Zacarías
6 Fei huiño püraquintun, ca adquintun meli hueichan carreta tripalu rangi epu huincul meu cobrengelu. 2 Tati hunen hueichan carreta niei quelüque cahuellu, ca ti epungechi hueichan carreta niei curüque cahuellu. 3 Tati cülangechi hueichan carreta niei ligque cahuellu, ca ti melingechi hueichan carreta niei pirülngechi cahuellu. 4 Fei ramtufiñ tati cüme püllü ñi dungupeteu: “Ñidol, ¿chem am ta tüfa?”. 5 Ti cüme püllü huiñoldungueneu: “Tüfa tati meli püllü huenu mapu meu cüpalu, tati Ñidolcülelu com Mapu mu ñi adquiñ meu puhuingün ñi quimal chem chumal, fei tripaleingün. 6 Tati nielu curüque cahuellu amuai picun mapu meu, pu ligque cahuellu doi üye mu amuaingün ti lafquen meu, ca pu pirülngelu amuaingün huaihuen mapu meu. 7 Ca tüfa engün epeque lef tripamequei ñi miyahual Mapu meu”. Fei ti cüme püllü feipi: “Amumün, ca miyaumün Mapu meu”. Fei eluhuingün ñi miyahual Mapu meu. 8 Fei mütrümeneu, ca feipi: “Ngüneduamnge, pu amulelu picun mapu meu tüngduamelfingün Jehová ñi illcun picun mapu meu”. 9 Fei Jehová ca quiñe rupa dungueneu: 10 “Heldái, Tobiya ca Jedayá mu yemefinge chem ñi hulel pu mülecalu Babilonia mu. Feichi antü eimi ca quisu engün tripalu Babilonia mu amumün Josías ñi ruca mu, Sofonías ñi fotüm. 11 Yemefinge plata ca milla, fei deumange quiñe corona ca tuculelfinge tati loncolechi sacerdote Josué, Jehozadaq ñi fotüm. 12 Fei feipifinge: “‘Tüfa ñi feipiel Jehová Ñidolcülelu pu hueichafe mu: “Tüfa tati huentru Choyon pingelu. Tüfa choyotripayai quisu ñi mülehue mu, ca deumayai Jehová ñi ngillatuhue ruca. 13 Quisu ta deumayai Jehová ñi ngillatuhue ruca ca lonco ülmencüleai. Quisu anüai ñi ülmen huancu mu, fei ngünenieai, ca sacerdotengeai ñi ngünenien mu, ca cüme yeafi ñi sacerdotengen ca ñi lonco ülmen-ngen. 15 Ca tati alü camapulelu cüpayaingün, fei quelluconaingün ñi deumayal Jehová ñi ngillatuhue ruca”. Fei quimaimün tañi huercüeteu Jehová Ñidolcülelu pu hueichafe mu. Tüfa feingeai eimün cüme allcütulmün tamün Chau Ngünechen Jehová ñi feipin’”.