Zacarías
5 Ca quiñe rupa püraquintun, fei adquintun quiñe chumpol papel müpüyauquelu. 2 Quisu ramtueneu: “¿Chem adquintupeimi?”. Iñche huiñoldungun: “Adquintupen quiñe chümpol papel müpüquelu, tüfa 9 metro tuhui ca 4,5 metro rupai”. 3 Fei feipieneu: “Tüfa tati malisian dungu puhualu com Mapu mu, chumngechi ñi feipin tati chümpol papel quiñe püle mu, com tati hueñequelu petu castigangelai, ca chumngechi ñi feipin ti chümpol papel cañpüle mu, com tati mupiquenolu ñi eldungucünuel petu castigangelai. 4 ‘Huercüfiñ’, feipi Jehová Ñidolcülelu pu hueichafe mu, ‘fei puhuai tati hueñequelu ñi ruca mu, ca tati mupiquenolu ñi eldungucünuel iñche ñi üi mu, fei ñi ruca mu puhuai cafei; ca mülenagai ponhui ruca mu, ca apümcayafi ti ruca, tañi mamüll ca tañi cura’”. 5 Fei tripapai tati cüme püllü tañi dunguqueteu, ca feipieneu: “Füreneen, püraquintunge ca ngüneduamnge chem ñi tripamequen”. 6 Fei ramtun: “¿Chem am tüfa?”. Quisu huiñoldungui: “Tati cülco cheu ñi medilngequen quiñe efa, tüfa ta tripamequei”. Ca feipi: “Femngechi adngeingün huall Mapu mu”. 7 Ti cülco niei quiñe moncol tapa pañillhuengelu, fei ngüneduamün ñi huitrañpüramngen ti tapa, ca ponhui mu mülei quiñe domo anülelu. 8 Fei ti cüme püllü feipi: “Tüfa tati Huesaque Dungu”. Fei huiño ütrüftucufi ti cülco mu, ca trananacümcünufi ti pañillhue tapa huente cülco mu. 9 Fei püraquintun ca adquintun ñi cüpalen epu domo, ca ti cürüf pürameyu engu. Nieingu müpü quiñe fütra üñüm reque. Ca huitrañpüramfingu ti cülco callfü huenu meu. 10 Feimu ramtufiñ tati cüme püllü ñi dungupeteu: “¿Cheu yeafingu ti cülco?”. 11 Quisu huiñoldungui: “Sinar mapu mu, ñi deumalelafiel quiñe ruca tati domo; ca pepicacünulelngele ti ruca, fei elcünungeai cheu ñi müleafel”.