Saka 7 Folad

Somowal, dademak ci Yis, ato kafahkaˈan a demak i, o harateng ato nafalocoˈan ningra malecaday to kakarayan Wama. (Yohani 14:9) Mikitini nidemakan ni Yis a kafahkaˈan a demak mananamay ita ko maanan hani?Tangongolay ko olah ni Yis aci Yihofa kitaanan. Ta itiniho ci Yis i fafekang no sera i, midemakay cingra to kafahkaˈan a palahdaw to roray no tamdaw, mahapinangay ita itini tangongolay ko olah ningra to tamdaw. Kinacecayay, tatosa a mapohaway tamdaw milekalay mingitangit ci Yisan to sapadama ningra. (Matay 20:30-34) Sinanoten hena, samanen ‘siniˈadaay cangranan’ ci Yis sanay ko sinael, miadahanto cangra. Ora mihongyakan ‘siniˈadaay’ sanay a Krisiya a sowal, maˈaraw ni Yis ko tamdaw misemsem hato matapaˈay no poˈot ko falocoˈ ningra. Roma sa i, pafecol ci Yis to macahiway tamdaw, miadah to malonoˈay a adadaay tamdaw, mikitiniay i tangongolay a siniˈadaay a falocoˈ ko sapihaen ningra to demak. Siniˈada ci Yis to tamdaw, samanen o ciolahay cingra. (Matay 15:32; Marko 1:41) Papakasoˈlinen ita, ‘matomesay ko sidaˈitay’ a Kawas ci Yihofa ato kanonoˈan Ningra a Wawa ci Yis, tangongolay ko kaolah kitaanan, maˈaraw ko nika pisemsem ita i, tada adadaay ko falocoˈ Nangra. (Luka 1:78; 1 Pitiro 5:7) Maedeng miharatengay Cangra to sapikalikiaw a palahdaw to kihcod a pades, ho ecato ka pisemsem ko tamdaw. w23.04 3 fiedac 4-5 fatac

Mamisaˈicel kita miliyas to mararaway harateng no hekal ni Satan, soˈliˈlin micadaan no ˈalomanay ko mahaenay harateng, nikawrira oha mamisaˈicel kita miliyas. Mamikingkiwho kita to Fangcalay Cudad, mitomes to matatodongay harateng i ponoˈ no niyah. Roma i, mirienang to saˈopo ato mitosil mamidipot to harateng no mita. Aka mapawan, mikiˈokay ci Yihofa, cowa ko papicadaen Ningra kita to caay ko mamahadidi ita a sapalifet. (1 Korinto 10:12, 13) Itini tonini a pasangaray a lintad, kita o kahacecay tamdaw o mamikifalocoˈ pasayra ci Yihofaan mitolon, ngaˈ padadotoc madimadi Cingranan. Makalimay ci Yihofa kitaanan ‘mifowah to nafalocoˈan i kaˈayaw Ningra.’ (ˈOlic 62:8) Pakahemeken ci Yihofa, pakayniho midemakan Ningra a kihcod miakoˈid Cingranan. Micangacang Cingranan padama tisowanan timolo a mitosil, cangacangenho Cingra padama tisowanan misiˈayaw to pasangaray, micoˈay to sakayhid. Aka a papicaraen ko tamdaw ato demak tisowanan micerid a mitolon ci Yihofaan. w23.05 7 fiedac 17-18 fatac

Hano mirienang kita to saˈopo no kasakopang hani? Sakakaay lalangian i, papakahemek ci Yihofaan. (ˈOlic 26:12; 111:1) Roma i, itini tonini a pasangaray a lintad, mirienang kita to saˈopo wa ngaˈay masasipakalalok. (1 Tisalonika 5:11) Itini saˈopo pakamay kita pacaˈof to salicay, mamalaˈosi koniya tosa patosokan. Kawra pacaˈof kita to salicay i, tatahasiˈayaw to tosa a pasangar, o cecay i, maharatengho to papacaˈof marawrawayto ko falocoˈ, o roma i, sapipacaˈofaw to adihayay a salicay, kawra cowa ka rarid a matoroˈ a matahidang kita. Sasamaan kita miremo tonini tosa pasangar hani? Sowal no tarokos ci Pawlo samacayen ita itini ‘masasipakalalokay’ a demakan sanay. Haratengen ita, ano soˈlinto kantang ko sowal, patalahkal to nika pakasoˈlin o papakalalok to tao, cowa ito ko mamarawraw ko falocoˈ. O roma i, ano caka rarid a matahidang no misikayay kita i, o mamahemekho kita, samanen ngangaˈayto ko roma tamdaw a pakamay pacaˈof.—1 Pitiro 3:8. w23.04 20 fiedac 1-3 fatac

Mapatenakayto ko lihaf, wa ngaˈayto ko Yutaya tamdaw minokay i nalacolan i Israil! Maholiw cangra tayra i Papilon maedeng 70 miheca, ˈarawhan ngaˈayayto a minokay! (Icra 1:2-4) Onini demak edengan ci Yihofa ko pakadangaray. Samanen tocerid cowa ka panokay to maholiway a tamdaw ko Papilon. (Isaya 14:4, 17) Kawra mapelengayto ko Papilon, o faelohay mikowanay pasowalay to Yutaya tamdaw, wa ngaˈayto cangra miliyas to Papilon. Toniya tatokian kahacecay a Yutaya tamdaw, mangalefay o tawki no lomaˈ, oha mamisaˈosi: mamiliyas anca materek itini Papilon. Sapidemakaw toniya saˈosi cowa ko madoloay alatek. ˈAlomanay Yutaya tamdaw matoˈasayto ko mihecaan, awaayto ko pakayraan maraay ko mirakatan minokay i nalacolan. Roma i, ˈalomanay Yutaya tamdaw itiniay i Papilon hofocen, mihaenay o nalacolanto nangra ko Papilon. Pakaynien cangranan, o Israil o nalacolan no tatoˈasan. O romaroma Yutaya tamdaw cihafayay ko kaˈorip itini Papilon, mihaenay pasangaran nanay cangra misawad to singdi ato sinowayay a lomaˈ no niyah, malinah tayra i kafahalan a pala maˈorip. w23.05 14 fiedac 1-2 fatac

Pakalalokay ko Fangcalay Cudad kitaanan padadotoc palahad to mihadidiay, siniˈadaay ato ciolahay falocoˈ. Luka 21:19 sanay: ‘Ano mihadidi kamo, o mamadipot ko ˈorip.’ Kolosay 3:12 sanay: ‘Caˈedongen ko . . . siniˈadaay falocoˈ.’ Saka 1 Tisalonika 4:9, 10 sanay: ‘Maherekayto ko Kawas pasifanaˈ i tamowanan, ka masasiolah. . . . Kawra salikakaaw, palimoˈot kami tamowanan ka padadotoc mihaen to demak, hanaca masongilaˈ ko pidemak.’ Onini a sinael somowalay toya saka 1 hahekalan, patalahkalayto tonini tolo capeling a Krisciyang, kawra papadadotocho palahad tonini a capeling. Ano kitato i, mamihaen to demak. Ngaˈayay haratengen iso ko saka 1 hahekalan a Krisciyang, samaanay cangra patalahkal tonini a capeling, dotoc mafanaˈayto kiso sasamaan mitodong cangranan, ho ngaˈay maherek a misaday pakayni i taˈangayay padiing. Mihaenay i, ˈayaw no mifekad ko taˈangayay padiing i, maherekayto kiso minanam mihadidi, hanaca mamisetek to falocoˈ padadotoc mihadidi i laliyadan no taˈangayay padiing. w23.07 3 fiedac 4, 8 fatac

Ano o manilnilay no fangcalay saocor a Krisciyang kita, anca ‘o roma lopayˈay a siri,’ oha mamaterek i “Makoracay a Lalan.” Mihaen ngaˈ, ngaˈay kita padadotoc midoko ci Yihofaan anini, noikor mamilifokho to pairaan no Hongti Kitakit no Kawas i tamdaw a masakenakenaay a sapalemed. (Yohani 10:16) Mikitini 1919 miheca misatapang, iraay ko masapatekay masaˈofaday a tamdaw miliyasay to Taˈangayay Papilon, oyaan mararaway a pihakelongan. Iraay ko faˈinayan fafahiyan matoˈasay kaemangay, misatapangay cangra romakat tonini sapatinako a taˈangayay lalan. Miliyas ko Yutaya tamdaw to Papilon i, mipalahdawanto ni Yihofa ko kihcod a sacara i lalan. (Isaya 57:14) Anini a lintad “Makoracay a Lalan” o masamaanay hani? Itini ˈayaw no 1919 miheca to pina soˈot miheca, sakadademakan ni Yihofa ko papina mangodoay Cingranan a tamdaw palahdaw to sacara, ho ira ko toki no tamdaw mikitini Taˈangayay Papilon masadak. (Nengnengen ko Isaya 40:3.) Midemakay cangra to kalimlaan misadayay a tayal, itini sapatinako a tatodong mitomadaw to lalan, padama to moecelay ko falocoˈ a tamdaw miliyas to mararaway a pihakelongan, micomod i lakoing no midokoay a pakayraan, tano matatodongay a pakayraan midoko ci Yihofaan. w23.05 15-16 fiedac 8-9 fatac

Halamhamay ci Yihofa lipahak makalim a midoko kita Cingranan. (2 Korinto 9:7) Ano mahaenay i, awa ko micikelohay a ˈicel ita ngangaˈayho padadotoc a malaˈosi ko patosokan han? Haratengen ko tinakoan ni Pawlo. Sanay ko sowal ningra: ‘Padadotocen ako a misaˈicel mirikec ko tireng no niyah, ho mala mitengilay a koli ko tireng.’ (1 Korinto 9:25-27 ato roma pihongyak.) Nolatekay, soˈlinto awaay ko harateng ni Pawlo to sapidemakaw to demak ni Yihofa, kamayanay pacieci to niyahan a midemak. Mihaen to demak cingra mihaydaan ni Yihofa han? Hayi, manaeca! Pafelian ni Yihofa to taˈangayay a sapalifon cingra. (2 Timoti 4:7, 8) Malecaday, maˈaraw ni Yihofa kita awaawa ko micikelohay a ˈicel padadotocayho a palaˈosi to patosokan i, o lalipahak Cingra. Mafanaˈay Cingra nolatek midemak kita to maanan a demak, cowa ko nika olah ita a midemak tora demak, ao Cingra ko kaolahan ita. Ci Yihofa pakayniay pisaˈicel ita a palemed kitaanan, matira pipalifon Ningra ci Pawloan. (ˈOlic 126:5) Ano matinako ita ko pipalemed ni Yihofa i, latek irato ko micikelohay a ˈicel kitaanan. w23.05 29 fiedac 9-10 fatac

Patinakoan no tarokos ci Pawlo to mafotiˈay a tamdaw koya caay ko mamaterek a maˈorip itini romiˈad ni Yihofa. Maeholto ko tamdaw i, cowato ka fanaˈ to mataˈlifay a toki ato mafekaday i taliyok a demak. Mihaenay, cowa ka fanaˈ cangra mamafekad ko maanan kalimlaan a demak, cowa ka ngaˈay a midemak to maanan. Anini, mahecaday o mafotiˈay ko ˈalomanay tamdaw. (Loma 11:8) Soˈliˈlin ihkalay ko wacay to itiniayto kita i ‘salikoray a romiˈad’ nohatini, mamafekadto ko taˈangayay a padiing, ˈarawhan cowa pikihar cangra tonini a wacay. (2 Pitiro 3:3, 4) Kawra mafanaˈay kita, mataˈlifto ko cecay romiˈad, mangata mangataayto ko romiˈad ni Yihofa, mankora papadadotoc kita talipaˈelal. (1 Tisalonika 5:6) Papadadotoc kita rihaday ko ponoˈ. Misamaanay hani? Samanen mihaen i, ngaˈ caka picapid to mirikecay anca lacongis nonini a hekal. Mangataayto ko romiˈad ni Yihofa, wa matongal ko macadaay ita a saroero, mapacieci itini tonini lacongis mipiliˈ a midama to cecay. Kawrira, aka calemcem kita, samanen o fangcalay saocor no Kawas papadama kitaanan padadotoc rihaday ko ponoˈ, mataneng ko pisaˈosi.—Luka 12:11, 12. w23.06 10 fiedac 6-7 fatac

Matengil iso ko Samson sanay a ngangan maharatengay ko maanan hani? O maharatengay iso oyaan taˈangayay ko ˈicel a faˈinayan alatek. Soˈlinay mahaen ci Samson, kawra na midemakay cingra to cecay mararaway a pisaˈosi, pairaay to kaadayayan no niyah a teloc. Soˈlin mahaen, o misinanotan ni Yihofa o kihcod na midemakan ni Samson Cingranan. Miˈoninganho Ningra i Fangcalay Cudad ko nano demak ni Samson, ngaˈayay nanamen ita. Sapilidongaw to Israil tamdaw finawlan no Niyah, misaka dademakan ni Yihofa ci Samson palaˈosi to adihayay demak. Ikor no mapatay ci Samson to 1,000 miheca, itini sakayat ni Yihofa mitiliday ko tarokos ci Pawlo to ngangan no ˈalomanay tamdaw, oniya tamdaw sahtoay o taˈarawan no pakasoˈlinay falocoˈ, masalalomaˈay ci Samson. (Hipray 11:32-34) Soˈlin pasangar ko pakayraan kamayan mitadiˈec ci Samson ci Yihofaan, patirengay to ngaˈayay taˈarawan ita. O taˈarawan ningra papakalalok kitanan, mikitini cingranan mamananamho ita ko masakalimlaan a kimad. w23.09 2 fiedac 1-2 fatac

Sapadadotocaw palahad to mihadidiay, ngaˈay kita micerid pasayra ci Yihofaan mikifalocoˈ a mitolon, pasowalen Cingra to ifalocoˈay a cariraw no niyah. (1 Tisalonika 5:17) Cowa ka tahalifa kiso nohatini to pakidemay a sapalifet alatek, kawra ano marorayan nanay kiso, maohotay anca taˈangayay ko saroero i, pasayraay kiso ci Yihofaan micangacang to sapadama hokira? Ano miceridayto kiso anini micangacang to sapadama ni Yihofa misiˈayaw to pasangar to romiˈamiˈad, ano tahalifa to taˈangayay sapalifet noikor i, cowato ko cacisasa kiso pasayra ci Yihofaan micangacang to sapadama. Itiya o papakasoˈlin kiso, mafanaˈay Cingra ihacowa a tatokian ato tano maanan a pakayraan padama tisowanan o sangaˈayay. (ˈOlic 27:1, 3) Ano aniniho minanamto kita mihadidi, noikor mifekad ko taˈangayay padiing i, oha ngangaˈayto padadotoc mihadidi. (Loma 5:3) Hano saan ko sowal hani? Mahapinangay no ˈalomanay salikaka, mitadiˈec cangra to sapadama ni Yihofa mihadidi to cecay sapalifet ikor, mamatongal ko pakasoˈlin to mamidama ko Kawas cangranan, o mahaenay a pakasoˈlin papadama cangranan malaˈosi ko pisiˈayaw to noikoran a sapalifet.—Yakop 1:2-4. w23.07 3 fiedac 7-8 fatac

Tada misapoeneray ci Yihofa, iraay ko siniˈada, makahiay Cingra micaˈi to tamdaw. Tinakoen, tiya papalaˈafoen ni Yihofa ko tatiihay Sotom a tamdaw i, salakatayho pakayni i coyoh mirikec toya moecelay a Lotoan, papiˈorong cingranan to paro no lomaˈ milaliw tayra i lotok. Matalaway ci Loto itiya, oranto cangacangay ci Yihofaan mihayi cingranan miˈorong to paro no lomaˈ milaliw tayra i Coar, onini a kaemingay a niyaroˈ nao papalaˈafoen ni Yihofa. Na ngangaˈay ci Yihofa misaali ci Lotoan mitoor to limoˈot Ningra a midemak, kawra mihayian Ningra ko picangacang ni Loto, cowa ka palaˈafo to Coar. Mikitini toniya maˈoningay mahapinangay ita tada misapoeneray ci Yihofa. (Satapangan 19:18-22) Ikor no adihayay mihecaan, pasayraay ci Yihofa i Ninifi a tamdaw patalahkal to siniˈadaay falocoˈ. Miocoran Ningra ko pairasolay ci Yona mihadak to salasil, somowal to papalaˈafoen ko Ninifi ato tatiihay tamdaw itira. Kawra ikor no pasasiyor ko Ninifi a tamdaw, siniˈadaayto ci Yihofa cangranan, cowato palaˈafo to Ninifi.—Yona 3:1, 10; 4:10, 11. w23.07 21 fiedac 5 fatac

Mikitini ci Yoasan mananam ita ko maanan hani? O cecay kilang ano panta ko lamit i, o mamitiˈer to sacoker ngaˈ moecel ko katomireng. Ano paliyasen ko sacoker i, ira ko taˈangayay fali o mamaterep konini a kilang. Malecaday ci Yoas tonini a kilang. Oya midamaay cingranan a Yihoyata mapatay ikor, mafiyoray no mitowakangay a sasowalen cingra, cowato ka tanektek a tomireng, miliyasay ci Yihofaan. Onini a tinakoan mitadtaday, cowa ka ngaˈay kita ira ko sadama no paro no lomaˈ ato salikaka ngaˈ mangodo ci Yihofaan. Sapitafoaw to tanektekay a pakasoˈlin, o mamicerid kita mikingkiw, midotim ato mitolon, paˈicel to olah ato mangodoay ci Yihofaan a falocoˈ. (Yirimiya 17:7, 8; Kolosay 2:6, 7) Cowa ka pakidem ko saali ni Yihofa kitaanan. Patnakay 12:13 ano tolasen ko saali ni Yihofa, saan ko sowal: ‘Ka ngodoen ko Kawas, midoedo to limoˈot Ningra. Onini ko lalahcien no tamdamdaw a demak.’ Mikangodo kita to Kawas, o ngangaˈayto misiˈayaw to sapalifet noikor, ngaˈayho tanektek caka ngiyangi. Ano padadotoc kita mikangodo ci Yihofaan, awaayto ko maan mamipalak to kalawidang ita i Cingranan! w23.06 18-19 fiedac 17-19 fatac

Satapang no saka 5 sinael i, ‘oya maroˈay i tadamaanay ˈanengan sanay ko sowal.’ (Paˈarawan 21:5a) Polong a mapolosi itini i Paˈarawan, kinatoloay aca ci Yihofa a pasowal, o cecay konini. Tatodong i, o somowalay tonini a sakiˈok cowa ko ciˈicelay a coyoh, cowa koya patikolayto maˈorip a Yisan, ao ci Yihofa ko mikiˈokay! Mitadtaday konini, dotoc a sowal no Kawas o papakasoˈlinen. Misamaanay hani? Samanen ‘cowa ko misamangahay’ ci Yihofa. (Titus 1:2) Mihaenay i, o maˈosiay ita itini i Paˈarawan 21:5, 6 sahtoay ngaˈayay a tiˈeren. ‘Nengnengen!’ sanay ko sowal ni Yihofa. (Paˈarawan 21:5) Itini Paˈarawan, mihongyakan a ‘nengnengen’ sanay a Krisiya tilid maceriday mahadak. dotoc o manan ko sowal ni Yihofa hani? Sanay Cingra: ‘Safaelohento Ako ko kihcod nohatini.’ Ora nisowalan ni Yihofa itini, soˈliˈlin o noikoran a demak, kawra mafanaˈay Cingra mamalaˈosi ko sakiˈok no Niyah, mankora midemakay Cingra nohatini tonini a sakiˈok, saan ko sowal Ningra.—Isaya 46:10. w23.11 3-4 fiedac 7-8 fatac

Tarokos ci Pitiro mamiˈodot to adihayay a dangoc no niyah. Nengnengen ko pina tinakoan. Pasowalan ni Yis ko nisawawaan, sapilahciaw to sapairasol no Fangcalay cudad, o mamisemsem cingra patayen no tamdaw, ˈarawhan milalangan ni Pitiro cingra. (Marko 8:31-33) Ci Pitiro ato romaroma tarokos kinapinapinaay a malacongis to cima ko sakakaay. (Marko 9:33, 34) ˈAyaw no mamapatay ci Yis toya dadaya, felot sanay ci Pitiro a mikerit to tangila no cecay tamdaw. (Yohani 18:10) Toya dadaya, tona matalaway to tamdaw ci Pitiro, kinatoloay a mihakeno ci Yisan. (Marko 14:66-72) Oranto i, tada masomaday ci Pitiro, ongong sanayto tomangic cingra. Kawrira, cowa ka sawaden ni Yis konini matoleday a tarokos. Patikol maˈorip ci Yis ikor, papipatalahkalan ci Pitiro to olah ningra ci Yisan. Papidimokosan ni Yis ci Pitiro to siri ningra, misapoener a matayal saki salikaka. (Yohani 21:15-17) Mahemekay ci Pitiro micada tonini kalimlaan a ˈinorong. Itini Kocinsic a Romiˈad, ci Pitiro ato romaroma salikaka malisopsop i Yirusalim i, tahacadaay to sapanilnil no fangcalay saocor, cangra i, o saˈayaway milayap tonini masakalimlaan a sapalemed a tamdaw. w23.09 22 fiedac 6-7 fatac

Palimoˈotay ci Pitiro to malohemay malitengay, sowal sa: ‘Simawen a midimokos ko sapatorod no Kawas tamowanan a siri.’ (1 Pitiro 5:1-4) Ano o malohemay malitengay kiso, mafanaˈay kami to maolahay kiso to salikaka, ciharatengay to sapisimawaw cangranan, kawrira, nolatekay tada ˈifowaay kako malotayayto, cowa pakafilo kako mitamorong tonini ˈinorong, wa saan kiso miharateng alatek. Ano mahaenay i, sasamaanto kiso hani? Pasowalen ci Yihofa to cariraw no falocoˈ iso. Sanay ci Pitiro: ‘O matayalay i, ka pitiˈer to sapafeli no Kawas a ˈicel a matayal.’ (1 Pitiro 4:11) O malifaay no salikaka a pasangar latek cowa ko mamasaysay itini tonini a hekal, kawra haratengen, oya ‘sakakaay a misimaway’ a Yis Kristo ngangaˈay padama cangranan, hanaca aikaka ko madangaray ningra. Cowa ko anini aca, itini faelohay a hekal o mamisongilaˈ cingra midimokos to salikaka. O saali no Kawas to malohemay malitengay i, maolah to salikaka, misimaw ato ciharateng cangranan, ‘malo taˈarawan no siri.’ w23.09 30 fiedac 13-14 fatac

Aka pitadiˈec to harateng no tamdaw. Ano kitinien ita i pinengneng no tamdaw ko pinengneng to demak i, wa misakahmaw ci Yihofaan ato palinian Ningra alatek. (1 Korinto 3:19) ‘O taneng nonini hekal’ patooray to mararaway a coos ita. Itini nolitengan a Pirkamum ato Tiyatira, o mitaˈongay to samiyay ato malafoay madadiˈiyay a waywayan tada matenakay, itiraay a Krisciyang mafiyoray no mahaenay a pinangan. Oniya tosa kasakopang pakihateray to madadiˈiyay a waywayan, telocto mirikecan ni Yis. (Paˈarawan 2:14, 20) Anini, taharoeroay kita to sapicadaaw to mararaway a harateng. O paro no lomaˈ ato kafanaˈan a tamdaw mamisawi, papisawad kitanan to saaroˈan no Krisciyang. Wa saan ko sowal nangra, mitoor to coos no niyah cowa ko mararaway, matelangayto ko palinian no Fangcalay Cudad sanay. Kawra, nolatekay, o sapafeli ni Yihofa a sakayat cangoˈotay saan kita miharateng alatek, hato ‘sapitaˈlifaw to sowal no Fangcalay Cudad.’—1 Korinto 4:6. w23.07 16 fiedac 10-11 fatac

O wina ni Yis ci Mariya misaaliay to ˈicel. Cowaho ka ciraramod cingra kawra cacipoyapoy mahofoc to wawa. Awaayho ko nalifetan ningra midimokos to wawa, ˈarawhan papalahad midimokos to cecay wawa, hanaca o noikoran a Misiya koniya wawa. Cowaho ka dadiˈi cingra to faˈinayan cacipoyapoyto cingra, sasamaan cingra mitadtad to hafaˈinay ci Yosifan toniya demak hani? (Luka 1:26-33) Samaanay ci Mariya milifok to ˈicel hani? Micangacangay cingra to sadama. Tinakoen, pakayni toniya ˈinorong, papitadtadan ningra ci Kapriil tonini a demak. (Luka 1:34) Ikorto i, malingaday cingra tayra i ‘lotok no Yuta’ milisoˈ to salawina ci Ilisapican. Pakahemekay ato pakalalokay ci Ilisapic ci Mariyaan, hanaca itini sakayat ni Yihofa somowalay to pakayniay toya itiyaday ni Mariya a wawa a sapairasol. (Luka 1:39-45) Matengil konini a sowal ikor, pakahemekay ci Mariya ci Yihofaan, somowal ‘tano ciˈicelay a patelaw midemak to kafahkaˈan’ ci Yihofa sanay. (Luka 1:46-51) Pakaynian ci Kapriilan aci Ilisapican, patongalan ni Yihofa to ˈicel ci Mariya. w23.10 14-15 fiedac 10-12 fatac

O nisawawaan ni Yis iraay ko 144,000 tamdaw manilnilay no fangcalay saocor, cangra ato ci Yihofa iraay ko mikiriwiˈay a kalalaˈed, aitini i kakarayan malacafay ci Yisan a mala saysi. (Paˈarawan 14:1) O Fangcalay Kitiraan mitaypiyaway, ya itiniho i sera ko 144,000 tamdaw i, mihofocan no fangcalay saocor cangra, malo wawa no Kawas. (Loma 8:15-17) O Safangcalay Kitiraan mitaypiyaway to kaitiraan ni Yihofa i kakarayan. Oya palaˈeday to Fangcalay Kitiraan ato Safangcalay Kitiraan a ‘kiradom’ mitaypiyaway to tireng ni Yis. Ano o ciheciayho a tireng ci Yis i, cowa ko ngangaˈay malo sakakaay saysi a micomod i kakarayan matayal saki Yihofaan. Patafangento ni Yis ko tireng, malo sapilidong to tamdamdaw a ˈaca i, ngaˈayayto ko 144,000 tamdaw milifok to no kakarayan a ˈorip, kawra sasawaden nangra ko nohecian a tireng wangaˈ milifok to mahaenay a sapalifon.—Hipray 10:19, 20; 1 Korinto 15:50. w23.10 28 fiedac 13 fatac

Tiya lokesen no Ifraim a tamdaw ci Kitiyon i, cowa ka keter cingra. Paihkalay cingra to misapoeneray, mihadidiay a mitengil to ngaliwngiw nangra, damsayay a mikangodo pacaˈof cangranan, oranto i, dipayalayto ko demak. (Kakitaan 8:1-3) O citanengay a malohemay malitengay wa ngaˈay mitodong ci Kitiyonan, ano micada to salikaf i, songilaˈen a mitengil, hanaca damsay ko pipacaˈof. (Yakop 3:13) Ano mihaen i, wa ngaˈayto cangra itini kasakopang micowat to dipayal. Mapadik ni Kitiyon ko Mitiyan a tamdaw ikor, sapaˈdilaw ko Israil tamdaw ci Kitiyonan. Kawra cowa ka kahi ci Kitiyon a micada, ao panokayay to polong a narorayan ci Yihofaan. (Kakitaan 8:22, 23) Sasamaan ko malohemay malitengay mitodong ci Kitiyonan hani? Ano malaˈosi ko pina demak i, panokayen ko ˈdil ci Yihofaan. (1 Korinto 4:6, 7) Tinakoen, ano mapakahemek ko cecay malohemay malitengay to nika inaneng ningra a pasifanaˈ i, ngangaˈay cingra mitadtad, o Kimad no Kawas ko ciˈicelay han, anoca tadtaden to tahacadaay cingra to sapahatatanam no likakawa no Kawas hato iraay ko hatiniay a inaneng han. Mamicerid cangra miharateng, mikidatay ko niyah to pisamacay no tao a minengneng hokira. w23.06 4 fiedac 7-8 fatac

Ano caka tangsol sa malifok ko misaalian ita i, licayen ko niyah, matatodongay kora misaalian a demak no mako han? Marariday kita miharateng to o maanan ko sangaˈayay kitanan. Kawra ano raayen minengneng i, o micangacangan a demak latek cowa ko sangaˈayay. Ano pakayni i maanan a pasangar mitolon ci Yihofaan, haratengen, alatek iraay ko romaroma sapisaysay a pakayraan mikikakaay ko kangaˈay to miharatengan no mita. Roma sa i, mingitangitan ita a pina demak cowa ka tatodong to araaw ni Yihofa. (1 Yohani 5:14) Tinakoen, mitolonay ko wama wina micangacang ci Yihofaan padama to wawa nangra padadotoc midoko to Kawas, mihaen ko picangacang cowa ko mararaway. Kawrira, cowa ka pacieci ci Yihofa to tamdaw midoko Cingraanan. Halamhamay Cingra to polong a tamdaw, mahawpay ko wawa no mita, mikifalocoˈ mipiliˈ midoko Cingraanan. (Limoˈot 10:12, 13; 30:19, 20) Mankora, onini wama wina ngangaˈay mitolon ci Yihofaan padama cangranan mitemer to falocoˈ no wawa, pakalalok to wawa nai falocoˈ maolah ci Yihofaan, makahi mala widang Ningra.—Taneng 22:6; Ifiso 6:4. w23.11 21 fiedac 5 fatac; 23 fiedac 12 fatac

Mihinom to tao hano o kalimlaan a pakayraan patalahkal to olah hani? Cecay taˈarawan to Fangcalay Cudad sanay, misaka dademakan ni Pawlo ‘mihinom’ sanay a sowal tatodong i, “ano tahalifa ko tao to pakidemay sapalifet i, tomireng i tatihi ningra pakalalok cingranan.” Mihinom kita to tahapadesay a salikaka, papadama cangranan tanektek, padadotoc romakat i saka tahadaˈoc no ˈorip a lalan. O kahacecay no pipacafay ita ato pihinom to tahalosaˈay a salikaka i, o paihkalay kita to olah cangranan. (2 Korinto 7:6, 7, 13) Wa isalakatho ira ko siniˈadaay a falocoˈ ita ngaˈ, malingad mihinom to tao. Iraay ko siniˈadaay a falocoˈ a tamdaw ano maˈaraw ko tao misemsem i, makalimay sapihinomaw to tao, misaˈicel a milowan to roray nangra. Misaˈicelay ci Pawlo pasowal, mihinom ci Yihofa to tamdaw ato kasiniˈada ni Yihofa to tamdaw o makedecay a malaliting. Panganganan ni Pawlo ci Yihofa to ‘siniˈadaay to tamdaw a Wama, pafeliay to sahinom a Kawas.’—2 Korinto 1:3. w23.11 9-10 fiedac 8-10 fatac

O kahacecay mikotoday ci Kristoan a tamdaw o tatahalifa to pades, hatiraay ci Pawlo. Sanay ko sowal ningra to i Tisalonikaay a kasakopang: ‘Itira kami i tamowanan i, na paliˈayaway a mitadtad to mamalifa ita ko pades. Soˈlinay a mahaen ko demak.’ (1 Tisalonika 3:4) Sanay ko sowal ningra to i Korintoay a kasakopang: ‘Salikakaaw, o malifaay niyam a pades i Aciya pala, harateng niyam i nanay mafanaˈ kamo . . . Na mamapatayto sanay kami to niyahan.’ (2 Korinto 1:8; 11:23-27) Anini, o Krisciyang tatahasiˈayaw to pinapina a pades. (2 Timoti 3:12) Pakayni i pihakelong ci Yisan mikatawaan no salawina ato widang kiso han? Misetekay kiso to falocoˈ itini kihcod a demakan caay pisamangah, pakayni toninian malifaay iso ko fangafang i katayalan han? (Hipray 13:18) Pakayniay kiso i pipaladaˈ to tao to hatokel no Fangcalay Cudad a malifa ko pisafelit no sifo han? Sowal ni Pawlo, ano o mananto a pades ko malifaay ita, o kalipahakan maemin. w23.12 10-11 fiedac 9-10 fatac

Misiˈayawayho ci Yakop to romaroma a pasangar. O tatosa a wawa ningra ci Simiyong aci Lifi mipalakay to ngangan no lalomaˈan, pakangodoayho to fangcalay ngangan ni Yihofa. Roma i, kaolahan ni Yakop ci Rakil mahofoc to saka tosa a wawa i, mahalodotay a mapatay. Malitengto ci Yakop i, pakayni i pakidemay a kedal mafolaway tayra i Icip. (Satapangan 35:16-19; 37:28; 45:9-11, 28) Soˈliˈlin tahalifa to adihayay pasangar, kawra cowa ka malahdaw ko nika pakasoˈlin ni Yakop ci Yihofaan ato sakiˈok Ningra. Mansa pakayni toninian, palemedan ni Yihofa ci Yakop. Tinakoen, pafelian ni Yihofa ci Yakop to adihayay a hafay. O roma i, nao mapatayayto ci Yosif sanay ci Yakop a miharateng, ˈarawhan malalitemohayho ci Yosifan cingra. Haratengen iso hena, hakowaay ko noka piakoˈid ni Yakop ci Yihofaan itiya? Tona tangongolay ko kalawidang ni Yakop aci Yihofa, mansa pakaremoay cingra to masamaamaanay a sapalifet. (Satapangan 30:43; 32:9, 10; 46:28-30) Kita i, ngangaˈay padadotoc patanektek to nika lawidang aci Yihofaan. Mihaen i, soˈlinto talihafal sa tahasiˈayaw to sapalifet, o ngangaˈay kita pakaremo a misiˈayaw. w23.04 15 fiedac 6-7 fatac

Ci Tafiti itini ˈOlic saka 23 fedengan patalahkalay cingra to tanektekay a pakasoˈlin. Pakasoˈlinay cingra to maolahay ci Yihofa i cingranan, ciharatengayho cingranan. Onini a ˈOlic somowalay to tangongolay ko kalalaˈed ningra atoya pakaenay cingranan a Yihofaan. Misarocoday mitadiˈec ci Tafiti ci Yihofaan, ira ko sakayat ni Yihofa, rihadayan nanay ko falocoˈ ningra. Mafanaˈay ci Tafiti hakelong no ˈorip no niyah o mamadipot no olah ni Yihofa, hano mihaen cingra a pakasoˈlinen hani? Midimokosan ni Yihofa ko maamaan a saali ni Tafiti, matinakoay ni Tafiti konini a kasongilaˈ a madimokos. Roma i, tangongolay ko kalawidang ni Tafiti aci Yihofa, milifokayho to pihayda ni Yihofa. Mihaenay, pakasoˈlinay cingra ano mifekadto ko maanan noikor, papadadotoc ci Yihofa midimokos cingranan. Awaay ko sasa ni Tafiti to olah ni Yihofa, o hatiniay a noka pakasoˈlin padamaay cingranan miremo to maamaan a carirawan, lipahaken ato marenecen ko falocoˈ ningra.—ˈOlic 16:11. w24.01 29 fiedac 12-13 fatac

Mahererek ko Saka Tosa Lalood no Hekal, ikor, adihayay pala iraay ko dipayal, ngaˈayto pasalat ko finawlan no Kawas a mitosil pasifanaˈ to tamdaw. Anini, padadotocay mihakelong ko Malohemay Malitengay i Congpo to sakayat ni Kristo, mihadak to matatodongay to araaw no Kawas a sakayat ato harateng ni Kristo, hanaca misaka dademakay to kasakilac kantok ato malohemay malitengay pasayra i kasakopakopang mihadak to sakayat. Manaokaniw, oniya faˈinayan salikaka sahtoay o cowa ko malefotay, latekay mararaway ko demak, malecad ci Mosian, Yosuwa ato tarokos. (Saˈosi 20:12; Yosuwa 9:14, 15; Loma 3:23) Kawra sowal no Fangcalay Cudad, manilnilay no fangcalay saocor a malohemay malitengay itiniay i “kawanan a kamay” ni Kristo, mitoroˈan tonini i, polong a malohemay malitengay no kasakopang sahtoay itiniay sakayat ni Kristo. (Paˈarawan 2:1) Mihaenay hato cipinangay kita, padotocay ci Kristo misinanot mikerid to madimadiay citanengay a koli ato polong a malohemay malitengay, papadadotoc mihaen to demak. Adihayay ko lalangian ita mitadiˈec to pakaynian ni Yis i mikeriday faˈinayan salikaka mihadakan a sakayat. w24.02 23-24 fiedac 13-14 fatac

Anini, sasamaan kita pakahemek ci Yihofaan, palipahak Cingranan hani? Ngangaˈay kita fanekfek malalengo to tao pakayni ci Yihofaan, hanaca itini sasowalen patalahkal to miakoˈiday ato maolahay kita to kakarayanay Wama. Ano mitosil i, haharatengen ita sakakaay a patosokan o papadama to tamdaw miingid ci Yihofaan, padama cangranan mahecad kitanan maolah to kanonoˈan a kakarayan Wama. (Yakop 4:8) Mihaenay i, mamisaka dademak kita to Fangcalay Cudad padama to tao mafanaˈ ci Yihofaan ato makapahay capeling Ningra, matira o olah, masadafdafay, taneng, ˈicel a capeling Ningra. Roma i, wa ngaˈayho kita itini i nokaˈorip mitodong ci Yihofaan. Mihaen ko demak ita, mamahapinang no tao cowa ka lecad kita tonini a tatiihay a hekal, sakafanaˈawto cangra hano cowa ka hecad kita to romaroma tamdaw. (Matay 5:14-16) Ano ira ko matatodongay a toki ita i, ngangaˈayto pasayra cangranan mitadtad tonini demak, o soˈlinayto ko harateng a tamdaw wa masolotto a miingid to Kawas. Tano mahaenay a pakayraan kita pakahemek ci Yihofaan, o papalipahak to kakarayan Wama.—1 Timoti 2:3, 4. w24.02 10 fiedac 7 fatac

Mamalo o matenesay a Krisciyang, papalahad kiso to pina ciepocay a inaneng. Papadama konini tisowanan mitamorong to ˈinorong no kasakopang, mahela ko katayalan paririˈ to niyah ato paro no lomaˈ, padamaho tisowanan ngaˈay ko kalalaˈed to tao. Tinakoen, palahad to ngaˈayay inaneng a miˈosi ato mitilid. Sowal no Fangcalay Cudad mikingkiw ko tamdaw to romiˈamiˈad to Kimad no Kawas, hanaca misongilaˈ midotim, wa malaˈosi ko kaˈorip a lipahak. (ˈOlic 1:1-3) To romiˈamiˈad mikingkiw to Fangcalay Cudad, o cacipinang cingra to pakayraan ni Yihofa misimsim, palahad to ihkalay a inaneng a misimsim, mafanaˈ samaan misaka dademak to safalod no Fangcalay Cudad. (Taneng 1:3, 4) Misaaliay ko salikaka to sapadama no matenesay a faˈinayan salikaka, misaali cangranan mikitini Fangcalay Cudad mihadak to matatodongay a sakayat ato sapaini. Ano iraay ko ngaˈayay a inaneng iso miˈosi ato mitilid, misadayan iso a kimad ato sapacaˈof mamatongal ko kaciepoc, paˈicel to pakasoˈlin no tao. Wa ngaˈayho kiso a mitilid to kalimlaan. Oniya mitilidan a kalimlaan wa patanektek to pakasoˈlin no niyah, ngaˈay pakalalok to tao. w23.12 26-27 fiedac 9-11 fatac

Ano makokiˈen kiso i, ngaˈayay saharateratengen ano malahdawto ci Satan i, mamidemak ci Yihofa to maanan a demak noikor. 2014 miheca kasapala taykay iraay ko cecay kapotoˈay ika, o cecay wama tiya malalengo to paro no lomaˈ to 2 Timoti 3:1-5 i, malacafay misaharaterateng ano o faelohay hekal ko mipaliˈayawan nonini sinael i, wa samaan ko sowal nora sinael. Alatek wa saan ko sowal: “Tahirato i faelohay hekal i, o raraheker ko kaˈorip iso. Itiyato, caciharateng ko tamdaw to tao, maolah to noˈadingoan a hafay, misapoener ko falocoˈ, mikangodo to Kawas, mikangodo to wama wina, ira ko miakoˈiday falocoˈ, madimadi, siniˈada, makahi a malakangaˈay ato tao, somowal to kangaˈayan no tao, miˈimer to tireng, damsay, maolah to makapahay, madimadi ngaˈayay pakasoˈlinen, makahi pacaˈi, caay ka misatakaraw, maolahay to Kawas cowa ka haliacang, mitiˈenecay to soˈlinay falocoˈ a malatamdaw. O kakalacafayen iso a micawmaˈ ko mahaenay tamdaw.” To kalo a romiˈad mamihaen kiso a malalengo to paro no lomaˈ anoca salikaka to kaˈorip i faelohay hekal han? w24.01 6 fiedac 13-14 fatac

Sowal no Fangcalay Cudad: ‘Maolahay ci Yihofa to finawlan Ningra.’ Mafanaˈ tonini parihadayay to falocoˈ no mita! (ˈOlic 149:4) Kawra nolatekay, o romaroma salikaka masofaway ko pinengneng to niyah, wa saan cangra miharateng alatek: “Soˈlinay ci Yihofa mihayda takowanan han?” Itini lintad no Fangcalay Cudad, ˈalomanay madimadiay midoko ci Yihofaan a tamdaw na iraay ko mahaenay a nafalocoˈan. (1 Samuil 1:6-10; Yopu 29:2, 4; ˈOlic 51:11) Misongilaˈay paihkal ko Fangcalay Cudad, o cowa ka lefot a tamdaw ngangaˈay milifok to pihayda no Kawas. Sasamaan ko pidemak ita hani? Pakasoˈlinen ita a mihakelong ci Yis Kristo halo micada to paputisem. (Yohani 3:16) Mihaen i, o patalahkalay kita to maherekayto pakayni i raraw no niyah a pasasiyor, halo miketon to sowal a midofdof to araaw no Kawas. (Dmak 2:38; 3:19) Misaka dademak kita toniya pina demak mitongal to olah ci Yihofaan, tada o kahemekan Ningra konini. Ano padadotoc kita misaˈicel milahci to miketonan ita a sowal patafang to tireng, o mamihayda ci Yihofa kitanan, malo o ngaˈayayto a widang Ningra kita.—ˈOlic 25:14. w24.03 26 fiedac 1-2 fatac

Ano mikeceng ko sifo kitaanan a mitosil, ngaˈayay todongen ita ko taˈarawan no saka 1 hahekalan a nisawawaan kiemel mitosil. Ngangaˈay kita pakasoˈlin, papadama ci Yihofa kitaanan milahci to mitosilay tayal. Mihaenay, mamitolon kita micangacang ci Yihofaan pafeli to taneng ato timolo kitaanan. Cangacangen ci Yihofa padama kitaanan misiˈayaw to pasangaray. Kita ˈalomanay tamdaw misiˈayaway to hakokay, adada, nafalocoˈan a pasangaray, mapatay ko salawina, ato pasangaray no paro no lomaˈ masakenakenaay a sapalifet, o lifong ato malalooday a pades mitongalay to pasangar no mita. Mihaenay, o nafalocoˈan iso ato masiˈayaway a pasangaray eminen pasowal ci Yihofa, malecad ono kasasowal to ngaˈayay a widang. Aka calemcem, o papadamaen ni Yihofa kiso. (ˈOlic 37:3, 5) Kiemel a mitolon papadama kitaanan padadotoc mihadidi i kapadesan. (Loma 12:12) Mafanaˈay ci Yihofa to malifaay no finawlan Ningra ko maanan, o picangacang nangra to salidong, matengilay Ningra maemin.—ˈOlic 145:18, 19. w23.05 5-6 fiedac 12-15 fatac

Ano mamidemak kita to kalimlaan a sasaˈosien i, hapinangen ‘o maanan ko araaw ni Yihofa,’ dotoc tooren ko araaw Ningra a midemak. (Ifiso 5:17) Miharateng kita to cecay demak milingatay to maanan safalod no Fangcalay Cudad, mihaen micangacangay ci Yihofaan samaanay ko pinengneng tonini a demak. Ikor sakadademaken ita konini a safalod, mamadoloto citaneng ko pisaˈosi. O ˈada ita ci Satan, oyaan ‘mariˈangay,’ makalimay cingra kitanan ˈifowa micangacang to demak nonini a hekal, mihaen awato ko toki ita matayal saki Yihofaan. (1 Yohani 5:19) Ano caka pinaˈon kita, itini pinengneng to hafay, picudadan no hekal ato tayal no niyah mamadoloto paikaka to katayal ci Yihofaan. Ano iraay ko hatiniay a pasangaray no cecay Krisciyang, mitadtaday konini mafiyorayto no hekal ko harateng ningra. Manaokaniw, masowalay i fafekang a demak cowa ko mararaway, kawra o hatiniay a demak cowa ko ngangaˈay paisalakaten i nokaˈorip ita. w24.03 24 fiedac 16-17 fatac