Saka 3 Folad

Itiniay tinakoan ni Matay 25:31-​36, ‘lopayˈay siri’ o moecelay a tamdaw i salikoray romiˈad ko mitoroˈan. O roma lopayˈay siri cangra, iraay ko tokel itini fafekang no sera a lakoing midaˈoc ko ˈorip. Madimadiay cangra midama to itiniayho i fafekang no sera a salikaka ni Kristo, padama to manilnilay no fangcalay saocor a Krisciyang milahci to cecay kalimlaan a tayal, o milasilay to ngaˈayay lihaf i paro no kakarayan, padama to tamdaw malo nisawawaan ni Kristo. (Matay 24:14; 28:19, 20) To mihecahecaan ˈayaw no Piharatengan a Saˈopo pina lipay, o roma lopayˈay siri misarocoday itini cowacowa pala mitahidang to maolahay to soˈlinay kimad a tamdaw mirienang to Piharatengan a Saˈopo. Misarocodayho cangra ngaˈay ko pilimasmas, ho rihaday ko kalingad nonini a saˈopo. Ngaˈay tano mahaenay a pakayraan midama to salikaka ni Kristo, tada lipahakay ko roma lopayˈay siri. Mafanaˈay cangra, o nano demak nangra to salikaka ni Kristo malecaday o matayalay saki Kristoan.​—Matay 25:37-​40. w22.01 22-23 fiedac 11-​12 fatac

Tada siniˈadaay ci Yis to cecay ciadadaay to fanges a tamdaw, siniˈadaay to misemsemay to adada a fafahiyan, siniˈadaayho to malahdaway ko salawina a tamdaw. Mitodong kita to capeling ni Yis ato pakayraan ningra micada to tamdaw, o mitodongay ci Yihofaan. (Marko 1:​40, 41; 5:​25-​34; Yohani 11:33-​35) Ano matongal ko kalecad ita ci Yihofaan, wa matongal ko piingid Cingranan. Mikotod to pasaripaˈan ni Yis wa ngaˈay padama kitaanan misamacay midoko ci Yihofaan, cowa ko mamakalisanga noniya ciraraway hekal ko falocoˈ. ˈAyaw no kinafalah a dadaya, sanay ci Yis: ‘Malowidayto ako koniya hekal.’ (Yohani 16:33) Mihaen ko sowal ni Yis, samanen cowa ka mafiyor no harateng, patosokan ato waywayan no hekal cingra. Cowa ka mapawan ci Yis to lalangian ningra tayni i fafekang no sera, o papaˈodingar to fangcalay ngangan ni Yihofa. Samanay kita hani? Adihayay a demak noniya hekal mikalisangaay to falocoˈ ita alatek. Kawra, ano todongen ita ci Yis, misamacay midemak to araaw ni Yihofa, wa ngaˈay kita ‘pakalowid toniya hekal.’​—1 Yohani 5:5. w21.04 3-4 fiedac 7-8 fatac

Mafanaˈay ci Pawlo na mikiˈokay ci Yis, ‘polong midoedoay cingranan a tamdaw wa milifok to tahadaˈocay ˈorip.’ (Yohani 3:​16; Loma 6:​23) O midoedoay ci Pawlo ci Yisan, pakasoˈlinay to sapatefoc a tamdaw. Pakasoˈlinay cingra, soˈlin pakidemay ko raraw no cecay tamdaw iˈayaw, ano mikifalocoˈ a pasasiyor, mamakahi ci Yihofa misodod. (ˈOlic 86:5) Roma i, pakaynian no Kawas ci Kristoan paihkal to olah kitaanan. Pakasoˈlinay ci Pawlo to olah no Kawas. Sinanoten samanay ko sowal ni Pawlo i Kalatiya 2:​20 saikor noniya sinael, sanay: ‘Wawa no Kawas . . . maolahay takowanan, pakayniay takowanan kinafalah to niyah.’ Citolasay ko olah ni Yihofa cowa ka saan ci Pawlo miharateng, cowa piharateng cingra: ‘Mafanaˈay kako hano maolah ci Yihofa to roma salikaka, kawra cato kaolah takowanan saan.’ Patalipaˈelalan ni Pawlo ko Lomaay a Krisciyang: ‘Tiya cirarawho kita i, maharekayto ci Kristo pakayni kitaanan a mapatay.’ (Loma 5:8) O olah no Kawas tada tangongolay awaay ko tolas! Masongilaˈay ko pakasoˈlin ni Pawlo to tangongolay a olah no Kawas. Mafanaˈayho ci Pawlo padadotocay mihadidi ci Yihofa to Israil tamdaw. w21.04 22 fiedac 8-​10 fatac

Ano misikay to pipacekiw i, padamaen ko pacekiwan palahad to olah ci Yihofaan. Sasamaan ko demak iso hani? Kilimen ko toki misaadihay mitadtad to capeling ni Yihofa. Padamaen ko pacekiwan mihapinang to lipahakay a Kawas ci Yihofa, makalimay padama to maolahay Cingranan a tamdaw. (1 Timoti 1:​11; Hipray 11:6) Pacipinangen ko pacekiwan, misaka dademak to minanaman wa adihay ko epoc, hanaca mitokelay ci Yihofa cingranan milifok to epoc pakayniay kaolah Cingranan. (Isaya 48:17, 18) Ano matongal ko olah no pacekiwan ci Yihofaan, wa irato ko ˈicel a mifalic. Sakalaˈosiaw ko patosokan micada to paputisem, misaaliay to kakinafalah ko pacekiwan. O roma pacekiwan o mamifalah to pina dafong. ˈAlomanay pacekiwan wa misawad to cowa kaolah ci Yihofaan a widang, ecato picawmaˈ cangranan. O roma pacekiwan mapacieciay miliyas to paro no lomaˈ, samanen cowa kaolah cangra to Misawacayay Tamdaw ni Yihofa. Mikiˈokay ci Yis, o mihakelongay cingranan a tamdaw cowa ko mamatoled. Wa milifok cangra to kadofahay a sapalifon, pafeli cangranan to dihkoay a paro no lomaˈ no Krisciyang.​—Marko 10:29, 30. w21.06 4-5 fiedac 8-9 fatac

O tarokos ci Pawlo patinakoan ko padamaay to tamdaw malo Krisciyang a tayal to maomahay to omah, mihaenay o pipaloma aca cangoˈotayho. Patalipaˈelalay cingra to Korintoay a Krisciyang sanay: ‘Kako ko palomaay, ci Apolos ko micefosay to nanom. . . . O mikaomahan no Kawas a omah kamo.’ (1 Korinto 3:​6-9) Matayal kita i omah no Kawas i, mitosil to tamdaw o palomaay, pasifanaˈ to tamdaw o micefosay to nanom. Mafanaˈay kita, o pacengoˈay palahad to sapaloma i, o Kawas, o Cingra ko misolotay to tamdaw tayra i tatihi Ningra. Ngaˈay milasil to ngaˈayay lihaf ato pasifanaˈ to tamdaw to soˈlinay kimad, o kalikoan konini! Mirienang toniya tayal matinakoay ita ko soˈlinay a lipahak. O tarokos ci Pawlo itini Tisalonika adihayay ko mapadamaay tamdaw malo Krisciyang, sanay ko sowal ningra: ‘Ano patikol ko tapang ita ci Yis kitaanan i, itini ˈaˈayaw ningra, o tokel ita, lipahak, o kalikoan a pohong o maanan hani? Coko kamo han? Soˈlinayto o ˈdil niyam kamo, o lipahak niyam.’​—1 Tisalonika 2:​19, 20; Dmak 17:​1-4. w21.07 3 fiedac 5 fatac; 7 fiedac 17 fatac

Misolotan ni Yihofa kita o kahacecay tamdaw tayra i tatihi Ningra. (Yohani 6:​44) Haratengen hena, o maanan ko tatodong nonini? Mihapinang ci Yihofa to ˈalomanay tamdaw i, manengnengay Ningra iraay ko soˈliˈlinay falocoˈ iso, mafanaˈay to mamaolah kiso Cingranan. Pakayni Cingranan o kalimlaan konini. (1 Rayray 28:9) Mafanaˈay ci Yihofa tisowanan, cipinangay tisowanan, maolahayho tisowanan. Tada mitemeray to falocoˈ! Tada ciharatengay ci Yihofa tisowanan, ciharatengayho to roma salikaka. Sapitadtadaw tonini, patinakoan ni Yis ci Yihofa to pakaenay a tamdaw. Lalomaˈ no 100 a siri ano mahiday ko cecay, samanay ko demak no pakaenay tamdaw hani? ‘Miterekan ningra koya 99 siri i lotok, mikilim toya mahidayay a siri.’ Ano mahela ningra koya mahidayay a siri cowa piroroh ciranan patelas sanay comikay, ao mahemekay cingra. Mitadtaday konini to manan hani? Pakaynien ci Yihofaan, o kahacecay a siri sahtoay o kalimlaan. Sanay ci Yis: ‘Malecaday, o kakarayan Wama ako cowa ka makahi a malaˈafo ko cecay no sasafaay tamdaw.’​—Matay 18:12-​14. w21.06 20 fiedac 1-2 fatac

Midotim kita to midaˈocay cowa ka falic a olah ni Yihofa, o mamatongal ko olah i Cingranan, matongal ko tanektek no kalawidang Cingranan. (Loma 8:​38, 39) Mapakalalokay kita, sapitodongaw to taˈarawan ni Yis. (1 Pitiro 2:​21) Itini ˈayaw no Piharatengan a Saˈopo, misongilaˈay kita miasip to malifaay ni Yis i saikoray cecay lipay a demak, ato pakayni maˈoningay to kapatay ningra ato patikol maˈorip. I Piharatengan a Saˈopo a dadaya, mamisongilaˈ kita mitengil to kimad, miharateng to patalahkalan ni Yis a olah kitaanan. (Ifiso 5:2; 1 Yohani 3:​16) Miasip ato midotim kita to ngaˈayay taˈarawan ni Yis, miharateng to samaanay cingra paihkal to kinafalahay a harateng, o mamapakalalok, makalim malecad cingranan ko waywayan a maˈorip. (1 Yohani 2:6) Mamatongal ko pisetek ita to falocoˈ materek i olah no Kawas. (Yuta 20, 21) Makalim kita materek i olah no Kawas, o mamidofdof Cingranan, misaˈicel paˈdil to fangcalay ngangan Ningra, misaˈicelho pakahemek to falocoˈ Ningra. (Taneng 27:11; Matay 6:9; 1 Yohani 5:3) Mirienang kita to Piharatengan to Kinafalah ni Yis a Saˈopo, mamatongal ko pisetek to falocoˈ to romiˈamiˈad tano waywayan paihkal ci Yihofaan: ‘Makalimay kako tahadaˈoc materek i olah Iso!’​—w22.01 23 fiedac 17 fatac; 25 fiedac 18-​19 fatac

Pafeliay ci Yihofa to pasalatay harateng kitaanan. Samanen iraay ko pasalatay harateng ita, wa ngaˈay kita mipiliˈ to kaolahan ita a pakayraan a maˈorip. Ano mipiliˈ kita midoko to Kawas i, o mamahemek Cingra. (ˈOlic 84:11; Taneng 27:11) Wa ngaˈayho kita misaka dademak to pasalatay harateng midemak to inanengay a saˈosi. Wa ngaˈay kita mitodong to taˈarawan ni Yis, mipiliˈ paisalakat to misaalian no tao. Kinacecayay, tiya malotayto ci Yis ato tarokos i, tayraay cangra i awaay ko adeses a kitiraan, sapahanhanaw to cecay liyad, kawra mahelaay no ˈalomanay tamdaw cangra, makalimay sapitengilaw to sapasifanaˈ ni Yis. Cowa ka maketer ci Yis, ao siniˈadaay toya ˈalomanay tamdaw, orato ‘pasifanaˈ cangranan to adihayay a demak.’ (Marko 6:​30-​34) Ano malecad kita ci Yisan makahi a kinafalah, mihadak to toki ato ˈicel a padama to tao, wa paˈodingar to kakarayan Wama.​—Matay 5:​14-​16. w21.08 3 fiedac 7-8 fatac

Cowa kaolah ci Yihofa malecad maemin, mikitini misangaˈan Ningra makapahay a maamaan mahapinang. O misangaˈan Ningra a tamdaw cowa kalecalecad, kahacecay tamdaw mikiriwiˈay maemin, mihaenay cowa ko papalalinien ni Yihofa kita to tao. O kemoday a falocoˈ ita ko minengnengan Ningra, o soˈliˈlinay a waywayan ita. (1 Samuil 16:7) O maanan ko kangaˈayan ita, dangoc ato kalomahadan a lalengawan, mafanaˈay Cingra maemin, cowa ko mamataˈlif ko saali Ningra kitaanan. Wa tano harateng ni Yihofa ko sapinengneng ita to niyah, mihaen o ‘matatodong ko harateng’ ita, eca pisatakaraw minengneng to niyah, cowa ko mamisakahmaw minengneng to niyah. (Loma 12:3) Manaokaniw, wa ngaˈay kita misongilaˈ mihapinang to mafanaˈay mitosil pasifanaˈ a salikaka, pasayra cangranan minanam. (Hipray 13:7) Mihaen, o mamananam ita ko pina inaneng, paira to epoc no mitosilay a tayal no niyah. (Filipi 3:​17) Kawra, minanam to ngaˈayay taˈarawan no tao o cecay demak, palalini to tao to niyah o roma a demak. w21.07 20 fiedac 1-2 fatac

Pakayni pisongilaˈ mihapinang to pinaˈorip, pinaloma ato foˈis, wa ngaˈay kiso mitongal to pakasoˈlin to Misangaˈay a Tatapangan. (ˈOlic 19:1) Ano micalep kiso a mikingkiw, wa matongal ko pakasoˈlin oniya kihcod sahtoay o Misangaˈan ni Yihofa. Ano mihapinang kiso to kasapaan a maamaan i, haratengen koniya wacay paihkal to masamanay ko Misangaˈay a Tatapangan ita. (Loma 1:​20) Tinakoen, mafanaˈay kiso alatek, o cidal cowa ko pihadak aca to misaalian no ˈorip a tedi ato faedet, mihadakayho to mamipalak to tireng no tamdaw a maloloay a tedi. Samanay kita a madipot hani? Itini papotal no cikiw iraay ko mitahpoay a sapidipot, o coyangcen hananay, ngaˈay misefsef to tatiihay a tedi. Ano taˈangay ko mihadakan no cidal a maloloay tedi, matongalay ko adihay no coyangcen. Haratengen iso koniya pisafaco coko iraay ko Misangaˈay a Tatapangan, hanaca iraay ko olah ato citanengay han? w21.08 17 fiedac 9-​10 fatac

Ikor no micada to paputisem ko cecay tamdaw, o papadotoc kita a ciharateng cingranan, mikangodo cingranan. (1 Yohani 4:​20) Sasamaan ko hademak hani? Pakasoˈlinen ko salikaka, aka ranikay a cisasa cangranan. Soˈlin cowa ka cipinang kita hano midemak ko salikaka to cecay demak, aka misaˈosi to misatekeday anca tatiihay ko nafalocoˈan nangra. O kakangodoen ita cangra, minengneng cangranan ikakaay ko ngaˈay to niyah. (Loma 12:10; Filipi 2:3) Soˈlinay i, paihkal kita sadipotto siniˈadaay ato damsayay i polong a tamdaw. Ano makalimay kita malo paro no lomaˈ ni Yihofa, o mamitoor to sowal Ningra a maˈorip. Tinakoen, pasifanaˈay ci Yis kitaanan pasayra i polong a tamdaw paihkal to siniˈadaay ato damsayay, mahawpay ko ˈada ita. (Luka 6:​32-​36) Soˈlin pasangaray kita mihaen to demak, wa kamayanho a misaˈicel minanam to harateng ato pakayraan ni Yis a dademak. Ano misarocod kita midofdof ci Yihofaan ato mitodong ci Yisan, o pasowalay kita to kakarayan a Wama makalimay kita tahadaˈoc materek i paro no lomaˈ Ningra. w21.08 6 fiedac 14-​15 fatac

Minanam mitadiˈec ci Yihofaan. Mikiˈokay ci Yihofa, ano mitadiˈec kita Cingranan, patafang to sangaˈayay Cingranan, o tataktaken Ningra ko sapalemed kitaanan. Itini Fangcalay Cudad maˈoningay ko adihayay ngaˈayay taˈarawan, misarocoday cangra matayal saki Yihofaan. Salakatayho cangra a pahawang, ngaˈ milifokay to sapalemed ni Yihofa. Tinakoen, cowa kafanaˈ ci Apraham to tatalacowa, kawra kamayan a miliyas to nalacolan, itini ikor no miliyas cingra i itiyaay milifok to sapalemed ni Yihofa. (Hipray 11:8) Malecaday ci Yakop, ikor no malalefo cingra to coyoh, ngaˈ pafelian ni Yihofa cingra to mikiriwiˈay sapalemed. (Satapangan 32:24-​30) Tiya misaday ko Israil tamdaw micomod i Mikiˈokan no Kawas a Pala i, salakatay ko saysi paripaˈ to macedasay a Yortan ˈAlo, itiyaay tomerep ko nanom no ˈalo, hato ngaˈay ko finawlan a mitaˈlif to ˈalo. (Yosuwa 3:​14-​16) Anini lintad ˈalomanay salikaka mitadiˈecay ci Yihofaan, mitongal to tayal saki Cingranan, mikitini kita ngaˈayay taˈarawan nangra milifok to sapakalalok. w21.08 29-​30 fiedac 12-​14 fatac

O matoˈasay salikaka maemin, soˈlin adihayay ko mahopeday iso a nalifetan, kawra mafanaˈay kiso pakayni kafalic no pakayraan, misaaliay kiso to papadotoc a misalof. Ano matoˈasto kiso micada to paputisem, wa ngaˈayho mihadak to sapadama. Ngaˈayay paladaˈ kiso to kaemangay tamdaw to nalifetan ato mananamay no niyah, o mamahemek cangra mitengil to pipasowal iso toniya demak. Toniya pakayraan ‘micerid a paladaˈ ’ kiso, wa adihay ko sapalemed ni Yihofa tisowanan. (Luka 6:​38) Ano misawidang kiso to kaemangay tamdaw, kiso ato cangra o mamicada to sapakalalok. (Loma 1:​12) O matoˈasay tamdaw adihayay ko mahopeday a taneng ato nalifetan, o kaemangay tamdaw talifakay ciˈicelay, ngaˈayay kamo madadama. Malacafay ko matoˈasay ato kaemangay a matayal, o papalemed to polong a tamdaw no kasakopang, o papaira to sapakahemek to sidaˈitay a Wama i kakarayan! w21.09 8 fiedac 3 fatac; 13 fiedac 17-​18 fatac

Pakayni kapatay ni Yis i pisemseman hecek hano ecato pakasoˈlin ko Yutaya tamdaw cingranan hani? Samanen pakayraen cangranan, o mapatayay i pisemseman hecek o ciraraway a tamdaw, tatiihay ko demak, ecato ko ci Misiya sanay. (Limoˈot 21:22, 23) Oya mifalahay ci Yisan a Yutaya tamdaw cowa pakasoˈlin to awaay ko raraw ni Yis, o mapakokotay, mapaolafay. O saˈakawangay hoing no Yutaya caloh sanay misawkit ci Yisan, cowa pidofdof to rayray no rikec a midemak, awaay ko masadafdafay. (Luka 22:54; Yohani 18:24) Cowa pitengil cangra to wacay a mitiyawca to demak, ‘mikilimayho to makaniway a wacay pakokot ci Yisan, sapipatayaw cingranan.’ (Matay 26:59; Marko 14:55-​64) Patikol ci Yis maˈorip, oniya cowa pitoor to rikec a misawkitay a tapang tano linkim palofok toya mihimaway to tadem a sofitay, papiyakayak to mangah, somowal to mitakawan no nisawawaan ni Yis ko tireng ningra.​—Matay 28:11-​15. w21.05 11 fiedac 12-​13 fatac

Na ngangaˈay ci Yihofa palaˈafo toniya ciraraway a hekal, kawra misetekay to falocoˈ Cingra mihadidi, pairaay to adihayay a haepoc no mita! Hofochan ko teloteloc ni Atam aci Ifa, cidangocayto ko tireng ato falocoˈ. Kawra kamayan a maolah ci Yihofa cangranan, misongilaˈ a midimokos cangranan. Mikiˈokayho ko Kawas papalaˈafo tonini a ciraraway a lekakawa. (1 Yohani 4:​19) Hanaca maharekayto Cingra misaˈosi to pidemakan a toki. Mafanaˈ to tada maolahay ko Kawas kitaanan, coko mamakahi kita malacafay Cingranan a mihadidi han? Hai, ano hakowato ko halafin a mihadidi, wa makahi kita. Patirengay ci Yihofa to saˈakawangay a taˈarawan no mihadidiay. Toniya demak, malefotay ko pitodong ni Yis to kakarayan Wama. Pakayni kitaanan, itiniho i fafekang no sera ci Yis miememay to pipakangodo ato tatiihay a sowal, itiniayho i pisemseman hecek mapasemsem. (Hipray 12:​2, 3) Ira ko ˈicel ni Yis miemem toniya kihcod, maedeng o pakayniay ngaˈayay taˈarawan ni Yihofa. Malecaday, o ngaˈayay taˈarawan ni Yihofa wa pakalalok kitaanan padadotoc a mihadidi. w21.07 12-​13 fiedac 15-​17 fatac

Mararaway kita to romiˈamiˈad, kawra makahiay ci Yihofa misodod kitaanan. (ˈOlic 103:10-​14) Malecaday ci Yis, soˈlin cowa ko malefotay ko nisawawaan, kawra siniˈadaay cingra cangranan, misodod cangranan. Makahiayho kinafalah to ˈorip no niyah, ho ngaˈay masodod ko raraw ita. (1 Yohani 2:​1, 2) “Mikifalocoˈ misodod” kita to salikaka, o papadihko to taˈangayay lomaˈ no Krisciyang ita. (Ifiso 4:​32) Manaokaniw, misodod to tao pasangaray nolatekay, mansa mamihadak kita to adihayay a ˈicel. Miharateng ko cecay fafahiyan salikaka to “Mikifalocoˈ Masasodod” a cacekiwen lalakaw taˈangayay ko sapadama cingranan, sanay cingra: “Mitadtaday ko lalakaw, misodod to tao cowa ko mihaiay to waywayan no tao, anca talimaan saan to pidokaˈ no tao. Tatodong no misodod i, ecato kaketer to tao, parihaday to falocoˈ no niyah.” Mikifalocoˈ kita misodod to salikaka, malecaday o kakarayan Wama ci Yihofaan a maolah cangranan. w21.09 23-​24 fiedac 15-​16 fatac

Maolahay ci Yis to pakayniay ci Yihofaan ato araaw Ningra a soˈlinay kimad. Cowa ko pitoor aca ningra to soˈlinay kimad maˈorip, misaˈicelayho a pasifanaˈ to tao mafanaˈ to soˈlinay kimad. (Yohani 18:37) O soˈliˈlinay mihakelong ci Yisan a tamdaw maolahay to soˈlinay kimad. (Yohani 4:​23) Soˈlinay i, panganganan no tarokos ci Pitiro ko pakasoˈlinan no Krisciyang o ‘lalan no soˈlinay kimad.’ (2 Pitiro 2:2) Maolahay to soˈlinay kimad ko salakatay a Krisciyang, mansa minaˈay to misafelitay to soˈlinay kimad a pihakelongan, nanaman no serangawan ato no tamdaw a harateng. (Kolosay 2:8) Malecaday, o aniniay Krisciyang misaˈicelay ‘mitoor to soˈlinay kimad ko waywayan,’ mikaˈimer to pihakelongan no niyah ato pakayraan maˈorip palecad to sowal no Kawas. (3 Yohani 3, 4) Caay ka pasowal ko Misawacayay Tamdaw ni Yihofa to masongilaˈay ko kafanaˈ no niyah to Fangcalay Cudad. Pakayni sapasifanaˈ ato limasmas no likakawa, latekay cowa ka tatodong ko pinengneng nangra to demak. Ano pakayni Fangcalay Cudad matongal ko kacipinang nangra ikor, wa masalof ko pidemak. w21.10 22 fiedac 11-​12 fatac

I nolitengan, mitaliyokay to niyaroˈ a lowil midipotay to lalomaˈay no niyaroˈ a finawlan caka madokaˈ no ˈada. Malecaday, o madimadiay a olah ni Yihofa masongilaˈay ko pidipot kitaanan, eca ka mapalak no tamdaw anca o demak ko kalawidang ita Cingranan. Iraay ko madimadiay olah ni Yihofa i kitaanan, mansa misolot Cingra kitaanan, ngaˈay kita materek i tatihi Ningra. (Yirimiya 31:3) Tano roma sapatinako ci Tafiti milengo to sadipot no Kawas i finawlan Ningra, sanay cingra: ‘O pikiˈadingan ako a kitiraan ko Kawas, o tano madimadiay a olah micada takowanan a Kawas.’ Sanayho ko sowal ni Tafiti: ‘Iraay ko madimadiay a olah Ningra takowanan, o pisitaraan ako, o pilimekan ako, o paˈoripay i takowanan a Tapang, o sapatada ako, o midipotay takowanan.’ (ˈOlic 59:17; 144:2) Hano patinakoen ni Tafiti ko madimadiay a olah ni Yihofa to pilimekan ato pisitaraan hani? Samanen ano icowato kita, ano padadotoc kita midoko ci Yihofaan, cowa ko mamihayi Cingra to tamdaw anca demak mipalak to kalimlaan a kalawidang ita Cingraanan. w21.11 6 fiedac 14-​15 fatac

Kinacecayay, tahalifaay ci Yis ato nisawawaan to faliyos i riyar, misaka dademakan ni Yis konini a toki padama to nisawawaan mihapinang itini maanan a pakayraan papaˈicel cangra to pakasoˈlin. (Matay 8:​23-​26) Itiya taˈangayay ko faliyos i riyar, micomoday i tamina ko tapelik, kawra maeholay ko fotiˈ ni Yis. Rawraw sanay ko nisawawaan, mipalalay ci Yisan paˈorip cangranan. Damsayay ci Yis somowal to pasangaray nangra, saan: ‘Cangoˈotay ko pakasoˈlin a tamdaw, hano matalaw kamo hani?’ Misiˈayaway kiso to “faliyos” han? Malifa iso ko pades anca sano faliyosay a sapalifet, tinakoen pakidem ko adada no tireng, telocto taˈangayay ko saroero, fokil sato a midemak. Latekay tada macariraway kiso, kawra aka matapiˈ no cariraw, telocto malahdaw ko pakasoˈlin ci Yihofaan. Ka padotoc miingid Cingranan, mikifalocoˈ mitolon Cingranan, songilaˈen miharateng samanay ci Yihofa padadotoc midimokos tisowanan isalakat. (ˈOlic 77:11) Ngaˈay pakasoˈlin kiso, ano aninito anca noikorto, cowa ko mamifalah ci Yihofa tisowanan. w21.11 22 fiedac 7, 10 fatac

Mihaen ko harateng no roma tamdaw, ano eca ka haeminen nangra miala ko dafong no tao, o midofdofayto tonini a sarikec sanay, kawra itini roma pakayraan misafelitay cangra tonini a sarikec. Tinakoen, cowa ko matatodongay a sapitingting ato sapilatang ko sapilipalaw no misasingdiay to lafang, malecaday o mitakaway. Itini Lifi 19:13 palalitingay to mitakaway ato makaniway a waywayan misasingdi, saan ‘aka milipalaw.’ Mihaenay, ano milipalaw ko misasingdiay tamdaw to tao, malecaday o mitakaway. O saka falo no Moetep a Rikec o mararaway ko mitakaway sanay, o lalakaw no Lifi padamaay to Israil tamdaw cipinang sasamaan a misaka dademak to safalod nonini a sarikec. O mamisongilaˈ kita miharateng to pinengneng ni Yihofa to milipalaway ato mitakaway. Ngaˈayay licayen ita ko niyah: ‘Maharek kako miasip to Lifi 19:11-​13, mahapinangay ako itini kaˈorip no niyah, mangalef itini misasingdiay ato katayalan, iraay ko sasalofen han?’ w21.12 9-​10 fiedac 6-8 fatac

Mitolon kiso to romiˈamiˈad i ngaˈayay haratengen, anini mararaway kiso to maanan, dotoc cangacangen ci Yihofa misodod tisowanan. Manaokaniw, ano aretengay ko raraw iso, cangacangen ko sadama no malohemay malitengay. Wa makahi cangra mitengil to sowal iso, hanaca misalalangian to Fangcalay Cudad mihadak to limoˈot tisowanan. Malacafay cangra tisowanan a mitolon, micangacang ci Yihofaan misalalangian to sapatefoc a misodod tisowanan. Mihaen, wa ngaˈay masalof ko kalimlaan kalalaˈed iso aci Yihofaan. (Yakop 5:​14-​16) Misongilaˈ miharateng to sapatefoc a limasmas wa ira ko sapadama. Maharateng ko Wawa no Kawas pakayni kitaanan micada to roray, masomaday kiso alatek. Kawra, tongalen iso midotim ko kinafalah ni Yis, o matongal ko olah ci Yisan ato kakarayan Wama Ningra. To mihecahecaan mirienangay kita to piharatengan to kinafalah ni Yis a saˈopo, tawlikay mitahidang to tao kalacafay mirienang, mihaen wa matongal ko pisalimla to sapatefoc. Pafeliay ci Yihofa to hatoki ita pasifanaˈ to tao mafanaˈ to Wawa Ningra, tada o kalikoanto konini! w21.04 18-​19 fiedac 13-​16 fatac

Kinacecayay, iraay ko ˈalomanay tamdaw mikilim cingranan. Misalafiiay ci Yis itini i lotok mitolon, maedeng tada malotayay itiya. Maˈaraw ningra ko ˈalomanay samaanay ko harateng hani? Siniˈadaay cingra to manikaway ato adadaay a tamdaw ilalomaˈ nangra, cowa ko piadah aca cangranan, mihadakayho to cecay a kimad, oya kafanaˈan no tamdaw ‘o pasifanaˈ i lotok,’ tada mitemeray to falocoˈ no tamdaw konini a kimad. (Luka 6:​12-​20) Makahiay ci Yis mipalak to toki padama to tamdaw. Ngaˈay haratengen iso, tiya mafanaˈ to mipatayan ko paputisemay a Yohani i, hakowaay ko adada no falocoˈ ningra a masomad han? Sowal no Fangcalay Cudad: ‘Matengil ni Yis konini a lihaf ikor i, mikalicay to tamina miliyas itira, tayra i awaay ko adeses a kitiraan, caay kaciharateng makalisanga no tamdaw.’ (Matay 14:10-​13) Kawra o ˈalomanay tamdaw isalakatay a tahira toya awaay ko adeses a kitiraan. (Marko 6:​31-​33) Maharatengay ni Yis tada misaaliay to sapasifanaˈ ato sahinom ko ˈalomanay tamdaw, tangsolay padama cangranan.​—Luka 9:​10, 11. w22.02 21 fiedac 4, 6 fatac

Ano mahapinang ita pakararaway ko niyah to tao, sasamaanto hani? Fanekfek a mitolon ci Yihofaan, micangacang Cingaranan padama kitaanan miliyaw a malakangaˈay to salikaka. Wa ngaˈay kita milomal to niyah, licayen ko niyah to pina salicay, tinakoen: “Wa makahi kako misakahmaw to niyah, misapoener a miliˈay, mararihaday to salikaka han? Ano talaˈayaw kako mihaen to demak, sasamaan ko harateng ni Yihofa aci Yis hani?” Miharateng kita toniya salicay, wa irato ko ˈicel midofdof ci Yisan, paihkal to misapoeneray, talaˈayaw mararihaday to salikaka. Ano mararihaday kita to salikaka i, pairaen ko misapoeneray a waywayan. (Ifiso 4:​2, 3) Tatalaˈayaw a mikilim to pakararawan ita a tamdaw, hanaca o patosokan ita o mamisarocod a mitapid to pairaan no niyah a dokaˈ. Haratengen, mararihaday to salikaka ikakaay ko kalimlaan to o cima ko matatodongay cima ko mararaway.​—1 Korinto 6:7. w21.12 25-26 fiedac 13-​16 fatac

Tada adadaay ko falocoˈ ni Yis, samanen mafanaˈay cingra ˈalomanay a finawlan cowa ka picada to milasilan ningra a lihaf no Hongti Kitakit. Mihaenay, o mamalaˈafo ko Yirusalim, o maˈosaway a tamdaw o mamalaholiw. (Luka 21:20-​24) Ka adayayan i, mahaenay ko mifekaday a demak, ˈalomanay tamdaw mifalahay cingranan. Ano mitosil kiso i, samaanay ko harateng no malitemohay a tamdaw hani? Ano cowa ka ˈaloman ko tamdaw minanam to soˈlinay kimad, ngaˈay kiso mikitini i kacilosaˈ ni Yis minanam to maanan hani? Tada ciharatengay ci Yihofa to tamdaw. O kacilosaˈ ni Yis pahapinangay kitaanan tada ciharatengay ci Yihofa to tamdaw, ‘cowa ka kahi Cingra malaˈafo ko cecay tamdaw, mitokelay pasasiyor ko cecacecay a tamdaw.’ (2 Pitiro 3:9) Ano ira ko cowa pisateked a harateng ita, padadotoc a padama to tao mafanaˈ to ngaˈayay lihaf, o paihkalayto kita soˈlinay a ciharateng cangranan.​—Matay 22:39. w22.01 16 fiedac 10-​12 fatac

Ano misongilaˈ kiso miharateng to nano demak ni Yihofa i finawlan no Niyah ato tisowanan i, papatongal to tanektek no pakasoˈlin iso. O sakakaay i papadadotoc matongal ko olah iso ci Yihofaan. Palalinien to roma capeling, o olah ikakaay ko pipakalalok kitaanan midofdof ci Yihofaan, matongal ko kalim ita pakayni sapakahemekaw Cingranan makahi a kinafalah, ato miemem to kihcod a pasangaray. (Matay 22:37-​39; 1 Korinto 13:​4, 7; 1 Yohani 5:3) Pakayni kitaanan o ngaˈayay kalawidang aci Yihofaan o sakakaay kalimlaan! (ˈOlic 63:​1-7) Haratengen, mitolon, micekiw, midotim o kalimlaan a demak midoko. Ngaˈay kita malecad ci Yisan mikilim to awaay ko adeses a kitiraan midemak tonini a demak. Aka makalisangaˈ ko falocoˈ, mitolonho ci Yihofaan micangacang to sapadama kitaanan misamacay ko harateng mirienang to midokoay a demak. Ano mihaen kita misongilaˈ misaka dademak to toki, o papalifonen ni Yihofa kita, itini faelohay a hekal mamilayap kita to tahadaˈocay a ˈorip.​—Marko 4:​24. w22.01 31 fiedac 18-​20 fatac

O harateng mifiyoray to waywayan, mihaenay sowal ni Yis o fafalahen ko mikayatay to sakararaw a harateng. (Matay 5:​21, 22, 28, 29) Makalimay kita pakahemek to kakarayan a Wama, mihaenay ano ira ko mararaway a harateng no ponoˈ, tatangsolen a mifalah, tada kalimlaan ko pihaen to demak! Sowal ni Yis: ‘O maharatengay i falocoˈ mahadakay i ngoyos.’ (Matay 15:18) Soˈlinayto o sasowalen ita patahkalay to i kemoday a falocoˈ ita, o soˈliˈlinay a waywayan ita. Ngaˈayay licayen iso ko niyah: “Ano pasowal to soˈlinay a sowal ano papaira to sakaafad ako, wa manaˈay kako a misamangah han? Madimadiay kako to raramod, eca pikalona to roma tamdaw hokira? Papakaliyas kako to kaacekan a sasowalen, malecad to miliyasay to midengaay a adada han? Ano pakararaw ko tao takowanan i, wa damsay kako a pacaˈof han?” Miharateng tonini a salicay wa ira ko sapadama tisowanan. Sapihelongaw kita to katelangan a capeling i, o fafalahen ko cowa ka satamdaw a sasowalen, ecato pisamangah, pakangodo to tamdaw ato somowal to kaacekan a sasowalen. w22.03 5 fiedac 12-​14 fatac

Ano talaˈayaw kita misaali to sapaini, eca ko pitala to sapaini no tao, o papadotoc a macakat, malo matenesay a Krisciyang. Mihaenay, talaˈayaw misaali to sapaini tada kalimlaan. Itini i masamanay a pakayraan, wa ngaˈay kita talaˈayaw milicay to sapaini no tao hani? Ilaeno iraay ko pina tinakoan: (1) Cecay fafahiyan salikaka mitahidangay to adihayay ko nalifetan a mitosilay mirienang to pipakingkiw, hanaca mahererek i, milicayay to tao iraay ko maanan sasalofen no niyah. (2) Cecay cowaho ka ciraramod a fafahiyan salikaka sapicakayaw to cecay kafer, tahidangay cingra to matenesay a fafahiyan salikaka papinengneng to matatodongay ko mipiliˈan no niyah. (3) Cecay faˈinayan salikaka sakinacecay mihadak to pakapapotalay a kimad, tahidangay cingra to cecay kadofahay ko nalifetan a salikaka misongilaˈ mitengil to kimad ningra ikor paini cingranan. Soˈlin adihayayto ko mihadakan no cecay faˈinayan salikaka a kimad, wa ngaˈayho cingra milicay to kadofahay ko nalifetan a mikimaday, hanaca mitoor to sapaini nangra a midemak.​—Taneng 19:20. w22.02 13 fiedac 15-​17 fatac

Tada maolahay ci Yihofa kitaanan, malecad o kaolah ato pidimokos Ningra ci Yisan. (Yohani 5:​20) Itiniho i fafekang no sera ci Yis i, midimokosan ni Yihofa ko saali ningra, mahawpay ko padama cingranan mitafo to tanektekay pakasoˈlin no falocoˈ, itini kasomadan ningra pakalalok cingranan, ato pafeli to kihcod sakaˈorip. Pasowalanho ni Yihofa ci Yis maolahay cingranan, mihaydaay cingranan. (Matay 3:​16, 17) Mafanaˈay ci Yis o tangongolay ko olah a kakarayan Wama itiniay i tatihi padama cingranan, mansa caay ka matoˈol. Malecaday kita ci Yisan itini adihayay pakayraan mitinako to olah ni Yihofa. Haratengen, soloten ni Yihofa kita tayra i tatihi Ningra, pafeli kitaanan to dihkoay a taˈangayay paro no lomaˈ no Krisciyang, tada rahekeray ko harateng ita, hanaca itini katoledan a tatokian milifokay to sapakalalok no salikaka. (Yohani 6:​44) Cowa kaketon ko sapafeli ni Yihofa i noˈadingoan a ‘kakaenen’ ita, hanaca midimokosay to sakaˈorip ita to romiˈamiˈad. (Matay 6:​31, 32) Songilaˈen ita miharateng ko olah ni Yihofa kitaanan, wa matongal ko olah Cingranan. w21.09 22 fiedac 8-9 fatac

Itini ˈayaw no malacafay kiso to Misawacayay Tamdaw ni Yihofa minanam to Fangcalay Cudad i, samaanay ko kaˈorip hani? ˈAlomanay tamdaw cowa kakahi miharateng to salakatay a demak. Itiya i, o pinengneng ita to kaˈorip ato capeling mafiyoray no palinian nonini a hekal, ‘itini tonini a hekal awaay ko hatokel ita, cowa ka fanaˈ to Kawas.’ (Ifiso 2:​12) Kawra ikor no minanam to Fangcalay Cudad iso, i kakarayan iraay ko tada maolahay tisowanan a Wama, ci Yihofa Cingra. Mananamayho iso ano sapakahemekaw ci Yihofaan, masalalomaˈ no taˈangayay paro no lomaˈ Ningra, mamisongilaˈ a mifalic to harateng no niyah, o pinengneng to kaˈorip ato pakayraan a maˈorip, o mamidofdof to ˈakawangay a palinian no waywayan Ningra a maˈorip. (Ifiso 5:​3-5) Ci Yihofa o Misangaˈay a Tatapangan no mita, o Wamaho ita i kakarayan, iraay ko fadangalan patireng to rikec no lomaˈ. Misaaliay Cingra kitaanan itini ˈayaw no micada to paputisem misaˈicelto a ‘mihelong to katelangan a capeling ato katelangan a waywayan.’ w22.03 2 fiedac 1-3 fatac

Micadaay to satahidang mirienang ato minengneng to pakaetimay a lafang, tada lipahakay ko harateng. Malecaday ko roma lopayˈay a siri, mahemekay cangra mirienang to Piharatengan a Saˈopo. O roma lopayˈay siri iraay ko toki misongilaˈ miharateng to hatokel no niyah. O roma lopayˈay siri tada halamhamay mitengil to Piharatengan a Saˈopo a kimad, samanen onini a kimad mitadtaday to Pikowan to Comaˈol Miheca, mamalaˈosi a demak ni Kristo ato kalacafayay cingranan mikowan a 144,000 tamdaw. Palo lakoingen nangra konini a cikiw, padamaho to madimadiay a tamdaw malo malefotay. Isaya 35:​5, 6; 65:21-​23; ato Paˈarawan 21:​3, 4 a sapairasol no Fangcalay Cudad mitadtaday to makapahay kaˈorip noikor, o masacaˈolay masaemangay mirienangay to Piharatengan a Saˈopo a tamdaw miharatengay ano matatodong ko sapairasol i, o niyah ato kaolahan a paro no lomaˈ malacafay lipahak a maˈorip, maacangay a mahemek. Mihaen ko demak nangra, o papaˈicel to hatokel noikor, misetek to falocoˈ eca ka piliyas ci Yihofaan.​—Matay 24:13; Kalatiya 6:9. w22.01 21 fiedac 5-7 fatac

O maanan ko sapatefoc? Itini Kirisiya a Cudad, mitoroˈan no sapatefoc o mihadakan ni Yis a sapiˈaca to malahdaway ni Atam. (1 Korinto 15:22) Hano misaali kita to sapatefoc hani? Samanen itini Rikec ni Mosi tano ˈorip a patefoc to ˈorip o masadafdafay a palinian ni Yihofa. (Kasadakan 21:23, 24) O malahdaway ni Atam o malefotay a ˈorip no tamdaw, mansa patafang ci Yis to malefotay a ˈorip no tamdaw, mihaen ngaˈ matoor ko masadafdafay a palinian no Kawas. (Loma 5:​17) Mihaenay, pakayni i pakasoˈlinay to sapatefoc a tamdaw, ci Yis malo ‘Midaˈocay a Wama’ nangra. (Isaya 9:6; Loma 3:​23, 24) Tangongolay ko olah ni Yis to kakarayan Wama, maolahayho kitaanan, mansa makahi kinafalah to ˈorip no niyah. (Yohani 14:31; 15:13) Pakayni toniya olah, misetekay cingra to falocoˈ tahatolas a madimadi, tahira i patay, milaheci to araaw no kakarayan Wama. Mihaenay, wa masongilaˈ a malaˈosi ko nano araaw ni Yihofa to tamdaw ato cikiw. w21.04 14-16 fiedac 2-3 fatac