Jioba Inyi Ilaija Unye

Jeseben inaan̄ ejit enenen mgbọ inọbe mkpọ orọrọ ebi nriran Baali. Jeseben oneniria etip isi lek Ilaija ibe: ‘Kè ebi kè awaji esulu emi ekpan̄ ire nkasan̄a ugwem kwun̄ sabum ike mgbọ keyi iyakwut kubọk owu osan̄abe ugwem ebi nriran cha.’ Ukpook otetet Ilaija, ililibi isi emen ewe. Ilaija obebeek uriaak ibe: ‘Inyọn̄ ijot emi! Mgbọ keyi, kpan̄asi mbet keyi, Jioba, na mọnọ ugwem n̄a.’ Mije efuuk otabe ọmọ me owot, Ilaija olalaak me irak uti ge.

Ogwu osat ge onenitimi ọmọ me ilaak, mè ibe ọmọ: ‘Nan̄a keke, mè rie inorie.’ Ilaija omumun̄ owut unin̄i fituru ge ewọpbe me inyọn̄ mbubuuk ukan̄ me agan̄ ibot kan̄, mè imun̄ si sọn̄ ogbokot mudim ge me ere ya. Irerie inorie ya, mè inwọ mudim ya, mè ikpọk isiki ilaak. Ogwu osat ya okpọkpọk itimi ọmọ, mè itumu inyi ọmọ ibe: ‘Nan̄a keke, mè rie inorie, ke ije ya oboje ijọn̄ọ enenen.’ Eya orọ, Ilaija orerie inorie ya igbaalek. Inenije ije akọp egwe ini mè akọp eririeen̄ ini mege irebe inyọn̄ ogoon̄ Orebu. Me ere ya, Ilaija oninin̄ emen nkororok ge ibosi ilaak. Ire, Jioba otutumu inyi ọmọ ibe: ‘Ilaija, okirọ keke me ere keyi?’ Ilaija ofọfọọk ibe: ‘Ebi Ijeren mitele inyan̄a-ibot kwun̄, mè igbugbọ ntook ngwugwa kwun̄ cha igwook, mè isa oge akọn̄ ikpan̄ ebi nriran kwun̄ isan̄a. Emi gaalek nyaka inisik. Mgbọ keyi, ema ekiweek ikpakpan̄ emi si.’

Jioba otutumu inyi Ilaija ibe: ‘Nene si keke me inyọn̄ ogoon̄.’ Uga unye efet owuwut itoon̄ me inyọn̄ ogoon̄ ya, ijọn̄ osisisik unye unye, ukan̄ onunu. Me ota kan̄, Ilaija onọnọ sọntiik ida ge okitaan̄ ususuk. Mgbọ yaage, Ilaija osasa ofọnti inyọn̄ kan̄ ikana ichit isi, mè inan̄a isibi inikeke me otu nkororok ya. Jioba onenido ọmọ inu orọro ilibibe. Ilaija ofọfọọk ibe: ‘Emi gaalek nyaka inisik.’ Ire, Jioba otutumu inyi ọmọ ibe: ‘Ikare owu gaalek osik. Obop ene jaaba emaan̄ me Ijeren, ebi ikitọbọ ebum inyi emi si.’ Je si tọkọ Ilaisia aran̄ me ibot inyi ibọkọ irek kwun̄ kubọk ogwu nriran. Mgbọ yaage, Ilaija osisi irọ inu Jioba obe me ọmọ irọ. Ire okeek ibe ke Jioba mokitap ubọk inyi owu ire okirọ inu iweekbe ni? Iin̄, mokitap ubọk inyi owu. Kè eji ekween̄-nu inu ge obọbọkọ irek me mgbọ una ibot ya.