Afchi dungu ñi ngüneduamngeal tati pu küpa fautizawlu engün

Tati pu Dungukelu Iney Ngen Jewba ñi fütrake trawün mew epe kom tati pu che fautizangekey. Feychi fütrake trawün mew wülngekey kiñe wewpin ñi allkütual pu fautizawalu, fey epe afle ti wewpin, ti wewpife ‘witrapüramün’ piafi tati pu fautizawalu, fey engün newentun mu wiñoldunguayngün tüfachi epu ramtun:

1. ¿Wiñorakiduamtuymi may tami culpan mu, ka wültukuymi tami mongen ta Jewba mu, ka feyentunieymi may Jesukristo ñi lan mew?

2. Fautizawalu am eymi Dungukelu Iney Ngen Jewba ngeaymi ka koneltuaymi Chaw Ngünechen tañi trokiñche mu, ¿kimtukunieymi tüfachi dungu?

Tati pu fautizawalu “may” pile engün, femngechi pengelayngün ñi feyentukefiel ñi montulcheken Jesus tañi lan, ka pengelayngün ñi wültukuel ñi mongen Chaw Jewba mu, fey ñi poyeafiel kom tañi piwke mew engün (Rom. 10:9, 10). Feymu llemay, pu fautizawalu llellipun mew müley ñi rakiduamal tüfachi ramtun mu. Femngechi, akule ti antü ñi fautizangeal, küme kimayngün tañi chumal, fey rüf piwke mew wiñoldunguayngün.

¿Llellipufimi ta Jewba, fey wültukuymi tami mongen kidu mu? Feychi llellipun mu, ¿feypifimi tami poyeafiel kidu müten ka tami eluwal tami femal kidu tañi ayükeel?

¿Rüf eluwküleymi tami fautizawal chumül rume?

¿Chem takun müley tami yenieal tami fautizangeal? (1 Tim. 2:9, 10, TNM; Juan 15:19; Filip. 1:10).

Iñchiñ taiñ cristianongen müley taiñ küme tukutuwal ñom piwke mu “ka küme rakiduam mew”, femngechi pengelkeiñ taiñ “poyeniefiel ta Chaw Ngünechen”. Feymu pu fautizawalu ngelay ñi yenieal yewentukufalngechi takun ñi fautizangeal, ka femngechi feychi takun wirintukunielu ngam fill dungu tukulayay. Doy may, yenieayngün küme takun lifkülelu.

¿Chem küme femün müley tami pengelal petu fautizangelmi? (Luka 3:21, 22).

Fautizawlu Jesus pengelkünuy chumngechi ñi fautizangeal pu che. Kidu tañi küme duam mu ka küme femün mu pengeli fente ñi falintuniefiel tañi fautizangeal. Feymu petu fautizangele ti che, ngelay ñi ayekawmekeal, weyelkantuyawnoal ka femnoal chem dungu no rume ñi pekan trokinoafiel tüfachi falin antü. Ka femngechi tati we cristiano ngelay ñi mallmawküleal ñi wewel mu reke. Tüfachi antü müna ayüwün-ngey, feymu ti che küme duam mu pengelay tañi ayüwkülen.

Amulmi trawün mu ka kiñewkülelmi ti trawünche mu, ¿chumngechi kelluaeymu tami rumel poyeafiel ta Jewba?

Dew fautizawlu eymi, ¿chumngelu falin-ngey tami küme elantükünual tami papeltuafiel Biblia ka tami rumel amuldungual?

ÑI KIMNIEAL TATI PU LONGKOLELU TRAWÜNCHE MEW

Kiñe amuldungukelu petu fautizawnolu ‘küpa fautizawün’ pile, müley tamün feypiafiel ñi ngüneduamal tati trokiñ feypilelu “Fillke ramtun ñi inaduamal pu küpa fautizawlu” (pag. 12-47). Ka müley ñi inaduamal ti trokiñ feypilelu “Tüfa ñi kimafel ti pu amuldungukelu petu fautizawnolu” (pag. 7-10). Tüfa mew feypiley chumngechi ti che küpa fautizawlu müley ñi pepikawal petu ñi trawüluwnon pu longkolelu engün. Chumngechi ñi feypilen feychi trokiñ mew, tati küpa fautizawlu petu ramtungele, inaduamafuy tañi wirintukuel ka nülanieafuy tañi lifru. Welu duamfalngelay ñi kelluaetew ka che tañi inaduamal tüfachi ramtun petu ñi trawüluwnon pu longkolelu engün.

Kiñe che küpa fautizawle müley ñi feypiafiel tati peñi adkünukelu ti trokiñ longkolelu. Fey ti che kidu pepikaway ti trokiñ “Fillke ramtun ñi inaduamal pu küpa fautizawlu”. Fey wüla, tati peñi adkünukelu ti trokiñ longkolelu ramtuafeyew: “¿Dew llellipuymi may ta Chaw Jewba, fey tami wültukual tami mongen kidu mew?”. Fey “dew femün” pile ti che, tüfachi longkolelu werküafi ta epu longkolelu ñi wichuke trawüluwal ti che engu, fey ñi inaduamal ti trokiñ “Fillke ramtun ñi inaduamal pu küpa fautizawlu” (wünen trokiñ ka epungechi trokiñ). Fey kiñe longkolelu inaduamay ti che engu tati wünen trokiñ, ka ti kangelu longkolelu inaduamay ti che engu tati epungechi trokiñ. Duamfalngelay esperayal ñi fülkülepan kiñe fütra trawün, fey ñi ramtungeal ti che.

Kiñe hora mew ngüneduamngeafuy kake kiñeke ti trokiñ, welu doy alüñmayafuy. We konle ñi inaduamal ti trokiñ ti che engu, ti longkolelu müley ñi llellipukünual, fey dewle engün, ka müley ñi llellipual. Tati longkolelu ka ti küpa fautizawlu ngelay ñi matu ngüneduamal tüfachi trokiñ. Ka tati longkolelu elfalkünungelu ñi ramtulelafiel tati küpa fautizawlu, müley ñi doyümnieafiel tüfachi trawün, chem dungu mew rume tañi femal.

Newe kümelayafuy ñi trawülngeal kom pu fautizawalu ñi ramtungeal, feymu doy kümeafuy pu longkolelu ñi ramtuafiel kake kiñeke che. Kidulele ti küpa fautizawlu doy küme entuay tañi wiñoldungun. Femngechi ti longkolelu küme ngüneduamafuy ñi chem wiñoldungukeel ti che, ka küme kimafuy tunte ñi kimnieel ti che tati rüf dungu mu. Femngechi küme inaduamayngün ñi pepikawkülepen may ti che tañi fautizangeal. Welu tati pu afkadiwen kiñentrür koneltuafuyngu.

Kiñe ñaña küpa fautizawle, müley ñi kidulenoal ti longkolelu engu. Fey inafül püle müleafuy che, welu koneltulayafuy ti ramtun dungu mu. Duamfalngele, ka kiñe peñi müleafuy chew ñi ramtungen ti lamngen, tüfa kiñe longkolelu ngeafuy kam kiñe konakechi kellukelu (siervo ministerial). Tati küpalechi parrafo feypi iney elfalkünungeafuy ñi inaduamal kake kiñeke trokiñ ti che engu.

Kiñe trawünche mu müna pichin longkolelu mülele, fey kiñe konakechi kellukelu inaduamafuy ti che engu ti wünen trokiñ feypilelu “Pu cristiano ñi feyentukeel”. Tüfachi konakechi kellukelu müley ñi küme adümuwal ka küme rakiduam nieal. Welu pu longkolelu müten müley ñi inaduamal ti epungechi trokiñ feypilelu “Chumngechi müley ñi yenieal ñi mongen pu cristiano”. Tati trawünche mew mülenole fentren adümuwkechi peñi ñi femal tüfachi küdaw, tati witran-ngepakechi longkolelu feypingeay tüfa. Fey kidu dulliafuy tañi mütrümal kiñeke longkolelu püllelechi trawünche mew ñi kelluntukual.

Küpa fautizawle kiñe pichikeche ka wechekeche, kümeafuy ñi compañnieaetew tañi chaw kam ñuke feyentulelu. Pepi compañnoelieyew tañi chaw kam ñuke, epu longkolelu müley ñi inaduamal kake kiñeke trokiñ. Ñi inaduamal tati wünen trokiñ, müleafuy kiñe longkolelu ka kiñe konakechi kellukelu.

Tati pu longkolelu müley ñi ngüneduamal tati pu küpa fautizawlu ñi adümniefiel tati doy duamfalngechi kimeltun Biblia mew mülelu. Kafey pu longkolelu inaduamafuy ñi rüf piwkeyeniefiel ti rüf dungu ka tañi yamniefiel Jewba ñi adkünuelchi trokiñche. Tati che newe küme adümnole tati falinke kimeltun Biblia mew mülelu, tati pu longkolelu müley ñi adkünual ñi kellungeal ti che, femngechi ñi pepikawküleal ñi fautizawal küpalechi antü mu. Kafey kakelu che petu ñi elungenon ñi fautizawal, müley ñi doy pengelal tañi falintuniefiel ti amuldungun ka tañi inaniefiel ñi chem pilen Jewba tañi adkünuelchi trokiñche. Tati pu longkolelu müley ñi küme adkünual feychi hora ñi inaduamngeal kake kiñeke trokiñ, femngechi ñi kimnieal engün ñi pepikawkülepen may ti che ñi fautizangeal. Kiñeke ramtun dungu doy alüñmayafuy ñi ngüneduamngeal ka kakelu pichiñmayafuy, welu itrokom chi ramtun dungu müley ñi ngüneduamngeal.

Dew ngüneduamle ti che engu ti epungechi trokiñ, tati pu longkolelu elfalkünungelu müley ñi trawüluwal engün, fey ngüneduamafingün tati küpa fautizawlu ñi mongen, tañi adümuwün, kam kakelu dungu ñi rupameken, fey ‘fautizangepe’ kam ‘petu fautizangekilpe’ piafuyngün. Pu longkolelu müley ñi kimal tati che ñi rüf weniyeniefiel ta Jewba ka tañi adümniefiel tati doy falinke kimeltun Biblia mew mülelu. Eymi longkolelu, piwkeyewün mu kellufilmi tati che küpa fautizawlu, tüfa küme pepikawküleay ñi amuldungual Ngünechen ñi küme dungu, tüfa tati doy falin dungu ñi elfalngeel.

Fey kiñe kam epu longkolelu elfalkünungelu trawüayngün tati küpa fautizawlu engün, ka feypiafingün tañi pepikawkülen kam pepikawkülenon ñi fautizangeal. Pepikawkülele ti che, trür inaduamayngün tati trokiñ feypilelu “Afchi dungu ñi ngüneduamngeal tati pu küpa fautizawlu engün” (pag. 51-53). Ti che petu dewnole ñi kimeltungeel tati lifru ¡Rumel Ayüucüleaimi!, tati pu longkolelu ngülamtuafi ñi kom papeltuafiel tüfachi lifru dew fautizawle rume. Feypiafimi tati che fautizawalu tati tarjeta feypilu Registro de publicador de la congregación wirintukungeay chumül fautizangeay. Acordalelfinge ti che feychi tarjeta mu wirikonküley tañi üy, chew tañi mülen ka kakelu femngechi dungu. Tüfa kellukefi Jewba tañi trokiñche ñi küme amuleal tañi küdaw wall Mapu mu. Femngechi ti che koneltuafuy fillke dungu ñi femkeel ti trawünche ka kelluafeyew ka adnieafeyew pu longkolelu. Kafey pu longkolelu acordalelafuy ti che kom ñi kimniengeel kidu mu pünengeay chumngechi ñi feypiel tati “Política global de protección de datos personales de los testigos de Jehová”, mülelu jw.org mu. Tüfachi pichi trawün ti fautizawalu engu mari minuto müten puwafuy.

Dew rupale kiñe tripantu tañi fautizawün kiñe che, epu longkolelu müley ñi trawüluwal kidu engün, fey yafültukuafi ka ngülamtuafi. Kiñe tüfachi epu longkolelu fey tati peñi longkolelu ti trokiñche mew chew ñi amuldungukeel ti che. Feyti we fautizawlu pichikeche ngele kam wechekeche ngele, müley ñi compañnieaetew tañi chaw kam ñuke feyentulelu. ¿Chumngelu femngeay tüfachi trawün? Ñi yafültukungeal ka ñi kellungeal tati we fautizalelu. Tati pu longkolelu nütramkayafi chumngechi ñi amulen tañi weniyefiel Jewba, ka ngülamtuafi ñi amuleal tañi papeltufiel Biblia fill antü, chumngechi poyeafiel Jewba tañi familia engu fill semana, rumel trawümekeal ka koneltuleal ti trawün mu, ka ñi amuldungual fill semana (Efes. 5:15, 16). Ti che petu kimeltulelngenole ti lifru ¡Rumel Ayüucüleaimi!, pu longkolelu müley ñi adkünuafiel ñi kellungeal ti we fautizalelu ñi kom papeltuafiel tüfachi lifru. Tati pu longkolelu ngülamtuafuy kiñe kam epu dungu mew müten chumngechi tañi doy küme amuleal, welu doyelchi may piwkeyen mu yafültukuafi.