পাঠ ৩৮
ঈশ্বৰে দিয়া জীৱনৰ প্ৰতি কৃতজ্ঞ হওক
ঈশ্বৰে আমাক এটা ভাল জীৱন দিছে। আমি জীৱনত যিয়েই সমস্যাৰ সন্মুখীন নহওঁ কিয়, আমি আনন্দিত হৈ থকাৰ বহুতো কাৰণ আছে। গতিকে, জীৱনৰ প্ৰতি আমি কেনেকৈ কৃতজ্ঞতা দেখুৱাব পাৰোঁ আৰু এইদৰে কৰাৰ মুখ্য কাৰণ কি? আহক চাওঁ।
১. আমি কিয় জীৱনৰ প্ৰতি কৃতজ্ঞতা দেখুৱা উচিত?
যিহোৱাই আমাক জীৱন দিছে, সেইবাবে আমি জীৱনৰ প্ৰতি কৃতজ্ঞ হোৱা উচিত। (গীতমালা ৩৬:৯) “তেৱেঁই সকলোকে জীৱন, নিশ্বাস, আৰু আটাই বস্তু দিয়ে।” (পাঁচনিৰ কৰ্ম্ম ১৭:২৫, ২৮) যিহোৱাই আমাক জীয়াই থাকিবলৈ প্ৰয়োজন হোৱা সকলো বস্তু দিছে। এই বস্তুবোৰৰপৰা আমি কেৱল জীয়াই থাকোঁ এনে নহয়, কিন্তু ইয়াৰপৰা আমি আনন্দও লাভ কৰোঁ।—পাঁচনিৰ কৰ্ম্ম ১৪:১৭ পঢ়ক।
২. আমি জীৱনৰ প্ৰতি কেনেকৈ কৃতজ্ঞতা দেখুৱাব পাৰোঁ?
যেতিয়া আপুনি মাৰ গৰ্ভত আছিল, তেতিয়াৰেপৰা যিহোৱাই আপোনাক জানে আৰু আপোনাৰ বিষয়ে চিন্তা কৰে। যিহোৱাৰ এজন বিশ্বাসী সেৱক দায়ূদে তেওঁৰ বিষয়ে বাইবেলত এইদৰে লিখিছে, “তোমাৰ চকুৱে প্ৰথমে উৎপন্ন হোৱা মোৰ আকাৰ দেখিলে।” (গীতমালা ১৩৯:১৬) যিহোৱাৰ বাবে আপোনাৰ জীৱন বহুত মূল্যৱান। (মথি ১০:২৯-৩১ পঢ়ক।) চিন্তা কৰক, যেতিয়া কোনোবাই জানি-শুনি কাৰোবাক হত্যা কৰে বা আত্মহত্যা কৰে,a তেতিয়া যিহোৱাক কিমান দুখ লাগে। (যাত্ৰাপুস্তক ২০:১৩) যেতিয়া কোনোবাই নিজৰ জীৱন বা অৱহেলা কৰি কাৰোবাৰ জীৱন বিপদত পেলায়, তেতিয়াও যিহোৱাক বহুত দুখ লাগে। আমি নিজৰ আৰু আনৰ জীৱনৰ সুৰক্ষাৰ প্ৰতি ধ্যান দি দেখুৱাওঁ যে আমি যিহোৱাই দিয়া মূল্যৱান জীৱনৰ প্ৰতি কৃতজ্ঞ।
গভীৰভাৱে ধ্যান কৰক
আমি জীৱনৰ প্ৰতি কৃতজ্ঞ বুলি কি কি উপায়েৰে দেখুৱাব পাৰোঁ? আহক এই বিষয়ে আলোচনা কৰোঁ।
৩. নিজৰ স্বাস্থ্যৰ প্ৰতি যত্ন লওক
জীৱনৰ সকলো দিশত আমি যিহোৱাক আনন্দিত কৰিব বিচাৰোঁ। সেইবাবে, আমি নিজৰ জীৱন যিহোৱাক সমৰ্পণ কৰিছোঁ। আমি যেন নিজৰ শৰীৰক বলিদান হিচাপে যিহোৱালৈ উৎসৰ্গ কৰিলোঁ। সেইবাবে, আমি নিজৰ শৰীৰৰ যত্ন লোৱা উচিত। ৰোমীয়া ১২:১, ২ পঢ়ক, তাৰ পাছত নিম্নলিখিত প্ৰশ্নবোৰ আলোচনা কৰক:
নিজৰ স্বাস্থ্যৰ প্ৰতি যত্ন লʼবলৈ কি কথাই আপোনাক উৎসাহিত কৰিব পাৰে?
আপুনি কি কি উপায়েৰে এইদৰে কৰিব পাৰে?
৪. সদায় সুৰক্ষাৰ প্ৰতি ধ্যান দিয়ক
বাইবেলে উৎসাহিত কৰিছে যে আমি এনে কামৰপৰা আঁতৰি থাকিব পাৰোঁ, যাৰ বাবে আনে আৰু আমি নিজেই আঘাত পাব পাৰোঁ বা মৃত্যু হʼব পাৰে। আমি কি কি বিষয়ত সুৰক্ষাৰ প্ৰতি ধ্যান দিব পাৰোঁ, এই বিষয়ে জানিবলৈ ভিডিঅʼখন চাওক।
হিতোপদেশ ২২:৩ পঢ়ক, তাৰ পাছত আলোচনা কৰক যে তলত দিয়া পৰিস্থিতিবোৰত আপুনি নিজৰ আৰু আনৰ সুৰক্ষাৰ প্ৰতি কেনেকৈ ধ্যান দিব পাৰে?
ঘৰত থকাৰ সময়ত।
কামৰ ঠাইত।
খেলা-ধূলা কৰাৰ সময়ত।
গাড়ী চলোৱা বা যাত্ৰা কৰাৰ সময়ত।
৫. গৰ্ভত থকা সন্তানৰ জীৱনক মূল্যৱান বুলি ভাবক
দায়ূদে কবিতা আকাৰে কৈছিল যে যিহোৱাই এগৰাকী মাতৃৰ গৰ্ভত থকা সন্তানৰ বিষয়ে সকলো কথা জানে। গীতমালা ১৩৯:১৩-১৭ পঢ়ক, তাৰ পাছত নিম্নলিখিত প্ৰশ্নৰ ওপৰত আলোচনা কৰক:
যিহোৱাৰ দৃষ্টিত জীৱনৰ আৰম্ভণি কেতিয়া হয়, এগৰাকী মাতৃ গৰ্ভৱতী হোৱাৰ সময়ত, নে সন্তান জন্ম হোৱাৰ সময়ত?
প্ৰাচীন সময়ত যিহোৱাই ইস্ৰায়েলীসকলক কিছুমান নিয়ম দিছিল। ইয়াৰ যোগেদি এগৰাকী মাতৃ আৰু তেওঁৰ গৰ্ভত থকা সন্তানৰ সুৰক্ষা হৈছিল। যাত্ৰাপুস্তক ২১:২২, ২৩ পঢ়ক, তাৰ পাছত নিম্নলিখিত প্ৰশ্নবোৰ আলোচনা কৰক:
যেতিয়া কোনোবাই অজানিতে গৰ্ভত থকা সন্তানক হত্যা কৰে, তেতিয়া যিহোৱাক কেনেকুৱা লাগে?
যদি কোনোবাই জানি-শুনি এইদৰে কৰে, তেনেহʼলে যিহোৱাক কেনেকুৱা লাগে?b
যিহোৱাৰ দৃষ্টিভংগীৰ বিষয়ে আপুনি কেনে অনুভৱ কৰে?
যদিও এগৰাকী তিৰোতাই জীৱনক মূল্যৱান বুলি ভাবে, কিন্তু নিজৰ পৰিস্থিতিৰ বাবে হয়তো তাই ভাবিব পাৰে যে গৰ্ভপাত কৰাৰ বাহিৰে আৰু কোনো উপায় নাই। যিচয়া ৪১:১০ পঢ়ক, তাৰ পাছত নিম্নলিখিত প্ৰশ্নবোৰ আলোচনা কৰক:
যদি এগৰাকী তিৰোতাক গৰ্ভপাত কৰিবলৈ কোনোবাই হেঁচা দিয়ে, তেনেহʼলে তাই কাৰপৰা সহায় লোৱা উচিত? তাই এইদৰে কিয় কৰা উচিত?
কিছুমান লোকে কয়: “যদি আপোনাক এই সন্তান নালাগে, তেনেহʼলে গৰ্ভপাত কৰি দিয়া।”
আপোনাৰ কিয় বিশ্বাস হʼল যে যিহোৱাই এগৰাকী মাতৃ আৰু তেওঁৰ গৰ্ভত থকা সন্তানৰ জীৱনক মূল্যৱান বুলি ভাবে?
আমি কি শিকিলোঁ
বাইবেলত কোৱা হৈছে যে যিহোৱাই আমাক জীৱন দিছে। সেইবাবে, আমি নিজৰ জীৱনক প্ৰেম কৰা উচিত, কৃতজ্ঞ হোৱা উচিত আৰু সুৰক্ষা দিয়া উচিত। এইদৰে আমি আনৰ জীৱনৰ বিষয়েও ভবা উচিত।
আপুনি কেনেকৈ উত্তৰ দিব?
যিহোৱাই কিয় মানুহৰ জীৱনক মূল্যৱান বুলি ভাবে?
যেতিয়া কোনোবাই জানি-শুনি আত্মহত্যা কৰে বা আনক হত্যা কৰে, তেতিয়া যিহোৱাক কেনেকুৱা লাগে?
যিহোৱাই আমাক জীৱন দিছে বুলি আপুনি ভাবেনে? আপুনি এইদৰে কিয় ভাবে?
বেছিকৈ জানক
যিহোৱাই আমাক জীৱন দিয়াৰ বাবে আমি তেওঁক কেনেকৈ ধন্যবাদ দিব পাৰোঁ?
গৰ্ভপাত কৰা তিৰোতাগৰাকীক যিহোৱাই ক্ষমা কৰিবনে? ইয়াৰ উত্তৰ জানিবলৈ এই লেখটো পঢ়ক।
“পবিত্ৰ শাস্ত্ৰই গৰ্ভপাতৰ বিষয়ে কি কয়?” (ৱেবছাইটত দিয়া লেখ)
জীৱনৰ বিষয়ে যিহোৱাৰ দৃষ্টিভংগী জানিলে আমি এনে খেল-ধেমালীৰপৰা আঁতৰি থাকিম, যাৰ যোগেদি আমাৰ জীৱন বিপদত পৰিব পাৰে। আহক এই বিষয়ে চাওঁ।
যদি এজন ব্যক্তিৰ মনত আত্মহত্যা কৰাৰ ভাবনা আহে, তেনেহʼলে বাইবেলে কেনেকৈ সহায় কৰিব পাৰে, আহক চাওঁ।
a নিৰাশাত থকা লোকসকলৰ বিষয়ে যিহোৱাই চিন্তা কৰে। (গীতমালা ৩৪:১৮) কেতিয়াবা কেতিয়াবা এজন ব্যক্তিয়ে ইমানেই নিৰাশ হৈ পৰে যে তেওঁ হয়তো ভাবিব পাৰে, ‘মই জীয়াই থকাৰ কোনো লাভ নাই।’ তেওঁৰ এই দুখ যিহোৱাই ভালদৰে বুজি পায় আৰু এনেধৰণৰ নিৰাশাৰপৰা ওলাই আহিবলৈ তেওঁ সহায় কৰিব পাৰে। এই বিষয়ে জানিবলৈ “মই জীয়াই থাকিব নিবিচাৰোঁ—আত্মহত্যা কৰিবলৈ মন গʼলে মই কি কৰিম, বাইবেলত কিবা পৰামৰ্শ আছেনে?” নামৰ লেখটো পঢ়ক। এই পাঠৰ বেছিকৈ জানক ভাগত এই লেখ দিয়া আছে।
b যিসকলে সত্যত অহাৰ আগতে গৰ্ভপাত কৰিছিল, তেওঁলোকৰ বিবেকে হয়তো তেওঁলোকক আঘাত দিব পাৰে। কিন্তু যিহোৱাই তেওঁলোকক ক্ষমা কৰিবলৈ সাজু থাকে। এই বিষয়ে বেছিকৈ জানিবলৈ “পবিত্ৰ শাস্ত্ৰই গৰ্ভপাতৰ বিষয়ে কি কয়?” নামৰ লেখটো পঢ়ক। এই পাঠৰ বেছিকৈ জানক ভাগত এই লেখ দিয়া আছে।