Todongen ko Misapoeneray ni Yihofa

1. O misapoeneray ni Yihofa hano mamatongal ko pikangodo ita Cingranan?

PASOWALAY kiso to cifadangalay a hekal a tamdaw to misapoeneray han? Cowa. Kawra, cowa ka hecad ci Yihofa cangranan, o cacifadangalay Cingra, nikawrira o misapoeneray Cingra, awaay ko mimimiming aca a misatakaraway. (ˈOlic 113:5-8) Oniya lalakaw mamilengo mikitini sepat a pakayraan mamahapinang ita, tada misapoeneray ci Yihofa, ato samaanay ci Yis itini toniya sepat a pakayraan mitodong to kakarayan a Wama. Minanam toniya lalakaw papadama kitanan miingid ci Yihofaan, hanaca minanam Cingranan malo misapoeneray a tamdaw.

Madoloay Ingiden ci Yihofa

2. Pakayni to misapoener ni Yihofa, mikitini kita i ˈOlic 62:8 mahapinang ko maanan? (Nengnengen ko coka.)

² Cowa ka ˈaloman ko tamdaw maolahay malacafay to misatakaraway a tamdaw. O misatakaraway a tamdaw itini waywayan a paihkal, matalawayto ko tamdaw a miingid. Kawra cowa ka hecad ko ikakarayan Wama ita ci Yihofa. Tada misapoeneray Cingra, mansa makahiay mitengil to sowal ita, makalimayho kitanan pasowal Cingranan to harateng ato nafalocoˈan. (ˈOsien ko ˈOlic 62:8.) Mahecad o wama misongilaˈ mitengil to sowal no wawa, ano ci Yihofato i, mihaenay a misongilaˈ mitengil to satolon no mita. Mitilidan Ningra ko satolon no ˈalomanay tamdaw i Fangcalay Cudad, paihkalay koni tada misalimlaay ci Yihofa to satolon ita, madoloay a ingiden Cingra! (Yosuwa 10:12-14; 1 Samuil 1:10-18) Kawra latekay awaay ko tatodong no niyah miingid ci Yihofaan sanay ko harateng ita. Ano mahaenay i, haharatengen ita ko maanan hani?

3. Hano pakasoˈlin kita, makalimay ci Yihofa kitanan micerid pakayni i satolon miingid Cingranan?

³ Soˈlin miharateng kita, awaay ko tatodong no niyah milifok to olah ni Yihofa, kamayan a makahi Cingra mitengil to satolon ita, makalim miingid kita Cingranan. Hano ngaˈay pakasoˈlin kita tonini hani? Na masowalay ni Yis ko malafoay a wawa a sapatinako, pasasiyor cingra ikor papinokayaw, kawra hato awaay ko tatodong no niyah malo wawa no wama. Minokay cingra i, samaanay ko demak no wama hani? Sanay ci Yis, maˈaraw no wama ko wawa, ‘talaˈayaway a comikay a mitakec mihangot cingranan.’ (Luka 15:17-20) Malecaday ci Yihofa toniya sidaˈitay a wama, tahatengil to pakayniay kita i kasomad, kakesem anca cariraw a micangacang Cingranan, misongilaˈay mitengil to sowal no mita. (Radiw no mararomay 3:19, 20) Siniˈadaay Cingra kitanan, ‘talaˈayaway a comikay’ a mihinom kitanan, mamafanaˈto maolahay Cingra kitanan. (Isaya 57:15) Samaanay ci Yihofa ‘talaˈayaw a comikay’ hani? Marariday Cingra pakalalok to malohemay malitengay, o mihakelongay a paro no lomaˈ ato salikaka padama kitanan. (Yakop 5:14, 15) Mihaen ko demak ni Yihofa, ho matinako ita itiniay Cingra i tatihi no mita.

4. O manan ko paihkalay tada ngaˈayay ingiden ci Yis?

⁴ Samaanay ci Yis mitodong to kakarayanay a Wama? Malecaday ci Yis ci Yihofaan tada misapoeneray. Itiniho i fafekang no sera cingra i, maolahay ko ˈalomanay tamdaw mikilim cingranan. Ano ira ko kafokilan a demak i, milicayan nangra cingra. (Marko 4:10, 11) Licayen ni Yis cangra to samaanay ko pinengneng to demak i, pasowalay cangra to nafalocoˈan a harateng. (Matay 16:13-16) Soˈlin mararaw cangra, cowa ka ciˈangi, cowa ka calemcem to hamamakapoˈi cangra, samanen mafanaˈay cangra to sidaˈitay iraay ko mihadidiay ni Yis. (Matay 17:24-27) Malefotay ci Yis mitodong to ikakarayan a Wama, mansa cipinangayto cangra to masamaanay a Kawas ci Yihofa. (Yohani 14:9) Mahapinangay nangra, itiya misatakaraway ko ˈaˈideman no kalodoyongan pakidemay ko saali, kawra cowa ka lecad ci Yihofaan, tada misapoeneray madoloay ingiden Cingra.

5. Palahaden ita ko misapoeneray wa madolo ko tao miingid kitanan, hano haenen ko sowal hani?

⁵ Sasamaan kita mitodong to kakarayan Wama hani? Palahaden ko misapoeneray. Cowa ka pisapoener a tamdaw o misaidahidahiay ko niyah sanay ko harateng, madoloay a maˈinap to tao, anca maharatengay ko pakararaw no tao to niyah. Awaay ko miingiday to mahaenay a tamdaw. Kawra o misapoeneray a tamdaw mafanaˈay siniˈada to tao, mihadidiay to tao, makahiay misodod to tamdaw. Mahemekay miingid ko ˈalomanay to mahaenay a tamdaw. (Kolosay 3:12-14) Palahad kita to misapoeneray, wa madolo a ingiden no tao kita. Mangalef ko malohemay malitengay misaˈicel a malo madolo ingiden no tamdaw. Mamicerid malacafay ko malohemay malitengay to salikaka, ano awaawa maˈaraw ko malohemay malitengay, pasangaray to ingiden no salikaka cangra. Mansa mamisaˈicel ko malohemay malitengay tayra i Kasaˈopoan a misaˈopo. Tatodong i, ano caka adada anca romaroma lalangian i, tatayra i Kasaˈopoan a misaˈopo cangra, cowa ko tano Zoom a misaˈopo. O roma i, mamisaˈicel cangra kalacafay to salikaka mirienang to pakalomalomaˈay a pitosil. Ano ngaˈay ko kalalaˈed no salikaka ato malohemay malitengay, mamadoloto ko salikaka pasowal to pasangar no niyah.

Ci Yihofa Makahiay a Pacaˈi

6-7. Makalimay ci Yihofa pacaˈi, mitoor to pingitangit no sikawdan Ningra a midemak, patinakoen hena.

⁶ O niyah a pakayraan tada o sangaˈayay, sanay ko harateng no misatakaraway a tamdaw, mansa ˈatekakay ko falocoˈ nangra. Kawra cowa ko mahaenay ci Yihofa, soˈlin mafanaˈay Cingra sasamaan ko demak o sangaˈayay, kawra makahiay Cingra a pacaˈi. Nengnengen ko cecay tinakoan, samaanay ci Yihofa micada to pakayni ci Mosi ci Miriam. Tiya malacafayay ci Miriam aci Aron milikaf ci Mosian. Kawra mitaypiyaway ci Mosi ci Yihofaan, milikafay ci Miriam ci Mosian, mihaen to demak cowa ka pikangodo ci Yihofaan. Telocto i, mangolaway ci Yihofa cingra, malonoˈan no Kawas cingra. Ikor tangsolay ci Aron micangacang ci Mosi miadah ci Miriam, mingitangitan ni Mosi ci Yihofa miadah ci Miriaman. Samaanayto ko demak ni Yihofa hani? Cowa ka pisatakaraw ci Yihofa midoedo to isaˈayaway a pisayfang, ao tengilan Ningra ko pingitangit ni Mosi miadah ci Miriaman. (Saˈosi 12:1-15) Tada misapoeneray ci Yihofa!

⁷ Nengnengenho ita ko nalifetan no Hongti ci Hicikiya. Na miocoran ni Yihofa ko pairasolay mifanaˈ ci Hicikiya mamapatayto cingra sanay. Tahalosaˈay ci Hicikiya mingitangit ci Yihofaan miadah cingranan. Mihayian ni Yihofa to pingitangit ningra, patongalanho to 15 miheca ko ˈorip ningra. (2 Hongti 20:1, 5, 6) Tada misapoeneray ci Yihofa, hanaca siniˈadaay Cingra to sikawdan Ningra, mansa makahiay Cingra mitoor to pingitangit nangra a midemak.

8. O manan a tinakoan paihkalay to makahiay ci Yis a micaˈi? (Marko 3:1-6)

⁸ Samaanay ci Yis mitodong to kakarayanay a Wama? Itiniho i fafekang no sera ci Yis i, cowa ka pakidem mitoor to saˈosi no tamdaw, ano iraay ko saali makahiay cingra padama to tao. Tinakoen, itini Paselaˈan a Romiˈad na miadahay cingra to adada. Pakidemay ko saali no ˈaˈideman no pihakelongan, harateng nangra cowa ka ngaˈay itini Paselaˈan a Romiˈad miadah to adada sanay, kawra kamayan mahaen ko demak ni Yis. (ˈOsien ko Marko 3:1-6.) Malo ˈaˈideman no kasakopang ci Yis ikor, padadotocay paihkal to makahiay micaˈi a waywayan. Tinakoen, mafanaˈay cingra i kasakopang iraay ko tamdaw pakidemay ko raraw, kamayanho mihadidi micada cangranan, padama cangranan mikifalocoˈ pasasiyor.—Paˈarawan 2:2-5.

9. Sasamaan kita palahad to makahiay pacaˈi a waywayan? (Nengnengen ko coka.)

⁹ Sasamaan kita mitodong to kakarayan a Wama hani? Ka pisapoener a minanam ci Yihofaan, misaˈicel malo makahiay pacaˈi a tamdaw. (Yakop 3:17) Tinakoen, ano makahiay pacaˈi ko wama wina, cowato ko papakidem ko saali to wawa, cowa ko papidemak cangranan to cowa ko mamadangar nangra a demak. O wama wina ngaˈayay miˈosi to Satapangan 33:12-14, nengnengen samaanay ko picada ni Yakop to wawa, paihkal to makahiay pacaˈi a waywayan. Makahi pacaˈi a wama wina cowa ka palalini to cima ko sangaˈayay a wawa. O malohemay malitengay mamakahi a pacaˈi. Tinakoen ano malalengo cangra i, ano mihayiayto ko ˈalomanay tamdaw to cecay demak, hanaca oniya saˈosi cowa pisafelit to safalod no Fangcalay Cudad, wa makahi pacaˈi ko malohemay malitengay a midama, aka o niyah aca a harateng ko samacayen. (1 Timoti 3:2, 3) Kita kahacecay tamdaw ngaˈayay tano pinengneng no tao a misimsim, ano caka lecad ko pinengneng no tamdaw to mita i, mamisaˈicel kita a cipinang. (Loma 14:1) Mamisaˈicel kita pakacipinang to emin a tamdaw to o makahiay pacaˈi a tamdaw kita.—Filipi 4:5.

Tada o Cihadidiay ci Yihofa

10. O mihadidiay a Kawas ci Yihofa, hano mafanaˈ kita hani? Hadaken ko tinakoen hena.

¹⁰ Misatakaraway a tamdaw awaay ko mihadidiay, caay ka kahi a mitala. Kawra cowa ka hecad ci Yihofa, o mihadidiay Ningra awaay ko cima pakafiloay. Tinakoen, i lintad ni Nowa, 120 ko miheca ko pitala ni Yihofa ngaˈ palaˈafoay to mariˈangay a tamdaw. (Satapangan 6:3) Mihaen iraayto ko toki ni Nowa mahofoc palahad to wawa, halo kalacafay to paro no lomaˈ misangaˈ to tamina. Ikor, toha papalaˈafo ci Yihofa to Sotom ato Komora i, kinapinapinaay a milicay ci Apraham. Kamayan ci Yihofa mihadidi a mitengil, cowa ka cinaˈafaden. Ano misatakaraway a tamdaw i, wa saan cingra a sowal alatek: “Cisasaay kiso takowanan han?” Kawra cowa ka pihaen ko demak ni Yihofa, padotocay mihadidi a micada ci Aprahaman.—Satapangan 18:20-33.

11. Itini lintad ita, hano padadotoc ci Yihofa paihkal to mihadidiay? (2 Pitiro 3:9)

¹¹ Itini lintad ita, padadotocay ci Yihofa paihkal to mihadidiay. Soˈlin maherekayto Cingra misaˈosi hahacowa palaˈafo toniya tatiihay a hekal, nikawrira padotocayho mihadidi mitala toniya romiˈad. Hano mihadidiay ci Yihofa hani? Sowal no Fangcalay Cudad: ‘Cowa ka halamham [ci Yihofa] to sakalaˈafoaw no cecacecay a tamdaw, ao halamhamay to pasasiyor ko tamdamdaw maemin.’ (ˈOsien ko 2 Pitiro 3:9.) Halafinayto ko pitala ni Yihofa, iraay ko maanan a minaroˈan hani? Pakayni to pihadidi ni Yihofa, mansa masacaˈolay masaefan a tamdaw iraay ko hatoki mafanaˈ Cingranan, malo widang Ningra. Pakasoˈlinay kita, wa ˈalomanho ko tamdaw midoko Cingranan. Nikawrira o pitala ni Yihofa iraay ko tolas no toki. Maolahay Cingra to tamdamdaw, nikawrira iraay ko tolas, cowa ko mamihayi Cingra padadotoc a materek ko tatiihay a tamdaw.—Hapakuk 2:3.

12. Samaanay mitodong ci Yis to kakarayanay a Wama paihkal to mihadidiay hani?

¹² Samaanay ci Yis mitodong to kakarayanay a Wama? Lalomaˈ no pina soˈot mihecaan, padadotocay ci Yis mitodong ci Yihofaan paihkal to mihadidiay. Maˈaraway ni Yis ci Satan padotocay a pakokot to Kawas ato madimadiay sikawdan Ningra, maˈarawayho padotocay ko tamdaw tahalifa to pakidemay a pades. (Satapangan 3:4, 5; Yopu 1:11; Paˈarawan 12:10) Saharateratengen iso, ‘sapipalahdawaw Cingra to nidemakan ni Akoma a kihcod’ han? (1 Yohani 3:8) Kawra cowa ka caloh ci Yis mitoor to harateng no niyah a midemak, ao padadotocay a mitala to misaˈosian ni Yihofa a romiˈad. Hano padadotocay ci Yis mihadidi hani? Cecay lalangian i, tada misapoeneray cingra, mafanaˈay cingra edengan ci Yihofa ko iraay ko fadangalan a misaˈosi, hahacowa palahdaw ci Akomaan ato pairaan ningra a pades.—Dmak 1:7.

13. Samaanay ci Yis paihkal to mihadidiay i tarokos? Hano ira ko hatiniay mihadidiay ningra?

¹³ Itiniho i fafekang no sera ci Yis i, paihkalay to mihadidiay. Tinakoen, saliyaliyaw sanay ko tarokos malacongis cima ko sakakaay, kawra cowa ka toleden ci Yis cangranan, cowa ka pisawad cangranan. (Luka 9:46; 22:24-27) Samaanay ko pidemak ni Yis hani? Padadotocay ci Yis mihadidi pasifanaˈ cangranan, pakasoˈlin cangranan to padadotoc a macakat, minanam paihkal to misapoeneray. Mahaenay kiso saliyaliyaw sa a mararaw han? Ano mahaenay i, hamaan a calemcem, mamihaen ci Yis pihadidi micada tisowanan. Ira ko mahaenay misapoeneray a Hongti, coko miakoˈiday kiso ci Yisan hokira?

14. Sasamaan kita palahad to mihadidiay?

¹⁴ Sasamaan kita mitodong to kakarayan a Wama hani? Itini noharatengan ato waywayan ano makalimay kita mahecad ci Yihofaan, palahaden ko ‘ni Kristo a harateng.’ (1 Korinto 2:16) Sasamaan palahad hani? Oha mamikingkiw kita to Ratoh a Cudad, midotimho to misowalan ni Yis, ato nidemakan ningra, mifolfol to samaanay ko piharateng ningra. O roma i, mamitolonho kita micangacang to sapadama ni Yihofa, itini sasowalen ato waywayan paihkal to ni Kristo a harateng. Ano misaˈicel kita mihaen to demak, wa mahecadto to Kawas ci Yihofaan, pakayni i niyah ato salikaka ira ko mihadidiay a falocoˈ.—Matay 18:26-30, 35.

Misalimlaay ci Yihofa to Misapoeneray a Tamdaw

15. O manan a tinakoan paihkalay to misalimlaay ci Yihofa to misapoeneray a tamdaw? (ˈOlic 138:6)

¹⁵ ˈOsien ko ˈOlic 138:6. O Saˈakawangay Tatapangan ci Yihofa, kawra mikiwiriˈay a misinanot to ifafekangay no sera misapoeneray a tamdaw! I pinengneng no tamdaw tadancaay cangra, kawra i pinengneng ni Yihofa i o masakalimlaan. Nengnengen ita ko tinakoan no Fangcalay Cudad. Mafanaˈay kiso to fafahiyan a sikawdan ci Tipora han? Samanen cowa ka adihay ko matiliday to demak ningra i Fangcalay Cudad. O midipotay mipalahaday ci Ripikaan a tamdaw cingra, itini lalomaˈan no Isak aci Yakop 125 mihecaan madimadiay cingra a matayal. Pakayni toniya demak mikiriwiˈan ni Yihofa a miˈoning, ho mafanaˈ kita ci Yakopan ato paro no lomaˈ ningra maolahay ci Tiporan. (Satapangan 24:59; 35:8 ato roma pihongyak.) Pinaayto hahekalan ikor, mipiliˈan ni Yihofa ci Tafiti malo hongti no Israil, itiya i, o kapahho cingra pakaenay to siri a tamdaw. (2 Samuil 22:1, 36) Miocoran no Kawas ko coyoh panengneng toya tadancaay pakaenay to siri a tamdaw, o isaˈayaway mafanaˈ cangra to mihofocanto ci Kristo. (Luka 2:8-11) Ikor, tiya ˈafofoen ni Yosif aci Mariya ci Yis tayra i fangcalay sefi i, panengnengan ni Yihofa to malitengayto a Simiyon aci Anna, ira ko kalikoan pakaˈaraw to noikoran a Misiya. (Luka 2:25-30, 36-38) ‘Soˈlin saˈakawangay ko saˈaroan ni Yihofa, kawra ciharatengay to misapoeneray a tamdaw!’

16. I micada to tamdaw, samaanay ci Yis mitodong to kakarayanay a Wama?

¹⁶ Samaanay ci Yis mitodong to kakarayanay a Wama? Ci Yis ato kakarayanay Wama mahecaday a misalimla to misapoeneray tamdaw. Ci Yis patenakay to ngaˈayay lihaf no Kitakit no Kawas i ‘cowa ka picudad a kalo a tamdaw.’ (Dmak 4:13; Matay 11:25) Miadahay cingra to adadaay tamdaw, cowa aca padama cangranan miliyaw tanoktok to tireng, padamaayho cangranan masatamdawto ko kaˈorip nangra. (Luka 5:13) ˈAyaw no mamapatay toya dadaya i, talaˈayaway ci Yis pananaw to ooˈ no tarokos, soˈlinay i, ono koli a demak koni. (Yohani 13:5) ˈAyaw no patikol tayra i kakarayan, pafelian ni Yis ko nisawawaan to masakalimlaan a tayal, ho ira ko kalikoan nangra padama to tamdaw milifok to midaˈocay a ˈorip. Mihaen ci Yis to demak, paihkalay to tada misalimlaay cingra to polong misapoeneray mikotoday cingranan a tamdaw, mahawpay kita.—Matay 28:19, 20.

17. Sasamaan ko demak ita ho mafanaˈ ko tao to maolahay mikangodoay kita cangranan? (Nengnengen ko coka.)

¹⁷ Sasamaan kita mitodong to kakarayan a Wama hani? Mamisarocod kita maolah ato mikangodo to tao. Tinakoen, mamilasil kita i polong a tamdaw to ngaˈayay lihaf no Kitakit no Kawas. Ano o mananto ko aˈirangan no tao, kalomahadan, hakowaay ko picudadan, ano makahiay cingra mitengil, o mamahemek kita padama cingranan mafanaˈ to soˈlinay kimad. Roma i, masemer kita to salikaka. Ano masamaanayto ko inaneng anca ˈinorong no mita i, minengneng to salikaka ikakaay to niyah ko kangaˈay. (Filipi 2:3) Mansa padadotoc kita a misapoener, itini kahirahira no demak ‘talaˈayaw masasikangodo,’ mamahemek ci Yihofa.—Loma 12:10; Cifaniya 3:12.

18. Makalimay kiso mitodong to misapoeneray ni Yihofa han? Misamaanay?

¹⁸ Misarocod kita mitodong to sidaˈitay Wama i kakarayan, malo misapoeneray a tamdaw, mamadoloto a ingiden no tamdaw, makahi a pacaˈi, matongalho ko mihadidiay a falocoˈ. Mahecadho kita ci Yihofaan maolah ato mikangodo to tao. Ano misaˈicel kita mihaen to demak, padadotoc mitodong to misapoeneray a Kawas, mamatongal ko pisalimla Ningra kitanan!—Isaya 43:4.