Pu füchalelu, rume falin-ngeimün trahunche mu

Feula müte nehuen-ngelaimi chi tami femal com tami femquefel huechengelu eimi. Fentren tripantu serfiniefulmi Jehová, huelu feula com femhuelaimi tami femquefel cuifi, tüfa huesa duamelafeimu. Femngechi rupalmi, ¿chem quelluaimu?

¿CHEM AYÜQUEI JEHOVÁ TAMI FEMAL?

Ramtuunge: “¿Chem ayüquei Jehová iñche ñi femal?”. Raquiduamnge ñi feipin Deuteronomio 6:5, feipi: “Piuqueyefinge tami Chau Dios Jehová com tami piuque, com tami mongen ca com tami nehuen mu”.

Tüfachi versiculo pengeli Jehová ayüquei taiñ eluafiel com taiñ pepi femel. Tami quimün mu tüfa, quelluafeimu tami trürümuunoal caquelu mu. Ca trürümlayafimi tami femquefel cuifi tami femhuequenoel fachantü.

Raquiduamnge tüfa mu: tami huechengen mu, com tami nehuen mu cüdahuelfimi Jehová. Feula tami mongen caletui, huelu amulei tami elufiel Jehová com tami pepi femel. Ngüneduamülmi tüfa, quimtucuaimi: cuifi ca fantepu mu cüdahuelfimi Jehová com tami piuque mu. Felei llemai, fentecünulaimi tami eluquefiel Jehová tati doi cümelu.

EIMI QUELLUAFUIMI TA CAQUELU

Ngüneduamlayaimi tami pepi femhuenon, doi mai raquiduamaimi chumngechi quelluafuimi caquelu. Feula tami doi füchalen mu, femafuimi quiñeque dungu tami pepi femquenofel cuifi. Tüfa femafuimi:

Nütramcayafimi tami quimürpuel caquelu che. Ngüneduamafimi ñi feipin quiñeque huentru Biblia mu:

Ti lonco ülmen David feipi: “Cuifi huechengequefun, fei feula füchalehuen, huelu turpu pequelafiñ ñi quisucünungen ti norngelu, ca tañi pu yall ñi mongetuyauquen cofque” (Sal. 37:25).

Josué feipi: “Allcütumuchi, feula epe lalen iñche, huelu eimün com tamün piuque ca com tamün mongen meu quimnieimün tüfachi dungu: com tati cümeque dungu tamün feipicünueteu tamün Chau Jehová, com huechutripai. Com femtripai eimün tamün duam mu. Quiñe no rume femtripalai pilayafuiñ” (Jos. 23:14).

David ca Josué nütramcaquefuingu tañi peel engu ca tañi rupan fentren tripantu mu ñi serfiniefiel Jehová. Feimu ñi feipin engu tüfachi epu versiculo mu manelfali ca rume quellupelafi caquelu che. Eimi ca femngechi nütramcayafuimi tami quimürpuel serfiniefiel mu Jehová, fei rume quelluafuimi caquelu che.

Nütramcayafuimi chumngechi tami quelluqueteu Jehová eimi ca ñi quelluquefiel caquelu. ¿Acordaimi chi quiñe rupa Jehová ñi quellufiel tañi pu che? Eluunge tami nütramcayafiel caquelu, tüfa yafültucuafeyu tati pu allcütulu. Nütramcafilmi tami rupan cümeque dungu tami serfiquefiel mu Jehová, rume yafültucuafuimi tami pu peñi ca pu lamngen (Rom. 1:11, 12).

¿Ca chumngechi yafültucuafuimi caquelu? Amun mu Trahunhue Ruca mu. Trahun mu hueluconque yafültucuuqueiñ, feimu pepi amulmi Trahunhue Ruca mu cümeafui tami femal. Lamngen Connie taiñ nütramcapeel feipi: “Iñche amun mu trahun mu, doi cüme duamcülequen. Piuqueyenquechi lloungequen, ¿ayüucülenoafulu am iñche? Yelelquefiñ pichique regalo pu lamngen tañi pengelelafiel tañi piuqueyefiel. Ca eluuquen tañi coneltuleal tañi trahunche mu”.

JEHOVÁ FALINTUQUEFI TAMI SERFINIEFIEL

Biblia mu mülei fentrenque che pepi femhuelafui tañi femquefel huechengelu, huelu Jehová piuqueyenieyu. Quiñe tüfa ta Simeón, quiñe fücha Israel chengefui, quisu petu mongelefui choyüngelu Jesús. Simeón amuquefui Chau Jehová ñi ruca meu, üye mu ¿adquintupelafi huechequeche femquelu falinque cüdau? Feimu Simeón tañi füchalen mu raquiduami chi tañi müte falihuenon Jehová ñi adquiñ meu. Huelu Jehová femngechi raquiduamlai. Jehová quimniefui Simeón tañi nor chengen ca tañi yamnieteu. Cafei eluñmafi ñi quimafiel Jesús pichichengelu. Ca adniefi ñi feipicünual Jesús ñi Mesías ngerpual (Luc. 2:25-35). Felei llemai, Jehová raquiduamlai tañi füchalen mu Simeón, doi mai ngüneduamfi tañi nehuentu feyentulen ca ñi nien Chau Dios ñi nehuen.

Eimi pepi femquelaimi chi com tañi ayünieel ñi serfiafiel Jehová, huelu maneluunge Jehová falintufi com tami pepi femquen. Jehová “ayüquei ti che ñi hulal chem tañi nieel, feipiquelafi ñi hulal chem tañi nienon” (2 Cor. 8:12).

Feimu raquiduamnge chem tami femafel. Pichiñmafule rume, ¿chumngechi amuldunguafuimi? Ca mütrümafuimi telefono mu pu peñi, pu lamngen ñi yafültucuafiel cam huirintuculelafuimi quiñe mensaje. Pichique dungu mu rume, yafültucungeafui pu peñi, pu lamngen. Doi yafültucuafuimi eimi tami fentren tripantu serfiniefiel mu Jehová.

Pepi femlaimi chi quiñeque dungu tami füchalen mu, huelu petu cüdaucüleimi Jehová mu. Femngechi femi quiñe lamngen África mu, peafimi ti huichulechi dungu “Quiñe lamngen quellufi quiñe domo ñi langümuunoal”.

Acordange tami alüñma serfifiel Jehová ca tami serfiniefiel, yafültucuafui ta caquelu. Inayentufalimi tami nehuentulen mu. Feimu maneluunge ñi feipin Hebreos 6:10: “Chau Ngünechen norngei, fei ngoimaquelai tamün femquen ca tamün piuqueyefiel tañi üi. Femngechi pengelimün tamün serfituniefiel fantepu mu tamün chaf feyentulelu”.

AMULEPE TAMI QUELLUAFIEL CAQUELU

Pu cientifico feipiquei pu füchaqueche quelluquefilu caquelu che doi tremolequei, tañi raquiduam doi cüme amulequei ca doi alün mongen nieingün.

Felei, taiñ quellufiel caquelu cümelcaqueiñmu, huelu tüfa catrütulayai com taiñ huesa rupan füchalen mu. Chau Dios ngünenietule mapu, feichi mu müten culpafengehuelayaiñ, feimu ngehuelayai huesaque dungu taiñ füchan mu ca lahuelayai che (Rom. 5:12).

Huelu petu ñi acunon feichi antü, serfinieafimi Jehová ca quelluafimi caquelu tañi quimafiel Jehová, femngechi doi nehuentuleai tami maneluhun ca doi tremoleafuimi cütu. Pu peñi, pu lamngen füchalelu, loncontucunieaimün: Jehová falintueimünmeu tamün serfiniefiel, tati trahunche mai falintuquefi tamün feyentulen.