Ezequiel
2 Fei feipieneu: “Huentru ñi fotüm, huitrapürange, fei dunguayu”. 2 Nütramcangelu iñche, coni Chau Ngünechen ñi nehuen iñche mu, fei huitrañpürameneu ñi allcütual inei tañi dungumequeteu. 3 Fei feipieneu: “Eimi huentru ñi fotüm, huercüayu pu Israel che mu, tati troquiñche ngünefalngenolu, fei caiñetueneu ta iñche. Quisu engün ca tañi cuifique che quiñepülecünuingün tañi ley dungu fantepu mu. 4 Huercüayu pu fotüm ngünefalngenolu ca cura piuque nielu. Feipiafimi engün: ‘Tüfa ñi feipiel tati Doi Fütra Ñidol Jehová’. 5 Feichi pu che ngünefalngelai, huelu allcütule cam allcütunole engün, rüf quimaingün ñi mülefel Chau Ngünechen ñi huerquen quisu engün meu. 6 Huelu eimi huentru ñi fotüm, llicaquelayafimi engün ca llicalayaimi chem tañi feipial engün, hualloñmanielmu rume chacai ca huayun cam mülelmi rangi pu escorpion mu. Eimi llicalayaimi chem tañi feipial engün, feichi pu che ngünefalngelai, huelu ngelai tami pellqueaeteu tañi ange engün. 7 Mülei tami nütramcalelafiel iñche tañi feipin, allcütule engün cam femnole rume, tüfa engün am trencül piuquengelu. 9 Adquintulu iñche, pefiñ quiñe cuhu huinüfcülelu iñche mu, ca nierquei quiñe chumpol lifru. 10 Fei nülai ti chumpol lifru iñche tañi adquiñ püle. Feiti chumpol lifru huirintuculei epuñpüle. Huirintuculei fillque ül feipilu hueñancün dungu, ngüman ca eyütun dungu.