যিহোৱাই অসীম শক্তি প্ৰদান কৰে
১ এই সম্পৰ্কে আপুনি পাঁচনি পৌলৰ বিষয়ে কেনে ধাৰণা ৰাখে? যেতিয়া আমি বাইবেলৰ পৰা পাঁচনি কৰ্ম্মৰ কিতাপখন পঢ়ো, তাত আমি পৌলে যিহোৱাৰ সেৱাৰ প্ৰতি কঠোৰ পৰিশ্ৰম কৰা বিষয়ে জানিব পাৰোঁ। পৌলৰ তেনে কাৰ্য্যৰ প্ৰতি আমি গভীৰ মুল্যাঙ্কন দেখুৱাওঁ। পৌলে ঈশ্বৰৰ সেৱাত কৰা কাৰ্য্যবোৰক কেনেকৈ সম্পন্ন কৰিব পাৰিলে? এই বিষয়ে তেওঁ এইদৰে কৈছিল: “মোক শক্তি দিয়া জনাত থাকি, মই সকলো বিষয়ত বলৱান হৈছোঁ।” (ফিলি. ৪:১৩) আমিও যিহোৱাৰ অসীম শক্তিৰ পৰা লাভৱান হʼব পাৰোঁ। কিন্তু কেনেকৈ? যিহোৱাই আমাৰ বাবে প্ৰৱন্ধ কৰা ছয়টা ব্যৱস্থাক গ্ৰহণ কৰি আমি আধ্যাত্মিকৰূপে পুনৰ সজীৱ আৰু শক্তিশালী হʼব পাৰিম।
২ ঈশ্বৰৰ বাক্য: আমি জীয়াই থাকিবলৈ যেনেকৈ আহাৰ গ্ৰহণ কৰা প্ৰয়োজন, সেইদৰে আধ্যাত্মিকৰূপে জীৱিত থাকিবলৈ আমি ঈশ্বৰৰ বাক্যৰে নিজকে প্ৰতিপালন কৰা আৱশ্যক। (মথি ৪:৪) বাইবেলে আমাৰ আধ্যাত্মিক শৰীৰক জীৱিত ৰাখিবলৈ শক্তি প্ৰদান কৰে। সত্যৰ প্ৰতি উৎসাহ আৰু আগ্ৰহ বজাই ৰাখিবলৈ আমি নিয়মীয়াকৈ অৰ্থপূৰ্ণৰূপে ব্যক্তিগত অধ্যয়ন আৰু ধ্যান কৰা আৱশ্যক।—গীত. ১:২, ৩.
৩ প্ৰাৰ্থনা: যিহোৱাৰ কাষ চাপিবলৈ আৰু সমস্যাৰ সৈতে সফলতাৰে সন্মূখীন হʼবলৈ আমি প্ৰাৰ্থনা কৰা আৱশ্যক। যিসকলে শক্তি বিচাৰি প্ৰাৰ্থনা কৰে, যিহোৱাই তেওঁলোকক নিজৰ আত্মাৰ দ্বাৰাই অসীম শক্তি প্ৰদান কৰে। (লূক ১১:১৩; ইফি. ৩:১৬) সেইবাবে বাইবেলে আমাক “প্ৰাৰ্থনাত লাগি” থাকিবলৈ উৎসাহিত কৰিছে। (ৰোমী. ১২:১২) আপুনি একেৰাহে প্ৰাৰ্থনাত লাগি থাকেনে?
৪ মণ্ডলী: মণ্ডলীৰ সভাসমূহ আৰু তাত উপস্থিত হোৱা ভাই-ভনীসকলৰ আনন্দময় সঙ্গতিৰ দ্বাৰাও আমি শক্তিশালী আৰু উৎসাহিত হওঁ। (ইব্ৰী ১০:২৪, ২৫) যেতিয়া আমি কোনো বিপদৰ সন্মূখীন হওঁ, তেতিয়া আমাক উৎসাহিত কৰিবলৈ তেওঁলোকে প্ৰেমময় সাহাৰ্য্য আগবঢ়ায়।—হিতো. ১৭:১৭; উপ. ৪:১০.
৫ প্ৰচাৰ কাৰ্য্য: নিয়মীয়াকৈ কৰা প্ৰচাৰ কাৰ্য্যই আমাক ঈশ্বৰৰ ৰাজ্য আৰু তাৰ পৰা পোৱা আশীৰ্ব্বাদসমূহত আমাৰ ধ্যান কেন্দ্ৰিত কৰিবলৈ সহায় আগবঢ়ায়। যেতিয়া আমি আনক যিহোৱাৰ বিষয়ে শিকাত সহায় কৰোঁ, তেতিয়া আমি অধিক উৎসাহিত হওঁ। (পাঁচ. ২০:৩৫) এইটো সঁচা যে আমি সকলোৱে আৱশ্যক হোৱা স্থানলৈ গৈ প্ৰচাৰ কাৰ্য্য বা পূৰ্ণ-সময় অগ্ৰগামী সেৱা কৰিব নোৱাৰে। কিন্তু তথাপিও আমি প্ৰচাৰত অৰ্থপূৰ্ণৰূপে ভাগ লৈ কাৰ্য্য কৰিব পাৰোঁ।—ইব্ৰী ৬:১০-১২.
৬ খ্ৰীষ্টান প্ৰাচীনসকল: প্ৰাচীনসকলে দিয়া উদগণি আৰু সহায়ৰ দ্বাৰা আমি লাভৱান হওঁ। কিয়নো যিহোৱাই তেওঁৰ জাকক চোৱা-চিতা কৰিবলৈ প্ৰাচীনসকলক নিযুক্ত কৰিছে। (১ পিত. ৫:২) প্ৰাচীন সময়ত যেনেকৈ পৌলে মণ্ডলীৰ লোকসকলক সহায় কৰিছিল, সেইদৰে বৰ্ত্তমান সময়ৰ পৰিব্ৰাজক অধ্যক্ষসকলেও (ট্ৰেভেলিং ওভাৰচিয়াৰসকলে) মণ্ডলীসমূহক উৎসাহিত কৰে।—ৰোমী. ১:১১, ১২.
৭ বিশ্বাসী লোকসকলৰ আৰ্হি: প্ৰাচীন আৰু আধুনিক সময়ৰ বিশ্বাসী সঙ্গী সেৱকসকলৰ উৎসাহজনক আৰ্হিয়ে আমাক আধ্যাত্মিকৰূপে শক্তিশালী কৰি তুলে। (ইব্ৰী ১২:১) যেতিয়া আপোনাক পুনৰ আধ্যাত্মিক শক্তিৰ আৱশ্যক হয়, সেইসময়ত আমাৰ আলোচনীবোৰত থকা উৎসাহজনক আত্মকথা, বাৰ্ষিক পুস্তকʼত দিয়া উন্নতিসাধক ৰিপৰ্ট বা প্ৰক্লেমাৰচ্ কিতাপত থকা আধুনিক সময়ৰ যিহোৱাৰ সাক্ষীসকলৰ উৎসাজনক বিৱৰণিসমূহ নপঢ়ে কিয়?
৮ ডেকা বয়সতে সত্যক গ্ৰহণ কৰা এজন প্ৰায় নব্বৈ বছৰীয়া ভাইৰ কিশোৰ অৱস্থাতে তেওঁৰ বিশ্বাস পৰীক্ষিত হৈছিল। সৰ্ব্বপ্ৰথমে তেওঁৰ মণ্ডলীত উৎসাহেৰে সহযোগিতা কৰা কিছুমানে যিহোৱাৰ সংগঠনক ত্যাগ দিয়ে। তাৰ পাছত তেওঁ ঘৰে-ঘৰে প্ৰচাৰ কৰিবলৈ কঠিনতা অনুভৱ কৰিব ধৰিলে। কিন্তু তেওঁ সকলো অৱস্থাতে যিহোৱাৰ ওপৰত ভৰসা ৰাখিছিল। সেইবাবে কম সময়ৰ ভিতৰতে প্ৰচাৰ কাৰ্য্যত আনন্দ লাভ কৰিব ধৰিলে। বৰ্তমান সময়তো তেওঁ ঈশ্বৰৰ সেৱাত লাগি আছেনে? অৱশ্যেই! শাৰীৰিকভাৱে অসুস্থ হোৱাৰ স্বত্ত্বেও তেওঁ যিহোৱাৰ সাক্ষীসকলৰ বিশ্বব্যাপী মুখ্য কাৰ্য্যালয়ত প্ৰাশাসন গোষ্ঠীৰ এজন সদস্য আৰু বেথেল পৰিয়ালৰ এজন সদস্যৰূপে কাৰ্য্য কৰি আছে। যিহোৱাৰ সংগঠনৰ সৈতে লাগি থকাৰ বাবে তেওঁ কেতিয়াও অনুতাপ কৰা নাই।
৯ ব্ৰিটেইনৰ বেথেলত থকা এগৰাকী ভনীয়ে যেতিয়া তাই বাপ্তিষ্মা লৈছিল সেই সময়ত তাই ১৩ বছৰ বয়সৰ আছিল। তাই নিজৰ ডাঙৰ ককায়েকৰ সৈতে অগ্ৰগামী কাৰ্য্য আৰম্ভ কৰে, তাৰ এবছৰৰ পাছত দ্বিতীয় বিশ্ব যুদ্ধৰ সময়ত নিৰপেক্ষতা বজাই ৰখাৰ বাবে তাইৰ দেউতাক জেইলত যাব লগা হৈছিল। আধ্যাত্মিকতাত শক্তিশালী হʼবলৈ তাই যিহোৱালৈ অপেক্ষা কৰি সত্য ঈশ্বৰৰ সেৱাত একেৰাহে লাগি থাকে। সময় অতিবাহিত হোৱাৰ লগে-লগে তাই এজন বিশ্বাসী ভাইৰ সৈতে বিবাহ হয় আৰু দুয়োৱে মিলি যিহোৱাৰ ইচ্ছাক পালন কৰে। কিন্তু তেওঁলোকৰ বিবাহৰ ৩৫ বছৰৰ পাছত এদিন হঠাতে তাইৰ স্বামীৰ মৃত্যু হয়। তেতিয়াও তাইক যিহোৱাই শক্তি দিয়ে আৰু এতিয়ালৈকে সেই ভনী গৰাকীয়ে ঈশ্বৰৰ সেৱা কৰি আছে আৰু যিহোৱাৰ পাৰ্থীৱ পৰিয়ালৰ এগৰাকী সদস্যৰূপে চিৰকালে কৰি থাকিব বিচাৰে।
১০ যিহোৱাই নিজৰ বিশ্বাসী দাসসকলক সহায় কৰে আৰু বল দিয়ে। “তেওঁ ক্লান্ত হোৱা লোকক শক্তি দান কৰে, আৰু বল নোহোৱা লোকক অধিক বল দান কৰে।” ওপৰত উল্লেখ কৰা এই ছটা ব্যৱস্থাক নিজৰ জীৱনত প্ৰয়োগ কৰি আমি যিহোৱাৰ অসীম শক্তি লাভ কৰিব পাৰোঁ। কিন্তু সদায় এটা কথা মনত ৰাখক: “যিবিলাকে যিহোৱালৈ অপেক্ষা কৰে, তেওঁবিলাকে নতুন নতুন বল পাব . . . তেওঁবিলাকে লৰ মাৰি শ্ৰান্ত নহব, তেওঁবিলাকে গমন কৰি ভাগৰ নাপাব।” (যিচ. ৪০:২৯-৩১) শক্তিৰ বাবে পৌলে যিহোৱালৈ সম্পূৰ্ণৰূপে ভৰসা কৰিছিল সেইদৰে আমিও কৰা আৱশ্যক।