Awaji Irom Adasi Enerieen̄ mè Enenwaan̄

Jioba iwop uko me ere ge ekigwen Iden. Ajakajak, uti mè anam ijojot me uko ya. Awaji onenisa mfuun̄ ijọn̄ irom adasi enerieen̄ orere, Adam, mè ifuuk efuuk ugwem itap me emen inwọm kan̄. Ire oriọọn̄ inu oyayaka irọ ni? Ogwu enerieen̄ ya okakana ogwu okiluk ugwem! Jioba ototo Adam ibe ikikpọ chieen̄ me lek uko ya, mè itumu inyi ọmọ ibe inyi otutuuk anam erieen̄.

Jioba onyinyi Adam ikan ge okukup ufiak. Itumu inyi Adam ibe: ‘Owu mokọt irie mfut uti geelek ilọ me lek mfut uti ge okup okpọkpọ. Ire orie mfut uti ya, owu okpolọlọ ikwukwu.’

Ike mgbọ ojebe, Jioba otutumu ibe: ‘Marom ogwu ntap-ubọk inyi Adam.’ Awaji orọrọ inyi Adam ilaak ilaak osibi esese, mè isan̄a mgbaramgbasi ge mè iyaka ire ukwuk ge me agba owot Adam isa irom nwa ge inyi Adam. Erieen̄ ogwu enenwaan̄ ya ire Îfu. Adam mè Îfu enenikana adasi ototun̄ ukan̄. Ikukup Adam me lek imumun̄ nwa kan̄? Adam ibele ejit enenen ire lek itumube ibe: ‘Kpọ ogwu Jioba osabe mgbaramgbasi n̄a irom! Chei, ogwugwu ire ebilene kubọk n̄a.’

Jioba itumu inyi Adam mè Îfu ibe ekaan̄ nsabọn mè ejot otutuuk linyọn̄ yi. Iweek ibe ema enwọọn̄ ikekigbaan̄ isi ikwaan̄ irọrọ me otutuuk inyọn̄ ijọn̄ yi ikana paradais, mè iyaka ire, ujuja uko kubọk uko Iden. Ire, inu ikayaka ikup ikeya. Bak lek keke ni? Eji mekween̄ igbaalek me ibot usem obogọọk.