Saka 12 Folad

Latekay, pasangaray cipinang to sowal no Fangcalay Cudad sanay kita miharateng, anca cowa pitoor ci Yihofa to mitokelan ita a pakayraan pacaˈof to satolon, telocto, cisasaay ko falocoˈ. Ano pakiyadi han ita, o hatiniay sasa wa mifasaw to pakasoˈlinay falocoˈ ita, mipalak to kalalaˈed ita ci Yihofaan, mangalef ecato pakasoˈlin kita to sakiˈok ni Yihofa. (Yakop 1:​7, 8) Patinakoan no tarokos ci Pawlo ko hatokel ita to ˈenor no tamina. (Hipray 6:​19) O ˈenor no tamina, ngaˈayay patanektek to tireng no tamina i taˈangayay fali, ho caka songtol no tamina ko fakeloh. Kawra, saka ciepocaw ko ˈenor no tamina, o makakafitay to ˈenor ato tireng no tamina a kadang, coka ngaˈay a mapelaˈ. Ano citaˈi ko kadang, wa maketon alatek. Malecaday, ano caka pacaˈofen ko sasa, wa mafasaw ko pakasoˈlinay falocoˈ. O cisasaay ko falocoˈ a tamdaw tahalifa to pisafelit, alatek cowato pakasoˈlin, to mamalaˈosi ko sakiˈok ni Yihofa. Malahdaway ko pakasoˈlinay falocoˈ a tamdaw, malahdaway ko hatokel. O mahaenay tamdaw awaay ko lipahak. w21.02 30 fiedac 14-​15 fatac

Mikerid ci Apraham to paro no lomaˈ miliyas to Ur i, 70 ko mihecaan alatek. (Satapangan 11:31-​12:4) Lalomaˈ no 100 miheca, itini sanay i pakopangan ko kitiraan, itini pala no Kanang misalinalinah. 175 ko mihecaan, mapatayay ci Apraham. (Satapangan 25:7) Kawra, cowa pakaˈaraw cingra to kalaˈosi no sakiˈok ni Yihofa, pafeli to Kanang a pala i teloteloc ningra, cowa pakaˈaraw toya ‘niyaroˈ’, oya Hongti Kitakit no Kawas a mapatireng. Soˈlin mahaen, sowal no Fangcalay Cudad ci Apraham ‘matoˈas a marenec ko kapatay.’ (Satapangan 25:8) Soˈlin adihayay ko malifaay ni Apraham a roray, padotocay pakasoˈlin cingra ci Yihofaan, makahi a mitala ci Yihofaan. Hano ngaˈay cingra tahatolas ko pihadidi hani? Samanen i hakelong no kaˈorip ningra, padotocay ci Yihofa a midipot cingranan, pala ngaˈayay a widang cingranan. (Satapangan 15:1; Isaya 41:8; Yakop 2:​22) Malecad ci Aprahaman, oha mamitala kita toya ‘iraay ko soˈlinay taˈeneran a niyaroˈ.’ (Hipray 11:10) Kawra cowa ko mamitala kita to pipatireng toya niyaroˈ, samanen itini 1914 miheca mapatirengayto ko Hongti Kitakit no Kawas, misatapang i kakarayan a mikowan. (Paˈarawan 12:​7-​10) O tatalaen ita i, o pikowan noniya Hongti Kitakit to polong a cikiw. w20.08 4-5 fiedac 11-​12 fatac

Pairaen ita ko misapoeneray falocoˈ ato mihadidiay a waywayan misongilaˈ mitengil to sowal no tao. Ciepocay mihaen to demak, misamanay hani? Saka 1, mihaen ko demak ita ecato pakararaw to tao. Saka 2, matongal ko kacipinang ita to harateng ato nafalocoˈan no salikaka, madoloto a siniˈada cangraanan. Saka 3, ngaˈay kita padama to salikaka cipinang to harateng no niyah, latekay, hadaken no tamdaw ko sowal, ngaˈ mafanaˈay to samanay ko harateng no niyah. O roma salikaka pakayni i serangawan, capeling anca nalifetan i salakat, pasangaray pasowal to tao to nafalocoˈan no niyah. Latekay, wa mitala kita to koˈedaway toki, rihaday sanayho ko salikaka a mihadak to nafalocoˈan a sowal, pacipinang kitaanan to harateng nangra. Ano malecad kita ci Yihofaan ira ko mihadidiay falocoˈ, wa malifok ko pakasoˈlin no salikaka. Ano pasowal cangra kitaanan i, o mamisongilaˈ kita a mitengil. w20.04 15-​16 fiedac 6-7 fatac

Tocerid materekay ko foting i kaolahan nira a kitiraan, ato adihayay ko kakaenen a kitiraan. Mafanaˈ to hacowa a tatokian mifoting masakalimlaan. Kinacecayay, cecay itiniay Taypingyang potipot a salikaka mitahidangay to mikiriwiˈay nilnilen mitosilay malacafay a mifoting. Sanay koya mikiriwiˈay nilnilen mitosilay: “Nocila papacem 9 ko toki masasoˈaraw kita.” Sanay ko salikaka pacaˈof: “Cowa ka fanaˈ kiso! Sapirepelaw to foting cowa ka itini kangaˈayan ita a toki, aitini sangaˈayay mirepel to foting a toki ko piliˈen.” Itini saka 1 hahekalan, ‘milifokay to tamdaw a mifotingay’ wa mikilim to matatodongay a toki ato kitiraan a mitosil to tamdaw. Tinakoen, o nisawawaan ni Yis tayraay i fangcalay sefi, kasaˈopoan, icifa a mitosil, pakalomalomaˈayho a milasil to ngaˈayay lihaf. (Dmak 5:​42; 17:17; 18:4) Malecaday, cacipinang kita to pinangan no mitosilan a kilac, salalangien ko pinangan nangra a misalof, itini kairaan no tamdaw a toki ato kitiraan a mitosil.​—1 Korinto 9:​19-​23. w20.09 4 fiedac 8-9 fatac

Malawidang kita ci Yisan, wa midofdof to masakenaay limasmas no likakawa no Kawas. Makakomod kita to mikayatay a salikaka, wa patanektek to kalalaˈed ita to ˈaˈideman no kasakopang. (Ifiso 4:​16) Tinakoen, tokel no likakawa no Kawas songilaˈen misaka dademak ko Hongti Kitakit kasaˈopoan, mansa o roma kasakopang makakadepay. Oniya pisalof maˈesalay ko mapalakay a payci, kawra o roma salikaka maminanam to kafalic. Halafinayto cangra i cecay kasakopang a matayal alatek, hanaca tangongolayto ko kalawidang to salikaka. Kawra madimadiay cangra a midofdof to limasmas no likakawa no Kawas, makahi a malinah tayra faelohay kasakopang, madeng lipahakay ci Yis minengneng. w20.04 24 fiedac 14 fatac

O kaˈamisay hongti ato katimolay hongti malaˈafasay to tadamaanay saaroˈan toniya hekal. Tinakoen, ikor no Saka Tosa Lalood no Hekal, o Suwiay ato kapot ningra miˈemetay to adihayay pala no Iwropa, mapacieciay ko Ikok ato Padaka mikomod a patireng to kapot no sofitay, pangangan to ‘Pitasiyang makakiˈokay lekakawa.’ Adihayay ko mapalakay no kaˈamisay hongti a payci, kalalifet to katimoloay hongti a misaday to sapilood a dafong. Itini lalood no Afrika, Asia ato Latin Amilika, na midamaay ko kaˈamisay hongti to mitowakangay to katimolay hongti a sofitay. Caka halafin, o Rowasiya ato kapot ningra micowatay to ˈicel i paro no kakarayan. Tano wangcan a maˈaˈodis to Ikok ato Padaka, mikokotayho to tao mipalakay to pikowan ato kicay no niyah. Toniya tatokian, malecad o sapaˈayaw ni Taniil, kaˈamisay hongti padotocay a miˈodis to finawlan no Kawas.​—Taniil 11:41. w20.05 13 fiedac 5-6 fatac

“Ira ko mitawalay a ina to wawa ningra haw? Ira ko caay ka olah to nisofocan ningra a wawa haw?” O mihadakan ni Yihofa to lintaday ni Isaya a Israil tamdaw a salicay konini. Sanay ko dotoc a sowal ni Yihofa: “Ano iraira ko mitawalay a ina to wawa ningra i, caay ko mamatawal Ako kiso.” (Isaya 49:15) Cowa ka rarid ci Yihofa palini to Niyah to wina, kawra toniya sinael, saka dademakan ni Yihofa ko siniˈadaay a olah no wina mitadtad to kaolah Ningra to sikawdan no Niyah. ˈAlomanay a wina malecaday ko harateng to salikaka ci Ciyaseminan, sanay koniya salikaka: “Ano pacoco kiso to wawa, mifekaday ko mikiriwiˈay a olah, o hatiniay a olah padadotocay i hakelong nokaˈorip.” O cecay sikawdan no Kawas ano ecato pirienang to saˈopo ato mitosil, masinanotay no Kawas. O ˈalomanay kaolahan ita a salikaka soˈlin na mihawaday a mitosil, miliyas to kasakopang, kawra ikorto patikolay i kasakopang, mahemekay ko ˈalomanay pakaˈaraw cangranan a minokay. Makalimay ci Yihofa patikol i tihi Ningra ko hatiniay a salikaka, malecaday kita.​—1 Pitiro 2:​25. w20.06 18 fiedac 1-3 fatac

Adihayay a odoˈ o maˈaraway, kawra sakakaay ciepocay a odoˈ o cowa ka ˈaraw. Itini kimad ni Yis i lotok sanay, o kakarayan a hafay ikakaay ko epoc tono dafongan a hafay. Sanay ko dotoc a sowal: ‘Icowaay ko hafay iso, itiraay ko falocoˈ iso.’ (Matay 6:​19-​21) O maanan ko misaaretengan ita, orira ko micangacangan. Misaˈicel kita milifok to pihayda no Kawas, o ‘mitalingay to hafay i kakarayan.’ Sowal ni Yis, o mahaenay a hafay cowa ko mamalahdaw anca matakaw. Pakalalokay ko tarokos ci Pawlo kitaanan misamocek toya ‘cowa ka ˈaraw’ a demak, mahawpay ko mamalifok a sapalemed i faelohay hekal. (2 Korinto 4:​17, 18) Sasamaan ko hademak ita o misalimlaay toniya sapatelong hani? w20.05 26 fiedac 1-2 fatac

O pipasifanaˈ ni Mosi pasinowayay to Israil tamdaw, matongal ko tanektek no pakasoˈlinay falocoˈ, malecaday o malosoˈay no ˈorad a talod. Ano pasifanaˈ kita to tao i, mahaenay ko harateng nangra han? Ano mirienang kita to pakalomaˈay anca pakaˈalomanay pisawacay i, saka dademaken ko Fangcalay Cudad misiwkay to ngangan no Kawas. Ngaˈayay saka dademaken ita ko misafacoan no likakawa a cudad, ika ato wangcan a lalakaw, padama to tamdaw mafanaˈ Cingranan. Kita i, itini i katayalan, picudadan anca miliwko i, mameten ko toki a pasifanaˈ to tamdaw ci Yihofaan, o matomesay ko olah a Kawas Cingra. Pasowalen ita ko tao to makapahay araaw ni Yihofa toniya cikiw i, alatek o sakinacecay pakatengil cangra to ciharatengay ci Yihofa cangraanan. Misalalangian kita to Fangcalay Cudad a padama to tamdaw mafanaˈ to sidaˈitay a Wama i kakarayan, misalof to mararaway a harateng nangra i salakat, mihaen i, o misarocoday a patalahkal to fangcalay ngangan no Kawas, wa ngaˈay pasinoway to pakatengilay to soˈlinay kimad a tamdaw!​—Isaya 65:13, 14. w20.06 10 fiedac 8-9 fatac

Ano sapadamaaw to makalimay patikol i tatihi ni Yihofa a salikaka, misaaliay kita to maanan a capeling hani? Mikitini misowalan ni Yis malafelay wawa a sapatinako wa ngaˈay kita milifok to sadama. Iraay ko cecay wawa tada macoliay, liyas sanay to lomaˈ. (Luka 15:​17-​24) Ikor, talipaˈelalay ko falocoˈ ningra, misetek ko falocoˈ minokay. Comikayay ko wama a miraod i cingraan a mitakec. Matinakoay ningra kamayan a maolah ko wama cingranan. Kawra tada makesemay ko harateng ningra, caayto ka tatodong malo wawa no wama ko niyah. Maharek mitengil to nafalocoˈan no niyah i, tada siniˈadaay ko wama cingraan, milimasmas to tangidaf maacang to kapinokay ningra, mialaho to sangaˈayay a rikoˈ parikoˈ cingraan, pasowal cingranan cowa ko mawmahay cingra, ao kalimlaan a wawa. Ci Yihofa malecaday oya sidaˈitay a wama i sapatinako. Ciharatengay Cingra to mihawaday mitosil a salikaka, tada makalimay patikol cangra i tatihi Ningra. Mitodong kita ci Yihofaan paihkal to mihadidiay, ciolahay falocoˈ ato siniˈadaay falocoˈ, wa ngaˈay padama cangranan mihaen ko demak. w20.06 25-​26 fiedac 8-9 fatac

Sowal ni Yis o roma tamdaw pakatengil to soˈlinay kimad, ‘tangsolay lipahak a micada,’ kawra tahalifa to sapalifet i, malahdawayto ko pakasoˈlinay falocoˈ. (Matay 13:​3-6, 20, 21) Cowa ka harateng nangra alatek malo nisawawaan ni Yis o tatahalifa to pasangaray ato sapalifet. (Matay 16:24) Anca, ano malo Krisciyang wa rihadayto, sinowayto ko kaˈorip sanay cangra miharateng. Kawra, itini toniya cowa ka lefot a hekal, o tatahalifa kita to pasangaray. Itini kaˈorip wa mifekad ko cowa kaharateng a kafalic alatek, hato pasangarayto kita mitafo to lipahakay. (ˈOlic 6:​6; Patnakay 9:​11) ˈAlomanay salikaka pakasoˈlinay to iraay ko soˈlinay kimad no niyah. Hano mafanaˈ kita hani? Samanen soˈlin midokaˈ ko kasakopangay tamdaw cangranan anca midemak to mararaway a demak, cowa ka ngiyangi ko pakasoˈlinay falocoˈ nangra. (ˈOlic 119:165) Ano tahalifa to sapalifet, matongalay ko tanektek no pakasoˈlinay falocoˈ nangra. (Yakop 1:​2-4) O papalahad kita to mahaenay a pakasoˈlinay falocoˈ. w20.07 8 fiedac 1 fatac; 9 fiedac 4-5 fatac

ˈAyaw no miˈosi to Fangcalay Cudad, cangacangen ci Yihofa padama tisowanan mihapinang to sinael ira ko manan a epoc. Tinakoen ko sowal, ano mikilimay kiso to pakayraan a misaysay to pasangaray, cangacangen ci Yihofa padama tisowanan mihapinang to milingatay to safalod no Fangcalay Cudad, mafanaˈ to sasamaan ko demak. (Filipi 4:​6, 7) Pafeliay ci Yihofa kitaanan to kadofahay sapiharateng a inaneng. Ano miˈosi to Fangcalay Cudad i, misaharateng i ponoˈ itiraay ko niyah, patinako to oyaan i Fangcalay Cudad a tamdaw kiso, misaharateng itiraay ko niyah tora kitiraan, maˈaraway ko manan, matinakoay ko manan. Midotim. Midotim hananay o misongilaˈay a miharateng to miˈosian a lalakaw, ato milingatay koniya lalakaw to niyah. Midotim wa ngaˈay padama kitanan pakakiting to kalimlaan, matongal ko kacihapinang to lalangian. Ano miˈosi to Fangcalay Cudad caka midotim, malecaday o pinengneng aca to mafolfolay a coka caay ka makakadep. Pakayni pidotim, wa ngaˈayto mahapinang ko polong no coka. w21.03 15 fiedac 3-5 fatac

Na makesemay ci Pawlo alatek, ano caka fanekfek mitosil ko niyah, cowa ko mamalepel saan miharateng alatek. O aˈintel cingra toya Aciyaay miliyasay cingranan a tamdaw alatek, anca ecato pakasoˈlin to roma widang. Kawra, cowa ka haen ci Pawlo. Soˈlin misiˈayaw to saroero no patay, kamayan pakahapinang ci Pawlo to demak, mafanaˈ to kalimlaan ko paˈodingar ci Yihofaan. Padotocayho ci Pawlo miharateng to pakalalok to tao, hanaca miceriday mitolon ci Yihofaan, misarocod a mitiˈer Cingranan. Cowa piharateng ci Pawlo to cima ko miliyasay cingranan, ao miharatengay o cima ko cowa piliyas cingranan, hanaca miakoˈid to mihadakan nangra a sapadama. Roma i, misamacayay cingra a micekiw to Fangcalay Cudad. (2 Timoti 3:​16, 17; 4:​13) Sakakaay kalimlaan i, pakasoˈlinay ci Pawlo tada maolahay ci Yihofa aci Yis cingranan. w21.03 18 fiedac 17-​18 fatac

Mikitini saka 2 hahekalan misatapang, matongalay ko makaniway a Krisciyang micomod i kasakopang, tano mararaway a kimad cangra mitahepo to soˈlinay kimad no Fangcalay Cudad. Mikitiya misatapang tahini 1870 miheca, cowa ka likakawaen ko soˈlinay midoko to Kawas a tamdaw. O makaniway Krisciyang malecaday ciwarakay emi kalikiay a matongal, hato cowa ka hapinang no tamdaw o cima ko soˈlinay a Krisciyang. (Matay 13:36-​43) Mahapinangay ita, oya tatokian awaay ko ‘kaˈamisay hongti’ anca ‘katimolay hongti.’ Samanen mikitini saka 2 hahekalan tahini 1870 miheca, cowa ka likakawaen ko soˈlinay midoko to Kawas a tamdaw, mansa awaay ko mikowanay to mamiˈodis to finawlan no Kawas. Ikor no 1870 miheca, masadakayto ko kaˈamisay hongti ato katimolay hongti. w20.05 3 fiedac 5 fatac

Paˈayaway ci Yoil, iraay ko taˈangayay ˈopo a ririˈ micomoday i Israil, awaay ko maˈosaway a komaen! (Yoil 1:​4) Adihayay mihecaan, sowal no likakawa no Kawas o masowalay i sapairasol a ririˈ o finawlan ni Yihofa, o mitosilay a demak nangra malecaday o ririˈ a micomod caay kafilo a miˈeteng, i Yoil 1:6 a ‘kitakit’ oyaan makayhiday no ˈaˈideman no pidoyongan ko mitoroˈan, pakayni i mitenakan a lihaf taˈangayay ko pisetiˈ cangraanan. Kawra ano songilaˈen mitadtad ko fafekang ato laeno a sinael, wa mahapinang to sasalofen ko pitadtad isalakat. Sowal ni Yihofa: ‘Laplapen Ako paliyas tamowanan ko kaˈamisay a sofitay [ririˈ].’ (Yoil 2:​20) Ano mitaypiyaway ko ririˈ toya midoedoay to limoˈot ni Yis mitosil a Misawacayay Tamdaw ni Yihofa, hano laplapen ni Yihofa cangra hani? (Icikil 33:​7-9; Matay 28:19, 20) Mahapinangay, ora lalaplapen ni Yihofa a ‘ririˈ’ cowa ko finawlan Ningra, oyaan misafelitay to finawlan Ningra a tamdaw. w20.04 3 fiedac 3-5 fatac

Ano cowa ka tangsol ci Yihofa pacaˈof to satolon ita, ano saan kita miharateng i, sasamaan to hani? Sowal ni Yakop, wa ‘padadotoc kita micangacang.’ Mihaen ko demak ita, cowa ko mamaˈisang ko Kawas, cowa ko mamirikec kitaanan. Micangacang kita to sapafeli no kakarayan Wama a inaneng, misiˈayaw to sapalifet, wa ‘makahi Cingra paladaˈ.’ (ˈOlic 25:12, 13) Mafanaˈay Cingra to malifaay ita a sapalifet, ato roray ita, makalimay sapadamaaw kitaanan. Tada kalipahakanto konini! Mihaenay, wa samaan ci Yihofa pafeli to taneng kitaanan hani? Pakaynian ni Yihofa i kimad Ningra pafeli to taneng i kitaanan. (Taneng 2:6) Mihaenay, wa micekiw kita to Fangcalay Cudad ato mitepangan a cudad. Kawra, cowa ko pinanam aca to sifanaˈ, saka dademakenho ko minanaman. Sowal ni Yakop: ‘Saka dademaken namo ko kimad no Kawas, aka o pitengil aca.’ (Yakop 1:​22) Misaka dademak kita to safalod no Fangcalay Cudad wa micowat to rihadayay, mangalef makahi a micaˈi, matongal ko siniˈadaay falocoˈ. (Yakop 3:​17) O hatiniay a capeling papadama kitaanan miremo to masakenaay a sapalifet, padadotoc a lipahak. w21.02 29 fiedac 10-​11 fatac

Ano milifok ko pacekiwan to sadama no salikaka i kasakopang, matongalay ko kacakat, salikor malo Krisciyangay. Ngaˈay padama ko kahacecay a mitosilay to minanamay to Fangcalay Cudad a tamdaw malo Krisciyang, mirienang to kasakopang. (Ifiso 4:​16) Ira ko cecay misakafahay sanay cingra: “Palahad to wawa matenes misaaliay to sadama no polong niyaroˈ a tamdaw. Harateng ako malecaday padama to tamdaw malo Krisciyang, misaaliay to sadama no polong a kasakopang.” Palahad to wawa misaaliay to sadama no paro no lomaˈ, widang ato singsi, pakalalok cangra to wawa, pasifanaˈ to wawa to kalimlaan a kimad. Malecaday, o salikaka mihadak to sapaini to pacekiwan, pakalalok cangranan, patireng to ngaˈayay taˈarawan nangra, ngaˈayho padama cangranan padotoc macakat, malo Krisciyang. (Taneng 15:22) Maˈaraw no pacekiway a singsi ko pipadama no tao to pacekiwan no niyah, hano o mamahemek hani? Samanen o kacakat no pacekiwan o minaroˈan no ˈalomanay tamdaw. w21.03 8 fiedac 1-3 fatac

Ano hakowato ko mihecaan no Krisciyang oha mamisinanot, aka o potal aca ko sao midokoay ci Yihofaan, itini aikor midemak to mararaway a demak. Paihkalay ci Yohani, ano midemak kita to malafoay a demak, cowato ko midoedoay to soˈlinay kimad a dademak. (1 Yohani 1:6) Sapilifokaw kita to pihayda ni Yihofa, o waywayan a dademak o papaihkalen to ˈodingaray. Ano midemak kita to tatiihay a demak, soˈlin cowa ka ˈaraw no tao, o mamaˈaraw ni Yihofa. (Hipray 4:​13) Aka mafiyor kita to pinengneng no hekal tamdaw to raraw. Itini lintad ni Yohani, sowal no misafelitay to kimad a tamdaw, soˈlin padeteng a mararaw ko tamdaw, wa ngaˈayho padotoc a malo widang no Kawas sanay. Anini, malecaday ko harateng no ˈalomanay tamdaw. Pakasoˈlinay to Kawas sanay ko ˈalomanay, kawra pakayni i o maanan ko raraw, cowa pihayda cangra to pinengneng ni Yihofa, mangalef ko pakayniay madadiˈiyay a demak, haratengay sanay cangra a midemak. O roma waywayan o mararaway sanay ko pinengneng ni Yihofa, kawra kaolahan no niyah, o pakayraan a maˈorip sanay cangra. w20.07 22 fiedac 7-8 fatac

Ano misaali to sapadama ko fafahiyan salikaka i, patadoay kiso cangranan a somowal hokira? Haratengen ko laenoay tinakoan. Cecay fafahiyan salikaka cowa pihakelong ko faˈinay, maosoyayto a mirienang to saˈopo, mahererek tangsolay miliyas, hanaca cowa ka rarid miˈorong to wawa mirienang to saˈopo. Milikafay ko roma tamdaw toniya fafahiyan salikaka, ano samaanto ko harateng no faˈinay papadotoc miˈorong to wawa mirienang to saˈopo saan miharateng. Soˈlinay i, misarocodayto koniya fafahiyan salikaka a midemak. O pilimasmas ningra to toki cowa ka haratengay saan ko niyah misaˈosi, ngangaˈay ko wawa mirienang to saˈopo hokira cowa ko cingra ko mamisaˈosi. Ano pakahemeken iso koniya fafahiyan salikaka, pasowal to tao ngaˈayay ko midemakan ningra, mihaen ecato pilikaf ko tao cingranan alatek. Malohemay malitengay mafanaˈay cangra mitokelay ci Yihofa ngaˈay ko pidimokos to fafahiyan salikaka. (Yakop 1:​27) Mihaenay, wa mitodong cangra ci Yisan, paihkal to micaˈiyay a waywayan. Wa patado cangra to fafahiyan salikaka a miharateng, cipinang to nafalocoˈan nangra, cowa ko misaˈosian no tamdaw ko tatooren. (Matay 15:22-​28) Talaˈayaw ko malohemay malitengay ciharateng to fafahiyan salikaka, o mamatinako nangra ko pidipot ni Yihofa ato likakawa no Kawas. w20.09 24-​25 fiedac 17-​19 fatac

Pairasolay ci Taniil misamimingay ko harateng, pasayraay ci Yihofaan micangacang to sakayat. Kinacecayay, mitadtaday ci Taniil to mitiihan no hongti ci Nipukatnicar, cowa pasowal cingra to mitadiˈecay to ˈicel noniyah, panokayay to ˈdil ci Yihofaan. (Taniil 2:​26-​28) Wa ngaˈay mananam ita ko maanan hani? Ano maolahay ko salikaka mitengil to mihadakan ita a kimad, anca ngaˈayay ko minaroˈan ita i pitosilan, aka mapawan panokay to ˈdil ci Yihofaan. O mamihai kita, ano awaay ko sapadama ni Yihofa, wa awa ko mamadangal ita a demak. (Filipi 4:​13) Tada misamimingay ci Yis, ngaˈayay todongen ita. Kihcod a demak mitadiˈecay cingra ci Yihofaan. (Yohani 5:​19, 30) Caay ka ciharateng cingra sapiˈafasaw to fadangalan. Itini Filipi 2:6 sanay: ‘Caay ka ciharateng cingra sapiˈafasaw to malecaday no Kawas a saaroˈan.’ O mitengilay to sowal a Wawa cingra, mikangodoay cingra to fadangalan no kakarayan Wama. Cipinangay to citolasay ko fadangalan no niyah. w20.08 11 fiedac 12-​13 fatac

O malifaay no roma salikaka a pasangaray cowa ko kafanaˈan no tao. Ano pasangaray ko kaˈorip iso, pakararawayho ko tao tisowanan, ngaˈay kiso mikitini i taˈarawan ni Mifiposit milifok to sapakalalok. (2 Samuil 4:4) O masamoˈay cingra, pakararawanho ni Tafiti cingra. Kawra cowa ka pakidem ko katoled ningra, ao padotocay a miakoˈid ko falocoˈ. Miakoˈiday cingra na sidaˈitay ci Tafiti cingranan. (2 Samuil 9:​6-​10) Mihaenay tiya pakararawen ni Tafiti cingra i, cowa ka maketer cingra anca miroroh ci Yihofaan, ao misinanotay to sasamaan midama to minilnilan ni Yihofa a hongti. (2 Samuil 16:​1-4; 19:24-​30) Tiliden ni Yihofa ko nalifetan ni Mifiposit i Fangcalay Cudad, wa ngaˈay kita minanam cingranan.​—Loma 15:4. w20.04 26 fiedac 3 fatac; 30 fiedac 18-​19 fatac

Itini kasakopang, mikiriwiˈay manilnil mitosilay, mikiriwiˈay misakafahay ato miceriday misakafahay. Oniya salikaka mieminay to toki mirienang to mitosilay, soˈlin cowa ka cihafay ko kaˈorip nangra, kawra adihayay ko sapalemed ni Yihofa cangranan. (Marko 10:29, 30) Tangongolay ko olah ita toniya salikaka, ira cangra i kasakopang, tada aakoˈiden ita ci Yihofa! Edengan ko mikayatay a salikaka ato mieminay to toki a mitosilay ko iraay ko saaroˈan i kasakopang han? Cowa ka hatira! O kahacecay milasilay to ngaˈayay lihaf a mitosilay o kalimlaan maemin. (Loma 10:15; 1 Korinto 3:​6-8) Samanen iraay ko kalimlaan a tayal no kasakopang no Krisciyang, padama to tamdaw malo nisawawaan ni Kristo. (Matay 28:19, 20; 1 Timoti 2:4) Polong mirienangay mitosil a salikaka i kasakopang, ano micadaayto paputisem anca cowaho picada to paputisem a mitosilay, misaˈicelay paisalakat to mitosilay a tayal i nokaˈorip.​—Matay 24:14. w20.08 21 fiedac 7-8 fatac

Mihaen o sinael anini ngaˈay mahapinang ita, ano misiˈayaw kita to sapalifet i, wa midama ci Yis kitaanan, Oniya sowal ni Yis pafeliay to taˈangayay ˈicel ita. Pakayni kitaanan, pasangaray ko roma romiˈad. Tinakoen, mapatay ko salawina i, o adada no falocoˈ ita cowa ko pina aca romiˈad, ao pinaay a mihecaan. O roma tamdaw matoˈasayto, matongalay ko pasangaray. O roma tamdaw itini roma romiˈad mikiriwiˈay a matoled. Soˈlin mahaen, wa ngaˈayho ira ko ˈicel ita padotoc a mihadidi, samanen mikiˈokay ci Yis ‘toniya kihcod a romiˈad,’ mahawpay ko sapasangaray a romiˈad i nokaˈorip ita, wa kalacafay cingra kitaanan. (Matay 11:​28-​30) Mikiˈokay ko Fangcalay Cudad, ci Yihofa wa pakayni i coyoh padama kitaanan. (Hipray 1:​7, 14) Tinakoen, ano pasayra kita i asakitakit itini i hekal, i kasafinacadan, i kasangasaw, i kasasi romaroma no sowal ato kasafinawlanmilasil to ‘ngaˈayay lihaf no Hongti Kitakit’ i, wa damaen no coyoh kita, pafeli to sakayat kitanan.​—Matay 24:13, 14; Paˈarawan 14:6. w20.11 13-​14 fiedac 6-7 fatac

Mitokelay kita cipinang ko pacekiwan, o mananamay ningra a kimad o mikitiniay i Fangcalay Cudad. (1 Tisalonika 2:​13) Sasamaan ko hademak ita hani? Pakalaloken ko pacekiwan mihadak to harateng no niyah. Hamaan o niyah saan ko mitadtad to sinael, latekay papitadtaden ko pacekiwan. Padamaen ita ko pacekiwan mihapinang, samaan cingra misaka dademak to sinael. Saka dademaken ko salicay, papisowalen ko pacekiwan to kacipinang ato nafalocoˈan ningra pakayni i sinael. (Luka 10:25-​28) Tinakoen, licayen ko pacekiwan: “Mikitini sinael mahapinangay iso ko maanan a capeling ni Yihofa?” “Oniya sinael samaan padama tisowanan?” “Pakayni mananamay iso a lalakaw samanay ko harateng iso?” Sakakaay i, cowa ko hakowaay ko sifanaˈ no pacekiwan, ao hakowaay ko kaolah ningra toniya sifanaˈ, ato ngangaˈay saka dademaken ko mananamay no niyah hokira. Ano pasifanaˈ saka dademaken ko Fangcalay Cudad. Sapacakataw to inaneng pasifanaˈ, kalimlaan ko misapoeneray. w20.10 15 fiedac 5-6 fatac

Ngaˈay kita pakasoˈlin, wa matoor ko toki malaheci ko mitosilay a tayal. Haratengen, mifekaday i lintad ni Nowa a demak misawacayay to mitooray ci Yihofa to toki. Itini ˈayaw no lenlen 120 miheca, misaˈosiayto Cingra to pitefadan to lenlen a toki. Ikor no pina poloˈ miheca, palimoˈotan ni Yihofa ci Nowa misangaˈ to tamina, ˈayaw no matefad ko lenlen, malalokay ci Nowa matayal to 40 tahira 50 miheca. Soˈlin caka pisikor ko tamdaw to pirikec ningra, kamayan padadotoc cingra mitosil, tahira pipasowal ni Yihofa pacomod to pinaˈorip i tamina ko tolas. Ikor, maraod ko misaˈosian a toki, “miˈdefanto ni Yihofa ko fawahan no tamina.” (Satapangan 6:3; 7:​1, 2, 16) Cato ka halafin, pasifanaˈento ni Yihofa kita malaheciayto ko mitosilay a tayal. Maraod ko toki, palaˈafoento Ningra ko tatiihay hekal ni Satan, paitini moecelay faelohay hekal paˈorip kitaanan. ˈAyaw nonini, nanay todongen ita ci Nowa, ato tanektekay caka pisawad a tamdaw, padadotoc misarocod ato mihadidi, pakasoˈlin to sakiˈok ni Yihofa! w20.09 13 fiedac 18-​19 fatac

Ano awa ko mikeriday a limasmas, wa sasifod saan ko taˈangayay a paro no lomaˈ ni Yihofa, ecato ka lipahak. Tinakoen, o salikoray a saˈosi i, caka fanaˈ ko ˈalomanay to cima ko mamisaˈosi, o cima ko mamidemak toniya misaˈosiyan. Ano o ngaˈayay a limasmas ko fadangalan no kakeridan, o ˈalomanay fafahiyan hano mapaekelay ato makowanay no faˈinay saan a miharateng hani? Samanen ˈalomanay a faˈinayan mihakelongay to nanaman anca nolitengan, cowa pisikol to palinian no Kawas. Roma lalangian i, sapirenecaw ko faˈinay to malikoay falocoˈ, sapisawacayaw to idahiyay ko niyah, o soˈlinay a faˈinayan. Harateng ningra, soˈlin caka ngaˈay pacieci to fafahi a maolah cingranan, wa ngaˈay paˈangi cingranan, mihaen wa ngaˈayto a ontingen cingra. O mahaenay harateng ato demak o cowa ka pikangodo to fafahiyan, misafelitay to harateng ni Yihofa.​—Ifiso 5:​25, 28. w21.02 3 fiedac 6-7 fatac

Mikifalocoˈ kita mitolon ci Yihofaan, mamalowan ko saroero. Papacaˈofen ni Yihofa ko satolon ita, ‘pafeli kitaanan to mataˈlifay ko maharatengay a rihaday.’ (Filipi 4:​6, 7) Taˈangayay ko ˈicel no Fangcalay saocor, pafeliay ci Yihofa to mahaenay a ˈicel padama kitaanan miliyaw a rihaday ko falocoˈ. (Kalatiya 5:​22) Ano mitolon kita ci Yihofaan i, hadaken ko nai falocoˈay a sowal, pasowalen Cingra to malifaay a pasangaray, ato nafalocoˈan iso. Ano iraay ko hapakayraan a misaysay, cangacangen ci Yihofa pafeli tisowanan to taneng mikilim toniya pakayraan, hanaca ira ko ˈicel a dademak. Ano cowa ko mamasaysay koni a pasangaray i, cangacangen ko sapadama ni Yihofa eca ka pakidem ko calemcem. Ihkalen ko satolon iso, caka halafin mamahapinang samaanay ci Yihofa pacaˈof. Hanaca soˈlin caka tangsol a milifok to sapacaˈof, aka a pisawad. Makalimay ci Yihofa tisowanan ihkal ko pitolon Cingraanan, mangalayayho kisowanan padadotoc mihaen to demak.​—Luka 11:​8-​10. w21.01 3 fiedac 6-7 fatac

O roma salikaka i kasakopang ciraramodayto, iraay ko niyah a paro no lomaˈ, kawra iraay ko cowa ciraramod a salikaka. Mihaenay, sasamaan ko pinengneng ita to awaay ko ramod a salikaka hani? Haratengen ita ko pinengneng ni Yis. Itini hekal ci Yis cowa ka ciraramod, padotocay cingra caka ciramod, misaka dademakan ko toki ato ˈicel i patorodan no Kawas cingranan a tayal. Cowa pasowal ci Yis, caciramod anca aka ciramod ko nisawawaan ningra. Kawra somowalay cingra, o roma tamdaw misaˈosiay eca ka ciramod. (Matay 19:12) O masafaay ko cowa ciramod a tamdaw cowa kasaan ci Yis, anca cowa ka renec ko kaˈorip nangra saan a miharateng, tada mikangodoay cingra to cowa ciramod a tamdaw. Malecaday ci Pawlo ci Yisan, matayal saki Kawas a tatokian padotocay eca ka ciramod. Harateng ni Pawlo ciraramod cowa ko mararaway, mafanaˈay cingra caciramod hokira oniyah a saˈosi. w20.08 28 fiedac 7-8 fatac

Koˈedaway ko ˈorip no tarokos ci Yohani, kasemeran ko hakelong nokaˈorip. Soˈlin adihayay ko malifaay ningra a pasangaray, kawra cowa ka lahdaw ko pakasoˈlin. Padotocay misarocod midofodof to limoˈot ni Yis, mahawpay ko kaolah to salikaka oniya limoˈot. Mihaenay, pakasoˈlinay ci Yohani maolahay ci Yihofa aci Yis cingraanan, hanaca pafeliay cingraanan to ˈicel misaysay to masakenaay a sapalifet. (Yohani 14:15-​17; 15:10) Ano samaanto ko demak ni Satan ato hekal, cowa pakaˈafas to olah ni Yohani i falocoˈ, cowa ka pakaconged cingraanan tano sowal tano waywayan paihkal to olah i salikaka. Malecad ci Yohanian, itiniay kita makowanay ni Satan a hekal maˈorp, o kawas noniya hekal cingra, matomesay ko ˈinteh no falocoˈ. (1 Yohani 3:​1, 10) Misamacayay ci Satan miconged kitaanan maolah to salikaka, ano eca pafelien ita cingra to toki, cowa ko mamalaˈosi cingra. Nanay seteken ita ko falocoˈ, maolah to salikaka. Cowa ko tano sowal aca, tano waywayanho paihkal to olah no mita. Mihaen ko demak ita, wa pakayni i noka masalalomaˈ no paro no lomaˈ ni Yihofa, marenec ko falocoˈ ita, wa ciepoc ko hakelong no kaˈorip ita.​—1 Yohani 4:7. w21.01 13 fiedac 18-​19 fatac

Itini mikowanan ni Satan a hekal, adihayay ko malifaay ita a pasangaray, latekay cowato ka fanaˈ to sasamaan ko hademak. (2 Timoti 3:1) Kawra cowa ko cacalecem kita, cowa ko mamatalaw. Mikiˈokay ci Yihofa wa tano ciˈicelay a kawanan a kamay midama kitaanan. (Isaya 41:10, 13) Pakasoˈlinay kita, misarocod kita micekiw to Fangcalay Cudad, wa milifok to sadama ni Yihofa, ira ko ˈicel miremo to masakenaay a sapalifet. O ika ita, cingihaay a cohi ato “Taˈarawan no Pakasoˈlinay Falocoˈ” madadoedoay lalakaw, wa ngaˈay malecad o maˈoripay i ˈaˈayaw iso koniya maˈoningay. ˈAyaw no minengneng, mitengil ato miasip kiso toniya mitepangan i, cangacangen ci Yihofa padama tisowanan mihapinang to ciepocay tisowanan a safalod. Haratengen to itiraay kiso i kaˈoripan nora tamdaw a kitiraan, midotim to samanay ko demak noniya madimadiay a sikawdan ni Yihofa, ato samanay ci Yihofa padama cangranan milakowit to pasangaray, dotoc sakadademaken ko mananamay iso. Akoˈiden ko nano demak ni Yihofa tisowanan. Sapaihkalaw to miakoˈiday falocoˈ, kilimen ko toki pakalalok ato padama to salikaka. w21.03 19 fiedac 22-​23 fatac

Ano ciraramoday to kiso, ciharateng saka ci wawaaw, ngaˈayay licayen namo ko niyah: ‘O misapoeneray a tamdaw kami han? Soˈlinay kami maolah ci Yihofaan ato sowal Ningra han? Wa rihaday ci Yihofa patorod tamiyanan midimokos to faelohay ˈorip han?’ (ˈOlic 127:4) Ano iraayto ko wawa iso, ngaˈayay licayen ko niyah: ‘Pasifanaˈan ako ko wawa malalok a matayal han?’ (Patnakay 3:​12,13) ‘Madokaˈay ko tireng no wawa alatek, o harateng nangra mafiyoray alatek, misarocoday kako a midipot cangranan han?’ (Taneng 22:3) Manaokaniw, midipot to wawa hoeca ka madokaˈ cowa ko madoloay. Kawra, ngaˈayay hadidien iso a pasifanaˈ cangra, padama cangranan minanam ano tahasiˈayaw to masakenaay a pasangaray i, mikilim to sakayat no Fangcalay Cudad. (Taneng 2:​1-6) Tinakoen, ano cato pidoko ko salawina ci Yihofaan, ngaˈayay saka dademaken iso ko Fangcalay Cudad padama to wawa mihapinang, padotoc a madimadi ci Yihofaan o kalimlaan. (ˈOlic 31:23) Ano ira ko mapatayay tamdaw i lomaˈ, ngaˈayay paˈarawen iso ko wawa to mamihinom cingranan, padama to sakarihaday no falocoˈ ningra a sinael.​—2 Korinto 1:​3, 4; 2 Timoti 3:​16. w20.10 27 fiedac 7 fatac