1 Crónicas

19 Rupalu ta antü, lai ta Nahás, tüfa pu Ammón che ñi lonco ülmen, ca tañi fotüm hue lonco ülmen-ngerpui. 2 Fei David feipi: “Nahás cutranpiuqueyeneu* ta iñche, feimu cutranpiuqueyeafiñ ta Hanún, Nahás tañi fotüm”. Feimu David huercüfi pu huerquen ñi yafültucuafiel ta Hanún lalu tañi chau. Huelu David ñi pu cüdaufe puulu pu Ammón che ñi mapu mu, 3 pu Ammón che ñi pu principe feipifingün ta Hanún: “David huercüfi tañi pu cüdaufe tami yafültucuaeteu, fei tañi yamnieafiel* tami chau, ¿rüfngepei mai ta tüfa? ¿Cüpapelaingün mai taiñ lloftuaeteu* ca ñi ngüneduamafiel ti mapu tami huehuaeteu?”. 4 Feimu Hanún nüfi David ñi pu cüdaufe, cupilfi ca catrüñmafi tañi tacun rangi püle trutre meu,* fei hula feipifi engün ñi amutual. 5 Ti lonco ülmen David quimelelngei chem ñi rupan tüfachi pu huentru. Fente tañi illamcangen engün, David huercüfemfi caquelu huentru ñi trafmeafiel engün ca ñi feipiafiel: “Jericó huaria mu mülenagcülemün tremle hula tamün payun, fei hula huiñotuaimün”.

6 Rupachi antü mu, pu Ammón che ngüneduamingün ñi rumeñma üdenieteu David,* feimu Hanún ca pu Ammón che huercüingün 34 mil 200 kilo* plata tañi culliafiel carretela* ca huentru püracahuellulelu. Tüfa engün tuhui Mesopotamia,* Aram-Maacá ca Zobá mu. 7 Cullingün 32 mil carretela, cafei cullifingün Maacá ñi lonco ülmen ca tañi pu che. Fei hula puhuingün ca anümingün tañi tolto ruca* itrotripa Medebá mapu mu. Pu Ammón che tripaingün tañi huaria mu, fei trahuluhuingün tañi hueichayal.*

8 Quimlu David huercüfi ta Joab, com tañi pu hueichafe ca tañi pu doi nehuen-ngechi soltau. 9 Feimu pu Ammón che amuingün ca pepicahuingün ñi hueichayal conhue püle ti huaria ñi puerta mu. Huelu pu lonco ülmen aculu mülerquei cañpüle lelfün mu.

10 Fei Joab pefilu ñi hueichapayaeteu pu caiñe adquiñ püle ca furi püle, dullifi Israel ñi doi cümeque hueichafe ca feipifi ñi pepicahual tañi hueichayafiel pu Siria che. 11 Cafei Joab elcünufi pu caquelu hueichafe ñi adnieaeteu tañi peñi Abisái,* fei ñi pepicahual tañi hueichayafiel pu Ammón che. 12 Fei feipi: “Pu Siria che doi nehuen-ngele iñche mu, eimi montulpayaen. Ca pu Ammón che doi nehuen-ngele eimi mu, iñche montulayu. 13 Mülei taiñ yafüluucüleal ca nehuen piuquengeal taiñ pu che ñi duam mu ca tati fillque huaria mu taiñ elueteu Chau Ngünechen. Fei Chau Jehová femai chem cümelu ñi troquifiel”.*

14 Fei Joab ca tañi pu hueichafe amuingün tañi hueichayafiel pu Siria che. Tüfa engün leftripaingün Joab ñi duam mu. 15 Pu Ammón che pefilu pu Siria che ñi lefmahun, ca lefmahuingün tañi peñi Abisái ñi duam mu, fei conpuingün ti huaria mu. Rupalu tüfa, Joab huiñotui Jerusalén mu.

16 Pu Siria che pefilu ñi huehueteu pu Israel che, huercüingün huerquen tañi trahulafiel pu Siria che. Tüfa engün mülefui Leufü pingechi troquiñ mapu mu,* ca adnieyu engün Sofac, tati loncolelu Hadadézer ñi pu hueichafe.

17 Quimelelngelu ta David, feica müten trahulfi com pu Israel hueichafe, noi ti Jordán leufü mu, puhui cheu ñi mülen engün ca pepicahui ñi hueichayafiel. David pepicahui ñi hueichayafiel pu Siria che, fei tüfa engün hueichaeyu. 18 Huelu pu Siria che lefmahuingün Israel ñi duam mu. David langümfi 7 mil hueichafe amulniefilu carretela ca 40 mil Siria hueichafe namuntu amulelu. Cafei langümfi Sobac, ti loncolelu pu hueichafe mu. 19 Pu cüdahuelquefilu ta Hadadézer ngüneduamingün ñi huehueteu pu Israel che. Feica müten feipicünuingün tañi cümelcautual David engu, fei eluhuingün ñi cüdahuelafiel. Fei pu Siria che pihuelai ñi quelluafiel pu Ammón che.