Saka 2 Folad

Tada ciharatengay ci Yihofa to kahacecay midokoay Cingranan a tamdaw. Itatihiay no mita Cingra, ano matoled ko falocoˈ a masomad kita mafanaˈay Cingra. (ˈOlic 145:18, 19) Haratengen hena, tada damsayay ci Yihofa ci Iliyaan. Oniya madimadiay a pairasolay itiniay ka sasifodan no Israil a tatokian a maˈorip. Itiya, midokoay ci Yihofaan a tamdaw tahalifaay to pakidemay a sapalak no mikowanay, hanaca ˈintehay cangra ci Iliyaan. (1 Hongti 19:​1, 2) Roma i, o madimadiay ci Yihofaan a pairasolay edengan cecay aca cingra saan ci Iliya, tada pasomaday konini cingranan alatek. (1 Hongti 19:10) Tangsolay masinanot ni Yihofa misaaliay to maanan ci Iliya, orato micorcoray to coyoh pakalalok cingranan, pasifanaˈ cingranan caay ko matoˈolay cingra, ato pasowal cingranan, ˈalomanayho ko mikangodoay ci Yihofaan a tamdaw i Israil. (1 Hongti 19:​5, 18) Na mihinomay ci Yis to nisawawaan ningra, pasowal cangranan o mamalifok ko simoˈot tingloh a paro no lomaˈ. (Marko 10:29, 30) O Wama noniya taˈangayay paro no lomaˈ ci Yihofa, mikiˈokay Cingra to mamidama to midokoay Cingranan a tamdaw.​—ˈOlic 9:​10. w21.06 8-9 fiedac 3-4 fatac

Mitihedakan ita tano Fangcalay Cudad ko mararaway a sasowalen no pihakelongan, mansa mapiliˈ ko ˈalomanay tamdaw kitaanan. Tinakoen, sapiontingaw ko misasingsiay to mihakelongay tamdaw, pasemseman no Kawas ko tatiihay tamdaw i cikok sanay. Kawra pasowalan ita ko tamdaw to o mangah konini, samanen o finawlan ni Yihofa kita, mafanaˈay kita o ciolahay Cingra. Roma i, cowa ka patay ko saloˈafang no tamdaw sanay ko misasingsiay, kawra mitoroˈan ita cowa ko mikitiniay i Fangcalay Cudad ko hatiniay a sowal, hanaca ano cowa ka patay ko saloˈafang, awaayto ko epoc patikol maˈorip. Adihayay a kimad no pihakelongan sahtoay o maharekayto misaˈosi, kawra pasowalay kita to tamdaw, pafeliay ko Kawas to pasalatay noka piharateng i tamdaw, ngaˈay mipiliˈ to midoko Cingranan hokira. Samanay ko harateng no ˈaˈideman no pihakelongan tonini hani? Tada maketeray cangra. Maolah kita to soˈlinay kimad, o papakasoˈlin ato midofdof to kimad no Kawas. (Yohani 8:​45, 46) Aka malecad kita ci Akoma Satanan. Tanekteken a midofdof ko soˈlinay kimad, eca pidemak to misafelitay to pihakelongan a demak. (Yohani 8:​44) Palimoˈotay ko Kawas to finawlan Ningra ‘kaˈintehen ko tatiihay, kaˈimer to ngaˈayay,’ malecad o midemakan ni Yis.​—Loma 12:9; Hipray 1:9. w21.05 10 fiedac 10-​11 fatac

Ano makefeng kita i talakal no misatakaraway ato maˈanofay, sasamaanto aki? Aka calemcem, wa ngaˈay kita milaliw! Masowalay no tarokos ci Pawlo, ‘malepelay ni Akoma’ a tamdaw wa ngaˈay miliyas to talakal ningra. (2 Timoti 2:​26) Aka mapawan, o ˈicel ni Yihofa ikakaay ci Satanan. Ano micada kita to sadama ni Yihofa, wa ngaˈayto miliyas to talakal ni Akoma. Mihaenay haw i, sangaˈayay a pakayraan i satapang aca liyasento koniya talakal. Kawra edengan mitiˈer to sadama ni Yihofa, ngaˈ malaˈosi ko demak ita. Mansa, cangacangen ci Yihofa to romiˈamiˈad padama kitanan misalof to niyah, nengnengen ko harateng no niyah ato waywayan mafiyoray no tatiihay a waywayan hokira. (ˈOlic 139:23, 24) Aka palamiten i falocoˈ ita ko misatakaraway ato maˈanofay! Pina caˈol a mihecaan, padotocay ci Satan malo mangilosay misaˈefitay a miˈadopay. Kawra, cato ka halafin wa mapalitto cingra, saikor wa mapalaˈafo. (Paˈarawan 20:​1-3, 10) Makalimay kita pakaˈaraw toniya romiˈad! Kawra wa ikaka ko talipaˈelal ita nohatini, sinanoten ko talakal ni Satan, misarocod miliyas to talakal no misatakaraway ato maˈanofay. Wa misetek to falocoˈ ‘micoˈay ci Akomaan, mihaen wa miliyas ci Akoma kitanan a milaliw.’ w21.06 19 fiedac 15-​17 fatac

Micada ko cecay tamdaw to soˈlinay kimad no Fangcalay Cudad, hanaca paladaˈ to tao to mananamay no niyah a kimad, wa pakahemek ci Yihofaan. (Taneng 23:15, 16) Anini, maˈaraw ni Yihofa fanekfekay ko finawlan Ningra mitosil pasifanaˈ to tamdaw, tada mahemekay! Tinakoen, itini 2020 miheca, soˈlin mifekad ko lifong, kawra kamayan misikay kita to 770 emang 5,765 a pacekiwan, hanaca padama to 24 emang 1,994 tamdaw micada to paputisem, oniya faelohay nisawawaan misikayay to pacekiwan, padama to ˈalomanay tamdaw micada to paputisem. (Luka 6:​40) Awaay ko hasasa, misaˈicel kita padama to tamdaw malo Krisciyang, maedeng o lalipahak ci Yihofa. Pasifanaˈ to tao wa mihadak to adihayay ˈicel, kawra ira ko sadama ni Yihofa, wa ngaˈay kita mihadak to ˈicel padama to tamdaw palahad to olah to kakarayan Wama. Wa ngaˈay kita patireng to patosokan, misikay to cecay pacekiwan han? Ano mameten ita ko kahacecay toki, mitahidang to tamdaw malacafay kitanan minanam to Fangcalay Cudad, wa ira ko kafahkaˈan a minaroˈan alatek. w21.07 6-7 fiedac 14-​16 fatac

Hongti ci Tafiti pakayni sapidamaaw to patirengay to fangcalay sefi a tayal adihayay ko mihadakan ningra a hafay no niyah. (1 Rayray 22:11-​16) Citolasay ko ˈicel ita alatek, awaay ko pakayraan mirienang to patirengay a tayal no likakawa no Kawas, kawra itini madangaray no ˈicel ita wa ngaˈay pakiyaho a midama, ngaˈayay paladaˈen ita ko kaemangay tamdaw to adihayay ngaˈayay nalifetan. O tarokos ci Pawlo o ngaˈayay taˈarawan to hinapaladaˈay. Mitahidangan ni Pawlo koya kaemangay a Timoti malacafay cingranan talacowacowa a mitosil, hanaca cowa ka ˈidi paladaˈ ci Timotian to pakayraan no niyah a mitosil. (Dmak 16:​1-3) Micada to sapahatatanam ni Pawlo ikor, padamaay ci Timotian malo idahiay a mitosilay ato singsi no Fangcalay Cudad. (1 Korinto 4:​17) Ikor, misaka dademakan ni Timoti ko sapasifanaˈ ni Pawlo cingranan a pakayraan a pahatatanam to tao. w21.09 12 fiedac 14-​15 fatac

Mikitini taˈarawan ni Apolos aci Pawlo ngaˈay mananam ita ko maanan. Iraay ko kadofahay a sifanaˈ nangra to Fangcalay Cudad, o idahiay a singsi, mikangodoan no tamdaw, ˈalomanay ko mapadamaay tamdaw malo Krisciyang, kawra cowa ko sakalalifet saan cangra minengneng to tao. (Dmak 18:24) Soˈlinay i, miliyas ci Apolos to Korinto cecay liyad i, palimoˈotan ni Pawlo cingra kaliki a minokay. (1 Korinto 16:12) Misaka dademakay ci Apolos to inaneng no niyah milasil to ngaˈayay lihaf ato patanektek to pakasoˈlin no salikaka. Roma i, tiya ‘matatodong ko pitadtad to kimad no Kawas’ ci Priskila aci Akuila cingranan i, cowa ka somowal ko Fangcalay Cudad to maketeray cingra, mahapinangay tada o misapoeneray a tamdaw cingra. (Dmak 18:24-​28) Mafanaˈay ko tarokos ci Pawlo to malaˈosiay ni Apolos a demak, kawra cowa ka calemcem cingra mikikaka ko tao to niyah. Mikitini sapalimoˈot ni Pawlo to Korinto a kasakopang mahapinang ita, tada misamimingay cingra, matatodongay ko pinengneng.​—1 Korinto 3:​4-6. w21.07 18-​19 fiedac 15-​17 fatac

Padetengay ci Atam aci Ifa mitowakang to limoˈot, mansa malaplapay i lomaˈ no Kawas. Kawra o teloteloc nangra samanay hani? Tangongolay ko olah ni Yihofa to tamdaw, kinafalahay to foseniˈan a wawa Ningra, ho ngaˈay ira ko toki no midofdofay a tamdaw miliyaw malo paro no lomaˈ Ningra. (Yohani 3:​16) Pakayni i sapatefoc, hato ngaˈayay ci Yihofa misawawa toya madimadiay a 144,000 a tamdaw. (Loma 8:​15-​17; Paˈarawan 14:1) Cowa ko 144,000 aca a tamdaw, anini iraayho ko pinaay soˈot emang madimadiay midoko ci Yihofaan a tamdaw, mitooray to araaw Ningra a maˈorip. Ano mahererek ko pikowan to 1,000 miheca i, ano mataˈlif nangra ko saikoray sapalifet, wa soˈliˈlinto malo wawa no Kawas. (ˈOlic 25:14; Loma 8:​20, 21) Ano aniniho, wa ngaˈayto cangra pangangan ci Yihofaan to Wama. (Matay 6:9) Roma i, o patikolay maˈorip a tamdaw wa ira ko toki cipinang to saali ni Yihofa cangranan, polong makahiay midofdof a tamdaw saikor o mamalo paro no lomaˈ Ningra cangra. w21.08 5 fiedac 10-​11 fatac

Manilnil ko tarokos ci Pawlo midemak to mitosilay a ˈinorong ikor, itini pina poloˈ miheca misaaretengan ningra minengneng konini a ˈinorong. ‘Ano itinito kaˈalomanan anca pakalomalomaˈ,’ fanekfekay cingra mitosil. (Dmak 20:20) Mimetmetay to kahacecay a toki mihaen to demak cingra. Tinakoen, itini cingra i Atin mitala to cafay i, pasayraay cingra iraay ko saaroˈan a tamdaw mitosil, iraay ko ngaˈayay a minaroˈan. (Dmak 17:16, 17, 34) Ano itinito i kapalitan, mimetmetan ni Pawlo ko toki mitosil to itihiay a tamdaw. (Filipi 1:​13, 14; Dmak 28:16-​24) Ngaˈayay ko pisakadademak ni Pawlo to toki, marariday mitahidang to roma tamdaw kalacafay cingranan mitosil. Tinakoen, itini sakinacecay miliwko a mitosil, miˈorongan ningra koya ci Marko hananay a Yohani a malingad, sakinatosa i, ci Timoti ko miˈorongan ningra. (Dmak 12:25; 16:​1-4) Maedeng misarocoday ci Pawlo padama cangranan minanam samaan milikakawa to kasakopang, samaan midemak to pakaenay a demak, ato sasamaan malo ngaˈayay a singsi.​—1 Korinto 4:​17. w22.03 27 fiedac 5-6 fatac

Sowal no roma tamdaw o maˈaraway aca a dafong ko pakasoˈlinan nangra, mansa cowa ka pakasoˈlin to iraay ko Misangaˈay a Tatapangan. Kawra pakasoˈlinay cangra to cowa kaˈaraw a dafong, tinakoen misolotay a ˈicel, samanen adihayay a wacay misawacayay to iraay ko misolotay a ˈicel. Mikitini Fangcalay Cudad, pakasoˈlin to ‘cowa kaˈaraw a dafong,’ o pakasoˈlinay to cowa kaˈaraw a dafong kawra soˈlinay aira, misaaliay to wacay. (Hipray 11:1) Manaokaniw, mikilim to wacay misaaliay to toki ato ˈicel, kawra ˈalomanay tamdaw cowa kakahi mihaen to demak. Cecay tamdaw ano caka pinengneng to wacay ko niyah, awaay ko Misangaˈay a Tatapangan wa saan miharateng alatek. Ikor no misongilaˈ mikilim to wacay, o roma kakakosiya pakasoˈlinay o Kawas ko misangaˈay toniya dohaw. Isaˈayaw cowa pakasoˈlin cangra to iraay ko Misangaˈay a Tatapangan, samanen cowa pasifanaˈ ko taykak to misangaˈay a demak. Kawra ikorto mafanaˈay cangra ci Yihofaan, maolahayho Cingranan. Soˈlinay, ano samanayto ko picudadan ita, o mamikilim to wacay, mitongal to pakasoˈlin to Kawas. w21.08 14 fiedac 1 fatac; 15-​16 fiedac 6-7 fatac

Ci Yis tano malafelay wawa a tawcikel pasifanaˈ kitanan tada makahiay siniˈada to tamdaw ci Yihofa. Oniya wawa miliyas to lomaˈ ikor “eminen ningra a milaˈom ko payso ningra itira a patahtah a maˈorip.” (Luka 15:13) Ikor, pakayni i raraw no niyah a pasasiyor ko harateng ningra, orato misapoeneray, minokay tayra i lomaˈ no wama. Sasamaan ko harateng no wama hani? Sanay ci Yis: ‘Yo i ra:ayho no lomaˈ cingra i, maˈaraw no wama ningra cingra, saka, sasiniˈada sa koya wama a minengneng cingraan, ta cikay sa koya wama a miraod i cingraan a mitakec a mihangot.’ O wama cowa pakangodo to wawa, hanaca misododay cingranan, mahemekay mihamham cingranan minokay i lomaˈ. Soˈlin pakidemay ko raraw no malafelay wawa, kawra samanen soˈliˈlinay cingra pasasiyor, misododan no wama cingra. O sapatinako a sidaˈitay wama mitaypiyaway ci Yihofaan, ci Yis tano kasemeran a tawcikel pacipinang kitanan, tada makahiay ko kakarayan Wama misodod toya soˈliˈlinay pasasiyor a mararaway a tamdaw.​—Luka 15:17-​24. w21.10 8 fiedac 4 fatac; 9 fiedac 6 fatac

Anini, ˈalomanay ˈaˈideman no pihakelongan mihalakaay saka ecaaw mafanaˈ ko tamdaw to iraay ko ngangan no Kawas. Romaroma tamdaw mikitini mihongyakan a Fangcalay Cudad mipadengay to ngangan no Kawas, roma tamdaw mikecengay to tamdaw itini kiyokay misaka dademak toniya ngangan. Awaay ko sasowalen, edengan ko Misawacayay Tamdaw ni Yihofa ko soˈliˈlinay mikangodo to fangcalay ngangan ni Yihofa. Misarocoday kita to ˈicel misawacay ci Yihofaan, awaay ko roma a pihakelongan malecad kitaanan padama to tao mafanaˈ to fangcalay ngangan no Kawas. (Isaya 43:10-​12) Roma i, mitepangan ita Faelohay Hekal Mihongyakan Fangcalay Cudad tosaay ok sepat patek efan ko adihay, o mipadengan no roma mihongyakan kasadakan no ngangan no Kawas, patikolan noniya mihongyakan misaka dademak ko ngangan no Kawas. Mitepangayho kita to mataˈlifay ko 1,000 sasowalen a cudad, oniya mitepangan marariday misaka dademak to Yihofa sanay a ngangan. w21.10 20-​21 fiedac 9-​10 fatac

Padama kita to iraay ko saali a salikaka o midokoay ci Yihofaan. Mikiˈokay ci Yihofa to Israil tamdaw, hinapaladaˈ cangra micada to manikaway a finawlan o mamilifok to sapalemed Ningra. (Limoˈot 15:10) Itini pinengneng ni Yihofa, o kahacecay noka padama ita to iraay ko saali a salikaka, o mahecaday o patelongay to dafong Cingranan. (Taneng 19:17) Tinakoen, tiya mapalit ci Pawlo i, macadaay ko sapafeli no Filipi a kasakopang a sapatelong, oniya sapatelong o ‘micadaan no Kawas a sapatoˈaya’ sanay cingra, ‘tada palipahakay’ to Kawas. (Filipi 4:​18) Ngaˈay kiso miharateng: “Ngaˈay kako padama to cima a salikaka i kasakopang hani?” Ano misaka dademak kita to toki, ˈicel, inaneng ato payci no niyah padama to iraay ko saali a salikaka, o mamahemek ci Yihofa. Itini pinengneng Ningra, mihaen ko demak ita o midokoay Cingranan. (Yakop 1:​27) Mirienang kita to matatodongay a pidoko, o mamihadak to toki ato ˈicel, kawra aka o karetengay a ˈinorong konini saan miharateng. (1 Yohani 5:3) Misamaanay hani? Samanen maolahay kita ci Yihofaan ato salikaka. w22.03 24 fiedac 14-​15 fatac

Haratengen ita misiˈayaway ko salikaka to manan a pasangaray, wa madolo to paihkal to siniˈadaay a falocoˈ i cangranan. Ano pakidemay ko adada no cecay fafahiyan salikaka, soˈlin caka pasowal cingra to pasangaray ko niyah, kawra ano ira ko soˈlinay padama cingranan a tamdaw, o mamahemek cingra. Ngaˈay kita padama cingranan mitangtang, anca padama cingranan miasik to lomaˈ han? Ano malahdaway ko tayal no salikaka, itini ˈayaw no mahela ko faelohay tayal ningra, ngaˈay kita pafeli to miming a payci padama cingranan milakowit to pasangaray han? Wa ngaˈay kita caka pasowal cingranan to o kita ko pafeliay to payci. O mamalecad kita ci Yihofaan talaˈayaw a padama to salikaka, aka mitala to pisaali no tao ngaˈ mihadak to sadama. Haratengen, to romiˈamiˈad pasadakan ni Yihofa ko cidal, caka picangacang kita Cingranan, mihaenay ko demak Ningra. O dihkoay a tedi no cidal cowa ko patedi aca i tireng no miakoˈiday ci Yihofaan a tamdaw, midamaayho to ˈorip no polong tamdaw. Mirenecay ci Yihofa to saali ita, tano mahaenay a pakayraan paihkal to olah kitaanan. Mihaen a sidaˈit Cingra, hinapaladaˈ, tada maolahay kita Cingranan! w21.09 22-​23 fiedac 12-​13 fatac

Iraay ko madimadiay a olah no Kawas, mansa makahi misodod to tamdaw. Madimadiay a olah miocoray ci Yihofaan misodod to mikifalocoˈay pasasiyor, eca to piliyaw mararaw a tamdaw. Mitiliday to ˈOlic ci Tafiti sanay ko sowal ci Yihofaan: ‘Caay pidoedo Cingra to raraw ita a mitefoc titaanan, caay ka pitoor to raraw ita a misayfang.’ (ˈOlic 103:​8-​11) Ci Tafiti mikitini kaadayayan a nalifetan no niyah, makesemay a harateng tada aretengay a ˈinorong, kawra mananamay Ningra o ‘makahiyay misodod to tamdaw’ ci Yihofa. Hano makahi ci Yihofa misodod to tamdaw hani? O caˈof itiniay i aniniay a sinael. Malecad o sowal ni Tafiti, matomesay ko madimadiay a olah ni Yihofa to micangacangay to sasodod Ningra a tamdaw. Ano mararaw kita i, makesem ko falocoˈ o pinangan konini, iraay ko sakangaˈay no mita. O hatiniay a harateng micorohay kitanan micangacang to sasodod no Kawas, ato pasasiyor misafaeloh. w21.11 5 fiedac 11-​12 fatac

Misaaretengay ci Yihofa to fangcalay ngangan no Niyah, makalimay mikangodo ko kahacecay tamdaw toniya ngangan. (Isaya 42:8) Kawra itini 6,000 mihecaan, padotocay mapakadit ko ngangan Ningra. (ˈOlic 74:10, 18, 23) Ci Akoma (tatodong i ‘mitonganganay’) somowalay cowa kakahi ko Kawas pafeli ci Ataman aci Ifaan to misaalian nangra a dafong. (Satapangan 3:​1-5) Mikitiya misatapang, padotocay ci Akoma pakokot to Kawas, somowal to caay kakahi ko Kawas pafeli to tamdaw to misaalian nangra a dafong. Maˈaraw ni Yis mapakadit ko fangcalay ngangan no kakarayan Wama, adadaay ko falocoˈ. Iraay ko fadangalan ni Yihofa mikowan to pinaˈorip i kakarayan ato sera, hanaca o sangaˈayay ko pakayraan Ningra a mikowan. (Paˈarawan 4:​11) Kawra, mihalakaay ci Akoma miolat to coyoh ato tamdaw, papiharateng cangranan to awaay ko fadangalan no Kawas mikowan cangranan. Cato ka halafin, o mamasongilaˈ misaysay konini a lacongis. Noikor o mamafanaˈ ko polong a tamdaw, o sangaˈayay ko pakayraan ni Yihofa a mikowan, hanaca edengan o Hongti Kitakit Ningra ko papaira to soˈlinay a dipayal no tamdaw. w21.07 9 fiedac 5-6 fatac

O tawki no lomaˈ makalimay mirenec to sakaˈorip no fafahi ato wawa. Cangoˈotay ko sakaˈorip iso han? Ano mahaenay i, cowa ko madoloay. Kawra, ngaˈayho kiso misaka dademak toniya toki patanektek to pakasoˈlin no niyah. Mikifalocoˈ mitolon ci Yihofaan, micekiwho ato midotim to sowal ni Yis i Matay 6:​25-​34. Ngaˈayho kiso minengneng to nalifetan no salikaka, miharateng samanan ni Yihofa midimokos ko sakaˈorip nonini a ˈifowaay matayal Cingranan a tamdaw. (1 Korinto 15:58) Mihaen matongal ko pakasoˈlin iso, ano midimokosan ni Yihofa ko sakaˈorip no salikaka, o mamidimokos tisowanan. Mafanaˈay Cingra to saali iso, mafanaˈayho sasamaan mirenec to saali iso. Ano soˈlin matinako iso ko pipadama ni Yihofa, mamatongal ko tanektek no pakasoˈlin, noikor ngangaˈay mihadidi to pakidemay a sapalifet. w21.11 20 fiedac 3 fatac; 21 fiedac 6 fatac

ˈAlomanay Krisciyang pakayniay sapatefoc a kimad matongalay ko tanektekay a pakasoˈlin. Soˈlin micada to pisafelit, kamayanho padotoc a mitosil, tahalifa to sapalifet ko kaˈorip ngaˈayayho mihadidi. O ngaˈayay a tinakoan ko tarokos ci Yohani. Tanektekay capisawad cingra a milasil to pakayniay ci Kristoan ato sapatefoc a kimad, mataˈlifay ko 60 miheca. Mangata ko 100 miheca i, o katalawan a tamdaw sanay ko pinengneng no mikowanay no Loma ci Yohanian, paholiwan i Patmos potipot. O manan ko raraw hani? O ‘pakayniay pilasil to demak no Kawas, misawacay ci Yisan.’ (Paˈarawan 1:9) Itini pakasoˈlin no falocoˈ ato mihadidiay patirengay ci Yohani to ngaˈayay taˈarawan no mita! Itini mitilidan ni Yohani a cudad, paihkalay to tangongolay ko olah ningra ci Yisan, ato pisaareteng to sapatefoc. Masowalay ningra a sapatefoc ato pairaan no sapatefoc a raheker mataˈlifay ko 100. (Paˈarawan 19:10) Awaay ko hasasa, misalimlaay ci Yohani to sapatefoc. w21.04 17 fiedac 9-​10 fatac

Misaaliay ci Yihofa to finawlan Ningra ngaˈay ko picada to masamoˈay ko tireng a tamdaw. Tinakoen, palimoˈotan Ningra ko Israil tamdaw ‘aka piˈkak to madoˈengay a tamdaw,’ tatodong nonini aka piroero to madoˈengay a tamdaw anca somowal to mariˈangay a sowal cangranan. Tada tatiihay ko hatiniay a demak! Samanen cowa ka pakatengil ko madoˈengay a tamdaw, awaay ko pakayraan paˈading to niyah. Itini Lifi 19:14, palimoˈotanho no Kawas ko finawlan ‘aka pitenaˈ to lalan no mapohaway a tamdaw.’ O cecay cudad sanay, itini taliyok no Israil a pala nolitengan, o masamoˈay ko tireng a tamdaw marariday ˈafasen anca masamsamay. O romaroma cangoˈotay ko siniˈada a tamdaw padetengay midokaˈ anca mikalona to mapohaway a tamdaw, miteli to sapitenaˈ i kaˈayaw nangra. O hatiniay a waywayan tada mariˈangayto! Mansa, milasil ko Kawas to rikec i Lifi 19:14, o papadama to Israil tamdaw cipinang o sasiniˈada cangra to malonayay a tamdaw. w21.12 8-9 fiedac 3-4 fatac

Tada matalaway ci Yakop, calemcemay kamayanho ˈinteh ci Isau cingranan, mansa fanekfekay cingra mitolon ci Yihofaan. Dotoc, pafeliay cingra to adihayay sapatelong i kaka. (Satapangan 32:​9-​15) Saikor, maˈaraw ningra ko kaka talaˈayaway paihkal to mangodoay harateng, pasayra i kaka a mitaˈong, cowa ka kinacecay kinatosa aca, ao kina pitoay. Tada misapoeneray ci Yakop, mikangodoayho to kaka, mansa mararihadayayto tatosa a malikaka. (Satapangan 33:​3, 4) O midemakan ni Yakop itini ˈayaw ato ikor no miˈaraw to kaka ngaˈayay nanamen ita. Misapoeneray ci Yakop pasayra ci Yihofaan micangacang to sapadama, dotoc midemakay to matatodongay a demak, misarocod pairato lipahakay itini kalalitemohan nangra a tatokian. Masasoˈarawto i, ci Yakop aci Isau cowa ka lacongis to cima ko mararaway, samanen o patosokan ningra i, o mararihaday. Wa ngaˈay kiso mitodong to taˈarawan ni Yakop han?​—Matay 5:​23, 24. w21.12 25 fiedac 11-​12 fatac

Maharateng to pakayniay sapihepolaw to raraw iso mapatay ci Yis, saan kiso miharateng alatek: “Awaay ko tatodong ako saan miharateng.” Hano ira ko mahaenay a harateng ita hani? Samanen malipalaway no falocoˈ no niyah kita alatek, awaay ko kapo no niyah, awaay ko tatodong kaolahen saan. (1 Yohani 3:​19) Ano iraay ko hatiniay a harateng ita, haharatengen ‘ikakaay no falocoˈ ita ko Kawas.’ Ano samaanto kita masofaw ko pinengneng to niyah, kamayan ci Yihofa maolah kitanan, misodod kitanan. Ngaˈay kita misalof to harateng no niyah, minanam mikitini pakayraan ni Yihofa a minengneng to niyah. Sapidemakaw tonini, wa micerid kita micekiw to Fangcalay Cudad, padadotoc mitolon, miceridho macacawmaˈ to salikaka. Mihaen ko demak hano masakalimlaan hani? Samanen mamatongal a mahapinang iso o maanan ko makapahay capeling ni Yihofa, matongalho ko pitinako to olah Ningra tisowanan. To romiˈamiˈad midotim to pina sinael wa ihkal ko maharatengay iso, ngaˈay ‘misalof’ to mararaway a harateng no falocoˈ.​—2 Timoti 3:​16. w21.04 23-​24 fiedac 12-​13 fatac

Sapalahadaw to tanektekay a pakasoˈlin, o pinanam aca to sifanaˈ cangoˈotayho. Misaaliay kita misongilaˈ midotim to mananamay no niyah a sifanaˈ. Nengnengen ko nalifetan no mitiliday to ˈOlic 77 fedengan. Tada marorayay cingra, samanen cowa to pihayda ko Kawas cingranan ato finawlan ningra a Israil tamdaw saan ko harateng ningra. Tada macariraway cingra, itini dadaya pasangaray mafotiˈ. (2-8 sinael) Sasamaan cingra hani? Pasowalay cingra ci Yihofaan: ‘Midotim kako to midemakan Iso a maemin, miharateng to kahacecay midemakan Iso.’ (12 sinael) Soˈlin ihkalay cingra mafanaˈ to nano demak ni Yihofa isaˈayaw to finawlan no Niyah, kawra kamayan cingra macariraw, sanay miharateng: ‘Mapawanay ko Kawas paihkal to sidaˈit, pakayni i kaketer eca to ka siniˈada to tamdaw han?’ (9 sinael) Ikor, misongilaˈay cingra miharateng to midemakan ni Yihofa, ato samaanay ci Yihofa siniˈada to finawlan no Niyah isaˈayaw. (11 sinael) Padamaay konini cingranan pakasoˈlin, cowa ko mamifalah ci Yihofa to finawlan no Niyah. (15 sinael) w22.01 30-​31 fiedac 17-​18 fatac

Samanay ko nafalocoˈan ni Yihofa toya mapatayay madimadiay a sikawdan hani? Maolahay Cingra cangranan, makalimay sapiliyawaw maˈaraw cangra! (Yopu 14:15) Wa ngaˈay haratengen iso hakowaay ko kaˈilol ni Yihofa toya widang Ningra ci Aprahaman, ato ‘misiˈayaway’ masasowal Cingranan a Mosian han? (Kasadakan 33:11; Yakop 2:​23) Maedeng makalimay ko Kawas mitengil to sapakahemek Cingranan a radiw ni Tafiti ato roma mitiliday to ˈOlic a tamdaw! (ˈOlic 104:33) Soˈlin mapatayayto koniya widang, kawra cowa ka pawan ci Yihofa cangranan. (Isaya 49:15) Pakayni kihcod nangra, ihkalay ko kafanaˈ ni Yihofa. O papatikolen Ningra paˈorip cangra, miliyaw mitengil to mikifalocoˈay a satolon nangra, micada to pidoko nangra. Ano malahdaw ko kaolahan iso a widang, mafanaˈ to ciolahay ci Yihofa, maedeng o tataˈangay ko sahinom tisowanan. Ikor no mifekad ko mitowakangay demak i Itin i, mafanaˈayto ci Yihofa, ˈayaw no mamidemak Cingra, o mamalingad ko tatiih no pakayraan noniya hekal. Tada ˈintehay ci Yihofa to mararaway a demak no hekal, caka sadafdaf, ato mariˈangay demak. w21.07 10 fiedac 11 fatac; 12 fiedac 12 fatac

Maolah kita to salikaka, o paihkalay to misalimlaay ko niyah to sapatefoc. Misamanay hani? Samanen cowa ko pakayniay aca ci Yis kitaanan, pakayniayho i salikaka ita kinafalah to ˈorip. Ano makahiay ci Yis pakayni cangranan a mapatay, madeng o kalimlaan cangra saan ko piharateng. (1 Yohani 3:​16-​18) Sangaˈayen ita micada ko salikaka, o paihkalay to olah cangranan. (Ifiso 4:​29, 31–​5:2) Tinakoen, ano adada cangra, tahalifa to sapalifet ato tahapades i, padamaen ita cangra. Kawra, ano midokaˈ kitanan ko sowal ato midemakan no salikaka, sasamaan ko pidemak hani? Ano pakararaw ko salikaka kitaanan, itini han ita i falocoˈ minaˈeng, pasangaren a misodod cangranan han? (Lifi 19:18) Ano mahaenay, tengilen ko laenoay limoˈot: ‘Ano iraira ko katatiihan no falocoˈ no nima namo i cimaanan i, kasasihepol. Haenen o nipihepol ni Yihofa to raraw namo ko nika sasihepol namo to raraw.’ (Kolosay 3:​13) Kinacecay kita misodod to salikaka, o pasowalay to kakarayan Wama, soˈlinay kita miakoˈid to limasmas Ningra a sapatefoc. w21.04 18 fiedac 12-​13 fatac

Marorayay kita matayal saki Yihofaan alatek, padama to ˈalomanay tamdaw malo Krisciyang. Kawra cipinangay kita, ano hakowato ko malaˈosiay ita a demak, sahtoay o palemedan ni Yihofa. Mikitini taˈarawan ni Apolos ato tarokos ci Pawlo ngaˈay kita minanam to cecay demak, ano ngaˈayay ko saaroˈan a matayal, wa ngaˈay mimetmet to toki micowat to sakarihaday no kasakopang. Pakayni sapiˈadingaw to kakelec no kasakopang, o mikeriday a salikaka misalalangiay to Fangcalay Cudad a mihadak to limoˈot, cowa pisatakaraw to niyah, ao pakalalokay to salikaka midofdof ato mikotod ci Yisan, tada miakoˈiday kita cangranan! (1 Korinto 4:​6, 7) Pafeliay ko Kawas kitaanan o kahacecay tamdaw to pina inaneng. Miharateng kita cowa ka hakowa ko mademakay no niyah saan, kawra malecad o mitaˈisay to rikoˈ pakakiting to kala, ora miming a mihadakan a ˈicel wa ngaˈay micowat to rihaday no kasakopang. Ano ira ko miming malalifetay i falocoˈ ita, wa misaˈicel a mifalah. Wa misetek kita to falocoˈ misaˈicel micowat to rihaday, makelec a malacecay.​—Ifiso 4:3. w21.07 19 fiedac 18-​19 fatac

O ngangaˈay pakasoˈlin kiso, o mamiliyaw kiso a malacafay to mapatayay a salawina. Soˈlin mafanaˈay ci Yis to papatikolen no niyah paˈorip ci Lacarus, kawra mihinom ci Yis to masomaday a widang i kamayan marowis ko losaˈ, misawacayay konini to makalimay cingra patikol paˈorip to mapatayay a tamdaw. (Yohani 11:35) Ngaˈay kiso padama to malahdaway ko salawina a tamdaw. Ci Yis cowa ko kalacafay aca ci Martaan aci Mariyaan a tomangic, mihadidiayho a mitengil mihinom cangranan. (Yohani 11:25-​27) O ngangaˈay kita mihaen a padama to malahdaway ko salawina a tamdaw. Itini Awtariya o cecay malohemay malitengay ci Taen, sanay cingra: “Ikor no mapatay ko fafahi i, tada misaaliay kako to sapadama no tao. Iraay ko papina mararamoday marariday mipalak to toki malacafay takowanan, ano hacowato a tatokian, makahiay cangra mitengil to sowal ako. Ano tada marawraw ko falocoˈ ako i, ngaˈay itini i kaˈayaw nangra tomangic, cowa ko mamangodo cangra. Pafeliay cangra takowanan to adihayay a sapadama, tinakoen, ano cowato kangaˈay kako misawsaw to tosiya, micakay to dafong anca mitangtang i, padamaay cangra takowanan midemak tonini a demak. O roma i, marariday cangra malacafay takowanan a mitolon. O soˈliˈlinay a widang ako cangra, o ‘malacafay misiˈayaw to pades’ a salikaka.”​—Taneng 17:17. w22.01 16 fiedac 8-9 fatac

Sahtoay o saka ngaˈay no mita ko miharatengan ni Yihofa. (Taneng 4:​20-​22) Tada maolahay Cingra kitaanan, mansa pakaynian i Fangcalay Cudad, mitepangan a cudad anca matenesay a Krisciyang pafeli to sapalimoˈot kitaanan. (Hipray 12:​9, 10) O sasinanoten ko lalakaw, cowa ko pakayraan mihadak to sapalimoˈot. Latekay, cowa ka ngaˈay ko pakayraan no tao mihadak to sapalimoˈot saan kita miharateng. Manaokaniw, mihadakay to sapalimoˈot a tamdaw o mamisaˈicel tano kaolahan no tao micada a pakayraan paihkal. (Kalatiya 6:1) Kawra ano o micadaay to sapalimoˈot kita i, sasamaan ko pidemak hani? O mamisamacay kita to matengilay a sowal, cowa ko pakayraan mihadak to sapalimoˈot. Ngaˈayay licayen ko niyah: “Soˈlin cowa kaolah kita to pakayraan no tao mihadak to sapalimoˈot, kawra ora sowal ningra iraay ko matatodongay han? Wa ngaˈay kako misamacay miharateng sasamaan ko niyah mikitini tonini a sapalimoˈot milifok to epoc, eca ko pisinanot to dangoc no tao han?” Ano iraay ko taneng ita, o kahacecay a sapalimoˈot o saka cakat no niyah han ko pinengneng. w22.02 12 fiedac 13-​14 fatac

Mafanaˈay ci Yihofa to mamihadak kita to adihayay a toki ato ˈicel, ngaˈ mafalah ko tatiihay a harateng ato nanaman. (ˈOlic 103:13, 14) Pakaynien Ningra i Fangcalay Cudad, fangcalay saocor ato likakawa Ningra, ho malifok ita ko taneng, ˈicel ato sadama no salikaka a mifalic. Sakadademaken ko Fangcalay Cudad misongilaˈ a mikinsa to niyah. O Fangcalay Cudad malecaday o dadingoan, ngaˈay padama kitaanan mihapinang to harateng ato waywayan no niyah. (Yakop 1:​22-​25) Roma i, maharekayto ci Yihofa misaday padama tisowanan. Mafanaˈay Cingra o maanan ko sangaˈayay a pakayraan padama tisowanan, mafanaˈayho to harateng no falocoˈ iso. (Taneng 14:10; 15:11) Mihaenay palahaden ko ngaˈayay nanaman, mitolon to romiˈamiˈad Cingranan, ato micekiw to Fangcalay Cudad o kimad Ningra. Pakasoˈlin to o sangaˈayay ko palinian ni Yihofa. O saali ni Yihofa kitaanan sahtoay o saka ciepoc no mita, ano tooren ita ko palinian Ningra a maˈorip, wa maseneng ko kaˈorip, ira ko epoc, o mamilifokho to soˈlinay a lipahak.​—ˈOlic 19:​8-​11. w22.03 4 fiedac 8-​10 fatac

Mipatireng kita ato mitomadaw to pidokoan a kitiraan o midokoay ci Yihofaan. Pakayni pisangaˈ to pakopangan ato roma dafong o fangcalay a tayal sanay ko pinengneng ni Yihofa. (Kasadakan 36:​1, 4) Anini, o patirengay to Hongti Kitakit Kasaˈopoan ato roma pidokoan a kitiraan o fangcalay a tayal sanay ko pinengneng ni Yihofa. O roma salikaka mipalakay to adihayay a toki mirienang toniya tayal, tada miakoˈiday kita to mihadakan nangra a ˈicel pakayni i Hongti Kitakit. Manaokaniw mamirienang cangra to mitosilay a tayal, itini lalomaˈ nangra, o roma tamdaw makalimay malo misakafahay. Onini a malalokay a salikaka ano pangangan malo misakafahay i, ano matoor ko palinian, o malohemay malitengay ngangaˈay minilnil cangranan, cowa ko cacisasa ko harateng. Mihaen ko demak no malohemay malitengay, o midamaay to patirengay a tayal. Roma i, ano iraay anca awaay ko inaneng ita to patirengay a demak, o kahacecay tamdaw wa ngaˈay padama miasik ato mitomadaw to pidokoan a kitiraan. w22.03 22 fiedac 11-​12 fatac