OKPỌKỌ 3

Ugwem Ikokup me Paradais?

Jioba inyi Adam mè Îfu ogbogbo ata inu. Ibebene 1:28

Mgbọ Jioba orombe Îfu isan̄a, isa ọmọ inyi Adam

Jioba ìrom adasi enewaan̄, Îfu, mè isa inyi Adam melek nwa.—Ibebene 2:21, 22.

Jioba ìrom ema melek nkeek mè akpalek eyi ososo, me kpenube lọlọ geege.

Adam mè Îfu mimun̄lek Paradais enyibe ema

Ema eluk me Paradais, me uko miyaka ire ogọ Iden, ereya ijaan̄ uja, okwaan̄, mfut uti me anam omọwa.

Jioba itumu usem inyi ema mè ijeen̄ ema inu. Ire ema megban̄ utọn̄ melek Awaji, kè ema eluk ere mgbọ ikakaan̄ge itata me Paradais me inyọn̄ ijọn̄.

Awaji ibe ekarie ge melek mfut uti cha. Ibebene 2:16, 17

Mfut uti okup me emen ogọ ya eyi Jioba otumube inyi Adam mè Îfu ibe ekarie

Jioba ijeen̄ Adam mè Îfu okpọkpọ mfut uti ge okup me ogọ Iden ya mè itumu ibe, ire ema irie ke ema mekwu.

Ogwu osat ikpak ya, isa ijijinu itumu ikọ inyi Îfu

Ogwu osat ge ikpaka otu Awaji. Ogwu osat mkpikpak yi ire Setan ogwu ore Yọk.

Setan ikaweek ibe Adam me Îfu esiki ibot enyi Jioba. Eya orọ Setan osabe ijijinu miya ire ulu itumu inyi Îfu ibe, ire irie mfut ya ke ogwu ikpobokwu, ire ke ogwu mobelek Awaji. Îre, usem ya ire ataak.—Ibebene 3:1-5.