¿Chumngechi ayühulafimu Jehová tamu mafün meu?

1, 2. ¿Chem ayüniei Jehová tati pu novio meu?

¿NIEPEIMI mai novio cam novia? Ca, ¿feipicünuupeimu mai tamu niehual? Femngele, ¿rume ayüucülepelaimi? ¿Niepelaimi fentren duam tami pepicamequefiel tami mafün? Jehová ayüquei tamu ayüucüleal feichi antü tamu niehual,a ca tamu ayüucüleal com tamu mongen mu (Prov. 5:18; Cant. 3:11).

² Rume falin-ngei tami mafün ñi ayühulafiel Jehová. Tüfachi troquiñ mu ngüneduamaiñ chemu fente falin-ngei ca chumngechi femafuiñ. Tüfachi ngülam rume quelluafui pu novio, huelu ca quelluafui pu amualu ti mafün meu cam ngülamtuafen pieliyiñmu pu niehualu.

¿CHUMNGELU AYÜHULAFIMI JEHOVÁ TAMI MAFÜN MEU?

3. Tati pu niehualu, ¿chem mülei ñi ngüneduamal ca chemu?

³ Tati pu novio petu ñi pepicanon tañi mafün, mülei ñi ngüneduamal Jehová ñi ngülam mülelu Biblia mu. ¿Chemu? Jehová deumafilu am tati curehuen. Elcünui ti hunen huentru ca ti hunen domo tañi niehual engu (Gén. 1:28; 2:24). Feimu tati pu niehualu mülei ñi ngüneduamal Jehová tañi feipin ñi ayühulafiel engün.

4. Tati pu niehualu, ¿ca chemu ayühulafui Jehová tañi mafün meu?

⁴ Pu niehualu eluuquei ñi ayühulafiel Jehová tañi chauyefiel mu ca tañi hueniyefiel mu (Heb. 12:9). Ayünieingün tañi cüme hueniyenieafiel Jehová, feimu ngüneduamqueingün tañi huesa duamelnoafiel chem dungu meu no rume (Sal. 25:14). Feimu eimün pu niehualu, raquiduamfiel mu fente tamu cümelcaqueteu Jehová, ¿eluucülepelaimu tamu ayühulafiel tamu mafün meu? (Sal. 116:12).

¿CHUMNGECHI AYÜHULAFIMU JEHOVÁ?

5. Biblia, ¿chumngechi quelluafui pu niehualu?

⁵ Biblia meu huiriconcülelai chumngechi ñi adcünungeal mafün, feimu tati pu niehualu caquerumeafui chumngechi ñi adcünual tañi mafün. Huelu cheu rume mülele engün, pu cristiano niehualu inaquefi pu gobierno ñi ley coneltulelu tati curehuen mu (Mat. 22:21). Tati pu niehualu inafile Biblia tañi ngülam, ayühulafingün Jehová. Ngüneduamaiñ quiñeque feitachi ngülam.

6. ¿Chemu fente falin-ngei tati pu niehualu ñi inayafiel tati ley?

⁶ Inayafimün tati ley dungu (Rom. 13:1, 2). Fentren troquiñ mapu mu tati gobierno niei ley dungu ñi inayafiel tati pu niehualu. Feimu tati pu niehualu mülei tañi ngüneduamal feitachi ley. Duamfalngele, feipiafimün pu loncolelu tamün quelluaeteu.b

7. ¿Chumafui pu niehualu ñi cüme tripayal tañi mafühun?

⁷ Cüme adcünungepe ti mafühun (1 Cor. 10:31, 32). Tamün mafühun mu quimfalngepe tamün adnieteu Jehová tañi nehuen ca tamün trürnon pu poyequenofilu Jehová (Gál. 5:19-26). Tati novio am loncolerpualu tañi novia mu, adcünuai tañi com cüme tripayal tati mafühun mu. Tañi femngechi femal, allcütungeafui quiñe hueupin Biblia mu tripalu. Tati hueupife piuqueyenquechi ca yamquechi hueupiai. Tati pu allcütulelu inaduamaingün tati curehuen quiñe regalo reque felei Jehová mu, ca tañi rume falin-ngen feichi antü tañi niehun epu che. Feimu fentren novio ayüquei ñi allcütual ti hueupin Trahunhue Ruca mu. Eimi ca femngechi raquiduamcülelmi, pürüm huirintuculelafimi quiñe carta tati pu loncolelu.

8. Tati pu novio niele quiñe fiesta engün, ¿chumafui tañi ayühulafiel Jehová? (Romanos 13:13).

⁸ (Papeltunge Romanos 13:13). Pu niehualu niele fiesta, ¿chumafuingün tañi trürnoal tañi fiesta tati pu poyequenofilu Jehová? Romanos feipi ñi famentungeal “pofolcalechi fiesta”. Griego quehun mu, feipi feitachi fiesta mu mülequei ngollicahun ca epe hunmaqueingün tañi allcütufiel musica (ca peafimi ti nota de estudio “fiestas descontroladas” mülelu Romanos 13:13 mu). Ti niehualu feipifule tañi müleal pulcu, adcünuafuingu inei no rume tañi fente putunoal.c Mülele musica, cuñiutucuhuaingün tañi müte nehuentulenoal tati pu che ñi cüme nütramcayal. Ca cüme ngüneduamaingün chem musica ñi allcütungeal ca ñi chem pin tati letra, femngechi inei no rume tañi huesa duamnoal.

9. Tati pu niehualu pepicamequele ñi mafühun, ¿chem mülei tañi raquiduamal?

⁹ Quiñeque mafühun mu tañi pu hueni ca tañi pu familia feipiquefi quiñeque dungu ñi saquiafiel tati pu noviohuen. Ca pengelngequei video ca adentun, ca femngequei caquelu dungu tañi cüme rupaleal engün. Femngechi femle engün, doi ayühun-ngeafui ti mafühun. Huelu chem dungu rume femfule engün, mülei ñi cüme duamelafiel caquelu che (Filip. 4:8). Petu pepicamequelmu ti mafühun, ramtuhuafuimu: “¿Chum duamelpeafi mai pu amualu? ¿Yamniengepeai mai Jehová ñi elcünuel ñi niehual pu che? ¿Tañi mafühun ayühulpeafi mai Jehová?”. Cümeafui tañi müleal ayecan dungu, huelu inei no rume ngelai ñi entual huesaque ayecan (Efes. 5:3). Tami hueni cam tami familia feipiale quiñe dungu tami mafühun meu, quimfalcünuafimi chem tañi feipinoal.

10. Pu novio, ¿chemu mülei ñi ñom piuquengeal tañi pepicayal tañi mafühun? (1 Juan 2:15-17).

¹⁰ Quintulayaimün tamün afmatungeal (papeltunge 1 Juan 2:15-17). Jehová tañi pu che eluuquelai tañi afmatungeal, doi mai eluuquei ñi püramyeafiel Jehová. Feimu tati niehualu mallmauquelai ca pünequelai rume fentren plata tañi mafün meu. Peñi Mike mülelu Noruega mapu mu, feipi: “Conlayu defen dungu mu, fei amulei tayu precursorngen. Tayu mafün afmatufal-lafui, huelu müna cüme tripai. Piuquentucufiyu feichi antü”. Lamngen Tabita ca feipi: “Raquiduamquelayu ñi afmatufalngeal tayu mafün. Feimu doi pichin dungu mülefui tayu dullial, feimu epu rume raquiduam nielayu. Ca doi tüngcülefuyu”.

11. ¿Ca chem mülei ñi ngüneduamal pu niehualu? (Ca inaduamnge ti adentun).

¹¹ ¿Ayüpelaimu tamu cüme adcüleal tamu mafün meu? Biblia pengeli cuifi mu ca femquefui pu novio (Is. 61:10). Felei, tami tucutuhual feichi antü, trürlayafui chi chumngechi tami tucutuuquen fill antü. Huelu quimfalngepe tami mallmangenon ca tami nien cüme raquiduam (1 Tim. 2:9). Tamu tucutuhual ca chum adcüleal hunentuculayafimu tamu mafün mu, doi mai tamu ayühulafiel Jehová (1 Ped. 3:3, 4).

12. Pu novio, ¿chumngelu mülei ñi famentuafiel huimtun nüucülenolu Biblia mu?

¹² Famentuafimün com ti huimtun nüucülenolu Biblia mu (Apoc. 18:4). Tati pu che poyequenofilu Jehová femquei quiñeque huimtun tañi mafün mu nüucülelu coilaque religion ca pu huesaque püllü, ca femquei quiñeque dungu ñi nieal suerte engün. Huelu com tüfachi ünufalchi dungu Jehová ngüfetuqueiñmu taiñ famentuafiel (2 Cor. 6:14-17). ¿Mülepei mai quiñe huimtun tami lof meu? Cüme ngüneduamnge chem tuhun niei ca quintuafuimi Biblia ñi ngülam petu tami femal cam femnoal tami mafün meu.

13. Pu novio, ¿chumngechi inayentufingu Jehová elungen mu regalo?

¹³ Tami lof mu, ¿huimtulepelai che ñi yelelafiel regalo pu novio? Trürlayafui ti regalo ñi hulün tati doi nielu plata ca tati doi pichin plata nielu. Biblia feipi taiñ ayüucüleal hul-liyiñ taiñ nieel (Prov. 11:25; Hech. 20:35). Huelu tati pu novio raquiduamel-layafi pu invitado ñi dicümtucufiel ñi hulal regalo engün, ca huesa duamel-layafi doi pichi falifule ti regalo. Pu novio inayentufilu Jehová doi falintuafingu chem rume tañi elungeel piuqueyen mu (2 Cor. 9:7).

¿CHUMNGECHI PEPICAUCÜLEAFUIMU?

14. ¿Chem cüdaungechi dungu rupaquei quiñeque noviohuen?

¹⁴ Pepicangeal quiñe mafün ñi ayühulafiel Jehová cüdaungeafui. Peñi Charlie mülelu Islas Salomón mu, feipi: “Rume cüdautuyu tayu dullial inei tañi amual tayu mafün meu. Niefuyu fentren hueni ca cheu tayu mülen tati pu che üngümcülequei tañi invitangeal”. Taiñ lamngen Tabita ca feipi: “Tañi lof meu mülequei fütraque mafün, feimu tayu pu chau pilafui iñchiu tayu mangelafiel doi pichin che”. Sara mülelu India mu ca feipi: “Rume ngüneduamngequei chumten plata ñi nien pu che. Tañi pu primo femingün fütraque mafün. Feimu ngüchaltucungequefun tañi mafün tañi doi afmatufalngeal”. Eimi ca femngechi rupalmi, ¿chem quelluafeimu? Peafiyiñ.

15. Pu niehualu petu pepicale ti mafün, ¿chemu falin-ngei tañi llellipual?

¹⁵ Llellipunieafimu Jehová tamu pepicayal ti mafün. Feipiafimu ta Jehová tamu raquiduamelnieteu ca chem rume coneltulelu ti mafühun mu (Filip. 4:6, 7 ca ti nota de estudio “en cualquier situación”). Ca quelluen piafuimu Jehová tamu cüme dullial ca tamu tüngcüleal fill raquiduamcülelmu. Ca llellipuafimu tamu nehuencünuhual caquelu ayünole chumngechi tamu dulliel (1 Ped. 5:7). Pefilmu tamu huiñoldungueteu, doi amuleai tamu maneluucülen Jehová mu. Tabita feipi: “Iñche ca tañi novio ayülayu tayu notucadungual iñchiu ca tayu pu familia iñchiñ. Feimu petu tayu nütramcanon chem femal tayu mafün mu, hune llellipuquefuyu. Ngüneduamiyiñ chumngechi Jehová quellueiñmu taiñ tüngcüleal”.

16, 17. Ñi pepicangeal quiñe mafün, ¿chumngelu falin-ngei ñi cüme nütramcayal?

¹⁶ Yamuhun mu nütramcayaimu (Prov. 15:22). Tati niehualu mülei ñi dullial fentren dungu: chumül tañi niehual, tunten plata tañi gastayal ca tunten che tañi amual. Petu tamu dullinon, trür cüme ngüneduamaimu chem dungu doi cümeafui ñi femngeal. Ca ngüneduamaimu Biblia ñi ngülam ca tamu ngülamtueteu quiñe adümuhun-ngechi cristiano. Piuqueyenquechi nütramcahuaimu chem tamu raquiduamcülen ca cüme allcütuhuaimu. Ca femngechi nütramcayafimu tamu pu che. Tamu pu chau ayüfule ñi femal quiñeque dungu tamu mafün meu, cümefule, eluñmayafuimu. Fei engün meu ca falin-ngei feichi antü. Pepi femnolmu tañi ayüel engün, piuqueyenquechi nütramcayafuimu chumngelu ñi femngenoal (Col. 4:6). Quimfalcünuafimu tamu pu che chem dungu doi falin-ngei tamu mafün mu: quiñe ayühun-ngechi antüngealu ca tañi ayühulafiel Jehová.

¹⁷ Tamu pu chau testigongenole, doi cüdaungeafui tamu feipiafiel chem tamu chumal mafün mu. Huelu doi cüme tripayai piuqueyenquechi nütramcafilmu. Quiñe peñi mülelu India mu feipi: “Tayu pu chau ayüfuingün tañi femal quiñeque huimtun coneltulelu hinduismo pingechi religion. Cüdautuyu ñi adümelafiel chemu taiñ femnoal feichi huimtun. Huelu caquelu dungu tañi ayüel engün chaftulafi Jehová tañi ayüqueel, feimu femngei müten. Cacünungetui ti iyael tayu dullifel tañi cüme duamelafiel engün. Cafei huimtulelafuingün tañi ülcantual ca failayal, feimu femlaiñ”.

18. ¿Chem quelluafi tati pu novio ñi cüme tripayal tañi mafün? (1 Corintios 14:40; ca inaduamnge ti adentun).

¹⁸ Com cüme adcünuaimu. Femngechi acule feichi antü, doi tüngcüleaimu (papeltunge 1 Corintios 14:40). Quiñe peñi Taiwán mu mülelu feipi: “Epe puulu ñi femngeal tayu mafün, trahuluhuiyiñ tati pu che eluulu taiñ quelluaeteu. Nütramcaiñ com taiñ femal feichi antü ca adümcantuiñ quiñeque dungu, femngechi ñi cüme amuleal ti mafün” pi. Cafei dullilmu quiñe hora, femtripape, femngechi pengelafimu tamu pu invitado tamu respetafiel.

19. Tamu mafün ñi cüme tripayal, ¿chem quelluafeimu?

¹⁹ Raquiduamülmu chem cüdaungechi dungu rupayafui tamu mafün mu, pepicaucüleaimu tamu famentuafiel (Prov. 22:3). Quiñeque lof meu, tati che amuquei quiñe mafün invitangenofule rume. Tami lof meu mülele femngechi huimtun, raquiduamafuimu chumafuimu tañi rupanoal femngechi dungu. Cafei invitafilmu quiñeque tami pu che testigongenolu, feipiafimi chumngechi ñi femngequen pu testigo ñi mafün ca chem huimtun taiñ femquenon. Pengelafuimi ti troquiñ mülelu taiñ pagina mu feipilu “¿Cómo son las bodas de los testigos de Jehová?”. Cafei ñi cüme tripayal ti fiesta, feipiafimi quiñe peñi tami manelfiel ñi adnieafiel ti mafün (Juan 2:8). Cüme feipiafimu feichi peñi chem tamu dullial, femngechi quelluaimu ñi cüme triparpual tamu mafün ca ñi ayühulafiel Jehová.

20. ¿Chem mülei ñi acordayal pu novio?

²⁰ Tañi pepicangeal quiñe mafün coneltulei alün dungu, feimu fill raquiduamcüleafuimu. Acordange, tati mafühun ayühun-ngei, huelu quiñe antü mu müten femngequei. Fei hula, eluhuaimu tamu quiñentrür serfiafiel Jehová, tüfa mai doi falin-ngei. Quintulayaimu tañi afmatufalchi mafün-ngeal, doi mai tañi ayühulafiel Jehová. Maneluhuaimu Jehová mu tamu pepicayal tamu mafün. Femngechi, acordafilmu feichi antü, ayühun mu feipiaimu: “Com cüme tripai Jehová tayu adnieteu mu” (Sal. 37:3, 4).