ˈAyaw no Mamirikec to Tao i, ˈOsien ko Yopu a Cudad

1-2. Oya tatoloay widang ni Yopu aci Ilihu sapipadamaaw ci Yopuan, hano cowa ko madoloay hani?

I KAˈORIPAN ni Yopu a kitiraan ˈalomanay ko mafanaˈay cingranan to cihafayay, kawra fahal sanay malahdaway ko kihcod ningra. Oniya demak kalikiay mafanaˈ ko tamdamdaw. O widang ningra ci Ilifac, Piltat, aci Cofar, tahatengil cangra kalikiay tayra i Uc sapihinomaw ci Yopuan. Kawra pakidemay ko nika tatiih ni Yopu, tada fahkaˈay ko widang ningra, cowa pakasoˈlin to maˈaraway no niyah!

² Saharateratengen hena ko kasiniˈadaan ni Yopu a pakayraan. Fahal sanay, malahdaw ko kihcod ningra. O kolong ningra, siri, lofa ato lakota, roma i, matodohay a mapatay, o roma i, maˈafasay no tohoy. O sikawdan ningra matodohay a mapatay, o roma i, mipatayan no tohoy. Dotoc, fahal sanay mapelal ko lomaˈ, mapaekelay mapatay ko emin a wawa. Cowa konini aca, matomesay ko mafenaˈ i tireng ni Yopu, tada adadaan nanay cingra. Ya tayni ko tatoloay widang ikor, maˈarawayto tada masomaday ci Yopu maroˈ i ˈafoˈafoan. Sasamaan ko demak no widang ningra hani? Maedeng pitoay ko romiˈad cowa ka caciyaw cangra. (Yopu 2:12, 13) Itiyato i, tayniay ko cecay kapah ci Ilihu, maroˈay i ngata ningra. Ikor somowalayto ci Yopu. Sakapatayaw sanayto cingra, sanayho cingra kaeca ka hofocen ko kangaˈay. (Yopu 3:1-3, 11) Mihaenay i, misaaliay ci Yopu to sapakalalok no widang, misaaliayho to sapadama misalof to harateng! Kawra o manan ko hasowal no widang ni Yopu hani? Tano masamaanay a pakayraan hani? O waywayan nangra papaihkal to o soˈlinay a widang a ciharateng ci Yopuan hokira.

3. Oniya lalakaw mamilengo to maanan?

³ Mikayatan ni Yihofa ci Mosi mitilid to Yopu a cudad, mitiliday to tatoloay widang ni Yopu aci Ilihu o manan ko misowalan, ato o manan ko midemakan nangra. Miˈosi to Yopu a cudad cacipinangto kita, itini pifiyor no tatiihay coyoh somowalay ci Ilifac to cowa ka ngaˈay a sowal, kawra itini sakayat ni Yihofa pasowalay ci Ilihu to mihinomay ci Yopuan a sowal. (Yopu 4:12-16; 33:24, 25) Mihaenay i, ano miˈosi to nalifetan ni Yopu mamafanaˈ kita, o roma sapirikec pairaay to sahinom, o roma a sapirikec pakasomaday to tamdaw. Mansa ano sapirikecaw kita to widang i, miˈosiho to Yopu a cudad o sakaciepoc no mita. Dotoc oniya lalakaw mamilengo, pakayni to misowalan no tatoloay widang ni Yopu patalipaˈelalay kitanan to maanan, ato sasamaan kita minanam to ngaˈayay taˈarawan ni Ilihu. Milengo to nalifetan nangra i, wa minengnengho kita mikitini Yopu a cudad, o nolitengan a Israil tamdaw o manan ko mananamay nangra, anini i, o mananho ko mamananam ita.

O Sapirikec no Tatoloay Widang ni Yopu

4. O tatoloay widang ni Yopu hano cowa pakahinom ci Yopuan? (Nengnengen ko coka.)

⁴ Sanay ko Fangcalay Cudad, ya matengil no tatoloay widang ni Yopu to tahapades ci Yopu ikor, ‘malacafayay cangra mihinom ci Yopuan, paihkal to siniˈadaay cingranan.’ (Yopu 2:11) Kawra o sasowalen nangra cowa ka mihinom ci Yopuan, misamaanay hani? Toloay ko lalangian. Saka cecay, kalikiay cangra a misaˈosi to hano tahapades ci Yopu. Tinakoen, o harateng nangra mararaway ci Yopu, mansa tefocen no Kawas cingra.a (Yopu 4:7; 11:14) Saka tosa, oniya tatoloay a widang adihayay ko sowal nangra, kawra awaay haca ko sapadama mihinom ci Yopuan, madokaˈay ko falocoˈ ni Yopu. Tinakoen, o roma sowal hato ngaˈayay a tengilen, kawra awaay ko epoc pakayni ci Yopuan. (Yopu 13:12) Kinatosaay ci Piltat paihkal to cinaˈafaden, datadat sanay ko sasowalen ni Yopu, kateliˈian sanay ko harateng ningra. (Yopu 8:2; 18:2) Mitoˈosanho ni Cofar ci Yopu, o ‘awaay ko mipaloan ilalomaˈ no ponoˈ’ ni Yopu sanay ko sowal. (Yopu 11:12) Saka tolo, alatek cowa ko taˈangayay ngihaˈ nangra mirikec ci Yopuan, kawra mariˈangay cangra, o sowal nangra pakadokaˈay to falocoˈ ni Yopu. (Yopu 15:7-11) Macalohay misawacay koniya tatoloay tamdaw to raraw ni Yopu, kawra mapawanay cangra a mihinom cingranan, patanoktok to pakasoˈlinay falocoˈ ningra.

5. Oya sasowalen no tatoloay widang ni Yopu mapadamaay mahinom ci Yopuan han?

⁵ O harateng noya tatoloay widang ni Yopu cowa ka hecad to ni Yihofa a harateng, samanen awaay ko siniˈadaay a harateng nangra ci Yopuan, ao palidlid sa malo sakadademakan ni Satan. (Yopu 2:4, 6) Cowa ka hinomen nangra ci Yopu, pakidemay ko pidokaˈ to falocoˈ ni Yopu, mitongal to roray ato somad ningra. (Yopu 19:2) Mihaenay misaˈicelay ci Yopu paˈading to niyah, kawra mangalefay ko cowa ka sadafdaf no harateng, cowato ka mikangodo, matatodong ko sowal ningra. (Yopu 6:3, 26) Ano mahaenay i, mikitini i nalifetan ni Yopu o manan ko mananamay no Israil tamdaw hani? Mamananamho ita ko maanan?

6. Pakayni i tatoloay widang ni Yopu, o nolitengan a malohemay malitengay no Israil o manan ko mananamay nangra hani?

⁶ O manan ko mananamay no Israil tamdaw hani? O patireng ko kitakit no Israil ikor, minilnilan ni Yihofa ko pina citatodongay a faˈinayan malo malohemay malitengay, mitoor to moecelay palinian Ningra a misaysay to lacongis no finawlan. (Limoˈot 1:15-18; 27:1) Oniya manilnilay a malohemay malitengay ano misongilaˈ mikingkiw to nalifetan ni Yopu, maminanam to adihayay ciepocay a sakayat. Tinakoen, songilaˈen a mitengil ko malohemay malitengay ho pasowal to sapaini ato misawkit. (2 Rayray 19:6) Sakafanaˈaw to demak adihayen ko salicay no malohemay malitengay tora tamdaw, aka hato mafanaˈayto ko niyah to kihcod. (Limoˈot 19:18) O roma i, ano ira ko micangacangay to sapadama a tamdaw i, hamaan a cinaˈafaden ko malohemay malitengay, sidaˈiten ko sasowalen. Mihaenay i, oya micangacangay to sapadama a tamdaw mamadolo a pasowal to nafalocoˈan no niyah.—Kasadakan 22:22-24.

7. Itini nolitengan a Israil, cowa ko malohemay malitengay aca, o cimaho ko ngangaˈay mirikec to tamdaw hani? Mikitini nalifetan ni Yopu wa ngaˈay cangra minanam to maanan? (Taneng 27:9)

⁷ Itini nolitengan a Israil, cowa ko malohemay malitengay aca wa ngaˈay mirikec to tamdaw, o polong a Israil tamdaw wa ngaˈay pasowal to sapaini ato rikec to widang, padama cangranan mitongal to kalawidang aci Yihofa, anca padama cangranan misalof to waywayan no niyah. (ˈOlic 141:5) Makahi a pasowal to widang to nafalocoˈan a sarikec, o mahaenay a tamdaw tada o soˈlinay a widang. (ˈOsien ko Taneng 27:9.) Kawra sapihadakaw ko Israil tamdaw to ciepocay a sarikec i, sinanoten ko sasowalen no tatoloay widang ni Yopu, ho cipinang to o manan ko cowa ka ngaˈay sowalen, o manan a demak ko cowa ka ngaˈay demaken.

8. Mirikec to tao i, aka a midemak to maanan? (Nengnengen ko coka.)

⁸ O manan ko mananamay ita? Ano tahalifa ko salikaka to pasangar i, ciharatengay kita sapipadamaaw cangranan a misaysay. Kawra sapipadamaaw cangranan i, aka mahecad to tatoloay widang ni Yopu. Saka cecay, hamaan a kaliki a misaˈosi, hanaca hapinangen ko niyah to soˈlinay ko sowal. Saka tosa, aka tano nalifetan no niyah a mihadak to sapaini, mahaenay ci Ilifac. Samanen o nalifetan no niyah cowa ka tatodong alatek. Tano soˈlinay a kimad no Fangcalay Cudad a safalod mirikec ko ngaˈay. (Yopu 4:8; 5:3, 27) Saka tolo, aka mariˈang ko sasowalen, kangdoen ko tao. Soˈlin, oya tatoloay widang ni Yopu matatodongay ko sowal nolatekay. Misakadademakayho ci Pawlo to sowal nangra. (Nengnengen ko Yopu 5:13 ato 1 Korinto 3:19.) Kawra adihayay ko sowal nangra tada midokaˈay ci Yopuan, mikalioratayho to Kawas, mansa o mararaway ko sowal nangra sanay ci Yihofa. (Yopu 42:7, 8) Haratengen, o matatodongay a sapirikec cowa ko mamikaliorat to salikaka, hato awaay ko siniˈada a Kawas ci Yihofa, caka makaliorat ko salikaka, hato awaay ko tatodong a micada to olah ni Yihofa. Dotoc i, mikitini taˈarawan ni Ilihu o manan ko mananamay ita hani?

O Pirikec ni Ilihu ci Yopuan

9. Hano misaaliho ci Yopu to sapadama hani? Samaanan ni Yihofa padama cingra?

⁹ Halafinay malalengo ci Yopu ato tatoloay widang ningra, 28 fedengan ko mitiliday to kalacongis nangra, hanaca adihayay ko maketeray, awaay ko pakalalokay a sowal. Mihaenay cowa ka patatikol to ˈicel ni Yopu, misaaliayho to sahinom ato sapisalof. Samaanen ni Yihofa padama ci Yopu hani? Miocoran Ningra ci Ilihu a mirikec ci Yopuan. Kawra hano ikor ngaˈ pasowal ci Ilihu hani? Saan cingra: ‘Kaemangho kako, matoˈasayto kamo, mihaenay i, mikangodoay kako tamowanan, miˈimer to niyah.’ (Yopu 32:6, 7) Mafanaˈay ci Ilihu, tada adihayay ko nalifetan no kaˈorip no matoˈasay tamdaw, adihayayho ko taneng. Kawra mihadidiay ci Ilihu milahci a mitengil to lacongis ni Yopu ato tatoloay a widang ikor, oha mamisatapangto a pasowal ci Ilihu. Sanay cingra: ‘Nolatekay cowa ka citaneng ko matoˈasay, nolatekay cowa ka fanaˈ a pafafidaˈ to ngaˈayay tatiihay ko malitengay tamdaw.’ (Yopu 32:9) Ano mahaenay i, dotoc mansanay ko sowal ni Ilihu hani? Samaanay ko sasowalen ningra a pakayraan hani?

10. ˈAyaw no mamirikec ci Yopuan i, misamaanan ni Ilihu ko demak? (Yopu 33:6, 7)

¹⁰ ˈAyaw no mamirikec ci Ilihu ci Yopuan i, cowa ka pakararom cingra ci Yopuan, ao rihadayay ko falocoˈ ni Yopu. Samaanan ni Ilihu ko demak hani? Saka cecay, ˈimeren ningra ko keter no niyah. Samanen sanay ko Fangcalay Cudad, salakat i, tada maketeray ci Ilihu. (Yopu 32:2-5) Kawra cowa ka ngolaw ningra ci Yopu, tano damsayay a pakayraan a pasowal ci Yopuan. Tinakoen sanay cingra: ‘Itini kaˈayaw no Kawas, mahecaday kako tisowanan.’ (ˈOsien ko Yopu 33:6, 7.) Saka tosa, pakacipinangan ni Ilihu ci Yopu, ano somowal ci Yopu i, tada misongilaˈay mitengil ci Ilihu. Hano mafanaˈ kita hani? Samanen misaliyaliyawan ni Ilihu ko sowal ni Yopu. (Yopu 32:11; 33:8-11) Ikor, mirikec cingranan i, soˈlinayto mihaen ci Ilihu to demak.—Yopu 34:5, 6, 9; 35:1-4.

11. Samaanay ci Ilihu mirikec ci Yopuan hani? (Yopu 33:1)

¹¹ Ya mirikec ci Ilihu ci Yopuan i, tada mikiharay a mikangodo ci Yopuan. Tinakoen, “Yopuaw” sanay ci Ilihu a miowaw to ngangan ni Yopu, kawra cowa ka mahaen ko tatoloay a widang ni Yopu. (ˈOsien ko Yopu 33:1.) Tahatengil ci Ilihu malacongis ci Yopu to tatoloay a widang ningra i, sapipasowalaw ci Ilihu. Mihaenay i, mirikec ci Ilihu ci Yopuan i, sidaˈitay ko harateng ni Yopu, mihaenay mitahidang ci Yopuan pasowal to nafalocoˈan no niyah. (Yopu 32:4; 33:32) Roma i, ihkalay pasowal ci Ilihu to mararaway harateng ni Yopu, alatek wa ira ko masamaanay a katalawan. Patalipaˈelalayho ci Yopuan aka mapawan ko makapahay capeling ni Yihofa, tinakoen o taneng, ˈicel, masadafdafay ato madimadiay a olah ni Yihofa. (Yopu 36:18, 21-26; 37:23, 24) Tada ciepocay ko pirikec ni Ilihu ci Yopuan, padama a misalof to falocoˈ ni Yopu, ikor ngangaˈay micada to sapirikec ni Yihofa. (Yopu 38:1-3) Mihaenay mikitini taˈarawan ni Ilihu o manan ko mananamay no Israil tamdaw hani? Mamananamho ita ko maanan?

12. Samaanay ci Yihofa pakayni i pairasolay padama to finawlan no Niyah? Mikitini taˈarawan ni Ilihu mananamay no Israil tamdaw ko maanan?

¹² O manan ko mananamay no Israil tamdaw hani? I nolitengan maceriday ci Yihofa miocor to pairasolay pakafanaˈ a misalof to Israil tamdaw. Tinakoen, i lintad no Kakitaan miocoran ni Yihofa ko fafahiyan a pairasolay ci Tipora mitenak to sakayat Ningra i finawlan no Niyah. Kaemangho ci Samuil i, pakaynian ni Yihofa cingranan mitenak to araaw no Niyah i Israil tamdaw. (Kakitaan 4:4-7; 5:7; 1 Samuil 3:19, 20) Irato ko hongti no Israil tamdaw ikor, kamayan ci Yihofa miocor to pairasolay padama ko finawlan Ningra tano matatodongay a pakayraan midoko Cingranan. Ya mararaw cangra i, pakaynianho to pairasolay mirikec cangranan. (2 Samuil 12:1-4; Dmak 3:24) Mihaenay i, oya makapahay taˈarawan ni Ilihu ngangaˈay padama to madimadiay a Israil tamdaw a cipinang, ano mirikec i, samaanen ko sowal, ngaˈayho tano siniˈadaay damsayay a pakayraan mirikec to tamdaw.

13. Sasamaanen ita pakalalok ko salikaka?

¹³ O manan ko mananamay ita? Mahecad to pairasolay, tano Kimad no Kawas a mirikec to tamdaw. O roma i, sinanoten ko sasowalen a pakayraan no niyah, hongaˈ mahinom mapakalalok ko salikaka to sasowalen no mita. (1 Korinto 14:3) Malo malohemay malitengay a salikaka, mamangalef ko pihaen to demak. Soˈlin maketer ngaliwngiw ko salikaka, ‘mafolaay macalohay ko sowal,’ kamayan ko malohemay malitengay paihkal to ‘sidaˈit ato siniˈadaay.’—1 Tisalonika 5:14; Yopu 6:3.

14-15. Tano tinakoen a mitadtad, ano mamirikec ko malohemay malitengay to salikaka i, sasamaan a mitodong ci Ilihu.

¹⁴ Haratengen ko cecay pakayraan: Mafanaˈ ko cecay malohemay malitengay to mararomay ko cecay fafahiyan salikaka, mihaenay malacafayay cingra to roma faˈinayan salikaka milisoˈ cingranan, sapakalalokaw cingranan. Sanay koniya fafahiyan salikaka, soˈlin mirienangay to saˈopo ato mitosilay ko niyah, kawra cowa ka lipahakay. Tahatengil ko malohemay malitengay to nika toled a harateng ningra ikor, sasamaan ko demak ningra ngaˈ ngaˈay hani?

¹⁵ Sapipadamaw a pakalalok toniya fafahiyan salikaka i, wa ngaˈay mihaen ko malohemay malitengay. Saka cecay, misaˈicel a cipinang to hano matoled koniya fafahiyan salikaka. O harateng noniya fafahiyan salikaka, awaay ko tatodong no niyah micada to olah no Kawas sanay han? Anca pakayni i ‘cariraw no kaˈorip’ a mararom han? (Luka 21:34) Sakacipinangaw toniya demak i, wa ngaˈay licayen ko malohemay malitengay ko pina salicay, ikor songilaˈen a mitengil. Saka tosa, pakahemeken ko fafahiyan salikaka no malohemay malitengay. Tinakoen haenen a pasowal to fafahiyan salikaka: “Soˈlin matoleday ko falocoˈ iso, kawra kamayan a mirienang to saˈopo ato mitosilay. Tada makapahayto ko nidemakan iso.” Haenen a pakahemek cingranan. Saka tolo, ya mafanaˈ ko malohemay malitengay to pakayraan no fafahiyan salikaka, mafanaˈho hano matoled ko falocoˈ ningra ikor, sakadademaken ko Fangcalay Cudad a paˈicel to pakasoˈlinay falocoˈ ningra, ho pakasoˈlin cingra to maolahay ci Yihofa cingranan.—Kalatiya 2:20.

Padadotoc Mikitini i Yopu a Cudad Milifok to Epoc

16. Sasamaan ko demak ita ngaˈ mamilifok to epoc nai Yopu a cudad hani?

¹⁶ Tada adihayay ko malifokay ita a epoc nai Yopu a cudad! Isaˈayaw a lalakaw milengo, o Yopu a cudad padama kitanan cipinang, hano hayi no Kawas a tahapades, ato ano tahapades kita i, sasamaan madimadi ci Yihofaan tahatolas. Oniya lalakaw mananamay ita, aka mahecad to tatoloay widang ni Yopu, ao todongen ita ko ngaˈayay taˈarawan ni Ilihu, mihaen i, o sapirikec no mita wa ciepoc. Ano sapirikecaw kiso to tao i, ngaˈayay ˈosienho ko Yopu a cudad, haratengen o manan ko kalimlaan hani? Ano halafinayto kiso cowa ka piˈosi to Yopu a cudad i, ngangaˈay miliyaw a miˈosi han? Ano mihaen ko demak iso i, mamilifok kiso to adihayay epoc nai Yopu a cudad.