayho. Tada matalaway kako itiya, masamsamay sanay ko harateng.” Kaˈintelen no tamdaw o kasomadan, kawra cowa ka fahka kita, samanen maharekayto ci Yis pasowal o kakaˈintelen no tamdaw kita. Hano kaˈintelen no tamdaw ko nisawawaan ni Yis hani? Samanen malecaday kita ci Yisan ‘cowa ko noniya hekal.’ (Yohani 15:17-​19) Soˈlin mikangodoay kita to mikowanay no hekal, kawra cowa pidoko kita to kitakit ato mitaypiyaway to kitakit a dafong. Dengan ci Yihofa ko midokoan ita, dengan o fadangalan Ningra ko midopoan, ci Satan ato ‘teloteloc’ ningra awaay ko fadangalan ni Yihofa mikowan sanay. (Satapangan 3:​1-5, 15) Pasowalen ita ko tamdaw dengan o Hongti Kitakit no Kawas ko hatokel no tamdaw, hanaca cato ka halafin wa palaˈafoento noniya Hongti Kitakit ko polong misaˈadaay a lekakawa. (Taniil 2:​44; Paˈarawan 19:19-​21) Pakaynien i misamimingay tamdaw o ngaˈayay lihaf konini, kawra o tatiihay tamdaw cowa ka olah mitengil to mahaenay a lihaf. w21.03 20 fiedac 1-2 fatac

Mihaydaan ni Yihofa ko fafahiyan salikaka, kalimlaan ko tayal nangra i kasakopang. Paihkalay cangra to taneng, pakasoˈlinay, fanekfekay, timoloay, ato hinapaladaˈay, makapahay ko demak, patirengay to ngaˈayay taˈarawan ita. (Luka 8:​2, 3; Dmak 16:14, 15; Loma 16:​3, 6; Filipi 4:3; Hipray 11:11, 31, 35) Itini kasakopang ni Yihofa ˈalomanay ko matoˈasay salikaka, pakahemekay koni kitaanan. o matoˈasay salikaka pakayni ka matoˈas matoˈasto adihay ko adada no tireng, kawra oniya matoˈasay Krisciyang misarocoday a mirienang to mitosilay tayal, hanaca pakalalok ato pahatatanam to tao. Mikitini nalifetan nangra adihayay ko mamananam ita, itini pinengneng ni Yihofa ato kita tada kalimlaan cangra! (Taneng 16:31) Itini kasakopang ˈalomanay ko kalimlaan a kaemangay. Makowanay ni Satan koniya hekal, matomesay ko tatiihay a harateng, itini ko kaemangay i mahaenay pakayraan a lomahad, cowa ko madoloay. Kawra kamayan cangra tawlik a pacaˈof i kasaˈopoan, fanekfek a mitosil, timolo a miˈading to pihakelongan no niyah, tada pakalalokay kitaanan. Kanonoˈan a kaemangay, o sadama namo i kasakopang tada kalimlaanto!​—ˈOlic 8:2. w20.08 21-​22 fiedac 9-​11 fatac

Misatapang kita mitosil, pasowal to tao o Misawacayay Tamdaw ni Yihofa ko niyah, misafelitay ko paro no lomaˈ alatek, milikafay ko widang alatek, caay kakahi mitengil ko mitosilan a tamdaw. Sasamaan kiso palahad to timolo hani? Saka 1, pakasoˈlin to itiniay i kakarayan ci Yis mikayat to mitosilay a tayal. (Yohani 16:33; Paˈarawan 14:​14-​16) Saka 2, pakasoˈlin to dadimokosen ni Yihofa kiso. (Matay 6:​32-​34) Ano pakasoˈlin kiso toniya tosa, wa matongal ko timolo. Pasowalen iso ko paro no lomaˈ ato widang malacafay kiso to Misawacayay Tamdaw ni Yihofa a minanam to Fangcalay Cudad halo mirienangay to saˈopo, paihkalay to iraay ko pakasoˈlin iso. Sapitooraw to moecelay palinian ni Yihofa, taˈangayay ko kafalic iso i nokaˈorip alatek, paihkalay konini to iraay ko pakasoˈlin ato timolo iso. Padadotoc kiso misaˈicel palahad to timolo, wa ngaˈay pakasoˈlin, ‘ano talacowato kiso, wa kalacafay ko Kawas iso ci Yihofa tisowanan.’​—Yosuwa 1:​7-9. w20.09 5 fiedac 11-​12 fatac

Inanengay ko demak no Hongti ci Asa, misarocoday to falocoˈ a mitadiˈec ci Yihofaan, ano rihaday anca pasangar ko pakayraan, madimadiay cingra a midoko to Kawas, ‘hakelong no kaˈorip madimadiay ci Yihofaan.’ (1 Hongti 15:14) Midemakay cingra to maanan hani? Mikoracan ningra ko mararaway pidoko i Yutaya kitakit. Sanay ko Fangcalay Cudad: ‘Palasawadan ningra ko pipatoˈayaan ato cadada no ˈalafang a Kawas, pelpelen ko fokeloh a hecek, tastasen ko samiyay.’ (2 Rayray 14:​3, 5) Palasawaden ningra ko kacingangan no mamo ningra tono fafahi no hongti, samanen pakalalokay ci Maciya to tamdaw midoko to samiyay. (1 Hongti 15:​11-​13) Cowa ko pifalah aca ni Asa to samiyay, padamaayho to Yutaya tamdaw miliyaw midoko ci Yihofaan. Orato, palemedan ni Yihofa ci Asa ato finawlan Ningra, paira to dipayalay a tatokian, moetepay miheca ‘awaay ko lalood, dipayalay ko kitakit.’​—2 Rayray 14:​1, 4, 6. w20.09 14 fiedac 2-3 fatac

Patorod to tao misimaw to kalimlaan a dafong, marariday maˈaraw i kaˈorip a demak. Tinakoen, micokingay kita to payci i kingko, samanen telien ko payci i kingko masimaway, cowa ko mamasiday, cowa ko mamatakaw. Patalipaˈelalan no tarokos ci Pawlo ci Timoti, pafeliay ko Kawas cingranan to kalimlaan a sapatorod, mahawpay ko milingatay to araaw no Kawas a matatodongay a sifanaˈ, ato cecay kalimlaan a tayal, “patenak to kimad no Kawas,” “ka pidemak to paratohay a tayal.” (2 Timoti 4:​2, 5) Palimoˈotan ni Pawlo ci Timoti ka pisimaw to patorodan. Malecad ci Timotian, milifokay kita to kalimalaan a sapatorod no Kawas. Pafelian ni Yihofa kita to kalimlaan a Kimad no Fangcalay Cudad. Hano kalimlaan ko soˈlinay kimad, samanen o soˈlinay kimad padamaay kitaanan mafanaˈ sasamaan patireng to kalawidang ci Yihofaan, ato sasamaan lipahak ko kaˈorip. Micada kita to soˈlinay kimad halo mitoor to soˈlinay kimad a maˈorip, cowato ko mamalipalaw no mararaway a kimad, cowato ko mamidemak to malafoay a demak.​—1 Korinto 6:​9-​11. w20.09 26 fiedac 1-3 fatac

Mahapinang no pacekiwan to pakasoˈlinay ato maolahay kiso to soˈlinay kimad, wa matemer ko falocoˈ, miharateng to ciepocay ko minanaman no niyah. Alatek ngaˈayay pasowalen iso ko pacekiwan, misaka dademak to safalod no Fangcalay Cudad samanay misalof to kaˈorip iso, mihaen o mamahapinang ningra wa ira ko sapadama no Fangcalay Cudad cingranan. Ano misikay pacekiw i, ngaˈayay pasowalen iso o roma salikaka samanay miremo to malecaday a pasangaray. O pacekiwan iso ano mikitini taˈarawan no salikaka micada to sapakalalok, ngaˈayay tahidangen iso cingra mirienang to kalalengo namo. Padamaen ko pacekiwan mihapinang, misaka dademak to safalod no Fangcalay Cudad wa ngaˈay misalof to kaˈorip no niyah. Ano ciramodayto ko pacekiwan iso, minanamay ko ramod ningra to Fangcalay Cudad hokira? Ano cowaho, ngaˈayay tahidangen iso ko ramod ningra mirienang to kalalengo namo. Pakalaloken ko pacekiwan paladaˈ to mananamay a sifanaˈ i paro no lomaˈ ato widang.​—Yohani 1:​40-​45. w20.10 16 fiedac 7-9 fatac

Mitooran ni Yosif aci Mariya ko sakayat ni Yihofa to wama wina a midemak, palahad ci Yisan malo kaolahan no Kawas a tamdaw. (Limoˈot 6:​6, 7) Tangongolay ko olah nangra ci Yihofaan, padamaayho to wawa malo sakakaay a patosokan ko kaolah ci Yihofaan. Marariday ci Yosif aci Mariya miˈorong to wawa mirienang to midokoay ci Yihofaan a demak. To lipalipay tayraay cangra i kasaˈopoan no Nacali mirienang to saˈopo, to mihecahecaan tayraay i Yirusalim misalisin to Pitaˈlifan a Lisin. (Luka 2:​41; 4:​16) Itini lalan no sakatayra i Yirusalim, mametan nangra ko toki padama to wawa minanam to likisi no finawlan no Kawas, i fatad tayraay i masowalay no Fangcalay Cudad a pala minengneng. Ikor, matongalay ko adihay no wawa ni Yosif aci Mariya, sapadotocaw toniya ngaˈayay nanaman cowa ko madoloay, kawra tada ciepocay ko pihaen nangra to demak. Mipiliˈan nangra paitinien i salakatay no kaˈorip ko midokoay to Kawas a demak, mansa paro no lomaˈ ngaˈayay ko kalalaˈed a miingid ci Yihofaan. w20.10 28 fiedac 8-9 fatac

Ano mirienang kiso to pipacekiw no tao i, ˈayawho misongilaˈ misaday to lalakaw. Masowalay no mikiriwiˈay misakafahay ci Tolin: “Ano misongilaˈ misaday to lalakaw ko cafay, tada mahemekay kako, ano mihaen cingra wa ngaˈay pakalalok to pacekiwan.” Roma i, wa mahapinang no pacekiwan alatek, o pacekiway a singsi ato kiso misongilaˈay misaday to lalakaw, mihaen ngaˈay to cingra minanam to ngaˈayay a taˈarawan namo. Ano cowa ka songilaˈ iso a misaday, ngaˈay palaken ko toki mafanaˈ to kalimlaan no lalakaw. Itini pipacekiw i, kalimlaan ko mitolonay, mihaenay iˈayaw miharateng, ano papitolon ko pacekiway a singsi tisowanan, ngaˈay kiso somowal to maanan, mahaenay a satolon iso wa ira ko epoc. (ˈOlic 141:2) Itini Dipong fafahiyan salikaka ci Hana minanam to Fangcalay Cudad i, miceriday ko pacekiway singsi ningra mitahidang to cecay fafahiyan salikaka mirienang to picekiw. O satolon noniya salikaka caay ka pawan ci Hana, sanay cingra: “Mahapinangay ako tangongolay ko kalawidang ningra ci Yihofaan, sapahecadaw kako cingranan. Itini satolon ningra masowalay ko ngangan no mako, tada ciharatengay cingra takowanan.” w21.03 9-​10 fiedac 7-8 fatac

Mikiˈokay ci Yis ci Pawloan o rarihaday tahira i Loma, kawra o roma Yutaya tamdaw i Yirusalim mihokhokay, sapipatayaw ci Pawloan. Mafanaˈ ko ˈaˈideman no sofitay ci Kerawti Lisiya toniya demak i, masadakay a milidong, tangsolay miocor to sofitay midipot ci Pawloan tayra i Kasaliya. Itira, ‘palimoˈotay ko tapang ci Filis mipalit ci Pawloan i lomaˈ no hongti.’ Mihaenay, awaayto ko pakayraan noya sapipatayaw ci Pawloan a tamdaw a midemak. (Dmak 23:12-​35) Kawra ikor mikotayan ni Fiseto ci Filise a malo tapang, sapakahemekaw cingra to Yutaya tamdaw, milicayay ci Pawloan: ‘Makahi kiso tayra i Yirusalim, itini ˈaˈayaw ako pakayni toniya demak micada to sasawkit han?’ Mafanaˈay ci Pawlo itini Yirusalim o papatayen cingra alatek. Sanay cingra: ‘Pacakaten ako ci Kaysaan!’ Sanay pacaˈof ci Fiseto: ‘Ano pacakaten iso ci Kaysa, ka tayra kiso ci Kaysaan mamaan.’ Ikor tayraay ci Pawlo i Loma, miliyas toya sapipatayaw cingranan a Yutaya tamdaw.​—Dmak 25:​6-​12. w20.11 13 fiedac 4 fatac; 14 fiedac 8-​10 fatac

Makesem ko falocoˈ o matatodongay konini. Tinakoen, o roma tamaw makesemay ko falocoˈ samanen iˈayaw no mafanaˈ to soˈlinay kimad midemakay to mararaway a demak, o roma tamdaw makesem ko falocoˈ samanen ikor micada to paputisem midemakay to mararaway a demak. (Loma 3:​23) Manaokaniw, sapidemakaw kita to matatodongay a demak, kawra “soˈlinay adihay ko patelac no mita a maemin.” (Yakop 3:2; Loma 7:​21-​23) Soˈlin cowa ka olah kita to makesemay a falocoˈ, kawra o ngaˈayay kora harateng, samanen o makesemay a falocoˈ micorohay kitanan misalof to mararaway, misetek to falocoˈ ecato piliyaw mararaw. (Hipray 12:12,13) Ano maharekayto pasasiyor kita, paihkalayto ci Yihofa misododan Ningra kita, ano padadotocho kita makesem to iˈayaway a raraw, mihaen o pakidemay a makesem ko falocoˈ. O tatiihay ko hatiniay makesemay a falocoˈ. (ˈOlic 31:10; 38:​3, 4) Haharetengen, ano cowa pisawad ci Yihofa kitaanan, sawad han ita ko niyah, mihaen o pakahemekay ci Satanan! Mihaenay, aka pakidem a makesem ko falocoˈ.​—Nengnengen ko 2 Korinto 2:​5-7, 11. w20.11 27 fiedac 12-​13 fatac

Maˈaraw noniya Lifi a mitiliday to ˈOlic ko tatiihay tamdaw sinowayay ko kaˈorip. Cowa ka ciharateng cingra malecad cangranan midemak to tatiihay demak, kawra kamayan a masemer cangranan. (ˈOlic 73:​2-9, 11-​14) Ano nengnengen hato kadofahay ko kaˈorip no tatiihay tamdaw, haratengay sanay midemak, awaay ko cariraw. Oniya Lifi tamdaw misaaliay tano harateng ni Yihofa a minengneng to demak. Mihaento ko demak ningra i, miliyawayto a rihaday lipahak ko falocoˈ. Sanay cingra pasowal ci Yihofaan: ‘Edengan Kiso, awaayto ko maanan kasemeran ako.’ Malecaday, soˈlin kadofah ko kaˈorip no tatiihay tamdaw, cowa ko mamasemer kita cangranan, samanen ora lipahak nangra ono potal aca, cowa ka halafin. (Patnakay 8:​12,13) Ano masemer cangranan o saka toled ita, mamalahdawho ko kalawidang to Kawas. Ano mahapinang ita iraay ko malecaday noniya Lifi ko harateng noniyah, palecaden cingra midoedo to sidaˈitay a limoˈot no Kawas, hanaca micawmaˈ to midokoay to Kawas a tamdaw. O kalipahak ita ano pakayniay kaira ni Yihofa, o lipahak ita o soˈliˈlinay a lipahak. Mihaen o mamaterek kita i matatodongay a lalan, milifok to ‘soˈliˈlinay a ˈorip.’​—1 Timoti 6:​19. w20.12 19 fiedac 14-​16 fatac

Ano mitolon kita ci Yihofaan i, cowa ko roray aca no falocoˈ ko pasowalen Cingra, paihkalenho ko piakoˈid. Soˈlin pasangar ko pakayraan, haratengen ita o malifokayto ita o maanan a sapalemed, ano mihaen to demak iraay ko epoc. Latekay, pasangaray kiso mihadak to cariraw no falocoˈ. Kawra haratengen, o kantangay a sowal ita “Lidongen kako” ano saan i, tatengilen ni Yihofa koni. (2 Rayray 18:31) Tadiˈecen ko taneng ni Yihofa, cowa ko niyah a taneng. ˈAyaw no Kongyen 8 hahekalan, milooday ko sofitay no Asiriya, tada matalaway ko finawlan no Yutaya. Sapicoˈayaw to Asiriya tamdaw, pasayraay cangra makaniway kawas no Icip micangacang to sadama. (Isaya 30:​1, 2) Mirikecan ni Yihofa cangra, ano caka pasasiyor wa ira ko taˈangayay pades mifekad. (Isaya 30:​7, 12, 13) Miocoran ni Yihofa ci Isaya pasowal cangraanan, samaan ko demak ngaˈ milifok to soˈlinay sadipot. Sanay ci Yihofa: ‘Aka marawraw, sarocoden mitadiˈec Kako, o caciˈicel kamo.’​—Isaya 30:15b. w21.01 3-4 fiedac 8-9 fatac

Padotocay a madimadi ko salikaka ni Kristo, mansa milifokay to sapalifon, tayra i kakarayan malacafay ci Kristoan a mala hongti ato mala saysi. (Paˈarawan 20:6) Itiniay kakarayan taˈangayay a paro no lomaˈ no Kawas maedeng makalimay pakaˈaraw toniya 144,000 a tamdaw milifok to sapalifon. Dotoc, maˈaraway ni Yohani ko kasemeran a sasing. Iraay ko taˈangayay ˈopo a tamdaw milakowitay to Armakiton. Cowa ka lecad i saˈayaway a 144,000 tamdaw, ˈalomanay koni taˈangayay ˈopo tamdaw, hanaca cowa ka saˈosi ko ˈaloman. (Paˈarawan 7:​9, 10) ‘Cirikoˈay cangra to kohcalay a rikoˈ,’ paihkalay konini padotocay cangra madimadi to Kawas aci Kristoan, cowa ka mapakadit no hekal ni Satan. (Yakop 1:​27) Mawahoay cangra a somowal, o sakalidong no niyah pakayniay nano demak ni Yihofa ato tofor a siri ci Yis i cangraanan. Itini toniya tatokian, mitatoyay cangra to sarengad, paihkalay konini marenecay ko falocoˈ a lipahak, pakapapotal a mihai o minilnilan ni Yihofa a Hongti ci Yis.​—Nengnengen ko Yohani 12:12, 13. w21.01 15-​16 fiedac 6-7 fatac

Mamalo ngaˈayay a tawki no lomaˈ, o faˈinayan o mamitodong to pakayraan ni Yihofa aci Yis misaka dademak to fadangalan. Ikakaay ko taneng ni Yihofa to cimacimaan, kawra makahiyayho mitengil to harateng no sikawdan Ningra. (Satapangan 18:23, 24, 32) O malefotay ci Yihofa, kawra cowa pisaali Cingra kitaanan a malefot. Cowa ka hatini aca, micelohan Ningra ko kacangoˈotan ita, “padama” kitaanan malaˈosi ko demak. (ˈOlic 27:9; 113:6, 7; Hipray 13:6) Mihaiyay ci Tafiti, saka laˈosi no demak ningra, pakayniay pisapoener ni Yihofa, makahi a padama cingranan. Nohatini, nengnengen ita ko taˈarawan ni Yis. Soˈlin o tapang cingra, o singsi, kawra misawsaway to waˈay no nisawawaan. Sanay ci Yis: ‘Patirengen ako ko taˈarawan, samanay ko demak ako tamowanan, haenen namo ko pidemak.’ (Yohani 13:12-​17) Soˈlin taˈangayay ko fadangalan ni Yis, kawra makahiay talaˈayaw a matayal saki tao, cowa pitala to tao matayal saki cingranan.​—Matay 20:28. w21.02 3-4 fiedac 8-​10 fatac

Kapah salikaka, tanektekay ko tireng namo, iraay ko ˈicel, adihayay ko sapadama to kasakopang. (Taneng 20:29) Ira kamo i kasakopang, tada ngaˈayayto. Ciharatengay kiso malo dama sikawdan alatek, kawra itini pinengneng no tao, kaemangayho kiso, awaay ko nalifetan, cato pakadangar to kalimlaan a tayal saan kiso miharateng. Kawra soˈlin kaemangho kiso, ngaˈayayho a midemak to pina a demak, milifok to pasoˈlin ato pikangodo no salikaka. Kapah salikaka, iraay ko maanan a inaneng iso, ngaˈay padama to salikaka han? Iraay ko inaneng namo. Mahapinangay iso alatek, o roma matoˈasay salikaka makalimay mafanaˈ misaka dademak to pinpan ato tingnaw i picekiw ato masaˈopo. O sifanaˈ iso tonini wa taˈangay ko sapadama to salikaka. Ano o mananto ko demak, malikoen ci Yihofa tisowanan. w21.03 2 fiedac 1, 3 fatac; 7 fiedac 18 fatac

Soˈlin ikaka to faˈinay ko picudadan no fafahi, mikerid to pakalomaˈay pidoko ato roma demak, ono faˈinay a ˈinorong. (Ifiso 6:4) Soˈlin mafanaˈay ko fafahi to mamikerid ko faˈinay i midokoay a demak, kawra sapatanektekaw to pakasoˈlin to Kawas ono niyah a ˈinorong. Mihaenay haw i, o mamihadak cingra to toki micekiw to Fangcalay Cudad, halo misongilaˈ a midotim. Mihaen, o papadotoc cingra mitongal to olah ato pikangodo ci Yihofaan, wa lipahak a midofdof to faˈinay. O fafahi ano pakayniay kaolah ci Yihofaan a padotoc midofdof to faˈinay, wa ikaka ko karenec no falocoˈ toya manaˈayay micada to pikerid a tamdaw. Patirengay cangra to ngaˈayay taˈarawan no kaemangay salikaka. Cowa ko paira aca nangra to rahekeray no lomaˈ, ngaˈayho paira to damsayay a olah no kasakopang. (Titus 2:​3-5) Anini, i lalomaˈ no madimadiay midoko ci Yihofaan a tamdaw, o fafahiyan ko ˈalomanay.​—ˈOlic 68:11. w21.02 13 fiedac 21-​23 fatac

Pakayni paihkal to timolo ato mihadidiay o mikiriwiˈay a taˈarawan ko tarokos ci Pawlo. Soˈlin nolatekay malonayay cingra, kawra mitadiˈecay cingra to sapafeli ni Yihofa a ˈicel, mansa padadotoc a tanektek. (2 Korinto 12:​8-​10; Filipi 4:​13) Ano misapoener ko falocoˈ ita mihai misaaliay ko niyah to sadama ni Yihofa, wa milifok to mahecaday a ˈicel ato timolo miremo to sapalifet. (Yakop 4:​10) Wa ngaˈay pakasoˈlin kita, o sapalifet cowa ko sapisayfang ni Yihofa kitaanan. Sowal ni Yakop: ‘Ano micada to sapalifet i, aka pasowal to: “Palifetay ko Kawas takowanan.” Samanen cowa ka ngaˈay mapalifet no tatiihay demak ko Kawas, cowa ka tano tatiihay demak a palifet Cingra to tamdaw.’ (Yakop 1:​13) Ano pakasoˈlin kita tonini, wa matongal ko piingid toniya sidaˈitay a Wama i kakarayan. ‘Cowa ko mamafalic’ ci Yihofa. (Yakop 1:​17) Padamaan Ningra ko saka 1 hahekalan a Krisciyang milakowit to sapalifet, wa kalacafay Cingra kitaanan milakowit to pasangaray. Mihaenay i, cangacangen ci Yihofa pafeli tisowanan to taneng, pakasoˈlinay falocoˈ ato timolo, wa pacaˈofen Ningra ko satolon iso. w21.02 31 fiedac 19-​21 fatac

Kalawidangen ko pacekiwan. Miceridto mirienang to saˈopo ko pacekiwan i, padotocen ciharateng cingranan. (Filipi 2:4) Ano mafalicayto cingra i, ngaˈayay pakahemeken cingra. Ngaˈayay licayen cingra samanay ko harateng minanam to Fangcalay Cudad, anca o pakayraan no lomaˈ ato katayalan, kawra hamaan milicay to kangodoan a sowal. Ano matongal ko kasasowal namo, wa matongal ko kafanaˈ cingranan. Ngaˈay malawidang to pacekiwan, ngaˈayto pakalalok cingranan macakat, malaˈosi ko patosokan patafang to tireng micada to paputisem. Itini padadotoc macakat ato kafalic no pacekiwan a tatokian, padamaenho iso cingra ira ko masalalomaˈay no kasakopang saan ko harateng. Cecay a pakayraan i tahidangen cingra tayni i lomaˈ micawmaˈ. (Hipray 13:2) Roma i, ikor no mala mitosilay ko pacekiwan, ngaˈayay tahidangen iso cingra malacafay mitosil. Itini Pracil salikaka ci Tiyake sanay: “Maharatengay ako ˈalomanay salikaka mitahidangay takowanan kalacafay cangranan mitosil, o sangaˈayay a pakayraan mafanaˈ to salikaka. Ikor adihay ko mananamay ako, matongalayho ko piingid ci Yihofaan aci Yisan.” w21.03 12 fiedac 15-​16 fatac

Palimoˈotan ni Yis ko nisawawaan mikaolah to ˈada nangra. (Matay 5:​44, 45) Mihaen ko demak madoloay han? Cowa. Kawra tiˈeren ko fangcalay saocor no Kawas, wa madangar ita. O minaroˈan no fangcalay saocor mahawpay ko olah, ato mihadidiay, sidaˈitay, damsayay, pakaˈmetay to tireng. (Kalatiya 5:​22, 23) Oniya capeling wa padama kitanan milowid to ˈintelay. ˈAlomanay misafelitay a tamdaw ikorto mafalicay ko waywayan, samanen maˈaraway ko faˈinay, fafahi, wawa anca fiyaw paihkalay toniya makapahay capeling no Krisciyang. Itini lalomaˈ nangra iraay ko malo kanonoˈan salikaka ita. Mansa, ano pasangaray kiso maolah to ˈintelay tisowanan a tamdaw, wa cangacangen ko Kawas pafeli to fangcalay saocor tisowanan. (Luka 11:13) Ngaˈay kiso pakasoˈlin, ano mitoor to limoˈot no Kawas a midemak, sahtoay o ngaˈayay. (Taneng 3:​5-7) Taˈangay ko ˈicel no ˈintelay, taˈangay ko pidokaˈ to tamdaw. Kawra ikakaay ko ˈicel no olah, wa milowid to falocoˈ no tao, ngaˈay pakahemek to falocoˈ ni Yihofa. Kawra, o misafelitay a tamdaw padadotoc miˈintel kitaanan, kamayan kita ngaˈay lipahak ko falocoˈ. w21.03 23 fiedac 13 fatac; 24 fiedac 15, 17 fatac

Misowalan no sapairasol no Yoil o pilood no ˈada. (Yoil 2:​1, 8, 11) Sowal ni Yihofa wa mikerid Cingra to ‘taˈangayay sofitay’ (sofitay no Papilon) mitefoc to cowa ka madimadi a Israil tamdaw. (Yoil 2:​25) Panganganan ni Yihofa ko sofitay no Papilon to ‘kaˈamisay a sofitay,’ samanen mikitiniay cangra i kaˈamis no Israil a mifekad to lalood. (Yoil 2:​20) O sofitay nangra malecaday to masieroday ko rayaray a ririˈ, sowal ni Yoil ‘timoloay canira talaˈayaw, micomod i niyaroˈ, . . . mikodapol i lomaˈ, malecad o mitakaway pakayra sasingalan a micomod.’ (Yoil 2:​8, 9) Haratengen iso koniya pakayraan hena? Miedefay ko sofitay no Papilon, sapiyapiyat sanay ko fonos, awaay ko pilimekan no cowa ka madimadi a Israil tamdaw! Itini ˈayaw no kongyin 607 miheca, milooday ko sofitay no Papilon to Yirusalim, oya pakayniay i ririˈ a sapairasol no Yoil malaˈosiayto. Sowal no Fangcalay Cudad: ‘Mikeridan no Kawas ko hongti no Papilon a tamdaw milood cangraanan . . . ano pakalongayto, limocedan, anca matoˈasay, malonayay, caay ka siniˈad a cangra.’​—2 Rayray 36:17. w20.04 5 fiedac 11-​12 fatac