Agosto

Feitachi versiculo feipi epu falin dungu: 1) nor chengeliyiñ rume, rupayafuiñ huesaque dungu mu. Ca 2) Jehová montulqueiñmu huesaque dungu mu. ¿Chumngechi montulqueiñmu Jehová? Quelluqueiñmu taiñ cüme raquiduamal rupaliyiñ huesaque dungu mu. Jehová feipilaeiñmu taiñ rupanoal huesaque dungu, huelu feipieiñmu taiñ ayüucüleal serfifiliyiñ (Is. 66:14). Ca feipiqueiñmu taiñ raquiduamcüleal taiñ cüme feletual cüpalechi antü mu (2 Cor. 4:16-18). Huelu petu ñi acunon feichi antü, Jehová quellunieiñmu taiñ cüme serfinieafiel (Lam. 3:22-24). ¿Chem quimeltueneu ñi rupan quiñeque serfiquefilu Jehová cuifi mu ca famülque mu? Ruparumeliyiñ huesaque dungu mu, Jehová quelluaiñmu maneluucüleliyiñ quisu mu (Sal. 55:22). w23.04 pag. 15 parr. 3, 4

José engu María eluucülefui tañi inayal ñi feipin ti autoridad cüdaungefulu rume (Luc. 2:1-6). Feichi mu, ti lonco ülmen Augusto pingelu entui quiñe ley. Feitachi ley feipi com che ñi ngünenieteu pu Roma che mülefui ñi huiñotual quisuque ñi huaria mu engün, femngechi ñi huirintucuñmangeal ñi üi. Feimu José engu María mülefui ñi amual Belén huaria mu, 150 kilometro camapulefui. Müna cüdaungefui ñi miyahual feichi rüpü püle. María ailla cüyen amulefui ñi niepüñeñcülen. Feimu ¿cüdautupelai ñi amual Belén huaria mu? Fei engu fill raquiduamcülefui tañi chumleal ta María ca tañi püñeñ. ¡Rüpü püle choyüngerumefule ti püñeñ nga! Feichi pichiche Mesías ngerquealu, feimu María rume falichi püñeñ tüfa, duamfal-lai tañi inayal ñi feipin ti gobierno piafui. Huelu ¿chumi? María epe choyünielu rume ñi püñeñ, feitachi curehuen inafi müten ñi feipin ti lonco ülmen. Jehová rume ayühui tañi femün mu engu ca cuñiutucueyu. Cüme puhuingu Belén huaria mu, fei María choyüfi ti pichiche. Cafei María tañi femün femtripai quiñe dungu ñi feipicünuel Biblia (Miq. 5:2). w23.10 pag. 8 parr. 9; pag. 9 parr. 11, 12

Quiñeque peñi ca quiñeque lamngen raquiduamün mu müten tañi huiñoldungual llicaqueingün. ¿Eimi cai? ¿Ca llicaqueimi? Tüfa tami femafel: cüme pepicaunge (Prov. 21:5). Cüme entendefilmi ñi inaduamngeal trahun mu, doi cüdautulayaimi tami huiñoldungual. ¿Ca chumafuimi? Fentre amul-layaimi tami huiñoldungun (Prov. 15:23; 17:27). Pichiñmale tami huiñoldungun, müte llicalelayaimi. Pichin dungun mu huiñoldungulmi, huelu piuque mu tripale pengelaimi tami cüme pepicaucülen ca tami cüme adümniefiel chi dungu. Inafulmi rume feitachi cümeque ngülam, huelu petu llicalelmi, quiñe cam epu rupa müten huiñoldungulmi, ¿chumafuimi? Loncontucuaimi Jehová falintuñmaqueimu tami femquen (Luc. 21:1-4). Jehová feipilayaimu tami femal tami pepilnoelchi dungu (Filip. 4:5). Feimu raquiduamnge chem tami femafel, fei ngillatufinge Jehová tami tüngduamelaeteu. Ellaca mu, quiñechi müten chi pichi huiñoldunguafuimi. w23.04 pag. 21 parr. 6-8

Ti apostol Pablo feipieiñmu taiñ inayentuafiel pu soltau llihuatulelu ca cüme tucutuucülelu. Mülele hueichan, pu soltau mülei ñi pepicaucüleal ñi hueichayal. Iñchiñ ca mülei taiñ pepicaucüleal acule Jehová ñi antü, ¿chumngechi? Mülei taiñ feyentuleal, nieal piuqueyehun ca taiñ maneluucüleal. Pu soltau cüme tucutuuquei ñi cuñiutucuhual tañi rücu, femngechi ñi allfülmangenoal ñi piuque. Ca femngechi ti feyentun ca piuqueyehun cuñiutucuqueiñmu. Taiñ feyentun ca piuqueyehun quelluqueiñmu taiñ serfinieafiel Jehová ca taiñ inayentuafiel ta Jesús. Ca femngechi taiñ feyentun mu, maneluucüleiñ Jehová ñi fürenequefiel feichi pu che tañi serfiqueteu com piuque mu (Heb. 11:6). Ca quelluaiñmu taiñ inanieafiel taiñ feipieteu Jesús rupaliyiñ rume cüdaungechi dungu mu. ¿Chumafuiñ taiñ doi feyentuleal? Inaduamafiyiñ chumngechi ñi aguantan pu peñi ca pu lamngen inacangelu rume ca müte nienolu rume ta plata. Ca inaduamafuiñ quiñeque peñi, lamngen cüme yenieingün ñi mongen ca hunentucuquefingün Jehová ñi dungu tañi mongen mu. Tüfa quelluaiñmu taiñ rume falintunoafiel falinque fillem. w23.06 pag. 10 parr. 8, 9

Duamnieiñ taiñ ngüneucüleal taiñ dirpual taiñ ayünieel, doyelchi mai cüdaungele taiñ femal cam müte yafüluucülenoliyiñ rume. Jehová tañi nehuen mu quelluafeiñmu taiñ cüme ngüneucüleal (Luc. 11:13; Gál. 5:22, 23). Esperalayaimi tañi cümelcaleal ti dungu. Famülque mu lifrelelayaiñ huesaque dungu mu. Feimu anücünuuliyiñ taiñ esperayal ñi cümelcaletual com dungu taiñ mongen mu, turpu dirpulayafiyiñ taiñ ayünieel. Quiñeque mu ayüliyiñ taiñ dirpuafiel taiñ ayünieel, huelu fütra dungu troquifali ca cüdaungei, feimu yafüluulayafuiñ taiñ dirpuafiel. Femngechi dungu mu eimi rupalmi, ñoquiquechi amuleai tami femal. Por ejemplo, ayülmi tami doi cüme cristianongeal, tami piuqueyechefengeal cam tami ñom piuquengeal, hunelu mu pengelaimi pichiquen dungu mu. Ayülmi tami doi papeltuafiel Biblia, eluunge tami papeltuafiel pichique troquiñ mu. w23.05 pag. 29 parr. 11-13

Afaelchi antü mu, Jehová tañi troquiñche mu eluqueiñmu ngülam mülelu Biblia mu, tüfa quelluqueiñmu taiñ amuleal ti “Lifngechi Rüpü” mu (Is. 35:8; 48:17; 60:17). Quiñe che eluule ñi papeltuafiel ta Biblia conafui ñi “Lifngechi Rüpü” mu. Quiñeque che pichiñma mu müten miyauquei feitachi rüpü mu, fei famtripaqueingün. Huelu quiñeque eluucüleingün ñi miyahual feitachi rüpü mu, fei ñi turpu famtripanoal. ¿Cheu am yeafeyu feitachi rüpü? Tüfachi rüpü yeafi pu dullinque cristiano “Chau Ngünechen ñi ayüfalchi mapu mu” ¿chem am tüfa? Tüfa tati huenu, cheu ñi mülemum Jehová (Apoc. 2:7). ¿Tati mülealu mapu mu cai? ¿Cheu yeafeyu tüfachi rüpü? Yeafeyu ñi culpan chengehuenoal afle huaranca tripantu ñi ngüneniefiel Jesús ta mapu. Eimi miyahulmi feitachi “Lifngechi Rüpü” mu, huiño quintulayaimi, amulenge müten. w23.05 pag. 17 parr. 15, 16; pag. 19 parr. 17, 18

Raquiduamün mu com tañi femün ta Jehová eimi mu mañumtuquefimi, feimu eluquefimi tami mongen ñi poyeafiel (Sal. 116:12-14). Biblia feipi: “Com tati cümeque dungu ca com tati tutengelu Chau Ngünechen mu cüpai” (Sant. 1:17). Chau Jehová huli tañi poyen Fotüm com iñchiñ mu, tüfa tati doi cüme dungu taiñ elueteu. Jesús hulün mu tañi mongen, feimu eimi hueniyerpuafuimi Jehová ca nierpuafuimi rumel mongen (1 Juan 4:9, 10). Feimu llemai eluulu eimi tami serfiafiel ta Jehová, mañumtuquefimi tami piuqueyeteu ca com cümeque dungu tami elueteu (Deut. 16:17; 2 Cor. 5:15). w24.03 pag. 5 parr. 8

Famülque mu pu che re huesaque dungu femquei. Ca femngechi che mülequefui Lot tañi antü mu. Feichi mu, “pu huesaque che quim yehuequelafui tañi huesaque femün mu”. Lot quimniefui Jehová ñi üdequefiel huesaque dungu, feimu “rume cutrantupiuquelefui” (2 Ped. 2:7, 8). Huelu Lot tañi yamquefiel mu Jehová ca ñi piuqueyeniefiel mu, inayentuquelafui huesaque che ñi femün, üdequefi huesaque dungu. Iñchiñ ca hualloñmanieiñmu huesaque che respetaquenofilu Jehová ñi feipin. Fei, ¿chem mülei taiñ femal taiñ connoal huesaque dungu mu? Taiñ piuqueyeniefiel Jehová ca taiñ yamniefiel. Ti lifru Proverbios rume quelluaiñmu taiñ yamnieafiel ca piuqueyeafiel ta Chau Dios. Com iñchiñ, huentru, domo, hueche, füchache, com mülei ñi inaduamafiel cümeque ngülam mülelu tüfachi lifru mu. Yamniefiliyiñ Jehová, hueniyelayafiyiñ pu che huesaque dungu femquelu. w23.06 pag. 20 parr. 1, 2; pag. 21 parr. 5

Eimi tami testigongen mu caiñetueimu chi tami familia. Cam doyümfimi chi serfiafiel ta Jehová ti plata mu (Mat. 6:33). Jehová quimniei tami elel quisu mu (Heb. 6:10). Feimu rupaimi chi ñi feipiel ta Jesús. Quisu feipi: “Rüf feipihuayiñ, inei rume elcünule ruca, peñi, lamngen, ñuque, chau, yall cam lelfün iñche tañi duam ca ti cümeque dungu ñi duam mu, fantepu meu llohuai 100 rupa tañi niequefel: ruca, peñi, lamngen, ñuque, yall, lelfün ca rupayai caiñetuhun. Cafei cüpalechi antü meu llohuai rumel mongen” (Mar. 10:29, 30). Femi llemai, tami llohuelchi cümelcan feula, doi alürpui tami elcünuel mu (Sal. 37:4). w24.03 pag. 9 parr. 5

Mülen mu filla Judea mu, ¿chumingün pu cristiano Antioquía mu? “Tunte ñi pepi femün engün, adcünuingün ñi quellual pu peñi ca pu lamngen Judea mapu mülelu” (Hech. 11:27-30). Ñi rume camapulen engün, huelu eluhuingün ñi quelluafiel (1 Juan 3:17, 18). Ruparumele huesaque dungu, iñchiñ ca femngechi pengelaiñ taiñ cutranpiuqueyefiel taiñ pu peñi ca lamngen. ¿Chumngechi eluucüleafuiñ taiñ quellual? Feipiafuiñ pu loncolelu taiñ quelluntucual, hulafuiñ plata ñi amuleal Jehová ñi cüdau huall mapu mu cam ngillatuleafuiñ quiñeque rupalelu huesaque dungu mu. Taiñ pu peñi, pu lamngen ca duamnieafuingün ñi quellungeal ñi nieal tañi duamnieel engün. Cutranpiuqueyecheliyiñ, Jesús cümelcayaiñmu cüpale tañi ramtucadungupayafiel pu che (Mat. 25:34-40). w23.07 pag. 4 parr. 9, 10; pag. 6 parr. 12

Jesús inayentuquefi tañi Chau. Mülelu mapu mu, Jehová huercüeyu “ñi quelluafiel pu Israel che müten, ñamquiyauchi ufisa reque felelu”. Huelu quiñe rupa quiñe domo fülcontufi Jesús, feipifi ñi tremoltuñmayaeteu ñi püñeñ conhuecüfülelu. Tüfachi domo Israel tuhun nielafui, fei ¿chumi Jesús? Cutranpiuqueyefi ti domo ca tremoltufi ñi püñeñ, Israel tuhun-ngenofulu rume (Mat. 15:21-28). Jesús, ¿ca chumngechi inayentufi ta Jehová? Mülelu mapu mu, Jesús feipi: “Inei rume quimlafiñ ta Jesús feipifile ta caquelu che, ca femngechi iñche quimlafiñ feichi che feipian” (Mat. 10:33). Huelu quiñe rupa, Pedro cüla rupa quimlafiñ ta Jesús pifi caquelu che. Fei Jesús, ¿famentupeyu mai tañi femün mu? Femlai. Jesús quimniefui Pedro tañi huiñoduamtun ca tañi cüme feyentulen. Feimu huiñomongetulu ta Jesús, peufaluufi ta Pedro ca quimfalcünulelfi tañi perdonafiel ca ñi piuqueyeniefiel (Luc. 24:33, 34). Iñchiñ inayentuafuiñ ta Jehová ca Jesús, feimu mülei taiñ ngünefal chengeal. Jehová feipieiñmu taiñ femngechi chengeal. w23.07 pag. 21 parr. 6, 7

Quiñeque che feyentunole Chau Dios ñi cüme elcünutuafiel ti mapu, ¿chem feipiafuiñ? Hune, Chau Jehová feipicünui tañi chumal. Apocalipsis feipi: “Tati anülelu ülmen huancu mu feipi: ‘Huecünumequetufiñ com dungu’”. Chau Dios niei quimün, pepiluhun ca ayüniei femürpual tañi feipicünuel. Epu, Chau Dios quimniei ñi femtripayal tañi feipicünuel, feimu deu huechurpui pi. Fei ca feipi: ‘Tüfachi dungun manelfali ca rüfngei. ¡Deu femtripai tati!’. Cüla, Chau Jehová eluule ñi femal quiñe dungu, huechunenturpuquefi. Feimu feipi: “Iñche tati Alfa ca tati Omega” (Apoc. 21:6). Femngechi Chau Jehová pengelai Huecüfü ñi coilatufengen ca pepi catrütulafi Chau Jehová ñi ayüqueel. Feimu quiñe che feipile: “Tüfa müna cümefui, huelu ¿rüfngei chi am?”, eimi ¿chumafuimi? Papeltulelfinge ca quimelelfinge Apocalipsis capitulo 21, versiculo 5 ca 6. Pengelelafimi tati che chumngechi Chau Jehová pengeli ñi rüf femtripayal tañi ayünieel. Acordanienge, Jehová quisu feipicünui tüfa, fei femtripayai (Is. 65:16). w23.11 pag. 7 parr. 18, 19

Abrahán deu füchafui, 75 tripantu niefui ca nielafui ta yall, fei Jehová feipicünueyu tañi fütra trochiñchengerpual. Fei Abrahán, ¿pepefi mai ñi feipicünueteu ta Jehová? Com pelafi, pefi quiñeque müten. Deu rumelu Éufrates leufü mu, Abrahán mülefui ñi esperayal 25 tripantu ñi choyüngeal tañi fotüm Isaac. Ca 60 tripantu ca rupafui tañi choyüngeal tañi epu nieto, Esaú ca Jacob (Heb. 6:15). Abrahán pelafi com tañi cüpanche quiñe fütra troquiñche reque ca pelafi chumngechi ñi conpun engün ti cüme mapu mu. Femfulu rume, Abrahán müna cüme hueniyequefui ta Jehová (Sant. 2:23). Raquiduamnge huiñomongetule ta Abrahán. Quimai quisu tañi feyentun mu ca ñi nien mu paciencia com pu che mapu mu cümelcangei (Gén. 22:18). ¿Chem quimiyiñ tüfa? Abrahán reque com pelayafiyiñ chi ñi femtriparpun com ñi feipicünuel ta Jehová. Huelu mülei taiñ nieal ta paciencia, fei maneluucüleaiñ Jehová taiñ cümelcayaeteu feula ca cüpalechi antü mu (Mar. 10:29, 30). w23.08 pag. 24 parr. 14

Huechengelu lonco ülmen Uzías, ñom piuquengefui ca respetaquefui ta Chau Dios. 68 tripantu mongelerpui ca epe com tañi mongen Jehová füreneeyu (2 Crón. 26:1-4). Uzías hueufi fentren caiñe ca cüme adcünufi Jerusalén, femngechi ñi contunoaeteu pu caiñe (2 Crón. 26:6-15). Com ñi cüme femün Uzías Jehová quelluntucueyu, ¿müna ayüucülepelafui? (Ecl. 3:12, 13). Uzías ñi lonco ülmen-ngen mu huimtulefui ñi feipiafiel caquelu pu che chem ñi femal, ¿feimu raquiduampelai ñi femal chem rume tañi ayüqueel? Feimu quiñe antü Uzías conpui ti ngillatuhue ruca mu ca lüpümfi incienso altar meu, tüfa ñi femnoafel pu lonco ülmen, pu sacerdote müten mülefui ñi femal (2 Crón. 26:16-18). Ti hunen lonco sacerdote Azarías norümfeyu, huelu Uzías rume illcui. Uzías püntütripai Jehová mu, fei Jehová elueyu lepra cutran (2 Crón. 26:19-21). Uzías ñom piuquengefule, ¿afquentu cüme mongen yeniepelayafui? w23.09 pag. 10 parr. 9, 10

Dullin cristianongefulu rume, ti apostol Pedro ca huelulcauquefui. Peaiñ tañi rupan ti tripantu 36 mu. Feichi mu, Chau Dios huercüfi ta Pedro Cornelio mu, quisu judio tuhun-ngelafui. Fei Chau Dios dullin cristianocünufi ta Cornelio, tüfa pengeli epu dungu: “Chau Dios dullintuchequelai” ca pu judiongenochi che conafuingün Jehová ñi trahunche mu (Hech. 10:34, 44, 45). Feichi mu müten, Pedro eluhui tañi trahuluhual pu judiongenochi che engün, cuifi turpu femquelafui. Huelu rupai quiñe dungu. Feichi mu, mülequefui quiñeque cristiano judiongelu petu raquiduamquefuingün ñi trahunoal pu judiongenochi che engün. Fei quiñeque cristiano femngechi raquiduamquelu puhuingün Antioquía huaria mu, fei mu Pedro iquefui pu cristiano judiongenolu. ¿Chumi ta Pedro puulu tati pu judio? Pedro püntünentuhui pu judiongenochi cristiano mu. ¿Llicalefui chi ta Pedro tañi chem pingeal? Ti apostol Pablo pefi tañi huesa femün ta Pedro, fei norümtufi com che ñi adquiñ mu (Gál. 2:13, 14). Huelulcaulu Pedro, huelu fentecünulai tañi serfinieafiel Jehová. w23.09 pag. 22 parr. 8

Cüme inaduamuhuaimi, huelu huesa duamquilnge tami norümtual quiñeque dungu. Taiñ Ñidol ‘cüme piuquengei’ ca quelluaimu tami doi cüme cristianongeal (1 Ped. 2:3). Ti apostol Pedro feipi: “Chau Ngünechen pepicayaimünmeu com dungu mu. Fei nehuentucuaimünmeu”. Quiñe rupa Pedro falintuulafui Jesús tañi adquiñ mu tañi culpafe chengen mu (Luc. 5:8). Huelu piuqueyenquechi quellueyu Jehová ca Jesús. Tañi femngen mu inaniefi ta Jesús, feimu elungei ñi conpual cheu ñi ngünenien ta Jesús huenu mu (2 Ped. 1:11). Müna cüme dungu llohui ta Pedro. Fentecünunolmi tami serfinieafiel Jehová ca eluhulmi tami pepicayaeteu, ca elungeaimi afnoachi mongen. Femngechi ‘ayühun mu montulngeaimi fente tami feyentun’ (1 Ped. 1:9). w23.09 pag. 31 parr. 16, 17

Ti ngillatuhue tolto ruca mu mülefui quiñe patio lepün püle malaltuculelu. Tüfa mu pu sacerdote femquefui tañi falin cüdau. Patio mu mülefui quiñe fütra altar cobre deumangelu, tüfa mu lüpümngequefui chalintucun. Ca mülefui quiñe fütra lafatorio cobre deumangelu, tüfa mu pu sacerdote cüchacuhuquefui ca cüchanamunquefui fei ñi femal tañi cüdau (Éx. 30:17-20; 40:6-8). Petu tañi mülen mapu mu, pu dullingelu cüdauqueingün Jehová ñi adcünuelchi ruca ñi lepün püle. Feichi lafatorio mülequefulu ngillatuhue ruca mu raquiduamelqueyu pu dullinque cristiano ñi lifcüleal tañi raquiduam ca tañi mongen, femngechi ñi cüme hueniyeafiel ta Chau Jehová. Com pu cristiano ca mülei ñi femal. Ti “fütra troquiñche”, ¿cheu püramyequefi ta Chau Dios? Serfiqueingün mapu meu Jehová ñi adcünuelchi ruca huecuntu patio püle. Ti apostol Juan feipi ti fütra troquiñche ‘huitralerquei engün itrotripa Chau Ngünechen ñi ülmen huancu meu. Antü ca pun meu serfiquefingün ta Chau Ngünechen tañi ruca mu’ (Apoc. 7:9, 13-15). Mañumquefiyiñ ta Chau Jehová taiñ elueteu ñi serfiafiel tañi ruca ñi adcünuel. w23.10 pag. 28 parr. 15, 16

Jehová adniequefi pu loncolelu taiñ nehuentucuaeteu (Is. 32:1, 2). Feimu cüme duamcülenolmi, nütramcafinge engün. Llounge tañi quellu, femngechi Jehová nehuentuaimu.Ti maneluhun Biblia mu cüpalu nehuentuqueiñmeu. Com pu cristiano maneluuqueingün ñi rumel mongeleal: quiñeque huenu meu, caquelu mapu meu (Rom. 4:3, 18, 19). Tüfachi maneluhun nehuentuaiñmeu ñi chaftuafiel fill huesaque dungu, ñi amuldungual Chau Dios ñi cümeque dungu ca ñi huechunentual elfal cüdau trahunche mu (1 Tes. 1:3). Peaiñ chumngechi tüfachi maneluhun yafültucufi ti apostol Pablo. Pablo feipi ñi hualloñmanieteu fill huesaque dungu. Quiñeque mu, ‘cüme quimlafui tañi chumal, inantucungei ca famnacümngei’, quiñeque mu, epe larpui (2 Cor. 4:8-10). Pablo, ¿cheu entui nehuen? Raquiduami tañi nieelchi maneluhun Pablo, ¿cheu entui nehuen? Raquiduami tañi nieelchi maneluhun (2 Cor. 4:16-18). Raquiduami ñi chumlerpual tañi mongen cüpalechi antü mu, rume falintufi tañi maneluhun ñi rumel müleal huenu mu. Pablo raquiduamtucuniefi tañi maneluhun, feimu “fill antü huengequetui” tañi piuque ca tañi raquiduam. w23.10 pag. 15, 16 parr. 14-17

Llellipulmi, ramtuhuaimi: “¿Puhui mai chi antü tañi eluaeteu Jehová chem tañi llellipufiel?”. Llellipufiliyiñ Jehová, müchai müten duamnieiñ ñi quellungeal piafuiñ, huelu Chau Jehová quelluaiñmu puuchi antü meu (1 Ped. 5:6, 7). Müchai müten huiñoldungungenole taiñ llellipun, Jehová elulayaeneu tañi llellipufiel piafuiñ. Huelu petu no ¿pipelai ta Chau Ngünechen? Quiñe hueche llellipui ñi tremoltuaeteu Chau Dios. Huelu amulei müten tañi cutrancülen. Jehová tremoltufile ti hueche, ¿chem rupayafui? Feichi hueche serfiquefi ta Chau Ngünechen quisu ñi cümelcaleal müten feipiafui ti Huecüfü (Job 1:9-11; 2:4). Cafei Jehová feipicünui ñi acual chi antü ñi tremoltuafiel com pu cutrancülelu (Is. 33:24; Apoc. 21:3, 4). Feimu petu acunole feichi antü, iñche tremoltuaeneu ta Chau Jehová pilayafuiñ. Feimu, ¿chem pediafui ti hueche? Llellipuafui Jehová ñi eluaeteu nehuen ca tüngün, femngechi ñi aguantayal ca ñi serfinieafiel ta Chau Jehová. w23.11 pag. 23 parr. 13

Sansón huelulcaufulu rume, fentecünulai ñi serfinieafiel Jehová. Sansón quintui chumngechi ñi quehuayafiel pu Filistea che, femngechi ñi huechurpual tañi huercüeteu ta Jehová (Juec. 16:28-30). Sansón llellipufi ta Jehová: “Eluen nehuen ñi huiñoleltuafiel pu Filistea che chem tañi femeteu”. Jehová allcütufi ta Sansón, fei huiñoleltufi tañi nehuen. Feichi mu Sansón doi alün Filistea che langümürpufi. Sansón tañi huesa femün mu huesaque dungu rupafui. Femfulu rume, amulei ñi serfiniefiel Jehová. Iñchiñ Sansón reque, ca fentecünulayaiñ taiñ serfinieafiel Jehová huesa femfuliyiñ rume, norümtungeliyiñ cam niehuenoliyiñ taiñ cüdau Jehová ñi trahunche mu. Loncontucuaiñ: Jehová eluucülei taiñ perdonayaeteu (Sal. 103:8, 9). Huelulcauliyiñ rume, Jehová quelluaiñmu taiñ femürpual quisu tañi ayüqueel, chumngechi tañi femfiel ta Sansón. w23.09 pag. 6 parr. 15, 16

Pablo feipi taiñ nehuentulen mu, “ayühuelquefiyiñ ta Chau Dios”. Iñchiñ feipilayafuiñ Jehová ñi ayüuquen taiñ rupan huesaque dungu mu, doi mai Jehová ayüuquei taiñ nehuentulen mu. Rume cümei taiñ ayühuelafiel Jehová taiñ femün mu (Sal. 5:12). Raquiduamafiyiñ ta Abrahán. Abrahán rupafulu rume huesaque dungu mu, nehuencünuhui, feimu ayühuelmafi Jehová tañi piuque. Feimu Jehová tañi hueni troquieyu ca nor che pieyu (Gén. 15:6; Rom. 4:13, 22). Iñchiñ cai, ¿chumngechi ayühuelafuiñ ta Jehová? ¿Taiñ nien fentren cüdau trahunche mu? Femlai. Doi mai, püntütripalayaiñ Jehová mu rupan mu huesaque dungu, femngechi ayühuelafiyiñ ta Jehová. Com iñchiñ nehuentuleafuiñ taiñ serfinieafiel Jehová. Tunten tripantu nieliyiñ rume, chem rupaliyiñ rume, ca tunte pepiluuliyiñ rume, com iñchiñ ayühuelafuiñ ta Jehová. Eimi rupamequeimi chi huesaque dungu fachantü, fei acordanienge: tami nehuentulen mu ayühuelquefimi ta Jehová. Quimnielu am ta iñchiñ Jehová ñi ayüucülen iñchiñ mu, feimu doi maneluhuaiñ taiñ cümelcayaeteu. w23.12 pag. 11 parr. 13, 14

Pu quimque peñi mülei ñi cüme allcütual ca entendeafiel ñi chumlen ta caquelu (Prov. 20:5). Ngüneduamülmi caquelu che chumngechi ñi dunguquen, tañi ange, ca chumngechi nengümuuquei, quimafuimi ñi chumlen feichi che. Feimu mülei tami inafül nütramcayafiel ti che, peñmayafiel tañi ange. Huelu re telefono müten nütramcafilmi pu che, cüdautuafuimi tami nütramcacheal. Feimu eluunge tami nütramcayafiel pu che, telefono mu cam mensaje mu müten no (2 Juan 12). Cüdahuaimi tami mongeluhuam. Quiñe quim cristiano ca mülei ñi cüdahual tañi mongeluhuam quisu ca tañi pu familia (1 Tim. 5:8). Pu hueche enseñalngeafui chumngechi ñi nieal quiñe cüdau tañi mongeluhuam (Hech. 18:2, 3; 20:34; Efes. 4:28). Com nehuen mu cüdahuaimi ca deumayaimi com tami cüdau, femngechi pengelaimi tami cüme cüdaufengen, cüdautulayaimi tami peal quiñe cüdau ca ñamümlayafimi. w23.12 pag. 27 parr. 12, 13

Quiñeque mu Biblia nütramcai Jehová tañi antü mu, ¿chem pi tüfa? Jehová tañi apümcaquefiel tañi pu caiñe ca tañi montulquefiel tañi pu che. Cuifi mu, Jehová castigaquefi quiñeque troquiñche tañi caiñetueteu (Is. 13:1, 6; Ezeq. 13:5; Sof. 1:8). Pichilehuechi antü mu, Jehová tañi antü conai lefcontungele ti Fütra Babilonia, fei afai Armagedón hueichan mu. Taiñ mongetripayal feichi antü mu, mülei taiñ pepicaucüleal fachantü. Doi mai Jesús feipi taiñ ‘rumel pepicaucüleal’ petu ñi acunon ti fütra cutrancahun (Luc. 12:40; Mat. 24:21). Ti apostol Pablo hunen carta ñi huirintuculelfiel pu Tesalónica che, adentucünulelfi fentren quimeltun, femngechi ñi pepicaucüleal engün petu tañi acunon Jehová tañi antü. Pablo quimniefui ñi acunoal Jehová ñi antü feichi antü mu (2 Tes. 2:1-3). Huelu feipifi engün ñi pepicaucüleal, femngechi ñi llihuatuleal reque. Iñchiñ ca femngechi mülei taiñ pepicaucüleal. w23.06 pag. 8 parr. 1, 2

Tokio huaria Japón mapu mu deumangei quiñe edificio alüpüralu 1978 tripantu mu. Fentren che pefiel mu ñi fente alüpüralen tüfachi edificio, ¿aguantapeafui mai cüparumele quiñe fütra nüyün? ramtuuquefuingün. Huelu feitachi edificio turpu tranapuulai, ¿chumngelu? Feitachi edificio am cüme deumangelu tunte nengümcaufule rume, tranapuulayafui. Iñchiñ taiñ cristianongen feitachi edificio reque feleiñ. ¿Chumngelu feipiqueiñ? Feitachi edificio reque, iñchiñ nehuencüleiñ taiñ inayafiel Jehová ñi huercün dungu. Eluhuaiñ taiñ femal Chau Dios tañi feipiel ca turpu famentulayafiyiñ. Huelu quiñeque mu duamfalngele, mülei taiñ ngünefalngeal (Sant. 3:17). Feimu nehuencüleaiñ taiñ inayal Jehová ñi feipin ca ngünefalngeaiñ. Femngechi falintuafiyiñ Jehová ñi feipin ca dicümtuculayafiyiñ caquelu pu che ñi raquiduamal iñchiñ reque. w23.07 pag. 14 parr. 1, 2

Huecüfü eluhui ñi ngünencayafiel Jesús tañi culpayal, ca feipifi ñi famtripayal Jehová mu. Huelu Jesús famentueyu (Mat. 4:1-11). Huecüfü ayüfui Jesús ñi culpayal, femngechi taiñ montulnoaeteu. ¿Ca chem huesaque dungu mu rupai ta Jesús? Tañi pu caiñe inacaeyu ca ayüfuingün tañi langümafiel (Luc. 4:28, 29; 13:31). Ca inaduamquefui chumngechi ñi huelulcauquen tañi pu discipulo (Mar. 9:33, 34). Feichi antü juiciantucungelu ta Jesús, tañi pu caiñe hulelcaeyu ca ayentueyu engün. Fei langümngei chumngechi ñi langümfiel pu huesaque che ca rume cutrancahui (Heb. 12:1-3). Ca epe puulu ñi layal ta Jesús, quisu tañi duam mu aguantai, tañi Chau incalaeyu (Mat. 27:46). Jesús rume sufrifui taiñ montulaeteu. Raquiduamliyiñ com ñi cutrancahun Jesús iñchiñ mu, doi piuqueyerpuquefiyiñ. w24.01 pag. 10, 11 parr. 7-9

Nieliyiñ paciencia, cüme yeucüleaiñ caquelu che iñchiñ. Ñochi duamngeliyiñ, cüme allcütuafiyiñ ñi feipin caquelu pu che (Sant. 1:19). Ca femngechi cümelcaucüleaiñ caquelu che iñchiñ. Cafei cüdaungechi dungu mu rupaliyiñ huelu ñochi duamngeliyiñ, chumlayaiñ rume ca chem pilayaiñ rume taiñ huesa duamelafiel caquelu pu che. Ca huesa duameleliyiñmu quiñeque che, illcufemlayaiñ. Taiñ huesa femeteu ca femngechi femlayafiyiñ, doi mai ‘illcutumequeulayaiñ ca hueluquentu perdonahuaiñ com piuque mu’ (Col. 3:12, 13). Nieliyiñ paciencia, cüme raquiduamaiñ taiñ femal. Petu taiñ femnon quiñe dungu aporiaulayaiñ, huelu mai cüme raquiduamaiñ taiñ chumal. Por ejemplo, nieliyiñ paciencia, cüme dulliaiñ chem cüdau taiñ llohual. Ofrecelngeliyiñ quiñe cüdau, lloufemlayafiyiñ. Hune raquiduamaiñ cheu mülei ti cüdau ca tunten hora taiñ cüdahual. Ca ramtuhuafuiñ: “¿Llouli tüfachi cüdau catrütupeafeneu mai tañi müleal tañi familia iñchiñ ca tañi hueniyeafiel Jehová?”. Feimu taiñ cüme femal mülei taiñ ñochi duamngeal. w23.08 pag. 22 parr. 8, 9

Quiñeque mu huesa duamafuimi chi chaftumequefilmi huesaque raquiduam. Acordalmi tami feipicünufiel ta Jehová, femngechi doi nehuencünuhuaimi tami femnoal huesaque dungu. Iñchiñ hultuculu taiñ mongen ta Chau Jehová mu, quisutu illamuhuaiñ. ¿Chumngechi femqueiñ? Ayüfalngefule rume, famentuquefiyiñ Jehová ñi üdequeel (Mat. 16:24). Feimu ngüchaltucungeliyiñ taiñ huesa femal cam rupaliyiñ huesaque dungu mu, cüme quimnieiñ taiñ chumal: püntütripalayaiñ Jehová mu. Eluucüleiñ taiñ ayühuelafiel ta Jehová. Inayentuafiyiñ ta Job. Rupafulu rume huesaque dungu, feipi: “¡Lali rume, elcünulayan ñi nor piuquengen!” (Job 27:5). w24.03 pag. 9 parr. 6, 7

Chem ñi rupan taiñ pu peñi ca lamngen pengeli Chau Ngünechen ñi piuqueyechequen (2 Cor. 13:11). Quisu caque quiñeque iñchiñ duamtuqueiñmu. Cüme quimnieiñ ‘Jehová nor piuqueyen mu cuñiutucuqueiñmu’ (Sal. 32:10). Doi raquiduamliyiñ chumngechi taiñ piuqueyenieteu Jehová, inaduamaiñ chumte taiñ cuñiutucuqueteu, femngechi doi fülconaiñ quisu mu. Nülacünulelafiyiñ taiñ piuque llellipun mu. Pengelelen tami piuqueyeniefiel, quelluen piafiyiñ. Nütramcalelafiyiñ com taiñ raquiduamcülen, maneluhuafuiñ taiñ allcütuqueteu ca taiñ quelluaeteu (Sal. 145:19). Chumngechi ti cütral eñumalqueiñmeu hutre mu, ca femngechi Jehová tañi piuqueyen yafültucueiñmu rupan mu huesaque dungu. Feimu ayüqueiñ taiñ fülmanieafiel ta Jehová. Tañi piuqueyechen yafültucuqueiñmu ca tüngduamelqueiñmu. Ayühuelqueiñmu fente taiñ piuqueyenieteu mu, feimu iñchiñ ca feipiafiyiñ: “Piuqueyeniefiñ ta Jehová” (Sal. 116:1). w24.01 pag. 31 parr. 19, 20

Pu judio quimquefuingün Chau Dios ñi üi. Feimu Jesús enseñalafi müten tañi inei pingen ta Jehová, doi mai ca quimelelfi tañi chumngen (Juan 1:17, 18). Tati Hebreo Huirintucun feipi Chau Jehová cutranpiuqueyechequei ca cuñillchequei (Éx. 34:5-7). Jesús entui quiñe nütram ñi cüme quimfalcünual Jehová ñi cutranpiuqueyechequen ca ñi cuñillchequen. Feipi quiñe fotüm ñamquiyauquefulu huiñotui tañi chau ñi ruca mu. Ti chau pefilu ñi cüpalen alü camapu trafmefi, pancofi ca perdonafi (Luc. 15:11-32). Femngechi Jesús quimeltufi caquelu che ñi chumngen ta Jehová. w24.02 pag. 10 parr. 8, 9

Chau Jehová tüngduamelquefi ca yafültucufi pu cutrancaucülelu ñi piuque. ¿Chem quelluaiñmu taiñ cutranpiuqueyecheal ca yafültucucheal chumngechi femquei Jehová? Mülei taiñ duamtucheal, piuqueyehual chumngechi piuqueyeuquei pu familia ca cüme piuquengeal, femngechi amuleai taiñ piuqueyeuquen ca yafültucuuquen fill antü (Col. 3:12; 1 Tes. 4:18; 1 Ped. 3:8). Femngechi chengeliyiñ ca cutranpiuqueyecheliyiñ, yafültucuafiyiñ pu cutrancaucülelu. Jesús feipi: “Chem ñi mülen ta piuque mu, hun meu tripaquei. Tati cüme huentru cümeque dungu nielu ñi piuque, cüme entuquei ñi dungun” (Mat. 12:34, 35). Felei llemai, piuqueyefiliyiñ taiñ pu peñi ca pu lamngen, yafültucuafiyiñ engün. w23.11 pag. 10 parr. 10, 11

Taiñ cüme adümafiel fillque profecia Biblia, duamfali taiñ quellungeal. Raquiduamnge tüfa mu. Amuimi quiñe huaria tami quimnofel, huelu compañnieimu quiñe hueni cüme quimfilu ti huaria. Tami hueni cüme quimniefi ti rüpü ca cheu tamu miyahun. Müna cümei tami compañnieteu tami hueni. Ca femngechi, Jehová cüme quimniei chem rupamequei taiñ antü meu ca chem rupayai cüpalechi antü mu. Feimu taiñ cüme adümafiel Biblia ñi feipicünuel, ñom piuque mu ngillatuafiyiñ Jehová taiñ quelluaeteu (Dan. 2:28; 2 Ped. 1:19, 20). Quiñe cüme chau reque, Jehová ayüquei tati pu che ñi cüme feleal (Jer. 29:11). Jehová müten feipiafeiñmu chem dungu ñi rupayal cüpalechi antü mu. Feimu huirintucui profecia taiñ quimtucunieal chem falinque dungu ñi rupayal (Is. 46:10). w23.08 pag. 8 parr. 3, 4