Aucantual ñi huehual plata

¿Cümepei mai aucantual ñi huehual plata?

PU CHE ÑI FEIPILEN

Fentren che feipiquei huesalcachequelai aucantual plata, huelu mülei ñi inangeal pu gobierno ñi ley. Quiñeque mu ti gobierno pünequei chi plata ñi quellucheal.

BIBLIA ÑI FEIPILEN

Biblia feipiquelaeiñmu taiñ aucantunoal taiñ huehual plata. Huelu mülei fillque ngülam pengelquelu chem raquiduamquei Chau Dios.

Ñi huehual plata quiñe che aucantun mu mülei ñi müntuñmayafiel ta caquelu. Huelu Jesús ngülamtueiñmu: “Cuñiutucülemün tamün diñmatunoal” (Lucas 12:15, Traducción del Nuevo Mundo [TNM]). Felei llemai pu femngechi aucantuquelu diñmatuqueingün. Quiñeque che müten hueuquei, huelu pu adcünuquelu tüfachi aucantun feipichequeingün ñi huehual fentren plata. Feimu pu che fente ñi ayüfiel ñi ricungeal hulquei fentren plata casino meu. Tüfachi aucantun mu quelluquelafi pu che ñi diñmatunoal plata. Doi mai ngüchaltucuchequei ñi cüdaunoal tañi huehual plata.

Pu aucantuquelu plata mu quisu duamuuquei müten. Fei engün ayüniei ñi müntuñmayafiel tañi nieel caquelu che. Huelu Biblia feipi: “Inei no rume ngelai ñi quisu duamuhual müten, doi mai caquelu che ñi cüme feleal” (1 Corintios 10:24, TNM). Cafei quiñe tati mari huercün dungu feipilei: “Diñmatuñmalayafimi [...] chem no rume ñi nieel tami chafche” (Éxodo 20:17). Quiñe che re ayüle ñi huehual müten ayüniei ñi müntuñmayafiel caquelu che tañi plata.

Quiñeque che feipiquei nien cüme suerte, tüfa quelluqueneu tañi cüme feleal. Huelu Biblia feipiqueiñmu taiñ femngechi femnoal. Cuifi quiñeque israelche feyentulafingün ta Chau Dios, fei eluhuingün ñi poyeafiel ti coila dios hulquelu cüme suerte. ¿Chumngentufi tüfa ta Chau Ngünechen? Fei feipi: “Fentecünulaimün tamün femquen huesaque dungu iñche ñi üdequeel, ca dullimün iñche ñi ayühulquenoeteu” (Isaías 65:11, 12).

Rüfcünu llemai quiñeque pais femmequei feichi plata ñi quelluafiel pu che ñi nieal educacion cam cüdau. Cüme pünengele rume feichi plata, ellcangelayafui cheu ñi tuhun. Fillque aucantun mu ngüchaltucuquefi pu che ñi diñmatual, fei quisutu duamuhual ca cüdaunoal nieal fillque chemcün.

“Diñmatuñmalayafimi [...] chem no rume ñi nieel tami chafche” (Éxodo 20:17).

Ti aucantun plata mu, ¿chumngechi huesalcayafeyu pu che?

BIBLIA ÑI FEIPILEN

Tati Biblia ngüfetuqueiñmeu: “Tati pu eluucülelu ñi ricungeal, pünoconqueingün huesaque dungu mu, ngünencan dungu ca huesaque illutun falin-ngenolu. Tüfachi dungu yequeyu engün ñi cutrancahual ca ñi layal” (1 Timoteo 6:9, Traducción del Nuevo Mundo [TNM]). Tati illutun foliluucülei reque tati pu ayülu ñi aucantual ñi huehual plata. Rume huesalcaquefi pu che ti illutun, feimu lle tati Biblia ngüfetuqueiñmeu taiñ connoal aucantun dungu (Efesios 5:3).

Ti aucantun dungu pu che cüdautuquelai ñi huehual plata, femngechi yequeyu ñi piuqueyenieafiel ti plata. Tati Biblia feipi: “Diñmatufiel ta plata itrofill huesaque dungu cüpalquei”. Pu diñmatuquefilu plata eluuquei tañi ngünenieteu. Pu femngechi femquelu fill raquiduamcülequei ca hueniyequelaingün ta Chau Dios. Tati Biblia feipieiñmeu tati pu diñmatuquefilu ta plata “cutrancauqueingün fentren huesaque dungu mu” (1 Timoteo 6:10, TNM).

Tati pu diñmatuquefilu plata ayüucülequelaingün ca tüngcülequelaingün, re plata dungu müten raquiduamtucuniefingün. Feimu Eclesiastés 5:10 feipilei: “Quiñe che piuqueyequefilu tati plata tuduamquelai plata meu, ca quiñe piuqueyequefilu ti falinque fillem tuduamquelai tañi huehuelchi plata mu”.

Famülque mu fentren che conlu aucantun dungu plata mu presuleingün reque. Estados Unidos mapu mu, rume fentren che concüleingün feitachi aucantun dungu.

Proverbios 20:21 pengeli tati pu diñmatuquefilu ta plata ricungerpuafui, huelu Chau Jehová cümelcalaeyu engün ca conqueingün fentren defen dungu. Ca quiñequentu engün pofrequeingün, niehuequelaingün hueni, cüdau ca tañi familia. Inaniefiliyiñ Biblia ñi ngülam, quelluaiñmu taiñ famentuafiel huesaque aucantun dungu concülelu ti plata.

“Tati pu eluucülelu ñi ricungeal, pünoconqueingün huesaque dungu mu, ngünencan dungu ca huesaque illutun falin-ngenolu. Tüfachi dungu yequeyu engün ñi cutrancahual ca ñi layal” (1 Timoteo 6:9, TNM).