Saka 2 Folad

Wa misarocod kita a cipinang to salikaka. Ngaˈayay malacafay cangraanan mitosil, ˈayaw ato ikor no saˈopo masasowal cangranan, anca tahidangen cangra a mitahka. Mihaen, wa mahapinang iso: Cecay fafahiyan salikaka maomoyay, ˈarawhan o mangodoay, cecay faˈinayan salikaka maolahay to sinowayay, ˈarawhan makahiay a paladaˈ, maosoyayto ko cecay lalomaˈan masaˈopo, ˈarawhan misafelitay ko salawina cangraanan. (Yopu 6:​29) Manaokaniw, cowa kangaˈay kita ‘hina capid to demak.’ (1 Timoti 5:​13) Kawra ano cipinang kita to salikaka ato malifaay nangra, wa matongal ko kasiniˈada cangraanan. Ano mapiliˈ kiso minengneng to cecay salikaka i kasakopang, tanamen mitongal to kafanaˈ cingraanan, mihaen o papatado cingraanan miharateng. Mankora, mamisadak to ˈicel, kawra ano tooren ita ko sowal no Fangcalay Cudad ‘misakakahad to falocoˈ,’ wa malecad ci Yihofaan maolah to ‘masakenaay a tamdaw.’​—2 Korinto 6:​11-​13; 1 Timoti 2:​3, 4. w20.04 16-​17 fiedac 10-​12 fatac

Itini ˈayaw no kinafalah a dadaya, patalipaˈelalan ni Yis ko nisawawaan masasiolah. Mafanaˈay ci Yis, o cowa pisateked a olah wa padama to nisawawaan a makelec, milowid to ˈintelay. Haratengen ita ko tinakoan no Tisalonika kasakopang. Oniya kasakopang misatapang tomireng micadaayto sapalak, kawra padotocay a madimadi ko salikaka, paihkal to ciolahay falocoˈ, patirengay to ngaˈayay taˈarawan. (1 Tisalonika 1:​3, 6, 7) Pakalalokan ni Pawlo cangra padotoc paihkal to olah, ‘masongilaˈ ko pidemak.’ (1 Tisalonika 4:​9, 10) O mahaenay a olah ngaˈayay pakalalok ato mihinom to matoleday a tamdaw, midama to malonayay tamdaw. (1 Tisalonika 5:​14) Soˈlinay cangra mitoor to sapaini ni Pawlo a midemak. Mansa ikor no cecay miheca, itini saka tosa a tikami ni Pawlo sanay, ‘o olah nangra to salikaka padotocay a matongal.’ (2 Tisalonika 1:​3-5) O olah to salikaka padamaay cangranan itini pasangaray pakayraan ato sapalak padotoc a mihadidi. w21.03 22 fiedac 11 fatac

Ano sapilifokaw kita to tahadaˈocay a ˈorip, wa mitoor to palinian no Krisciyang maˈorip. (Dmak 20:24; 1 Pitiro 2:​21) Kawra, ci Satan ato hekal a tamdaw mitokelay kitaanan ‘mahecad cangranan ko kaˈorip.’ (1 Pitiro 4:4) Malikafay cangra to kaˈorip ita, sowal sa ngaˈayay ko ˈorip nangra, pairaay to pasalat sanay, kawra sahtoay o mangah konini. (2 Pitiro 2:​19) Mipiliˈ kita to masamaanay a kaˈorip tada kalimlaan! Cowa ka ciharateng ci Satan materek kita i kaemingay ‘sakaˈorip a lalan,’ tokel ningra malecad kita o ˈalomanay tamdaw, comikay i kakahaday a lalan. Hato sinowayay comikay toniya lalan, kawra o ‘sakapatay a lalan’ konini. (Matay 7:​13, 14) Ano sakaterekaw kita i moecelay a lalan, oha mamitadiˈec ci Yihofaan ato midofdof Cingraanan. w20.04 26 fiedac 1 fatac; 27 fiedac 5, 7 fatac

Caka halafin, o Rowasiya ato kapot ningra micomoday i ‘Fangcalay pala.’ (Taniil 11:41) 2017 miheca, mikecengay ko mikowanay no Rowasiya to tayal no finawlan no Kawas, mipalitayho to salikaka ita. Mikecengay cangra to mitepangan ita a cudad, mahawpay ko Faelohay Hekal Mihongyakan Fangcalay Cudad, miˈafasayho to Fenpo, kasaˈopoan ato pitaykayan i Rowasiya. Mihaenay, itini 2018 miheca o Malohemay Malitengay i Congpo paihkalay, o Rowasiya ato kapot ningra o faelohay a kaˈamisay hongti. Soˈlin pakidem ko macadaay no finawlan no Kawas a sapalak, kamayan manaˈay mitowakang to mikowanay. Wa mitoor kita to limoˈot no Fangcalay Cudad, patado to ‘polong ˈakawangay ko saaroˈan a tamdaw’ mitolon, ano mifiyor ko saˈosi nangra to pasalat ita a midoko i, mamitongal ko pihaen a mitolon. w20.05 14 fiedac 9 fatac

O wama wina, ano papakasoˈlin ko wawa to iraay ko soˈlinay kimad no niyah, oha papatireng cangra to kalawidang ato Kawas, wa oniyah ko mamihapinang to matatodongay ko sowal no Fangcalay Cudad. Pakayni sapasifanaˈaw to wawa mafanaˈ to kimad no Kawas, papatireng ko wama wina to taˈarawan, misongilaˈ minanam to Fangcalay Cudad. O mamipalak ko wama wina to toki midotim to mananamay a lalakaw, mihaen ngaˈ pakalalok to wawa mitodong a midemak. Pasifanaˈenho ko wawa misaka dademak to lalosidan a micekiw to Fangcalay Cudad, malecad o pipasifanaˈ to pacekiwan. Mihaen ko demak no wama wina, wa matongal ko olah no wawa ci Yihofaan, pakasoˈlin to pakaynian ni Yihofa i madimadiay citanengay a koli padama kitaanan a cipinang to Fangcalay Cudad. (Matay 24:45-​47) Cowa ko pasifanaˈ aca to wawa to taˈeneran a kimad no Fangcalay Cudad. O kalomahad nangra matongal ko saka cipinang a inaneng, pasifanaˈen cangra to ‘tangongolay a demak no Kawas,’ mihaen wa ngaˈayto padama cangranan palahad to tanektekay pakasoˈlinay falocoˈ.​—1 Korinto 2:​10. w20.07 11 fiedac 10, 12-​13 fatac

Anini pinaay soˈot ˈofad cowa kalefot a tamdaw malawidangay ni Yihofa. Oniya tamdaw o pakasoˈlinay to sapatefoc, mansa ngaˈayay patafang to tireng micada to paputisem, palahad to ngaˈayay kalawidang to Kawas. Ano mihaen ko demak ita, wa ngaˈay malacafay to pinaay soˈot ˈofad patafangay to tireng micadaay to paputisem a Krisciyang, malo ngaˈayay a widang ni Yihofa. Samaan ko demak ita o misalimlaay to kalawidang to Kawas hani? O pidoko ni Apraham aci Yopu to Kawas mataˈlifay ko 100 miheca, pahecaden ita cangra, ano hakowato ko halafin a midoko to Kawas, padadotoc a madimadi. Pahecaden ita ci Taniil, minengneng to kalawidang to Kawas ikaka ko kalimlaan to ˈorip no niyah. (Taniil 6:​7, 10, 16, 22) Ira ko sapadama ni Yihofa, o papakahadidi kita to masakenaay sapalifet, tahadaˈoc malo widang ni Yihofa.​—Filipi 4:​13. w20.05 27 fiedac 5-6 fatac

Kinacecayay, maˈaraway ni Tafiti maynoˈay ko fafahi no tao, ci Patsipa koniya fafahiyan. Mafanaˈay cingra to sarikec ni Yihofa ‘hamaan maˈinal to fafahi no tao,’ kawra kamayan padadotoc a misamocek minengneng ci Patsipaan. (Kasadakan 20:17) Cowato pisacecay to falocoˈ cingra midemak to kaolahan ni Yihofa a demak, maˈinalay to kakapah ni Patsipa. Soˈlin maolahay ato mikangodoay ci Tafiti ci Yihofaan, kawra itini toniya demak o sapisaloaw aca to misatekeday a coos ningra ko maharatengay, telocto taˈangayay ko raraw. Oniya waywayan ningra pakangodoay to fangcalay ngangan no Kawas, malahdawayho ko ˈorip no awaay ko raraw a tamdaw, pakarorayayho to paro no lomaˈ. (2 Samuil 11:​1-5, 14-​17; 12:​7-​12) Mirikecan ni Yihofa ci Tafiti, ikor patikolay ngaˈay ko kalalaˈed ni Tafiti ato Kawas. (2 Samuil 12:3; ˈOlic 51:​2-4, 17) Caka pisacecay ko falocoˈ ni Tafiti a mangodo ci Yihofaan, mikayatay to kaadayayan a teloc. Kawra itini i sapadama ni Yihofa, mananamay ningra ko sapasifanaˈ, pasasiyor a misafaeloh, mansa saan ko sowal no Fangcalay Cudad, ‘ci Tafiti misarocoday to falocoˈ madimadi to Kawas ningra ci Yihofaan.’​—1 Hongti 11:4; 15:3. w20.06 11 fiedac 12-​13 fatac

Palinian no Fangcalay Cudad ko olah ni Yihofa to finawlan Ningra to sasoˈot. O olah no Kawas ato sasoˈot iraay ko maanan kalecadan hani? Haratengen hena, itini kiso i citapelikay a riyar mamaˈemekto, toniya tatokian ira ko mitekolay to sapipaˈorip a rikoˈ. Maedeng mamiakoˈid kiso cingranan, samanen o ngangaˈayto kiso a mapawpaw i fafekang no nanom. Kawra o sapaˈorip aca a rikoˈ cangoˈotayho, samanen kietecay ko nanom, misaaliay kiso pilaliwan a tamina hongaˈay madipot ko ˈorip. Mihaenay, ira ko mitekolay to sasoˈot tisowanan, dotoc mitengteng tisowanan patayra i tamina. Masowal ni Yihofa koya miliyasay Cingranan a Israil tamdaw, anini, kamayanho mahaen ko harateng ni Yihofa. Pakayra toya cowato pidoko Cingraanan, mamaˈemekto no pasangaray no niyah a salikaka, tokel ni Yihofa nanay mafanaˈ cangra to maolahay Cingra cangranan, makalimay patikol cangra i tatihi Ningra. Wa ngaˈay pakaynien ni Yihofa tisowanan a paihkal toniya olah cangraanan. Pasifanaˈen ko mihawaday mitosil a salikaka maolahay ci Yihofa ato kita cangranan, mihaen to demak tada kalimlaan. w20.06 27 fiedac 12-​13 fatac

Ikor no mapatay ci Stifano, milaliway ko ˈalomanay Krisciyang to Yirusalim, ‘maliwasakay tayra i Yutiya ato Samariya a kilac,’ o roma tamdaw tayraay i Sayprus ato Antiok. (Dmak 7:58-​8:1; 11:19) Pasangaray kita miharateng, hakowaay ko malifaay no Krisciyang a pasangaray itiya. Kawra, ano talacowato cangra, fanekfekay a milasil to ngaˈayay lihaf, telocto, adihayay ko mapatirengay a faelohay kasakopang itini i pala no Loma. (1 Pitiro 1:1) Nikawrira, o pasangaray a romiˈad iraayho i kaˈayaw. Tinakoen, itini i kongyen 50 miheca, o hongti no Loma ci Krautius, papiliyasay to Yutaya a tamdaw to Loma, o Yutaya a Krisciyang mapacieciay miliyas to lomaˈ no niyah, malinah tayra i roma a pala. (Dmak 18:​1-3) Masowalay no tikami ni Pawlo itini i kongyen 61 miheca, mapakangodoay ko salikaka i ˈaˈayaw no ˈalomanay tamdaw, mipalitan, miˈafasan ko hafay. (Hipray 10:32-​34) Mahecaday to roma tamdaw ko Krisciyang, wa miemem to nikaw ato pisemsem to adada.​—Loma 15:26; Filipi 2:​25-​27. w21.02 26-​27 fiedac 2-4 fatac

Ano padadotoc kita patanektek to pakasoˈlin, ano samaanto ko demak ni Satan ato mikotoday cingranan, cowa ko papakangiyangi kitaanan. (2 Yohani 8, 9) ˈAˈinteh ko hekal tamdaw kitaanan, mihaenay salakaten ita misaday ko falocoˈ. (1 Yohani 3:​13) Sanayho ko sowal ni Yohani: ‘Polong no hekal makowanay noya mariˈangay.’ (1 Yohani 5:​19) Pakayni kangata no salikoray romiˈad, mafanaˈay ci Satan cowato ka hakowa ko toki no niyah. Matongalay ko kangolaw ningra, ciharatengay sapicongedaw to mitosilay a tayal ita, ato mipalak to pakasoˈlin ita. Mikayhid cingra kitanan midemak to malafoay a demak, misaka dademakayho to misafelitay to kimad a tamdaw patenak to mangah. Cowa ko hatiniay aca a pakayraan, mifekadayho to saˈodis kitaanan. Mansa itini roma kitakit ato kasakilac, makecengay ko roma a tayal ita, anca masongilaˈay a makeceng. Kawra o itiniay a salikaka kamayan mitafo to mihadidiay. Misawacayay konini ano samaanto ko demak ni Satan, wa tahatolas kita a madimadi. w20.07 24 fiedac 12-​13 fatac

Tokel ni Yihofa to polong a tamdaw aitini i makapahay cikiw tahadaˈoc lipahak ko kaˈorip, kawra ikor mitowakangay ci Atam aci Ifa to Kawas, telocto cowa to kangaˈay cangra ato teloteloc tahadaˈoc a maˈorip. (Loma 5:​12) Samanay ci Yihofa a misaysay toniya demak hani? Tangsolay Cingra milasil to sapilidong to tamdaw a limasmas. (Satapangan 3:​15) Misaˈosiay ci Yihofa misadak to sapatefoc, ho ngaˈay ira ko tokel no teloteloc ni Atam aci Ifa mihepol to raraw ato patay, paira to hatoki no midokoay to Kawas a tamdaw ngaˈay tahadaˈoc a maˈorip. (Yohani 3:​16; 1 Korinto 15:21, 22) Pakaynian ni Yihofa i Wawa Ningra patikol a paˈorip to masacaˈolay masaemangay a mapatayay tamdaw, wa itini malecaday tatokian cangra a patikol maˈorip han? Cowa ko mamahaen, samanen ano tangsol sa matongal ko tamdaw wa masasifod alatek. Polong a demak ni Yihofa masieroday, mafanaˈay Cingra ira ko malikakawaay, masieroday, mihaen ngaˈ rihaday ko kaˈorip no tamdaw.​—1 Korinto 14:33. w20.08 14 fiedac 3 fatac; 15 fiedac 5 fatac

Maedeng o cacipinang ko pacekiwan to araaw no pilengo to Fangcalay Cudad o papadama cingranan micada to paputisem malo Misawacayay Tamdaw ni Yihofa. Ano madangar no pacekiwan ko laenoay pina demak, matoorto ko patosokan micada to paputisem. Salakat, mafanaˈ cingra ci Yihofaan, palahad to olah ato pakasoˈlin ci Yihofaan. (Yohani 3:​16; 17:3) Ikor, wa padotoc cingra miingid ci Yihofaan, hanaca malawidang to salikaka i kasakopang. (Hipray 10:24, 25; Yakop 4:8) Dotoc, papasasiyor cingra to raraw no niyah, ecato pidemak to tatiihay demak. (Dmak 3:​19) O mamifanaˈho cingra to pakasoˈlinan no niyah a kimad i roma tamdaw. (2 Korinto 4:​13) Saikor, patafang cingra to tireng ci Yihofaan, hanaca micada to paputisem. (1 Pitiro 3:​21; 4:2) Palidlid sa macakat ko pacekiwan, malaˈosi ningra ko cecay patosokan, mikifalocoˈ ko singsi a pakahemek cingranan, pakalalok cingranan. Tiya micada cingra to paputisem i, wa lipahak ko polong no kasakopang! w20.10 17-​18 fiedac 12-​13 fatac

Ano mararid kita palalini to kasakopangay a tamdaw, wa pasangar mihapinang to epoc no niyah. O roma tamdaw i kasakopang mafanaˈay pasifanaˈ alatek, anca inanengay milikakawa, o roma mafanaˈay mihinom ato pakalalok to tao. Cato ka hatira cangranan ko kangaˈay no niyah saan miharateng, mihaen ko harateng iso, o paihkalay to misapoeneray ko falocoˈ iso. (Filipi 2:3) Kawra, mamisinanot kita, ano oya inanengay tamdaw ko palinien ita, wa matoled ko niyah, alatek wa malecad o misowalan ni Pawlo, awaay ko saaroˈan no niyah i kasakopang saan miharateng. itini saka 1 hahekalan pakaynian ni Yihofa i fangcalay saocor pafeli to roma Krisciyang midemak to kafahkaan a demak, kawra cowa ka sahto saan milifok ko kahacecay a tamdaw to malecaday a ˈicel. (1 Korinto 12:​4-​11) Kawra kalimlaan maemin ko kahacecay a Krisciyang. Anini, cowato pafeli ci Yihofa kitaanan to kafahkaan a ˈicel, kawra malecaday ko pinengneng Ningra. Soˈlin cowa kalecad ko inaneng no kahacecay tamdaw, kawra o pinengneng ni Yihofa o kalimlaan a maemin. w20.08 23 fiedac 13-​15 fatac

Ngaˈay kiso mitolon ci Yihofaan, micangacang Cingranan pafeli to timolo ato ˈicel tisowanan, o papacaˈofen ni Yihofa ko satolon iso, padotoc a midama tisowanan, cowa ko fafalahen Ningra kiso. (Dmak 4:​29, 31) Ngaˈay misongilaˈ a miharateng kiso, na samanay ci Yihofa a padama tisowanan miremo to adihayay a pasangaray, ira ko ˈicel iso midemak to taˈangayay kafalic. Na mikeridan ni Yihofa ko finawlan Ningra mitaˈlif to Kahngangay a Riyar, o papadama tisowanan malo nisawawaan ni Kristo. (Kasadakan 14:13) Mihaenay, wa ngaˈay kiso malecad o mitiliday to aniniay sinael a mitiliday to ˈOlic matomes ko pakasoˈlin. Wa ngaˈay ci Yihofa padama to faelohay a mitosilay ira ko timolo, nengnengen ko nalifetan no fafahiyan salikaka ci Cei. Sakinacecay pakalomalomaˈ cingra a mitosil i, mariˈangay koya cilomaˈay sanay miceliˈ: “Cowa kaolah kako masasowal to Misawacayay Tamdaw ni Yihofa!” Dotoc saˈicel sanay miˈedef to fawahan. Cowa katalaw ci Cei, sanay pasowal to cafay mitosil: “Matengilay iso han? Cowaho ka pasowal kako mafanaˈayto cingra to Misawacayay Tamdaw ni Yihofa kako! Tada kahemekanto!” Nohatini, o misakafahayto ko salikaka ci Cei. w20.09 6 fiedac 13-​14 fatac

Pasowalan ni Asa ko finawlan, o ci Yihofa ko padamaay cangranan ‘milifok to rihaday.’ (2 Rayray 14:​6, 7) Kawra sasinoway sato ko kaˈorip nangra cowa ka saan ko harateng ni Asa. Mimetmetay cingra to toki patireng to niyaroˈ, ato ˈadipel, patireng to pikacawan ato fawahan. Pasowalan ni Asa ko finawlan: ‘Oniya pala itiniayho i kamay ita.’ Tatodong ningra ngaˈayay pasalat ko finawlan i lalomaˈ no kitakit, cowa ko mamacara no ˈada ko patirengay a tayal nangra. Pakalalokan ni Asa ko finawlan misongilaˈ misaka dademak toniya rihadayay a tatokian. Misaka dademakan ni Asa ko rihadayay a tatokian paˈicel to sapilood no sofitay. (2 Rayray 14:8) Mihaen ko demak ningra, o cowa pitadiˈec ci Yihofaan han? Cowa ka hatira. Mafanaˈay ci Asa, malo hongti no kitakit, iraay ko ˈinorong ningra padama to finawlan a misaday, samanen cowa ko tatahadaˈoc a rihaday ko Yutaya kitakit. Soˈlinay mahaen ko demak. w20.09 15 fiedac 4-5 fatac

Mikitiniay i ngaˈayay harateng ko cecay malohemay malitengay, pakayni i siri no Kawas patireng to saˈosi a midipot cangranan. Kawra, o fadangalan no malohemay malitengay ato tawki no lomaˈ iraay ko taˈangayay kasasiroma. Tinakoen, minilnilan ni Yihofa ko malohemay malitengay itini kasakopang midemak to misawkitay a demak, pafeli cangranan to fadangalan a mifalah to cowa ka pasasiyor a mararaway tamdaw. (1 Korinto 5:​11-​13) Roma pakayraan, pafelian ni Yihofa ko tawki no lomaˈ to pina fadangalan, awaay kono malohemay malitengay. Tinakoen, iraay ko fadangalan no tawki no lomaˈ patireng ato midemak to rikec no lomaˈ. (Loma 7:2) Iraay ko fadangalan ningra misaˈosi pina ko toki to dadaya minokay ko wawa. Ano eca pidofdof ko wawa to rikec no lomaˈ, iraay ko fadangalan ningra mirikec to wawa. (Ifiso 6:1) Manaokaniw, o ciolahay a tawki no lomaˈ ˈayaw no mamisaˈosi to rikec no lomaˈ wa malalengoho to fafahi, samanen ‘o cecayay ko tireng’ ningra ato fafahi.​—Matay 19:6. w21.02 16-​18 fiedac 10-​13 fatac

O roma lalangian no kalimlaan ko Kimad no Fangcalay Cudad i, edeng oya ‘matatodongay ko waywayan’ hanaca misapoeneray ko falocoˈ a tamdaw ko padamaan ni Yihofa cipinang to soˈlinay kimad. (Dmak 13:48) O mahaenay tamdaw mihaiyay, pakaynian no Kawas i ‘madimadiay citanengay a koli’ pasifanaˈ kitaanan. (Matay 11:25; 24:45) Oniyah ko tiˈeren cato ka cipinang kita to Fangcalay Cudad. Awaay ko maanan a demakan mikikakato kacipinang to soˈlinay kimad a masakalimlaan. (Taneng 3:​13) Patorodanho ni Yihofa kita to kalimlaan a tayal, pasifanaˈ to tamdaw mafanaˈ Cingranan ato araaw Ningra. (Matay 24:14) O milasilan ita a lihaf tada kalimlaan, paira to hatoki no tamdaw micomod i taˈangayay paro no lomaˈ ni Yihofa milifok to tahadaˈocay a ˈorip, mansa tada kalimlaan. (1 Timoti 4:​16) Ano hakowato ko toki ita a mitosil, sahtoay o midamaay toniya kalimlaan a tayal. (1 Timoti 2:​3, 4) Ngaˈay malacafay to Kawas a matayal, o kalikoan no mita!​—1 Korinto 3:9. w20.09 26-​27 fiedac 4-5 fatac

Itini kalingad ni Pawlo tayra i Loma, misaliyaliyaway ci Yihofa pakayni i salikaka padama ci Pawloan. Nengnengen ita ko pina tinakoan. Ci Aristarkus aci Luka o ngaˈayay widang ni Pawlo, kalacafayay cangra ci Pawloan tayra i Loma. Cowa ka somowal ko Fangcalay Cudad to na mikiˈokan ni Yis ci Aristarkus aci Luka, rarihaday cangra tahira i Loma. Soˈlin mahaen, kamayan makahi cangra misiˈayaw to katalawan a kalacafay ci Pawloan. Tahira i katahalifaan nangra to faliyos i tamina i, itiyaay mafanaˈ to rarihaday koniyah. (Dmak 27:​1, 3) Tinakoen, itini i Siton, mihaiyay ci Yuliyus ‘tayra i widang ci Pawlo micada to sadimokos nangra.’ Ikor, ci Pawlo ato cafay itini Putiuliay ‘maˈaraway ko salikaka, micada to tahidang nangra milafin to pito romiˈad.’ O salikaka itira patahkaay ci Pawloan ato cafay ningra, madeng paladaˈan ni Pawlo cangra to pakalalokay to tamdaw a nalifetan.​—Dmak 15:​2, 3. w20.11 15-​16 fiedac 15-​17 fatac

O wama wina, pakaynien i sasowalen ato waywayan iso pahapinang to wawa, soˈlinay maolah kiso ci Yihofaan. O sangaˈayay sapatelong iso to wawa i, padama cangranan minanam a maolah ci Yihofaan. Iraayho ko cecay kalimlaan, papadamaen no wama wina ko wawa palahad to ngaˈayay nanaman, micerid micekiw, mitolon, ato mirienang to saˈopo ato mitosilay tayal. (1 Timoti 6:​6) Manaokaniw, o mamidimokos kiso to sakaˈorip no wawa. (1 Timoti 5:⁠8) Haharatengen, ano malaˈafo koniya hekal i, o sakalidong no wawa ato micomod i faelohay hekal, cowa ko hafay, ao ngaˈayay kalawidang to Kawas. (Icikil 7:​19) ˈAlomanay Krisciyang a wama wina inanengay ko mipiliˈan, padama to wawa miingid ci Yihofaan, maˈaraw ita mihaen ko demak nangra, tada mapakalalokay. Itini mahaenay a paro no lomaˈ a lomahad a wawa tocerid iraay ko ngaˈayay nanaman, miakoˈiday to wama wina mihaen a pasifanaˈ cangranan.​—Taneng 10:22. w20.10 28-​29 fiedac 10-​11 fatac

O tarokos ci Pitiro nolatekay o sasowalen ato midemakan no niyah pakasomaday cingranan. Kinacecayay, pasowalay ci Yis to tarokos wa mapasemsem cingra, ato papatayen. Matengil ni Pitiro tangsolay miconged ci Yisan, somowalay to sinael anini. (Matay 16:21-​23) Misalofan ni Yis ci Pitiro. Roma i, ˈalomanay tamdaw milepelay ci Yisan, caloh sanay ci Pitiro mihodoc to funus, pasayra i koli no taˈangayay saysi mitapaˈ, matepocay ko kawanan a tangila ningra. (Yohani 18:10, 11) Miliyaway ci Yis misalof ci Pitiroan. Roma i, na malikoay a pasowal ci Pitiro soˈlin milaliw ko roma tarokos ci Yisan, cowa ko mamihaen ko demak ningra. (Matay 26:33) Kawra cowa ka mahaen o miharatengan noniyah a tanoktok ci Pitiro. Toya dadaya, matalaway cingra to tamdaw kinatoloay a mihaiken ci Yisan. Tada masomaday ci Pitiro toniyah, cowato pakaˈemet a “miongong a tomangic.” (Matay 26:​69-​75) Harateng ningra cato pisodod ci Yis cingraanan. Kawra, cowa ka padotoc a malonay ci Pitiro. Ikor no mararaw cingra kamayan malacafay to roma tarokos a midoko ci Yihofaan.​—Yohani 21:​1-3; Dmak 1:​15, 16. w20.12 20 fiedac 17-​18 fatac

O tawki no lomaˈ itini adihayay pakayraan ngaˈayay paihkal to misapoeneray. Tinakoen, cowa ko mamisaali cingra malefot ko fafahi ato wawa. Soˈlin caka lecad ko harateng no paro no lomaˈ cingranan, wa makahi cingra a mitengil. Roma i, harateng no roma tamdaw o fafahiyan ko mamidemak tono lomaˈ a demak saan ko harateng, o misapoeneray a faˈinay wa makahi pacafay to tayal no lomaˈ. Mihaen to demak cowa ko madoloay, cecay ci Rowiciw fafahiyan salikaka sanay: “Itini kitiraan niyam, ano pacafay ko faˈinay to fafahi misawsaw to kaysing, miharateng ko salawina ato fiyaw cowa ko soˈlinay a faˈinayan cingra, cowa pakaˈimer to fafahi sanay.” Itihiay iso a tamdaw ano mahaenay ko pinengneng, aka mapawan, miharateng ko roma tamdaw, misawsaw to waˈay ono koli a tayal, kawra misawsaway ci Yis to waˈay no tarokos. O ngaˈayay a tawki no lomaˈ cowa ko saaroˈan no niyah ko misaaretengan, ao nafalocoˈan no fafahi ato wawa. w21.02 2 fiedac 3 fatac; 4 fiedac 11 fatac

Miharateng to makapahay a demak i ˈayaw o sapatelong ni Yihofa, kawra ano samaanto ngaˈay ko kaˈorip iˈayaw, o kaˈorip i faelohay a hekal wa ikaka ko kangaˈay. Midokaˈay ko tao kitanan alatek, kawra ano makahi kita misodod to tao, wa ngaˈay misamacay matayal saki Kawasan. Pakidem makesam ko falocoˈ ecato ka lipahak kita midoko ci Yihofaan, mansa pasayra kita ci Pawloan minanam, pakasoˈlin to maharekayto ci Yihofa misodod kitanan. (1 Timoti 1:​12-​15) Iraay ko hatokel ita tahaˈdaoc maˈorip. Itini faelofay a hekal, cowato ko mamiharateng kita to matoleday a demak ˈiayaw. Sowal no Fangcalay Cudad, itiya, “o mamatawalto ko iˈayaway a demak a maemin.” (Isaya 65:17) Soˈlin O roma salikaka matoˈas matoˈasayˈto, kawra itini faelohay hekal, wa patikol cangra kaemang. (Yopu 33:25) Mihaenay, misetek kita to falocoˈ, aka maˈorip i mataˈlifayto, ka pasiˈayaw ko pinengneng, misaˈimer to hanoikor. w20.11 24 fiedac 4 fatac; 29 fiedac 18-​19 fatac

Itini ˈaˈayaw mamifekad ko maanan a demak hani? Itini taˈangayay padiing a tatokian, ci Yihofa wa tano kafahkaan a pakayraan milidong kitanan. Salakat, ocoren Ningra ko hongti no hekal palaˈafo to Papilon, itini palaˈafoan to mararaway a pihakelongan a tatokian, wa milidong Cingra to midokoay Cingranan a tamdaw. (Paˈarawan 17:​16-18; 18:​2, 4) Ikor, itini Armakiton wa palaˈafoen Ningra ko hekal ni Satan, itiya wa milidong Cingra to madimadiay a finawlan Ningra. (Paˈarawan 16:14, 16) Ano padadotoc kita mikelec to kalawidang aci Yihofaan, cowa ko papaira to midaˈocay a dokaˈ kitanan ci Satan. Soˈlinay, o mamalaˈafo, tahadaˈoc malahdaw i, ci Satan. (Loma 16:20) Mihaenay, wa caˈedongen ita ko sapafeli ni Yihofa a sapilood a rikoˈ, ano samaanto aka mihelong! Aka cecay aca milood, kalacafayen ko salikaka madadama, midofdofho to limoˈot ni Yihofa. Mihaen ko demak iso, wa ngaˈay pakasoˈlin o sidaˈitay a Wama papaˈicel tisowanan, padadotoc a midipot tisowanan.​—Isaya 41:10. w21.03 30 fiedac 16-​17 fatac

Samaan ko demak ita, o misarocoday mitadiˈec ci Yihofaan hani? Itini Fangcalay Cudad adihayay ko tinakoan mamitadtad, aka marawraw misarocod mitadiˈec ci Yihofaan masaka limlaan. Micekiw to hatiniay a maˈoningay i, oha ngangaˈay kita miharateng: O sikawdan no Kawas tahalifa to pakidemay sapalak i, o maanan ko padamaay cangranan kamayan eca ka marawraw hani? Tinakoen, o saˈakawangay a hoing no Yutaya mirikecay to tarokos aka to mitosil sai, timoloay cangra a pasowal: ‘O Kawas ko dadofdofen niyam, cowa ko tamdaw.ˈ (Dmak 5:​29) Ikor mipekpekan cangra, kawra cowa ka talaw cangra. Misamaanay hani? Samanen mafanaˈay cangra, o kaolahan ni Yihofa ko midemakan no niyah, iraay ko sadama ni Yihofa ato pihayda, mansa padadotoc cangra timolo milasil to ngaˈayay lihaf. (Dmak 5:​40-​42) Malecaday, misiˈayaw to saroero no patay ci Stifano kamayan ‘rihaday ko pising, ora pising ningra malecaday o pising no coyoh.’ (Dmak 6:​12-​15) Misamaanay hani? Samaanen pakasoˈlinay ci Stifano milifokay to pihayda ni Yihofa cingranan. w21.01 4 fiedac 10-​11 fatac

Tatodong nonini iraay ko makoracay makapahay falocoˈ nangra, o moecelay tamdaw sanay ko pinengneng no Kawas. (Isaya 1:​18) Maherekayto patafang micada to paputisem a Krisciyang cangra, pakasoˈlinay to kinafalah ni Yis, iraay ko ngaˈayay kalalaˈed ci Yihofaan. (Yohani 3:​36; 1 Pitiro 3:​21) Mihaenay, milifokay cangra to pihayda no Kawas, ngaˈay itini fafekang no sera saromiˈad salafii midoko Cingraanan. (Paˈarawan 7:​15) Soˈlinayto, adihayay a tayal milasil to Hongti Kitakit ato padama to tamdaw malo Krisciyang, o cangra ko milahciay. Tada fanekfekay cangra, pinengneng nangra to tayal no Hongti Kitakit no Kawas ikakaay to demak no niyah a masakalimlaan. (Matay 6:​33; 24:14; 28:19, 20) Mikiˈokay ko Kawas wa padadotoc midimokos to mahadakay i taˈangayay padiing a taˈangayay ˈopo tamdaw. O sowal no Fangcalay Cudad: ‘Ya maroˈay i tadamaanay a kamaroˈan a Kawas micelakay to kopang midipot cangranan.’ Mitalaay ko roma lopayˈay siri to pidemak no Kawas to ilaenoay a sakiˈok: ‘Wa sisiten no Kawas ko kahacecay a losaˈ nangra.’ Noikor, o mamaˈaraw nangra malaˈosi koniya sakiˈok.​—Paˈarawan 21:​3, 4. w21.01 16 fiedac 9-​10 fatac

Tada mahemekay kita masalalomaˈ no taˈangayay paro no lomaˈ ni Yihofa! Misarocod kita mikangodo to patirengan ni Yihofa no kakeridan a limasmas. Paihkalay ko Fangcalay Cudad misaaretengay ci Yihofa to fafahiyan, malecaday cangra o faˈinayan a masakalimlaan. Tinakoen itini saka 1 hahekalan, pafelian ni Yihofa ko roma tamdaw to fangcalay saocor, hato iraay ko kafahkaan a ˈicel nangra, mahawpay ko somowal to roma sowal, oniya tamdaw iraay ko faˈinayan ato fafahiyan. (Dmak 2:​1-4, 15-​18) Malecad o faˈinayan, roma fafahiyan manilnilay no fangcalay saocor, ngaˈay malacafay ci Yisan mala hongti. (Kalatiya 3:​26-​29) O tatahadaˈoc i fafekang no sera maˈorip a tamdaw iraay ko faˈinayan ato fafahiyan. (Paˈarawan 7:​9, 10, 13-​15) Ano faˈinayanto fafahiyanto, polong a Krisciyang o mamitosil pasifanaˈ to tamdaw. (Matay 28:19, 20) Itini Dmak mikiriwiˈay somowal to cecay fafahiyan salikaka ci Priskila, cingra ato faˈinay ci Akuila malacafayay padama ci Apolosan, pasayni toniya adihayay ko sifanaˈ a faˈinayan matatodong ko pitadtad to kimad no Fangcalay Cudad.​—Dmak 18:24-​26. w21.02 14 fiedac 1 fatac; 15 fiedac 4 fatac

O malohemay malitengay, iraay ko taˈangayay a ˈinorong namo, o papadama to salikaka pacakat to inaneng pasifanaˈ to tamdaw. Ano marawraw ko harateng no pacekiway a singsi, ngaˈay pasowalen iso cingra, makahiay kiso misikay to pacekiwan. O malohemay malitengay ngaˈay papakalalok to pacekiway a singsi, padadotoc a tanektek. (1 Tisalonika 5:​11) Soˈlin awaay ko pacekiwan ita nohatini, wa ngaˈayho padama to pacekiwan padadotoc a macakat. Ano mirienang kita to pipacekiw no tao i, ngaˈayay isalakat a misaday, ngaˈay ko kadadama to pacekiway a singsi pakalalok to pacekiwan, kawra aka adihay ko sowal. Misatapang ko pacekiwan mirienang to saˈopo i, malawidang kita cangranan, patireng to ngaˈayay taˈarawan nangra. Ngaˈayay mihadak to toki ko malohemay malitengay pakalalok to pacekiwan, pahatatanamenho ato pakahemeken ko pacekiway singsi. Mihadak kita to miming a ˈicel pakalalok to tamdaw miingid ato midoko ci Yihofaan, tada kalipahakanto a demak! w21.03 13 fiedac 18-​19 fatac

Ci Tafiti milahciay to demak, ngaˈayay pasoˈlinen. Tinakoen, kaemangho cingra i pakaenay to siri no wama, misongilaˈay midimokos, kawra adihayay ko malifaay ningra a katalawan. Ikor pasowalan ningra ko Hongti ci Sawlo: “Pakaen ko sikawdan iso to siri no wama, iraay ko layong, iraayho ko tomay, milepelay to siri. Milepelan ako cira, mipatay ciraan, mikitini ngoyos nira milidong to siri.” (1 Samuil 17:34, 35) Miharateng ci Tafiti iraay ko ˈinorong no niyah midipot to siri no wama, Kapah salikaka ngaˈayay mitodong ci Tafitian, misongilaˈ midemak to patorodan cangranan a kahacecay demak. O kapah a Tafiti palahaday to tangongolay kalawidang ci Yihofaan. Oniya kalawidang ikakaay masakalimlaan to timolo ato inaneng no onkak. Cowa ko Kawas aca ni Tafiti ci Yihofa, o widangho ningra, o tada ngaˈayay a widang. Kapah a salikaka, o sakakaay kalimlaan a hademak namo nohatini i, tongalen ko kalawidang to kakarayan a Wama, mihaen o kalimlaan. w21.03 3 fiedac 4-5 fatac