Saka 11 Folad

Haratengen ci Yona, palimoˈotan ni Yihofa cingra tayra i Ninifi milasil to sasawkit a lihaf, kawra mikalicay cingra to tamina pasayra masafelitay a patosokan malingad, ‘sapilimekaw ci Yihofaan.’ (Yona 1:​1-3) Pakayni ka cangoˈot no kacipinang ci Yonaan, o cowa kangaˈay pakasoˈlinen cingra, o cowa ka madimadi wa saan ko piharateng ita. Ano kiso i, wa pafelienho iso ci Yona to hatoki han? Eca alatek. Kawra pafelienho cingra to toki sanay ko piharateng ni Yihofa. (Yona 3:​1, 2) O satolon ni Yona i tiyad no foting, wa mahapinang ita ko soˈlinay a waywayan ningra. (Yona 2:​1, 2, 9) Madeng kinapinapinaay ci Yona mitolon ci Yihofaan, oniya satolon paihkalay, o misapoeneray ko falocoˈ ningra, matomesay to miakoˈiday a falocoˈ, misetekay to falocoˈ midofdof to limoˈot ni Yihofa. Mihaenay, soˈlin na milaliway cingra, pacaˈofanho ni Yihofa ko satolon ningra, padadotoc malo pairasolay Ningra. O malohemay malitengay salakatho mafanaˈ to ‘mifekaday demak’ itiya a paini to tao, tada kalimlaan mihaen to demak! w20.04 15 fiedac 4-6 fatac

Saka 1 hahekalan a Krisciyang micadaay to sapasifanaˈ ni Kristo, hanaca pakayni sapadama no fangcalay saocor a cipinang to Fangcalay Cudad, pakasoˈlin to misalalangiay koniya kimad to Fangcalay Cudad. (Dmak 17:11, 12; Hipray 5:​14) O pakasoˈlinay falocoˈ nangra cowa ko patirengan i nafalocoˈan. Midoko cangra to Kawas, cowa ko pakayniay ka lipahak a micawmaˈ to salikaka. Ira ko pakasoˈlinay falocoˈ nangra, o kafanaˈ to ‘pakayniay i Kawas a matatodongay a sifanaˈ.’ (Kolosay 1:​9, 10) O kimad no Fangcalay Cudad cowa ko mamafalic. (ˈOlic 119:160) Soˈlin pakararaw ko salikaka kitaanan anca pakidem ko raraw, anca tahalifa kita to pasangaray, kamayan o soˈlinay kimad ko sowal no Kawas, cowa ko mamafalic. Mihaenay, tatongalen ita ko kafanaˈ to Fangcalay Cudad, ato pakasoˈlin o sapasifanaˈ no Fangcalay Cudad kitaanan sahtoay o soˈlinay kimad. Malecad o ˈenor no tamina ano mafaliyos patanektekay to tamina, o soˈlinay kimad ko taˈeneran a pakasoˈlin, wa ngaˈay padadotoc a tanektek i sapalifet. w20.07 9 fiedac 6-7 fatac

Pinengneng ni Yis, midama kita to salikaka ningra malecaday o midamaay cingraanan. (Matay 25:34-​40) O kalimlaan a pakayraan ita midama cangraanan i, mihakelong to limoˈot ni Yis misarocod a padama to tao malo Krisciyang. (Matay 28:18, 19) Ano awaay ko sadama no ‘roma lopayˈay siri,’ cowa ko mamalaheci no salikaka ni Kristo koniya miedefay to cikiw a tayal. (Yohani 10:16) Ano masalalomaˈay no ‘roma lopayˈay siri’ kiso, o pitosil iso misawacayay to maolahay ko niyah to salikaka ni Kristo, maolahayho ci Yis Kristoan. O roma pakayraan ita malawidang ci Yihofaan aci Yisan i, midama to mikayatan nangra a demak. (Luka 16:9) Tinakoen, ngaˈayay pakiyaho kita midama to polong no hekal a tayal, padama to tahapadesay a salikaka. Roma i, ngaˈayay pakiyaho kita midama to mapalakay no kasakopang, anca itini sakaˈorip padama to kafanaˈan ita a salikaka.​—Taneng 19:17. w20.04 24 fiedac 12-​13 fatac

O kaˈamisay hongti hano ‘cowa pisikol to Kawas no lalitengan’ hani? Pakayni sapalaˈafoaw to pihakelongan, o mikowanay no Suwiay tano masakenaay a pakayraan milowan to ˈicel no pihakelongan, tinakoen itini 1918 miheca milasilay ko mikowanay to cecay sarikec, hato pasifanaˈay ko picudadan to awaay ko Kawas sanay a sasowalen. Samanay ko kaˈamisay hongti ‘panokay to ˈdil i polol a kawas’ hani? Sapatanoktokaw to ˈicel, adihayay ko mapalakay a payci no Suwiay micowat to sofitay, misangaˈ to adihayay kakako a sapilood a lalosidan. Adihayay a mihecaan, o kaˈamisay hongti ato katimolay hongti adihayayto ko sapilood a lalosidan, maedengay palaˈafo to pinaay poloˈ walwalan a tamdaw. Soˈlin halafinayto malalifet ko kaˈamisay hongti ato katimolay hongti, kawra itini cecay kalimlaan a demakan makakadepay cangra, ‘patireng toya papalahorac a kateliiyan a dafong.’ (Taniil 11:31) Oniya ‘kateliiyan a dafong’ o Makomoday Kitakit ko mitoroˈan. w20.05 6-7 fiedac 16-​17 fatac

Cima ko papadama mikilim to mihawaday mitosil a salikaka hani? Ano paro no lomaˈ nangra, anca malohemay malitengay no kasakopang, misakafahay ato roma mitosilay, wa ngaˈay mihadak to ˈicel. Iraay ko widang anca salawina iso mihawaday mitosil han? Itini pakalomaˈay mitosil anca mirienang to kaˈalomanay a pisawacayan i, na malitemohay iso ko mihawaday mitosil a salikaka han? Ngaˈayay pasowalen iso cingra, ano makalimay cingra ira ko tamdaw minengneng cingranan, wa ngaˈay pafelien iso ko malohemay malitengay i kasakopang to sapilinlak cingranan. Sanay ci Tomas: “Salakat milicayan ako ko salikaka, samanen mafanaˈay cangra to icowaay ko kitiraan no mihawaday mitosil a tamdaw. Milicayanho ako ko ˈalomanay maharatengay ko cima cowato pirienang to saˈopo. Ano milisoˈ kako to mihawaday mitosil a salikaka i, milicayay to pakayraan no wawa nangra ato salawina. O roma mihawaday mitosil a tamdaw miˈorongay to wawa mirienang to saˈopo i salakat, o wawa nangra nao mitosilay alatek. Oniya kaemangay misaaliay to sapadama ngaˈ ngaˈay patikol i tatihi ni Yihofa.” w20.06 24 fiedac 1 fatac; 25 fiedac 6-7 fatac

Itini lalomaˈ no pinaˈorip i cikiw, edengan ko tamdaw iraay ko sapisalof to capeling a inaneng, samanen ngaˈayay ko tamdaw pakayni pitikol miharateng ato mifolfol to mafekaday a demak minanam to sapasifanaˈ, mifalic to kaˈorip no niyah ato pakayraan a misimsim, malo ngaˈayayto a tamdaw. (1 Korinto 6:​9-​11; Kolosay 3:​9, 10) Ngaˈayay pahatatanamen ita ko makapahay falocoˈ no niyah, mafanaˈ pafafidaˈ to ngaˈayay tatiihay. (Hipray 5:​14) Ngaˈayayho kita paihkal to ciolahay falocoˈ, siniˈadaay a falocoˈ, wa ngaˈayho palahad to malecaday ni Yihofa moecelay a harateng. Sapaihkalaw kita to misalimlaay ko niyah to sapafeli no Kawas sapiharateng a inaneng, cecay pakayraan i, misaˈicel a miharateng to samanay ko Kawas misaliyaliyaw padama ato mihinom kitaanan, o papatongal to pakasoˈlin ita to papadama Cingra kitaanan no ikor. (ˈOlic 77:12; 78:​4, 7) O roma pakayraan i, haratengen ko nano demak no tao kitaanan, halo paihkal to piakoˈid cangraanan. Paihkalay ko mikingkiwan, iraay ko miakoˈiday falocoˈ a tamdaw matongalay ko lipahak. w20.05 23 fiedac 12-​13 fatac

Kinacecayay, milimekay ci Mosi itini i dihif, maˈaraway ko pahadakan ni Yihofa a ˈdil. Samanay ko harateng ningra itiya. Sowal no Sapicalep Mafanaˈ to Fangcalay Cudad, ci Mosi “malifetay ko cecay kafahkaˈan a demak, alatek ˈayaw no tayni i fafekang no sera ci Yis awaayho ko pakalifetay a tamdaw.” Dotoc i, matengilay ni Mosi ko pakaynian ni Yihofa i coyoh mihadak a sowal: ‘Yihofa, Yihofa, o siniˈadaay to tamdaw, patadoay miharateng to tamdaw a Kawas, o caay ka ranikay a maketer, iraay ko madimadiay a olah, tada soˈliˈlinay ngaˈay tiˈeren, midaˈocay ko olah to tamdaw, misododay to raraw.’ (Kasadakan 33:17-​23; 34:​5-7) Toniya sinael anini, ano masowal ni Mosi ko ngangan ni Yihofa i, alatek miliyaway maharateng koniya nalifetan. Maharateng ita ko ngangan ni “Yihofa” i, haharatengenho samanay a Kawas ci Yihofa. Ngaˈay miharateng kita to iraay ko maanan a makapahay capeling no Kawas, tinakoen o ˈicel, taneng, masadafdafay, olah ato roma makapahay capeling. Mihaen ko demak ita wa matongal ko pikangodo Cingraanan.​—ˈOlic 77:11-​15. w20.06 8-9 fiedac 3-4 fatac

Pasowalay ci Yis o tahapinangan no Krisciyang o masasiolahay. (Yohani 13:34, 35) Soˈlin o olah ngaˈayay padama kitaanan mihapinang o cima ko finawlan no Kawas, kawra sapadamaaw kitaanan a palahad to tanektekay a pakasoˈlin cowaho kaedeng konini. Pakasoˈlin kita to Kawas, cowa ko pakayniay aca i kasasiolah no Krisciyang. Misamaanay hani? Haratengen ko laenoay pakayraan: Itini kasakopang iraay ko tamdaw karetengay ko raraw, o mararaway a tamdaw o malohemay malitengay anca misakafahay. Cecay tamdaw i kasakopang midokaˈay tisowanan. Irako misafelitay to kimad i kasakopang, pasowal to cowa ko soˈlinay kimad ko minanaman ita. Ano malifa ko hatiniay pakayraan i, o mamapolin kiso, ecato pidoko ci Yihofaan hokira? Ora taˈeneran iso ano o ngaˈayay aca waywayan no salikaka, eca ko tangongolay a kalawidang no niyah to Kawas, cowa ko tatanektek ko pakasoˈlin iso. Soˈlin o olah ci Yihofaan ato salikaka ngaˈayay padama tisowanan palahad to pakasoˈlinay falocoˈ, kawra mamisarocod kiso a micekiw to Fangcalay Cudad, cipinang to mananamay a lalakaw, halo pikilim to milingatay a lalakaw, mihaen ngaˈ pakasoˈlin to pakayniay ci Yihofaan a sowal i Fangcalay Cudad sahtoay o soˈlinay kimad.​—Loma 12:2. w20.07 8 fiedac 2-3 fatac

Misawacayay ko adihayay tinakoan, padamaay ko coyoh kitaanan mahela ko makalimay patikol i tatihi ni Yihofa a tamdaw. (Paˈarawan 14:6) Itiniay i Ekuwato ci Siewiaw na micangacangay ci Yihofaan padama cingranan patikol i kasakopang. Mitolonayho cingra i, tatosaay malohemay malitengay mikongkongayto fawahan. Ngaˈay padama cingranan, tada mahemekay koniya tatosaay salikaka. Ngaˈay padama to mihawaday mitosil a tamdaw patikol i tatihi ni Yihofa, maedeng o mamahemek kita. Ci Saewato o misakafahay, tada lipahakay cingra padama to mihawaday mitosil a salikaka, sanay cingra: “Latekay, tahatangicay kako to kahemek. Maharateng ko pilidong ni Yihofa to lopayˈay siri nai hekal ni Satan, hanaca ngaˈay kako malacafay ci Yihofaan, tada malikoay ko harateng ako.” Ano mihawaday kiso micawmaˈ to finawlan ni Yihofa, ka pakasoˈlin, kamayanho a maolah ci Yihofa tisowanan, mitokelay tisowanan patikol i tatihi Ningra. Ano patikol kiso, o mamahemek Cingra a mihamham tisowanan. w20.06 29 fiedac 16-​18 fatac

Ci Yihofa o ‘Kasapaan a Singsi,’ itini Fangcalay Cudad adihayay ko matiliday a tinakoan, ngaˈayay nanamen ita. (Isaya 30:21) Roma tamdaw paihkalay to kaolahan no Kawas a capeling, dotimen ita ko taˈarawan nangra, wa adihay ko mananamay. Roma tamdaw cowa ka paihkal to mahaenay a capeling, haratengen ita samanay ko teloc nangra, o ngaˈayay a sapasifanaˈ. (ˈOlic 37:37; 1 Korinto 10:11) Haratengen ko tinakoan ni Sawlo. Kaemang cingra i misamimingay, mafanaˈay to citolasay ko ˈicel noniyah, cowa ka timolo micada to sapatorod ni Yihofa cingranan a ˈinorong. (1 Samuil 9:​21; 10:20-​22) Kawra caka halafin ci Sawlo mala hongti misatakarawayto, midemakay to cowa ka ngaˈay demaken no niyah a demak. Kinacecayay, awaayho ci Samuil, haratengay sanay a patoˈaya i Kawas. Telocto, malahdaway ko pihayda no Kawas cingranan, salikor malahdaway ko saaroˈan no hongti. (1 Samuil 13:​8-​14) Mikitini ci Sawloan mananamay ita ko sapasifanaˈ, aka a pidemak to awaay ko fadangalan no niyah a demak. w20.08 10 fiedac 10-​11 fatac

Pakaynian ni Yihofa ci Kristoan pafeli to mikeriday tamdaw i kasakopang ‘malo sapatelong.’ (Ifiso 4:8) Oniya tamdaw mahawpay ko Malohemay Malitengay i Congpo, o dama nangra, o Iing no Fenpo, kasakilac kantok, papotalay a singsi, malohemay malitengay ato dama sikawdan. Pakaynian no Kawas i fangcalay saocor a minilnil toniya salikaka pakalalok to kasakopang, midimokos to kalimlaan a lopayˈay a siri Ningra. (1 Pitiro 5:​2, 3) O tireng iraay ko cowa ka lecad a caˈang, tinakoen o kamay anca o waˈay, kahacecay a caˈang iraay ko hademak, wa paira to epoc no tatirengan. Malecaday, ci Yihofa tano fangcalay saocor minilnil to salikaka ira ko cowa ka lecad a ˈinorong, misaˈicelay matayal cangra, palemed to polong no kasakopang. Mihaen ko demak nangra cowa ko sapilifokaw to sapakahemek, pakayniay sapakalalokaw to salikaka. (1 Tisalonika 2:​6-8) Oniya matenesay salikaka cowa pisateked a matayal saki kitaanan, tada o aakoˈiden ita ci Yihofa! w20.08 21 fiedac 5-6 fatac

Makalimay kita milasil to ngaˈayay lihaf, cecay lalangian ita malingad mitosil i, ˈalomanay tamdaw ‘masamsamay, awaay ko pitiˈeran,’ misaaliay sakafanaˈaw to kimad no Hongti Kitakit. (Matay 9:​36) Mitokelay ci Yihofa mafanaˈ to soˈlinay kimad ko masakenaay a tamdaw, salikor ngaˈay malidong. (1 Timoti 2:4) Maharateng to ngangaˈay milidong to ˈorip no tamdaw ko mitosilay tayal, matongalay ko kalim ita a mitosil. (Loma 10:13-​15; 1 Timoti 4:​16) Ano mitosil kita i, misaaliay to matatodongay a lalosidan, mafanaˈ a misaka dademak. Pakayni sasamaan ‘malo milifokay to tamdaw a mifotingay,’ ihkalay ko sakayat ni Yis, ano mitosil miˈorong to manan, o maanan ko hasowal, icowa a mitosil. (Matay 10:​5-7; Luka 10:​1-​11) Anini, misadayay ko likakawa ni Yihofa to Sapasifanaˈ a Lalosidan, adihayay ko ciepocay a lalosidan. Pasifanaˈayho ko likakawa no Kawas kitaanan sasamaan misaka dademak toniya lalosidan. Padama kitaanan misalof to inaneng a mitosil, matongal ko pakasoˈlin ita a mitosil.​—2 Timoti 2:​15. w20.09 4 fiedac 6-7, 10 fatac

Na padamaan no tarokos ci Yohani ko roma tamdaw mafanaˈ to soˈlinay kimad, tiya matengil ningra koya tamdaw padotocay madimadi midoko to Kawas i, maedeng lipahakay cingra. Adihayay ko masiˈayaway noya Krisciyang a pasangaray, misarocoday ci Yohani a paˈicel to pakasoˈlin nangra, samanen pakaynien ci Yohanian ko sowal, malecaday o wawa ningra cangra. Malecaday, maˈaraw ita ko wawa noniyah anca pacekiwan misaˈosi patafang to tireng ci Yihofaan hanaca madimadi a midoko Cingraanan, maedeng o lalipahak ko falocoˈ. (3 Yohani 3）Itini saka 98 miheca, misaka dademakan ni Yihofa ko fangcalay saocor mikayat ci Yohanian mitilid to tolo a tikami pafeli to itiyaay a Krisciyang. O araaw i, papakalalok cangranan padadotoc pakasoˈlin ci Yisan, hanaca padadotoc midoedo to soˈlinay kimad a dademak. Tada calemcemay ci Yohani, samanen iraay ko makaniway a singsi i kasakopang, tatiihay ko pifiyor to romaroma tamdaw. (1 Yohani 2:​18, 19, 26) Oniya tamdaw sao mafanaˈay ci Yihofaan, kawra cowa pidofdof to limoˈot Ningra w20.07 20 fiedac 1-3 fatac

Ano pakasoˈlin kita to milasilan no niyah a lihaf, wa fanekfek a mitenak i tamdaw. Pakasoˈlinay kita to mamalaˈosi ko sakiˈok no Fangcalay Cudad. (ˈOlic 119:42; Isaya 40:8) Maˈaraway ita ko adihayay sapairasol malaˈosiay i lintad no mita, maˈarawayho, ikor no mitoor ko ˈalomanay tamdaw to safalod no Fangcalay Cudad a maˈorip i, makapahayto ko kaˈorip nangra. Oniya demak mitongalay to pakasoˈlin ita, misaaliay ko tamdaw sapakatengilaw to ngaˈayay lihaf no Hongti Kitakit. O papakasoˈlinen ita ci Yihofa aci Yis. O mitenakan ita a lihaf mikitiniay ci Yihofaan. Mafanaˈay kita, ano samaanto ko masiˈayaway ita a pakayraan, o pikiˈadingan ita ci Yihofa, o ˈicel no mita. (ˈOlic 46:​1-3) O Hongti no Hongti Kitakit no Kawas ci Yis, pafelianto ni Yihofa cingra to polong a fadangalan. O mitosilay a tayal itiniay sakayat ni Yis a midemak, mansa ngaˈay kita matomes ko pakasoˈlin. (Matay 28:18-​20) Ira ko pakasoˈlinay falocoˈ ita, wa pakasoˈlin to papalemeden ni Yihofa ko pisaˈicel ita. w20.09 12 fiedac 15-​17 fatac

Latekay, misiˈayaway ko fafahiyan salikaka to mikiriwiˈay pasangaray, misaaliay to papatado cangranan a somowal. (Isaya 1:​17) Tinakoen, o maponengay anca milikongay a fafahiyan salikaka misaaliay to padama cangranan midemak to nano demak no faˈinay a demak i salakat. O matoˈasay a fafahiyan salikaka misaaliay to papadama cangranan a pasowal to ising. O misakafahay a fafahiyan salikaka mirienangay to roma a tayal no likakawa, caka ngaˈay malecad to roma misakafahay mararid a mitosil, wa malikaf no tao alatek, ano mahaen misaaliay to papatado cangranan somowal a tamdaw. Nengnengen ko taˈarawan ni Yis. Ano mapakararaw ko fafahiyan salikaka i, tangsolay ci Yis masadak patado cangranan a somowal. Tinakoen, tiya mirikec ci Marta ci Mariyaan i, tangsolay paˈadingen ni Yis ci Mariya. (Luka 10:​38-​42) Kinacecayay, mararaway ko saˈosi ni Mariya sanay ko piharateng no tao a milikaf cingranan, paˈadingan ni Yis ci Mariya. (Marko 14:​3-9) Mafanaˈay ci Yis to ngaˈayay ko nafalocoˈan ni Mariya, pakahemekay cingranan. Pairasolayho ci Yis, ‘ano talacowato a mapatenak ko ngaˈayay lihaf,’ wa ira ko tamdaw milomal to nano demak ni Mariya. w20.09 24 fiedac 15-​16 fatac

Cipinangay ko ngaˈayay a pakaenay, moraraway ko lopayˈay siri nolatekay. Mihaenay, ano moraraw ko lopayˈay siri, cowa ko papakidem ko pisayfang no pakaenay ciraan. Itini nolitengan, o roma sikawdan ni Yihofa na cowa pidoedo to saali Ningra a midemak, nengnengen samanay ci Yihofa padama cangranan. O pairasolay ci Yona cowa picada to sapatorod ni Yihofa cingranan a ˈinorong, milaliway cingra. Kawra, cowa ka sawaden ni Yihofa cingra. Mahecaday o ngaˈayay a pakaenay, milidongan ni Yihofa ci Yona, halo pafeli to ˈicel cingranan milaheci to ˈinorong. (Yona 2:​7; 3:​1, 2) Ikorto, misakada demakan ni Yihofa ko sapatinako no katawaay padama ci Yonaan a cipinang, o ˈorip no cecacecay a tamdaw o masaka limlaan. (Yona 4:​10, 11) O manan ko mananamay ita hani? O malohemay malitengay cowa ko mamisawad to mihawaday mitosil a salikaka, ao mamisaˈicel cipinang to hano mahaen ko demak nangra. Ano patikol cangra itihi ni Yihofa, o malohemay malitengay wa padadotoc a ciharateng ato midimokos cangranan. w20.06 20-​21 fiedac 10-​12 fatac

Ikor no maliwasak ko Suwiay i 1991 miheca, milifokay to ‘miming a sapadama’ ko itiraay a salikaka, toniya tatokian ngaˈayay pasalat cangra midoko to Kawas ato mitosil. Teloc to, itini mikowanan no Suwiay a kilac, kalikiay macakat ko ˈaloman no mitosilay, pinaayto poloˈ a emang. Kawra mataˈlif ko cecay liyad, o Rowasiya ato kapot ningra malo kaˈamisay hongti. saka cipinangaw toniya mikowanay o kaˈamisay hongti anca o katimolay hongti hokira, haharatengen ko tolo a lalangian: Saka 1, oniya mikowanay misongtolay ko pifiyor to finawlan no Kawas hokira. Saka 2, oniya mikowanay misaˈadaay ci Yihofaan ato finawlan Ningra hokira. Saka 3, oniya mikowanay malalifetay to misaˈadaay a hongti hokira. O Rowasiya ato kapot ningra misongtolay ko pifiyor to finawlan no Kawas, mahawpay ko pikeceng to mitosilay a tayal, ato mipalak to masacaˈolay masaemangay a Misawacayay Tamdaw ni Yihofa. Oniya mipalakay a waywayan nangra paihkalay to misaˈadaay cangra to Kawas ato finawlan no Kawas. Padadotocay cangra malalifet to katimolay hongti, o Ikok ato Padaka Ciˈicelay Mikowan to Hekal. w20.05 12-​13 fiedac 3-4 fatac

Ano sapadamaaw kita to tamdaw malo Krisciyang, papadotoc misalof to inaneng a pasifanaˈ. Itini cowacowa pala 1,000 efan ko pacekiwan ita. Tada maolahay kita to soˈlinay kimad no Fangcalay Cudad, mansa ano milengo to soˈlinay kimad i, awaay ko tolas a somowal. Kawra, ano misikay to Mikecolay anca kasakopang a picekiw, anca pacekiw to Fangcalay Cudad, cowa ka ngaˈay adihay ko sowal no misikayay. O hamamiˈimer ko singsi no Fangcalay Cudad, ano mitadtad to sinael anca cecay kalimlaan i, aka haemin han pasowal ko pacekiwan to kafanaˈan no niyah, mihaen ngaˈ ira ko toki misaka dademak to Fangcalay Cudad a pasifanaˈ to pacekiwan. (Yohani 16:12) Itini picada ita to paputisem i, o taˈeneran aca no soˈlinay kimad ko kafanaˈan, kawra ikakaayto salakatay ko adihay no sifanaˈ ita nohatini. (Hipray 6:1) Adihayay ko mihadakan ita a toki mansa iraay ko hatiniay a sifanaˈ, mihaenay cowa ko haemin han ko kafanaˈan no niyah a pasowal to pacekiwan. w20.10 14-​15 fiedac 2-4 fatac

Patadoan ni Yihofa ci Yis mipiliˈ to sangaˈayay a wama wina. (Matay 1:​18-​23; Luka 1:​26-​38) Mikifalocoˈay a sowal ni Mariya mahapinangay ita, tada maolahay cingra ci Yihofaan ato sowal Ningra. (Luka 1:​46-​55) Makahiyay ci Yosif midofdof to sakayat ni Yihofa, mitadtaday konini tada mikangodoay cingra to Kawas, makalim pakahemek to Kawas. (Matay 1:​24) Cowa patadoen ni Yihofa ci Yis mipiliˈ to cihafayay a wama wina. Ikor no hofocen ci Yis o sapatafang ni Yosif aci Mariya wa mahapinang ita, awaay ko payci nangra. (Luka 2:​24) Papitoay ko wawa ningra aci Mariya, madeng kantangay ko kaˈorip nangra. (Matay 13:​55, 56) Soˈlin tahalifa ci Yis to katalawan i, midipotan ni Yihofa cingra, kawra mihaiyan ni Yihofa misiˈayaw ci Yis to pasangaray ato sapalifet. (Matay 2:​13-​15) Tinakoen, paro no lomaˈ ni Yis salakat cowa pakasoˈlin to ci Misiya cingra, madeng masomaday ci Yis. (Marko 3:​21; Yohani 7:5) Roma i, madeng kaemangho ci Yis mapatayayto ci Yosif. w20.10 26-​27 fiedac 4-6 fatac

Misiˈayaw kiso to pasangaray i, matoˈolay awaay ko padamaay sanay kiso miharateng han? Mahaenay ko harateng no ˈalomanay tamdaw, masalalomaˈay ko madimadiay sikawdan no Kawas. (1 Hongti 19:14) Ano iraay ko mahaenay harateng iso, aka mapawan to sakiˈok ni Yihofa, sanay Cingra: ‘Caay piliyas, caay pifalah Kako i tisowanan.’ Wa ngaˈay pakasoˈlin kita a somowal: ‘Ira ci Yihofa padama takowanan, cowa ko mamatalaw kako.’ (Hipray 13:​5, 6) Oniya sowal itiniay saka 61 miheca sapatikami ni Pawlo to Yutiyaay a Krisciyang. Maharatengay ita ko nafalocoˈan no mitiliday to ˈOlic itini ˈOlic 118:​5-7. Malecad to mitiliday to ˈOlic, matinakoay ni Pawlo padotocay ci Yihofa a padama cingranan. Tinakoen, ˈayaw no mitilid cingra to Hipray tosa miheca, tahalifaay ci Pawlo to taˈangayay faliyos i riyar. (Dmak 27:​4, 15, 20) Itini toniya piliwko ato ˈayaway a tatokian, padotocay ci Yihofa tano masakenaay pakayraan padama ci Pawloan. w20.11 12 fiedac 1-2 fatac

Haharateng saan to ikakaay ko ngaˈay no iˈayaway a kaˈorip to aniniay hano cowa ko citanengay hani? Tangoˈol to iˈayaway o ngaˈay aca i salakat ko maharatengay. Tinakoen ko nolitengan Israil, ikor no miliyas cangra to Icip, kahenayay mapawan to pasangar no kaˈorip iˈayaw, o ngaˈayay aca a kakaenen ko maharatengay. Sanay cangra: ‘Maharatengay niyam itiniho i Icip cowa pipalak to payci iraayto ko foting, iraayho ko fidaol, kacawasay, kocay, tamaniki, ato sowan!’ (Saˈosi 11:5) Kawra soˈlinay caka pipalak cangra to payci iraayto ko kakaenen han? Cowa. Itiya marorayay ko kaˈorip no Israil, malakoliay cangra i Icip, taˈangayay ko saroero. (Kasadakan 1:​13, 14; 3:​6-9) Ikor mapawanay cangra toniya roray, makalim sapatikolaw to iˈayaway. Cowa pisinanot cangra to sapalemed ni Yihofa cangranan, ikakaay ko ngaˈay no iˈayaway saan miharateng. Cowa ka hemek ci Yihofa tonini.​—Saˈosi 11:10. w20.11 25 fiedac 5-6 fatac

Nolatekay, maharateng ita ko ˈorip no niyah kamotoˈay, hanaca “matomesay ko cariraw,” matoleday ko falocoˈ. (Yopu 14:1) Itini nolitengan, o madimadiay sikawdan ni Yihofa iraay ko mahaenay a harateng, o roma tamdaw sakapatayaw sanay. (1 Hongti 19:​2-4; Yopu 3:​1-3, 11; 7:​15, 16) Kawra, oya mitiˈeran nangra a Kawas ci Yihofa saliyaliyaw sanay pakalalok cangranan, padama cangranan tanoktok. O tinakoan nangra matiliday i Fangcalay Cudad, sahto o sapasifanaˈ kitaanan, pafeli kitanan to sahinom. (Loma 15:4) Haratengen ko wawa ni Yakop ci Yosif. Cecay liyad, mikitini kaolahan a wawa ci Yosif, malo sasafaayto a koli, mamatayal i midokoay to makaniway kawas a tamdaw. (Satapangan 37:​3, 4, 21-​28; 39:1) O fafahi ni Potifa paolafay ci Yosifan to mamiˈodang cingranan, cowa pitiyawca ci Potifa to samanay ko demak palit hananay ci Yosif. Itira, pakadangan ko waˈay ni Yosif. (Satapangan 39:14-​20; ˈOlic 105:17, 18) Ano matoled ko harateng ni Yosif, o matatodongay konini. w20.12 16-​17 fiedac 1-4 fatac

Sowal ningra kalimlaan mihaen ko pitolon. Kawra ‘patalahkal malo fangcalay’ o maanan ko tatodong hani? Misowalan itini ‘fangcalay’ o makoracay, kasapaan, macingkiyatay. Harateng no roma tamdaw: ‘O Yihofa sanay a ngangan o makoracay sanay, hano patalahkalenho to fangcalay hani?’ Sapacaˈofaw toniya salicay, nengnengen ita mitaypiyaway koniya ngangan to manan. O cecay ngangan cowa ko pitilid anca piˈosi aca to pina tatilidan. Sowal no Fangcalay Cudad: ‘Mipiliˈ to hafay cowa pakafilo mipiliˈ to makapahay ngangan.’ (Taneng 22:1; Patnakay 7:1) Kalimlaan ko ngangan, mitaypiyaway to makapahay ngangan no tamdaw, o pinengneng no tao cingranan. Mihaenay, o cecay ngangan samanen mitilid ato samanen miˈosi cowa ko kalimlaan, sakakaay i, maˈaraw anca matengil no tamdaw koniya ngangan i, samanay ko pinengneng to cinganganay a tamdaw.Misamangahay ko tamdaw a paoraf ci Yihofaan, mipalak to ngangan Ningra, pakaditay to ngangan Ningra. w20.06 3 fiedac 5-7 fatac

Misiˈayaw to taˈangayay a saroero, macariraway ko harateng ita alatek. Tinakoen, calemcemay kita cangoˈotay ko mietanan a payci sakaˈorip, anca calemcemay to adada, caka ngaˈay malingad matayal, anca malahdaw ko katayalan. Alatek calemcemayho kita mamakayhid ko niyah mararaw, caka madimadi to Kawas. Roma i, caka halafin wa owingen ni Satan ko midamaay cingranan miˈodis to finawlan no Kawas, cacalemcemho kita alatek caka ngaˈay kita misiˈayaw. Telocto wa saan kita miharateng: Calemcem kako to hatiniay a demak o matatodongay hokira? Na pasowalan ni Yis ko nisawawaan ningra: ‘Aka to macariraw.’ (Matay 6:​25) Tatodong ningra i, coka ngaˈay cariraw kita to polong a demak hokira? Cowa ka hatira. Nolitengan, o madimadiay a sikawdan ni Yihofa macariraway cakarihaday, kawra cowa ka hawaden ni Yihofa cangra. (1 Hongti 19:4) Mihaen ko sowal ni Yis, o mihinomay kitaanan. Cowa ka ngalay Cingra pakidem ko cariraw no falocoˈ ita cato ka ngaˈay a misamacay midoko to Kawas. w21.01 3 fiedac 4-5 fatac

O faˈinay itini picada to paro no lomaˈ, o mamisiˈayaw ci Yihofaan aci Yisan. (1 Pitiro 3:7) O tawki no taˈangayay paro no lomaˈ no dohaw ci Yihofa, iraay ko fadangalan patireng to rikec no lomaˈ. (Isaya 33:22) O fongoh no kasakopang ci Yis, iraay ko fadangalan patireng to rikec no kasakopang ato midemak to rikec. (Kalatiya 6:2; Kolosay 1:​18-​20) Malecad ci Yihofaan aci Yisan, tawki no lomaˈ iraay ko fadangalan pakayni i lomaˈ midemak to sasaˈosien. (Loma 7:2; Ifiso 6:4) Kawra, citolasay ko fadangalan ningra. Tinakoen, o patirengan ningra a rikec no lomaˈ patatodongen to safalod no Fangcalay Cudad. (Taneng 3:​5, 6) O tawki no lomaˈ awaay ko fadangalan patireng to potalay no lomaˈ a sarikec. (Loma 14:4) Roma i, lomahadto ko wawa miliyas to lomaˈ wa padadotoc a mikangodo to wama, kawra cowato ko tawki no lomaˈ nangra ko wama.​—Matay 19:5. w21.02 2-3 fiedac 3-5 fatac

Tawki no lomaˈ o kalimlaan a pakayraan ciharateng to paro no lomaˈ i, paririˈen cangra to sakaˈorip. Kawra haharatengen nangra, kalimlaan ko pirenec to dafongan a saali no paro no lomaˈ, kawra sakakaay kalimlaan i parenecen ko noˈadingoan a saali nangra. (Matay 5:3) Tiya paceken ci Yis i pisemsemay hecek, mamapatayto i, ciharatengay cingra milifok ci Mariya to sadimokos. Soˈlin pakidemay ko adada, patorodan ningra ci Yohani midipot to wina ningra ci Mariyaan. (Yohani 19:26, 27) Malo tawkiay no paro no lomaˈ a salikaka adihayay ko ˈinorong alatek, tinakoen wa malalok cingra a mawmah paririˈ to paro no lomaˈ, ngaˈay paˈdil ci Yihofaan. (Ifiso 6:​5, 6; Titus 2:​9, 10) Itini kasakopang iraay ko adihayay a ˈinorong ningra alatek, tinakoen padama to salikaka ato mikerid to mitosilay a tayal. O roma i, mamikeridho cingra to paro no lomaˈ midoko to Kawas, micerid micekiw to Fangcalay Cudad. Mitamorong to ˈinorong ko tawki no lomaˈ, misaˈicel midimokos to tirengan, nafalocoˈan, noˈadingoan a saali no paro no lomaˈ, maedeng o mamiakoˈid ko paro no lomaˈ cingraanan.​—Ifiso 5:​28, 29; 6:4. w21.01 12 fiedac 15, 17 fatac

Sowal no Fangcalay Cudad, o cecay inanengay a fafahi mafanaˈay midimokos to demak no lomaˈ, ngaˈayho misasingdi. (Taneng 31:15, 16, 18) Cowa ko awaay ko fadangalan mihadak to harateng no niyah a koli, mitadiˈecay ko faˈinay cingranan, makahiay mitengil to sapaini ningra. (Taneng 31:11, 26) Ano mihaen ko pikangodo no faˈinay to fafahi, o mamakahi ko fafahi a midofdof to faˈinay. Adihayay ko malaˈosiay ni Yis a demak, kawra o misakahmaway to niyah a midofdof ci Yihofaan cowa ka saan ko piharateng ningra. (1 Korinto 15:28; Filipi 2:​5, 6) Malecaday, o cecay inanengay a fafahi mitodong ci Yisan a midofdof to faˈinay, cowa ko misakahmaway to niyah. Midama cingra to faˈinay, cowa ko kaolah aca to faˈinay, pakayniayho ka olah ato pikangodo ci Yihofaan. O Krisciyang a fafahi wa midofdof to faˈinay, kawra cowa ko sasahto saan a dofdofen. Ano misaali ko faˈinay to fafahi midemak to misafelitay to safalod no Fangcalay Cudad a demak, o maminaˈay cingra a midemak. w21.02 11 fiedac 14-​15 fatac; 12 fiedac 19 fatac

Mikitini nolitengan tahanini, o sikawdan ni Yihofa pakayni kaolah Cingranan hato ngaˈayay mihadidi to sapalak. Tinakoen, tiya miconged ko saˈakawangay hoing no Yutaya to tarokos a mitosil i, maolahay cangra to Kawas, mansa misetek to falocoˈ ‘midofdof to pikowan no Kawas, eca ko tamdaw ko dofdofen.’ (Dmak 5:​29; 1 Yohani 5:3) Anini, o ciˈicelay a mikowanay mariˈangay a mipalak to salikaka ita, kawra iraay ko madimadiay a olah no salikaka to Kawas, mansa tanektek a tomireng, eca ka ngiyangi. Pakayni kita pihakelongan kaˈintelen no tamdaw, cowa ka toled, malikoay ko harateng. (Dmak 5:​41; Loma 5:​4, 5) Pakayni kitaanan, o pisafelit no paro no lomaˈ pasangaray a siˈayawen. Ikor no minanam kita to Fangacalay Cudad, malipalaway no tamdaw kita sanay ko harateng no paro no lomaˈ, anca masingkiay kita sanay. (Nengnengen ko Marko 3:​21.) Alatek pakidem ko pisafelit nangra kitaanan. Cowa ko fafahka kita tonini, samanen sanay ko sowal ni Yis: ‘O ˈada no tamdaw o paro no lomaˈ.’​—Matay 10:36. w21.03 21 fiedac 6-7 fatac

Ano mirienang kiso to pipacekiw no cecay mitosilay i, ano somowal ko singsi ato pacekiwan i, wa songilaˈen iso mitengil. Mihaen, wa ngaˈay kiso i matatodongay a tatokian mihadak to matatodongay a sowal. Manaokaniw, o mamisongilaˈ kiso a mihapinang, aka adihay ko sowal, aka miketon to sowal no singsi, aka paliyas to lalangian. Ngaˈayay tano kantangay a sowal, cecay tinakoan anca salicay, mitadtad to kalimlaan. Soˈlin awa ko satongal a sowal iso, ngaˈayay pakahemeken ko pacekiwan, ciharateng cingranan, mihaen o ngangaˈay padama cingranan a macakat. Ano iraay ko sadama to pacekiwan, ngaˈay kiso pasowal to samaanay kiso minanam to Fangcalay Cudad, samanay miremo to pasangaray, anca samanay mihapinang to padadotocay ci Yihofa padama tisowanan. (ˈOlic 78:​4, 7) O nalifetan no miso wa ngaˈay pakalalok to pacekiwan alatek, tinakoen matongal ko pakasoˈlinay falocoˈ ningra, wa pakalalok cingranan sapicadaaw to paputisem. w21.03 10 fiedac 9-​10 fatac

Mitosil kita i malifokay a minaroˈan o cima ko papanokayen to ˈdil hani? Sapatikami ni Pawlo to Korintoay a kasakopang pacaˈofay toniya salicay, sanay cingra: ‘O palomaay kako, o micefosay ci Apolos, nikawrira, o Kawas ko palahaday tonini.’ (1 Korinto 3:​6, 7) Ngaˈay kita palecad ci Pawloan, itini pitosilan ano ira ko malaˈosiay a demak i, wa panokayen ko ˈdil ci Yihofaan. Samaan ko demak ita o misalimlaay to kalacafay matayal to Kawas aci Kristoan ato coyoh hani? (2 Korinto 6:1) Misarocod patenak to ngaˈayay lihaf no Fangcalay Cudad i tao. Cowa ko ‘pipaloma’ aca ita, caceridenho a ‘micefos.’ Ano maolahay ko tao to Fangcalay Cudad, wa misaˈicel kita patikol milisoˈ cingranan, o patosokan i misatapang minanam to Fangcalay Cudad. Ikor no misatapang minanam to Fangcalay Cudad, itini sadama ni Yihofa maˈaraw ko pacekiwan palidlid saan mafalic ko harateng, maedeng o tataˈangay ko lalipahak ita. w20.05 30 fiedac 14, 16-​18 fatac