¿Chem quimeltuquei Biblia?

¿Cümepeafui mai taiñ conal cuñihun-ngechi deporte meu?

“ÑI DEPORTETUAL DOI FENTREN CHE ÜTRÜFNAGI AVION MU, PÜRAINGÜN LIL MU, HUAMPO MEU MIYAUQUEINGÜN TRAYENCO MEU CA HUEYELQUEINGÜN QUIÑENTRÜR TIBURON ENGÜN”. (TÜFA ÑI FEIPIN TI PAPEL THE WILLOW GLEN RESIDENT).

ÑI FEIPIN tüfachi periodico pengeli doi fentren che conquei cuñihun-ngechi deporte mu. Tañi femal ütrüfnagingün paracaida mu cam parapente, püraingün lil meu pirelelu.a Fentren che rume ayüniei femal cuñihun-ngechi dungu. Caquelu che ñi femal cuñihun-ngechi dungu pünequei bicicleta, patineta ca patines. Cafei pünequeingün tabla ñi miyahual piren mu. ¿Chumi engün tañi doi aucantual engün? Püraingün doi alüpüralechi huincul, nagingün fütraque lil ca ayüniei engün ñi doi rincüal. Chumngechi feipilei ti revista Time pingelu, rume fentren che ayüniei ñi femal cuñihun-ngechi deporte. “Pu quim deportetuquelu ca pu femquelu tüfa quiñeque antü müten, ayüniei engün conal cuñihun-ngechi dungu. Femngechi doi adümuucülelu troquiuqueingün, fei ta ayühulqueyu engün”.

Huelu pu femngechi deportetuquelu allfülequei. Mülei quiñeque deporte allfüluhun-ngenolu, huelu pu femquelu cuñihun mu tucuquefingün tañi mongen, feimu allfütripaingün. 1997 tripantu Estados Unidos mapu mu, doi alün che allfütripaingün tañi miyahun patineta mu, tati pu pünequelu tabla ñi miyahual piren mu ca fentren che allfütripai püralu fütraque huincul mu. Caquelu cuñihun-ngechi deporte mu doi fentren che latripaingün. Pu femngechi deportetuquelu quimnieingün ñi cuñihun-ngen. Quiñe che miyauquelu esqui mu feipi: “Rume raquiduamtucunien tañi layafel”. Ca quiñe che tabla mu miyauquelu piren mu feipi: “Allfütripanolmi, nehue yafüluulaimi”.

Chumngechi taiñ inaduampeel, ¿cümepeafui mai pu cristiano ñi conal femngechi deporte mu? ¿Chumngechi quelluqueiñmu Biblia taiñ quimal ñi cuñihun-ngen quiñe deporte? Taiñ quimal ngüneduamaiñ chem raquiduamquei Chau Dios mongen mu.

Chau Dios falintuquefi ti mongen

Biblia feipi: ‘Chau Jehová meu cüpai ti mongen’ (Salmo 36:9). Fei deumaeiñmu ca elueiñmu com taiñ duamnieel taiñ mongeleal (Salmo 139:14; Hechos 14:16, 17; 17:24-28). Feimu ayüniei iñchiñ taiñ falintunieafiel ta mongen. Taiñ doi cüme quimal tüfa ngüneduamaiñ chem ñi feipifiel Chau Dios tati pu Israel che cuifi mu.

Moisés ñi ley feipi caque quiñeque che mülei ñi cuñiutucunieafiel tañi chafche. Quiñe Israel che inanofule tüfachi ngülam, culpantucuafui lafule quiñe che. Quiñe Israel che mülefui ñi femal quiñe pichi malal huente tañi ruca mu, femnofule culpantucuafui ütrüfnagle quiñe che (Deuteronomio 22:8). Cafei quiñe toro repülfile quiñe che fei langümfile, culpantucungelayafui ti ngen toro. Huelu quimfule ca feipingefule ñi cuñihun-ngen tañi toro, culpantucungeai ñi cuidanofiel tañi cullin, fei langümngeafui (Éxodo 21:28, 29). Quimfali llemai Chau Jehová rume falintuquefi ta mongen. Feimu tañi ley meu huercüi tati pu che ñi ca femngechi falintuafiel.

Chau Jehová ñi pu che ca inaniequefuingün tüfachi ley, femngechi tañi femnoal cuñihun-ngechi dungu. Biblia nütramcai quiñe dungu ñi rupan. David ayüfui pütocoal co entungelu quiñe posoco Belén mülefulu. Huelu pu filisteo ngünenieyu feichi huaria. ¿Chumingün cüla soltau quimlu David ñi ayüel? Hueichafingün tati pu filisteo, entufingün co ñi yelelafiel ta David. ¿Chumi David? Pilai ñi pütocoal ca hutrui ti co, fei feipi: “Iñche rume yamniefiñ ta Chau Ngünechen, feimu ¡pütocolayan! Tüfachi pu huentru cuñihun mu tucui ñi mongen, ¿chumngechi pütocoafun ñi mollfüñ engün? Epe langümngeingün ñi cüpalal co” (1 Crónicas 11:17-19). David ayülafui cuñihun mu pütocoal quiñe che ñi mongen, femngechi ñi quisu cümelcahual.

Jesús ca femngechi raquiduamquei. Quiñe afmatun dungu mu Huecüfü yefi ta Jesús ti doi alüpürachi huechuñ Chau Ngünechen ñi ruca mu. ‘Ütrüfnacümuhulmi, pu cümeque püllü montulaimu’ pifi. Jesús feipieyu: “Dicümtuculayafimi tami Chau Ngünechen Jehová ñi pengelal tañi pepiluhun” (Mateo 4:5-7). Felei llemai, David ca Jesús quimtucuingu Chau Dios ayüquelai pu che ñi femal cuñihun-ngechi dungu.

Feimu ramtuhuafuiñ chi: “¿Chem quelluaiñmu taiñ quimal ñi cuñihun-ngen quiñe deporte cam ñi cuñihun-ngenon?”. Cafei mülei cümeque deporte, huelu cuñiutucuunoliyiñ, cuñihun-ngeafui. Fei, ¿chumafuiñ taiñ cüme dullial?

¿Cümepei mai ti deporte tañi dulliel?

Petu taiñ dullinon cümeafui taiñ ramtuhual quiñeque dungu. Por ejemplo, ¿allfütripapei mai fentren che tüfachi deporte mu? ¿Cüme quimniepen mai chumngechi femal tüfachi deporte? ¿Niepen mai iñche com tañi duamnieel tañi cuñiutucuhual? Tranli cam huesalcale ti chemcün tañi cuñiutucuucüleal, ¿chum tripayai ñi femün? ¿Pichi allfütripayafun müten cam rumeñma allfütripayafun cam layafun?

Quiñe cristiano cuñihun mu tucuafui ñi mongen tañi cüme rupaleal müten. Huelu femngechi femle, pengelai ñi cüme hueniyenofiel ta Chau Jehová. Fei elungelayafui elfal cüdau trahunche mu (1 Timoteo 3:2, 8-10; 4:12; Tito 2:6-8). Quimfali llemai tati cristiano deporteconcülelu mülei ñi raquiduamnieal chumngechi Chau Dios, taiñ deumaeteu, falintuquefi ti mongen.

[Quimngeal dungu]